‘Pagkasapo sa Isa ka Mutya nga may Daku nga Balor’

“Ang ginharian sang mga langit amo ang tulumuron nga ginapanikasugan sang mga tawo, kag ginaagaw ini sang mga nagapanikasog.”​—MATEO 11:12.

1, 2. (a) Anong tumalagsahon nga kinaiya ang ginlaragway ni Jesus sa isa niya ka parabola tuhoy sa Ginharian? (b) Ano ang ginsiling ni Jesus sa iya parabola tuhoy sa mutya nga may daku nga balor?

MAY yara bala isa ka butang nga ginapabaloran mo gid amo nga handa ka nga isakripisyo ang tanan mo nga ginapanag-iyahan agod maangkon ini? Bisan pa magsiling ang mga tawo nga determinado sila sa pagpanikasog sa pila ka tulumuron​—kuarta, kabantugan, gahom, ukon posisyon​—tumalagsahon gid sa isa ka tawo nga makasapo sing isa ka butang nga tuman ka bilidhon amo nga handa niya isakripisyo ang tanan para sa sini. Ginpatuhuyan ni Jesucristo ining tumalagsahon apang dalayawon nga kinaiya sa isa sang iya makapahunahuna nga mga parabola tuhoy sa Ginharian sang Dios.

² Isa ini ka parabola, ukon ilustrasyon, nga ginsaysay ni Jesus sa iya lamang mga disipulo, tuhoy sa mutya ukon perlas nga may daku nga balor. Amo ini ang ginsiling ni Jesus: “Ang ginharian sang langit kaangay sang isa ka nagalakbay nga manugpatikang nga nagpangita sing maayong mga mutya. Sang masapwan niya ang isa ka mutya nga may daku nga balor, naglakat sia kag ginbaligya gilayon ang tanan niya nga ginapanag-iyahan kag ginbakal ini.” (Mateo 13:​36, 45, 46) Ano ang luyag itudlo ni Jesus sa iya mga tagpalamati sa sining ilustrasyon? Kag paano kita makabenepisyo sa mga pinamulong ni Jesus?

Daku nga Balor sang mga Mutya

 3. Ngaa malahalon gid ang maayong mga mutya sang dumaan nga tion?

³ Kutob pa sang dumaan nga tion, ang mga mutya ginapabaloran na subong dekorasyon. Ang isa ka reperensia nagsiling nga suno sa isa ka Romano nga iskolar nga si Pliny the Elder, ang mga mutya amo anay ang “nagapangibabaw sa malahalon nga mga butang.” Indi kaangay sang bulawan, pilak, ukon iban pa nga mga hiyas, ang mutya ginapatubas sang buhi nga mga tinuga. Madamo sing nakahibalo nga may pila ka sahi sang talaba nga kon masudlan gani sing isa ka butang, halimbawa sing balas, nagaresulta ini sa mutya paagi sa amat-amat nga pagputos sini sang nacre sa balas. Sang dumaan nga tion, ang pinakamaayo nga mga perlas masami ginakuha sa Dagat nga Mapula, sa Persian Gulf, kag sa Indian Ocean​—malayo sa pungsod sang Israel. Amo ini ang rason kon ngaa si Jesus nagpamulong tuhoy sa “isa ka nagalakbay nga manugpatikang nga nagpangita sing maayong mga mutya.” Agod makakita sing malahalon gid nga mga mutya, daku gid nga panikasog ang nadalahig.

 4. Ano ang pinakaimportante nga leksion sa parabola ni Jesus tuhoy sa nagalakbay nga manugpatikang?

⁴ Bisan pa mahal gid ang bili sang maayong mga mutya halin pa sang una, maathag nga indi ang presyo sini ang pinakaimportante nga leksion sa parabola ni Jesus. Sa sining parabola, wala lamang ginpaanggid ni Jesus ang Ginharian sang Dios sa isa ka mutya nga may daku nga balor; gintalupangod man niya ang “isa ka nagalakbay nga manugpatikang nga nagpangita sing maayong mga mutya” kag sa iya ginhimo sang nakasapo sia sing isa sini. Indi kaangay sang isa ka ordinaryo nga negosyante, ang isa ka nagalakbay nga manugpatikang sang mutya matawag sadto anay nga eksperto, isa nga mausisaon ukon mauti sa paghibalo kon ano ang pinasahi nga perlas. Makilala niya ang tunay nga mutya kag indi sia malimbungan sang ginatanyag nga mapigaw nga klase ukon peke nga perlas.

5, 6. (a) Ano ang talalupangdon gid sa manugpatikang sa parabola ni Jesus? (b) Ano ang ginapakita sang parabola sang natago nga bahandi tuhoy sa nagalakbay nga manugpatikang?

⁵ May isa pa ka butang nga talalupangdon sa sini nga manugpatikang. Ang isa ka kinaandan nga manugpatikang mahimo magbulubanta anay sang balor sang mutya kon ibaligya agod mahibaluan niya kon pila ang iya ibayad sa sini agod makaganansia. Mahimo man niya binagbinagon anay kon bala may mabakal sa sini nga sahi sang mutya agod mabaligya niya ini gilayon. Kon sa aton pa, mas interesado sia nga makaganansia gilayon, indi sa pagpanag-iya sang mutya. Apang ang manugpatikang sa parabola ni Jesus indi amo sini. Indi sia interesado sa ganansia. Sa katunayan, handa niya isakripisyo “ang tanan niya nga ginapanag-iyahan”​—mahimo ang tanan niya nga pagkabutang​—agod maangkon ang madugay na niya nga ginapangita.

