Ang Kabuhi kag Ministeryo ni Jesus

Ang Ministeryo sa Templo Natapos

SI Jesus nagpakita sa katapusan sa templo. Sa katunayan, ginatapos niya ang iya dayag nga ministeryo sa duta luwas sa mga hitabo nahanungod sang pagbista kag pagpatay sa iya tatlo ka adlaw sang ulihi. Karon ginapadayon niya ang iya pagkastigo sa mga escriba kag mga Fariseo.

Tatlo ka beses nga nagsiling sia: “Kailo kamo, mga escriba kag mga Fariseo, mga salimpapaw!” Una, ginpahayag niya ang kailo sa ila bangod ginatinluan nila ang “guwa sang tagayan kag sang pinggan, apang sa sulod puno sila sang panglugos kag patuyang.” Gani sia nagapahanumdom: “Tinlui anay ang sulod sang tagayan kag pinggan, agod nga ang guwa nila magtinlo man.”

Masunod niya nga ginpahayag ang kailo sa mga escriba kag mga Fariseo bangod sang nasulod nga kahigkuan kag pagkadunot nga ginatinguhaan nila nga taguon paagi sa pakitakita nga pagkadiosnon. “Kaangay kamo sang mga lulubngan nga ginpaputi,” siling niya, “nga sa guwa nagapakita nga matahom apang sa sulod puno sang mga tul-an sang mga minatay kag sang tanan nga kahigkuan.”

Sa katapusan, ang ila pagkasalimpapaw napadayag sa ila kahanda sa paghimo sing mga lulubngan para sa mga manalagna kag sa pagpuni sini agod matalupangdan ang ila kaugalingon nga mga buhat sang kaluoy. Apang, subong sang ginapahayag ni Jesus, sila “mga anak sang mga nagpamatay sang mga manalagna.” Sa pagkamatuod, ang bisan sin-o nga nagatinguha sa pagbuyagyag sang ila pagkasalimpapaw yara sa katalagman!

Sa pagpadayon, ginbungat ni Jesus ang iya pinakamatigdas nga pulong sang pagpakamalaut. “Mga man-ug, kaliwat sang mga man-ug,” siling niya, “paano bala ang paglikaw ninyo sa katagudilian sang Gehenna?” Ang Gehenna isa ka nalupyakan nga ginagamit anay subong halabuyan sang basura sa Jerusalem. Gani nagasiling si Jesus nga bangod sang pagpadayon nila sang ila malaut nga dalanon, ang mga escriba kag mga Fariseo magaantos sing walay katapusan nga kalaglagan.

Nahanungod sadtong ginapadala niya subong mga tiglawas niya, si Jesus nagasiling: “Ang iban sa ila inyo patyon kag ilansang, kag ang iban sa ila bunalon ninyo sa inyo mga sinagoga kag hingabuton ninyo sa siudadsiudad; agod nga mag-abot sa inyo ang tanan nga dugo sang mga matarong nga gin-ula sa duta, kutob sa dugo ni Abel nga matarong tubtob sa dugo ni Zacarias nga anak ni Baraquias [nga gintawag Joiada sa 2 Cronica], nga ginpatay ninyo sa gin-utlan sang santuario kag sang halaran. Sa pagkamatuod nagasiling ako sa inyo, Tanan ini nga butang magaabot sa sining kaliwatan.”

Bangod maisog nga ginkastigo ni Zacarias ang mga lider sang Israel, “sila nagpuhon batok sa iya kag ginbato sia sing mga bato sa sugo sang hari sa luwang sang balay ni Jehova.” Apang, subong sang gintagna ni Jesus, magabayad ang Israel tungod sang tanan nga matarong nga dugo nga gin-ula. Nagbayad sila 37 ka tuig sang ulihi, sang 70 C.⁠E., sang ginlaglag sang Romanong hangaway ang Jerusalem kag kapin sa isa ka milyon ka Judiyo ang napatay.

Samtang ginabinagbinag ni Jesus ining makahaladlok nga kahimtangan, nagkasubo sia. “Jerusalem, Jerusalem,” pahayag niya sa liwat, “makapila kuntani nga buot ko tipunon ang imo mga anak subong sang isa ka munga nga nagatipon sang iya mga piso sa idalom sang iya mga pakpak! Apang indi ka buot. Yari karon! Ang inyo balay ginabayaan nga mamingaw.”

Nian si Jesus nagadugang: “Kutob karon indi ninyo ako makita tubtob nga magsiling kamo, ‘Pagdayawon ang nagakari sa ngalan ni Jehova!’ ” Ina nga adlaw mangin sa presensia ni Cristo kon magasulod sia sa iya langitnon nga Ginharian kag makita sia sang mga tawo paagi sa mga mata sang pagtuo.

Nian nagkadto si Jesus sa isa ka lugar nga matan-aw niya ang bahandian sang templo kag ang kadam-an nagahulog sing kuwarta sa sini. Ang mga manggaranon nagahulog sing madamong pilak. Apang nian nag-abot ang isa ka imol nga babaying balo kag naghulog sing duha ka sensilyo nga tuman ka diutay ang balor.

Gintawag ni Jesus ang iya mga disipulo kag nagsiling: “Sa pagkamatuod nagasiling ako sa inyo nga ining imol nga babaying balo naghulog sing labi pa sa tanan nga amot sa bahandian.” Mahimo nga natingala sila kon ngaa. Gani si Jesus nagapaathag: “Sila tanan nag-amot gikan sa ila kabuganaan, apang sia, sa iya kinawad-on, naghulog sang tanan niya, bisan sang tanan nga iya inugpangabuhi.” Pagkatapos nga masiling ini, si Jesus nagtaliwan sa templo sa katapusan nga tion.

Nahayanghag sa kadakuon kag katahom sang templo, ang iya mga disipulo nagtu-aw: “Manunudlo, tan-awa! daw ano nga mga bato kag daw ano nga mga balay!” Sa pagkamatuod, ang mga bato ginakunokuno nga kapin sa 11 ka metro kalaba, kapin sa 5 ka metro kasangkad, kag kapin sa 3 ka metro kataas!

“Nakita mo bala ining dalagku nga mga balay?” sabat ni Jesus. “Walay mabilin diri nga isa ka bato sa ibabaw sang isa nga indi malumpag.”

Pagkatapos masiling ini, si Jesus kag ang iya mga apostoles nagtabok sa Nalupyakan sang Kidron kag nagtaklad sa Bukid sang Olivo. Gikan didto malaaw nila ang matahom nga templo. Mateo 23:​25⁠–​24:​3; Marcos 12:​41⁠–​13:​3; Lucas 21:​1-6; 2 Cronica 24:​20-22.

◆ Ano ang ginhimo ni Jesus sa iya katapusan nga pagduaw sa templo?

◆ Paano ginpadayag ang pagkasalimpapaw sang mga escriba kag mga Fariseo?

◆ Ano ang kahulugan sang “katagudilian sang Gehenna”?

◆ Ngaa nagsiling si Jesus nga ang balo nag-amot sing labi pa sang sa manggaranon?