-
Ginsaaran ni Jehova si Daniel sing Isa ka Pinasahi nga PadyaBinagbinaga ang Tagna ni Daniel!
-
-
Kapitulo Disiotso
Ginsaaran ni Jehova si Daniel sing Isa ka Pinasahi nga Padya
1, 2. (a) Anong importante nga kinaiya ang ginakinahanglan sang isa ka manugdalagan agod magmadinalag-on? (b) Paano ginpaanggid ni apostol Pablo ang kabuhi sang matutom nga pag-alagad kay Jehova sa isa ka palumba?
ANG isa ka manugdalagan nagapaspas padulong sa inangan. Daw mahunos na ang iya ginhawa, apang bangod sang iya tulumuron, gin-ubos niya ang iya bug-os nga kusog sa malip-ot na lang nga dalaganon. Paagi sa bug-os kusog nga pagtinguha, natabok niya ang inangan sa katapusan! Masanaaw sa iya nawong ang kaumpawan kag kadalag-an. Nagmadinalag-on ang iya pagbatas.
2 Sa katapusan sang Daniel kapitulo 12, masapwan naton ang hinigugma nga manalagna nga nagahilapit na sa inangan sang iya “palumba”—ang iya kabuhi sang pag-alagad kay Jehova. Sa tapos masambit ang nanuhaytuhay nga mga huwaran sang pagtuo sa tunga sang mga alagad ni Jehova antes sang Cristianong panahon, si apostol Pablo nagsulat: “Busa, nian, sanglit ginalibutan kita sing tama kadaku nga panganod sang mga saksi, isikway man naton ang tagsa ka kabug-atan kag ang sala nga madali nagasalawid sa aton, kag magdalagan kita nga may pagbatas sang dalaganon nga ginabutang sa aton atubangan, samtang nagatulok sing maayo sa Pangulo nga Ahente kag Manughimpit sang aton pagtuo, si Jesus. Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.”—Hebreo 12:1, 2.
3. (a) Ano ang nagpahulag kay Daniel sa ‘pagdalagan nga may pagbatas’? (b) Anong tatlo ka talalupangdon nga butang ang ginsugid sang anghel ni Jehova kay Daniel?
3 Lakip sa sining ‘daku nga panganod sang mga saksi’ amo si Daniel. Dapat gid sia ‘magdalagan nga may pagbatas,’ kag ginpahulag sia nga himuon ini bangod sang iya tudok nga gugma sa Dios. Madamo gid ang ginpahayag ni Jehova kay Daniel nahanungod sa palaabuton sang bug-os kalibutan nga mga panguluhan, apang karon ginpadalhan Niya sia sining personal nga pagpalig-on: “Kag ikaw naman, lakat ka padulong sa katapusan; kag magapahuway ka, apang magatindog ka sa imo madangatan sa katapusan sang mga adlaw.” (Daniel 12:13) Ginasugid sang anghel ni Jehova kay Daniel ining tatlo ka talalupangdon nga butang: (1) nga si Daniel ‘magalakat padulong sa katapusan,’ (2) nga ‘magpahuway’ sia, kag (3) nga “magatindog” sia liwat sa palaabuton nga tion. Paano ining mga pulong makapalig-on sa mga Cristiano karon nga magbatas tubtob sa inangan sang palumba para sa kabuhi?
“LAKAT KA PADULONG SA KATAPUSAN”
4. Ano ang buot silingon sang anghel ni Jehova sa pagsiling nga “lakat ka padulong sa katapusan,” kag ngaa mahimo nga isa ini ka hangkat kay Daniel?
4 Ano ang buot silingon sang anghel sang magsiling sia kay Daniel: “Kag ikaw naman, lakat ka padulong sa Katapusan sang ano? Sanglit halos 100 ka tuig na ang edad ni Daniel, mahimo gid nga nagapatuhoy ini sa katapusan sang iya mismo kabuhi, nga mahimo malapit na matabo.a Ginapalig-on sang anghel si Daniel nga magbatas sing matutom tubtob sa kamatayon. Apang indi ini mahapos himuon. Nasaksihan pa ni Daniel ang pagkapukan sang Babilonia kag ang pagpauli sang nagkalabilin sang Judiyong mga bihag sa Juda kag Jerusalem. Pat-od nga nalipay gid sa sini ang tigulang na nga manalagna. Apang, wala sing rekord nga nag-upod sia sa sadto nga paglakbay. Mahimo nga tigulang na sia katama kag maluya sadto nga tion. Ukon ayhan kabubut-on ni Jehova nga magpabilin sia sa Babilonia. Kon ano man, kinaugali lamang nga magpalibog ang isa kon bala si Daniel nahidlaw man sang maglakat ang iya mga kasimanwa pa Juda.
