Ang Makakulugmat nga Adlaw ni Jehova Malapit Na

“Ang tulun-an nga handumanan ginsulat sa atubangan niya tungod sa mga nagakahadlok kay Jehova kag nagpainoino sa iya ngalan.”​—⁠MALAQUIAS 3:16.

 1, 2. Sa anong makakulugmat nga adlaw nagpaandam si Malaquias?

MAKAKULUGMAT! Sa pagpamanagbanag sang adlaw sadtong Agosto 6, 1945, isa ka daku nga siudad ang hinali nga nasunog. Mga 80,000 ang napatay! Madamo ang nahalitan sing malubha! Nagadabadaba ang kalayo! Ang nuklear nga bomba amo ang gintunaan sini. Kamusta ang mga Saksi ni Jehova sa sadto nga aksidente? Isa lamang sadto ang Saksi sa Hiroshima​—⁠nga nabilanggo bangod sang iya Cristianong integridad. Nawasak ang bilangguan, apang ang aton utod wala mahalitan. Subong sang ginsiling niya, ginpaguwa sia sa bilangguan sang bomba atomika​—⁠ayhan ang lamang maayo nga epekto nga nahimo sang bomba.

² Bisan pa makahaladlok yadto nga paglupok sang bomba, diutay lamang ini kon ipaanggid sa “daku kag makakulugmat nga adlaw ni Jehova” nga yara sa unahan. (Malaquias 4:⁠5) Ti, huo, may yara anay makakulugmat nga mga adlaw sang nagligad, apang ining adlaw ni Jehova magalabaw sa tanan sini.​—⁠Marcos 13:⁠19.

 3. Anong kinatuhayan ang matalupangdan sa ulot sang “tanan nga unod” kag sang panimalay ni Noe nga nagdul-ong sa Anaw?

³ Sang adlaw ni Noe, nga “ang tanan nga unod nagdunot sang ila dalanon sa duta,” kag ang Dios nagsiling: “Ang duta napun-an sing kasingki bangod sa ila; kag yari karon laglagon ko sila upod sa duta.” (Genesis 6:​12, 13) Subong sang narekord sa Mateo 24:​39, si Jesus nagsiling nga ang mga tawo “wala magsapak tubtob nga nag-abot ang anaw kag nagdaldal sa ila tanan.” Apang ang matutom nga si Noe, “ang manugbantala sang pagkamatarong,” kaupod sang iya mahinadlukon sa Dios nga panimalay, nakalampuwas sa sadto nga Anaw.​—⁠2 Pedro 2:⁠5.

 4. Anong nagapaandam nga halimbawa ang ginhatag sang Sodoma kag Gomorra?

⁴ “Subong man,” siling sang Judas 7, “ang Sodoma kag Gomorra kag ang mga siudad sa palibot nila, pagkatapos sila . . . nakighilawas sing tuman kag nagsunod sa unod sa dinagakaigo nga paggamit, ginbutang sa atubangan naton subong nagapaandam nga halimbawa sa pag-agom sing hudisyal nga silot sang walay katapusan nga kalayo.” Yadtong didiosnon nga katawhan nalaglag bangod sang ila makangilil-ad nga mahigko nga estilo sang pagkabuhi. Paandami ang mahunahunaon sa sekso nga mga komunidad sining modernong kalibutan! Talupangda, walay sapayan, nga kon paano ang mahinadlukon sa Dios nga si Lot kag ang iya mga anak nga babayi gintipigan nga buhi sa sadtong kalaglagan, ang mga sumilimba ni Jehova pagaamligan man sa nagahinampot sing madasig nga dakung kapipit-an.​—⁠2 Pedro 2:​6-9.

