Ang Matagnaon nga mga Adlaw ni Daniel kag ang Aton Pagtuo

“Malipayon ang nagahulat kag nagaabot sa isa ka libo kag tatlo ka gatos kag katluan kag lima ka adlaw!”​—⁠DANIEL 12:⁠12.

 1. Ngaa madamo ang napaslawan sa pagpangita sing matuod nga kalipay, kag sa ano naangot ang matuod nga kalipay?

ANG tanan luyag magmalipayon. Apang, pila lamang karon ang malipayon. Ngaa? Sa bahin bangod ang kalabanan nagapangita sing kalipay sa sayop nga mga duog. Ang kalipay ginapangita sa mga butang subong sang edukasyon, manggad, karera, ukon pagtigayon sing gahom. Apang, gin-angot ni Jesus, sa pamuno sang iya Wali sa Bukid, ang kalipay sa pagkamahunahunaon sang isa sa iya espirituwal nga kinahanglanon, kaluoy, putli nga tagipusuon, kag kaanggid nga mga kinaiya. (Mateo 5:​3-10) Ang sahi sang kalipay nga ginhambal ni Jesus matuod kag dayon.

 2. Suno sa tagna, ano ang magadul-ong sa kalipay sa tion sang katapusan, kag ano nga mga pamangkot ang nagautwas tuhoy sa sini?

² Para sa hinaplas nga nagkalabilin sa tion sang katapusan, ang kalipay ginaangot sa dugang pa nga butang. Sa tulun-an sang Daniel, aton mabasa: “Lakat ka, Daniel, kay ang mga pulong natakpan kag napat-inan tubtob sa tion sang katapusan. Malipayon ang nagahulat kag nagaabot sa isa ka libo kag tatlo ka gatos kag katluan kag lima ka adlaw!” (Daniel 12:​9, 12) Ano nga hut-ong sang panahon ang ginakobrehan sining 1,335 ka adlaw? Ngaa malipayon ang mga nagkabuhi sa sini nga panahon? May kaangtanan bala ini sa aton pagtuo karon? Ginabuligan kita sa pagsabat sining mga pamangkot kon balikan naton ang tion sang ginsulat ni Daniel ining mga pulong, wala madugay sa tapos mahilway ang Israel gikan sa pagkaulipon sa Babilonia kag sa ikatlo nga tuig ni Ciro nga hari sang Persia.​—⁠Daniel 10:⁠1.

Ang Pagpasag-uli Nagadala sing Kalipay

 3. Ano nga buhat ni Hari Ciro ang nagdala sing daku nga kalipay sa matutom nga mga Judiyo sang 537 B.C.E., apang ano nga pribilehiyo ang wala ginhatag ni Ciro sa mga Judiyo?

³ Para sa mga Judiyo, ang kahilwayan gikan sa Babilonia isa ka okasyon sang matuod nga paghugyaw. Sa tapos sang halos 70 ka tuig nga pagbatas sang mga Judiyo subong mga tinapok, gin-agda sila ni Ciro nga Daku nga magbalik sa Jerusalem agod patindugon liwat ang templo ni Jehova. (Esdras 1:​1, 2) Ang mga nagsugot naglakat nga may daku nga mga paglaum, kag nag-abot sila sa ila dutang natawhan sang 537 B.C.E. Apang, wala sila pag-agdaha ni Ciro nga ipasag-uli ang ginharian sa idalom sang isa ka kaliwat ni Hari David.

 4, 5. (a) San-o ginpukan ang Davidiko nga pagkahari? Ngaa? (b) Ano nga pasalig ang ginhatag ni Jehova nga ang Davidiko nga pagkahari ipasag-uli?