5. Ano ang nagapakita nga si Daniel nagbatas tubtob sa katapusan?
5 Walay duhaduha nga nakatipon si Daniel sing daku nga kusog bangod sang mainayuhon nga ginsiling sang anghel: “Lakat ka padulong sa katapusan.” Ayhan madumduman naton ang ginsiling ni Jesucristo mga anom ka siglo pagkatapos sini: “Sia nga nakabatas tubtob sa katapusan amo sia ang maluwas.” (Mateo 24:13) Walay duhaduha nga amo sini ang ginhimo ni Daniel. Nagbatas sia tubtob sa katapusan, matutom nga nagdalagan sa palumba para sa kabuhi tubtob sa katapusan sini. Ayhan isa ini ka rason kon ngaa may kahamuot nga ginpatuhuyan sia sang ulihi sa Pulong sang Dios. (Hebreo 11:32, 33) Ano ang nakabulig kay Daniel sa pagbatas tubtob sa katapusan? Ang rekord sang iya kabuhi nagabulig sa aton sa pagsabat sini.
NAGABATAS SUBONG ISA KA ESTUDYANTE SANG PULONG SANG DIOS
6. Paano naton nahibaluan nga si Daniel isa ka maukod nga estudyante sang Pulong sang Dios?
6 Para kay Daniel, ang pagbatas tubtob sa katapusan nagadalahig sang pagpadayon sa pagtuon kag pagpamalandong sing tudok sang makakulunyag nga mga saad sang Dios. Nahibaluan naton nga si Daniel isa ka maukod nga estudyante sang Pulong sang Dios. Kay kon indi, paano niya nahibaluan ang saad ni Jehova kay Jeremias nga ang pagkatapok magadugay sing 70 ka tuig? Si Daniel mismo nagsulat: “Ako . . . nakahantop paagi sa mga tulun-an sang kadamuon sang mga tuig.” (Daniel 9:2; Jeremias 25:11, 12) Walay duhaduha nga ginpangita ni Daniel ang mga tulun-an sang Pulong sang Dios nga matigayon sadto. Ang mga sinulatan nanday Moises, David, Solomon, Isaias, Jeremias, Ezequiel—ang bisan ano nga matigayon niya—pat-od gid nga naghatag kay Daniel sing madamo nga oras sa pagbasa kag pagpamalandong.
7. Kon ipaanggid ang aton tion sa adlaw ni Daniel, ano ang aton mga bentaha sa pagtuon sang Pulong sang Dios?
7 Ang pagtuon sa Pulong sang Dios, nga may pagkawili sa sini, importante gid agod mapalambo naton ang pagbatas karon. (Roma 15:4-6; 1 Timoteo 4:15) Kag yari sa aton ang kompleto nga Biblia, nga nagalakip sang nasulat nga rekord kon paano ang pila sang mga tagna ni Daniel natuman mga siglo sang ulihi. Dugang pa, ginapakamaayo kita nga masaksihan ang “tion sang katapusan,” nga gintagna sa Daniel 12:4. Sa aton adlaw, ginpakamaayo ang mga hinaplas nga makatigayon sing espirituwal nga paghantop, nagasiga subong mga kapawa sang kamatuoran sa sining madulom nga kalibutan. Subong resulta, madamo sang madalom nga tagna sa tulun-an sang Daniel, nga ang pila sini nagpalibog sa iya, ang puno sing kahulugan para sa aton karon. Busa, padayon nga tun-an naton ang Pulong sang Dios adlaw-adlaw, nga wala ginapatumbayaan ining mga butang. Ang paghimo sini magabulig sa aton sa pagbatas.
NAGPADAYON SI DANIEL SA PAGPANGAMUYO
8. Ano nga huwaran ang ginpahamtang ni Daniel tuhoy sa pangamuyo?
8 Ang pangamuyo nakabulig man kay Daniel sa pagbatas tubtob sa katapusan. Nangamuyo sia adlaw-adlaw kay Jehova nga Dios kag tampad nga nakighambal sa iya upod ang tagipusuon nga puno sang pagtuo kag pagsalig. Kilala niya si Jehova subong ang “Manugpamati sang pangamuyo.” (Salmo 65:2; ipaanggid ang Hebreo 11:6.) Sang nagabakho ang tagipusuon ni Daniel bangod sang pagrebelde sang Israel, ginbubo niya ang iya mga balatyagon kay Jehova. (Daniel 9:4-19) Bisan sang nagmando si Dario nga sa sulod sang 30 ka adlaw sa iya lamang mangabay, wala ini pagtugutan ni Daniel nga magpugong sa iya sa pagpangamuyo kay Jehova nga Dios. (Daniel 6:10) Indi bala matandog ang aton tagipusuon samtang ginahanduraw naton yadtong matutom tigulang na nga tawo nga nag-atubang sa isa ka lungib nga puno sang mga leon sa baylo nga sikwayon ang hamili nga pribilehiyo sa pagpangamuyo? Indi maduhaduhaan nga si Daniel matutom nga naglakat padulong sa iya katapusan, nga nagapangamuyo sing hanuot kay Jehova adlaw-adlaw.
