Ginatudlo Bala sang Pulong sang Dios ang Reinkarnasyon?

ANG bisan sin-o nga nagausisa sa Biblia sa paglaum nga makakita sia sing suporta para sa doktrina sang reinkarnasyon pat-od nga mapaslawan. Wala gid kamo sing makita sa Biblia nga ang mga tawo nabuhi na sa nagligad nga mga pagkabuhi. Dugang pa, indi ninyo makit-an ang mga ekspresyon subong sang “reinkarnasyon” ukon “pagsuob sang kalag” ukon “dimamalatyon nga kalag” sa Biblia.

Apang, ginapaathag sang iban nga nagapati sa reinkarnasyon ining kakulang sing suporta gikan sa Biblia paagi sa pagsiling nga ang ideya sang reinkarnasyon tuman ka kinaandan sang dumaan nga mga tion amo kon ngaa indi na kinahanglan ang bisan anong paathag. Matuod, ang doktrina sang reinkarnasyon tuman na kadugay, apang walay sapayan kon daw ano ini kadugay ukon daw ano ini ka kinaandan ukon indi sadto, ang pamangkot amo gihapon, Ginatudlo bala ini sang Biblia?

Sa 2 Timoteo 3:​16, 17, si apostol Pablo nagsulat: “Ang bug-os nga Kasulatan gin-inspirar sang Dios kag mapuslanon para sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios mangin sangkol sing bug-os, nga nasangkapan sing bug-os para sa tagsa ka maayong buhat.” Huo, ang Biblia amo ang inspirado nga Pulong sang Dios, ang iya komunikasyon sa tawhanon nga pamilya. Kag subong sang ginsulat ni Pablo, ginahimo sini ang bunayag nga manugpamangkot nga mangin “sangkol sing bug-os, nasangkapan sing bug-os” sa pagsabat sa tanan nga importante nga pamangkot nahanungod sa kabuhi, lakip ang mga pamangkot nahanungod sa nagligad, karon, kag sa palaabuton.

Nagsiling man si Pablo: “Sang mabaton ninyo ang pulong sang Dios, nga nabatian ninyo sa amon, ginbaton ninyo ini, indi subong pulong sang mga tawo, kundi, subong nga amo gid ini sa pagkamatuod, ang pulong sang Dios.” (1 Tesalonica 2:13) Sanglit ang Biblia nagaunod sing mga panghunahuna sang Dios, indi sang iya sang dihimpit nga tawo, indi kita dapat makibot sa pagsapo nga ang Biblia masami nga nagakatuhay sa mga panghunahuna sang tawo bisan pa ini nga mga ideya popular sa sulod sang mga tinuig. Apang mahimo magasiling ka, ‘Wala bala ang Biblia, sa pila ka bahin, nagapahangop man lang sing reinkarnasyon?’

Mga Teksto nga Ginhangop sing Sayop

Ang mga nagapati sa reinkarnasyon nagasiling nga ginapatuhuyan ini sang Biblia sa Mateo 17:​11-13, diin ginaangot ni Jesus si Juan Bautista kay manalagna Elias sang dumaan nga tion. Ini nga teksto mabasa: “ ‘Si Elias, sa pagkamatuod, nagapakari kag magapasag-uli sing tanan nga butang. Apang, ginasiling ko sa inyo nga si Elias nakakari na . . . ’ Nian nahangpan sang mga disipulo nga naghambal sia sa ila nahanungod kay Juan Bautista.”

Sa pagsiling sini, buot bala silingon ni Jesus nga si Juan Bautista isa ka reinkarnasyon ni manalagna Elias? Nahibaluan mismo ni Juan nga indi sia reinkarnasyon ni manalagna Elias. Isa ka bes sang ginpamangkot sia, “Ikaw bala si Elias?” si Juan maathag nga nagsabat: “Indi ako.” (Juan 1:21) Apang, gintagna na anay nga si Juan magauna sa Mesias, “nga may espiritu kag gahom ni Elias.” (Lucas 1:17; Malaquias 4:​5, 6) Kon sa aton pa, si Juan Bautista amo si “Elias” sa kahulugan nga ang hilikuton nga ginhimo niya kaanggid sa ginhimo ni Elias.

