“Dalha Ninyo ang Bug-os nga Ikapulo sa Tambubo”

“Tilawi ninyo ako, palihug, sa sini, . . . kon indi ko pagbuksan sa inyo ang mga talambuan sang langit.”—MALAQUIAS 3:10.

1. (a) Sang ikalima nga siglo B.⁠C.⁠E., ano nga pangagda ang ginhatag ni Jehova sa iya katawhan? (b) Sang unang siglo C.⁠E., ano ang nangin resulta sang pag-abot ni Jehova sa templo agod maghukom?

SANG ikalima nga siglo B.C.E., ang mga Israelinhon wala magmatutom kay Jehova. Wala sila maghatag sing ikapulo kag ang mga sapat nga ginhalad nila sa templo indi nagakabagay. Walay sapayan, nanaad si Jehova nga kon dalhon nila ang bug-os nga ikapulo sa tambubo, ibubo niya ang pagpakamaayo tubtob wala na sing masudlan. (Malaquias 3:8-10) Mga 500 ka tuig sang ulihi, si Jehova, nga gintiglawas ni Jesus subong Iya mensahero sang katipan, nag-abot sa templo sa Jerusalem agod maghukom. (Malaquias 3:1) Ang Israel subong isa ka pungsod nasapwan nga kulang, apang ang mga indibiduwal nga nagbalik kay Jehova ginpakamaayo sing bugana. (Malaquias 3:7) Ginhaplas sila nga mangin espirituwal nga mga anak ni Jehova, isa ka bag-ong tinuga, “ang Israel sang Dios.”—Galacia 6:16; Roma 3:25, 26.

2. San-o ang Malaquias 3:​1-10 natalana nga makatigayon sing ikaduha nga katumanan, kag ginaagda kita sa paghimo sing ano may kaangtanan sa sini?

² Pagligad sang halos 1,900 ka tuig, sang 1914, si Jesus ginpalingkod sa trono subong Hari sa langitnon nga Ginharian sang Dios, kag ang gin-inspirar sang Dios nga mga pulong sa Malaquias 3:1-10 natalana para sa ikaduha nga katumanan. May kaangtanan sa sining makakulunyag nga hitabo, ang mga Cristiano karon ginaagda nga dalhon ang bug-os nga ikapulo sa tambubo. Kon himuon naton ini, kita man makatigayon sing mga pagpakamaayo tubtob wala na sing masudlan.

3. Sin-o ang mensahero nga nagahanda sang dalanon sa atubangan ni Jehova (a) sang unang siglo? (b) antes sang unang inaway kalibutanon?

³ Nahanungod sa iya pagkari sa templo, si Jehova nagsiling: “Yari karon! Ako magapadala sang akon mensahero, kag dapat niya ihanda ang dalanon sa una nakon.” (Malaquias 3:1) Subong katumanan sini sang unang siglo, si Juan Bautista nagkari sa Israel nga nagabantala sing paghinulsol sa mga sala. (Marcos 1:2, 3) May yara bala hilikuton sa paghanda para sa ikaduha nga pagkari ni Jehova sa iya templo? Huo. Sa sulod sang mga dekada sa wala pa ang unang inaway kalibutanon, ang mga Estudyante sang Biblia nag-abot sa danyag sang kalibutan nga nagapanudlo sing putli nga doktrina sang Biblia kag nagabuyagyag sing nagatamay sa Dios nga mga kabutigan, subong sang mga doktrina nga Trinidad kag kalayuhon nga impierno. Nagpaandam man sila tuhoy sa nagapakari sadto nga katapusan sang Panag-on sang mga Gentil sang 1914. Madamo ang nagbaton sa sining masanag nga mga manugdala sing kamatuoran.—Salmo 43:3; Mateo 5:14, 16.

4. Ano nga pamangkot ang husayon sa tion sang adlaw sang Ginuo?

⁴ Ang tuig 1914 amo ang pamuno sang ginatawag sang Biblia nga “adlaw sang Ginuo.” (Bugna 1:10) Dalagku nga mga hitabo ang natalana nga matabo sa sulod sadto nga adlaw, lakip ang pagpakilala sa “matutom kag mainandamon nga ulipon” kag ang pagtangdo sa sini sa “tanan nga pagkabutang sang [Agalon].” (Mateo 24:45-47) Sadto sang 1914, linibo ka iglesia ang nangangkon nga Cristiano. Diin nga grupo ang kilalahon sang Agalon, nga si Jesucristo, subong iya matutom kag mainandamon nga ulipon? Ina nga pamangkot husayon pa sa pag-abot ni Jehova sa templo.