⁴ Talalupangdon yadto. Mga lima ka siglo antes sini, nanaad si Jehova kay David: “Ang imo panimalay kag ang imo ginharian papag-unon tubtob san-o sa atubang mo; ang imo trono papag-unon tubtob sa tion nga walay latid.” (2 Samuel 7:16) Sing dimakalilipay, ang kalabanan sang harianon nga mga kaliwat ni David nagrebelde, kag ang sala sa dugo sang pungsod nangin tuman ka daku amo kon ngaa sang 607 B.C.E., gintugutan ni Jehova ang Davidiko nga pagkahari nga mapukan. Luwas sa malip-ot nga panahon sa idalom sang mga Macabenhon, ang Jerusalem gingamhan sang iban nga pungsod sugod sadto tubtob sang ikaduha nga kalaglagan sini sang 70 C.E. Sa amo, sang 537 B.C.E., “ang gintangdo nga panag-on sang mga pungsod,” nga sa amo nga tion wala sing anak ni David ang magahari, nagsugod.​—⁠Lucas 21:⁠24.

⁵ Walay sapayan, wala ginkalimtan ni Jehova ang iya saad kay David. Paagi sa paagisod nga mga palanan-awon kag mga damgo, ginpahayag niya paagi sa iya manalagna nga si Daniel ang mga detalye sang palaabuton nga mga hitabo sa kalibutan nga magalawig sing mga siglo kutob sa tion sang paggahom sa kalibutan sang Babilonia tubtob sa tion nga ang isa ka hari sa linya ni David magahari liwat sa isa ka ginharian sang katawhan ni Jehova. Ining mga tagna, nga narekord sa Daniel kapitulo 2, 7, 8, kag 10-12, nagpasalig sa matutom nga mga Judiyo nga, sa ulihi, ang trono ni David matuod gid nga “papag-unon tubtob sa tion nga walay latid.” Sa pagkamatuod, yadtong ginpahayag nga kamatuoran nagdala sing kalipay sa mga Judiyo nga nagbalik sa ila dutang natawhan sang 537 B.C.E.!

 6. Paano naton nahibaluan nga ang iban sang mga tagna ni Daniel matuman sa aton tion?

⁶ Ang kalabanan nga komentarista sa Biblia nagasiling nga ang halos kabug-usan sang mga tagna ni Daniel natuman antes sang pagkatawo ni Jesucristo. Apang maathag nga indi ini matuod. Sa Daniel 12:​4, ginsugiran sang isa ka anghel si Daniel: “Ilikom ang mga pulong kag pat-ini ang tulun-an, tubtob gid sa tion sang katapusan. Madamo ang magadalagan pakadto-pakari, kag magabugana ang matuod nga ihibalo.” Kon ang pat-in sa tulun-an ni Daniel hukson​—⁠ipahayag sing bug-os ang kahulugan sini​—⁠sa tion lamang sang katapusan, sa pagkamatuod sa dimagkubos ang iban nga mga tagna sini dapat nga naaplikar sa sina nga panag-on.​—⁠Tan-awa ang Daniel 2:28; 8:17; 10:⁠14.

 7. (a) San-o natapos ang gintangdo nga panag-on sang mga pungsod, kag anong hilingagawon nga pamangkot ang dapat sabton? (b) Sin-o ang indi “matutom kag mainandamon nga ulipon”?

⁷ Sang 1914 ang gintangdo nga panag-on sang mga pungsod natapos, kag ang panahon sang katapusan sining kalibutan nagsugod. Ang Davidiko nga Ginharian ginpasag-uli, indi sa dutan-on nga Jerusalem, kundi sing dikitaon sa “mga panganod sang langit.” (Daniel 7:​13, 14) Sadto nga tion, bangod ang “mga gamhon” sang huwad nga Cristianismo nagadamo, ang kahimtangan sang matuod nga Cristianismo indi maathag​—⁠sa dimagkubos sa mga mata sang tawo. Walay sapayan, isa ka importante nga pamangkot ang dapat sabton: “Sin-o gid ang matutom kag mainandamon nga ulipon?” (Mateo 13:​24-30; 24:45) Sin-o ang magarepresentar sa duta sa ginpasag-uli nga Davidiko nga Ginharian? Indi ang undanon nga kauturan ni Daniel, ang mga Judiyo. Ginsikway sila bangod kulang sila sing pagtuo kag nasandad sila sa Mesias. (Roma 9:​31-33) Indi gid masapwan ang matutom nga ulipon sa tunga sang mga organisasyon sang Cristiandad! Ang ila malaut nga mga buhat nagpamatuod nga indi sila kilala ni Jesus. (Mateo 7:​21-23) Kon amo, sin-o ini?