⁶ Sa pagtamod sang madamo nga manugpatikang, indi maalamon ang ginhimo sining tawo sa parabola ni Jesus. Indi magrisgo sing subong sini ang isa ka tuso nga negosyante. Apang ang manugpatikang sa parabola ni Jesus may tuhay nga mga prinsipio. Ang iya natigayon, indi pinansial nga bentaha, kundi ang kalipay kag kaayawan sa pagpanag-iya sing isa ka butang nga tuman gid ka bilidhon. Ining punto nangin maathag sa kaanggid nga ilustrasyon nga ginhatag ni Jesus. Nagsiling sia: “Ang ginharian sang langit kaangay sang isa ka bahandi nga natago sa uma, nga nakita sang isa ka tawo kag gintago; kag bangod sa kalipay naglakat sia kag ginbaligya ang mga butang nga ginapanag-iyahan niya kag ginbakal yadto nga uma.” (Mateo 13:44) Huo, ang kalipay bangod sa pagkatukib kag pagpanag-iya sang bahandi nagpahulag gid sa tawo nga ibaylo ang tanan niya nga ginapanag-iyahan. May mga tawo bala nga kaangay sini karon? May yara bala bahandi nga takus sa sini nga sakripisyo?

Ang mga Nag-apresyar sa Daku nga Balor

 7. Paano ginpakita ni Jesus nga gin-apresyar gid niya ang daku nga balor sang Ginharian?

⁷ Sang ginasugid ni Jesus ang iya parabola, nagapamulong sia tuhoy sa “ginharian sang langit.” Gin-apresyar gid niya mismo ang daku nga balor sang Ginharian. Ginapamatud-an gid ini sang mga kasaysayan sa Ebanghelyo. Pagkatapos sang iya bawtismo sang 29 C.E., “ginsugdan ni Jesus ang pagbantala kag pagsiling: ‘Maghinulsol kamo, kay ang ginharian sang mga langit malapit na.’” Sa sulod sang tatlo ka tuig kag tunga, gintudluan niya ang kadam-an tuhoy sa Ginharian. Ginlatas niya ang bug-os nga pungsod, “naglibot sia sa mga siudad kag mga minuro, nga nagabantala kag nagawali sing maayong balita sang ginharian sang Dios.”​—Mateo 4:17; Lucas 8:1.

 8. Ano ang ginhimo ni Jesus agod ipasundayag kon ano ang pagahimuon sang Ginharian?

⁸ Paagi sa paghimo sing madamo nga milagro sa bug-os nga pungsod​—lakip na ang pagbulong sa mga may balatian, pagpakaon sa mga ginagutom, pagpatinong sa bagyo, bisan gani sa pagbanhaw sa mga patay​—ginpasundayag man ni Jesus kon ano ang pagahimuon sang Ginharian sang Dios. (Mateo 14:14-​21; Marcos 4:​37-​39; Lucas 7:​11-​17) Sang ulihi, ginpamatud-an niya ang iya pagkamainunungon sa Dios kag sa Ginharian paagi sa paghatag sang iya kabuhi, pagkapatay subong isa ka martir sa usok sang pag-antos. Subong nga kinabubut-on nga ginhatag sang nagalakbay nga manugpatikang ang tanan niya nga ginapanag-iyahan para sa “mutya nga may daku nga balor,” si Jesus nagkabuhi kag napatay para sa Ginharian.​​—Juan 18:37.

 9. Anong tumalagsahon nga kinaiya ang nakita sa una nga mga disipulo ni Jesus?

⁹ Wala lamang ginsentro ni Jesus ang iya kabuhi sa Ginharian kundi gintipon man niya ang magamay nga grupo sang mga sumulunod. Mga indibiduwal sila nga nag-apresyar man sa daku nga balor sang Ginharian. Lakip sa ila amo si Andres, nga isa anay ka disipulo ni Juan Bautista. Sang mabatian ang testimonya ni Juan nga si Jesus amo “ang Kordero sang Dios,” si Andres kag ang isa pa ka disipulo ni Juan, mahimo nga isa sa mga anak ni Zebedeo nga Juan man ang ngalan, naganyat gilayon sa pagsunod kay Jesus kag nangin mga tumuluo. Apang kapin pa ang iya ginhimo. Nagkadto gilayon si Andres sa iya utod nga si Simon kag ginsugiran sia: “Nakita namon ang Mesias.” Wala magdugay pagkatapos sini, si Simon (nga nakilal-an sang ulihi nga Cefas, ukon Pedro) subong man si Felipe kag ang iya abyan nga si Natanael nagkilala man kay Jesus subong Mesias. Sa katunayan, si Natanael nakasiling tuhoy kay Jesus: “Ikaw ang Anak sang Dios, ikaw ang Hari sang Israel.”​—Juan 1:35-49.

Napahulag sa Pagpanghikot

10. Ano ang reaksion sang mga disipulo sang nag-abot si Jesus kag gintawag sila pagligad sang pila ka tion pagkatapos sang una nila nga pagkitaay?

