Kadtui ang mga Tawo sa Tanan nga Pungsod kag Tudlui Sila

1, 2. Ano ang mahimo ipamangkot bangod sang ginsiling ni Jesus sa Mateo 24:14?

MAUGYON man ukon mamatok ang mga tawo sa aton, kilala gihapon kita nga mga Saksi ni Jehova sa aton pagbantala nga hilikuton. Basi may naistorya ka pa gani sa imo pagbantala nga nagsiling nga indi sia ugyon sa aton mga panudlo, pero nagadayaw gid sia sa aton ginahimo. Nahibaluan naton nga gintagna ni Jesus nga ang maayong balita sang Ginharian ibantala sa bug-os nga duta. (Mat. 24:14) Pero paano naton nahibaluan nga ang aton hilikuton amo ang katumanan sang tagna ni Jesus? May basihan bala ang aton pangangkon nga kita ang nagahimo sini nga hilikuton?

² Madamo nga relihion ang nagapati nga ginabantala nila ang Ebanghelyo, ukon ang maayong balita. Pero, ang ila ginahimo masami nga asta lang sa personal nga mga testimonya, serbisyo sa simbahan, ukon mga programa nga ginapagua sa telebisyon ukon sa Internet. Ginapabugal sang iban ang ila pagbulig sa mga kubos ukon ang ila pag-amot sa patag sang medisina kag edukasyon. Amo bala ini ang mga hilikuton nga ginsugo ni Jesus nga himuon sang iya mga disipulo?

 3. Suno sa Mateo 28:19, 20, ano ang apat nga dapat himuon sang mga sumulunod ni Jesus?

³ Mahulat lang bala ang mga disipulo ni Jesus nga kadtuan sila sang mga tawo? Indi! Pagkatapos mabanhaw si Jesus, ginsilingan niya ang ginatos niya ka disipulo: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila . . . Tudlui ninyo sila nga tumanon ang tanan nga ginsugo ko sa inyo.” (Mat. 28:19, 20) Apat ang dapat himuon. Dapat kita maghimo sing disipulo, bawtismuhan sila, kag tudluan sila, pero ano ang pinakauna? Nagsiling si Jesus: “Kadtui ninyo ang mga tawo.” Parte sa sini nga sugo, nagkomento ang isa ka iskolar sa Biblia: “Ang ‘pagkadto’ obligasyon sang tanan nga tumuluo, sa tabok man ini sang dalan ukon sa tabok sang dagat.”—Mat. 10:7; Luc. 10:3.

 4. Ano ang buot silingon sang mangin “mangingisda sang mga tawo”?

⁴ Ginapahangop bala ni Jesus nga bahala na ang kada isa sa iya mga sumulunod sa pagbantala, ukon ginapatuhuyan niya ang organisado nga pagbantala sang maayong balita? Bangod wala sing isa ka tawo nga makakadto sa “tanan nga pungsod,” ini nga hilikuton nagakinahanglan sang pag-organisar sa madamo nga tawo. Amo sini ang ginapahangop ni Jesus sang gin-agda niya ang iya mga disipulo nga mangin “mangingisda sang mga tawo.” (Basaha ang Mateo 4:18-22.) Ang pagpangisda nga ginsiling ni Jesus wala nagapatuhoy sa isa ka mangingisda nga nagagamit sang bunit kag paon, nga nagapungko lang kag nagahulat sang isda nga magtukob sang paon. Sa baylo, ginpatuhuyan niya ang pagpangisda nga nagagamit sang mga pukot, nga kinahanglan ang panikasog kag pagbuligay sang madamo nga tawo.—Luc. 5:1-11.

 5. Ano ang apat ka pamangkot nga dapat sabton, kag ngaa?

⁵ Agod mahibaluan kon sin-o gid ang nagatuman subong sang tagna ni Jesus nga ibantala ang maayong balita, dapat naton sabton ining apat ka pamangkot:

• Ano dapat ang mensahe nga ginabantala?

• Ano dapat ang aton motibo sa paghimo sini nga hilikuton?

• Ano dapat ang mga pamaagi sa pagbantala?

• Daw ano dapat kasangkad ini nga hilikuton, kag asta san-o?

Ang mga sabat sa sini nga mga pamangkot makabulig sa aton nga makilala kon sin-o gid ang nagahimo sini nga hilikuton nga makaluwas sing kabuhi, kag mapabakod sini ang aton determinasyon nga magpadayon sa pagbantala.—1 Tim. 4:16.

 6. Ngaa makasalig ka nga husto ang mensahe nga ginabantala sang mga Saksi ni Jehova?

⁶ Basaha ang Lucas 4:43. Nagbantala si Jesus sang “maayong balita sang Ginharian,” kag ginapaabot niya nga himuon man ini sang iya mga disipulo. Sin-o nga grupo sang katawhan ang nagabantala sini nga mensahe sa “tanan nga pungsod”? Maathag nga ang mga Saksi ni Jehova lang. Ginabaton ini bisan sang pila nga nagapamatok. Halimbawa, naistorya sang isa ka Saksi ang isa ka misyonero nga pari nga nakaistar sa madamo nga pungsod. Ginpamangkot sang pari ang mga Saksi sa sini nga mga pungsod kon ano ang mensahe nga ila ginabantala. Ano ang ila sabat? Nagsiling ang pari: “Kahalam-utan sila tanan kay palareho ang ila sabat: ‘Ang maayong balita sang Ginharian.’” Imbes nga mangin “kahalam-utan,” ginpakita sang mga Saksi nga matuod sila nga mga Cristiano kay nahiusa sila. (1 Cor. 1:10) Ginapalapnag nila ang mensahe sang Ang Lalantawan Nagabantala sang Ginharian ni Jehova. Ini nga magasin matigayon sa 254 ka lenguahe, kag halos 59 ka milyon ang ginahimo kada isyu, nga amo ang pinakamadamo nga sirkulasyon sa kalibutan.

