Isa Bala ka Sakripisyo ang Paghatag Mo?

Balanse nga Pagtamod sa mga Amot

SA TAPOS matudluan ang mga tawo sing madamo nga butang sa templo, si Jesus “naglingkod sa tampad sang bahandian kag nagtan-aw kon paano ang kadam-an nagahulog sing kuwarta sa bahandian.” (Marcos 12:41) Ang nagsunod amo ang kilala nga rekord tuhoy sa lepta sang babayi nga balo. Apang ngaa naglingkod didto si Jesus kag gintan-aw ang mga tawo nga nagahatag sang ila dulot? Wala bala niya ginsilingan ang iya mga disipulo nga indi gani nila pagpahibaluon ang ila wala nga kamot kon ano ang ginahimo sang ila tuo nga kamot kon nagahatag sila sang ila mga dulot sang kaluoy?—Mateo 6:3.

Antes sini, mabaskog nga ginpakamalaut ni Jesus ang relihioso nga mga lider bangod sang ila paggamit sing malaut nga mga metodo sa paghalunhon sa ‘mga balay sang mga babaying balo.’ Nagsiling sia nga ining mga relihionista “magabaton sing daku pa nga katagudilian.” (Marcos 12:40) Agod magtudlo sing leksion, ginliso niya ang iya igtalupangod sa ginahimo sang mga tawo didto sa mga bahandian. Sa karon, nga madamo kita sing mabatian nahanungod sa dalagku nga kuwarta nga nadalahig sa mga organisasyon sang iglesia, sa sayop nga paggamit sa sina nga mga kuwarta, kag sa maluho nga mga estilo sang pagkabuhi sang mga may katungdanan sa sini, maayo nga pamatian naton ang isiling ni Jesus.—Basaha palihog ang Marcos 12:41-44.

Ang mga Bahandian

Ang rekord nagasiling nga si Jesus “naglingkod sa tampad sang mga bahandian.” Mahimo nga yari ini sa Luwang sang mga Babayi, nga sa diin may pila ka bahandian, ukon mga kahon, nga ginabutang sa tupad sang dingding agod nga mahulog sang mga tawo ang ila mga dulot. Ang Judiyong tradisyon nagasugid sa aton nga may yara 13 tanan ka kahon. Sa Hebreo ginatawag ini nga mga trumpeta, bangod may diutay ini nga buluksan sa ibabaw nga pareho sa korte sang punta sang trumpeta. Ginasiling kuno nga ‘wala sing nagasulod sa templo nga indi maghulog sa sini.’

Ang Pranses nga propesor nga si Edmond Stap­fer, sa iya libro nga Palestine in the Time of Christ (1885), naghatag sing medyo detalyado nga paglaragway sining mga bahandian. Ang iya sinulat nagahatag sa aton sing paghangop sa relihioso nga kabuhi sang mga tawo sadtong tion, labi na tuhoy sa ila mga amot sa mga pag-alagad sa templo.

“Ang tagsa ka kahon may lain nga katuyuan, nga ginapakita sang inskripsion sa Hebreo nga hambal. Ang una may sulat nga: Bag-o nga mga siclo; kon sayoron, mga siclo nga ginpain para sa mga gasto sa sulod sang tuig. Ang ikaduha: Daan nga mga siclo; kon sayoron, mga siclo nga gindedikar para sa mga gasto sang nagligad nga tuig. Ikatlo: Mga tukmo kag mga kuyabog nga salampati; ang kuwarta nga ginbutang sa sining kahon amo ang presyo nga ginbayad sang mga nagdulot sing duha ka tukmo ukon duha ka kuyabog nga salampati, ang isa subong halad nga sinunog, kag ang isa pa subong halad para sa sala. Sa ibabaw sang ikap-at nga kahon may nasulat nga: Mga halad nga sinunog; ining kuwarta amo ang nagatabon sa gasto sang iban nga mga halad nga sinunog. Ang ikalima may inskripsion nga: Kahoy, kag nagaunod sang mga dulot sang mga matutom agod ibakal sing kahoy para sa altar. Ang ikan-um: Incienso (kuwarta agod ibakal sing incienso). Ang ikapito: Para sa santuaryo (kuwarta para sa lingkuranan sang kaluoy). Ang nabilin nga anom ka kahon may inskripsion nga: Kinabubut-on nga mga dulot.”

