‘Maghimo Kamo sing mga Abyan Paagi sa Dimatarong nga Manggad’

“Maghimo kamo sing mga abyan para sa inyo kaugalingon paagi sa dimatarong nga manggad . . . Ang tawo nga matutom sa diutay matutom man sa daku.”​—⁠LUCAS 16:​9, 10.

 1. Paano gindayaw ni Moises kag sang mga anak sang Israel si Jehova sa tapos sila makaguwa sa Egipto?

GINLUWAS paagi sa isa ka milagro​—⁠daw ano ka makapalig-on sing pagtuo nga eksperiensia! Wala sing liwan nga mapadunggan sa pagguwa sang Israel gikan sa Egipto kundi si Jehova, nga Labing Gamhanan. Indi katingalahan nga si Moises kag ang mga Israelinhon nag-amba: “Ang akon kusog kag kabakod amo si Jah, kay ginaluwas niya ako. Ini ang akon Dios, kag dayawon ko sia; ang Dios sang akon amay, kag pakataason ko sia.”​—⁠Exodo 15:​1, 2; Deuteronomio 29:⁠2.

 2. Ano ang gindala sang katawhan ni Jehova sang magbiya sila sa Egipto?

² Tuhay gid ang bag-o nga kahilwayan sang Israel gikan sa ila kahimtangan sa Egipto! Makasimba sila karon kay Jehova nga wala sing sablag. Kag wala sila magbiya sa Egipto nga wala sing dala. Si Moises nag-asoy: “Ang mga anak sang Israel . . . nagpangayo sa mga Egiptohanon sing mga hulusayon nga pilak kag bulawan kag mga panapton. Kag ginpapahamuot ni Jehova ang katawhan sa itululok sang mga Egiptohanon, sa bagay nga ginhatag nila ang ila gin­pangayo; kag ginhublasan nila ang mga Egiptohanon.” (Exodo 12:​35, 36) Apang paano nila gingamit ining kamanggaran sang Egipto? Nagresulta bala ini sa ‘pagpakataas kay Jehova’? Ano ang matun-an naton gikan sa ila huwaran?​—⁠Ipaanggid ang 1 Corinto 10:⁠11.

“Ang Amot ni Jehova”

 3. Ano ang ginhimo ni Jehova sang gingamit sang Israel ang bulawan sa butig nga pagsimba?

³ Sa tion sang 40 ka adlaw nga pagpanlakatan ni Moises sa Bukid sang Sinai agod batunon ang mga instruksion sang Dios para sa Israel, tinak-an sa paghulat ang katawhan sa ubos. Ginpanghukas nila ang ila bulawan nga mga aritos, kag ginsugo si Aaron nga himuan sila sing isa ka larawan nga ila simbahon. Ginpatindugan man sila ni Aaron sing isa ka altar, kag sing aga pa sang masunod nga adlaw, nagdulot sila sing mga halad didto. Ginkahamut-an bala sila sang ila Manluluwas sa sining paggamit nila sang ila bulawan? Wala gid! “Busa karon pabayai ako,” siling ni Jehova kay Moises, “nga magdabdab ang akon kasingkal batok sa ila kag mapapas ko sila.” Bangod lamang sa pagpakiluoy ni Moises nga wala pagpapasa ni Jehova ang pungsod, apang nagkalamatay ang rebelyuso nga mga pinuno paagi sa isa ka kalalat-an halin sa Dios.​—⁠Exodo 32:​1-6, 10-14, 30-35.

 4. Ano ang “amot ni Jehova,” kag sin-o ang nagdulot sini?

⁴ Sang ulihi, nakatigayon ang Israel sing kahigayunan nga gamiton ang ila manggad sa isa ka paagi nga nagpahamuot kay Jehova. Nagdala sila sing “dulot para kay Jehova.”⁠a Bulawan, pilak, saway, asul nga hilo, nanuhaytuhay nga linugom nga mga tela, mga panit sang karnero, mga panit sang poka, kag kahoy nga acasia amo ang lakip sa mga donasyon para sa pagpatindog kag sa pagsangkap sa tabernakulo. Ginapatalupangod sa aton sang kasaysayan ang panimuot sang mga nag-amot. “Ang tagsatagsa nga may kinabubut-on nga tagipusuon magdala sini subong amot ni Jehova.” (Exodo 35:​5-9) Maalwan nga nagsunod ang Israel. Busa, ang tabernakulo nangin isa ka tinukod nga “matahom kag dungganon,” suno sa mga pulong sang isa ka eskolar.