9. Ngaa indi gid naton dapat pasapayanan ang pribilehiyo sa pagpangamuyo?
9 Ang pangamuyo isa ka simple lamang nga buhat. Makapangamuyo kita sa halos tanan nga tion, sa bisan diin, sing mabaskog ukon mahipos. Apang, indi gid naton dapat pagpakadiutayon ining hamili nga pribilehiyo. Ginaangot sang Biblia ang pangamuyo sa pagbatas, pagpadayon, kag pagpabilin nga nagamata sa espirituwal. (Lucas 18:1; Roma 12:12; Efeso 6:18; Colosas 4:2) Indi bala talalupangdon nga may yara kita hilway kag bukas nga alagyan sang komunikasyon upod sa pinakamataas nga persona sa uniberso? Kag nagapamati sia! Dumduma ang okasyon sang nangamuyo si Daniel, kag nagpadala si Jehova sing isa ka anghel bilang sabat. Nag-abot ang anghel samtang nagapangamuyo pa si Daniel! (Daniel 9:20, 21) Mahimo nga wala na nagaduaw ang mga anghel sa aton panahon karon, apang si Jehova wala magbag-o. (Malaquias 3:6) Subong nga ginpamatian niya ang pangamuyo ni Daniel, pamatian man niya kita. Kag samtang nagapangamuyo kita, labi pa nga magasuod kita kay Jehova, sa amo makatigayon kita sing kaangtanan sa iya nga magabulig sa aton sa pagbatas tubtob sa katapusan, subong sang ginhimo ni Daniel.
NAGABATAS SUBONG ISA KA MANUNUDLO SANG PULONG SANG DIOS
10. Ngaa importante kay Daniel ang pagtudlo sing kamatuoran sang Pulong sang Dios?
10 Si Daniel dapat ‘maglakat padulong sa katapusan’ sa lain naman nga kahulugan. Dapat sia magbatas subong isa ka manunudlo sang kamatuoran. Wala gid niya ginkalipatan nga isa sia sa pinili nga katawhan nga tuhoy sa ila ang Kasulatan nagsiling: “‘Kamo akon mga saksi,’ siling ni Jehova, ‘ang akon alagad nga ginpili ko.’” (Isaias 43:10) Ginhimo ni Daniel ang tanan nga masarangan niya agod tumanon yadto nga komisyon. Walay duhaduha nga ang iya hilikuton naglakip sang pagtudlo sa iya katawhan nga nabihag sa Babilonia. Halos wala kita sing nahibaluan tuhoy sa mga pagpakig-angot niya sa iya mga masigka-Judiyo luwas sa iya kaangtanan sa tatlo nga ginpatuhuyan subong “iya mga kaupod”—sanday Hananias, Misael, kag Azarias. (Daniel 1:7; 2:13, 17, 18) Pat-od gid nga ang ila suod nga pag-abyanay nakabulig sa tagsatagsa sa ila sa pagbatas. (Hulubaton 17:17) Si Daniel, nga ginpakamaayo ni Jehova sing pinasahi nga paghantop, may madamo nga itudlo sa iya mga abyan. (Daniel 1:17) Apang may pagtudlo pa sia nga himuon.
11. (a) Ano ang tumalagsahon sa hilikuton ni Daniel? (b) Daw ano ka epektibo si Daniel sa pagtuman sang iya dikinaandan nga tulumanon?
11 Labaw kay bisan sin-o nga manalagna, may hilikuton si Daniel nga magpanaksi sa dungganon nga mga Gentil. Bisan pa masami nga dapat sia magdala sing dikalahamut-an nga mga mensahe, wala niya gintamod ining mga manuggahom nga subong bala makangilil-ad sila ukon sa pila ka paagi kubos sa iya. Nakighambal sia sa ila nga may pagtahod kag kalantip. May pila—subong sadtong mahisaon kag mapahituon nga mga satrapa—nga luyag magguba sa pagkatawo ni Daniel. Apang, gintahod sia sang iban nga mga dungganon. Bangod ginbuligan ni Jehova si Daniel sa pagpaathag sang mga tinago nga nagpalibog sa mga hari kag mangin-alamon nga mga tawo, nagbantog ang manalagna. (Daniel 2:47, 48; 5:29) Matuod, samtang nagatigulang sia, indi na sia subong ka aktibo sang pamatan-on pa sia. Apang pat-od nga naglakat sia padulong sa iya katapusan nga matutom gihapon nga nagapangita sing bisan anong paagi nga makaalagad subong isa ka saksi sang iya hinigugma nga Dios.
