Magpakaisog!

“Magpakaisog kag magsiling: ‘Si Jehova amo ang akon manugtabang.’ ”​—⁠HEBREO 13:⁠6.

 1. Ano nga kasidla ang ginpakita sadtong nakatuon sang kamatuoran sang Dios sang unang siglo C.E.?

NAHAUNANG-SIGLO sadto sang aton Kumon nga Dag-on. Nag-abot na ang madugay na ginahulat nga Mesias. Gintudluan niya sing maayo ang iya mga disipulo kag ginsugdan ang kinahanglanon nga pagbantala nga hilikuton. Tion na para mabatian sang mga tawo ang maayong balita sang Ginharian sang Dios. Gani, ang mga lalaki kag mga babayi nga nakatuon sang kamatuoran masidla nga nagbantala sadtong makalilipay nga mensahe.​—⁠Mateo 28:​19, 20.

 2. Ngaa ang mga Saksi ni Jehova nagakinahanglan sing kaisog karon?

² Wala pa natukod ang Ginharian sadto nga mga adlaw. Apang ang Gintangdo nga Hari, nga si Jesucristo, nagtagna sang iya palaabuton nga dikitaon nga presensia nga may kagamhanan sa Ginharian. Pagatandaan ini sing mga butang subong sang walay kaanggid nga inaway, tiggulutom, kamatay, linog, kag bug-os kalibutan nga pagbantala sang maayong balita. (Mateo 24:​3-14; Lucas 21:​10, 11) Subong mga Saksi ni Jehova, kinahanglan naton ang kaisog agod malandas ining mga kahimtangan kag paghingabot nga aton naeksperiensiahan. Busa mapuslanon nga binagbinagon ang mga sugilanon sa Biblia nahanungod sa maisugon nga mga manugbantala sang Ginharian sang unang siglo C.E.

Kaisog sa Pag-ilog kay Cristo

 3. Sin-o ang nagahatag sing labing maayo nga halimbawa sang kaisog, kag ano ang ginsiling sang Hebreo 12:​1-3 tuhoy sa iya?

³ Si Jesucristo nagaaman sing labing maayo nga halimbawa sang kaisog. Sa tapos nahinambitan ang ‘daku nga panganod’ sang maisog nga mga saksi ni Jehova sa wala pa ang panahon sang mga Cristiano, si apostol Pablo nagpatuhoy kay Jesus paagi sa pagsiling: “Sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang, nga nagatulok kay Jesus, nga Pangulo nga Ahente kag Manughimpit sang aton pagtuo. Kay tungod sa kalipay nga ginbutang sa iya atubang nagbatas sia sang usok sang pag-antos, nga nagatamay sang kahuluy-an, kag nagalingkod sa tuo sang trono sang Dios. Talupangda sia nga nagbatas sang amo nga pagsumpong sang mga makasasala batok sa iya kaugalingon, agod nga indi kamo paglapyuon ukon pagpunawon sa inyo mga kalag.”​—⁠Hebreo 12:​1-3.

 4. Paano ginpakita ni Jesus ang kaisog sang ginsulay ni Satanas?

⁴ Pagkatapos sang iya bawtismo kag sang 40 ka adlaw nga pamalandong, pangamuyo kag puasa sa kamingawan, maisog nga ginpamatukan ni Jesus si Satanas. Ginsulay sang Yawa nga himuon ang mga bato nga tinapay, si Jesus nagdumili bangod sayop ang magmilagro agod paayawan ang personal nga luyag. “Nasulat na,” siling ni Jesus, “Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.” Sang ginhangkat sia ni Satanas nga maglukso sa alibungan sang templo, si Jesus nagdumili bangod sala ang magsulay sa Dios agod luwason sia gikan sa mahimo nga paghikog. “Nasulat na man,” siling ni Cristo, “Dili mo pagsulayon si Jehova nga imo Dios.” Gintanyag ni Satanas sa iya ang tanan nga mga ginharian sa kalibutan para sa isa ka “buhat sang pagsimba,” apang si Jesus wala mag-apostata kag magsakdag sang hangkat sang Yawa nga ang mga tawo indi magapabilin nga matutom sa Dios sa idalom sang pagtilaw. Gani si Jesus nagsiling: “Palayo ka, Satanas! Kay nasulat na, ‘Magsimba ka kay Jehova nga imo Dios, kag sa iya lamang maghimo ka sing balaan nga pag-alagad.’ ” Sa sina, ang Manunulay “nagbiya sa iya tubtob sa isa pa ka kombeniente nga tion.”​—⁠Mateo 4:​1-11; Lucas 4:⁠13.

