Ang Kabuhi kag Ministeryo ni Jesus

Ang mga Tinapay kag ang Lebadura

DAKU nga mga panong ang nagdugok kay Jesus sa Decapolis. Madamo ang naghalin sa malayo nga duog padulong sa sining rehiyon nga laban ang mga Gentil agod mamati sa iya kag ayuhon sa ila mga balatian. Nagdala sila sing dalagku nga mga alat nga sa kinabatasan ginagamit nila nga suludlan sing mga kalan-on kon nagalakbay sila sa Gentil nga mga duog.

Apang, sang ulihi, gintawag ni Jesus ang iya mga disipulo kag nagsiling: “Naluoy ako sa kadam-an, kay tatlo na ka adlaw nga sila nagpadayon kaupod nakon kag wala gid sing kaunon; kag kon akon sila papaulion sa ila mga balay nga ginagutom, punawon sila sa dalanon. Sa pagkamatuod ang iban sa ila naghalin sa malayo.”

“Diin bala kita sa sini nga desyerto makakita sing kalan-on nga makaigo sa sini tanan nga mga tawo?” pamangkot sang mga disipulo.

Nagpamangkot si Jesus: “Pila pa ka bilog ang inyo tinapay?”

“Pito,” sabat nila, “kag pila pa ka isda.”

Sa tapos ginsilingan ang mga tawo nga maglingkod sa duta, ginkuha ni Jesus ang pila ka bilog nga tinapay kag ang mga isda, nagpasalamat sa Dios, ginpihakpihak niya ini kag ginhatag sa iya mga disipulo. Nian, ginpanghatag man nila ini sa mga tawo, nga nabusog tanan. Sa tapos sadto, sang gintipon ang mga nabilin, pito ka alat ang napuno, bisan pa mga 4,000 ka lalaki, subong man mga babayi kag kabataan, ang nakakaon na!

Ginpapauli ni Jesus ang mga kadam-an, nagsakay sia sa isa ka sakayan upod sa iya mga disipulo, kag nagtabok sa nakatundan nga baybayon sang Dagat sang Galilea. Ang mga Fariseo diri, nga sa sini nga tion gin-updan sang mga katapo sang relihioso nga sekta sang mga Saduceo, nagtinguha sa pagsulay kay Jesus paagi sa pagpangabay sa iya nga magpakita sing tanda gikan sa langit.

Nahibaluan ang ila panikasog nga sulayon sia, si Jesus nagsabat: “Kon magtunod ang adlaw nagasiling kamo, ‘Magaayo ang tiyempo, kay ang langit mapula’; kag sa aga, ‘Magaulan, kay ang langit mapula kag magal-um.’ Makahibalo kamo maghangop sang dagway sang langit, apang indi kamo makahangop sang mga tanda sang mga tion.”

Bangod sina, gintawag sila ni Jesus nga malaut kag makilahion kag nagpaandam sa ila nga, subong sang ginsiling na niya sa mga Fariseo, wala sing tanda nga ihatag sa ila luwas ang tanda ni Jonas. Nian, sia kag ang iya mga disipulo nagsakay sa isa ka sakayan kag nagpadulong sa Betsaida sa aminhan-sidlangan nga baybayon sang Dagat sang Galilea. Samtang nagalakbay sila natukiban sang mga disipulo nga nalipat sila sa pagdala sing tinapay, kag isa na lamang ka bilog nga tinapay ang nabilin.

Ginadumdom ang iya pagpakighambal sa Fariseo kag sa Saduceo nga mga sumalakdag ni Herodes, si Jesus naglaygay: “Mag-andam kag magbantay kamo batok sa lebadura sang mga Fariseo kag sa lebadura ni Herodes.” Sanglit nagpati ang mga disipulo nga ang ginapatuhuyan ni Jesus amo ang ila pagkalipat sa pagdala sing tinapay, bangod ang lebadura maathag nga nagapahangop sa ila hunahuna sing tinapay, nagsugod sila sa pagbaisay nahanungod sini. Sang matalupangdan ang ila indi pagkahangop, si Jesus nagsiling: “Ngaa bala nagabinaisay kamo tungod kay wala kamo sing tinapay?”

Kasan-o lamang, si Jesus milagruso nga nag-aman sing tinapay para sa linibolibo ka tawo, ayhan isa ukon duha ka adlaw lamang ang nagligad sang ginhimo niya ining katapusan nga milagro. Dapat nahibaluan nila kuntani nga indi ang kakulang sing literal nga mga tinapay ang ginakabalak-an niya. “Wala bala kamo makadumdom,” pahanumdom sa ila ni Jesus, “sang ginpamihakpihak ko ang lima ka bilog nga tinapay para sa lima ka libo ka tawo, pila ka alat ang inyo ginpuno?”

“Napulog-duha,” sabat nila.

“Sang ginpamihakpihak ko ang pito para sa apat ka libo ka lalaki, pila ka alat ang inyo ginpuno?”

“Pito,” sabat nila.

“Wala pa bala kamo makahantop?” pamangkot ni Jesus. “Paano bala nga wala kamo makahantop nga indi nahanungod sa tinapay ang akon ginpamulong sa inyo? Apang andam kamo sa lebadura sang mga Fariseo kag mga Saduceo.”

Nahangpan gid man sang ulihi sang mga disipulo ang punto. Ang lebadura, isa ka sustansya nga nagapaaslom kag nagapaalsa sa tinapay, isa ka tinaga nga masami ginagamit agod magpahangop sing kalautan. Gani nahangpan na karon sang mga disipulo nga si Jesus nagagamit sing simbulismo, nga ginapaandaman niya sila nga magbantay batok sa “panudlo sang mga Fariseo kag mga Saduceo,” nga may makapalain nga epekto. Marcos 8:1-21; Mateo 15:32–16:12.

◆ Ngaa nagdala ang mga tawo sing dalagku nga mga alat nga may kalan-on?

◆ Paghalin sa Decapolis, nagsakay si Jesus sa sakayan padulong diin?

◆ Ano ang sayop nga paghangop sang mga disipulo nahanungod sa komento ni Jesus sa lebadura?

◆ Ano ang buot silingon ni Jesus sa “lebadura sang mga Fariseo kag sang mga Saduceo”?