“Wala Pa Gid sing Tawo nga Nagpamulong Kaangay Sini”

1, 2. (a) Ngaa ang mga opisyales nga ginpadala sa pagdakop kay Jesus nagbalik nga indi sia kaupod? (b) Ngaa si Jesus isa ka tumalagsahon nga manunudlo?

ANG mga Fariseo nagsingkal sa kaakig. Si Jesus yara sa templo kag nagapanudlo tuhoy sa iya Amay. Ang mga nagapamati indi maghilisugot; madamo ang nagtuo kay Jesus, samtang luyag naman sang iban nga ipadakop sia. Bangod indi makapugong sang ila kaakig, nagpadala ang relihiosong mga lider sing mga opisyales sa pagdakop kay Jesus. Apang, nagbalik ang mga opisyales nga indi kaupod si Jesus. Nagpamangkot ang puno nga mga saserdote kag ang mga Fariseo: “Ngaa wala ninyo sia gindala diri?” Ang mga opisyales nagsabat: “Wala pa gid sing tawo nga nagpamulong kaangay sini.” Nahayanghag gid sila sa pagpanudlo ni Jesus amo nga wala nila sia gindakop.a​—Juan 7:45, 46.

² Indi lamang mga opisyales ang nahayanghag sa pagpanudlo ni Jesus. Madamo nga tawo ang nagtipon agod mamati lamang sa iya nga nagapanudlo. (Marcos 3:7, 9; 4:1; Lucas 5:1-3) Ngaa si Jesus isa ka tumalagsahon nga manunudlo? Subong sang nakita naton sa Kapitulo 8, ginahigugma niya ang mga kamatuoran nga ginpaalinton niya, kag ginahigugma niya ang katawhan nga gintudluan niya. Lantip man sia sa paggamit sa mga paagi sang pagpanudlo. Binagbinagon naton ang tatlo ka epektibo nga paagi nga gingamit niya kag kon paano naton ini mailog.

3, 4. (a) Ngaa naggamit si Jesus sing simple nga mga tinaga sa iya pagpanudlo? (b) Paano ang Sermon sa Bukid isa ka halimbawa sang simple nga pagpanudlo ni Jesus?

³ Mahanduraw mo bala kon daw ano kadamo nga bokabularyo ang mahimo kuntani gamiton ni Jesus? Apang, sang nagpanudlo sia, wala sia magpamulong tuhoy sa mga butang nga indi mahangpan sang iya tumalambong, nga ang madamo sa ila “wala sing tinun-an kag kinaandan lamang.” (Binuhatan 4:13) Mapatugsilingon sia sa ila mga limitasyon, kag wala niya sila ginpabug-atan sing tuman kadamo nga impormasyon. (Juan 16:12) Ang iya pinamulong simple lamang, apang ang kamatuoran nga ginpaalinton niya importante gid.

⁴ Binagbinaga, halimbawa, ang Sermon sa Bukid, nga narekord sa Mateo 5:3–7:27. Ang laygay nga ginhatag ni Jesus sa sini nga sermon madalom kag nagabinagbinag kon ano gid ang kabangdanan sang problema. Wala sia maggamit sing masibod nga mga ideya ukon mga dinalan. Sa katunayan, mahangpan bisan sang mga bata ang iya ginsiling! Gani, indi katingalahan nga sang makatapos si Jesus, ang kadam-an​—ayhan naglakip sa madamo nga mangunguma, manugbantay, kag mangingisda—​“nahayanghag sa iya paagi sang pagpanudlo.”​—Mateo 7:28.

 5. Maghatag sing mga halimbawa sang simple lamang nga mga pinamulong nga gingamit ni Jesus apang nga may importante gid nga kahulugan.

⁵ Sa iya pagpanudlo, si Jesus masami nga naggamit sing simple kag malip-ot nga mga dinalan kag naghambal sing mga pinamulong nga may importante gid nga kahulugan. Bangod wala pa sadto sing naimprinta nga mga libro, ginpatudok niya ang iya mensahe sa hunahuna kag tagipusuon sang iya tagpalamati. Binagbinaga ang pila ka halimbawa: “Untati ninyo ang paghukom agod indi kamo paghukman.” “Ang mga tawo nga mapagros wala nagakinahanglan sang manugbulong, kundi ang mga nagamasakit.” “Ang espiritu handa, apang ang unod maluya.” “Ibayad ninyo kay Cesar ang mga butang nga iya ni Cesar, apang ang mga butang sang Dios sa Dios.” “May kapin nga kalipay sa paghatag sangsa pagbaton.”b (Mateo 7:1; 9:12; 26:41; Marcos 12:17; Binuhatan 20:35) Pagligad sang halos 2,000 ka tuig sang una ini nga ginpamulong, ini nga mga pinamulong indi gihapon malipatan.