 5. Ano ang makabulig sa aton sa pagbato sa pagsulay?

⁵ Si Jesus nagpasakop kay Jehova kag nagsumpong kay Satanas. Kon aton man ‘ipasakop ang aton kaugalingon sa Dios kag sumpungon ang Yawa, magapalagyo sia gikan sa aton.’ (Santiago 4:⁠7) Kaangay ni Jesus, maisugon naton nga mabatas ang pagsulay kon iaplikar naton ang Kasulatan, ayhan nagabalikwat pa sini sa tion nga ginasulay kita sa paghimo sing sala. Mahimo bala nga masulay kita sa pagpangawat kon sa sadto nga tion ginsulit naton sa aton kaugalingon ang sugo sang Dios: “Dili ka magpangawat”? Mahimo bala nga ang duha ka Cristiano makahimo sing seksuwal nga imoralidad kon bisan ang isa sa ila maisugon nga nagbalikwat sang pinamulong: “Dili ka magpanglahi”?​—⁠Roma 13:​8-10; Exodo 20:​14, 15.

 6. Paano si Jesus isa ka maisugon nga mandadaug sa kalibutan?

⁶ Subong mga Cristiano nga ginadumtan sining kalibutan, malikawan naton ang espiritu kag makasasala nga paggawi sini. Si Jesus nagsiling sa iya mga sumulunod: “Sa kalibutan may kapipit-an kamo, apang magpakaisog kamo! Nadaug ko ang kalibutan.” (Juan 16:33) Nadaug niya ang kalibutan bangod sang indi pag-ilog sa sini. Ang iya halimbawa subong mandadaug kag ang resulta sang iya nagahupot sing integridad nga dalanon makahatag sa aton sing kaisog nga ilugon sia paagi sa pagpabilin nga nahamulag sa sining kalibutan kag wala madagtaan sini.​—⁠Juan 17:⁠16.

Kaisog sa Pagpadayon sa Pagbantala

 7, 8. Ano ang magabulig sa aton sa pagpadayon nga magbantala walay sapayan sang paghingabot?

⁷ Si Jesus kag ang iya mga disipulo nagsalig sa Dios para sa kaisog nga magpabilin nga magbantala walay sapayan sang paghingabot. Si Cristo masidla nga naghimo sang iya ministeryo walay sapayan sang paghingabot, kag pagkatapos sang Pentecostes 33 C.E., ang iya ginhingabot nga mga sumulunod nagpadayon sa pagbantala sang maayong balita bisan pa gintinguhaan sang Judiyong relihiosong mga lider nga pauntaton sila. (Binuhatan 4:​18-20; 5:29) Ang mga disipulo nangamuyo: “Jehova, tan-awa ang ila mga pagpahog, kag itugot sa imo mga ulipon ang pagpamulong sang imo pulong sa bug-os nga kasidla.” Kag ano ang natabo? “Sang nakapangamuyo sila, nag-uyog ang duog diin sila nagtipon,” siling sang kasaysayan, “kag napuno sila tanan sang balaan nga espiritu kag nagpamulong sila nga may kasidla sang pulong sang Dios.”​—⁠Binuhatan 4:​24-31.

⁸ Sanglit ang kalabanan sang mga tawo sa karon indi mabinatunon sang maayong balita, ang kasidla masunson nga kinahanglanon agod magpadayon nga bantalaan sila. Ilabi na kon ginahingabot, ang mga alagad ni Jehova nagakinahanglan sing hatag-Dios nga kaisog agod makapanaksi sing maid-id. (Binuhatan 2:​40; 20:24) Gani ang maisog nga manugbantala sang Ginharian nga si Pablo nagsiling sa batan-on, kubos ka eksperiensiado nga masigkamanugpangabudlay: “Ang Dios wala maghatag sa aton sang espiritu sang katalaw kundi sang gahom kag gugma kag kaligdong sang hunahuna. Nian dili mo ikahuya ang pagpanaksi nahanungod sa aton Ginuo, ukon sa akon nga iya binilanggo, kundi mag-ambit ka sang imo bahin sang pag-antos tungod sa maayong balita sa gahom sang Dios.” (2 Timoteo 1:​7, 8) Kon mangamuyo kita sing kaisog, padayon kita nga makabantala, kag bisan ang paghingabot indi makakuha sa aton sang aton kalipay subong mga manugbantala sang Ginharian.​—⁠Mateo 5:​10-12.

