Ang Kabuhi kag Ministeryo ni Jesus

Si Jesus—Sentro sang Binais

WALA madugay sa tapos sia maabiabi sa puluy-an ni Simon, ginsugdan ni Jesus ang ikaduha nga paglakbay sa pagbantala sa Galilea. Sa iya nagligad nga paglakbay sa teritoryo, gin-updan sia sang iya nahaunang mga disipulo, ni Pedro, ni Andres, ni Santiago, kag ni Juan. Apang karon gin-updan sia sang 12 ka apostoles, kag sang iban man nga mga babayi. Naglakip ini kay Maria Magdalena, Susana, kag Joana, nga ang bana isa ka opisyal ni Hari Herodes.

Samtang nagasaku ang ministeryo ni Jesus, nagadugang man ang binais nahanungod sa iya hilikuton. Isa ka ginsudlan sang yawa nga tawo, nga isa man ka bulag kag apa, ang gindala kay Jesus. Sang gin-ayo sia ni Jesus, sa bagay nga nahilway sia sa kontrol sang yawa kag makahambal kag makakita, ang kadam-an naorongan. Nagsiling sila: “Indi bala ayhan nga Anak sia ni David?”

Ang kadam-an nagtipon sa balay nga ginadayonan ni Jesus sa bagay nga sia kag ang iya mga disipulo indi makakaon. Luwas sa mga nagakabig sa iya nga ayhan sia ang ginsaad nga “Anak ni David,” yara ang mga escriba kag mga Fariseo nga nagkadto halin pa sa Jerusalem agod pakahuy-an sia. Sang mabatian sang mga himata ni Jesus ang kinagamo nahanungod kay Jesus, nagkadto sila sa pagdakop sa iya. Tungod sa ano nga rason?

Bueno, ang mga utod mismo ni Jesus wala pa magtuo nga sia Anak sang Dios. Subong man, ang kagamo kag pinuyas nga gintuga niya bug-os gid nga tuhay sa Jesus nga nakilala nila samtang nagadaku sia sa Nasaret. Gani nagpati sila nga may diperensya sa hunahuna si Jesus. “Buang sia,” siling nila, kag luyag nila sia nga dakpon kag dalhon palayo.

Apang maathag ang pamatuod nga gin-ayo ni Jesus ang tawo nga ginsudlan sang yawa. Nahibaloan sang mga escriba kag mga Fariseo nga indi nila mapanghiwala ang pagkamatuod sini, kag ang iban pa nga milagro ni Jesus. Gani agod pakahuy-an si Jesus ginsilingan nila ang mga tawo: “Ining tawo wala nagasubol sang mga yawa, kundi paagi kay Beelzebub nga prinsipe sang mga yawa.”

Nahibal-an ang ila panghunahuna, ginpakadto ni Jesus ang mga escriba kag mga Fariseo sa iya kag nagsiling: “Ang tagsa ka ginharian nga napihak batok sa iya kaugalingon mamusmus, kag ang tagsa ka banwa ukon panimalay nga napihak batok sa iya kaugalingon magtindog. Kag kon si Satanas nagasubol kay Satanas, napihak sia batok sa iya kaugalingon; nian paano bala ang pagtindog sang iya ginharian?”

Daw ano ka makahalapay nga lohiko! Sanglit ang mga Fariseo nagaangkon nga ang mga tawo gikan sa ila tunga nagpaguwa sing mga yawa, namangkot man si Jesus: “Kon ako paagi kay Beelzebub nagasubol sang mga yawa, paagi kay sin-o bala nagasubol sa ila ang inyo mga anak?” Sa iban nga hambal, ang ila panumbongon batok kay Jesus masumbong man sa ila. Nian si Jesus nagpaandam: “Apang kon paagi sa espiritu sang Dios ako nagasubol sang yawa, nian ang ginharian sang Dios nag-abot na sa inyo.”

Agod iilustrar nga ang iya pagpaguwa sang mga yawa pamatuod sang iya gahom sa ibabaw ni Satanas, si Jesus nagsiling: “Paano bala ang pagsulud sang isa ka tawo sa balay sang makusog nga tawo kag pag-ati sang iya pagkabutang kon indi anay niya paggapuson ang makusog? Nian ugaling atihon niya ang iya balay. Ang wala nagaupod sa akon batok sa akon, kag ang wala nagapanipon upod sa akon nagapaaplaag.” Ang mga Fariseo maathag nga batok kay Jesus, nagapakita sang ila kaugalingon nga mga ahente ni Satanas. Ginapaaplaag nila ang mga Israelinhon palayo sa iya.

Busa, si Jesus nagapaandam sa sining sataniko nga mga manugpamatok nga “ang pasipala batok sa espiritu indi mapatawad.” Sia nagapaathag: “Ang bisan sin-o nga nagapamulong sing isa ka pulong batok sa Anak sang tawo mapatawad ini sa iya; apang ang bisan sin-o nga magpamulong batok sa balaan nga espiritu indi mapatawad ini sa iya, bisan karon nga sistema ukon sa palaabuton.” Ang mga escriba kag mga Fariseo nakahimo sinang dimapatawad nga sala paagi sa malaut nga pagpatungod kay Satanas kon ano ang milagruso lamang nga pagpanghikot sang balaan nga espiritu sang Dios. Mateo 12:22-32; Marcos 3:19-30; Juan 7:5.

◆ Paano ang ikaduha nga paglakbay ni Jesus sa Galilea tuhay gikan sa nahauna?

◆ Ngaa ang mga himata ni Jesus nagpanikasog sa pagdakop sa iya?

◆ Paano gintinguhaan sang mga Fariseo nga pakanubuon ang mga milagro ni Jesus, kag paano sila gin-atubang ni Jesus?

◆ Sa ano nakasala yadtong mga Fariseo, kag ngaa?