Mga Leksion Gikan sa Kasulatan: Zacarias 1:​1⁠–​14:​21

Ginpapagsik ni Jehova ang Espiritu sang Iya Katawhan

SADTONG talipuspusan sang 538 B.⁠C.⁠E. ukon temprano sang 537 B.⁠C.⁠E., ang Persiahanon nga hari nga si Ciro nagpapanaug sing dekrito nga ang mga Judiyo dapat magbalik halin sa Babilonia pakadto sa Jerusalem sa ‘pagpatindog liwat sang balay ni Jehova.’ (Esdras 1:3) Apang, sang 520 B.⁠C.⁠E., ang templo wala pa gihapon mapatindog. Gani, ginbangon ni Jehova si manalagna Zacarias agod mangabudlay kaupod ni Hageo sa pagpukaw sa espiritu sang katawhan.

Ang inspirado nga mga pulong ni Zacarias nagpapagsik liwat sa matutom nga mga Judiyo paagi sa pagpakita nga si Jehova nagasakdag sa ila kag magapakamaayo sang ila buluhaton. Ining tolon-an sa Biblia nagapalig-on man sa aton bangod nagaunod ini sing Mesianikong mga tagna, subong man sing iban pa nga mga tagna nga may katumanan sa tion naton.⁠a Nagaaman man ini sa aton sing hamili nga mga leksion.

Si Jehova Nagapakamaayo sang Iya Katawhan

Si Jehova nabalaka sa iya katawhan. Sa tapos ginbaton sang mga Judiyo nga ang pagdisiplina sang Dios sa ila makatarunganon, si Zacarias may tatlo ka palanan-awon nga nagapakita sang Iya kabalaka sa ila. Sa una, nakita niya ang mga kabayo nga may nagasakay nga mga anghel. Ang isa ka anghel nagpalibog nga ang mga pungsod nga naghatag sing kalamidad sa mga Judiyo “nagapahuway.” Sa ikaduha, si Jehova namat-od sa pagpungal sa “apat ka sungay”​—⁠ang pangulohan nga mga kagamhanan nga nagpaaplaag sa iya katawhan. Ang ikatlo nga palanan-awon maathag nga nagalaragway sang mahigugmaon kag maamli­gon nga pagtatap ni Jehova sa Jerusalem.​—⁠1:​1⁠–​2:⁠13.

Wala sing isa ang makasarang sa pagpugong sa matutom nga mga alagad sang Dios. Sa ikap-at nga palanan-awon, si Satanas, ang pangunang manugpamatok sang katawhan ni Jehova, ginsabdong. (Ipaanggid ang Bugna 12:⁠10.) Sa ikalima, nahibaluan ni Zacarias nga ang katawhan sang Dios magahimo sang Iya kabubut-on walay sapayan sang daw bukid nga mga sablag. Paano? “ ‘Indi sa puwersa militar, ukon sa kusog, kundi sa akon espiritu,’ siling ni Jehova sang mga kasoldadosan.”​—⁠3:​1⁠–​4:⁠14.

Ang mga alagad ni Jehova ‘nagadumot sang malaut.’ (Salmo 97:​10, 11) Sa ikan-um nga palanan-awon, ginpakamalaut sang Dios ang mga malaut nga tubtob sa karon wala masiluti. Kag sa ikapito, ang paglaragway sang kalautan ginahimo sa “duta sang Sinar,” ang lugar sang dimatuod nga Babilonianhon nga relihion. Isa ka maayong lugar para sa sini! Ang malaut indi natungod sa tunga sang katawhan ni Jehova, nga nagadumot sa sini. Masunod nga nakita ni Zacarias ang apat ka kangga nga ginaguyod sang kabayo​—⁠ang anghelikong espiritu nga hubon nga gintangdo sa pag-amlig sa mga alagad sang Dios sa duta.​—⁠5:​1⁠–​6:⁠8.