Kaisog sa Pagdampig kay Jehova

 9, 10. (a) Ano ang ginhimo sang unang siglo nga mga Judiyo kag mga Gentil agod mangin bawtismado nga mga sumulunod ni Cristo? (b) Ngaa kinahanglan ang kaisog agod mangin isa ka Cristiano?

⁹ Madamong unang-siglo nga mga Judiyo kag mga Gentil ang maisog nga nagbiya sang dimakasulatanhon nga mga tradisyon agod mangin bawtismado nga mga sumulunod ni Cristo. Wala madugay pagkatapos sang Pentecostes 33 C.E., “ang kadamuon sang mga disipulo nagdugang sing tama gid sa Jerusalem; kag isa ka daku nga kadam-an sang saserdote nagmatinumanon sa pagtuo.” (Binuhatan 6:⁠7) Yadtong mga Judiyo may kaisog sa pagbugto sang relihiosong mga kaangtanan kag sa pagbaton kay Jesus subong ang Mesias.

¹⁰ Sugod sang 36 C.E., madamong Gentil ang nangin tumuluo. Sang nabatian ni Cornelio, sang mga miembro sang iya panimalay, kag sang iban pa nga mga Gentil, ang maayong balita, gilayon nila ini nga ginpatihan, ginbaton ang balaan nga espiritu, kag “ginbawtismuhan sa ngalan ni Jesucristo.” (Binuhatan 10:​1-48) Sa Filipos ang isa ka Gentil nga manugbantay sang bilangguan kag ang iya panimalay gilayon nga nagbaton sang Cristianismo, kag “nagpabawtismo sia sa gilayon upod ang bug-os nga panimalay.” (Binuhatan 16:​25-34) Kinahanglan ang kaisog sa paghimo sing amo nga mga tikang bangod ang mga Cristiano ginhingabot anay, dipopular nga minoridad. Sa gihapon amo sila. Apang kon wala pa ikaw makahimo sing dedikasyon sa Dios kag mabawtismuhan subong isa sang mga Saksi ni Jehova, indi bala ayhan tion na para sa imo nga maghimo sining maisugon nga mga tikang?

Kaisog sa Nabahinbahin nga mga Panimalay

 11. Anong maayong halimbawa sang kaisog ang gin-aman nanday Eunice kag Timoteo?

¹¹ Si Eunice kag ang iya anak nga lalaki nga si Timoteo naghatag sing maayong halimbawa sang maisog nga pagtuo sa isa ka nabahinbahin sang relihion nga panimalay. Bisan pa pagano ang bana ni Eunice, gintudluan niya ang iya anak sing “balaan nga mga sinulatan” kutob sa pagkalapsag. (2 Timoteo 3:​14-17) Sang nangin Cristiano, ginpakita niya ang ‘pagtuo nga wala sing bisan anong pagkasalimpapaw.’ (2 Timoteo 1:⁠5) May kaisog man sia sa pagsugid sang Cristianong panudlo kay Timoteo samtang nagapakita sing pagtahod sa pagkaulo sang iya dimatinuuhon nga bana. Sa pagkamatuod, ang iya pagtuo kag kaisog ginpadyaan sang ang iya natudluan sing maayo nga anak ginpili nga mag-upod kay Pablo sa misyonero nga mga paglakbay. Makapalig-on gid ini sa Cristianong mga ginikanan nga yara sa kaanggid nga mga kahimtangan!