Pag-abot sa Espirituwal nga Templo

5, 6. (a) Sa ano nga templo nag-abot si Jehova agod maghukom? (b) Ano nga paghukom ang nabaton sang Cristiandad gikan kay Jehova?

⁵ Apang, sa diin nga templo sia nag-abot? Maathag nga indi sa isa ka literal nga templo sa Jerusalem. Ang katapusan sadtong mga templo nalaglag sang 70 C.E. Apang may yara si Jehova isa ka daku pa nga templo nga ginlandong sang templo anay sa Jerusalem. Ginsambit ni Pablo ining daku pa nga templo kag ginpakita niya kon daw ano ini ka dungganon, nga may isa ka balaan nga duog sa langit kag isa ka luwang diri sa duta. (Hebreo 9:11, 12, 24; 10:19, 20) Diri sining daku nga espirituwal nga templo nag-abot si Jehova agod maghukom.—Ipaanggid ang Bugna 11:1; 15:8.

⁶ San-o ini natabo? Sang 1918, suno sa daku nga ebidensia nga matigayon.a Ano ang resulta? Tuhoy sa Cristiandad, nakita ni Jehova ang isa ka organisasyon nga nabulit sing dugo ang iya mga kamot, isa ka malaut nga relihiosong sistema nga nakighilawas sa sining kalibutan, nakig-alyansa sa mga manggaranon kag nagpigos sa mga imol, nagapanudlo sing paganong mga doktrina sa baylo nga buhaton ang putli nga pagsimba. (Santiago 1:27; 4:4) Paagi kay Malaquias, si Jehova nagpaandam: “Mangin saksi ako nga madagmit batok sa mga diwatahan, kag batok sa mga makihilahion, kag batok sa mga palasumpa sing butig, kag batok sa mga nagapangdaya sa suhol sang mga mamumugon, sa balo nga babayi kag sa ilo sa amay nga bata nga lalaki.” (Malaquias 3:5) Nahimo ini tanan sang Cristiandad kag nadugangan pa. Sang 1919 maathag nga nakita nga ginpamatbatan sia ni Jehova sing kalaglagan upod sa nabilin nga bahin sang Babilonia nga Daku, ang bug-os kalibutan nga edipisyo sang butig nga relihion. Kutob sadto, ang panawag ginpaguwa para sa mga matarong sing tagipusuon: “Guwa ka sa iya, katawhan nakon.”—Bugna 18:1, 4.

7. Sin-o ang ginkilala ni Jesus subong iya matutom kag mainandamon nga ulipon?

⁷ Sin-o, nian, ang matutom kag mainandamon nga ulipon? Sang unang siglo, nagsugod ini sa isa ka diutay nga grupo nga nagbaton sang pagpanaksi ni Juan Bautista kag ni Jesus, ang mensahero sang katipan. Sa aton siglo, amo ini sila ang pila ka libo nga nagbaton sang paghanda nga hilikuton sang mga Estudyante sang Biblia sa sulod sang mga tuig nga nagdul-ong sa 1914. Nagbatas sila sing mapintas nga mga pagtilaw sa tion sang unang inaway kalibutanon, apang ginpasundayag nila nga ang ila tagipusuon para kay Jehova.

Isa ka Hilikuton sa Pagpaninlo

8, 9. Sadto sang 1918, sa anong mga paagi ang matutom kag ang mainandamon nga ulipon nagkinahanglan nga tinluan, kag ano nga saad ang ginhatag ni Jehova sa sini?