12. (a) Ano nga pagpanudlo ang ginahimo naton karon subong mga Cristiano? (b) Paano naton masunod ang laygay ni Pablo nga ‘maglakat sa kaalam ayon sa mga tagaguwa’?
12 Sa Cristianong kongregasyon karon, mahimo nga makakita kita sing matutom nga mga kaupod nga magabulig sa aton sa pagbatas, subong sang pagbuligay nanday Daniel kag sang iya tatlo ka kaupod. Nagatudluanay man kita, nga ‘nagabayluhanay sing pagpalig-on.’ (Roma 1:11, 12) Kaangay ni Daniel, may komisyon kita nga magpanaksi sa mga ditumuluo. (Mateo 24:14; 28:19, 20) Busa dapat naton pauswagon ang aton mga kalantip agod nga ‘magamit [naton] sing matadlong ang pulong sang kamatuoran’ sa pagpakighambal sa mga tawo tuhoy kay Jehova. (2 Timoteo 2:15) Kag makabulig ini kon tumanon naton ang laygay ni apostol Pablo: “Padayon kamo sa paglakat sa kaalam ayon sa mga tagaguwa.” (Colosas 4:5) Ini nga kaalam nagalakip sang balanse nga pagtamod sa mga tawo nga wala nagaugyon sa aton pagtuluuhan. Wala naton ginatamay ini nga mga tawo, kag ginatamod ang aton kaugalingon subong superyor. (1 Pedro 3:15) Sa baylo, ginatinguhaan naton nga maganyat sila sa kamatuoran, nga ginagamit ang Pulong sang Dios nga may taktika kag kalantip agod malab-ot ang ila tagipusuon. Kon magmadinalag-on kita sa paglab-ot sa isa ka tawo, nagakalipay gid kita! Ini nga kalipay nagabulig gid sa aton sa pagbatas tubtob sa katapusan, subong sang ginhimo ni Daniel.
“MAGAPAHUWAY KA”
13, 14. Ngaa nahadlok ang madamo nga Babilonianhon sa kamatayon, kag paano tuhay ang pagtamod ni Daniel?
13 Nian ginpasalig sang anghel si Daniel: “Magapahuway ka.” (Daniel 12:13) Ano ang kahulugan sadtong mga pulong? Nahibaluan ni Daniel nga ang kamatayon nagahulat sa iya. Ang kamatayon indi malikawan nga kaulihian para sa tanan nga tawo, kutob sang adlaw ni Adan tubtob sa aton tion. Nagakaigo nga ginatawag sang Biblia ang kamatayon subong isa ka “kaaway.” (1 Corinto 15:26) Apang, para kay Daniel, tuhay ang kahulugan sang kamatayon sangsa kahulugan sini para sa mga Babilonianhon sa palibot niya. Para sa ila, bangod sang masibod nga pagsimba sa mga 4,000 ka butig nga mga diosdios, ang kamatayon puno sing tanan nga sahi sang makahaladlok nga butang. Nagapati sila nga sa tapos sang kamatayon, ang mga nagkabuhi nga dimalipayon ukon napatay sa masingki nga paagi nangin matimaluson nga mga espiritu nga nagapulupakita sa mga buhi. Nagapati man ang mga Babilonianhon sa isa ka makahaladlok nga kalibutan sang mga patay, nga ginapuy-an sang malaw-ay nga mga gadya sa dagway sang mga tawo kag mga sapat.
14 Para kay Daniel, ang kamatayon wala nagakahulugan sing bisan diin man sa sini. Mga ginatos ka tuig antes sang adlaw ni Daniel, gin-inspirar sang Dios si Hari Solomon sa pagsiling: “Nahanungod sa mga patay, wala sila makahibalo sing bisan ano.” (Manugwali 9:5) Kag tuhoy sa isa nga nagakapatay, ang salmista nag-amba: “Ang iya espiritu nagaguwa, nagabalik sia sa iya duta; sa amo nga adlaw nagakawala ang iya mga hunahuna.” (Salmo 146:4) Gani nahibaluan ni Daniel nga magmatuod ang ginsiling sa iya sang anghel. Ang kamatayon nagakahulugan sing pahuway. Wala sing pagpanghunahuna, wala sing mapait nga mga paghinulsol, wala sing pagpaantos—kag sa pagkamatuod wala sing mga gadya. Amo man sini ang ginpabutyag ni Jesus sang mapatay si Lazaro. Sia nagsiling: “Si Lazaro nga aton abyan nagpahuway.”—Juan 11:11.