 8. Sin-o ang nagpamatuod nga amo “ang matutom kag mainandamon nga ulipon” sa tion sang katapusan? Paano naton nahibaluan?

⁸ Sing indi gid maduhaduhaan, amo sila ang diutay nga hubon sang hinaplas nga kauturan ni Jesus nga kilala sang 1914 subong mga Bible Student apang sang 1931 gintawag nga mga Saksi ni Jehova. (Isaias 43:10) Sila lamang ang nagbantala sang ginpasag-uli nga Ginharian sa linya ni David. (Mateo 24:14) Sila lamang ang nagpabilin nga napain gikan sa kalibutan kag nagpakadaku sa ngalan ni Jehova. (Juan 17:​6, 14) Kag sa ila lamang natuman ang mga tagna sang Biblia tuhoy sa katawhan sang Dios sa katapusan nga mga adlaw. Lakip sa sining mga tagna amo ang mga serye sang matagnaon nga mga panahon nga nalista sa Daniel kapitulo 12 nga nagalakip sa 1,335 ka adlaw nga magadala sing kalipay.

Ang 1,260 ka Adlaw

 9, 10. Ano nga mga hitabo ang nagtanda sang “tion, kag mga tion kag katunga sang isa ka tion” sang Daniel 7:​25, kag sa ano pa nga kasulatan ginasambit ang kaanggid nga hut-ong sang tion?

⁹ Sa Daniel 12:​7, mabasa naton ang una nga matagnaon nga panahon: “Ini mangin sa isa ka tion, sa mga tion, kag sa katunga sang isa ka tion. Kag sa tion nga matapos ang pagdugmok sa gahom sang balaan nga katawhan, ini tanan nga butang matapos.”⁠a Amo man ini nga tion ang ginasambit sa Bugna 11:​3-6, nga nagasiling nga ang mga saksi sang Dios magabantala nga nagapanapot sing sako sa tatlo ka tuig kag tunga kag dayon pagapatyon. Sa liwat, sa Daniel 7:​25, aton mabasa: “Magapamulong pa gani sia sing mga pulong batok sa Labing Mataas, kag tublagon niya sing padayon ang mga balaan sang Supremo nga Isa. Kag magahunahuna sia sa pagbag-o sang mga tion kag sang kasuguan, kag itugyan sila sa iya kamot tubtob sa isa ka tion, kag mga tion, kag sa katunga sang isa ka tion.”

¹⁰ Sa sining naulihi nga tagna, ang “sia” amo ang ikalima nga kagamhanan sa kalibutan kon isipon halin sa Babilonia. Amo ini ang “sungay, nga diutay,” nga sa tion sang paggahom sini ang Anak sang tawo nagabaton sing “paggahom kag himaya kag ginharian.” (Daniel 7:​8, 14) Ining simbuliko nga sungay, nga sang primero amo ang imperyal nga Britanya, sadtong sang nahaunang inaway sa kalibutan nangin Anglo-Amerikano nga magkaupod nga kagamhanan sa kalibutan, nga karon ginapangibabawan sang Estados Unidos. Sa sulod sang tatlo kag tunga nga tion, ukon mga tuig, ining kagamhanan magatublag sa mga balaan kag magatinguha sa pagbag-o sang mga tion kag kasuguan. Sa ulihi, ang mga balaan itugyan sa iya kamot.​—⁠Tan-awa man ang Bugna 13:​5, 7.