⁸ Apang, bisan ining grupo ginkinahanglan nga tinluan. Ang iban nga nagbuylog sa ila nangin mga kaaway sang pagtuluuhan kag dapat kuhaon. (Filipos 3:18) Ang iban nagpangindi sa pagpas-an sang mga salabton nga nadalahig sa pag-alagad kay Jehova kag nagpalayo. (Hebreo 2:1) Luwas pa sa sina, may nabilin pa nga Babilonikong mga buhat nga dapat kuhaon. Subong isa ka organisasyon ang matutom kag mainandamon nga ulipon dapat man tinluan. Ang isa ka nagakaigo nga tindog sang pagkawalay nadampigan sa sining kalibutan dapat tun-an kag iaplikar. Kag samtang ang kalibutan dugang kag dugang pa nga nagalain, dapat sila makig-away sing mabaskog agod balabagan ang pagsulod sang moral kag espirituwal nga pagkadimatinlo sa kongregasyon.—Ipaanggid ang Judas 3, 4.

⁹ Huo, kinahanglan ang pagtinlo, apang mahigugmaon nga nanaad si Jehova tuhoy sa ginpalingkod sa trono nga si Jesus: “Magalingkod sia subong sang manugtunaw kag manug-ulay sing pilak kag putlion niya ang mga anak ni Levi; kag ulayon sila subong sang bulawan kag pilak, kag sila sa pagkamatuod mangin isa ka katawhan kay Jehova nga nagadulot sing halad sa pagkamatarong.” (Malaquias 3:3) Sugod sang 1918, gintuman ni Jehova ang iya saad kag gintinluan ang iya katawhan paagi sa sining mensahero sang katipan.

10. Ano nga sahi sang halad ang gindala sang katawhan sang Dios, kag ano nga pangagda ang ginhatag sa ila ni Jehova?

¹⁰ Ang hinaplas nga mga kauturan ni Cristo kag ang dakung kadam-an nga sang ulihi nagbuylog sa ila sa pag-alagad kay Jehova nakabenepisyo tanan gikan sa pagpanghikot ni Jehova subong manugtunaw kag manug-ulay sang pilak. (Bugna 7:9, 14, 15) Subong isa ka organisasyon sila nagkari, kag nagakari gihapon, nga nagadulot sing halad sa pagkamatarong. Kag ang ila halad ‘kalahamut-an kay Jehova, subong sang sa mga adlaw nga dumaan kag subong sang sa dumaan nga mga tuig.’ (Malaquias 3:4) Amo ini sila ang matagnaon nga gin-agda ni Jehova: “‘Dalha ninyo ang bug-os nga ikapulo sa tambubo, agod may kalan-on sa akon balay; kag tilawi ninyo ako, palihug, sa sini,’ siling ni Jehova sang kasoldadusan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo tubtob nga wala na sing masudlan.’”—Malaquias 3:10.

Mga Halad kag Ikapulo

11. Ngaa wala na ginapatuman ang mga halad suno sa Mosaikong kasuguan nga sistema?

¹¹ Sang adlaw ni Malaquias ang katawhan sang Dios nagdala sing literal nga mga halad kag ikapulo, subong sang uhay, prutas, kag mga sapat. Bisan sang adlaw ni Jesus, ang matutom nga mga Israelinhon nagdala sing literal nga mga halad sa templo. Apang, ini tanan nagbalhin sang mapatay si Jesus. Ang Kasuguan gindula, lakip ang sugo nga magdulot sing espisipiko nga materyal nga mga halad kag ikapulo. (Efeso 2:15) Gintuman ni Jesus ang matagnaon nga tipo sang mga halad sa idalom sang Kasuguan. (Efeso 5:2; Hebreo 10:1, 2, 10) Sa anong paagi, nian, ang mga Cristiano makadala sing mga halad kag ikapulo?

12. Ano nga sahi sang espirituwal nga mga halad kag mga sakripisyo ang ginahimo sang mga Cristiano?

¹² Para sa ila, ang mga halad talalupangdon nga isa ka espirituwal nga sahi. (Ipaanggid ang Filipos 2:17; 2 Timoteo 4:6.) Halimbawa, ginpatuhuyan ni Pablo ang pagbantala nga hilikuton subong isa ka halad sang sia nagsiling: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.” Ginsambit niya ang isa pa ka espirituwal nga sahi sang halad sang manugyan sia: “Dili pagkalimti ang paghimo sing maayo kag ang pagpaambit sang imo mga butang sa iban, kay sa amo nga mga halad nahamuot ang Dios.” (Hebreo 13:15, 16) Kon ginapalig-on sang mga ginikanan ang ila mga anak nga magsulod sa pag-alagad subong payunir, sarang masiling nga ginahalad nila sila kay Jehova, kaangay ni Jefte nga naghalad sang iya anak nga babayi subong “halad nga sinunog” sa Dios, nga nagpadaug sa iya.—Hukom 11:30, 31, 39.