 5. Ano ang matun-an naton gikan sa mga paghukom nga ginpatuman sa Jerusalem?

⁵ Nian binagbinaga ang nagapaandam nga mga halimbawa nga ginhatag sang gingamit ni Jehova ang nagalikop nga kasuldadusan sa paghapay sa Jerusalem, ang mahimayaon nga siudad nga sadto anay nangin “ang kalipay sang bug-os nga duta.” (Salmo 48:⁠2) Ining masubo nga mga hitabo natabo, una sang 607 B.C.E. kag sa liwat sang 70 C.E., bangod ginbiyaan sang nagaangkon nga katawhan sang Dios ang matuod nga pagsimba. Sing makalilipay, ang matutom nga mga alagad ni Jehova nakalampuwas. Ang kalaglagan sang 70 C.E. (nga ginlarawan sa pahina 16) ginalaragway subong ang “kapipit-an nga ang kaangay wala pa natabo kutob sa ginsuguran sang tinuga nga gintuga sang Dios tubtob sa sadtong tion.” Gindula sini sing bug-os ang apostata nga Judiyong sistema sang mga butang, kag pat-od gid nga sa sinang bahin nga ini “indi na mahanabo liwat.” (Marcos 13:19) Apang bisan ining pagpatuman sang paghukom sang Dios isa lamang ka landong sang “dakung kapipit-an” nga nagabutang karon sa katalagman sa bug-os kalibutan nga sistema sang mga butang.​—⁠Bugna 7:⁠14.

 6. Ngaa ginatugutan ni Jehova ang mga kalamidad?

⁶ Ngaa gintugutan sang Dios ang makakulugmat nga mga kalamidad, kag ang pagkawasi sang madamo katama nga kabuhi? Sa natabo kay Noe, sa Sodoma kag Gomorra, kag sa Jerusalem, ginpatuman ni Jehova ang paghukom sa sadtong naglaglag sang ila dalanon sa duta, nga nagdagta sining matahom nga planeta paagi sa literal nga polusyon kag moral nga kahigkuan, kag nga nag-apostata, ukon nagsikway, sa matuod nga pagsimba. Nagatindog kita karon sa bibi sang nagalakip-sa-tanan nga pagpatuman sang paghukom nga nagahugakom sa bug-os nga kalibutan.​—⁠2 Tesalonica 1:​6-9.

“Sa Katapusan nga mga Adlaw”

 7. (a) Sa ano matagnaon ang dumaan nga mga paghukom sang Dios? (b) Anong mahimayaon nga paglaum ang yara sa unahan?

⁷ Yadtong mga kalaglagan sang una nga panahon matagnaon sang makakulugmat nga dakung kapipit-an nga ginlaragway sa 2 Pedro 3:​3-13. Ang apostol nagsiling: “Hibalua ninyo anay ini, nga sa katapusan nga mga adlaw ang mga mayubiton magaabot nga may pagyubit, nga nagalakat nahisuno sa ila kaugalingon nga mga kailigbon.” Nian, nagapatalupangod sang adlaw ni Noe, si Pedro nagsulat: “Ang kalibutan sadto nga tion nakaagom sing kalaglagan sang ginlapawan ini sang tubig. Apang sa amo man nga pulong ang mga langit kag ang duta sa karon gintigana sa kalayo kag gintipigan nga sa adlaw sang paghukom kag sa kalaglagan sang mga tawo nga didiosnon.” Pagkatapos sinang pinakadaku sa tanan nga mga kapipit-an, ang madugay na ginahulat nga paggahom sa Ginharian sang Mesias makatigayon sing bag-ong mga bahin​—⁠“ang bag-ong mga langit kag ang bag-ong duta . . . , kag sa sini magapuyo ang pagkamatarong.” Daw ano ka makalilipay nga paglaum!

 8. Paano ang mga hitabo sa kalibutan nagapadulong sa putukputukan?

⁸ Sa aton ika-20 nga siglo, ang mga hitabo sa kalibutan progresibo nga nagapadulong sa putukputukan. Bisan pa nga ang paghapay sa Hiroshima indi ang adlaw sang pag-usisa sang Dios, mahimo ini malakip sa “makahaladlok nga mga talan-awon” nga gintagna ni Jesus para sa tion sang katapusan. (Lucas 21:11) Ginlansar sini ang nuklear nga katalagman nga nagakabit gihapon kaangay sang isa ka mabagyuhon nga panganod sa ibabaw sang katawhan. Busa, ang isa ka pangulong-dinalan sa The New York Times sang Nobiembre 29, 1993, mabasa: “Ang mga Pusil Mahimo nga Tuktukon Diutay Apang ang Nuklear nga mga Hinganiban Mahining Gihapon.” Sa karon, ang mga inaway sang mga pungsod, mga rasa, kag mga tribo padayon nga may makahaladlok nga ani. Sa nagligad nga mga inaway ang kalabanan nga mga nasamaran amo ang mga soldado. Sa karon, 80 porsiento sang mga nasamad sa inaway ang ginareport nga mga sibilyan, dugang sa minilyon nga nagpalagyo gikan sa ila dutang natawhan subong mga refugee.