¹⁰ Ang kakunyag nga nabatyagan nanday Andres, Pedro, Juan, kag sang iban pa sang nakilal-an nila ang Mesias mahimo mapaanggid sa nabatyagan sang nagalakbay nga manugpatikang sang nasapwan niya ang mutya nga may daku nga balor. Ano ang himuon nila karon? Wala sing madamo nga ginasugid ang mga Ebanghelyo tuhoy sa masunod nga ginhimo nila pagkatapos sang una nila nga pagkitaay ni Jesus. Mahimo nga ang kalabanan sa ila nagbalik sa naandan nila nga pangabuhi. Apang, pagligad sang mga anom ka bulan tubtob mga isa ka tuig, nakigkita liwat si Jesus kanday Andres, Pedro, Juan, kag sa utod ni Juan nga si Santiago sa ila negosyo nga pagpangisda sa Dagat sang Galilea.a Pagkakita sa ila, si Jesus nagsiling: “Magsunod kamo sa akon, kag himuon ko kamo nga mga mangingisda sang mga tawo.” Ano ang ila reaksion? Ang rekord ni Mateo nagasiling tuhoy kanday Pedro kag Andres: “Ginbayaan nila sa gilayon ang mga pukot, kag nagsunod sa iya.” Tuhoy naman kanday Santiago kag Juan, aton mabasa: “Ginbayaan nila sa gilayon ang sakayan kag ang ila amay, kag nagsunod sa iya.” Ang rekord ni Lucas nagsiling pa nga ila “ginbayaan ang tanan nga butang kag nagsunod sa iya.”​—Mateo 4:18-22; Lucas 5:1-11.

11. Ano mahimo ang rason sang paghulag gilayon sang mga disipulo sang gintawag sila ni Jesus?

¹¹ Padasudaso lang bala ang desisyon sang mga disipulo? Indi gid! Bisan pa nagbalik sila sa negosyo nga pagpangisda sang ila pamilya pagkatapos sang una nila nga pagkitaay ni Jesus, wala sing duhaduha nga nagtudok gid sa ila tagipusuon kag hunahuna ang ila nakita kag nabatian sa sina nga pagkitaay. Ang pagligad sang halos isa ka tuig mahimo naghatag sa ila sing madamo nga tion sa pagpamalandong tuhoy sini. Karon nag-abot na ang tion sa pagdesisyon. Mangin kaangay bala sila sang nagalakbay nga manugpatikang nga napahulag gid ang tagipusuon sang matukiban niya ang bilidhon katama nga mutya, amo nga, subong sa ginsiling ni Jesus, ‘naglakat sia kag gilayon’ nga ginhimo ang dapat niya himuon agod mabakal ini nga mutya? Huo. Napahulag gid ang ila tagipusuon sa ila nakita kag nabatian. Nakita nila nga tion na agod maghulag. Busa, suno sa ginasiling sang kasaysayan, wala sila nagpangalag-ag sa pagbiya sang tanan nila nga pagkabutang kag nangin mga sumulunod ni Jesus.

12, 13. (a) Paano naghulag ang pila nga nakabati kay Jesus? (b) Ano ang ginsiling ni Jesus tuhoy sa iya matutom nga mga disipulo, kag ano ang ginapahangop sang iya mga pulong?

¹² Daku gid ang kinatuhayan sining mga matutom sa iban nga ginsambit sang ulihi sa mga kasaysayan sa Ebanghelyo! Madamo sa mga gin-ayo ukon ginpakaon ni Jesus ang basta na lamang naglakat kag nagpadayon sa ila kaugalingon nga pangabuhi. (Lucas 17:​17, 18; Juan 6:26) Ang iban nagpamalibad pa gani sang gin-agda sila ni Jesus nga mangin iya sumulunod. (Lucas 9:​59-​62) Sa kabaliskaran, si Jesus nagsiling sang ulihi tuhoy sa mga matutom: “Kutob sang mga adlaw ni Juan Bautista tubtob karon ang ginharian sang mga langit amo ang tulumuron nga ginapanikasugan sang mga tawo, kag ginaagaw ini sang mga nagapanikasog.”​—Mateo 11:12.

¹³ “Ginapanikasugan” kag “nagapanikasog”​—ano ang ginapahangop sining mga termino? Tuhoy sa Griegong berbo nga ginhalinan sining mga ekspresyon, ang Vine’s Expository Dictionary of Old and New Testament Words nagasiling: “Ang berbo nagapahangop sing masupog nga pagpaninguha.” Kag tuhoy sa sining bersikulo, ang iskolar sa Biblia nga si Heinrich Meyer nagsiling: “Ginalaragway sini ang maukod, di-mapunggan nga paghimud-os kag paghimulat sa manug-abot nga Mesianikong ginharian . . . Tuman kaukod kag kapagsik (indi na kampante kag mahulaton) ang interes sa ginharian.” Kaangay sang isa ka nagalakbay nga manugpatikang, nakilala gilayon sang pila ka indibiduwal kon ano ang tunay nga bilidhon, kag handa sila sa pagsakripisyo sang tanan nila nga ginapanag-iyahan tungod sa Ginharian.​​—Mateo 19:​27, 28; Filipos 3:8.

Ang Iban Nag-upod sa Pagpangita

14. Paano ginhanda ni Jesus ang mga apostoles sa pagbantala sing Ginharian, kag ano ang nangin resulta?

¹⁴ Samtang nagapadayon si Jesus sa iya pagministeryo, ginhanas kag ginbuligan niya ang iban nga pangitaon ang Ginharian. Una nagpili sia sing 12 sa iya mga disipulo kag gintangdo sila subong mga apostoles, ukon iya mga pinadala. Ginhatagan sila ni Jesus sing detalyado nga mga instruksion kon paano himuon ang ila ministeryo subong man sing mga paandam tuhoy sa mga hangkat kag mga kabudlayan nga ila atubangon. (Mateo 10:​1-​42; Lucas 6:​12-​16) Sa nagsunod nga mga duha ka tuig, gin-updan nila si Jesus sa iya pagbantala sa bug-os nga pungsod, kag sa amo nangin suod sila sa iya. Nabatian nila ang iya mga pulong, nasaksihan ang iya gamhanan nga mga buhat, kag nakita ang iya personal nga halimbawa. (Mateo 13:​16, 17) Walay duhaduha nga ini tanan nagtandog gid sing tudok sa ila, tubtob sa punto nga kaangay sang nagalakbay nga manugpatikang, makugihon kag bug-os tagipusuon nila nga ginpangita ang Ginharian.