Ang ngalan sa una nga duha ka kahon nagapatuhoy sa katunga nga siclo (duha ka darico sa kuwarta sang Gresya) nga buhis nga ginapatuman sang kasuguan nga ibayad sang tagsa ka adulto nga lalaki para sa pagmentinar sa templo, sa mga serbisyo nga ginahimo didto, kag sa adlaw-adlaw nga mga sakripisyo nga ginadulot para sa bug-os nga pungsod. Ining buhis masami nga ginakolekta sa lokal nga mga komunidad kag dayon ginadala sa templo.—Mateo 17:24.

Ang katawhan ginaobligar man sang Kasuguan nga maghimo sing nanuhaytuhay nga mga dulot para sa ila kaugalingon. Ang iban para sa mga sala nga nakomiter, ang iban para sa seremonyal nga mga rason, kag ang iban pa gid bangod sang ila debosyon kag pasalamat. Ang mga kahon nga namarkahan sing “Mga tukmo kag mga kuyabog nga salampati” kag “Mga halad nga sinunog” para sa sina nga mga katuyuan. “Sa Trumpeta III,” siling sang libro nga The Temple, Its Ministry and Services, “ginahulog sang mga babayi ang katumbas nga kuwarta sang mga kuyabog nga salampati nga dapat dalhon nila para sa halad nga sinunog kag halad para sa sala, nga ginakuha sa adlaw-adlaw kag ginadulot ang katumbas nga kadamuon sang mga kuyabog nga salampati.” Mahimo gid nga amo ini ang ginhimo sang mga ginikanan sang lapsag nga si Jesus.—Tan-awa ang Lucas 2:22-24; Levitico 12:6-8.

May yara man mga dulot para sa kahoy kag incienso sa altar kag para sa boluntaryo nga mga dulot. Sa liwat, suno kay Propesor Stap­fer, “kon may luyag maghatag sing kuwarta para sa kahoy ukon incienso, may kantidad nga gintalana, kag ang manubo pa sa sini mahimo nga indi pag-idulot. Kinahanglan nga sa dimagkubos ihatag ang presyo sang isa ka hakop sang incienso, ukon duha ka kahoy nga isa ka kubiko ang kalabaon kag daku.”

Ano ang maton-an naton gikan sa sini tanan? Maathag nga ang mga Israelinhon may madamo nga salabton sa pagmentinar sa tabernakulo kag sang ulihi sang templo sa Jerusalem, ang sentro sang matuod nga pagsimba. Ang mga halad kag mga dulot bahin sang ila pagsimba. Sa kamatuoran, ang Kasuguan nagsugo nga “wala sing mag-atubang kay Jehova nga wala sing dala.” (Deuteronomio 16:16) Apang ano ang ila pagtamod sa sining mga obligasyon?

Nanuhaytuhay nga mga Pagtamod

Ginapakita sang rekord sang Biblia nga ang katawhan mahinatagon gid kag maalwan sang tion ni Moises kag ni David kag sang ulihi sang paggahom ni Joas kag Josias. (Exodo 36:3-7; 1 Cronica 29:1-9; 2 Cronica 24:4-14; 34:9, 10) Malipayon sila nga may bahin sila sa pagtukod sa balay ni Jehova kag sa pagmentinar sini subong man sa pagpauswag sang matuod nga pagsimba. Ang ila sentimiento nagakaigo gid nga ginpabutyag sang mga pulong ni David sang magsiling sia: “Nagkasadya ako sang nagsiling sila sa akon: ‘Magkadto kita sa balay ni Jehova.’”—Salmo 122:1.

Apang, indi tanan may maalwan nga espiritu. Halimbawa, mabasa naton nga sang mga adlaw ni Malaquias, ang mga saserdote nagadulot kay Jehova sing “ginkuha sa panglugos, kag sing piang, kag sing masakiton.” Sa baylo nga magkasadya sa ila pribilehiyo sang pag-alagad, sila nagsiling: “Yari karon! Daw ano ka makatalaka ini!”—Malaquias 1:13.

