Nahamut-an Sia sing Daku ni Jehova

“MAAYONG ADLAW, isa nga nahamut-an sing daku, si Jehova kaupod nimo.” Daw ano nga panamyaw! Ang humalambal wala sing liwan kundi ang anghel nga si Gabriel. Ginahambalan niya ang isa ka lamharon nga babayi nga may mapainubuson nga tagipusuon​—⁠si Maria, anak nga babayi ni Heli. Tuig 3 B.C.E., kag ang duog amo ang siudad sang Nazaret.​—⁠Lucas 1:​26-28.

Kalaslon na si Maria kay Jose nga panday. Suno sa Judiyong kasuguan kag kinabatasan, ginatamod na sia subong iya kasado nga asawa. (Mateo 1:18) Kaangay ni Maria, sia man may manubo nga tindog sa kabuhi. Ngaa, nian, gintamyaw sia sang anghel subong ang isa nga nahamut-an sing daku?

Ang Iya Makatilingala nga Pribilehiyo

Si Gabriel nagdugang: “Dili ka mahadlok, Maria, kay nakaagom ikaw sing bugay sa Dios; kag, yari karon! magapanamkon ka sa imo tiyan kag magaanak sing lalaki, kag tawgon mo ang iya ngalan Jesus. Mangin daku sia kag tawgon nga Anak sang Labing Mataas; kag si Jehova nga Dios magahatag sa iya sing trono sang iya amay nga si David, kag magahari sia sa panimalay ni Jacob sa gihapon, kag ang iya ginharian walay katapusan.”​—⁠Lucas 1:​29-33.

Natingala kag naligban, si Maria namangkot: “Paano bala ang pagkahimo sini, kay wala pa ako makahulid sa isa ka lalaki?” Si Gabriel nagsabat: “Ang balaan nga espiritu magakara sa imo, kag ang gahom sang Labing Mataas magalandong sa imo. Gani ang bata nga matawo sa imo tawgon nga balaan, ang Anak sang Dios.” Agod dulaon ang mga pangduhaduha, ang anghel nagdugang: “Yari karon! si Elisabet nga imo himata nagpanamkon man sing anak nga lalaki, sa iya katigulangon, kag ini ikan-um nga bulan sa iya, nga gintawag nga baw-as; kay sa Dios walay bisan ano nga indi mahimo.”​—⁠Lucas 1:​34-37.

Gilayon nga ginbaton ni Maria ining dalayawon nga pribilehiyo sang pag-alagad. Sing kinabubut-on, apang may pagpaubos, sia nagsabat: “Yari karon! Ang ulipon nga babayi ni Jehova! Himuon ini sa akon suno sa imo pulong.” Sa sina, si Gabriel nagtaliwan. Si Maria dalidali nga nagkadto sa isa ka siudad sa kabakuloran nga rehiyon sang Juda. Sang pag-abot niya sa puluy-an sang saserdote nga si Zacarias kag sang iya asawa, nga si Elisabet, nakita niya ang mga kahimtangan nga kasubong gid sa ginlaragway sang anghel. Daw ano nga kalipay ang nagpuno sa tagipusuon ni Maria! Ang iya mga bibig nagpamulong sang pagdayaw kay Jehova.​—⁠Lucas 1:​38-55.

Nangin Asawa Sia ni Jose

Isa ka ulay ang halinan sang tawhanon nga lawas ni Jesus, bangod ining pagkabun-ag gintagna. (Isaias 7:14; Mateo 1:​22, 23) Apang ngaa kinahanglan ang isa ka kalaslon nga ulay? Agod amanan sang isa ka amay-amay nga makahatag sa bata sang legal nga kinamatarong sa trono ni Hari David. Sanday Jose kag Maria sakop sang tribu ni Juda kag kaliwat ni Hari David. Gani ang kinamatarong sa pagkamanunubli ni Jesus doble nga napalig-on. (Mateo 1:​2-16; Lucas 3:​23-33) Amo ini kon ngaa ang anghel sang ulihi nagpasalig kay Jose nga indi magpangalag-ag nga kuhaon si Maria subong iya legal nga asawa, bisan pa nagamabdos sia.​—⁠Mateo 1:​19-25.⁠a

Ang kasuguan sa buhis nga ginpatuman ni Agosto Cesar nag-obligar kanday Jose kag Maria nga magparehistro sa Betlehem. Samtang didto, nagbun-ag sia sa iya panganay nga anak nga lalaki. Ang mga manugbantay nagduaw sa pagtan-aw sa lapsag, kag ginhimaya nila ang iya Amay, si Jehova. Pagkatapos sang 40 ka adlaw sang pagpaninlo suno sa Mosaikong Kasuguan, nagkadto si Maria sa templo sa Jerusalem sa paghalad sing katumbasan para sa iya mga sala. (Levitico 12:​1-8; Lucas 2:​22-24) Huo, bangod sia wala ginpanamkon nga putli, kag gani indi hilway gikan sa mantsa sang sala, ang iya ginpanubli nga dikahimpitan dapat tabunan sang mga halad sang katumbasan.​—⁠Salmo 51:⁠5.