 11, 12. Ano nga mga hitabo ang nagdul-ong sa pagsugod sang 1,260 ka matagnaon nga adlaw?

¹¹ Paano natuman ining magkaanggid nga mga tagna? Sa sulod sang mga tinuig antes sang Inaway Kalibutanon I, ang hinaplas nga kauturan ni Jesus dayag nga nagpaandam nga ang 1914 makasaksi sang katapusan sang gintangdo nga panag-on sang mga pungsod. Sang magdabdab ang inaway, nangin maathag nga ang paandam wala ginsapak. Gingamit ni Satanas ang iya “sapat nga mapintas,” ang bug-os kalibutan nga politikanhon nga organisasyon nga sadto ginapangibabawan sang Britaniko nga Emperyo, sa panikasog nga ‘bag-uhon ang mga tion kag ang kasuguan,’ agod paisulon ang tion sang paggahom sang Ginharian sang Dios. (Bugna 13:​1, 2) Napaslawan sia. Ang Ginharian sang Dios gintukod sa langit, nga indi gid malab-ot sang tawo.​—⁠Bugna 12:​1-3.

¹² Para sa mga Bible Student, ang inaway nagkahulugan sing tion sang pagtilaw. Sugod sang Enero 1914, ginpasalida nila ang Photo-Drama of Creation, isa ka Biblikanhon nga presentasyon nga nagpatalupangod sang mga tagna ni Daniel. Sang tig-ilinit sadto nga tuig sa Nakatundan nga Hemisperio, nagdabdab ang inaway. Sang Oktubre, ang gintangdo nga panag-on natapos. Sang katapusan sadto nga tuig, ang hinaplas nga nagkalabilin nagpaabot sing paghingabot, subong makita sa katunayan nga ang tuigan nga teksto nga napilian para sa 1915 amo ang pamangkot ni Jesus sa iya mga disipulo, “Sarang bala kamo makainom sa tagayan nga akon imnan?” pasad sa Mateo 20:​22, King James Version.

 13. Paano ang mga Bible Student nagbantala nga nagapanapot sing sako sa tion sang 1,260 ka adlaw, kag ano ang natabo sa katapusan sina nga panahon?

¹³ Busa, sugod sang Disiembre 1914, ining diutay nga hubon sang mga saksi ‘nagbantala nga nagapanapot sing sako,’ mapainubuson nga nagabatas samtang ginapahibalo nila ang mga paghukom ni Jehova. Ang nagpakibot sa madamo amo ang pagkapatay, sang 1916, ni C. T. Russell, una nga presidente sang Watch Tower Bible and Tract Society. Samtang nagalapnag ang inaway, nagbaskog ang paghingabot sa mga Saksi. Ang iban ginbilanggo. Ang mga indibiduwal, subong ni ­Frank ­Platt sa Inglaterra kag ni Rob­ert ­Clegg sa Canada, ginpaantos sang mapintas nga mga awtoridad. Sang ulihi, sang Hunyo 21, 1918, si J. F. Rutherford, ang bag-o nga presidente, upod sa mga direktor sang Watch Tower Bible and Tract Society, ginpamatbatan bangod sang butig nga mga panumbungon sing malawig nga pagkabilanggo. Sa amo, sa katapusan sang matagnaon nga panahon, ginpatay sang “diutay nga sungay” ang organisado nga pagbantala sa publiko.​—⁠Daniel 7:​8, King James Version.