6, 7. (a) Agod makapanudlo sing simple, ngaa importante nga maggamit kita sing mahapos mahangpan nga mga tinaga? (b) Paano naton malikawan nga pabug-atan ang isa ka estudyante sang Biblia sing tuman kadamo nga impormasyon?

⁶ Paano kita makapanudlo sing simple? Ang isa ka importante nga butang nga kinahanglan amo nga maggamit kita sing simple nga mga tinaga nga mahapos mahangpan sang kalabanan nga mga tawo. Ang sadsaran nga mga kamatuoran sang Pulong sang Dios indi masibod. Ginpahayag ni Jehova ang iya mga katuyuan sa mga tawo nga may hanuot kag mapainubuson nga tagipusuon. (1 Corinto 1:26-28) Ang mga kamatuoran sang Pulong sang Dios mapaalinton sing epektibo paagi sa simple kag ginpili sing maayo nga mga tinaga.

⁷ Agod makapanudlo sing simple, dapat kita maghalong nga wala naton ginapabug-atan ang isa ka estudyante sang Biblia sing tuman kadamo nga impormasyon. Busa, kon nagadumala sing pagtuon sa Biblia, indi kinahanglan nga ipaathag naton ang tanan nga detalye; indi kinahanglan nga dalion naton ang pagbinagbinag sa materyal nga daw subong bala nga ang pagtuptop sa gintalana nga mga pahina amo ang pinakaimportante. Sa baylo, maalamon nga ibagay naton ang kadasigon sang pagtuon sa mga kinahanglanon kag mga ikasarang sang estudyante. Ang aton tulumuron amo ang pagbulig sa estudyante nga mangin sumulunod ni Cristo kag sumilimba ni Jehova. Gani, kinahanglan nga maghinguyang kita sing tion tubtob mahangpan sang estudyante ang iya ginatun-an. Paagi lamang sini nga matandog ang iya tagipusuon sang kamatuoran sang Biblia kag mapahulag sia nga iaplikar ang iya natun-an.​—Roma 12:2.

8, 9. (a) Ngaa naggamit si Jesus sing mga pamangkot? (b) Paano naggamit si Jesus sing pamangkot agod buligan si Pedro nga mahangpan sing husto ang pamangkot tuhoy sa pagbayad sing buhis sa templo?

⁸ Si Jesus talalupangdon nga naggamit sing mga pamangkot, bisan pa nga menos tiempo kuntani kon ginsugiran na lang niya ang iya tagpalamati sang iya buot silingon. Kon amo, ngaa naggamit sia sing mga pamangkot? Kon kaisa, naggamit sia sing nagapahunahuna nga mga pamangkot agod ibuyagyag ang mga motibo sang mga nagapamatok sa iya, busa ginapahipos sila. (Mateo 21:23-27; 22:41-46) Apang, sa madamo nga hitabo, naggamit sia sing mga pamangkot agod ipabutyag sang iya mga disipulo kon ano ang ila ginahunahuna kag agod pukawon kag hanason ang ila panghunahuna. Gani, nagpamangkot sia sing subong sang, “Ano sa banta ninyo?” kag “Nagapati ka bala sini?” (Mateo 18:12; Juan 11:26) Paagi sa iya mga pamangkot, nalab-ot kag natandog ni Jesus ang tagipusuon sang iya mga disipulo. Binagbinaga ang isa ka halimbawa.

⁹ Isa ka bes, ginpamangkot si Pedro sang mga manugsukot sing buhis kon nagbayad si Jesus sing buhis sa templo.c Si Pedro maabtik nga nagsabat, “Huo.” Sang ulihi, nangatarungan si Jesus sa iya: “Ano sa banta mo, Simon? Gikan kay sin-o ang mga hari sang duta [nagasukot] sang mga balayran ukon buhis? [Gikan] sa ila mga anak ukon [gikan] sa mga dumuluong?” Si Pedro nagsabat: “[Gikan] sa mga dumuluong.” Nagsiling si Jesus: “Sa pagkamatuod, ang mga anak libre sa buhis.” (Mateo 17:24-27) Walay duhaduha nga nahangpan ni Pedro ang buot silingon sang mga pamangkot, kay nahibaluan sang tanan nga ang pamilya sang hari indi kinahanglan nga magbayad sing buhis. Busa, subong bugtong nga Anak sang langitnon nga Hari nga ginasimba sa templo, indi obligado si Jesus nga magbayad sing buhis. Talupangda nga sa baylo nga sugiran na lang si Pedro sing husto nga sabat, si Jesus mataktikanhon nga naggamit sing mga pamangkot agod buligan si Pedro nga mahangpan ini sing husto kag makita ang kinahanglanon nga maghunahuna anay sing maayo antes magsabat sa palaabuton.

