Ginhimo Nila ang Kabubut-on ni Jehova

Gin-abiabi si Jesus Subong Mesias kag Hari!

ANG magahod nga kadam-an nga nagsulod sa Jerusalem sang Nisan 9, 33 C.E., nagpakibot sa madamo nga taga-Judea. Bisan pa kinaandan na nga makita ang madamo nga tawo nga nagadugok sa siudad antes sang Paskuwa, tuhay ining mga dumuluaw. Ang panguna nga tawo sa tunga nila amo ang isa nga nagasakay sa tinday nga asno. Ang tawo amo si Jesucristo, kag ang katawhan naghumlad sing mga panapton kag mga paklang sang palma sa atubangan niya samtang nagasinggit sila: “Luwasa, nagapangamuyo kami, ang Anak ni David! Bulahan sia nga nagakari sa ngalan ni Jehova! Luwasa sia, nagapangamuyo kami, sa kahitaasan!” Sang makita ang kadam-an, madamo sang yara na sa Jerusalem ang napahulag nga magbuylog sa prusisyon.​—⁠Mateo 21:​7-9; Juan 12:​12, 13.

Walay sapayan nga ginaabiabi sia sadto nga tion, nahibal-an ni Jesus nga may mga kabudlayan nga nagahulat sa iya. Ti, lima na lang ka adlaw kag pagapatyon sia sa amo man nga siudad! Huo, nahibal-an ni Jesus nga ang Jerusalem indi maabiabihon nga teritoryo, kag ginhimo niya ang iya dayag nga pagsulod sa siudad nga ginahunahuna yadto.

Natuman ang Dumaan nga Tagna

Sang 518 B.C.E., gintagna ni Zacarias ang madinalag-on nga pagsulod ni Jesus sa Jerusalem. Sia nagsulat: “Maghugyaw sa kadalag-an, O anak nga babayi sang Jerusalem. Tuluka! Ang imo hari mismo nagaabot sa imo. Matarong sia, huo, may kaluwasan; mapainubuson, kag nagasakay sa asno, sa isa ka hamtong nga tinday sang asno nga babayi. . . . Kag magapamulong sia sing paghidait sa mga pungsod; kag ang iya pagginahom mangin kutob sa dagat pa dagat kag kutob sa Suba tubtob sa mga ukbong sang duta.”​—⁠Zacarias 9:​9, 10.

Busa ang pagsulod ni Jesus sa Jerusalem sang Nisan 9 nagtuman sang tagna sa Biblia. Indi yadto natabuan lang nga hitabo kundi ginplano sing maayo. Sang maaga nga bahin, sang didto sia sa guwa sang Jerusalem, ginsugo ni Jesus ang duha sang iya mga disipulo: “Kadto kamo sa minuro nga makita sang inyo panulok, kag makakita kamo sa gilayon sing asno nga nahigot, kag isa ka tinday kaupod niya; hubari ninyo sila kag dalha sila sa akon. Kag kon may magsiling sa inyo sing bisan ano, isiling ninyo, ‘Ang Ginuo nagakinahanglan sa ila.’ Sa amo ipadala niya sila sa gilayon.” (Mateo 21:​1-3) Apang ngaa luyag ni Jesus magsakay sa isa ka asno pasulod sa Jerusalem, kag ano ang kahulugan sang reaksion sang kadam-an?

Mensahe Nahanungod sa Pagkahari

Ang makita nga butang masami nga mas gamhanan sangsa ginhambal nga pulong. Sa amo, kon kaisa aktuwal nga ginpahimo ni Jehova sa iya mga propeta ang ila mensahe agod palig-unon ang ila matagnaon nga mensahe. (1 Hari 11:​29-​32; Jeremias 27:​1-6; Ezequiel 4:​1-​17) Ining kitaon gid nga paagi sang komunikasyon nagbilin sing tudok nga impresyon sa hunahuna sang bisan may pinakatig-a nga tagipusuon nga tagpalamati. Sa amo man nga paagi, aktuwal nga ginhimo ni Jesus ang gamhanan nga mensahe paagi sa pagsakay sa asno pasulod sa siudad sang Jerusalem. Paano?

