Ang Tanan Magahimaya kay Jehova!

“Sa duog sang kapawa dapat nila himayaon si Jehova.”​—ISAIAS 24:15.

1. Paano gintamod sang mga manalagna ni Jehova ang iya ngalan, kon ipaanggid sa anong panimuot sang Cristiandad sa karon?

JEHOVA​—ang mahimayaon nga ngalan sang Dios! Daw ano ka malipayon ang matutom dumaan nga mga manalagna sa paghambal tuhoy sa sina nga ngalan! Malipayon nila nga ginhimaya ang ila Soberanong Ginuo, si Jehova, nga ang iya ngalan nagapakilala sa iya subong ang Dakung Manugtuyo. (Isaias 40:5; Jeremias 10:6, 10; Ezequiel 36:23) Bisan ang gintawag nga dilutaw nga mga manalagna tuman kasidla sa paghimaya kay Jehova. Ang isa sa ila amo si Hageo. Sa tulun-an sang Hageo, nga ginahuman sang 38 lamang ka bersikulo, ang ngalan sang Dios gingamit sing 35 ka beses. Daw nadulaan sing kabuhi ini nga tagna sang ang hamili nga ngalan ni Jehova gin-islan sang titulo nga “Ginuo,” subong sang paggamit sini sang lutaw nga mga apostoles sang Cristiandad sa ila mga badbad sang Biblia.—Ipaanggid ang 2 Corinto 11:5.

2, 3. (a) Paano natuman ang isa ka talalupangdon nga tagna tuhoy sa pagpasag-uli sang Israel? (b) Anong kalipay ang gin-ambitan sang nagkalabilin nga mga Judiyo kag sang ila mga kaupdanan?

2 Sa Isaias 12:2, duha ka porma sang ngalan ang gingamit.a Ang manalagna nagasiling: “Yari karon! Ang Dios akon kaluwasan. Magasalig ako kag indi magkahadlok; kay si Jah Jehova amo ang akon kusog kag akon gahom, kag sia nangin akon kaluwasan.” (Tan-awa man ang Isaias 26:4.) Busa, mga 200 ka gatos ka tuig antes sang kahilwayan sang Israel gikan sa pagkaulipon sa Babilonia, si Jah Jehova paagi kay manalagna Isaias naghatag sing pasalig nga sia ang ila gamhanan nga Manluluwas. Yadtong pagkabihag naglawig kutob sang 607 tubtob sang 537 B.C.E. Si Isaias nagsulat man: “Ako, si Jehova, ang nagahimo sang tanan nga butang, . . . ang Isa nga nagasiling kay Ciro, ‘Sia ang akon manugbantay, kag himuon niya ang tanan ko nga nahamut-an’; bisan sang akon ginsiling sa Jerusalem, ‘Patindugon sia liwat,’ kag nahanungod sa templo, ‘Ang imo sadsaran igapasad.’” Sin-o ining si Ciro? Sing talalupangdon, sia si Hari Ciro sang Persia, nga naglutos sa Babilonia sang 539 B.C.E.—Isaias 44:24, 28.

3 Subong katumanan sang pulong ni Jehova nga ginrekord ni Isaias, si Ciro nagpaguwa sing isa ka sugo sa naulipon nga Israel: “Ang bisan sin-o nga yara sa inyo sang bug-os niya nga katawhan, ang iya Dios mangin kaupod niya. Kag magtaklad sia sa Jerusalem, nga yara sa Juda, kag magpatindog sang balay ni Jehova ang Dios sang Israel—sia amo ang matuod nga Dios—nga yara sa Jerusalem.” Ang malipayon gid nga nagkalabilin sang Israel upod ang mga di-Israelinhon nga mga Netineo kag mga anak nga lalaki sang mga alagad ni Solomon nagbalik sa Jerusalem. Nag-abot sila nga hustuhan gid agod saulugon ang Kapiestahan sang mga Payagpayag sang 537 B.C.E. kag maghimo sing mga halad kay Jehova sa iya halaran. Sang masunod nga tuig, sang ikaduha nga bulan, ginpasad nila ang sadsaran sang ikaduha nga templo, sa tunga sang mabaskog nga sininggit sang kalipay kag pagdayaw kay Jehova.—Esdras 1:1-4; 2:1, 2, 43, 55; 3:1-6, 8, 10-13.