10. Paano naton epektibo nga magamit ang mga pamangkot kon nagabantala sa mga pamalay?

¹⁰ Paano naton epektibo nga magamit ang mga pamangkot sa aton ministeryo? Kon nagabantala sa mga pamalay, magamit naton ang mga pamangkot sa pagpukaw sing interes, sa amo mapaambit naton ang maayong balita. Halimbawa, kon tigulang ang masugilanon naton, mahimo mamangkot kita sing matinahuron, “Ano nga pagbag-o ang nakita mo sa kalibutan sa bug-os mo nga pagkabuhi?” Pagkatapos sang iya sabat, mahimo mamangkot kita, “Ano sa banta mo ang kinahanglan agod mapauswag ang kahimtangan sa kalibutan karon?” (Mateo 6:9, 10) Kon iloy nga may magagmay nga mga anak ang masugilanon naton, mahimo mamangkot kita, “Nahunahuna mo na bala kon ano ang mangin kahimtangan sang kalibutan kon magdalagku na ang imo mga anak?” (Salmo 37:10, 11) Paagi sa pagkamapanilagon samtang nagapalapit sa balay, makapili kita sing pamangkot nga ginabagay sa kahimtangan sang tagbalay.

11. Paano naton epektibo nga magamit ang mga pamangkot kon nagadumala sing pagtuon sa Biblia?

¹¹ Paano naton epektibo nga magamit ang mga pamangkot kon nagadumala sing pagtuon sa Biblia? Ang ginpamensaran sing maayo nga mga pamangkot makabulig sa aton nga mahibaluan ang panghunahuna sang estudyante. (Hulubaton 20:5) Halimbawa, ibutang naton nga nagatuon kita sa kapitulo nga “Pagkabuhi nga Nagapahamuot sa Dios” sa libro nga Ano Gid ang Ginatudlo Sang Biblia?d Ginabinagbinag sang kapitulo ang pagtamod sang Dios sa mga butang subong sang seksuwal nga imoralidad, pagpahubog, kag pagbutig. Ang mga sabat sang estudyante mahimo magpakita nga nahangpan niya kon ano ang ginatudlo sang Biblia, apang nagaugyon bala sia sa ginatun-an niya? Mahimo mamangkot kita, “Ang pagtamod bala sang Dios sa sini nga mga butang daw rasonable sa imo?” Mahimo mamangkot man kita, “Paano mo iaplikar ini nga impormasyon sa imo kabuhi?” Apang, indi pagkalimti nga dapat kita mangin mataktikanhon, sa amo ginahatagan ang estudyante sing nagakaigo nga pagtahod. Indi naton luyag nga mahuy-an sia sa aton mga pamangkot.​—Hulubaton 12:18.

12-14. (a) Sa ano nga mga paagi ginpakita ni Jesus ang iya ikasarang sa paggamit sing makapakumbinsi nga pangatarungan? (b) Ano nga epektibo nga pangatarungan ang gingamit ni Jesus sang nagsiling ang mga Fariseo nga ang iya gahom naghalin kay Satanas?

¹² Bangod may himpit nga panghunahuna, si Jesus sampaton gid sa pagpangatarungan sa iban. Kon kaisa, naggamit sia sing epektibo nga pangatarungan agod pamatud-an nga sayop ang di-matuod nga mga panumbungon sang mga nagapamatok sa iya. Sa madamo nga hitabo, naggamit sia sing makapakumbinsi nga pangatarungan agod tudluan sing hamili nga mga leksion ang iya mga sumulunod. Tan-awon naton ang pila ka halimbawa.