Samtang didto sa templo sanday Maria kag Jose, ang tigulang nga si Simeon kag ang may edad na nga manalagna nga babayi nga si Ana nakatigayon sing pribilehiyo nga makita ang Anak sang Dios. Indi si Maria ang sentro sang igtalupangod. (Lucas 2:​25-38) Sang ulihi, ang mga Mago nagyaub kay Jesus indi sa iya.​—⁠Mateo 2:​1-12.

Pagkatapos nakapalagyo sa Egipto kag nagpabilin didto tubtob nga ang malauton nga si Herodes napatay, nagbalik ang mga ginikanan ni Jesus kag nagpuyo sa diutay nga minuro sang Nazaret. (Mateo 2:​13-23; Lucas 2:39) Didto ginpadaku nanday Jose kag Maria si Jesus sa idalom sang diosnon nga mga kahimtangan sa pamilya.

May Iban Pa nga mga Anak si Maria

Sang ulihi, gin-amanan ni Maria kag Jose si Jesus sing unudnon nga mga utod nga lalaki kag babayi. Sang nagbalik si Jesus sa iya tumandok nga banwa sang Nazaret sa pagministeryo, nakilala sia sang iya mga katubotubo. “Indi bala ini ang anak sang panday?” pamangkot nila. “Indi bala ang iya iloy ginatawag si Maria, kag ang iya mga utod si Santiago kag si Jose kag si Simon kag si Judas? Kag ang iya utod nga mga babayi, wala bala diri sila tanan kaupod naton?” (Mateo 13:​55, 56) Ginapatuhuyan sang mga taga-Nazaret ang pisikal nga pamilya nanday Jose kag Maria, lakip na ang iya mga anak nga lalaki kag babayi nga ila nakilal-an subong mga utod ni Jesus sa unod.

Ining mga utod nga lalaki kag babayi indi mga pakaisa ni Jesus. Indi man sila mga disipulo niya, ukon espirituwal nga mga utod nga lalaki kag babayi, bangod ang Juan 2:12 nagpatuhay sing maathag sa ulot sining duha ka grupo sa pagsiling: “Sia [si Jesus] kag ang iya iloy kag ang iya mga utod kag ang iya mga disipulo nagdulhog sa Capernaum.” Tinuig sang ulihi sa Jerusalem, nakita ni apostol Pablo si Cefas, ukon Pedro, kag nagdugang: “Wala ko makita ang iban nga mga apostol; luwas lamang kay Santiago, ang utod sang Ginuo.” (Galacia 1:​19, The Jerusalem Bible) Dugang pa, ang pinamulong nga si Jose “wala maghulid kay [Maria] tubtob nga nag-anak sia sing lalaki” nagapakita nga ang amay-amay ni Jesus nakighulid sa iya asawa sang ulihi kag nangin amay sang iban pa niya nga mga anak. (Mateo 1:25) Sing nahisuno, ang Lucas 2:7 nagatawag kay Jesus nga iya “panganay” nga anak.

Mahinadlukon sa Dios nga Iloy

Subong mahinadlukon sa Dios nga iloy, si Maria nagbulig kay Jose sa pagtudlo sa iya mga anak sa pagkamatarong. (Hulubaton 22:⁠6) Ang iya bugana espirituwal nga pamulong sang gintamyaw ni Elisabet nagapakita nga isa sia ka makugi nga estudyante sang Kasulatan. Sa sadto nga tion ginbalikwat sang iloy ni Jesus ang mga balatyagon gikan sa ambahanon ni Ana kag ginpakita ang iya ihibalo sa mga salmo, sa maragtason kag matagnaon nga mga sinulatan, kag sa mga tulun-an ni Moises. (Genesis 30:13; 1 Samuel 2:​1-10; Hulubaton 31:28; Malaquias 3:12; Lucas 1:​46-55) Saulado ni Maria ang matagnaon nga mga hitabo kag mga halambalanon, ginhuptan ini sa iya tagipusuon, kag ginpamalandungan ini sa iya hunahuna. Busa nasangkapan sia sing maayo sa pagpakigbahin sa pagtudlo sa lamharon nga si Jesus subong ginikanan.​—⁠Lucas 2:​19, 33.