Matagnaon nga mga Palanan-awon

Ang katumanan sang matagnaon nga pulong ni Jehova makalilipay kag makapabakud sang pagtuo. Matuod gid ini sa matagnaon nga mga palanan-awon ni Zacarias para sa aton adlaw! Nagagamit sang bulawan kag pilak nga gin-amot sang tinapok nga mga Judiyo, magahimo sia sing daku nga purongpurong para sa Mataas nga Saserdote nga si Josue. Dugang pa, “ang mga sa malayo magaabot kag magabulig sa pagpatindog sang templo ni Jehova,” subong nga madamo ang nagbiya sa Babilonia nga Daku agod magbulig sa pagpatindog sa templo pagkatapos sang 1919. Ang pagtadlong sa sayop nga mga panghunahuna nahanungod sa puasa nagdul-ong sa paglaragway sa nagapakari makalilipay nga kahimtangan sang Jerusalem. Gintagna nga ‘napulo ka tawo gikan sa tanan nga hambal’ ang magabuylog sa espirituwal nga mga Judiyo sa matuod nga pagsimba. (Galacia 6:​16; Bugna 7:​4-10) “Magsinggit, O babayi nga anak sang Jerusalem,” siling ni Jehova. Ang iya hari nagakari nga nagasakay sa asno kag “magapamulong sing paghidait sa mga pungsod.”​—⁠6:​9⁠–​9:⁠11.

Ang Dios kag ang mga Manugbantay

Ang mga manugtatap may mabug-at nga responsabilidad kag dapat mag-alagad nga may kakugi. Sa tapos manaad nga luwason ang iya katawhan, si Jehova nagpabutyag sang iya kaakig batok sa dimatutom nga mga manugbantay. Ang “tatlo ka manugbantay” nagpalain sa panong tubtob sa punto nga ginbungkag sang Dios ang iya katipan upod sa iya katawhan. Ang Jerusalem mangin “mabug-at nga bato.” Ang bisan sin-o nga magasalakay sa iya “mapilas sing tama.” Apang “ang mga pangulo sang Juda”​—⁠yadtong nagadumala sa pinili nga katawhan sang Dios​—⁠mangin “kaangay sang sulo nga nagadabadaba,” tumalagsahon nga makugi.​—⁠9:​12⁠–​12:⁠14.

Si Jehova nagadumot sa mga impostor. Sa kongregasyon sang Dios, ang bisan sin-o nga padayon nga ‘nagapamulong sing kabutigan’ ‘ginabuno,’ kay ginsikway subong mga apostata. Ang “duha ka bahin” sa duta papason, samtang ang ikatlo nga bahin ulayon sa kalayo. Kaanggid sa sini, ang kalabanan sadtong nagaangkon nga Cristiano​—⁠yadtong yara sa Cristiandad​—⁠ginpapas ni Jehova. Kutob sang 1919 padayon, diutay lamang sang matutom kag hinaplas nga mga Cristiano ang nanawag sa ngalan ni Jehova kag nagpasakop sa iya proseso sa pag-ulay.​—⁠13:​1-9.

Ang katawhan ni Jehova makasalig sa iya pangamlig. Kon ang mga kaaway nagatinguha sa paglaglag sa matuod nga mga sumilimba, ang Dios magaamlig sa iya katawhan kag magapapas sa kadam-an ni Satanas. Ang pagtunga sang Bukid sang Olibo nagaresulta sa isa ka malaragwayon nga nalupyakan nga sa diin ang mga hinaplas makaagom sing pangamlig sa idalom sang bug-os uniberso nga Ginharian ni Jehova kag sang Mesianikong pangulohan sang iya Anak. May kapawa para sa matutom nga mga alagad sang Dios kag kadudulman para sa mga pungsod. Ang katawhan dapat mamili: Simbahon si Jehova upod sa iya katawhan ukon agumon ang dayon nga kalaglagan.​—⁠14:​1-21.