 12. Nangin ano nga sahi sang tawo si Timoteo, kag sin-o karon ang nagapamatuod nga kaangay sa iya?

¹² Bisan pa si Timoteo nagapuyo sa nabahinbahin sa relihion nga panimalay, maisugon niya nga ginbaton ang Cristianismo kag nangin espirituwal nga tawo nga tuhoy sa iya si Pablo nakasiling: “Nagalaum ako kay Ginuong Jesus sa pagpadala kay Timoteo sa inyo [mga taga-Filipos] sa indi madugay, agod nga ako lipayon sang balita nahanungod sa inyo. Wala ako sing tawo nga kaangay sa iya nga magakabalaka sing matuod gid sa inyo kahimtangan. . . . Kamo nakahibalo sang pamatuod nga ginhatag niya tuhoy sa iya kaugalingon, kon paano nga subong nga anak upod sa amay nag-alagad sia upod sa akon sa pagpauswag sang maayong balita.” (Filipos 2:​19-22) Sa pagkamatuod, madamong bata nga lalaki kag bata nga babayi sa nabahinbahin sing relihion nga mga puluy-an ang maisog nga nagabaton sang matuod nga Cristianismo. Kaangay ni Timoteo nagahatag sila sing pamatuod tuhoy sa ila kaugalingon, kag nalipay gid kita nga bahin sila sang organisasyon ni Jehova!

Kaisog sa ‘Pagpakatalagman sang Aton Kaugalingon’

 13. Sa anong paagi nagpakita sing kaisog sanday Aquila kag Priscilla?

¹³ Si Aquila kag ang iya asawa, nga si Priscilla (Prisca), naghatag sing halimbawa paagi sa maisugon nga ‘pagpakatalagman sang ila kaugalingon’ tungod sa masigkamanugpangabudlay. Gin-abiabi nila si Pablo sa ila puluy-an, nangabudlay upod sa iya sa paghimo sing mga layanglayang, kag ginbuligan sia sa pagpatindog sing bag-ong kongregasyon sa Corinto. (Binuhatan 18:​1-4) Sa ila 15-ka-tuig nga pag-abyanay, ginpakatalagman nila bisan ang ila kabuhi tungod sa iya sa wala mahibalui nga paagi. Nagapuyo sila sa Roma sang ginsilingan niya ang mga Cristiano didto: “Ipaalinton ang akon panamyaw kay Prisca kag kay Aquila nga akon mga masigkamanugpangabudlay kay Cristo Jesus, nga tungod sa akon kabuhi ginpakatalagman nila ang ila kaugalingon nga kabuhi, kag indi lamang ako ang nagapasalamat sa ila kundi man ang tanan nga kongregasyon sang mga pungsod.”​—⁠Roma 16:​3, 4.

 14. Paagi sa pagpakatalagman sang ila kaugalingon para kay Pablo, sanday Aquila kag Prisca nagpanghikot nahisuno sa anong sugo?

¹⁴ Bangod sang pagpakatalagman sang ila kabuhi para kay Pablo, si Aquila kag si Prisca nagpanghikot suno sa pinamulong ni Jesus: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay.” (Juan 13:34) Ini nga sugo “bag-o” bangod labaw ini sa ginapatuman sang Mosaikong Kasuguan nga higugmaon sang isa ang iya isigkatawo subong sang paghigugma niya sang iya kaugalingon. (Levitico 19:18) Nagapatuman ini sing nagasakripisyo sa kaugalingon nga gugma nga nagalab-ot tubtob sa paghatag niya sang iya kabuhi tungod sa iban, subong sang ginhimo ni Jesus. Ang manunulat nga si Ter­tul­lian sang ikaduha kag ikatlo nga siglo C.E. nagbalikwat sang pinamulong sang mga kalibutanon nahanungod sa mga Cristiano sang nagsulat sia: ­“ ‘Tan-awa,’ siling nila, ‘kon paano sila nagahigugmaanay . . . kag kon paano sila handa bisan mapatay tungod sa isa kag isa.’ ” (Apology, kapitulo XXXIX, 7) Ilabi na sa tunga sang paghingabot nga mahimo kita maobligar sa pagpakita sing utudnon nga gugma paagi sa maisugon nga pagrisgo sang aton kabuhi agod malikawan ang pagpadayag sa mga masigkatumuluo sa kapintas ukon sa kamatayon sa mga kamot sang kaaway.​—⁠1 Juan 3:⁠16.

Ang Kaisog Nagadala sing Kalipay

 15, 16. Subong sang ginpakita sang Binuhatan kapitulo 16, paano maangot ang kaisog kag kalipay?

¹⁵ Si Pablo kag si Silas nagahatag sing pamatuod nga ang pagpakita sing kaisog sa tunga sang mga pagtilaw nagadala sing kalipay. Bangod sa sugo sang sibil nga mga mahistrado sa siudad sang Filipos, ginbunal sila sing dayag sing mga bilugon kag ginsulod sa pandog sang bilangguan. Apang, wala sila magkurog sing masinulub-on sa kahadlok. Walay sapayan sang ila mabudlay nga mga kahimtangan, may hatag-Dios nga kaisog gihapon sila kag kalipay nga ginadala sini sa matutom nga mga Cristiano.