 9. Paano ginpakita sang mga lider sang relihion ang pagpakig-abyan sa kalibutan?

⁹ Masunson nga ginapakita, kag padayon nga ginapakita, sang mga lider sang relihion ang “pagpakig-abyan sa kalibutan” paagi sa aktibo nga pagpakigbahin sa mga inaway kag maduguon nga mga rebolusyon. (Santiago 4:⁠4) Ang iban nakigkooperar sa makagod nga mga kadalagkuan sang komersial nga kalibutan samtang nagahimo sila sing madamo nga mga armas kag nagapalapnag sing mga emperyo sang droga. Halimbawa, sa pagreport sang pag-asasinar sa isa ka hari-hari sa droga sa South America, ang The New York Times nagsiling: “Nagtago sang iya transaksion sa droga sa likod sang pagpanag-iya sang lehitimo nga manggad sa negosyo kag sang larawan sang isa nga nagahatag sing bulig, gin-isponsoran niya ang iya kaugalingon nga palatuntunan sa radyo kag masunson ginaupdan sang Romanong Katoliko nga mga pari.” Ang The Wall Street Journal nagreport nga dugang sa pagguba sa kabuhi sang minilyon nga nangin mga nagiyan sa droga, ining hari-hari sa droga personal nga nagsugo sang pagpatay sa linibo. Ang The Times sang London nagsiling: “Ang mga manugpatay masunson nagabayad para sa isa ka espesyal nga Misa agod magpasalamat . . . sa amo man nga tion ang misa sa lubong sang biktima ginahimo sa iban nga lugar.” Daw ano nga kalautan!

 10. Paano naton dapat tamdon ang nagalain nga mga kahimtangan sa kalibutan?

¹⁰ Sin-o ang nakahibalo kon anong kahalitan ang pagahimuon pa sining inspirado sang demonyo nga mga tawo sa sining duta? Subong sang ginasiling sang 1 Juan 5:​19, “ang bug-os nga kalibutan yara sa gahom sang isa nga malauton,” si Satanas nga Yawa. Karon “kailo sa duta kag sa dagat, kay ang Yawa nagpanaug sa inyo, nga may dakung kasingkal, nakahibalo nga may malip-ot lamang sia nga tion.” (Bugna 12:12) Apang, sing makalilipay, ang Roma 10:13 nagapasalig sa aton nga ang “kada isa nga nagatawag sa ngalan ni Jehova maluwas.”

Ang Dios Malapit Na Maghukom

 11. Anong mga kahimtangan sa Israel ang nagasakdag sang tagna ni Malaquias?

¹¹ Tuhoy sa malapit nga palaabuton sang katawhan, ginaathag sang tagna ni Malaquias kon ano ang mahanabo. Si Malaquias amo ang katapusan sa malaba nga linya sang antes-Cristiano nga Hebreong mga manalagna. Naeksperiensiahan sang Israel ang paglaglag sa Jerusalem sang 607 B.C.E. Apang 70 ka tuig sang ulihi ginpakita ni Jehova ang iya mahigugmaon nga kalulo paagi sa pagpasag-uli sadto nga pungsod sa iya duta. Apang, sa sulod sang isa ka gatos ka tuig, ang Israel gindaldal liwat sa apostasya kag sa kalautan. Wala ginpadunggan sang katawhan ang ngalan ni Jehova, ginlapas nila ang iya matarong nga mga kasuguan, kag gindagtaan ang iya templo paagi sa paghalad sing bulag, piang, kag masakiton nga mga sapat. Ginbulagan man nila ang mga asawa sang ila pagkapamatan-on agod makapangasawa sila sing dumuluong nga mga babayi.​—⁠Malaquias 1:​6-8; 2:​13-16.

