Ang mga Linog, Tagna sa Biblia, kag Ikaw

ANTES sia mapatay, si Jesus nagtagna sing mga hitabo kag kahimtangan nga magapamatuod nga ining kalibutan nagsulod na sa “katapusan sang sistema sang mga butang.” Ini nga panag-on, siling niya, pagatandaan sang mga butang subong sang kamatay, kakulang sa kalan-on, kag lapnag nga inaway. Ginsambit man niya ang “mabaskog nga mga linog” nga mahanabo “sa nagkalainlain nga mga duog.” (Mateo 24:​3, 7; Lucas 21:10, 11) Ginapatuhuyan bala ni Jesus ang aton adlaw?

Madamo ang nagasiling nga indi. Nagasiling sila nga ang kadamuon sang mga linog wala magdamo sing talalupangdon sang nagligad nga mga dekada. Sa katunayan, ginareport sang U.S. National Earthquake Information Center nga ang mga linog nga may kabaskugon nga 7.0 kag labaw pa nagpabilin nga “halos pareho” sa bug-os nga ika-20 nga siglo.a

Apang, talupangda nga ang katumanan sang tagna ni Jesus wala nagakinahanglan sang pagdamo ukon pagbaskog sang mga linog. Ang ginsiling lamang ni Jesus amo nga may mabaskog nga mga linog sa nagkalainlain nga duog. Dugang pa, nagsiling sia nga ining mga hitabo magatanda sang “pamuno sang mga hapdi sang kasakit.” (Mateo 24:8) Ang kasakit ginatakus, indi sa kadamuon sang linog ukon kon daw ano ini kabaskog sa Richter scale, kundi sa epekto sini sa mga tawo.

Ang mga linog nagtuga gid sang daku nga kasakit sa aton adlaw. Sa katunayan, sang ika-20 nga siglo, minilyon ang napatay ukon nadulaan sing puluy-an bangod sining mga kalamidad. Ang mga eksperto nagasiling nga madamo sining mga kamatayon ang nalikawan kuntani. “Sa imol nga mga pungsod,” report sang BBC News, “ang barato kag madasig nga pagtukod sing pamalay agod mapaayawan ang mga kinahanglanon sang madasig nga pagsangkad sang siudad mas ginahatagan sing importansia sangsa mga reglamento sa pagtukod.” Nagakomento tuhoy sa duha ka trahedya sining karon lang, si Ben Wisner, isa ka eksperto sa mga kalamidad sa siudad, nagsiling: “Indi mga linog ang nagpatay sa sining mga tawo. Kombinasyon ini sang sayop, di-pagsapak, kagarukan, kag kakagod sang tawo.”

Huo, kon kaisa ang ginatunaan gid sang kamatayon sa isa ka linog amo ang kakagod kag pagpatumbaya sang tawo. Makawiwili nga ining mga kinaiya ginapadaku sa isa pa ka tagna sa Biblia tuhoy sa “katapusan nga mga adlaw” sining sistema. Sa sining tion, siling sang Biblia, ang mga tawo mangin “maiyaiyahon, mahigugmaon sa kuwarta,” kag “kabalan.” (2 Timoteo 3:​1-5, The Amplified Bible) Upod sa pinamulong ni Jesus tuhoy sa katapusan sang sistema sang mga butang, ini nga tagna nagahatag sing maathag nga pamatuod nga malapit na kita sa tion nga hatagan sang Dios sing kaumpawan ang nasit-an nga katawhan gikan sa tanan nga kabangdanan sang kasakit kag pag-antos karon—pati na ang mabaskog nga mga linog.—Salmo 37:11.

Luyag mo bala mahibaluan sing dugang pa ang tuhoy sa sining pasad-sa-Biblia nga paglaum? Kontaka ang mga Saksi ni Jehova sa inyo duog, ukon magsulat sa nagakaigo nga direksion sa pahina 5.

[Nota]