13. Ngaa wala ginaobligar ang mga Cristiano sa paghatag sing literal nga ikapulo sang ila suweldo?

¹³ Apang, kumusta ang ikapulo? Obligado bala ang mga Cristiano nga painon ang ikapulo sang ila suweldo kag ihatag ini sa organisasyon ni Jehova, subong sang ginahimo sa pila ka iglesia sang Cristiandad? Indi, wala ina ginapatuman. Wala sing kasulatan nga nagasambit sina nga talaksan para sa mga Cristiano. Sang mangolekta si Pablo sing mga amot para sa mga imol sa Judea, wala sia magsambit sing isa ka espisipiko nga porsiento nga dapat ihatag. Sa baylo, sia nagsiling: “Maghimo ang tagsa ka tawo suno sa ginpamat-od niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.” (2 Corinto 9:7) Sa paghambal tuhoy sa mga yara sa pinasahi nga pag-alagad, ginpakita ni Pablo nga bisan pa ang iban nagakabagay nga ginsakdag sang boluntaryo nga mga amot, handa sia sa pagtrabaho kag sakdagon ang iya kaugalingon. (Binuhatan 18:3, 4; 1 Corinto 9:13-15) Wala sing ikapulo nga gintangdo para sa sining katuyuan.

14. (a) Ngaa ang pagdala sing ikapulo wala nagarepresentar sing aton paghatag sang aton tanan kay Jehova? (b) Ano ang ginarepresentar sang ikapulo?

¹⁴ Sing maathag, para sa mga Cristiano ang ikapulo nagasimbulo, ukon nagarepresentar, sa isa ka butang. Sanglit ikapulo ini kag ang numero nga napulo masami nagasimbulo sing dutan-on nga pagkakompleto sa Biblia, nagasimbulo bala ang ikapulo sang aton paghatag sang aton tanan kay Jehova? Indi. Sa pagdedikar naton sang aton kaugalingon kay Jehova kag ginsimbuluhan ini sing bawtismo sa tubig, sa amo sini nga tion nga ginahatag naton ang aton tanan sa iya. Kutob sa tion sang aton dedikasyon, wala na kita sing aton nga indi iya ni Jehova. Apang, ginatugutan ni Jehova ang mga indibiduwal nga gamiton ang ila manggad. Gani ang ikapulo nagarepresentar sang bahin sang butang nga aton ginadala kay Jehova, ukon ginagamit naton sa pag-alagad kay Jehova, subong tanda sang aton gugma para sa iya kag sang aton pagkilala sa katunayan nga kita iya. Ang modernong adlaw nga ikapulo indi kinahanglan nga mangin ikapulo lamang. Sa pila ka kaso kubos ini. Sa iban nga kaso kapin ini. Ang tagsa ka indibiduwal nagadala sang kon ano ang ginatiklod sang iya tagipusuon nga dalhon niya kag kon ano ang ginatugot sang iya mga kahimtangan.

15, 16. Ano ang nalakip sa aton espirituwal nga ikapulo?

¹⁵ Ano ang nalakip sa sining espirituwal nga ikapulo? Una, ginahatag naton kay Jehova ang aton tion kag kusog. Ang tion nga aton ginahinguyang sa mga miting, sa pagtambong sa mga asambleya kag sa mga kombension, sa pag-alagad sa latagon, ini tanan butang nga ginahatag kay Jehova—isa ka bahin sang aton ikapulo. Ang tion kag kusog nga ginahinguyang naton sa pagduaw sa nagabalatian kag sa pagbulig sa iban—sa liwat, bahin ini sang aton ikapulo. Amo man ang aton pagbulig sa pagpatindog sing mga Kingdom Hall kag pagpakigbahin sa hilikuton sa pagmentinar kag sa pagpaninlo sini.