15. Ano ang ginsiling ni Jesus nga dapat mangin matuod nga rason sang pagkalipay sang iya mga sumulunod?

¹⁵ Dugang pa sa 12 ka apostoles, si Jesus “nagtangdo sing kapituan pa kag ginpadala sila sing tagduhaduha sa una niya sa tagsa ka siudad kag duog nga iya kadtuan.” Ginsugiran man niya sila tuhoy sa mga pagtilaw kag mga kabudlayan nga ila atubangon sa ulihi kag ginsugo sila nga sugiran ang mga tawo: “Ang ginharian sang Dios malapit na sa inyo.” (Lucas 10:1-12) Sang nagbalik ang 70, nalipay gid sila kag nagreport kay Jesus: “Ginuo, bisan pa ang mga demonyo nagpasakop sa amon paagi sa paggamit sang imo ngalan.” Apang mahimo nakibot gid sila sang ginsiling ni Jesus nga daku pa nga kalipay ang nagahulat sa ila bangod sang ila kakugi para sa Ginharian. Ginsugiran niya sila: “Indi kamo magkalipay sa sini, nga napasakop sa inyo ang mga espiritu, apang magkalipay bangod ang inyo mga ngalan nasulat na sa mga langit.”​—Lucas 10:​17, 20.

16, 17. (a) Ano ang ginsugid ni Jesus sa iya matutom nga mga apostoles sa ulihi nga gab-i nga magkaupod sila? (b) Ano nga kalipay kag pasalig ang nabatyagan sang mga apostoles bangod sang mga pulong ni Jesus?

¹⁶ Sa katapusan, sa ulihi nga gab-i nga nakaupod ni Jesus ang mga apostoles, sang Nisan 14, 33 C.E., ginsugdan niya ang gintawag sang ulihi nga Panihapon sang Ginuo kag ginsugo sila nga saulugon ini nga okasyon. Sadto nga gab-i, ginsugiran ni Jesus ang 11 nga nabilin: “Gin-unungan ninyo ako sa akon mga pagtilaw; kag nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian, agod magkaon kag mag-inom kamo sa akon latok sa akon ginharian, kag maglingkod sa mga trono sa paghukom sa napulog-duha ka tribo sang Israel.”​—Lucas 22:​19, 20, 28-30.

¹⁷ Daw ano gid nga kalipay ang mahimo nabatyagan sang mga apostoles sang nabatian nila ining mga pulong ni Jesus! Ginhatagan sila sing labing mataas nga kadungganan kag pribilehiyo nga matigayon sang isa ka tawo. (Mateo 7:​13, 14; 1 Pedro 2:9) Kaangay sang nagalakbay nga manugpatikang, daku ang ginbiyaan nila agod sundon si Jesus sa pagpangita sa Ginharian. Karon ginpasalig sila nga ang ila mga pagsakripisyo indi walay pulos.

18. Sin-o pa luwas sa 11 ka apostoles ang magabenepisyo sa ulihi sa Ginharian?

¹⁸ Indi lamang ang mga apostoles nga kaupod ni Jesus sadto nga gab-i ang makabenepisyo sa Ginharian. Kabubut-on ni Jehova nga ang kabug-usan nga 144,000 mangin bahin sang katipan sang Ginharian subong mga masigkamanuggahom ni Jesucristo sa mahimayaon nga langitnon nga Ginharian. Dugang pa, nakita ni apostol Juan sa palanan-awon ang “isa ka dakung kadam-an, nga wala sing tawo nga makaisip, . . . nga nagatindog sa atubangan sang trono kag sang Kordero, . . . nga nagasiling: ‘Ang kaluwasan utang namon sa amon Dios, nga nagalingkod sa trono, kag sa Kordero.’” Sila amo ang dutan-on nga mga sakop sang Ginharian.b​—Bugna 7:​9, 10; 14:​1, 4.

19, 20. (a) Anong kahigayunan ang bukas sa mga tawo sang tanan nga kapungsuran? (b) Anong pamangkot ang binagbinagon sa masunod nga artikulo?

¹⁹ Wala madugay antes magkayab si Jesus sa langit, ginsugo niya ang iya matutom nga mga sumulunod: “Busa lakat kamo kag maghimo sing mga disipulo sa mga tawo sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:​¹9, 20) Busa, mangin mga disipulo ni Jesucristo ang mga tawo gikan sa tanan nga kapungsuran. Panikasugan man nila ang Ginharian​—langitnon man ukon dutan-on ang ila padya​—subong sang ginhimo sang nagalakbay nga manugpatikang sa maayong mutya.

²⁰ Ginpakita sang mga pulong ni Jesus nga ang buluhaton nga paghimo sing mga disipulo magapadayon tubtob sa “katapusan sang sistema sang mga butang.” Ti sa aton panahon, may yara bala gihapon mga indibiduwal kaangay sang nagalakbay nga manugpatikang, nga handa sa pagsakripisyo sang tanan nila nga ginapanag-iyahan sa pagpangita sa Ginharian sang Dios? Binagbinagon ini nga pamangkot sa masunod nga artikulo.

[Mga nota]

Pagpangita sa “Mutya nga may Daku nga Balor” Karon

“Ining maayong balita sang ginharian ibantala sa bug-os napuy-an nga duta subong panaksi.”​—MATEO 24:14.

1, 2. (a) Ano ang ginhunahuna sang mga Judiyo sang panahon ni Jesus tuhoy sa Ginharian sang Dios? (b) Ano ang ginhimo ni Jesus agod mapaalinton ang husto nga paghangop sa Ginharian, kag ano ang nangin resulta?