Subong man, sang panahon ni Jesus ginhimuslan sang iban ang kahimtangan nga pauswagon ang ila kaugalingon nga mga kaayuhan. Halimbawa, ang malaut nga mga manugbaylo sing kuwarta sa templo, wala didto agod lamang magbaylo sing kuwarta. Sa baylo, ginahimuslan nila ang kamatuoran nga Hebreo lamang nga mga siclo ang ginabaton subong mga dulot, kag ang tanan nga may Romanhon ukon Gresyanhon nga kuwarta dapat magpabaylo. Suno kay Alfred Eder­sheim, isa ka awtoridad sa maragtas sang mga Judiyo, “ang mga bankero gintugutan sa pagtasar sing isa ka pilak nga meah, ukon mga ikap-at sang isa ka denar [ukon denaryo, bug-os nga suweldo sang mamumugon sa isa ka adlaw nga pagpangabudlay] sa tagsa ka katunga nga siclo.” Kon husto ini, madali mahangpan nga isa ini anay ka maayo nga negosyo kag kon ngaa naakig gid ang relihioso nga mga lider sang gintabog ni Jesus ang mga manugbaylo sing kuwarta.

“Sa Iya Kinawad-on”

Ini tanan nagapadaku sang ilustrasyon ni Jesus nahanungod sa diutay nga amot sang isa ka imol nga babaying balo, nga sa wala sing duhaduha ginhulog niya sa isa sang mga kahon nga namarkahan sing “Kinabubut-on nga mga dulot.” Subong isa ka balo, indi sia obligado nga maghatag sing buhis, kag bangod wala sia sing palangabuhian, mahimo nga wala niya malab-ot ang kantidad nga ginakinahanglan para sa mga halad nga sinunog ukon sa kahoy ukon sa incienso nga mga dulot. Apang, luyag niya maghimo sing isa ka butang agod ipakita ang iya gugma kay Jehova. Indi niya luyag nga mapuwera sia ukon ibilin lamang ini sa ‘makasarang sini.’ Si Jesus nagsiling: “Sia sa iya kinawad-on, nagbutang sang tanan niya, bisan ang tanan nga iya inugpangabuhi.”—Marcos 12:44.

Madamo sing mapuslanon nga leksion ang maton-an naton gikan sa sining hitabo. Ang labing talalupangdon, ayhan, amo nga samtang kita tanan may pribilehiyo sa pagsakdag sa matuod nga pagsimba paagi sa aton materyal nga mga pagkabutang, ang hamili gid sa panulok sang Dios, indi ang aton paghatag sang indi tanto ka importante, kundi amo ang paghatag sang mapuslanon gid sa aton. Sa iban nga mga pulong, ginahatag bala naton ang butang nga indi naton kahidlawan? Ukon ang paghatag bala naton isa ka sakripisyo gid?

Pagpauswag sa Matuod nga Pagsimba Karon

Ginapauswag sang mga Saksi ni Jehova ang matuod nga pagsimba paagi sa makugi nga pagbantala ‘sining maayong balita sang ginharian . . . sa bug-os napuy-an nga duta.’ (Mateo 24:14) Agod mahimo ining bug-os globo nga hilikuton indi lamang dedikado nga panikasog, tion, kag enerhiya ang kinahanglanon kundi daku man nga gasto. Ang 1987 Yearbook of Jehovah’s Witnesses nagareport nga “sang 1986, $23,545,801.70 ang kabilugan nga nagasto sa pagsakdag . . . sa 2,762 ka misyonero, 13,351 ka espesyal payunir, kag mga manugtatap kag sa ila asawa para sa 3,353 ka sirkito kag distrito sa bilog nga kalibutan.” Wala pa ini labot sa “daku nga gasto sa pagpamakal, sa pagpatindog, kag sa pagkay-o sang mga propiedad; sa pagsangkap sa mga pabrika kag mga opisina sa ulong-talatapan kag sa 93 ka sanga sang Sosiedad; kag sa pag-aman sing materyal nga mga kinahanglanon sang 8,920 ka boluntaryo nga nagaalagad sa mga panimalay Bethel.”