¹⁶ Ang aton ikapulo nagalakip man sang aton pinansial nga mga amot. Bangod sang tumalagsahon nga pag-uswag sang organisasyon ni Jehova sining karon nga tinuig, nagdugang man ang pinansial nga mga obligasyon. Kinahanglan ang bag-o nga mga Kingdom Hall, upod sa bag-o nga mga pasilidad sang sanga kag bag-o nga mga Assembly Hall, kag sa pagmentinar sa mga napatindog na. Ang pagtabon sang mga gasto sang mga utod nga naggamit sang ila kaugalingon para sa pinasahi nga pag-alagad—sa masami may daku nga mga sakripisyo sa ila bahin—isa man ka daku nga hangkat. Sang 1991 ang bili sang pagmentinar sa mga misyonero, nagalakbay nga mga manugtatap, kag mga espesyal payunir lamang nakalab-ot sa kapin sa 40 milyones dolyares, tanan sini gin-aman paagi sa boluntaryo nga mga amot.

17. Ano gid ang dapat naton ihatag subong aton espirituwal nga ikapulo?

¹⁷ Ano gid ang ihatag naton subong aton espirituwal nga ikapulo? Wala nagapangayo si Jehova sing porsiento. Walay sapayan, ang aton pagkanadedikar, ang matuod nga gugma kay Jehova kag sa kauturan, subong man ang aton pagbatyag sing pagkahilingagawon sa pagka­realisar nga may mga kabuhi nga dapat luwason, nagapalig-on sa aton nga dalhon ang aton bug-os nga espirituwal nga ikapulo. Ginatiklod kita nga alagdon si Jehova tubtob sa labing daku nga kasangkaron nga mahimo. Kon magkinot kita ukon magpaganot sa paggamit sang aton kaugalingon ukon sang aton manggad, kasubong ini sang aton pagpangawat sa Dios.—Ipaanggid ang Lucas 21:1-4.

Ginpakamaayo Tubtob Wala Na sing Masudlan

18, 19. Paano ginpakamaayo ang katawhan ni Jehova bangod sang pagdala sing ila bug-os nga ikapulo?

¹⁸ Sugod sang 1919, ang katawhan ni Jehova maalwan nga naghatag sing ila tion, kusog, kag pinansial nga manggad para sa mga kinahanglanon sang pagbantala nga hilikuton. Gindala nila sa pagkamatuod ang bug-os nga ikapulo sa tambubo. Subong resulta, gintuman ni Jehova ang iya saad kag nagbubo sing pagpakamaayo tubtob wala na sing masudlan. Nakita ini sing daku gid sa ila pagdamo. Gikan sa pila lamang ka libo nga hinaplas nga nagaalagad kay Jehova sang nag-abot sia sa iya templo sang 1918, ang hinaplas sa karon upod ang ila mga kaupod, ang iban nga mga karnero, nagdamo tubtob sa kapin sa apat ka milyon sa 211 ka nanuhaytuhay nga kadutaan. (Isaias 60:22) Ginpakamaayo man sila sing padayon nga pag-uswag sa paghangop sang kamatuoran. Ang matagnaon nga pulong labi pa nga ginpat-od sa ila. Ang ila pagsalig sa katumanan sang mga katuyuan ni Jehova natukod sing malig-on. (2 Pedro 1:19) Sila sa pagkamatuod isa ka katawhan nga “tinudluan ni Jehova.”—Isaias 54:13.

¹⁹ Paagi kay Malaquias, si Jehova nagtagna sing dugang pa nga pagpakamaayo: “Nian ang mga nagakahadlok kay Jehova nagsinilingay, kag si Jehova nagdungog kag nagpamati. Kag ang tulun-an sang handumanan ginsulat sa atubangan niya para sa mga nagakahadlok kay Jehova kag para sa mga nagahunahuna sang iya ngalan.” (Malaquias 3:16) Sa tanan nga organisasyon nga nagapangangkon nga Cristiano, ang mga Saksi ni Jehova lamang ang nagahunahuna sang iya ngalan kag nagapakadaku sini sa tunga sang mga pungsod. (Salmo 34:3) Daw ano ka malipayon sila sa pasalig nga ginadumdom ni Jehova ang ila katutom!