ANG mga Judiyo interesado gid sadto sa Ginharian sang Dios sang yari si Jesus sa duta. (Mateo 3:​1, 2; 4:​23-​25; Juan 1:49) Apang, sa primero, wala mahangpan sang kalabanan sa ila ang kasangkaron kag gahom sini; kag wala man nila anay nahangpan nga isa gali ini ka langitnon nga panguluhan. (Juan 3:1-5) Bisan ang iban nga nangin mga sumulunod ni Jesus wala gani nakahangop sing bug-os kon ano ang Ginharian sang Dios ukon kon ano ang ila dapat himuon agod pakamaayuhon nga mangin mga manuggahom kaupod ni Cristo.​​—Mateo 20:20-​22; Lucas 19:11; Binuhatan 1:6.

² Pagligad sang tion, mapailubon nga gintudluan ni Jesus ang iya mga disipulo sing madamo nga leksion, lakip na ang parabola tuhoy sa mutya nga may daku nga balor nga ginbinagbinag sa nagligad nga artikulo, diin ginpatalupangod sa ila ang importansia sang pagpanikasog sa pagpangita sa langitnon nga Ginharian. (Mateo 6:​33; 13:​45, 46; Lucas 13:​23, 24) Mahimo nga nagtandog gid ini sang ila tagipusuon bangod wala magdugay nangin daw wala sila ginakapoy kag nangin maisugon nga mga manugbantala sang maayong balita sang Ginharian tubtob sa mga ukbong sang duta, nga ginpamatud-an gid sang tulun-an nga Binuhatan.​​—Binuhatan 1:8; Colosas 1:23.

 3. Nagapatuhoy sa aton tion, ano ang ginsiling ni Jesus tuhoy sa Ginharian?

³ Ti, kamusta naman karon? Ang mga pagpakamaayo sang dutan-on nga paraiso sa idalom sang Ginharian ginabantala na karon sa minilyon ka tawo. Sa iya importante nga tagna tuhoy sa “katapusan sang sistema sang mga butang,” si Jesus espesipiko nga nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:​3, 14; Marcos 13:10) Ginpaathag man niya nga ining daku katama nga hilikuton pagahimuon walay sapayan sang dalagku nga mga balagbag kag mga hangkat, bisan sang paghingabot pa gani. Walay sapayan sini, nagpasalig sia: “Sia nga nakabatas tubtob sa katapusan amo sia ang maluwas.” (Mateo 24:9-13) Ini tanan nagakinahanglan sing pagkamasinakripisyuhon kag dedikasyon kaangay sa ginpakita sang nagalakbay nga manugpatikang sa parabola ni Jesus. May mga indibiduwal bala karon nga nagapakita sing kaangay sini nga pagtuo kag kakugi sa pagpanghikot para sa Ginharian?

Ang Kalipay sa Pagtukib sang Kamatuoran

 4. Ano ang epekto sang kamatuoran sang Ginharian sa mga tawo karon?

⁴ Ang manugpatikang sa parabola ni Jesus nalipay gid sang nakita niya ang “mutya nga may daku nga balor.” Ining kalipay nagpahulag sa iya nga himuon ang tanan niya nga masarangan agod matigayon ang mutya. (Hebreo 12:1) Sa karon, ang kamatuoran tuhoy sa Dios kag sa iya Ginharian nagaganyat kag nagapahulag man sa mga tawo. Nagapahanumdom ini sa aton sang mga komento ni Utod A. H. Macmillan, nga nagsulat tuhoy sa iya personal nga pagpangita sa Dios kag sa Iya katuyuan para sa katawhan, sa libro nga Faith on the March. Sia nagsiling: “Kada tuig, linibo pa ka tawo ang nakasapo sa akon nakita. Kag mga tawo sila nga kaangay naton, bangod naggikan sila sa tanan nga nasyonalidad, rasa, tindog sa katilingban kag edad. Wala sing ginapasulabi ang kamatuoran. Ginaganyat sini ang tanan nga sahi sang mga tawo.”

 5. Anong maayo nga mga resulta ang makita sa report sa 2004 nga tuig sang pag-alagad?

⁵ Ang kamatuoran sining mga pulong makita samtang kada tuig ginatos ka libo ka indibiduwal ang napahulag sang maayong balita sang Ginharian sang Dios sa pagdedikar sang ila kabuhi kay Jehova kag sa paghimo sang iya kabubut-on. Makita man ini sa 2004 nga tuig sang pag-alagad, nga nagsugod sang Septiembre 2003 tubtob Agosto 2004. Sa sulod sining 12 ka bulan, 262,416 ka tawo ang dayag nga nagsimbulo sang ila dedikasyon kay Jehova paagi sa pagpabawtismo sa tubig. Natabo ini sa 235 ka kadutaan, diin ginadumalahan sang mga Saksi ni Jehova ang 6,085,387 ka pagtuon sa Biblia sa puluy-an kada semana agod buligan ang mga tawo gikan sa nagkalainlain nga tindog sa katilingban kag gikan sa madamo nga pungsod, tribo, kag hambal nga matigayon ang nagahatag-kabuhi nga kamatuoran gikan sa Pulong sang Dios.​—Bugna 7:9.