15. Paano ang adlaw sang kamatayon mangin maayo pa sa adlaw sang pagkatawo?
15 Binagbinaga ang isa pa ka rason kon ngaa wala mahadlok si Daniel sa kamatayon nga mahimo matabo sa iya. Ang Pulong sang Dios nagasiling: “Ang maayo nga ngalan maayo pa sa maayo nga lana, kag ang adlaw sang kamatayon sangsa adlaw sang pagkatawo sang isa.” (Manugwali 7:1) Paano ang adlaw sang kamatayon, nga isa matuod ka masubo nga tion, mangin maayo pa sa makalilipay nga adlaw sang pagkatawo? Ang sekreto yara sa “ngalan.” Ang “maayo nga lana” mahimo nga mahal kaayo. Ginhaplasan isa ka bes ni Maria nga utod ni Lazaro ang mga tiil ni Jesus sing mahumot nga lana nga nagabili sing halos isa ka tuig nga sweldo! (Juan 12:1-7) Paano ang isa ka ngalan lamang mangin tuman ka bilidhon? Sa Manugwali 7:1, ang Griegong Septuagint nagasiling, “isa ka maayo nga ngalan.” Indi ang ngalan lamang kundi kon ano ang ginarepresentar sini ang tuman ka hamili. Sa adlaw sang iya pagkatawo, wala sing reputasyon, wala sing rekord sang maayong mga binuhatan, kag wala sing bilidhon nga handumanan ang personalidad kag mga kinaiya sang ngalan sang isa ka tawo. Apang sa adlaw sang kamatayon, ang ngalan nagakahulugan sini tanan. Kag kon ini isa ka maayo nga ngalan gikan sa pagtamod sang Dios, labi ini ka bilidhon sangsa bisan anong materyal nga mga pagkabutang.
16. (a) Paano si Daniel nagtinguha sa paghimo sing maayo nga ngalan sa Dios? (b) Ngaa makapahuway si Daniel nga may bug-os nga pagsalig nga nagmadinalag-on sia sa paghimo sing maayo nga ngalan kay Jehova?
16 Sa iya bug-os nga kabuhi, ginhimo ni Daniel ang tanan nga masarangan niya agod makahimo sing maayo nga ngalan sa Dios, kag wala sing bisan isa sini nga nalipatan si Jehova. Ginbantayan niya si Daniel kag gin-usisa ang iya tagipusuon. Amo man ang ginhimo sang Dios kay Hari David, nga nag-amba: “O Jehova, gin-usisa mo ako, kag nakilala ako. Nakilala mo ang akon paglingkod kag ang akon pagtindog. Ginbinagbinag mo ang akon panghunahuna gikan sa malayo.” (Salmo 139:1, 2) Matuod, si Daniel indi himpit. Kaliwat sia sang makasasala nga si Adan kag katapo sang isa ka makasasala nga pungsod. (Roma 3:23) Apang naghinulsol si Daniel sa iya pagkamakasasala kag nagpadayon sa pagtinguha nga maglakat upod sa Dios sa matadlong nga paagi. Busa makasalig ang matutom nga manalagna nga patawaron ni Jehova ang iya mga sala kag indi gid maghinakit sa iya. (Salmo 103:10-14; Isaias 1:18) Luyag ni Jehova dumdumon ang maayong mga binuhatan sang iya matutom nga mga alagad. (Hebreo 6:10) Sa amo, makaduha gintawag sang anghel ni Jehova si Daniel nga isa ka “nahamut-an sing daku nga lalaki.” (Daniel 10:11, 19) Nagakahulugan ini nga si Daniel ginahigugma sang Dios. Mahimo na si Daniel makapahuway nga may kaayawan, kay nahibaluan niya nga nakahimo sia sing maayo nga ngalan kay Jehova.
17. Ngaa hilingagawon nga maghimo kita sing maayo nga ngalan kay Jehova karon?
17 Ang tagsatagsa sa aton mahimo mamangkot, ‘Nakahimo bala ako sing maayo nga ngalan kay Jehova?’ Nagakabuhi kita sa magamo nga mga tion. Indi makapahilas kundi realistiko lamang nga kilalahon nga ang kamatayon mahimo mag-abot sa bisan sin-o sa aton sa bisan ano nga oras. (Manugwali 9:11) Gani, daw ano ka importante nga mamat-od ang tagsatagsa sa aton sa paghimo sing maayo nga ngalan sa Dios karon mismo, nga walay pagpalantang. Kon himuon naton ini, indi kita dapat mahadlok sa kamatayon. Isa lamang ini ka pagpahuway—kaangay sang pagtulog. Kag kaangay sang pagtulog, sundan ini sang pagbugtaw!