20, 21. (a) Anong ginpakamaayo nga kaangtanan ang ginaagom sang matuod nga mga Cristiano? (b) Tuhoy sa Cristianismo, anong kinatuhayan ang nagaathag kag nagaathag pa?

²⁰ Ang hinaplas nga nagkalabilin pinasahi nga katawhan ni Jehova, kag ang dakung kadam-an, nga nagapanong sa pagpakig-upod sa ila, nagaani upod sa ila sing mga pagpakamaayo sang putli nga pagsimba. (Zacarias 8:23) Paagi kay Malaquias, si Jehova nanaad: “‘Sila mangin akon,’ siling ni Jehova sang kasoldadusan, ‘sa adlaw nga ako magahimo sing pinasahi nga pagkabutang. Kag magapakita ako sing kaluoy sa ila, subong sang tawo nga nagapakita sing kaluoy sa iya anak nga nagaalagad sa iya.’” (Malaquias 3:17) Daw ano nga pagpakamaayo nga si Jehova may mahigugmaon nga pagtamod sa ila!

²¹ Sa pagkamatuod, nagaathag sing dugang kag dugang pa ang kinatuhayan sang matuod nga mga Cristiano kag sang butig. Samtang ang katawhan ni Jehova nagatinguha sa pagtuman sang iya mga talaksan, ang Cristiandad labi kag labi pa nga nagalugdang sa lunang sang pagkadimatinlo sining kalibutan. Nagmatuod gid ang mga pulong ni Jehova: “Makita gid ninyo liwat ang kinatuhayan sang isa nga matarong kag isa nga malauton, sang isa nga nagaalagad sa Dios kag sang isa nga wala nagaalagad sa iya.”—Malaquias 3:18.

22. Ano nga mga pagpakamaayo ang mabaton naton kon padayon naton nga dalhon sa tambubo ang aton bug-os nga ikapulo?

²² Sa indi madugay, ang adlaw sang paghusay magaabot para sa butig nga mga Cristiano. “ ‘Yari karon! nagaabot ang adlaw nga nagadabdab subong sang horno, kag ang tanan nga bugalon kag ang tanan nga nagahimo sing pagkamalaut mangin ginalaban. Kag ang adlaw nga magaabot magasunog sa ila,’ siling ni Jehova sang kasoldadusan.” (Malaquias 4:1) Nahibaluan sang katawhan ni Jehova nga amligan niya sila sa amo nga tion, subong nga gin-amligan niya ang iya espirituwal nga pungsod sadto sang 70 C.E. (Malaquias 4:2) Daw ano ka malipayon sila nga makabaton sina nga pasalig! Busa, tubtob sa sina nga tion magpakita ang tagsatagsa sa aton sang aton apresasyon kag gugma para kay Jehova paagi sa pagdala sang aton bug-os nga ikapulo sa tambubo. Nian makasalig kita nga sia padayon nga magapakamaayo sa aton tubtob nga wala na sing masudlan.

[Footnote]

Mapaathag Mo Bala?

◻ Sa modernong mga tion, san-o nag-abot si Jehova sa templo upod sa iya mensahero sang katipan?

◻ Sin-o ang matutom kag mainandamon nga ulipon, kag anong pagtinlo ang ginkinahanglan nila pagligad sang 1918?

◻ Ano nga sahi sang espirituwal nga mga halad ang ginadala sang matuod nga mga Cristiano kay Jehova?

◻ Ano nga ikapulo ang ginaagda sa mga Cristiano nga dalhon sa tambubo?

◻ Anong mga pagpakamaayo ang ginaagom sang katawhan sang Dios paagi sa paghalad sing espirituwal nga mga ikapulo?

[Laragway sa pahina 15]

Ang aton espirituwal nga ikapulo nagalakip sing paghalad sang aton kusog kag manggad sa pagpatindog sing mga Kingdom Hall

[Laragway sa pahina 16]

Bangod sang pagpakamaayo ni Jehova sa iya katawhan, madamo ang palatindugon, lakip ang mga Kingdom Hall kag mga Assembly Hall