4. Paano nangin matuod ang kapitulo 35 kag 55 sang Isaias?

4 Ang tagna sang pagpasag-uli ni Jehova malipayon nga matuman sa Israel: “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. . . . Makita nila ang himaya ni Jehova, ang pagkahalangdon sang Dios naton.” “Magaguwa kamo nga may kalipay, kag pagatuytuyan kamo nga may paghidait. Ang kabukiran kag ang kabakuluran sa atubangan ninyo magaamba . . . Kag ini mangin kabantugan para kay Jehova, isa ka dayon nga tanda nga indi mawala.”—Isaias 35:1, 2; 55:12, 13.

5. Ngaa nangin malip-ot lamang ang kalipay sang Israel?

5 Apang, nangin umalagi lamang yadto nga kalipay. Ang kaingod nga mga katawhan nagtanyag sing pagsimbuganay sing pagtuo agod patindugon ang templo. Sang primero wala magpasugot ang mga Judiyo nga nagasiling: “Wala kamo sing labot sa amon sa pagpatindog sing balay sang amon Dios, kundi kami amon sing tingob magapatindog kay Jehova ang Dios sang Israel, suno sa ginsugo sa amon ni Hari Ciro nga hari sang Persia.” Nian nangin mabaskog nga mga manugpamatok ining mga kaingod. ‘Padayon [nila] nga ginpaluya ang kamot sang katawhan sang Juda kag nagtublag sa ila sa pagpatindog.’ Nagbinutig sila tuhoy sa matuod nga kahimtangan sa nagbulos kay Ciro, nga si Artejerjes, nga nagmando nga pauntaton ang pagtukod sang templo. (Esdras 4:1-24) Nag-untat ang hilikuton sa sulod sang 17 ka tuig. Sing makapasubo, sadto nga tion ang mga Judiyo nahulog sa materyalistiko nga paagi sing pagkabuhi.

Naghambal si “Jehova sang mga Kasuldadusan”

6. (a) Paano naghulag si Jehova tuhoy sa kahimtangan sang Israel? (b) Ngaa nagakaigo ang kahulugan sang ngalan ni Hageo?

6 Walay sapayan sini, ginpakita ni Jehova ang ‘iya kusog kag gahom’ para sa Israel paagi sa pagpadala sing mga manalagna, nga sanday Hageo kag Zacarias, agod pahanumdumon ang mga Judiyo sang ila mga salabton. Ang ngalan ni Hageo naangot sa kapiestahan, kay nagakahulugan ini sing “Natawo sa Tion sang Piesta.” Sing nagakaigo, nagpanagna sia sa unang adlaw sang bulan sang Kapiestahan sang mga Payagpayag, ang tion nga ang mga Judiyo ginsugo nga “magkinalipay.” (Deuteronomio 16:15) Paagi kay Hageo, nagpadala si Jehova sing apat ka mensahe sa sulod sing kapin sa 112 ka adlaw.—Hageo 1:1; 2:1, 10, 20.

7. Paano kita mapalig-on sang nagabukas nga mga pinamulong ni Hageo?

7 Sa pagsugod sang iya pagtagna, si Hageo nagsiling: “Amo ini ang ginsiling ni Jehova sang mga kasuldadusan. (Hageo 1:2a) Sin-o ining “mga kasuldadusan”? Sila ang grupo sang mga anghel ni Jehova, nga kon kaisa ginapatuhuyan sa Biblia subong mga kasuldadusan. (Job 1:6; 2:1; Salmo 103:20, 21; Mateo 26:53) Wala bala ini nagapalig-on sa aton karon nga ang Soberanong Ginuong Jehova mismo nagagamit sang iya dimadaug langitnon nga mga hangaway agod tuytuyan ang aton hilikuton sa pagpasag-uli sang matuod nga pagsimba sa duta?—Ipaanggid ang 2 Hari 6:15-17.