 12, 13. (a) Anong pagtinlo ang kinahanglanon para sa hinaplas nga saserdutenhon nga klase? (b) Paano man nakabenepisyo ang dakung kadam-an paagi sa pagpanin⁠lo?

¹² Ang hilikuton sa pagtinlo kinahanglanon. Ginlaragway ini sa Malaquias 3:​1-4. Kaangay sang dumaan nga Israel, ang modernong-adlaw nga mga Saksi ni Jehova kinahanglan tinluan, gani ang hilikuton sa pagtinlo nga ginlaragway ni Malaquias maaplikar sa ila. Samtang nagahingapos ang nahaunang inaway kalibutanon, ang pila sa mga Estudyante sang Biblia, subong sang pagkilala anay sa mga Saksi, wala maghupot sing bug-os nga pagkawalay nadampigan sa mga buluhaton sang kalibutan. Sang 1918, ginpadala ni Jehova ang Iya “mensahero sang katipan,” nga si Cristo Jesus, sa Iya kahimusan sang espirituwal nga templo agod tinluan ang diutay nga grupo sang Iya mga sumilimba sa mga dagta sang kalibutan. Sing matagnaon, si Jehova namangkot: “Sin-o bala ang makabatas sang adlaw sang pagkari [sang mensahero], kag sin-o bala ang makatindog kon magpahayag sia? Kay sia kaangay sang kalayo sang manugtunaw kag kaangay sang habon sang mga manugpamunak. Kag magalingkod sia subong sang manugtunaw kag manug-ulay sang pilak kag putlion niya ang mga anak ni Levi [ang hinaplas nga saserdutenhon nga grupo]; kag ulayon sila subong sang bulawan kag pilak, tubtob nga magdulot sila kay Jehova sing mga halad sang pagkamatarong.” Subong natinluan nga katawhan, ginhimo nila ang kaangay sina!

¹³ Inang hinaplas nga saserdutenhon nga grupo nagadamo lamang sing 144,000. (Bugna 7:​4-8; 14:​1, 3) Apang, kamusta ang iban pa dedikado nga mga Cristiano karon? Nagadamo karon sing minilyon, ini nagahuman sa “dakung kadam-an” nga dapat man tinluan sa kalibutanon nga mga dalanon, ‘nagabunak sang ila mga panapton kag nagapaputi sini sa dugo sang Kordero.’ (Bugna 7:​9, 14) Busa, paagi sa pagpakita sing pagtuo sa halad gawad sang Kordero, nga si Cristo Jesus, nahuptan nila ang matinlo nga tindog sa atubangan ni Jehova. Ginpangakuan sila sing kaluwasan sa bug-os nga dakung kapipit-an, ang makakulugmat nga adlaw ni Jehova.​—⁠Sofonias 2:​2, 3.

 14. Anong mga pinamulong ang dapat pamatian sang katawhan sang Dios karon samtang padayon nila nga ginapalambo ang bag-ong personalidad?

¹⁴ Kaupod sang saserdutenhon nga nagkalabilin, dapat pamatian sining dakung kadam-an ang dugang pa nga pinamulong sang Dios: “Magapalapit ako sa inyo sa paghukom, kag mangin saksi ako nga madagmit batok sa mga diwatahan, kag batok sa mga makihilahion, kag batok sa mga palasumpa sing butig, kag batok sa mga nagapigos sang sinuhulan sa iya mga suhol, sang balo nga babayi kag sang ilo nga bata nga lalaki, kag sadtong nagapatalang sang manlulugayaw sa iya kinamatarong, kag wala nagakahadlok sa akon . . . Kay ako si Jehova; wala ako nagabaylo.” (Malaquias 3:​5, 6) Ang mga pagsulundan ni Jehova wala nagabag-o, gani sa kahadlok kay Jehova, dapat likawan sang katawhan niya karon ang tanan nga sahi sang idolatriya kag magmangin matinuuron, tampad, kag maalwan samtang padayon nila nga ginapalambo ang Cristianong personalidad.​—⁠Colosas 3:​9-14.

 15. (a) Anong maluluy-on nga imbitasyon ang ginapalab-ot ni Jehova? (b) Paano naton malikawan nga ‘kawatan’ si Jehova?