¹³ Sang naayo ni Jesus ang tawo nga bulag kag apa nga ginsudlan sing demonyo, ang mga Fariseo nagsumbong: “Ini nga tawo nagatabog sang mga demonyo paagi kay Beelzebub [si Satanas], ang manuggahom sang mga demonyo.” Ginbaton nila nga kinahanglan ang labaw sa tawo nga gahom agod matabog ang mga demonyo. Apang, nagsiling sila nga ang gahom ni Jesus naghalin kuno kay Satanas. Ang panumbungon indi lamang nga di-matuod kundi di-makatarunganon man. Agod ibuyagyag ang ila sayop nga panghunahuna, si Jesus nagsabat: “Ang tagsa ka ginharian nga nabahinbahin mahapay, kag ang tagsa ka siudad ukon panimalay nga nabahinbahin indi magtindog. Gani, kon si Satanas nagatabog kay Satanas, nabahinbahin sia; nian, paano makatindog ang iya ginharian?” (Mateo 12:22-26) Daw nagsiling si Jesus: “Kon ahente ako ni Satanas, nga ginadula ang ginhimo ni Satanas, nian ginakontra ni Satanas ang iya kaugalingon nga mga tulumuron kag mapukan sa ulihi.” Paano nila pamatud-an nga sayop ining makapakumbinsi nga pangatarungan?

¹⁴ Wala pa makatapos si Jesus sa pagpangatarungan sa ila. Bangod nahibaluan niya nga ang pila sang mga disipulo mismo sang mga Fariseo nagtabog sing mga demonyo, nagpamangkot sia sing simple apang epektibo nga pamangkot: “Kon nagatabog ako sang mga demonyo paagi kay Beelzebub, paagi kay sin-o nagatabog sa ila ang inyo mga anak [ukon, mga disipulo]?” (Mateo 12:27) Ang argumento ni Jesus amo ini: “Kon nagatabog ako sing mga demonyo paagi sa gahom ni Satanas, amo man ang inyo mga disipulo.” Ano ang masiling sang mga Fariseo? Indi gid nila pagbatunon nga ang ila mga disipulo nagpanghikot paagi sa gahom ni Satanas. Busa ang ila sayop nga pangatarungan nagbalandra sa ila. Indi bala makalilipay bisan nga basahon lamang kon paano nangatarungan si Jesus sa ila? Ti, hunahunaa lamang ang kalipay sang kadam-an nga personal nga nakapamati kay Jesus, kay ang iya presensia kag ang iya tingog pat-od gid nga naghatag sing dugang pa nga puersa sa iya pinamulong.

15-17. Maghatag sing halimbawa kon paano gingamit ni Jesus ang “labi pa gid” nga sahi sang pangatarungan sa pagtudlo sing makalilipay nga mga kamatuoran tuhoy sa iya Amay.

¹⁵ Naggamit man si Jesus sing lohiko kag makapakumbinsi nga pangatarungan sa pagtudlo sing makapalig-on kag makalilipay nga mga kamatuoran tuhoy sa iya Amay. Masunson niya ini nga ginhimo paagi sa paggamit sing “labi pa gid” nga sahi sang pangatarungan​—ginabuligan ang iya mga tagpalamati agod ang isa ka pamilyar nga kamatuoran mangin isa ka mas mabakod pa nga kombiksion. Pasad sa pagpaanggid, ini nga sahi sang pangatarungan nagapatudok gid. Usisaon naton ang duha lamang ka halimbawa.

¹⁶ Sang ginsabat niya ang pangabay sang iya mga disipulo nga tudluan sila sa pagpangamuyo, ginlaragway ni Jesus ang kahanda sang di-himpit nga tawhanon nga mga ginikanan nga ‘hatagan sing maayo nga mga dulot’ ang ila mga anak. Nian naghinakop sia: “Kon kamo bisan malaut makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!” (Lucas 11:1-13) Ang punto ni Jesus ginpasad sa pagpaanggid. Kon ginaaman sang makasasala nga tawhanon nga mga ginikanan ang kinahanglanon sang ila mga anak, labi pa gid nga hatagan sang Amay sa langit, nga himpit kag matarong sa tanan nga paagi, sing balaan nga espiritu ang iya mainunungon nga mga sumilimba nga mapainubuson nga nagapalapit sa iya sa pangamuyo!

¹⁷ Naggamit si Jesus sing amo man nga pangatarungan sang naghatag sia sing maalamon nga laygay sa pag-atubang sa mga kabalaka. Nagsiling sia: “Ang mga uwak wala nagasab-ug sang binhi ukon nagaani, kag wala sila sing kamalig ukon tambubo, apang ginapakaon sila sang Dios. Indi bala nga [labi pa kamo ka importante] sangsa mga pispis? Talupangda ninyo sing maayo kon paano nagatubo ang mga liryo; wala sila nagapangabudlay ukon nagapamulon . . . Kon ginapapanaptan sang Dios kaangay sini ang mga tanom sa latagon nga yari karon kag buas idap-ong sa pugon, labi pa gid nga panaptan niya kamo, kamo nga diutay sing pagtuo!” (Lucas 12:24, 27, 28) Kon ginaatipan ni Jehova ang mga pispis kag mga bulak, labi pa gid nga atipanon niya ang mga tawo nga nagahigugma kag nagasimba sa iya! Paagi sa sini nga pangatarungan, walay duhaduha nga natandog ni Jesus ang tagipusuon sang iya mga tagpalamati.