 6. Ano ang kabangdanan sang padayon nga mga pag-uswag sa nagliligad nga mga tinuig?

⁶ Paano ini nangin posible? Walay duhaduha nga ginabuyok ni Jehova ining mga husto nga nahuyog pakadto sa iya. (Juan 6:​65; Binuhatan 13:48) Apang, indi man naton pagpakadiutayon ang di-makagod nga espiritu kag ang daw wala ginakapoy nga panikasog sang mga nagboluntaryo sa pagpanghikot para sa Ginharian. Sa edad nga 79 anyos, si Utod Macmillan nagsulat: “Sugod sang natun-an ko ang mga saad para sa mga masakiton kag nagatagumatayon nga katawhan, ang akon paglaum sa mensahe nga ginpahayag sang Biblia wala gid mag-ugdaw. Kutob sadto namat-od ako nga magtuon sing dugang pa tuhoy sa ginatudlo sang Biblia agod mabuligan ko ang iban nga kaangay ko nga nagapangita man sing ihibalo tuhoy sa Labing Gamhanan nga Dios nga si Jehova kag sa iya maayong mga katuyuan para sa katawhan.”

 7. Ano nga eksperiensia ang nagalaragway sa kalipay kag kapagsik sang mga nakasapo sang kamatuoran sa Biblia?

⁷ Ining kaukod makita man sa mga alagad ni Jehova karon. Ang isa ka halimbawa amo si Daniela nga taga-Vienna, Austria. Nagsiling sia: “Halin sang bata pa ako, ang Dios amo na ang akon pinakasuod nga abyan. Luyag ko gid mahibaluan ang iya ngalan kay para sa akon ang titulo nga ‘Dios’ wala nagapasuod sa aton sa iya. Apang nagligad ang mga tinuig tubtob nangin 17 anyos ako kag naduaw ako sang mga Saksi ni Jehova. Ginpaathag nila ang tanan nga luyag ko mahibaluan tuhoy sa Dios. Sang ulihi, nasapwan ko gid man ang kamatuoran, kag makalilipay gid ini! Nakunyag gid ako amo nga nagbantala ako bisan kay sin-o.” Wala magdugay ginyubit sia sang iya mga kaeskwela bangod sang iya mapagsik nga pagbantala. “Apang, para sa akon, daw tagna ini sa Biblia nga nagakatuman,” padayon ni Daniela, “bangod natun-an ko nga nagsiling si Jesus nga ang iya mga sumulunod kaugtan kag pagahingabuton tungod sa iya ngalan. Nalipay gid ako kag nakunyag.” Wala magdugay, gindedikar ni Daniela ang iya kabuhi kay Jehova, nabawtismuhan, kag nagsugod sa paglab-ot sa tulumuron nga mangin misyonera. Pagkatapos sia makasal, si Daniela kag ang iya bana nga si Helmut nagbantala sa Aprikano, Indian, Pilipino, kag Tsino nga mga pumuluyo sa Vienna. Si Daniela kag si Helmut mga misyonero na karon sa bagatnan-katundan nga Aprika.

Wala Sila Nagapangampo

 8. Sa anong makapaladya nga paagi ginpakita sang madamo ang ila gugma sa Dios kag pagkamainunungon sa iya Ginharian?

⁸ Sa pagkamatuod, ang pagmisyonero isa sa mga paagi nga ginapakita sang katawhan ni Jehova karon ang ila gugma sa Dios kag pagkamainunungon sa iya Ginharian. Kaangay sang manugpatikang sa parabola ni Jesus, ang mga misyonero handa sa paglakbay sa malayo katama nga mga lugar tungod sa Ginharian. Siempre pa, wala nagalakbay ining mga misyonero agod mangita sing maayong balita sang Ginharian; sa baylo, ginadala nila ini sa mga tawo nga nagapuyo sa nabaw-ing nga mga duog sang duta, ginatudluan kag ginabuligan sila nga mangin mga disipulo ni Jesucristo. (Mateo 28:​19, 20) Sa madamo nga kadutaan, kinahanglan nila batason ang mabudlay katama nga mga kahimtangan. Apang ang ila pagbatas ginpadyaan sing bugana.

9, 10. Ano ang makakulunyag nga mga eksperiensia sang mga misyonero sa malayo nga mga lugar subong sang Central African Republic?

⁹ Ang isa ka halimbawa amo ang Central African Republic, diin ang nagtambong sang nagligad nga tuig sa Memoryal sang kamatayon ni Cristo, 16,184, nga mga pito ka pilo sangsa kadamuon sang mga manugbantala sang Ginharian sa sina nga pungsod. Bangod ang kalabanan nga bahin sining pungsod wala sing koryente, ang mga ulubrahon sa balay masami ginahimo sa gua sa idalom-kahoy. Sa amo, ang mga misyonero nagadumala man sing pagtuon sa Biblia sa idalom-kahoy. Indi lamang mas masanag kag mas mabugnaw sa gua kundi may isa pa ini ka bentaha. Ang mga tawo mainapresyahon gid sa Biblia, kag ang pagpakigsugilanon tuhoy sa relihioso nga mga topiko daw kaangay lang sang pagpakigsugilanon tuhoy sa isport ukon paniempo sa iban nga kultura. Sa masami, makita ini sang mga nagalabay kag nagabuylog sila sa pagtuon.

¹⁰ Busa, sang nagdumala sing pagtuon sa Biblia ang isa ka misyonero sa gua sang balay, ang isa ka pamatan-on nga lalaki nga nagapuyo sa pihak nga dalan nagpalapit kag nagsiling nga bangod wala sing nagduaw sa iya, dapat kadtuan man sia sang misyonero agod tun-an sing Biblia. Siempre, malipayon ini nga ginhimo sang misyonero, kag ang pamatan-on nga lalaki madasig nga nag-uswag. Sa sini nga pungsod, masami ginapadulog sang mga pulis ang mga Saksi sa dalan, indi agod ipatawag sa korte ukon multahan, kundi agod mangayo sing bag-o nga mga gua sang mga magasin nga Ang Lalantawan kag Magmata! ukon agod pasalamatan sila sa artikulo nga nanamian nila.