 14. Paano nagbag-o ang mga kahimtangan para sa hinaplas nga nagkalabilin sang 1919 kag pagkatapos sini?

¹⁴ Ginatagna sang tulun-an sang Bugna ang masunod nga natabo. Sa tapos sang malip-ot nga tion sang indi pagpanghikot​—⁠gintagna subong tatlo ka adlaw kag tunga nga paghamyang nga patay sa dalan​—⁠ang hinaplas nga nagkalabilin nabuhi kag nangin aktibo liwat. (Bugna 11:​11-13) Sang Marso 26, 1919, ang presidente kag mga direktor sang Watch Tower Bible and Tract Society ginpaguwa sa bilangguan, kag sang ulihi napamatud-an nga wala sing sala sa butig nga mga panumbungon batok sa ila. Pagkaguwa gid nila, ang hinaplas nga nagkalabilin nag-organisar liwat para sa dugang pa nga hilikuton. Busa, sa katumanan sang una nga kailo sang Bugna, nagguwa sila gikan sa kadadalman sang indi pagpanghikot kaangay sang espirituwal nga mga apan nga ginaupdan sang madamol nga aso, nga nagapatimaan sing madulom nga palaabuton para sa butig nga relihion. (Bugna 9:​1-11) Sang masunod nga pila ka tuig, ginpabaskog sila sa espirituwal kag naghanda para sa palaabuton. Sang 1921 nagbalhag sila sing isa ka bag-o nga libro, ang The Harp of God, nga gindesinyo agod buligan ang mga bag-uhan kag kabataan sa pagtuon sang sadsaran nga mga kamatuoran sang Biblia. (Bugna 12:​6, 14) Natabo ini tanan nga butang sa tion sang isa pa ka importante nga panahon.

Ang 1,290 ka Adlaw

 15. Paano naton makalkular ang pamuno sang 1,290 ka adlaw? San-o natapos ining panahon?

¹⁵ Ang anghel nagsiling kay Daniel: “Kutob sa tion nga kuhaon ang dalayon nga bahin [“ang dalayon nga halad,” foot­note] kag patindugon ang kangil-aran nga nagatuga sing kahapayan, mangin isa ka libo kag duha ka gatos kag kasiaman ka adlaw.” (Daniel 12:11) Sa idalom sang Kasuguan Mosaiko, “ang dalayon nga halad” ginasunog sa halaran sang templo sa Jerusalem. Ang mga Cristiano wala nagahalad sing mga halad nga sinunog, apang nagahalad sila sing dalayon nga espirituwal nga halad. Ginpatuhuyan ini ni Pablo sang magsiling sia: “Maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.” (Hebreo 13:15; ipaanggid ang Oseas 14:⁠2.) Ining dalayon nga halad ginkuha sang Hunyo 1918. Ano, nian, ang “kangil-aran”​—⁠ang ikaduha nga bahin nga pangitaon? Amo ini ang Liga de Nasyones, nga ginsakdag sang nagdaug nga mga kagamhanan sang matapos ang Inaway Kalibutanon I.⁠b Makangilil-ad ini bangod gintal-us ini sang mga lider sang Cristiandad sa Ginharian sang Dios, ginalaragway ang Liga subong amo ang lamang nga paglaum sang tawo para sa paghidait. Ang Liga ginbuko sang Enero 1919. Kon mag-isip kita sing 1,290 (tatlo ka tuig, pito ka bulan) kutob sadto nga tion, magadangat kita sa Septiembre 1922.

 16. Sa katapusan sang 1,290 ka adlaw, paano nangin maathag nga ang hinaplas nga nagkalabilin handa sa paghikot?

¹⁶ Ano ang natabo sadto? Ti, ang mga Bible Student napapagsik na, hilway sa Babilonia nga Daku, kag handa sa pagpanghikot. (Bugna 18:⁠4) Sa isa ka kombension nga ginhiwat sang Septiembre 1922 sa Cedar Point, Ohio, E.U.A., ginsugdan nila sing maisugon nga ipahibalo ang mga paghukom sang Dios sa Cristiandad. (Bugna 8:​7-12) Ang mga kutot sang mga apan nagsugod gid sa pagngutngot! Dugang pa, nagsugod ang ikaduha nga kailo sang Bugna. Ang isa ka hubon sang Cristianong manugkabayo​—⁠ginahuman sang primero sang hinaplas nga nagkalabilin kag sang ulihi ginpadamo sang dakung kadam-an⁠—​nagsalakay sa duta. (Bugna 7:9; 9:​13-19) Huo, ang katapusan sang 1,290 ka adlaw nagdala sing kalipay sa katawhan sang Dios.⁠c Apang dugang pa ang nagahulat.