Mga Amot Para sa Templo

 5, 6. May kaangtanan sa templo, paano gingamit ni David ang iya manggad, kag ano ang ginhimo sang iban?

⁵ Bisan pa si Hari Solomon sang Israel ang nagdumala sang pagpatindog sing isa ka permanente nga balay para sa pagsimba kay Jehova, si David, nga iya amay, ang naghimo sing daku nga paghanda para sa sini. Nagtipon si David sing madamo nga bulawan, pilak, saway, salsalon, troso, kag bilidhon nga mga bato. “Bangod nga natuhoy ko ang akon gugma sa balay sang akon Dios,” siling ni David sa iya katawhan, “may akon ako nga kaugalingon nga bahandi nga bulawan kag pilak; ginahatag ko ini sa balay sang akon Dios labaw kag kapin pa sa tanan nga akon naaman para sa balaan nga balay: tatlo ka libo ka talanton nga bulawan . . . kag pito ka libo ka talanton nga pilak nga inulay, nga inugtaklap sa mga dingding sang mga balay.” Ginpalig-on ni David ang iban nga mangin maalwan man. Madamo gid ang ginhatag: dugang pa nga mga bulawan, pilak, saway, salsalon, kag bilidhon nga mga bato. “Upod ang bug-os nga tagipusuon,” ang katawhan naghatag sing “kinabubut-on nga mga halad kay Jehova.”​—⁠1 Cronica 22:5; 29:​1-9.

⁶ Paagi sa sining kinabubut-on nga mga amot, ginpabutyag sang mga Israelinhon ang ila tudok nga apresasyon para sa pagsimba kay Jehova. Si David mapainubuson nga nangamuyo: “Sin-o bala ako kag ano bala ang akon katawhan, nga sarang kami sa pagdulot sing kinabubut-on nga mga halad kaangay sini?” Ngaa? “Kay ang tanan nga butang nagagikan sa imo, kag gikan sa imo kaugalingon nga kamot naghatag kami sa imo. . . . ako, sa akon bahin, sa pagkatarong sang akon tagipusuon gindulot ko sing kinabubut-on ini tanan nga butang.”​—⁠1 Cronica 29:​14, 17.

 7. Anong nagapaandam nga leksion ang matun-an naton gikan sa adlaw ni Amos?

⁷ Apang, wala pagpadayuna sang mga tribo sang Israel nga unahon ang pagsimba kay Jehova sa ila hunahuna kag tagipusuon. Sang ikasiam nga siglo B.C.E., ang nabahinbahin nga Israel nakasala sing espirituwal nga pagpatumbaya. Tuhoy sa naaminhan nga napulo ka tribo nga ginharian sang Israel, si Jehova nagsiling paagi kay Amos: “Kailo sila nga matawhay sa Sion kag sila nga nagasalig sa bukid sang Samaria!” Ginlaragway niya sila kaangay sang mga tawo nga “nagahigda sa mga katre nga tiposo . . . nagahilayhilay sa ila mga higdaan, . . . nagakaon sing mga kordero gikan sa panong kag sing lamharon nga toro gikan sa pinatambok nga mga tinday; . . . nagainom sing alak sa mga yahong.” Apang indi pangamlig ang ila daku nga manggad. Ang Dios nagpaandam: “Magakadto sila karon sa kabihagan upod sa nahauna nga ginbihag, kag ang inudyak sang mga nagahilayhilay magataliwan.” Sang 740 B.C.E, nag-antos ang Israel sa mga kamot sang Asiria. (Amos 6:​1, 4, 6, 7) Kag sang ulihi ang nabagatnan nga ginharian sang Juda nahulog man sa materyalismo.​—⁠Jeremias 5:​26-29.