8. Anong pagtamod ang nag-apektar sa Israel, kag upod ang anong resulta?

8 Ano ang kaundan sang unang mensahe ni Hageo? Ang katawhan nagsiling: “Ang tion wala pa mag-abot nga patindugon ang balay ni Jehova.” Ang pagtukod sang templo, nga nagarepresentar sa pagsimba sang Dios, indi na ang ila panguna nga ginakabalak-an. Nagliso sila sa pagpatindog sang ila kaugalingon daw palasyo nga mga balay. Gindula sang materyalistiko nga pagtamod ang ila kapagsik para sa pagsimba kay Jehova. Subong resulta, ginkuha niya ang iya pagpakamaayo. Ang ila kaumhan nangin dimabungahon, kag kulang sila sing panapton sa tion sing tuman nga tigtulugnaw. Ginkulang ang ila kinitaan, kag daw nagasulod sila sing kuwarta sa isa ka puyo nga busluton.—Hageo 1:2b-6.

9. Anong mabaskog, makapalig-on nga laygay ang ginhatag ni Jehova?

9 Duha ka beses nga naghatag sing mabaskog nga laygay si Jehova: “Patugsilingi ang inyo mga dalanon.” Sing maathag, si Zorobabel, ang gobernador sang Jerusalem, kag ang mataas nga saserdote nga si Josueb naghulag sing maisugon kag ginpalig-on ang katawhan “nga pamatian ang tingog ni Jehova nga ila Dios, kag ang mga pinamulong ni Hageo nga manalagna, bangod ginpadala sia ni Jehova nga ila Dios; kag ang katawhan nagkahadlok kay Jehova.” Dugang pa, “si Hageo nga mensahero ni Jehova nagsiling sa katawhan suno sa komisyon sang mensahero gikan kay Jehova nga nagasiling: “ ‘Ako magaupod sa inyo,” siling ni Jehova.’ ”—Hageo 1:5, 7-14.

10. Paano gingamit ni Jehova ang iya gahom para sa kaayuhan sang Israel?

10 Mahimo nga naghunahuna ang pila ka tigulang sadto sa Jerusalem nga ang himaya sang gintukod liwat nga templo “malayo” kon ipaanggid sa una nga templo. Apang, mga 51 ka adlaw sang ulihi, ginpahulag ni Jehova si Hageo nga ipahibalo ang ikaduha nga mensahe. Sia nagsiling: “ ‘Magpakabakod, O Zorobabel,’ siling ni Jehova, ‘kag magpakalig-on, O Josue nga anak ni Josadac nga mataas nga saserdote. Kag magpakalig-on kamo tanan nga katawhan sang duta,’ siling ni Jehova, ‘kag magpangabudlay. Kay magaupod ako sa inyo,’ siling ni Jehova sang mga kasuldadusan. . . . ‘Indi magkahadlok.’ ” Ginpat-od ni Jehova, nga sa nagakaigo nga tion magagamit sang iya labing gamhanan nga kusog agod ‘uyugon ang langit kag duta,’ nga malandas ang tanan nga pagpamatok, bisan ang pagdumili sang emperyo. Sa sulod sang lima ka tuig ang pagtukod sang templo nangin isa ka daku nga kadalag-an.—Hageo 2:3-6.

11. Paano ginpuno sang Dios ang ikaduha nga templo sang ‘mas daku nga himaya’?

11 Nian isa ka talalupangdon nga saad ang natuman: “ ‘Magaabot ang bilidhon nga mga butang sang mga pungsod; kag pun-on ko ini nga balay sing himaya,’ siling ni Jehova sang mga kasuldadusan.” (Hageo 2:7) Yadtong “bilidhon nga mga butang” amo ang mga di-Israelinhon nga nagkari sa pagsimba sa amo nga templo, kay ginpabanaag sadto ang halangdon nga presensia. Kamusta kon ipaanggid ini nga templo sa sadtong ginpatindog sang mga adlaw ni Solomon? Ang manalagna sang Dios nagsiling: “‘Ang himaya sining ulihi nga balay mangin daku sangsa una,’ siling ni Jehova sang mga kasuldadusan.” (Hageo 2:9) Sa una nga katumanan sang tagna, ang ginpatindog liwat nga templo nagdugay sing mas malawig sangsa una nga templo. Nagatindog pa gihapon ini sang pag-abot sang Mesias sang 29 C.E. Dugang pa, antes sia ginpapatay sang iya apostata nga mga kaaway sang 33 C.E., ang Mesias nagdala man sing himaya sa sini sang ginbantala niya didto ang kamatuoran.