[Footnote]

[Kahon sa pahina 31]

MGA TEKSTO SA BIBLIA GIN-USISA

o 1:​3​—⁠Bisan pa nagbalik ang mga Judiyo gikan sa Babilonia sang 537 B.⁠C.⁠E., ginlaygayan man sila nga magbalik sa Dios sa bug-os kalag nga pagkamatinumanon kag pagsimba. Magahatag sila sing kitaon nga pamatuod sining pagbalik paagi sa pagpakigbahin sa pagpatindog liwat nga buluhaton tubtob matapos ang templo.

o 2:​1-5​—⁠Ayhan, ginatakus sang pamatan-on nga lalaki ang Jerusalem agod magpatindog sing nagaamlig nga kuta sa palibot sini. Apang ginpakita sang anghel sang Dios nga ang pag-uswag sang siudad indi paglatiran sang kuta. Wala sing tawo ang makapugong sa padayon nga pag-uswag sang Jerusalem. Si Jehova ang iya pangamlig, subong nga ginaamligan man niya karon ang hinaplas nga nagkalabilin nga mangin bahin sang langitnon nga Bag-ong Jerusalem.​—⁠Bugna 21:⁠2.

o 6:​11-15​—⁠Ang pagpurongpurong sa Mataas nga Saserdote nga si Josue wala maghimo sa iya nga saserdote kag hari, kay wala sia sa harianon nga linya ni David. Sa baylo, naghimo ini kay Josue nga isa ka matagnaon nga larawan sang Mesias, nga sa iya ang tagna nahanungod sa “Salingsing” bug-os nga natuman. (Zacarias 3:​8; Jeremias 23:5) Si Josue nagbulig sa pagtapos sa buluhaton nga pagpatindog liwat sa templo sang Jerusalem. Ang langitnon nga Saserdote-Hari, si Jesucristo, nagtapos sang buluhaton sa espirituwal nga templo.

o 11:​4-11​—⁠Ang mga katulad karnero nga katawhan “ilihawon” sa kahulugan nga ang mga manugbantay sang pangulohan nagahingalit sa ila. Paagi sa pagtawag sa isa ka katapo nga “Katahom” kag sa isa pa nga “Bugkos,” si Zacarias nagpanghikot kaangay sang isa ka manugbantay nga may itulukod sa pagtuytoy sa panong kag sungkud sa pagtabog sa mga sapat. (Salmo 23:4) Ginalandong niya si Jesus, nga ginpadala agod mangin espirituwal nga manugbantay apang ginsikway sang mga Judiyo. Subong nga ginbugto ni Zacarias ang itulukod nga Katahom, ang Dios wala na makig-angot sing matahom sa mga Judiyo, nagabungkag sang iya katipan upod sa ila. Kag subong nga ginbugto ni Zacarias ang itulukod nga Bugkos, ang pagkanselar sang Dios sang Kasuguan nga katipan upod sa mga Israel nagbilin sa mga Judiyo nga wala sing teokratikong wagkus sang paghiusa. Ang ila relihioso nga pagkadinahiusa nangin kalaglagan para sa ila paagi sa paglaglag sang mga Romano sa Jerusalem sang 70 C.⁠E.

o 12:​11​—⁠“Ang paglalaw sang Adadrimon” mahimo nga nagapatuhoy sa paglalaw sa kamatayon ni Hari Josias sang Juda. Ang Adadrimon mahimo nga isa ka lugar sa nalupyakan sang Megido, diin napatay sia sa patag-awayan kaupod ni Faraon Necho. Ang kamatayon ni Josias ginlalawan, ang pagpanalabiton ni Jeremias kag ang pagsambit sang mga manug-amba sa panalabiton.​—⁠2 Cronica 35:​20-25.

[Piktyur sa pahina 31]

Subong sang gintagna ni Zacarias, ang katawhan sang tanan nga pungsod nagapakig-upod karon sa espirituwal nga Israel