Nagakaigo nga Paggamit sa Manggad sang Cristianong Panahon

 8. Anong maayong huwaran ang ginahatag nanday Jose kag Maria tuhoy sa paggamit sing manggad?

⁸ Sing tuhay, ang imol nga kahimtangan sang mga alagad sang Dios sang ulihi nga panahon wala magpugong sa ila sa pagpakita sing kakugi para sa matuod nga pagsimba. Binagbinaga sanday Jose kag Maria. Bilang pagtuman sa mando ni Cesar Agosto, naglakbay sila padulong sa dutang natawhan sang ila pamilya, ang Betlehem. (Lucas 2:​4, 5) Didto natawo si Jesus. Pagligad sang kap-atan ka adlaw, nagduaw sanday Jose kag Maria sa templo sa malapit nga Jerusalem agod magdulot sang ginapatuman nga halad para sa pagpatinlo. Subong tanda sang ila imol nga kahimtangan, naghalad si Maria sing duha ka magamay nga pispis. Sanday Jose kag Maria wala mangatarungan nga bangod sang ila kaimulon indi sila makahalad kay Jehova. Sa baylo, matinumanon nga gingamit nila ang ila diutay nga ikasarang.​—⁠Levitico 12:8; Lucas 2:​22-24.

 9-11. (a) Ano nga panuytoy ang ginahatag sang mga pulong ni Jesus sa Mateo 22:21 tuhoy sa kon paano naton dapat gamiton ang kuwarta? (b) Ngaa indi walay pulos ang diutay nga amot nga gindulot sang babayi nga balo?

⁹ Sang ulihi, ang mga Fariseo kag ang mga sumulunod ni Herodes nagtinguha sa pagsiod kay Jesus, nga nagasiling: “Busa, sugiri kami, Ano bala sa hunahuna mo? Tugot bala ang pagbayad sing buhis kay Cesar ukon indi?” Ang sabat ni Jesus nagpakita sang iya pagkamahinantupon. Nagapatuhoy sa sensilyo nga ginhatag nila sa iya, namangkot si Jesus: “Kay sin-o bala ini dagway kag sinulat?” Nagsabat sila: “Kay Cesar.” Sing maalamon, naghinakop sia: “Busa, ihatag kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:​17-21) Nahibaluan ni Jesus nga ang awtoridad nga ginhalinan sang sensilyo nagapaabot nga ibayad ang buhis sa ila. Apang ginbuligan niya ang iya mga sumulunod kag ang iya man mga kaaway sa paghisayod nga ang matuod nga Cristiano nagatinguha man sa paghatag sa “Dios sang mga butang nga iya sang Dios.” Nagalakip ini sang nagakaigo nga paggamit sa materyal nga mga pagkabutang sang isa.

¹⁰ Ang isa ka hitabo nga nasaksihan ni Jesus sa templo nagailustrar sini. Bag-o lang niya ginpakamalaut ang makagod nga mga escriba nga ‘naghalunhon sang mga balay sang mga babayi nga balo.’ “Sang pagtan-aw niya nakita niya ang mga manggaranon nga nagahulog sang ila mga dulot sa bahandian,” report ni Lucas. “Nian nakita [ni Jesus] ang imol nga babaying balo nga naghulog didto sing duha ka diutay nga sensilyo nga may manubo gid nga balor, kag nagsiling sia: ‘Sa pagkamatuod nagasiling ako sa inyo, Ining babaying balo, bisan pa imol sia, naghulog sing labi pa sa ila tanan. Kay sila tanan naghulog sing mga dulot gikan sa ila kabuganaan, apang ining babayi sa iya kinawad-on naghulog sang tanan nga inugpangabuhi niya.’ ” (Lucas 20:​46, 47; 21:​1-4) Ang iban nga mga tawo nagsiling nga ang templo ginpunihan sing bilidhon nga mga bato. Si Jesus nagsabat: “Nahanungod sining mga butang nga inyo ginatan-aw, magaabot ang mga adlaw nga walay mabilin diri nga isa ka bato sa ibabaw sang isa nga indi malumpag.” (Lucas 21:​5, 6) Wala bala sing pulos ang diutay nga amot sadtong babayi nga balo? Indi sa pagkamatuod. Ginsakdag niya ang kahimusan nga gintukod ni Jehova sadtong tion.