Sa Juan 9:​1, 2, aton mabasa: “Karon sang nagalabay sia [Jesus] nakita niya ang tawo nga bulag kutob sa pagkatawo. Kag ang iya mga disipulo nagpamangkot sa iya: ‘Rabbi, sin-o ang nakasala, ining tawo ukon ang iya mga ginikanan, nga natawo sia nga bulag?’ ” Ang iban nga nagapati sa reinkarnasyon nagapahangop nga sanglit ini nga tawo natawo nga bulag, pat-od gid nga ang iya sala natabo sa nagligad nga pagkabuhi.

Apang kon ano man ang ginbangdan sang pagpamangkot sang mga disipulo, ang sabat nga ginhatag ni Jesus dapat amo ang magapamat-od. Sia nagsiling: “Ini nga tawo wala makasala, ukon ang iya mga ginikanan.” (Juan 9:3) Nagasumpakil ini sa reinkarnasyon, nga nagapahangop nga ang mga diperensia sa lawas nagagikan sa mga sala sa nagligad nga pagkabuhi. Ang punto nga wala sing bisan sin-o ang makasala antes sang iya pagkatawo amo man ang ginsiling ni Pablo sang magsulat sia nahanungod kay Esau kag kay Jacob nga “wala pa sila matawo kag wala makahimo sing maayo ukon malain.”​—Roma 9:11.

Pagkabanhaw, Indi Reinkarnasyon

Apang, bisan pa wala ginasakdag sang Biblia ang doktrina sang reinkarnasyon, indi dapat magbatyag sing kapaslawan ang bisan sin-o. Ang mensahe sang Biblia nagatanyag sing butang nga labi ka makalipay sangsa ideya nga matawo liwat sa isa ka kalibutan nga puno sing balatian, kasubo, kasakit, kag kamatayon. Kag indi lamang nga makalipay ang ginatanyag sang Biblia kundi amo pa ini ang kamatuoran, ang Pulong mismo sang Dios.

Ginpabutyag ni Pablo ang makapalig-on nga doktrina sing subong sini: “May paglaum ako sa Dios . . . nga may pagkabanhaw sang mga matarong kag mga dimatarong.” Ang tinaga nga “pagkabanhaw,” ukon ang pila ka porma sini, kapin sa 50 ka beses nga makit-an sa Cristianong Griegong Kasulatan, kag ginpatuhuyan ini ni Pablo subong isa ka panguna nga doktrina sang Cristianong pagtuo.​—Binuhatan 24:15; Hebreo 6:​1, 2.

Ang pagkabanhaw gikan sa minatay nagakahulugan, sing maathag, nga may kamatayon. Wala gid ikaw sing makita sa Biblia nga bisan anong pagpahangop nga ang tawo may yara dimamalatyon nga kalag. Kon ang tawo may yara isa ka dimamalatyon nga kalag nga nagapain gikan sa lawas sa kamatayon kag nagakadto sa isa ka walay katapusan nga destinasyon sa langit ukon sa impierno ukon nagaeksperiensia sing reinkarnasyon, nian indi na kinahanglan ang pagkabanhaw. Sa pihak nga bahin, mga isa ka gatos ka teksto sa Biblia ang nagapakita nga ang tawhanon nga kalag, indi dimamalatyon, kundi mamalatyon kag sarang malaglag. Ang Biblia wala nagabulubag-o sa pagsiling nga ang kamatayon kabaliskaran sang kabuhi, kon sayuron, wala nagaluntad subong kabaliskaran sang nagaluntad.

Ang kamatayon, ukon indi pagluntad, amo ang silot sa pagpakasala ni Adan kag ni Eva batok sa Dios. Isa yadto ka silot, indi isa ka alagyan padulong sa dimamalatyon nga kabuhi sa iban nga duog. Maathag nga nagsiling ang Dios nga magabalik sila sa ila ginhalinan​—sa yab-ok sang duta: “Ginkuha ka sa sini. Kay yab-ok ka kag sa yab-ok magabalik ka.” (Genesis 3:19) Wala sila sing dimamalatyon nga kalag antes sila gintuga sang Dios kag ginpahamtang sa duta, sa hardin sang Eden, kag wala sila sini sa tapos sila mapatay.

