Ang Kabuhi kag Ministeryo ni Jesus

Pagpangutul sing Uhay sa Adlaw nga Inugpahuway

HALIN sa Jerusalem, si Jesus kag ang iya mga disipulo nagbalik sa Galilea. Tigpamulak sadto, kag ang mga uma may mga uyas. Gingutom ang mga disipulo. Gani nagpangutul sila sing mga uhay kag nagkaon. Apang sanglit Adlaw nga Inugpahuway, ang ginhimo nila gintalupangod.

Bag-o lang gintinguhaan sang relihioso nga mga lider sa Jerusalem nga patyon si Jesus bangod sang paglapas kuno sa Adlaw nga Inugpahuway. Karon ang mga Fariseo amo ang nagsumbong. “Toloka! Ang imo mga disipulo nagahimo sing indi tugot nga pagbuhaton sa Adlaw nga Inugpahuway,” panumbongon nila.

Ang mga Fariseo nagsiling nga ang pagpangutul sing uyas kag pagnusnos sini sa kamut agod kaunon pag-ani kag paglinas. Apang ang ila estrikto nga pagpatpat sa kon ano ang nagalakip sa trabaho naghimo sa Adlaw nga Inugpahuway nga isa ka lulan, samtang gintuyo ini nga mangin makalilipay, makapalig-on sa espirituwal nga tion. Gani si Jesus nagsabat paagi sa Makasulatanhon nga mga halimbawa nga nagapakita nga wala gid pagtuyoa ni Jehova nga Dios inang dinagakaigo nga pag-aplikar sing estrikto sa Iya kasugoan sa Adlaw nga Inugpahuway.

Sang gingutom, siling ni Jesus, si David kag ang iya tinawo nagdulog sa tabernakulo kag nagkaon sang tinapay nga pahayag. Bisan pa nga ang tinapay wala na sa atubangan ni Jehova kag gin-islan sing bag-o, ginatigana ini sing kinaandan para kaunon sang mga saserdote. Apang, sa idalom sang mga sirkunstansia, si David kag ang iya tinawo wala pagtagudilii bangod sang pagkaon sini.

Nagahatag sing isa pa ka halimbawa, si Jesus nagsiling: “Wala bala ninyo mabasahi sa Kasugoan nga sa adlaw nga inugpahuway ang mga saserdote sa templo nagapasipala sa adlaw nga inugpahuway kag dimalinapason sila?” Huo, bisan sa Adlaw nga Inugpahuway ang mga saserdote padayon nga nagaihaw kag nagahimo sang iban pa nga hilikuton sa templo sa paghanda sa mga sapat nga ihalad! “Apang ako nagasiling sa inyo,” siling ni Jesus, “ang isa nga daku pa sa templo yari diri.”

Nagapaandam sa mga Fariseo, si Jesus nagpadayon: “Kon nahibaloan ninyo kon ano ang kahulugan sini, ‘Buot ko ang kaluoy, kag indi ang halad,’ wala ninyo kuntani mapakamalaut ang mga dimalinapason.” Nian naghinakop sia: “Ang Anak sang tawo Ginuo sa adlaw nga inugpahuway.” Ano ang buot silingon ni Jesus sa sina?

Ginpatuhoyan ni Jesus ang iya mahidaiton nga paggahom sa Ginharian sa isa ka libo ka tuig. Sa 6,000 ka tuig ang katawhan nag-antos sing mabudlay nga pagkaulipon sa idalom ni Satanas nga Yawa, kag ang kasingki kag inaway amo ang kinaandan na karon. Sa pihak nga bahin, ang daku nga kasugoan ni Cristo sa adlaw nga inugpahuway mangin tion sa pagpahuway gikan sa tanan nga pag-antos kag pamigos. Mateo 12:1-8; Levitico 24:5-9; 1 Samuel 21:1-6; Numeros 28:9; Oseas 6:6.

◆ Ano ang ginsumbong batok sa mga disipulo ni Jesus, kag paano ini ginsabat ni Jesus?

◆ Ano nga sayop sang mga Fariseo ang ginpakilala ni Jesus?

◆ Sa anong paagi si Jesus “Ginuo sang adlaw nga inugpahuway”?