¹¹ Ginsilingan ni Jesus ang iya matuod nga mga sumulunod: “Walay suluguon nga makaalagad sa duha ka agalon; kay, magadumot sia sa isa kag magahigugma sa isa, ukon magadampig sia sa isa kag magatamay sa isa. Indi kamo makapaulipon sa Dios kag sa manggad.” (Lucas 16:13) Sa amo, paano naton mapakita ang husto nga pagkabalanse sa paggamit sang aton manggad?

Matutom nga mga Tulugyanan

 12-14. (a) Mga tulugyanan sang anong manggad ang mga Cristiano? (b) Sa anong talalupangdon nga mga paagi matutom nga ginatuman karon sang katawhan ni Jehova ang ila pagkatulugyanan? (c) Sa diin nagahalin ang kuwarta nga ginasakdag sa hilikuton sang Dios karon?

¹² Sang gindedikar naton ang aton kabuhi kay Jehova, daw subong bala nga nagsiling kita nga ang tanan nga yara sa aton, ang tanan naton nga manggad, iya. Kon amo, paano naton dapat gamiton ang yara sa aton? Sang ginapaathag ang Cristianong pag-alagad sa kongregasyon, si Utod C. T. Russell, unang presidente sang Watch Tower Society, nagsulat: “Dapat kabigon sang tagsatagsa ang iya kaugalingon subong nga tinangdo sang Ginuo nga mangin tulugyanan sang iya tion, impluwensia, kuwarta, kbp, kag dapat tinguhaon sang tagsatagsa nga gamiton ining mga kinaadman sa labi nga masarangan niya, sa himaya sang Agalon.”​—⁠The New Creation, pahina 345.

¹³ “Ang ginapaabot sa mga tulugyanan amo nga masapwan nga matutom ang isa ka tawo,” siling sang 1 Corinto 4:⁠2. Subong isa ka internasyonal nga organisasyon, nagatinguha ang mga Saksi ni Jehova nga magkabuhi nahisuno sa sina nga paglaragway, ginahinguyang ang pinakamadamo nga tion nga masarangan nila sa Cristianong ministeryo, ginapalambo sing maayo ang ila mga ikasarang sa pagpanudlo. Dugang pa, ang grupo sang mga boluntaryo sa idalom sang pagdumala sang mga Re­gional Build­ing Com­mit­tee kinabubut-on nga nagahatag sang ila tion, kusog, kag abilidad sa pagtukod sing mga tilipunan para sa pagsimba. Sa sini tanan, si Jehova nahamuot gid.

¹⁴ Sa diin nagahalin ang kuwarta nga ginasakdag sa sining masangkad nga kampanya sa pagpanudlo kag hilikuton sa pagpatindog? Gikan sa mga may kinabubut-on nga tagipusuon, subong sang natabo sang mga adlaw nga gintukod ang tabernakulo. May bahin bala kita subong mga indibiduwal? Ginapakita bala naton sa aton paggamit sang aton manggad nga ang pag-alagad kay Jehova amo ang labing importante sa aton? Kon tuhoy sa kuwarta, dapat kita mangin matutom nga mga tulugyanan.

Isa ka Kahimusan sa Pagkaalwan

 15, 16. (a) Paano nagpakita sing kaalwan ang mga Cristiano sang adlaw ni Pablo? (b) Paano naton dapat tamdon ang aton ginahambalan karon?

¹⁵ Nagsulat si apostol Pablo nahanungod sa maalwan nga espiritu sang mga Cristiano sa Macedonia kag Acaya. (Roma 15:26) Bisan pa pigado man sila, maabtik sila nga nag-amot sa pagbulig sa ila kauturan. Ginpalig-on ni Pablo ang taga-Corinto nga mga Cristiano nga magmaalwan man, kag magdonar sang ila sobra agod magtumbas sa kinawad-on sang iban. Wala sing bisan sin-o ang makasiling nga si Pablo nagpangilkil. Sia nagsulat: “Sia nga nagasab-ug sing halushalos magaani man sing halushalos; kag sia nga nagasab-ug sing bugana magaani man sing bugana. Maghimo ang tagsa ka tawo suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang manughatag nga malipayon.”​—⁠2 Corinto 8:​1-3, 14; 9:​5-7, 13.