¹⁵ Ginapalab-ot ni Jehova ang imbitasyon kay bisan sin-o nga mahimo nagtalikod sa iya matarong nga mga dalanon, nga nagasiling: “Balik kamo sa akon, kag magabalik ako sa inyo.” Kon sila mamangkot: “Sa diin bala magabalik kami?” sia nagasabat: “Nagapangawat kamo sa akon.” Kag bilang sabat sa dugang pa nga pamangkot: “Sa diin bala nagapangawat kami sa imo?” si Jehova nagasiling nga nangawat sila sa iya paagi sa indi pagdala sang ila labing maayo subong mga dulot para sa pag-alagad sa iya templo. (Malaquias 3:​7, 8) Bangod nangin bahin sang katawhan ni Jehova, luyag gid naton ihugod ang labing maayo nga bahin sang aton enerhiya, ikasarang, kag materyal nga pagkabutang sa pag-alagad kay Jehova. Busa, sa baylo nga kawatan ang Dios, ‘padayon [naton] nga ginapangita anay ang ginharian kag ang iya pagkamatarong.’​—⁠Mateo 6:⁠33.

 16. Anong pagpalig-on ang masapwan naton sa Malaquias 3:​10-12?

¹⁶ May daku nga padya para sa tanan nga nagabiya sang maiyaiyahon, materyalistiko nga mga dalanon sang kalibutan, subong sang ginapakita sang Malaquias 3:​10-12: “ ‘Tilawi ako, palihug, sa sini,’ siling ni Jehova sang kasuldadusan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.’ ” Para sa tanan nga mga mainapresyahon, si Jehova nagasaad sing espirituwal nga kabuganaan kag pagkamabungahon. Sia nagadugang: “Ang tanan nga pungsod magatawag sa inyo nga malipayon, kay kamo mangin duta nga kalaluyagan.” Indi bala nga amo ina sa tunga sang minilyon sang mapasalamaton nga katawhan sang Dios sa bug-os nga duta karon?

Ang mga Manughupot sing Integridad sa Tulun-an sang Kabuhi

 17-19. (a) Paano ang aton mga kauturan naapektuhan sang mga gamo didto sa Rwanda? (b) Upod ang anong pagtuo nga ining tanan nga mga matutom nagpadayon?

¹⁷ Sa sining punto, mahimo kita magkomento nahanungod sa integridad sang aton mga kauturan nga lalaki kag babayi sa Rwanda. Pirme sila nagdala sing labing maayo nga espirituwal nga mga dulot sa espirituwal nga balay sang pagsimba ni Jehova. Halimbawa, sa ila “Balaan nga Pagpanudlo” nga Distrito nga Kombension sang Disiembre 1993, ang ila 2,080 ka manugbantala sang Ginharian nakaani sing kabug-usan nga tumalambong nga 4,075. May 230 ka bag-ong mga Saksi ang nabawtismuhan, kag tuhoy sa ila, halos 150 ang nagpalista sa aux­il­iary payunir nga pag-alagad pagkadason nga bulan.

¹⁸ Sang ang kaakig sa tunga sang mga tribo nagsilabo sang Abril 1994, sa dimagkubos 180 ka Saksi, lakip ang manugtatap sang siudad sa Kigali, ang kapital, kag ang iya bug-os nga pamilya, ginpatay. Ang anom ka manugbadbad sang sanga sang Watch Tower Society sa Kigali, apat sa ila mga Hutu kag duha mga Tutsi, nagpadayon sa pagpangabudlay sa mga pila ka semana sa idalom sang daku nga mga pamahog, tubtob ang mga Tutsi kinahanglan magpalagyo, agod lamang mapatay sa isa ka checkpoint. Sang ulihi, dala kon ano ang nabilin sang ila kagamitan sa kompyuter, ang apat nga nabilin nagpalagyo pakadto sa Goma, sa Zaire, diin matutom sila nga nagpadayon sa pagbadbad sang Ang Lalantawan sa Kinyarwanda nga hambal.​—⁠Isaias 54:⁠17.

