Ano Gid ang Nagapahigko sa Tawo?

Samtang nagahilapit ang Paskua sang 32 C.E., masako nga nagapanudlo si Jesus sa Galilea. Mahimo nga nagkadto sia dayon sa Jerusalem para sa Paskua, suno sa ginapatuman sang Kasuguan sang Dios. Pero nangin mainandamon sia kay gusto sia patyon sang mga Judiyo. (Juan 7:1) Pagkatapos sini nagbalik sia sa Galilea.

Mahimo nga sa Capernaum na si Jesus sang nagkadto sa iya ang mga Fariseo kag mga escriba halin sa Jerusalem. Ngaa nagkadto sila didto? Nagapangita sila sing mga rason nga masumbong si Jesus. Namangkot sila: “Ngaa ginalapas sang imo mga disipulo ang tradisyon sang mga tawo sang una? Halimbawa, wala nila ginahinawan ang ila mga kamot antes magkaon.” (Mateo 15:2) Wala gid ginpahimo sang Dios sa iya katawhan ang ritwal nga ‘manghinaw sang ila mga kamot tubtob sa siko.’ (Marcos 7:3) Pero gintamod ini sang mga Fariseo nga isa ka serioso nga sala.

Sa baylo nga sabton sing direkta ang ila panumbungon, ginpakita ni Jesus kon paano nila hungod nga ginlapas ang Kasuguan sang Dios. “Ngaa ginalapas ninyo ang sugo sang Dios bangod sang inyo tradisyon?” pamangkot niya sa ila. “Halimbawa, ang Dios nagsiling, ‘Padunggi ang imo amay kag ang imo iloy,’ kag, ‘Ang nagatamay sa iya amay ukon iloy patyon.’ Apang nagasiling kamo, ‘Ang nagasiling sa iya amay ukon iloy: “Ang mapanginpuslan ninyo halin sa akon isa ka dulot nga ginhalad sa Dios,” indi na niya dapat padunggan ang iya amay.’”—Mateo 15:3-6; Exodo 20:12; 21:17.

Nagsiling ang mga Fariseo nga ang kuarta, propiedad, ukon bisan ano nga butang nga gindedikar subong dulot sa Dios iya kuno sang templo, gani indi ini puede gamiton sa iban nga katuyuan. Pero ang matuod, ara gihapon sa tawo ang iya gindedikar nga dulot. Halimbawa, mahimo magsiling ang anak nga ang iya kuarta ukon propiedad isa ka “corban,” isa ka dulot nga gindedikar sa Dios ukon sa templo, nga daw subong bala nga ang templo amo na ang may kinamatarong sa dulot. Ang kuarta ukon propiedad magamit gihapon sang anak, pero nagasiling sia nga indi ini magamit para buligan ang tigulang kag imol niya nga mga ginikanan. Sa amo malikawan niya ang iya responsibilidad sa ila.—Marcos 7:11.

Makatarunganon nga naakig si Jesus sa sining pagpatiko sa Kasuguan sang Dios kag nagsiling sia: “Ginhimo ninyo nga wala sing pulos ang pulong sang Dios bangod sang inyo tradisyon. Mga salimpapaw, husto gid ang gintagna ni Isaias tuhoy sa inyo, sang nagsiling sia: ‘Ini nga katawhan nagapadungog sa akon paagi lamang sa ila bibig, apang ang ila tagipusuon malayo sa akon. Wala sing pulos ang ila padayon nga pagsimba sa akon, kay ang ila mga panudlo mga sugo lamang sang mga tawo.’” Ang mga Fariseo indi makasabat sa pagpakalain ni Jesus. Gani gintawag niya ang kadam-an nga magpalapit sa iya. “Magpamati kamo kag hangpa ini,” siling niya. “Indi ang nagasulod sa baba sang tawo ang nagapahigko sa iya, kundi ang nagagua sa iya baba.”—Mateo 15:6-11; Isaias 29:13.

Sang didto na sila sa isa ka balay, ginpamangkot sang mga disipulo si Jesus: “Nakahibalo ka bala nga nasandad ang mga Fariseo sa imo ginsiling?” Nagsabat sia: “Ang tanom nga wala gintanom sang akon langitnon nga Amay gabuton. Pabay-i ninyo sila. Mga bulag sila nga mga manugtuytoy. Kon ang bulag magtuytoy sa isa pa ka bulag, pareho sila nga mahulog sa buho.”—Mateo 15:12-14.

Daw nakibot si Jesus sang si Pedro namangkot para sa ila tanan nga disipulo kon ano ang nagapahigko sa isa. Si Jesus nagsabat: “Wala bala kamo makahibalo nga ang tanan nga nagasulod sa baba nagaagi sa tiyan kag nagagua sa lawas? Apang, ang nagagua sa baba nagahalin sa tagipusuon, kag amo ini ang nagapahigko sa tawo. Halimbawa, nagahalin sa tagipusuon ang malaut nga pangatarungan, pagpatay, panghilahi, seksuwal nga imoralidad, pagpangawat, indi matuod nga pagpanaksi kag pagpasipala. Amo ini ang nagapahigko sa tawo; apang ang magkaon nga wala nakapanghinaw sing kamot wala nagapahigko sa tawo.”—Mateo 15:17-20.

Indi batok si Jesus sa katinlo, kag wala man sia nagapangatarungan nga indi na kinahanglan manghugas sang kamot antes maghanda sing pagkaon ukon magkaon. Sa baylo, ginapakamalaut niya ang pagkasalimpapaw sang mga lider sang relihion nga luyag maglapas sa matarong nga kasuguan sang Dios paagi sa pagsunod sa mga tradisyon sang mga tawo. Ang matuod, ang nagapahigko sa isa amo ang malaut nga mga buhat halin sa tagipusuon.