¹⁶ Ang maalwan nga mga amot nga ginahatag sang aton kauturan kag sang interesado nga mga tawo sa bug-os kalibutan nga hilikuton para sa Ginharian karon nagahatag sing pamatuod sa kon daw ano kataas ang ila pagtamod sa sining pribilehiyo. Apang, subong sang ginpahanumdom ni Pablo sa mga taga-Corinto, maayo para sa aton nga kabigon ining paghinun-anon subong isa ka pahanumdom.

 17. Ano nga kahimusan sa paghatag ang ginpalig-on ni Pablo, kag maaplikar bala ini sa karon?

¹⁷ Ginlaygayan ni Pablo ang kauturan nga maghimo sing kahimusan sa ila paghatag. “Sa kada una nga adlaw sang semana,” siling niya, “ang tagsatagsa sa inyo magpain nga natigana sa iya kaugalingon nga balay sing bisan ano suno sa iya pagkabugana.” (1 Corinto 16:​1, 2) Isa ina ka huwaran para sa aton kag sa aton kabataan sa aton pag-amot, kon bala paagi sa kongregasyon ukon direkta sa pinakamalapit nga sanga talatapan sang Watch Tower Society. Gin-agda sang isa ka misyonero nga mag-asawa nga ginpadala sa pagbantala sa isa ka banwa sa Sidlangan nga Aprika ang mga interesado nga magbuylog sa ila sa isa ka pagtuon sa Biblia. Sa katapusan sining una nga pagtipon, mainandamon nga naghulog ang mga misyonero sing pila ka sensilyo sa isa ka kahon nga namarkahan “Mga amot para sa hilikuton sang Ginharian.” Amo man ang ginhimo sang iban nga mga nagtambong. Sang ulihi, sa tapos maorganisar ining mga bag-uhan nga mangin isa ka Cristianong kongregasyon, nagduaw ang manugtatap sang sirkito kag gindayaw niya ang ila dalayon nga mga amot.​—⁠Salmo 50:​10, 14, 23.

 18. Paano naton mabuligan ang aton kauturan nga yara sa kasisit-an?

¹⁸ May pribilehiyo man kita nga gamiton ang aton manggad sa pagbulig sa mga biktima sang kinaugali nga mga kalamidad kag sa mga nagapuyo sa mga duog nga naapektuhan sang inaway. Nakunyag gid kita sang mabasa naton ang tuhoy sa mga bulig nga ginpadala sa Nasidlangan nga Europa kay yadto nga bahin sang kalibutan ginhalitan sang kagubot sa ekonomiya kag politika! Ang mga butang kag kuwarta nga gin-amot nagpamatuod sa kaalwan kag pagpakighiusa sang aton kauturan sa nagaantos nga mga Cristiano.⁠b​—⁠2 Corinto 8:​13, 14.

 19. Anong praktikal nga mga butang ang mahimo naton agod buligan ang mga yara sa bug-os tion nga pag-alagad?

¹⁹ Indi bala ginapabilihan naton sing daku ang hilikuton sang aton kauturan nga yara sa bug-os tion nga pag-alagad subong mga payunir, nagalakbay nga mga manugtatap, mga misyonero, kag mga boluntaryo sa Bethel? Suno sa ginatugot sang aton kahimtangan, mahimo nga direkta kita nga makahatag sing pila ka materyal nga bulig sa ila. Halimbawa, kon magduaw ang manugtatap sang sirkito sa inyo kongregasyon, mahimo nga maamanan ninyo sia sing dalayunan, kalan-on, ukon bulig sa iya plete. Ina nga kaalwan indi makalampas sa igtalupangod sang aton langitnon nga Amay, nga nagahandum nga ang iya mga alagad dapat atipanon. (Salmo 37:25) Sang nagligad nga pila ka tuig gin-agda sang isa ka utod nga lalaki ang isa ka nagalakbay nga manugtatap kag ang iya asawa para sa diutay nga pamahaw sa iya puluy-an. Sang maglakat ang mag-asawa para sa pag-alagad sa latagon sa gab-i, gintunghulan sang utod nga lalaki ang iya mga bisita sing isa ka sobre. Sa sulod amo ang kuwarta (katumbas sa isa ka U.S. nga dolyar) upod ining nasulat nga mga pulong: “Para sa isa ka tasa sang tsa ukon isa ka galon nga gasolina.” Daw ano kaayo nga apresasyon nga ginpabutyag sa sining mapainubuson nga paagi!