¹⁹ Pirme una nga ginpangabay sining refugee nga mga Saksi, bisan sa makahaladlok nga mga kahimtangan, ang espirituwal nga pagkaon sangsa materyal nga mga aman. Sa daku nga sakripisyo, ang mahigugmaon nga mga kauturan gikan sa pila ka kadutaan nakapadala sing mga suplay para sa ila. Paagi sa baba kag sa ila pagkahim-ong sa idalom sang mahuol nga kahimtangan, ining mga refugee naghatag sing dalayawon nga panaksi. Nagpadayon sila sa pagkamatuod sa pagdala sang ila pinakamaayo sa pagsimba kay Jehova. Ginpakita nila ang ila pagtuo, kaangay sang ginpabutyag ni Pablo sa Roma 14:8: “Kon kita nagakabuhi, nagakabuhi kita kay Jehova, kag kon kita nagakamatay, nagakamatay kita kay Jehova. Gani bisan kita nagakabuhi ukon nagakamatay, iya kita ni Jehova.”

 20, 21. (a) Kay sin-o mga ngalan ang wala nasulat sa tulun-an sang handumanan ni Jehova? (b) Kay sin-o mga ngalan ang makita sa tulun-an, kag ngaa?

²⁰ Si Jehova nagahupot sing rekord sang tanan nga nagaalagad sa iya nga may integridad. Ang tagna ni Malaquias nagapadayon: “Nian ang mga nagakahadlok kay Jehova nagsinilingay, ang tagsa sa iya kaupod, kag si Jehova padayon nga nagdungog kag nagpamati. Kag ang tulun-an nga handumanan ginsulat sa atubangan niya tungod sa mga nagakahadlok kay Jehova kag nagapainoino sa iya ngalan.”​—⁠Malaquias 3:16.

²¹ Daw ano ka importante karon nga ipakita naton ang diosnon nga kahadlok sa pagpadungog sa ngalan ni Jehova! Sa paghimo sini, indi kita magaagom sing malain nga paghukom, kaangay sadtong madinayawon nga nagasakdag sa mga sistema sining kalibutan. Ang Bugna 17:8 nagasiling nga “wala masulat ang ila mga ngalan sa linukot sang kabuhi.” Sing makatarunganon, ang pangunang ngalan nga nasulat sa tulun-an sang kabuhi ni Jehova amo ang iya sang Pangulong Ahente sang kabuhi, ang kaugalingon nga Anak sang Dios, si Jesucristo. Ang Mateo 12:21 nagasiling: “Sa pagkamatuod, sa iya ngalan magalaum ang mga pungsod.” Ang halad-gawad ni Jesus nagagarantiya sing kabuhi nga walay katapusan sa tanan nga nagatuo sa sini. Daw ano nga pribilehiyo nga ang aton indibiduwal nga mga ngalan idugang sa ngalan ni Jesus sa sinang linukot!

 22. Anong kinatuhayan ang makita kon ipatuman ni Jehova ang paghukom?

²² Kamusta ang mga alagad sang Dios sa paghukom? Si Jehova nagasabat sa Malaquias 3:​17, 18: “Magapakita ako sing kaawa sa ila, subong sang tawo nga nagapakita sing kaawa sa iya kaugalingon nga anak nga nagaalagad sa iya. Kag pat-od gid nga makita ninyo liwat nga katawhan ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.” Ang pagbinahinbahin mangin maathag sa tanan: ang malauton, nga ginpain para sa walay katapusan nga pagkautod, kag ang matarong, nga nahamut-an para sa kabuhi nga walay katapusan sa sakop sang Ginharian. (Mateo 25:​31-46) Busa ang dakung kadam-an sang mga katulad-karnero nga mga tawo makalampuwas sa daku kag makakulugmat nga adlaw ni Jehova.

Madumduman Mo Bala?

◻ Anong mga paghukom ang ginpatuman ni Jehova sang panahon sang Biblia?

◻ Paano ang mga kahimtangan karon nagaanggid sadtong dumaan nga panahon?

◻ Anong pagtinlo ang natabo bilang katumanan sang tagna ni Malaquias?

◻ Kay sin-o mga ngalan ang nasulat sa tulun-an sang handumanan sang Dios?