12. Ano ang katuyuan sang unang duha ka templo?

12 Ang una kag ikaduha nga templo sa Jerusalem nagtuman sa importante nga katuyuan sa paglandong sang importante nga mga bahin sang saserdotenhon nga pag-alagad sang Mesias kag sa paghupot sang putli nga pagsimba ni Jehova sa duta tubtob sang aktuwal nga pag-abot sang Mesias.—Hebreo 10:1.

Ang Mahimayaon Espirituwal nga Templo

13. (a) Anong mga hitabo tuhoy sa espirituwal nga templo ang natabo kutob sang 29 tubtob sang 33 C.E.? (b) Ano ang importante nga papel sang halad-gawad ni Jesus sa sining mga hitabo?

13 Ang tagna bala sang pagpasag-uli ni Hageo may pinasahi nga kahulugan sa ulihi nga mga adlaw? Pat-od gid! Ang ginpatindog liwat nga templo sa Jerusalem nangin sentro sang bug-os matuod nga pagsimba sa duta. Apang ginlaragway sini ang mas mahimayaon espirituwal nga templo. Nagsugod ini sa pagpanghikot sang 29 C.E. sadtong tion nga sang ginbawtismuhan si Jesus sa Suba sang Jordan, ginhaplasan ni Jehova si Jesus subong Mataas nga Saserdote, kag ang balaan nga espiritu nagkunsad sa iya subong sang salampati. (Mateo 3:16) Sang matapos na ni Jesus ang iya dutan-on nga ministeryo sa mahalaron nga kamatayon, ginbanhaw sia padulong sa langit, nga ginlaragway sang Labing Balaan sang templo, kag ginpresentar niya didto kay Jehova ang balor sang iya halad. Nangin isa ini ka gawad nga nagatabon sa mga sala sang iya mga disipulo, kag nagbukas sang dalan sa paghaplas sa ila, sang adlaw sang Pentecostes 33 C.⁠E., subong kabulig nga mga saserdote sa espirituwal nga templo ni Jehova. Ang ila matutom nga ministeryo tubtob sa kamatayon sa luwang sang templo sa duta nagdul-ong sa langitnon nga pagkabanhaw sa langit, para sa mapinadayunon nga pag-alagad subong saserdote.

14. (a) Anong kalipay ang nangin resulta sang makugi nga pagpanghikot sang unang Cristianong kongregasyon? (b) Ngaa nangin malip-ot lamang ining pagkalipay?

14 Linibo sang mahinulsulon nga mga Judiyo—kag sang ulihi mga Gentil—ang nagpanong sa sinang Cristianong kongregasyon, kag nakigbahin sa pagbantala sing maayong balita sang nagapakari nga paggahom sang Ginharian sang Dios sa duta. Pagkatapos sang halos 30 ka tuig, si apostol Pablo nakasiling nga ang maayong balita nabantala na “sa tanan nga katawhan sa idalom sang duta.” (Colosas 1:23) Apang sang mapatay na ang mga apostoles, nagsugod ang daku nga apostasya kag nagkipawkipaw ang iwag sang kamatuoran. Ang matuod nga Cristianismo natabunan sang sektaryanismo sang Cristiandad, pasad sa paganong mga panudlo kag mga pilosopiya.—Binuhatan 20:29, 30.

15, 16. (a) Paano natuman ang tagna sang 1914? (b) Anong pagtipon ang ginhimo sang ulihi nga bahin sang ika-19 kag una nga bahin sang ika-20 nga siglo?

