Ang Matun-an Naton kay Jesus

Kon Paano Mangin Malipayon

Paano kita mangin malipayon?

▪ Ang bantog nga sermon ni Jesus nagaumpisa sa tinaga nga malipayon. Sia nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Ano ang iya buot silingon? Ano ang aton espirituwal nga kinahanglanon?

Pareho sang sapat, dapat kita magginhawa, mag-inom, kag magkaon para mabuhi. Pero para mangin malipayon, may kinahanglanon kita nga lain sa mga sapat. Dapat naton mahibaluan ang katuyuan sang kabuhi. Ang aton lamang Manunuga ang makahatag sini sa aton. Si Jesus nagsiling: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mateo 4:4) Malipayon ang mga mahunahunaon sa ila espirituwal nga kinahanglanon kay nagasuod sila sa “malipayon nga Dios” nga si Jehova. Para mangin malipayon, ginhatagan niya sila sing paglaum.—1 Timoteo 1:11.

Naghatag si Jesus sing paglaum

▪ “Malipayon ang mga malulo, kay magapanubli sila sang duta,” siling ni Jesus. (Mateo 5:5) Ginhatagan ni Jesus sing paglaum ang mga tawo kay gin-ayo niya ang ila balatian kag ginbanhaw ang mga patay para mabuhi liwat sa duta. Nakahatag man sing paglaum ang iya mensahe: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Ang mga matinumanon sa Dios makatigayon sing kabuhi nga walay katapusan sa duta. Hunahunaa bala nga indi ka na magtigulang kag makaupod mo ang mabuot nga mga tawo. Amo nga ang Pulong sang Dios nagsiling: “Magkasadya sa paglaum.” (Roma 12:12) Ginsugid man ni Jesus kon paano kita mangin malipayon subong.

Ano ang malipayon nga pagkabuhi nga gintudlo ni Jesus?

▪ Naghatag si Jesus sing praktikal nga mga laygay parte sa pag-asawahay, pagkamapainubuson, husto nga pagtamod sa materyal nga mga butang, kag kon paano pakig-angutan ang iban. (Mateo 5:21-32; 6:1-5, 19-34) Mangin malipayon ka kon sundon mo ang laygay ni Jesus.

Ang pagkamahinatagon nagapahalipay man. (Binuhatan 20:35) Halimbawa, si Jesus nagsiling: “Kon maghanda ikaw sang sinalusalo, agdaha ang mga tawo nga imol, mga baldado, mga piang, mga bulag; kag mangin malipayon ka, bangod wala sila sing ibalos sa imo.” (Lucas 14:13, 14) Mangin malipayon ka kon pamensaron mo ang iban nga tawo, indi lang ang imo kaugalingon.

Ano gid ang makapahalipay sa aton?

▪ Mangin malipayon ka kon maghimo ka sing mga butang para sa iban, pero mas mangin malipayon ka kon maghimo ka sing mga butang para sa Dios. Mas labaw pa ini sangsa kalipay nga nabatyagan sang mga ginikanan nga nagapalangga sa ila kabataan. Ginpakita ini ni Jesus sang nagtudlo sia sa mga tawo. “May isa ka babayi sa kadam-an nga nagpabaskog sang iya tingog kag nagsiling sa iya: ‘Malipayon ang taguangkan nga nagdala sa imo kag ang mga suso nga imo ginsusuhan!’ Apang nagsiling sia: ‘Indi, sa baylo, Malipayon ang mga nagapamati sa pulong sang Dios kag nagatuman sini!’”—Lucas 11:27, 28.

Nalipay gid si Jesus sa paghimo sang kabubut-on sang iya Amay sa langit. Gusto gid sang Dios nga mahibaluan sang mga tawo ang paglaum nga kabuhi nga walay katapusan. Pagkatapos nga ginpaathag ni Jesus ini nga paglaum sa isa ka interesado nga tawo, sia nagsiling: “Ang akon kalan-on amo ang paghimo sa kabubut-on sang nagpadala sa akon.” (Juan 4:13, 14, 34) Mangin malipayon ka sa paghimo sang kabubut-on sang Dios paagi sa pagsugid sa iban sang kamatuoran sa Biblia.

Para sa dugang nga impormasyon, tan-awa ang kapitulo 1 sini nga libro, nga ginhimo sang mga Saksi ni Jehova.

[Retrato sa pahina 16]

Mangin malipayon gid kita kon mahibaluan naton ang katuyuan sang kabuhi