¹⁶ Sang mga tungang gab-i, si Pablo kag si Silas nagpangamuyo kag nag-ambahan sa Dios. Sa hinali, ang linog nag-uyog sang bilangguan, naghubad sang ila mga gapos, kag nagbukas sang mga ganhaan. Ang hinadlukan nga manugbantay sang bilangguan kag ang iya panimalay masidla nga ginpanaksihan nga nagdul-ong sa pagbawtismo sa ila subong mga alagad ni Jehova. Sia gid “nagkalipay pati ang iya bug-os nga panimalay nga nagtuo sia sa Dios.” (Binuhatan 16:​16-34) Daw ano nga kalipay ang mahimo nga ginhatag sini kay Pablo kag kay Silas! Bangod nabinagbinag na ini kag ang iban pa Makasulatanhon nga mga halimbawa sang kaisog, paano kita makapabilin nga maisog subong mga alagad ni Jehova?

Padayon nga Magpakaisog

 17. Subong sang ginpakita sang Salmo 27, paano ang paglaum kay Jehova naangot sa kaisog?

¹⁷ Ang paglaum kay Jehova nagabulig sa aton sa pagpabilin nga maisog. Si David nag-amba: “Maglaum kay Jehova; magpakaisog kag magpakabakod ang imo tagipusuon. Huo, maglaum kay Jehova.” (Salmo 27:14) Ginapakita sang Salmo 27 nga si David nagsalig kay Jehova subong “kalig-unan” sang iya kabuhi. (Bersikulo 1) Nakita kon paano nakig-angot ang Dios sa mga kaaway ni David sang nagligad naghatag sa iya sing kaisog. (Bersikulo 2, 3) Ang apresasyon sa sentro sang pagsimba ni Jehova isa man ka rason. (Bersikulo 4) Ang pagsalig sa bulig, pangamlig, kag paghilway ni Jehova nagpalig-on man sang kaisog ni David. (Bersikulo 5-10) Mabuligon man ang padayon nga pagtuon sa mga prinsipio sang matarong nga dalanon ni Jehova. (Bersikulo 11) Ang masinaligon nga pagpangamuyo sing kaluwasan gikan sa iya mga kaaway, upod ang pagtuo kag paglaum, nagbulig kay David nga magmaisog. (Bersikulo 12-14) Mahimo naton mapabakod ang aton kaisog sa kaanggid nga mga paagi, busa nagapakita nga kita tunay nga ‘nagalaum kay Jehova.’

 18. (a) Ano ang nagapakita nga ang tayuyon nga pagpakig-upod sa masigkasumilimba ni Jehova makabulig sa aton sa pagpabilin nga maisog? (b) Ano ang papel sang Cristianong mga miting sa pagpalig-on sing kaisog?

¹⁸ Ang tayuyon nga pagpakig-upod sa mga masigkasumilimba ni Jehova makabulig sa aton sa pagpabilin nga maisog. Sang nag-apelar si Pablo kay Cesar kag naglakbay sa Roma, ginsugat sia sang mga masigkatumuluo sa Foro ni Appio kag sa Tres Tavernas. “Sang nakita niya sila,” siling sang kasaysayan, “si Pablo nagpasalamat sa Dios kag nagpakaisog.” (Binuhatan 28:15) Samtang tayuyon kita nga nagatambong sa mga miting, ginapamatian naton ang laygay ni Pablo: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtililipon sing tingob, subong sang kinabatasan sang iban, kundi nagapalig-unay ang isa kag isa, kag labi pa gid sa ginatan-aw ninyo nga nagapalapit ang adlaw.” (Hebreo 10:​24, 25) Ano ang buot silingon sang pagpalig-unay sa isa kag isa? Ang pagpalig-on nagakahulugan sing “pagpukaw nga may kaisog, espiritu, ukon paglaum.” (Webster’s Ninth New Collegiate Dictionary) Daku ang mahimo naton sa pagpukaw sa iban nga may kaisog, kag ang ila pagpalig-on mahimo man nga makapabakod sini nga kinaiya sa aton.