15 Nagligad ang mga siglo. Nian sang katuigan 1870, ginsugdan sang isa ka grupo sang sinsero nga mga Cristiano ang maid-id nga pagtuon sang Biblia. Pasad sa Kasulatan, nakilala nila ang tuig 1914 subong ang katapusan sang “gintalana nga tion sang mga pungsod.” Amo sadto nga tion nga ang pito ka simboliko nga “mga tion” (2,520 ka tuig sang kaangay sapat nga paggahom sang tawo) natapos sang naglingkod si Cristo Jesus sa trono—ang Isa nga may “legal nga kinamatarong” subong ang Mesianikong Hari sang duta. (Lucas 21:24; Daniel 4:25; Ezequiel 21:26, 27) Labi na kutob sang 1919 padayon, ining mga Estudyante sang Biblia, nga nakilal-an karon subong mga Saksi ni Jehova, mapagsik nga nagpalapnag sa bug-os nga duta sang maayong balita sang nagapakari nga Ginharian. Sang 1919 mga pila ka libo sa ila ang nagsabat sa panawagan nga ginpahibalo sa kombension sa Cedar Point, Ohio, E.U.A. Nagdamo sila tubtob sang tuig 1935 sang 56,153 ang nagreport sing pag-alagad sa latagon. Sadto nga tuig, 52,465 ang nakigbahin sa mga emblema nga tinapay kag alak sa tuigan nga Memoryal sang kamatayon ni Jesus, sa amo nagasimbolo sang ila paglaum nga mangin mga saserdote upod ni Cristo Jesus sa langitnon nga bahin sang dakung espirituwal nga templo ni Jehova. Magaalagad man sila subong mga kaupod niya nga hari sa iya Mesianikong Ginharian.—Lucas 22:29, 30; Roma 8:15-17.

16 Apang, ginapakita sang Bugna 7:​4-8 kag 14:​1-4 nga ang kabilugan nga kadamuon sining hinaplas nga mga Cristiano nalimitehan sa 144,000 nga ang kalabanan sa ila natipon sang unang siglo antes magsugod ang dakung apostasya. Kutob sang talipuspusan sang ika-19 nga siglo kag tubtob sa ika-20 nga siglo, gintapos ni Jehova ang pagtipon sa sining grupo nga natinluan sang tubig sang iya Pulong, ginkilala nga matarong paagi sa pagtuo sa nagagawad nga halad ni Jesus, kag sang ulihi ginpat-inan subong hinaplas nga mga Cristiano nga magahuman sa kabug-usan sang 144,000.

17. (a) Anong pagtipon ang nagsugod kutob sang katuigan 1930? (b) Ngaa talalupangdon sa sini ang Juan 3:​30? (Tan-awa man ang Lucas 7:​28.)

17 Ano ang masunod kon makompleto na ang bug-os nga kadamuon sang mga hinaplas? Sang 1935, sa isa ka dimalipatan nga kombension sa Washington, D.C., E.U.A., ginpahibalo nga ang “dakung kadam-an” sang Bugna 7:9-17 amo ang isa ka grupo nga nakilal-an “pagkatapos” nga natipon ang 144,000 kag ang ila paglaum amo ang kabuhi nga walay katapusan sa paraiso sa duta. Sa tapos makilala sing maathag ang hinaplas nga si Jesus, si Juan Bautista, nga ang iya pagkabanhaw mangin dutan-on subong isa sang “iban nga mga karnero,” nagsiling tuhoy sa Mesias: “Sia kinahanglan magdugang, apang ako kinahanglan magbuhin.” (Juan 1:29; 3:30; 10:16; Mateo 11:11) Ang hilikuton ni Juan Bautista sa paghanda sa mga disipulo para sa Mesias nagahingapos sang ginsugdan ni Jesus ang pagpili sang nagadugang nga kadamuon sang mangin katapo sang 144,000. Nagbaliskad ini sang katuigan 1930. Nagbuhin ang kadamuon sadtong “gintawag kag ginpili” subong katapo sang 144,000 apang nagdugang sing daku ang kadamuon sang “dakung kadam-an” sang “iban nga mga karnero.” Ining dakung kadam-an padayon nga nagadamo samtang ang malauton nga sistema sang kalibutan nagahilapit sa iya katapusan sa Armagedon.​—⁠Bugna 17:14b.

18. (a) Ngaa mapaabot naton sing masinaligon nga “minilyon karon nga nagakabuhi ang indi na mapatay”? (b) Ngaa dapat naton sundon sing matutom ang Hageo 2:4?