‘Sa diin nagagikan ina nga mga kuwarta?’ amo ang masami ginapamangkot. Indi kaangay sang mga iglesia sang Cristiandad, ang mga Saksi ni Jehova wala nagapangolekta ukon nagapadala sing mga sobre agod mangayo sing mga donasyon. Sa baylo, ang mga kahon para sa amot—kaangay sang mga bahandian sang panahon sang Biblia—ginabutang sa ila mga Kingdom Hall. Kon kaisa, ang iban nga mga kahon mahimo ginabutang para sa pinasahi nga mga katuyuan, subong sang pagpatindog sing Kingdom Hall ukon Assembly Hall ukon sa pagbulig sa mga misyonero nga makatambong sa kombension sa ila dutang natawhan. Ang mga amot mahimo man ipadala sing direkta sa Watch Tower Society sa 25 Columbia ­Heights, Brook­lyn, New York 11201, ukon sa sanga talatapan sang Sosiedad sa inyo pungsod, para sa pagpauswag sa pagbantala nga hilikuton sa bug-os nga kalibutan.

Paano mo ginatamod ining madamo kag nanuhaytuhay nga mga paagi sang pag-amot? Imo bala ginatamod ini, kaangay sang pila sang adlaw ni Malaquias, nga isa ka makatalaka nga lulan, ayhan nagasiling sa imo tagipusuon: “Yari karon! Daw ano ka makatalaka!”? Ukon imo bala ginatamod ini, kaangay sang “imol nga babaying balo,” subong mga kahigayunan sa pagpakita sang imo kakugi kag kabalaka para sa matuod nga pagsimba kag sang imo handum sa pagpadungog kay Jehova paagi sa imo hamili nga mga butang? Indi pagkalimti ang pamangkot: Isa bala ka sakripisyo ang paghatag mo?

“‘Tilawi ninyo ako, palihog, sa sini,’ siling ni Jehova sang mga kasoldadosan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo tubtob wala na sing kakulangan.’” (Malaquias 3:10) Ang espirituwal nga kabuganaan kag ang pag-uswag sa bug-os kalibutan sa tunga sang katawhan ni Jehova nagapamatuod nga ginahimo na ina ni Jehova. Kabay nga magpadayon kita sa paghatag kay Jehova sing dulot nga isa gid ka halad.

[Kahon sa pahina 30]

KON PAANO ANG IBAN NAGAAMOT SA HILIKUTON SANG GINHARIAN

◻ MGA REGALO: Ang kuwarta nga boluntaryo nga mga donasyon mahimo ipadala sing direkta sa Watch Tower Bible and Tract Society of Pennsylvania, 25 Columbia ­Heights, Brook­lyn, New York 11201, ukon sa lokal nga sanga talatapan sang Sosiedad. Ang propiedad subong sang real ­estate, subong man mga alahas ukon iban pa nga bilidhon nga mga butang, sarang man madonar. Ang isa ka malip-ot nga sulat nga nagasiling nga ini donasyon dapat iupod sa sining mga amot.

◻ KONDISYONAL NGA KAHIMUSAN SA PAGDONAR: Mahimo itugyan ang kuwarta sa Watch Tower Society, upod ang kondisyon nga sa tion sang personal nga pagkinahanglan, ibalik ini sa nagdonar.

◻ SIGURO: Ang Watch Tower Society mahimo hingadlan subong ang benepisyaryo sang isa ka polisa sang siguro sa kabuhi ukon sa plano may kaangtanan sa pagretiro ukon pension.

◻ TRUST: Ang mga patago sa banko sarang maipiyar sa Sosiedad. Kon himuon ini, pahibalua palihog ang Sosiedad. Ang mga ­stock, bond, kag propiedad sarang man madonar nga may kahimusan nga ang nagdonar hatagan sing benepisyo samtang nagakabuhi sia. Ginadula sini nga metodo ang gasto kag mga walay kapat-uran sa paghanda sa testamento, samtang nagapasalig nga ang Sosiedad amo ang magabaton sa propiedad kon mapatay ang tag-iya sini.

◻ MGA TESTAMENTO: Ang propiedad ukon kuwarta sarang mapapanubli sa Watch Tower Society paagi sa legal nga testamento. Dapat padalhan sing kopya ang Sosiedad.

Para sa dugang pa nga impormasyon kag laygay nahanungod sina, magsulat sa Treas­urer’s Of­fice, Watch Tower Bible and Tract Society of Penn­syl­vania, 25 Columbia ­Heights, Brook­lyn, New York 11201, ukon sa lokal nga sanga talatapan sang Sosiedad.