Ang 12 anyos, natudluan sing maayo nga si Jesus nagpadayag sing ihibalo sa Kasulatan nga nagpatingala sa maalam nga mga tawo sa templo. Bangod nahamulag sia sa iya mga ginikanan sa panahon sadtong Paskuwa, ang iya iloy nagsiling: “Anak, ngaa bala naghimo ka sa amon sing subong? Yari karon ang imo amay kag ako nagpangita sa imo nga nagakasubo.” Si Jesus nagsabat: “Ngaa bala nga nagpangita kamo sa akon? Wala bala kamo makahibalo nga kinahanglan nga yara ako sa balay sang akon Amay?” Wala makahangop sang kahulugan sining sabat, naghipos na lang si Maria. Sa pagbalik sa Nazaret, si Jesus “nagdugang sa kaalam kag sa kataason kag nahamut-an sang Dios kag sang mga tawo.”​—⁠Lucas 2:​42-⁠52.

Si Maria Subong Disipulo ni Jesus

Daw ano ka nagakaigo nga si Maria nangin debotado nga disipulo ni Jesus sang ulihi! Mahagop sia kag wala sing handum nga mangin bantog walay sapayan sang iya pinasahi hatag-Dios nga katungdanan. Nahibaluan ni Maria ang Kasulatan. Kon inyo usisaon ini sing kinaugalingon, indi ninyo sia masapwan nga ginalaragway nga may halo, nga nagapungko sa isa ka trono subong “reyna nga iloy” kag ginalikupan sang silak sang himaya ni Cristo. Sa baylo, masapwan ninyo sia sa higad sing kadam-an, malayo sa kabantugan.​—⁠Mateo 13:​53-56; Juan 2:⁠12.

Gin-upangan ni Jesus ang sobra nga pagtahod kay Maria sa tunga sang iya mga sumulunod. Sang nagapamulong sia sa isa ka okasyon, “isa ka babayi gikan sa kadam-an ang nagsinggit, ‘Bulahan ang tiyan nga nagdala sa imo kag ang mga suso nga imo ginsusuhan!’ ‘Apang,’ sia nagsabat, ‘bulahan ang mga nagapamati sang pulong sang Dios kag nagabantay sini.’ ” (Lucas 11:​27, 28, The New American Bible, ginbadbad sang mga katapo sang Cath­o­lic Bib­li­cal As­so­ci­a­tion of Amer­i­ca) Sa isa ka sinalusalo sa kasal, si Jesus nagsiling kay Maria: “Babayi, ano bala ang imo sa akon? Wala pa mag-abot ang akon takna.” (Juan 2:⁠4) Ang iban nga pagbadbad mabasa nga: “Itugyan ang mga butang sa akon.” (Weymouth) “Indi ako pagtudlui.” (An American Translation) Huo, gintahod ni Jesus ang iya iloy, apang wala niya sia pagsimbaha.

Walay Katapusan nga mga Pribilehiyo

Daw ano nga mga pribilehiyo ang naagom ni Maria! Ginbun-ag niya si Jesus. Nian ginbatiti niya kag ginhanas ang lamharon nga bata. Sang ulihi, nagtuo sia, nangin disipulo kag espirituwal nga utod ni Cristo. Sa aton katapusan Makasulatanhon nga pagpasiplat kay Maria, makita naton sia sa ibabaw nga hulot sa Jerusalem. Didto sia kaupod sang mga apostoles ni Jesus, sang iya iban nga anak nga lalaki, kag sang pila ka matutom nga mga babayi​—⁠tanan mga sumilimba ni Jehova.​—⁠Binuhatan 1:​13, 14.

Sang ulihi, napatay si Maria kag ang iya lawas nagbalik sa yab-ok. Kaangay sa iban una nga hinaplas nga mga sumulunod sang iya pinalangga nga anak, nagtulog sia sa kamatayon tubtob sa gintangdo nga tion sang Dios nga banhawon sia subong isa ka espiritu nga tinuga nga may dimamalatyon nga kabuhi sa langit. (1 Corinto 15:​44, 50; 2 Timoteo 4:⁠8) Daw ano nga kalipay sining “nahamut-an sing daku” karon sa presensia ni Jehova nga Dios kag ni Jesucristo!

[Footnote]

[Piktyur sa pahina 31]

Si Maria nahamut-an sing daku subong iloy ni Jesus