11. Walay sapayan sang mga pagtilaw, ano ang ginabatyag sang madugay na nga mga misyonero sa ila pag-alagad?

¹¹ Madamo sang mga misyonero nga nagsugod sa pag-alagad mga 40 ukon 50 ka tuig na ang nagligad ang nagaalagad gihapon sing matutom sa latagon. Maayo gid sila nga mga halimbawa sang pagtuo kag pagbatas para sa aton tanan! Sa sulod sang 42 ka tuig, isa ka mag-asawa ang nakaalagad subong mga misyonero sa tatlo ka pungsod. Nagsiling ang bana: “May yara mga kabudlayan. Halimbawa, ginpakigbatuan namon ang malaria sa sulod sang 35 ka tuig. Apang, wala gid namon ginhinulsulan ang amon desisyon nga mangin mga misyonero.” Ang iya asawa nagdugang: “Madamo pirme sing butang nga dapat namon pasalamatan. Ang pagministeryo sa latagon makalilipay gid, kag mahapos lang makasugod sing mga pagtuon sa Biblia. Kon makita mo ang imo mga ginabuligan nga nagatambong sa mga miting kag nagasugilanunay, daw kaangay ini sang pagtinipon sang isa ka pamilya.”

‘Ginabilang Nila ang Tanan nga Butang nga Kadulaan’

12. Paano ginapabutyag ang matuod nga apresasyon sa balor sang Ginharian?

¹² Sang nasapwan sang nagalakbay nga manugpatikang ang isa ka mutya nga may daku nga balor, “naglakat sia kag ginbaligya gilayon ang tanan niya nga ginapanag-iyahan kag ginbakal ini.” (Mateo 13:46) Ining kahanda sa pagsakripisyo sa butang nga mahimo ginakabig nga bilidhon isa ka kinaiya sang mga nagaapresyar gid sa balor sang Ginharian. Subong isa nga may bahin sa pag-agom sang kahimayaan sa Ginharian upod kay Cristo, si apostol Pablo nagsiling: “Ginabilang ko gid ang tanan nga butang nga kadulaan tungod sa labaw gid nga kabilihanan sang ihibalo tuhoy kay Cristo Jesus nga akon Ginuo. Tungod sa iya ginbaton ko ang kadulaan sang tanan nga butang kag ginabilang ko sila nga mga sagbot, agod nga maagom ko si Cristo.”​—Filipos 3:8.

13. Paano ginpasundayag sang isa ka tawo sa Czech Republic ang iya gugma para sa Ginharian?

¹³ Sing kaanggid, madamo sa karon ang handa sa paghimo sing daku nga mga pagbag-o sa ila kabuhi agod maagom ang mga pagpakamaayo sang Ginharian. Halimbawa, sang Oktubre 2003, ang 60-anyos nga prinsipal sang isa ka eskwelahan sa Czech Republic ang nakabasa sang bulig sa pagtuon sa Biblia nga Ang Ihibalo nga Nagadul-ong sa Kabuhi nga Walay Katapusan. Pagkatapos ini mabasa, ginpangita niya gilayon ang mga Saksi ni Jehova sa ila lugar agod magtuon sing Biblia. Nangin maayo ang iya pag-uswag sa espirituwal kag wala magdugay nagsugod sia sa pagtambong sa tanan nga miting. Apang, kamusta ang iya mga plano nga magdalagan subong meyor kag sa ulihi magdalagan subong senador? Mas ginpili niya ang tuhay nga dalaganon​—ang palumba para sa kabuhi, subong isa ka manugbantala sang Ginharian. Nagsiling sia: “Nakapahamtang ako sing madamo nga literatura sa Biblia sa akon mga estudyante.” Ginsimbuluhan niya ang iya dedikasyon kay Jehova paagi sa pagpatugmaw sa tubig sa isa ka kombension sang Hulyo 2004.

14. (a) Ang maayong balita sang Ginharian nagapahulag sa minilyon sa paghimo sing ano? (b) Ano ang mahimo ipamangkot sing serioso sang kada isa sa aton sa iya kaugalingon?

¹⁴ Minilyon pa sa bug-os nga kalibutan ang naghulag sing kaanggid sini sa maayong balita sang Ginharian. Naggua sila sa malaut nga kalibutan, gin-uba ang ila daan nga personalidad, ginbiyaan ang ila anay mga kaupdanan, kag gin-untatan ang ila kalibutanon nga mga tulumuron. (Juan 15:19; Efeso 4:​22-​24; Santiago 4:4; 1 Juan 2:​15-​17) Ngaa ginhimo nila ini? Bangod ginkabig nila ang mga pagpakamaayo sang Ginharian sang Dios nga labaw sangsa bisan ano nga mahatag sang sistema sang mga butang karon. Amo man bala sini ang imo ginabatyag tuhoy sa maayong balita sang Ginharian? Napahulag ka bala sini sa paghimo sing kinahanglanon nga mga pagbag-o agod mapahisuno ang imo estilo sang pagkabuhi, mga prinsipio, kag mga tulumuron sa mga ginapatuman ni Jehova? Ang paghimo sini magaresulta sa bugana nga mga pagpakamaayo sa imo, sa karon kag sa palaabuton.