18, 19. Paano kita mangatarungan sa isa ka tawo nga nagasiling nga wala sia nagapati sa isa ka Dios nga indi niya makita?

¹⁸ Sa aton ministeryo, luyag naton maggamit sing maayo nga pangatarungan agod pamatud-an nga sayop ang di-matuod nga mga pagpati. Luyag man naton maggamit sing makapakumbinsi nga pangatarungan agod itudlo ang makapalig-on nga mga kamatuoran tuhoy kay Jehova. (Binuhatan 19:8; 28:23, 24) Dapat bala kita maggamit sing masibod nga pangatarungan? Indi. Ang leksion nga matun-an naton kay Jesus amo nga ang makatarunganon nga mga argumento nga ginapresentar sa simple nga paagi amo ang labing epektibo.

¹⁹ Halimbawa, ano ang isabat naton kon magsiling ang isa ka tawo nga wala sia nagapati sa isa ka Dios nga indi niya makita? Makapangatarungan kita pasad sa kasuguan sang kinaugali may kaangtanan sa kabangdanan kag epekto. Kon makita naton ang epekto, nahibaluan naton nga dapat may kabangdanan ini. Mahimo magasiling kita: “Kon yara ka sa naligwin nga lugar kag nakakita ka sing matahom nga balay kag may madamo ini nga pagkaon (epekto), indi mo bala gilayon batunon nga may isa (kabangdanan) nga naghimo sini? Gani kon makita man naton ang maathag nga desinyo sa kinaugali kag ang bugana nga pagkaon sa ‘bodega’ sang duta (epekto), indi bala makatarunganon nga maghinakop nga may Isa (Kabangdanan) nga naghimo sini? Ang Biblia mismo nagapangatarungan sa sini nga paagi: ‘Ang tagsa ka balay may nagtukod, apang sia nga nagtukod sang tanan nga butang amo ang Dios.’” (Hebreo 3:4) Sa pagkamatuod, bisan daw ano pa kaayo ang aton pangatarungan, indi naton makumbinsi ang tanan.​—2 Tesalonica 3:2.

20, 21. (a) Paano naton magamit ang “labi pa gid” nga sahi sang pangatarungan agod ipatalupangod ang mga kinaiya kag mga dalanon ni Jehova? (b) Ano ang binagbinagon naton sa masunod nga kapitulo?

²⁰ Sa aton pagpanudlo, sa ministeryo sa latagon ukon sa kongregasyon man, magamit man naton ang “labi pa gid” nga sahi sang pangatarungan agod ipatalupangod ang mga kinaiya kag mga dalanon ni Jehova. Halimbawa, agod ipakita nga ang doktrina tuhoy sa dayon nga pagpaantos sa kalayuhon nga impierno wala gid nagapadungog kay Jehova, mahimo magasiling kita: “Sin-o nga mahigugmaon nga amay ang magasilot sa iya anak paagi sa pagbutang sang iya kamot sa kalayo? Labi pa gid ka makangilil-ad para sa aton mahigugmaon nga langitnon nga Amay ang panudlo tuhoy sa kalayuhon nga impierno!” (Jeremias 7:31) Agod pasaligon ang napung-awan nga masigkatumuluo sang gugma ni Jehova sa iya, makasiling kita: “Kon ginatamod ni Jehova nga may kabilinggan bisan ang diutay nga maya, labi pa gid nga ulikdan kag higugmaon niya ang tagsa ka sumilimba niya sa duta, lakip na ikaw!” (Mateo 10:29-31) Ining epektibo nga pangatarungan magabulig sa aton agod malab-ot ang tagipusuon sang iban.

²¹ Sa tapos mabinagbinag ang tatlo lamang sa mga paagi sang pagpanudlo nga gingamit ni Jesus, mahangpan gid naton nga ang mga opisyales nga wala magdakop sa iya wala nagahambal sing sobra sang nagsiling sila: “Wala pa gid sing tawo nga nagpamulong kaangay sini.” Sa masunod nga kapitulo, binagbinagon naton ang paagi sang pagpanudlo diin nakilal-an si Jesus, kag ini amo ang paggamit sing mga ilustrasyon.