 20. Anong pribilehiyo kag salabton ang indi naton luyag patumbayaan?

²⁰ Sa espirituwal, ang katawhan ni Jehova ginapakamaayo! May yara kita espirituwal nga mga sinalusalo sa aton mga asambleya kag mga kombension, diin nagabaton kita sing bag-o nga mga publikasyon, maayong panudlo, kag praktikal nga laygay. Upod ang tagipusuon nga puno sing apresasyon sa aton espirituwal nga mga pagpakamaayo, wala naton ginakalipatan ang aton pribilehiyo kag salabton nga mag-amot sing kuwarta nga gamiton sa pagpauswag sang mga interes sang Ginharian sang Dios sa bug-os nga kalibutan.

‘Maghimo sing mga Abyan Paagi sa Dimatarong nga Manggad’

 21, 22. Ano sa indi madugay ang mahanabo sa “dimatarong nga manggad,” nga nagaobligar sa aton nga himuon ang ano karon gid?

²¹ Sa pagkamatuod, kadamo gid sing mga paagi nga mapakita naton nga ang pagsimba kay Jehova amo ang una sa aton kabuhi, kag ang importante sa sini ilabi na amo ang aton pagsunod sa laygay ni Jesus: “Maghimo kamo sing mga abyan para sa inyo kaugalingon paagi sa dimatarong nga manggad, agod nga, kon mapaslawan ini, batunon nila kamo sa mga puluy-an nga walay katapusan.”​—⁠Lucas 16:⁠9.

²² Talupangda nga ginsambit ni Jesus ang kapaslawan sang dimatarong nga manggad. Huo, maabot ang adlaw nga ang kuwarta sining sistema mangin walay pulos. “Ihaboy nila sa mga dalan ang ila pilak, kag ang ila bulawan mangin makangilil-ad nga butang,” tagna ni Ezequiel. “Ang ila pilak kag ang ila bulawan indi makaluwas sa ila sa adlaw sang kasingkal ni Jehova.” (Ezequiel 7:19) Samtang wala pa ini, dapat kita mangin maalamon kag mahinantupon sa paggamit naton sa aton materyal nga mga pagkabutang. Sa amo indi kita magbalikid nga may paghinulsol bangod sang aton indi pagpamati sa paandam ni Jesus: “Kon wala kamo magmatutom sa manggad nga dimatarong, sin-o bala ang magatugyan sa inyo sang manggad nga matuod? . . . Indi kamo makapaulipon sa Dios kag sa manggad.”​—⁠Lucas 16:​11-13.

 23. Ano ang dapat naton gamiton sing maalamon, kag ano ang mangin padya naton?

²³ Gani, dapat naton tanan sundon sing matutom ining mga pahanumdom nga unahon ang pagsimba kay Jehova sa aton kabuhi kag gamiton sing maalamon ang tanan naton nga pagkabutang. Sa amo mahimo nga matipigan naton ang aton pagpakig-abyan kay Jehova kag kay Jesus, nga nagasaad nga kon mapaslawan ang kuwarta batunon nila kita sa “mga puluy-an nga walay katapusan,” nga may paglaum sa dayon nga kabuhi sa langitnon nga Ginharian ukon sa isa ka paraiso nga duta.​—⁠Lucas 16:⁠9.

[Mga footnote]

Nadumduman Mo Bala?

◻ Paano nagsabat ang Israel sa imbitasyon ni Jehova nga mag-amot para sa pagpatindog sing tabernakulo?

◻ Ngaa indi walay pulos ang gin-amot sang babayi nga balo?

◻ Ano ang salabton sang mga Cristiano sa kon paano nila ginagamit ang ila manggad?

◻ Paano naton malikawan ang paghinulsol sa kon paano naton ginagamit ang kuwarta?

[Piktyur sa pahina 15]

Ang gin-amot sang babayi nga balo, bisan pa diutay lamang, indi walay pulos

[Mga piktyur sa pahina 16, 17]

Ang aton mga amot nagasakdag sa bug-os kalibutan nga hilikuton para sa Ginharian