“MAGATINDOG KA”
18, 19. (a) Ano ang buot silingon sang anghel sang gintagna niya nga si Daniel “magatindog” sa palaabuton? (b) Ngaa mahimo gid nga nahibaluan ni Daniel ang pagkabanhaw nga paglaum?
18 Ang tulun-an sang Daniel nagatakop paagi sa isa sang labing matahom nga mga saad nga ginhatag sang Dios sa isa ka tawo. Ang anghel ni Jehova nagsiling kay Daniel: “Magatindog ka sa imo madangatan sa katapusan sang mga adlaw.” Ano ang buot silingon sang anghel? Sanglit ang ‘pagpahuway’ nga bag-o lang niya ginpatuhuyan amo ang kamatayon, isa lamang ang mahimo mangin kahulugan sang saad nga si Daniel “magatindog” sa pila ka tion sa ulihi—amo ang pagkabanhaw!b Sa katunayan, ang iban nga mga iskolar nagasiling nga ang Daniel kapitulo 12 nagaunod sing una nga maathag nga pagpatuhoy sa pagkabanhaw nga masapwan sa Hebreong Kasulatan. (Daniel 12:2) Apang, sayop sila sa sini. Nahibaluan gid ni Daniel ang paglaum nga pagkabanhaw.
19 Halimbawa, walay duhaduha nga nahibaluan ni Daniel ining mga pulong nga ginrekord ni Isaias duha ka siglo sang una pa: “Ang imo mga patay magakabuhi. Ang akon bangkay—sila magabangon. Magmata kag mag-amba sing malipayon, kamo nga nagapuyo sa yab-ok! Kay . . . ang mga wala sing gahom sa kamatayon iluad sang duta sa pagkabun-ag.” (Isaias 26:19) Madugay na antes pa sina, ginhatagan ni Jehova sing gahom sanday Elias kag Eliseo sa paghimo sing aktuwal nga mga pagbanhaw. (1 Hari 17:17-24; 2 Hari 4:32-37) Bisan antes pa gani sini, si Ana, nga iloy ni manalagna Samuel, nagkilala nga si Jehova may ikasarang sa pagbanhaw sa mga tawo gikan sa Sheol, ang lulubngan. (1 Samuel 2:6) Antes pa gid sini, ginpabutyag sang matutom nga si Job ang iya mismo paglaum paagi sa sining mga pulong: “Kon ang mapagros nga tawo mapatay, mabuhi pa bala sia? Sa tanan nga mga adlaw sang akon obligado nga pag-alagad magahulat ako, tubtob nga magaabot ang akon kaumpawan. Magapanawag ka, kag ako magasabat sa imo. Kay sa binuhatan sang imo mga kamot magahandum ka.”—Job 14:14, 15.
20, 21. (a) Pat-od nga mangin bahin si Daniel sang ano nga pagkabanhaw? (b) Sa anong paagi ang pagkabanhaw sa Paraiso mahimo gid matabo?
20 Kaangay ni Job, may rason si Daniel sa pagsalig nga si Jehova nalangkag gid nga banhawon sia sa pila ka adlaw sa palaabuton. Sa gihapon, pat-od nga makapalugpay gid nga mabatian ang isa ka gamhanan nga espiritu nga tinuga nga nagapalig-on sina nga paglaum. Huo, si Daniel magatindog sa “pagkabanhaw sang mga matarong,” nga mahanabo sa tion sang Isa ka Libo ka Tuig nga Paghari ni Cristo. (Lucas 14:14) Ano ang kaangay sina para kay Daniel? Daku ang ginasugid sa aton sang Pulong sang Dios tuhoy sa sini.
21 Si Jehova “isa ka Dios, indi sang kagamo, kundi sang paghidait.” (1 Corinto 14:33) Gani, maathag nga ang pagkabanhaw sa Paraiso mangin mahim-ong. Ayhan magaligad ang pila ka tion pagkatapos sang Armagedon. (Bugna 16:14, 16) Ang tanan nga ebidensia sang daan nga sistema sang mga butang madula na, kag walay duhaduha nga mahimo na ang mga paghanda para sa pag-abiabi sa mga patay. Tuhoy sa kahimusan sang pagbalik sang mga patay, ginatanyag sang Biblia ini nga sulundan: “Ang kada isa sa iya kaugalingon nga paagisod.” (1 Corinto 15:23) Mahimo nga kon tuhoy sa “pagkabanhaw sang mga matarong kag mga dimatarong,” unahon ang mga matarong. (Binuhatan 24:15) Kon amo sina, ang matutom nga mga tawo sang una, kaangay ni Daniel, makabulig sa pagdumala sa mga hilikuton sa duta, lakip ang pagtudlo sa binilyon ka “dimatarong” nga banhawon.—Salmo 45:16.