Ang Paghingapos sang Pag-ani

15. Ano ang gintagna nga pagahimuon sang katawhan sang Dios sa katapusan nga mga adlaw?

¹⁵ Ang salmista nagsulat: “Ang imo katawhan magahalad sang ila kaugalingon sing kinabubut-on sa adlaw sang imo puersa militar.” Ang mga naghalad sang ila kaugalingon nagalakip sa “mga pamatan-on kaangay sang mga tulo sang tun-og” kag sa “isa ka daku nga hangaway” sang “mga babayi nga nagabantala sing maayong balita.” (Salmo 68:11; 110:3) Ano ang nangin resulta sang kapisan kag pagkamasinakripisyuhon sang katawhan ni Jehova​—lalaki kag babayi, pamatan-on kag tigulang​—sa sining katapusan nga mga adlaw?

16. Maghatag sing isa ka halimbawa kon paano ang mga alagad sang Dios nagapangita sing paagi agod mabuligan ang iban sa pagtuon tuhoy sa Ginharian.

¹⁶ Ang isa ka payunir, ukon bug-os tion nga manugbantala sang Ginharian, sa India nagpalibog kon paano niya mabuligan ang kapin sa duha ka milyon ka apa sa sining pungsod sa pagtuon tuhoy sa Ginharian. (Isaias 35:5) Nagdesisyon sia nga magtuon sing sign language sa isa ka eskwelahan sa Bangalore. Didto napaambit niya ang paglaum sang Ginharian sa madamo nga apa, nian natukod ang mga grupo sa pagtuon sa Biblia. Sa sulod sang pila ka semana, kapin sa 12 ka tawo ang nagsugod sa pagtambong sa mga miting sa Kingdom Hall. Sang ulihi, nakilala sang payunir sa isa ka punsion sang kasal ang isa ka pamatan-on nga lalaki nga taga-Calcutta nga madamo sing pamangkot kag nagpakita sing interes sa paghibalo sing dugang pa tuhoy kay Jehova. Apang, may problema. Kinahanglan magbalik ang pamatan-on nga lalaki sa Calcutta, nga mga 1,600 kilometros ang kalayuon, agod mag-eskwela sa kolehiyo, kag wala sing Saksi didto nga makahibalo sing sign language. Bangod sa iya pagpamilit, ang lalaki gintugutan sang iya amay nga mag-eskwela na lang sa Bangalore agod makapadayon sia sa pagtuon sa Biblia. Nangin maayo ang iya pag-uswag sa espirituwal, kag pagligad sing mga isa ka tuig, gindedikar niya ang iya kabuhi kay Jehova. Nian, sia naman ang nagtudlo sing Biblia sa pila ka apa, lakip sa iya amigo sang bata pa sia. Ang sanga talatapan sa India may kahimusan na karon para sa mga payunir nga magtuon sing sign language agod mabuligan ang mga apa.

17. Isaysay kon ano ang nakapalig-on sa imo sa report sa 2004 nga tuig sang pag-alagad sa pahina 19 tubtob 22.

¹⁷ Sa pahina 19 tubtob 22 sining magasin, makita mo ang bug-os kalibutan nga report sang pag-alagad sa latagon sang mga Saksi ni Jehova sa 2004 nga tuig sang pag-alagad. Hatagi sing tion nga usisaon ini, agod imo mismo makita ang ebidensia nga ang katawhan ni Jehova sa bug-os nga duta nagapanikasog gid karon sa pagpangita sang “mutya nga may daku nga balor.”

Padayon nga “Pangitaa Anay ang Ginharian”

18. Ano nga impormasyon ang wala ginlakip ni Jesus sa parabola tuhoy sa nagalakbay nga manugpatikang, kag ngaa?

¹⁸ Kon binagbinagon naton liwat ang parabola ni Jesus tuhoy sa nagalakbay nga manugpatikang, matalupangdan naton nga wala sing ginsambit si Jesus kon paano nakapadayon sa pagpangabuhi ang manugpatikang pagkatapos niya mabaligya ang tanan niya nga ginapanag-iyahan. Sing realistiko, mahimo may mamangkot: ‘Paano makapangita ang manugpatikang sing pagkaon, panapton, kag puluy-an kay wala na sia karon sing pagkabutang? Ano pa ang pulos sang iya malahalon nga mutya?’ Sa undanon nga pagtamod daw makatarunganon ining mga pamangkot. Apang indi bala nga ginlaygayan ni Jesus ang iya mga disipulo: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo”? (Mateo 6:31-33) Ang panguna nga punto sa sini nga parabola amo ang kinahanglanon nga ipasundayag ang bug-os tagipusuon nga debosyon sa Dios kag kakugi para sa Ginharian. May matun-an bala kita sa sini?

19. Anong importante nga leksion ang matun-an naton sa parabola ni Jesus tuhoy sa mutya nga may daku nga balor?

¹⁹ Bisan pa bag-o lang kita nakatuon sang dalayawon nga maayong balita, ukon mga dekada na kita nga nagapanghikot para sa Ginharian kag nagasugid sa iban sang mga pagpakamaayo sini, dapat padayon naton nga isentro sang aton intereses kag igtalupangod sa Ginharian. Nagakabuhi kita sa mabudlay nga mga kahimtangan, apang may mabakod kita nga mga rason nga magpati nga ang ginapangita naton matuod kag wala sing kaanggid​—kaangay sang mutya nga nasapwan sang manugpatikang. Ang mga hitabo sa kalibutan kag ang natuman nga mga tagna sa Biblia nagahatag sing makapakumbinsi nga pamatuod nga nagakabuhi na kita sa “katapusan sang sistema sang mga butang.” (Mateo 24:3) Kaangay sang nagalakbay nga manugpatikang, ipakita naton ang bug-os tagipusuon nga kakugi para sa Ginharian sang Dios kag magkalipay kita sa aton pribilehiyo sa pagbantala sang maayong balita.​​—Salmo 9:​1, 2.