Sang panahon sang Biblia gingamit ang asno para sa dungganon nga mga katuyuan. Halimbawa, sang ginhaplasan si Solomon subong hari nagsakay sia sa ‘babayi nga mula’ sang iya amay, isa ka hybrid nga tinday sang lalaki nga asno.a (1 Hari 1:​33-​40) Gani ang pagsakay ni Jesus sa asno pasulod sa Jerusalem nagkahulugan nga ginapresentar niya ang iya kaugalingon subong hari. Ang ginhimo sang kadam-an nagpalig-on sining mensahe. Ang kadam-an, nga walay duhaduha kalabanan mga taga-Galilea, naghumlad sang ila mga panapton sa atubangan ni Jesus​—⁠isa ka buhat nga nagapahanumdom sang dayag nga pagpahibalo tuhoy sa paghari ni Jehu. (2 Hari 9:​13) Ang pagtawag nila kay Jesus subong “Anak ni David” nagpadaku sang iya legal nga kinamatarong sa paggahom. (Lucas 1:​31-33) Kag ang paggamit nila sing mga paklang sang palma maathag nga nagpakita sang ila pagpasakop sa iya harianon nga awtoridad.​—⁠Ipaanggid ang Bugna 7:​9, 10.

Gani ang prusisyon nga natabo sa Jerusalem sang Nisan 9 nagpaalinton sing maathag nga mensahe nga si Jesus amo ang gintangdo sang Dios nga Mesias kag Hari. Sa pagkamatuod, indi tanan nalipay sa sining paagi sang pagpakilala kay Jesus. Ginhunahuna ilabi na sang mga Fariseo nga indi gid nagakaigo para kay Jesus nga hatagan sing amo sadto nga harianon nga pagpadungog. “Manunudlo,” siling nila, nga walay duhaduha may kaakig sa ila tingog, “sabdunga ang imo mga disipulo.” Si Jesus nagsabat: “Nagasiling ako sa inyo, Kon ini sila maghipos, ang mga bato magasinggit.” (Lucas 19:​39, 40) Huo, ang Ginharian sang Dios amo sadto ang tema sang pagbantala ni Jesus. Maisog niya nga ginbantala ining mensahe batunon man ini sang mga tawo ukon indi.

Leksion Para sa Aton

Nagakinahanglan sing daku nga kaisog para kay Jesus nga magsulod sa Jerusalem sa paagi nga gintagna ni manalagna Zacarias. Nahibal-an niya nga sa paghimo sadto ginapukaw niya ang kaakig sang iya mga kaaway. Antes sia magkayab sa langit, ginsugo ni Jesus ang iya mga sumulunod sa pagbantala sing maayong balita sang Ginharian sang Dios kag sa ‘paghimo sing mga disipulo sa mga tawo sa tanan nga kapungsuran.’ (Mateo 24:14; 28:​19, 20) Ang pagtuman sining hilikuton nagakinahanglan man sing kaisog. Indi tanan malipay sa pagpamati sa mensahe. Ang iban wala nagasapak sa sini, samtang ang iban nagapamatok sa sini. Ginalatiran sang pila ka panguluhan ang pagbantala nga hilikuton ukon ginadumilian ini sing bug-os.

Sa gihapon, narealisar sang mga Saksi ni Jehova nga dapat ibantala ang maayong balita tuhoy sa natukod nga Ginharian sang Dios, mamati man ang mga tawo ukon indi. (Ezequiel 2:⁠7) Samtang padayon nila nga ginahimo ining nagaluwas kabuhi nga hilikuton, ginapasalig sila sang saad ni Jesus: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—⁠Mateo 28:⁠20.

[Footnote]