 19. Paano ang mga Kasulatan kag Cristianong mga publikasyon naangot sa aton pagpabilin nga maisugon?

¹⁹ Agod magpabilin nga maisog, dapat naton tun-an sing tayuyon ang Pulong sang Dios kag iaplikar ang laygay sini sa aton kabuhi. (Deuteronomio 31:​9-12; Josue 1:⁠8) Ang aton regular nga pagtuon dapat magalakip sang Cristianong mga publikasyon pasad sa mga Kasulatan, kay ang maayong laygay nga ginaaman sini magabulig sa aton sa pag-atubang sa mga pagtilaw sang pagtuo upod ang hatag-Dios nga kaisog. Gikan sa mga kasaysayan sang Biblia, nakita naton kon paano ang mga alagad ni Jehova nagmaisog sa lainlain nga mga kahimtangan. Sa karon, ayhan wala naton mahibalui kon paano ang subong sina nga impormasyon makabulig sa aton, apang ang Pulong sang Dios may gahom, kag kon ano ang matun-an naton gikan sa sini pirme nga makabulig sa aton. (Hebreo 4:12) Halimbawa, kon ang kahadlok sa tawo nagasugod nga magaapektar sang aton ministeryo, mahimo naton dumdumon kon paano si Enoc maisugon nga nagpaalinton sang mensahe sang Dios sa mga didiosnon.​—⁠Judas 14, 15.

 20. Ngaa masiling nga ang pangamuyo kinahanglanon agod magpabilin kita nga maisog subong mga alagad ni Jehova?

²⁰ Agod magpabilin nga maisugon subong mga alagad ni Jehova, dapat kita magpadayon sa pangamuyo. (Roma 12:12) Ginbatas ni Jesus ang mga pagtilaw sa iya sing maisugon bangod sia “nagpangamuyo kag nag-ampo, nga may mabaskog nga pagsinggit kag mga luha, sa Isa nga makaluwas sa iya sa kamatayon, kag ginapamatian sia tungod sang iya kahadlok nga diosnon.” (Hebreo 5:⁠7) Paagi sa pagpabilin nga suod sa Dios sa pangamuyo, indi kita mangin kaangay sang kalibutanon nga mga matalaw nga gintuyo nga magaagom sing “ikaduhang kamatayon” nga gikan sini wala na sing pagkabanhaw. (Bugna 21:⁠8) Ang balaan nga pangamlig kag kabuhi sa bag-ong kalibutan sang Dios para sa iya maisugon nga mga alagad.

 21. Ngaa ang matutom nga mga Saksi ni Jehova mahimo magmaisog?

²¹ Subong matutom nga mga Saksi ni Jehova, indi naton dapat kahadlukan ang yawan-on kag tawhanon nga mga kaaway, kay may supurta kita sang Dios kag maisugon nga halimbawa ni Jesus subong bug-os kalibutan nga mandadaug. Ang makapalig-on sa espirituwal nga pagpakig-upod sa katawhan ni Jehova magabulig man sa aton nga magmaisog. Ang aton kaisog ginapalig-on man paagi sa panuytoy kag laygay sang mga Kasulatan kag sang Cristianong mga publikasyon. Kag ang kasaysayan sang Biblia tuhoy sa mga alagad sang Dios sang nagligad nagabulig sa aton sa paglakat sa iya mga dalanon sing maisugon. Busa, sa sining makahalanguyos nga katapusan nga mga adlaw, mag-uswag kita sing masidla sa balaan nga pag-alagad. Huo, magpakaisog ang tanan nga katawhan ni Jehova!

Paano Mo Sabton?

◻ Paano ang halimbawa ni Jesus makahatag sa aton sing kaisog?

◻ Ano ang naghatag sing kaisog kay Jesus kag sa iya mga disipulo nga magpadayon sa pagbantala?

◻ Ngaa ang mga Judiyo kag mga Gentil nagkinahanglan sing kaisog sa pagdampig kay Jehova?

◻ Anong halimbawa sang kaisog ang ginhatag nanday Eunice kag Timoteo?

◻ Ano ang pamatuod nga ang kaisog nagadala sing kaisog bisan sa tunga sang paghingabot?

[Piktyur sa pahina 18]

Kaangay ni Jesus, mabatuan naton ang pagsulay kon iaplikar kag balikwaton naton ang mga Kasulatan