Ang pagkabanhaw gikan sa kamatayon ginapaanggid sa pagbugtaw gikan sa katulugon ukon pagpahuway. Halimbawa, si Jesus nagsiling tuhoy kay Lazaro nga iya sadto banhawon: “Si Lazaro . . . nagtulog, apang makadto ako agod nga pukawon sia gikan sa katulugon.” (Juan 11:11) Tuhoy kay manalagna Daniel, aton mabasa: “Kay magapahuway ka, apang magatindog ka sa imo kapalaran sa katapusan sang mga adlaw.”​—Daniel 12:13.

Dayon nga Kabuhi sa Duta

Ano ang madangatan sang mga banhawon gikan sa kamatayon? Ang Biblia nagahambal sing duha ka sahi sang pagkabanhaw​—isa ka langitnon kag isa ka dutan-on. Ang dutan-on nga pagkabanhaw amo ang madangatan sang kalabanan nga nabuhi kag napatay. Pila lamang ang may langitnon nga pagkabanhaw, agod maghari upod kay Cristo sa langitnon nga Ginharian sang Dios. (Bugna 14:​1-3; 20:4) San-o magasugod ang dutan-on nga pagkabanhaw? Magasugod ini sa tapos ining karon nga malaut nga sistema malaglag sang Dios kag ang “isa ka bag-ong duta,” isa ka matarong nga bag-ong katilingban sang katawhan, magaluntad na.​—2 Pedro 3:13; Hulubaton 2:​21, 22; Daniel 2:44; Hulubaton 2:​21, 22.

Sa “bag-ong duta,” wala na sing balatian ukon pag-antos. Bisan ang kamatayon madula na kag pagabuslan sang paglaum nga mabuhi sing dayon. “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:4) Ang salmista nagtagna man: “Ang mga matarong magapanag-iya sang duta, kag magapuyo sila sa sini sing dayon.” (Salmo 37:29) Sing kaanggid, si Jesus nagsiling: “Malipayon ang mga malum-ok sing panghunahuna, kay panublion nila ang duta.”​—Mateo 5:5.

Ipaanggid inang daku nga mga saad sang Dios sa doktrina sang reinkarnasyon. Suno sa sina nga ideya, ginapatihan nga nagabalikbalik ikaw sa tion kag tion agod magkabuhi sa sini gihapon nga dunot nga daan nga sistema sang mga butang. Magakahulugan ina nga ikaw padayon gihapon nga maapektuhan sang kalautan, pag-antos, balatian, kag kamatayon sa isa ka halos walay katapusan nga siklo. Daw ano ka walay paglaum nga palaabuton ina!

Sa amo, ginasabat sang Biblia ang mga pamangkot, Nabuhi ka na bala anay? kag, Mabuhi ka bala liwat? sing subong sini: Indi, wala ikaw sing kabuhi anay luwas sangsa karon. Apang posible nga mapadugay mo ang imo kabuhi, sa pagkamatuod, sing dayon. Sa karon, sa sining “katapusan nga mga adlaw” sining karon nga sistema, mahimo ikaw makalaum nga maluwas sa katapusan sining kalibutan kag makasulod sa bag-ong kalibutan sang Dios nga indi na mapatay. (2 Timoteo 3:​1-5; Bugna 7:​9-15) Ukon kon mapatay ikaw sa wala pa mag-abot ang bag-ong kalibutan sang Dios, may paglaum ikaw nga banhawon padulong sa dayon nga kabuhi sa isa ka paraiso nga duta.​—Lucas 23:43.

Kon magpakita ikaw sing pagtuo kay Jesus, bisan ano man ang matabo, naaplikar man sa imo ang ginsiling ni Jesus kay Marta sang mapatay ang iya utod nga si Lazaro: “Ako ang pagkabanhaw kag ang kabuhi. Sia nga nagapakita sing pagtuo sa akon, bisan pa mapatay sia, magakabuhi; kag ang tagsa nga nagakabuhi kag nagapakita sing pagtuo sa akon indi na gid mapatay.”​—Juan 11:​25, 26.

[Blurb sa pahina 8]

Si Adan wala sing dimamalatyon nga kalag kundi nagbalik sia sa yab-ok sang napatay sia

[Retrato sa Pahina 9]

Ang Pulong sang Dios nagatudlo sing pagkabanhaw, indi sing reinkarnasyon