Ang Kabuhi kag Ministeryo ni Jesus

Ano ang Nagadagta sa Tawo?

NAGBASKOG pa ang pagpamatok kay Jesus. Indi lamang nga ginbiyaan sia sang madamo sang iya mga disipulo kundi ang mga Judiyo sa Judea nagatinguha sa pagpatay sa iya, subong sang ginhimo nila sang didto sia sa Jerusalem sang Paskuwa sang 31 C.E.

Paskuwa karon sang 32 C.E. Mahimo gid nga sa pagsunod sa ginapatuman sang Dios nga magtambong, si Jesus nagtaklad sa Jerusalem para sa Paskuwa. Apang, ginhimo niya ini sing mainandamon bangod ang iya kabuhi yara sa katalagman. Pagkatapos sini nagbalik sia sa Galilea.

Mahimo nga si Jesus didto sa Capernaum sang ang mga Fariseo kag mga escriba gikan sa Jerusalem nagkadto sa iya. Nagapangita sila sing rason nga isumbong sia sing relihioso nga paglapas sa kasuguan. “Ngaa bala nagalalis ang imo mga disipulo sang pinalatunlaton nga sugid sang mga tigulang?” pamangkot nila. “Halimbawa, wala sila nagapanghinaw sang ila mga kamot kon sila magkaon.” Wala ini ginapatuman sang Dios, apang ginakabig ini sang mga Fariseo subong isa ka daku nga sala kon indi paghimuon ining tradisyonal nga rito, nga nagalakip sing pagpanghinaw tubtob sa mga siko.

Sa baylo nga sabton ang ila panumbungon, gintudlo ni Jesus ang ila malaut kag hungod nga paglapas sa sugo sang Dios. “Ngaa nagalalis man kamo sa Kasuguan sang Dios tungod sang inyo pinalatunlaton nga sugid?” luyag niya mahibaluan. “Halimbawa, ang Dios nagsiling, ‘Tahura ang imo amay kag ang imo iloy’; kag, ‘Ang nagahambal sing malain batok sa amay ukon sa iloy, patyon sia nga totoo.’ Apang kamo nagasiling, ‘Ang bisan sin-o nga magsiling sa amay ukon sa iloy: “Halad sa Dios yadtong sarang ko ikabulig sa imo,” indi na sia magtahod sa iya amay.’”

Sa pagkamatuod, ang mga Fariseo nagatudlo nga ang kuwarta, pagkabutang, ukon bisan anong butang nga gindedikar subong dulot sa Dios iya sang templo, kag indi ini magamit para sa iban nga katuyuan. Apang, sing aktuwal, ang gindedikar nga dulot ginatago sang tawo nga nagdedikar sini. Sa sining paagi ang anak, paagi sa pagsiling lamang nga ang iya kuwarta ukon pagkabutang “corban”—isa ka dulot nga gindedikar sa Dios ukon sa templo—makalikaw sa iya salabton nga buligan ang iya tigulang nga mga ginikanan, nga mahimo nagakinahanglan sing daku nga bulig.

Nagakaigo nga nagakaakig sa malaut nga pagpatiko sang mga Fariseo sa Kasuguan sang Dios, si Jesus nagsiling: “Ginpakawalay pulos ninyo ang pulong sang Dios tungod sa inyo pinalatunlaton nga sugid. Mga salimpapaw, matuod gid ang gintagna nahanungod sa inyo ni Isaias, sang nagsiling sia, ‘Ining katawhan nagatahod sa akon sa ila mga bibig, apang ang ila tagipusuon malayo sa akon. Wala sing pulos ang pagsimba nila sa akon, bangod ginatudlo nila ang mga sugo sang mga tawo subong mga doktrina.’”

Mahimo nga nag-isol ang kadam-an agod tugutan ang mga Fariseo sa pagpamangkot kay Jesus. Karon, sang ang mga Fariseo indi makasabat sa mabaskog nga pagsabdong sa ila ni Jesus, gintawag niya ang kadam-an sa malapit. “Pamatii ninyo ako,” siling niya, “kag hangpa ninyo ang kahulugan. Indi ang nagasulod sa baba sang tawo ang nagadagta sa iya; kundi ang nagaguwa sa iya baba amo ang nagadagta sa iya.”

Sang ulihi, sang magsulod sila sa isa ka balay, ang iya mga disipulo namangkot: “Nahibaluan mo bala nga ang mga Fariseo nasaklaw sang imo ginsiling?”

“Ang tagsa ka tanom nga wala gintanom sang akon langitnon nga Amay pagagabuton,” sabat ni Jesus. “Pabayai sila. Mga bulag sila nga manugtuytoy. Kon ang bulag magtuytoy sa isa ka bulag, sila nga duha mahulog sa buho.”

Daw nakibot si Jesus sang, para sa mga disipulo, nangabay si Pedro nga athagon ang nahanungod sa nagadagta sa isa ka tawo. “Wala man bala kamo makahangop?” sabat ni Jesus. “Wala bala kamo makatalupangod nga ang bisan ano nga nagasulod sa baba sang tawo nagakadto sa iya tiyan kag ginapaguwa sa lawas? Apang, ang mga pulong nga nagaguwa sa baba nagahalin sa tagipusuon, kag amo ina ang nagadagta sa tawo. Halimbawa, gikan sa tagipusuon nagagikan ang malaut nga mga panghunahuna, pagpatay, panglahi, pakighilawas, pagpangawat, pagbutig, pagpasipala. Ining mga butang amo ang nagadagta sa tawo; apang indi madagtaan ang tawo kon magkaon sia nga wala makapanghinaw sang iya mga kamot.”

Wala ginapamatukan diri ni Jesus ang normal nga pagkatinlo. Wala sia nagabais nga indi dapat manghinaw ang isa ka tawo sang iya mga kamot antes maghanda sing kalan-on ukon magkaon. Sa baylo, ginapakamalaut ni Jesus ang pagkasalimpapaw sang relihioso nga mga lider nga malalangon nga nagatinguha sa pagpamintaha sa matarong nga kasuguan sang Dios paagi sa pag-insister sa dimakasulatanhon nga mga tradisyon. Huo, ang malaut nga mga buhat amo ang nagadagta sa isa ka tawo, kag ginapakita ni Jesus nga nagagikan ini sa tagipusuon sang isa ka tawo. Juan 7:1; Deuteronomio 16:16; Mateo 15:1-20; Marcos 7:1-23; Exodo 20:12; 21:17; Isaias 29:13.

◆ Ano nga pagpamatok ang ginaatubang karon ni Jesus?

◆ Ano ang panumbungon sang mga Fariseo, apang suno kay Jesus, paano ginalapas sing hungod sang mga Fariseo ang Kasuguan sang Dios?

◆ Ano ang ginsiling ni Jesus nga amo ang mga butang nga nagadagta sa tawo?