Ang 1,335 ka Adlaw

 17. San-o nagsugod kag natapos ang 1,335 ka adlaw?

¹⁷ Ang Daniel 12:12 nagasiling: “Malipayon ang nagahulat kag nagaabot sa isa ka libo kag tatlo ka gatos kag katluan kag lima ka adlaw!” Ining 1,335, ukon tatlo ka tuig, walo kag tunga ka bulan, mahimo gid nga nagsugod sang katapusan sang nauna nga panahon. Kon mag-isip kita halin sa Septiembre 1922, ginadala kita sini sa talispuspusan nga bahin sang tigpamulak (Nakatundan nga Hemisperio) sang 1926. Ano ang natabo sa sulod sadtong 1,335 ka adlaw?

 18. Ano nga mga katunayan ang nagapakita nga sang 1922 may pag-uswag pa nga dapat himuon?

¹⁸ Walay sapayan sang importante nga mga hitabo sang 1922, mahimo gid nga ginkahidlawan gihapon sang iban ang nagligad. Ang Studies in the Scriptures, nga ginsulat ni C. T. Russell, amo gihapon ang sadsaran nga tulun-an. Dugang pa, ang ginpanagtag sing lapnag nga polyeto nga Millions Now Living Will Never Die nagpresentar sing pagtamod nga sang 1925, ang mga katuyuan sang Dios sa pagpasag-uli sang duta sa Paraiso kag ang pagkabanhaw sang mga matutom sang una nga panahon magasugod sa pagkatuman. Ang pagbatas sang mga hinaplas daw malapit na matapos. Walay sapayan, ang iban sang nagpakig-upod sa mga Bible Student wala magbatyag nga dapat nila ipaambit sa iban ang maayong balita.

 19, 20. (a) Paano nagbag-o ang madamo nga butang para sa katawhan sang Dios sa tion sang 1,335 ka adlaw? (b) Ano nga mga hitabo ang nagtanda sang katapusan sang 1,335-ka-adlaw nga panahon, kag ano ang ginapakita sini tuhoy sa katawhan ni Jehova?

¹⁹ Samtang nagaligad ang 1,335 ka adlaw, ini tanan nagbag-o. Sa pagpalig-on sa kauturan, gin-organisar ang regular nga pagtuon sang mga grupo sa The Watch Tower. Ginpadaku ang pag-alagad sa latagon. Sugod sang Mayo 1923, gin-agda ang tanan nga mag-ambit sa pag-alagad sa latagon sa una nga Martes sang tagsa ka bulan, kag may tion nga gintigana sa miting sang kongregasyon sa tunga-tunga sang semana agod palig-unon sila sa sining hilikuton. Sang Agosto 1923, sa isa ka asambleya sa Los Angeles, California, E.U.A., ginpakita didto nga ang parabola sang mga karnero kag mga kanding ni Jesus matuman antes sang Milenyo nga Paggahom. (Mateo 25:​31-40) Ang tuig 1924 nakasaksi sang pag-inagurar sa estasyon sa radyo nga WBBR, nga ginagamit anay sa pagpalayag sing maayong balita sa kahanginan. Ang artikulo nga “Pagkabun-ag sang Pungsod” sa Marso 1, 1925 nga guwa sang The Watch Tower naghatag sing isa ka ginbag-o nga paghangop sa Bugna kapitulo 12. Sang ulihi, nahangpan sing nagakaigo sang matutom nga mga Cristiano ang magamo nga mga hitabo sang 1914-19.

