12. Ngaa mahimo gid nga makibot ang mga katapo sang Judiyo nga sinagoga sa Filadelfia kon mahibaluan nila nga ang iban sa ila ‘nagyaub’ sa lokal nga Cristianong komunidad?

¹² Ang mga katapo sang Judiyo nga sinagoga sa Filadelfia mahimo gid nga makibot sa paghibalo nga ang iban sa ila ‘magayaub’ sa lokal nga Cristianong komunidad. Bangod mahimo gid nga madamo sing indi Judiyo sa sadto nga kongregasyon, baliskad ang ginapaabot sang mga Judiyo. Ngaa? Bangod si Isaias nagtagna: “Ang mga hari [di-Judiyo] mangin mga manug-atipan para sa imo [katawhan sang Israel], kag ang ila mga prinsesa mangin mga yaya para sa imo. Magayaub sila sa imo nga ang ila mga nawong halos nagadapat sa duta.” (Isaias 49:23; 45:14; 60:14) Sa kaanggid nga kahulugan, gin-inspirar si Zacarias sa pagsulat: “Mahanabo sa amo nga mga adlaw nga napulo ka tawo [di-Judiyo] gikan sa tanan nga lenguahe sang mga pungsod ang magabuyot, huo, magabuyot gid sila sa sidsid sang isa ka Judiyo, nga nagasiling: ‘Magaupod kami sa inyo, kay nabatian namon nga ang Dios nagaupod sa inyo.’” (Zacarias 8:23) Huo, ang mga di-Judiyo ang dapat magyaub sa mga Judiyo, indi ang kabaliskaran sini!

14. Paano ang Isaias 49:23 kag Zacarias 8:23 talalupangdon nga natuman sa moderno nga mga tion?

¹⁴ Sa moderno nga mga tion, talalupangdon nga natuman ang mga tagna subong sang Isaias 49:23 kag Zacarias 8:23. Subong resulta sang pagbantala sang Juan nga klase, madamo nga tawo ang nagsulod sa nabuksan nga ganhaan padulong sa pag-alagad sa Ginharian.b Ang kalabanan sa ila naghalin sa Cristiandad, nga ang mga relihion sini butig nga nagapangangkon nga amo ang espirituwal nga Israel. (Ipaanggid ang Roma 9:6.) Subong isa ka dakung kadam-an, ginlabhan nila ang ila malaba nga mga panapton kag ginpaputi ini paagi sa pagtuo sa ginhalad nga dugo ni Jesus. (Bugna 7:9, 10, 14) Bangod nagapasakop sila sa paggahom ni Cristo sa Ginharian, nagalaum sila nga makapanubli sang mga pagpakamaayo sini diri sa duta. Nagkadto sila sa hinaplas nga kauturan ni Jesus kag “nagyaub” sa ila, sa espirituwal nga paghambal, bangod ‘nabatian nila nga ang Dios nagaupod sa ila.’ Nagapangalagad sila sa sining mga hinaplas, nga upod sa ila nahiusa sila sa isa ka bug-os kalibutan nga paghiliupod sang mga kauturan.—Mateo 25:34-40; 1 Pedro 5:9.