22. Ano ang pila ka pamangkot nga walay duhaduha luyag gid ni Daniel nga masabat?
22 Antes si Daniel mangin handa sa pag-uyat sini nga mga salabton, pat-od nga may mga ipamangkot sia. Kay tuhoy gani sa pila sang madalom nga mga tagna nga gintugyan sa iya, sia nagsiling: “Ako nakabati, apang wala ako makahangop.” (Daniel 12:8) Pat-od nga makunyag gid sia nga mahangpan sa katapusan ining mga tanhaga gikan sa Dios! Walay duhaduha nga luyag niya mabatian ang tanan tuhoy sa Mesias. Matun-an ni Daniel nga may pagkawili ang tuhoy sa pagpaagisod sang mga kagamhanan sa kalibutan kutob sang iya adlaw tubtob sa aton karon, tuhoy sa identidad sang matutom nga “mga balaan sang Isa nga Supremo”—nga nagpadayon walay sapayan sang paghingabot sa “tion sang katapusan”—kag tuhoy sa katapusan nga kalaglagan sang tanan nga ginharian sang tawo paagi sa Mesianiko nga Ginharian sang Dios.—Daniel 2:44; 7:22; 12:4.
ANG MADANGATAN NI DANIEL SA PARAISO—KAG ANG IMO MADANGATAN!
23, 24. (a) Paano ang kalibutan nga bugtawan ni Daniel sa iya pagkabanhaw tuhay sa isa nga iya nakilala anay? (b) Makatigayon bala si Daniel sing duog sa Paraiso, kag paano naton nahibaluan?
23 Handumon ni Daniel nga mahibaluan ang kalibutan nga iya bugtawan sa amo nga tion—isa ka kalibutan nga tuhay gid sa kalibutan sang iya adlaw. Wala sing mabilin nga ebidensia sang mga inaway kag pagpigos nga nagpalaw-ay sang kalibutan nga nakilala niya anay. Wala na sing kasubo, wala sing balatian, wala sing kamatayon. (Isaias 25:8; 33:24) Apang magabugana ang pagkaon, pamalay, kag makaalayaw nga trabaho para sa tanan. (Salmo 72:16; Isaias 65:21, 22) Ang katawhan mangin isa ka nahiusa, malipayon nga pamilya.
24 Pat-od nga si Daniel may duog sa amo nga kalibutan. “Magatindog ka sa imo madangatan,” siling sang anghel sa iya. Ang Hebreong tinaga nga ginbadbad diri nga “lot” sa Ingles [“madangatan” sa Hiligaynon] amo man ang gingamit para sa literal nga mga lote sang duta.c Mahimo nga nahibaluan ni Daniel ang tagna ni Ezequiel tuhoy sa pagbahinbahin sa ginpasag-uli nga duta sang Israel. (Ezequiel 47:13–48:35) Sa katumanan sini sa Paraiso, ano ang ginapahangop sang tagna ni Ezequiel? Nga ang tanan nga katawhan sang Dios makatigayon sing duog sa Paraiso, kay ang duta mismo bahinbahinon sa mahim-ong kag makatarunganon nga paagi. Sa pagkamatuod, tuhoy sa madangatan ni Daniel sa Paraiso, indi lamang isa ka lote sang duta ang matigayon niya. Magalakip ini sang iya papel sa katuyuan sang Dios didto. Ang ginsaad nga padya ni Daniel ginagarantiyahan.
25. (a) Ano ang pila ka malauman sa kabuhi sa Paraiso nga nagaganyat sa imo? (b) Ngaa sarang masiling nga ang mga tawo nagakadapat sa Paraiso?