²⁰ Ang tuig 1925 natapos, apang wala pa ang katapusan! Halin pa sang katuigan 1870, ang mga Bible Student nagaalagad nga ginatandaan ang petsa​—⁠sang primero ang 1914, dayon ang 1925. Nahangpan na nila karon nga dapat sila mag-alagad tubtob luyag ni Jehova. Ang Enero 1, 1926 nga guwa sang The Watch Tower nagdala sing importante nga artikulo “Sin-o ang Magapadungog kay Jehova?” nagapadaku subong sang wala pa gid matabo sang nagligad sang pagkaimportante sang ngalan sang Dios. Kag sang ulihi, sang Mayo 1926 sa kombension sa London, Inglaterra, isa ka resolusyon ang ginbaton nga natig-uluhan “Isa ka Testimonya sa mga Manuggahom sang Kalibutan.” Prangka nga ginbantala sini ang kamatuoran nahanungod sa Ginharian sang Dios kag ang nagapakari nga kalaglagan sang kalibutan ni Satanas. Sa amo man nga kombension, ginpaguwa ang may matigdas sing mensahe nga libro nga Deliverance, nga amo ang una sa mga serye nga nagbulos sa Studies in the Scriptures. Ang katawhan sang Dios nagatulok na karon sa palaabuton, indi sa nagligad. Ang 1,335 ka adlaw natapos na.

 21. Ano ang kahulugan sang pagbatas sa 1,335-ka-adlaw nga panahon para sa katawhan sang Dios sadto, kag ano ang kahulugan para sa aton sang katumanan sang tagna tuhoy sini nga hut-ong sang tion?

²¹ Ang iban wala magpasibu sa sini nga mga pagbag-o, apang ang mga nagbatas nangin malipayon gid. Dugang pa, kon balikdon naton ang katumanan sining matagnaon nga mga panahon, malipayon man kita bangod ang aton pagsalig ginapalig-on nga ang diutay nga hubon sang hinaplas nga mga Cristiano nga nagbatas sadtong mga panahon amo gid ang matutom kag mainandamon nga ulipon. Sa sulod sang mga tinuig sugod sadto, ang organisasyon ni Jehova nagsangkad sing daku, apang ang matutom kag mainandamon nga ulipon yara gihapon sa sentro sini, nga nagatuytoy sini. Daw ano ka makakulunyag, nian, mahibaluan nga para sa mga hinaplas kag iban nga mga karnero, dugang pa nga kalipay ang nagahulat sa ila! Makita naton ini samtang ginabinagbinag naton ang isa pa sa mga tagna ni Daniel.

[Mga footnote]

Mapaathag Mo Bala?

◻ Paano naton nahibaluan nga ang iban nga mga tagna sa Daniel matuman sa aton tion?

◻ Ngaa makasalig kita nga ang hinaplas nga nagkalabilin amo “ang matutom kag mainandamon nga ulipon”?

◻ San-o nagsugod kag natapos ang 1,260 ka adlaw?

◻ Ano nga pagpapagsik kag pagpasag-uli ang gindala sang 1,290 ka adlaw sa hinaplas nga nagkalabilin?

◻ Ngaa malipayon ang mga nagbatas tubtob sa katapusan sang 1,335 ka adlaw?

[Piktyur sa pahina 8]

Sugod sang 1919 nangin maathag nga “ang matutom kag mainandamon nga ulipon” amo ang hinaplas nga nagkalabilin

[Piktyur sa pahina 10]

Ulong-talatapan sang Liga de Nasyones sa Geneva, Switzerland

[Credit Line]

Retrato sang NU

[Kahon sa pahina 11]

MATAGNAON NGA MGA PANAG-ON NI DANIEL

1,260 ka adlaw:

Disiembre 1914 tubtob Hunyo 1918

1,290 ka adlaw:

Enero 1919 tubtob Septiembre 1922

1,335 ka adlaw:

Septiembre 1922 tubtob Mayo 1926