18 Sang maaga nga bahin sang katuigan 1920, ang mga Saksi ni Jehova nagpresentar sing isa ka pamulongpulong publiko nga natig-uluhan “Minilyon sang Nagakabuhi Karon ang Indi Na Mapatay.” Ini nga pinamulong mahimo nga isa ka pagpasobra sadto nga tion. Apang sa karon ina nga pinamulong mahimo ihambal nga may bug-os nga pagsalig. Ang nagadugang nga kapawa sang mga tagna sa Biblia kag ang anarkiya sining nagahimumugto nga kalibutan maathag nga nagapakita nga malapit na kaayo ang katapusan sang sistema ni Satanas! Ginapakita sang report sang Memoryal sang 1996 nga 12,921,933 ang nagtambong, diin 8,757 lamang (.068 porsiento) ang nagpakita sang ila langitnon nga paglaum paagi sa pagpakigbahin sa mga emblema. Ang pagpasag-uli sang matuod nga pagsimba malapit na matapos. Apang indi kita dapat magmahinay sa sinang hilikuton. Huo, ang Hageo 2:4 nagasiling: “ ‘Magpakalig-on, kamo nga katawhan sang duta,’ siling ni Jehova, ‘kag magpanghikot. Kay ako mangin kaupod ninyo,’ siling ni Jehova sang mga kasuldadusan.” Kabay mangin determinado kita nga indi masablagan sang materyalismo ukon sang pagkakalibutanon ang aton kakugi sa hilikuton ni Jehova!—1 Juan 2:15-17.

19. Paano kita makapakigbahin sa katumanan sang Hageo 2:​6, 7?

19 Makalilipay gid ang aton pribilehiyo sa pagpakigbahin sa modernong-adlaw nga katumanan sang Hageo 2:6, 7: “Amo sini ang ginasiling ni Jehova sang mga kasuldadusan, ‘Sa makaisa pa—sa diutay nga tion—kag uyugon ko ang mga langit kag ang duta kag ang dagat kag ang mamala nga duta. Kag uyugon ko ang tanan nga kapungsuran, agod magaabot ang bilidhon nga mga butang sang mga pungsod; kag pun-on ko ini nga balay sing himaya,’ siling ni Jehova sang mga kasuldadusan.” Ang kakagod, kaduluntan, kag dumot lapnag sa sining ika-20 nga siglo nga kalibutan. Sa pagkamatuod yari na ini sa iya katapusan nga adlaw, kag ginsugdan na ni Jehova ang “pag-uyog” sa sini paagi sa pagsugo sa iya mga Saksi nga ‘ibantala ang adlaw sang iya pagtimalos.’ (Isaias 61:2) Ining una nga pag-uyog matapos sa kalaglagan sang kalibutan sa Armagedon, apang antes sina nga tion, ginatipon ni Jehova sa pag-alagad sa iya “ang bilidhon nga mga butang sang mga pungsod”—ang mahagop, tulad-karnero nga mga tawo sa duta. (Juan 6:44) Ining “dakung kadam-an” ‘nagaalagad’ karon sa dutan-on nga luwang sang iya balay sang pagsimba.—Bugna 7:9, 15.

20. Sa diin masapwan ang pinakahamili nga manggad?

20 Ang pag-alagad sa templo ni Jehova nagadala sing mas hamili nga daug sangsa bisan anong materyal nga manggad. (Hulubaton 2:1-6; 3:13, 14; Mateo 6:19-21) Dugang pa, ang Hageo 2:9 nagasiling: “ ‘Mangin daku ang himaya sining ulihi nga balay sangsa nahauna,’ siling ni Jehova sang mga kasuldadusan. ‘Kag hatagan ko sing paghidait ini nga duog,’ siling ni Jehova sang mga kasuldadusan.” Ano ang buot silingon sining mga pinamulong sa aton karon? Isugid ini sang aton masunod nga artikulo.

[Mga footnote]

Mga Pamangkot sa Repaso

◻ Anong mga halimbawa sang mga manalagna ang dapat naton sundon tuhoy sa ngalan ni Jehova?

◻ Anong pagpalig-on ang aton nabaton gikan sa mabaskog nga mensahe ni Jehova sa napasag-uli nga Israel?

◻ Anong mahimayaon espirituwal nga templo ang nagapanghikot karon?

◻ Anong mga pagtipon ang ginhimo sing alagisod sadtong ika-19 kag ika-20 nga mga siglo, upod ang anong dakung paglaum sa palaabuton?

[Kapsion sa pahina 7]

Ginatuytuyan kag ginabuligan sang langitnon nga kasuldadusan ni Jehova ang iya mga Saksi sa duta