25 Apang, kamusta naman ang imo madangatan? Amo man nga mga saad ang maaplikar sa imo. Luyag ni Jehova nga ang matinumanon nga mga tawo “magatindog” para sa ila madangatan, nga makatigayon sing duog sa Paraiso. Hunahunaa lamang! Sa pagkamatuod, mangin makakulunyag nga makita gid si Daniel sa personal, upod sa iban pa nga matutom nga mga lalaki kag mga babayi sang panahon sang Biblia. Nian yara pa ang dimaisip nga iban nga magabalik gikan sa minatay, nga dapat tudluan agod makilala nila kag higugmaon si Jehova nga Dios. Handurawa ang imo kaugalingon nga nagaatipan sang aton dutan-on nga puluy-an kag nagabulig sa paghimo sini nga mangin isa ka paraiso nga may daku nga pagkananuhaytuhay kag wala nagalubad nga katahom. Hunahunaa nga ginatudluan ikaw ni Jehova, kag nagatuon sa pagkabuhi suno sa gintuyo niya nga pagkabuhi para sa katawhan. (Isaias 11:9; Juan 6:45) Huo, may duog para sa imo sa Paraiso. Bisan pa daw matingala ang pila ka tawo karon tuhoy sa Paraiso, dumduma nga sa ginsuguran gintuyo ni Jehova nga ang katawhan magkabuhi sa sina nga duog. (Genesis 2:7-9) Sa sina nga kahulugan, ang Paraiso amo ang kinaugali nga puluy-an sang binilyon nga pumuluyo sang duta. Diri sila nagakadapat. Ang pagsulod sa sini daw mangin subong sang pagpauli.
26. Paano ginakilala ni Jehova nga ang paghulat sa katapusan sining sistema indi mahapos para sa aton?
26 Nagaudyak ang aton tagipusuon sa pag-apresyar kon hunahunaon naton ini tanan, indi bala? Wala ka bala nagahandum nga makapuyo didto? Indi katingalahan, nian, nga nalangkag ang mga Saksi ni Jehova nga mahibaluan kon san-o matapos ining sistema sang mga butang! Indi mahapos ang maghulat. Nagaugyon sa sini si Jehova, kay ginapalig-on niya kita nga ‘padayon nga paabuton’ ang katapusan “bisan pa magpalantang ini.” Buot niya silingon nga gikan sa aton pagtamod mahimo nga daw nagapalantang ini, kay sa amo gihapon nga kasulatan, ginapasalig niya kita: “Indi ini magpalantang.” (Habacuc 2:3; ipaanggid ang Hulubaton 13:12.) Huo, ang katapusan magaabot sa gintalana nga tion.
27. Ano ang dapat mo himuon agod makatindog sa atubangan sang Dios tubtob sa walay katubtuban?
27 Ano ang dapat mo himuon samtang nagahilapit ang katapusan? Kaangay ni Daniel nga hinigugma nga manalagna ni Jehova, magbatas sing matutom. Tun-i sing maukod ang Pulong sang Dios. Mangamuyo sing hanuot. Mahigugmaon nga makig-upod sa mga masigkatumuluo. Makugi nga itudlo ang kamatuoran sa iban. Samtang labi pa nga nagahilapit ang katapusan sining malaut nga sistema sang mga butang sa pagligad sang kada adlaw, magpabilin nga determinado nga mangin isa ka mainunungon nga alagad sang Labing Mataas kag isa ka matutom nga sumalakdag sang iya Pulong. Sa pagkamatuod, binagbinaga ang tagna ni Daniel! Kag kabay nga ihatag sa imo sang Soberano nga Ginuong Jehova ang pribilehiyo nga magtindog sing malipayon sa atubangan niya tubtob sa walay katubtuban!
[Mga footnote]
a Si Daniel gindala nga bihag sa Babilonia sang 617 B.C.E., mahimo nga subong isa ka tin-edyer. Nabaton niya ining palanan-awon sang ikatlo nga tuig ni Ciro, ukon sang 536 B.C.E.—Daniel 10:1.
b Suno sa The Brown-Driver-Briggs Hebrew and English Lexicon, ang Hebreong tinaga para sa ‘pagtindog’ nga gingamit diri nagapatuhoy sa “pagpasag-uli sa kabuhi sa tapos sang kamatayon.”
c Ang Hebreo nga tinaga may yara kaangtanan sa tinaga para sa “dakaldakal,” kay magagmay nga mga bato ang gingamit sa pagpapalad. Ang duta ginbahinbahin kon kaisa sa sining paagi. (Numeros 26:55, 56) Ang A Handbook on the Book of Daniel nagasiling nga ang tinaga diri nagakahulugan sing “ina nga ginpain (sang Dios) para sa isa ka tawo.”
-
-
Ginsaaran ni Jehova si Daniel sing Isa ka Pinasahi nga PadyaBinagbinaga ang Tagna ni Daniel!
-
-
[Bug-os pahina nga retrato sa pahina 307]
[Retrato sa pahina 318]
Kaangay ni Daniel, ginabinagbinag mo bala ang matagnaon nga pulong sang Dios?
-