 7. Paano naton nahibaluan nga indi husto ang mensahe nga ginabantala sang mga klero sang Cristiandad?

⁷ Ang mga klero sang Cristiandad wala nagabantala sang Ginharian sang Dios. Kon ginaistorya gid man nila ang parte sa Ginharian, madamo sa ila ang nagasiling nga isa ini ka balatyagon ukon kahimtangan sa tagipusuon sang isa ka Cristiano. (Luc. 17:21) Wala nila ginabuligan ang mga tawo nga mahangpan nga ang Ginharian sang Dios isa ka gobierno sa langit nga si Jesucristo ang Manuggahom, nga amo ini ang solusyon sa tanan nga problema sang katawhan, kag malapit na lang sini dulaon ang tanan nga kalautan sa duta. (Bug. 19:11-21) Sa baylo, mas gusto nila nga dumdumon si Jesus kon Krismas kag Easter. Daw wala sila sing ideya kon ano ang himuon ni Jesus bilang bag-o nga Manuggahom sang duta. Bangod wala sila makahibalo kon ano dapat ang mensahe nga ila ibantala, matingala pa bala kita nga wala man sila makahibalo kon ano dapat ang motibo sa sini nga hilikuton?

 8. Ano ang sala nga motibo sa pagbantala?

⁸ Ano dapat ang motibo sa pagbantala? Indi ang pagpangolekta sang kuarta kag pagpatindog sang matahom nga mga tinukod. Ginsilingan ni Jesus ang iya mga disipulo: “Nakabaton kamo nga wala sing bayad, gani maghatag kamo nga wala sing bayad.” (Mat. 10:8) Ang Pulong sang Dios indi dapat pag-inegosyo. (2 Cor. 2:17, footnote) Indi dapat paggamiton sang mga manugbantala ini nga hilikuton para makakuarta. (Basaha ang Binuhatan 20:33-35.) Bisan pa sining maathag nga sugo, ang kalabanan nga relihion nawili sa pagpangolekta sang kuarta para sa mga galastuhan sang ila simbahan. Kinahanglan nila suelduhan ang ila mga klero kag madamo nga empleyado. Bangod sini, madamo nga lider sang Cristiandad ang nagmanggaranon.—Bug. 17:4, 5.

 9. Paano ginpakita sang mga Saksi ni Jehova nga husto ang ila motibo sa pagbantala?

⁹ Ano ang rekord sang mga Saksi ni Jehova parte sa pagpangolekta? Ang ila hilikuton ginasuportahan sang boluntaryo nga mga donasyon. (2 Cor. 9:7) Wala sing pagpangolekta nga ginahimo sa ila mga Kingdom Hall ukon kombension. Pero, sang nagligad nga tuig, ang mga Saksi ni Jehova naghinguyang sing halos duha ka bilyon nga oras sa pagbantala sing maayong balita kag nagdumala sing sobra siam ka milyon nga libre nga pagtuon sa Biblia kada bulan. Ang dalayawon sa sini kay wala sila ginasuelduhan sa ila hilikuton kag ila kuarta ang ila ginagasto. Ang isa ka researcher nagsiling parte sa hilikuton sang mga Saksi ni Jehova: “Ang ila panguna nga katuyuan amo ang pagbantala kag pagtudlo. . . . Wala sila sing klero, amo nga makakinot sila.” Gani, ano ang aton motibo sa paghimo sini nga hilikuton? Sa direkta nga sabat, ginahimo naton ini sing kinabubut-on bangod ginahigugma naton si Jehova kag ang aton isigkatawo. Katumanan ini sang tagna sa Salmo 110:3. (Basaha.)

10. Ano ang mga pamaagi ni Jesus kag sang iya mga disipulo sa pagbantala?

¹⁰ Ano ang mga pamaagi ni Jesus kag sang iya mga disipulo sa pagbantala sang maayong balita? Ginakadtuan nila ang mga tawo bisan diin—sa publiko nga mga lugar kag sa ila mga balay. Ginapangita nila ang mga takus sa ila pagpamalaybalay. (Mat. 10:11; Luc. 8:1; Binu. 5:42; 20:20) Ginapakita sining sistematiko nga pamaagi nga wala sila sing ginapasulabi.

11, 12. Kon parte sa pagbantala sang maayong balita, ano ang kinatuhayan sang Cristiandad kag sang katawhan ni Jehova?

¹¹ Kamusta ang mga relihion sang Cristiandad sa sini nga bahin? Ang kalabanan nga miembro sang relihion kontento na lang nga itugyan sa ila ginasuelduhan nga mga klero ang pagbantala. Pero sa baylo nga mangin “mangingisda sang mga tawo,” mas nabalaka ang mga klero sang Cristiandad nga indi maibanan ang ila mga “isda.” Kon kaisa, ginapalig-on man sang pila ka lider sang relihion ang pagbantala. Halimbawa, sang maaga nga bahin sang tuig 2001, si Pope John Paul II nagsulat sa mga miembro sang simbahan: “Sining nagligad nga mga tinuig, pirme ako nagapanawagan nga himuon ang bag-o nga pag-ebanghelyo. Ginapanawagan ko ini liwat subong . . . Dapat naton ilugon ang kakugi ni Pablo, nga nagsiling: ‘Kailo ako kon indi ko pag-ibantala ang Ebanghelyo.’” Nagsiling pa ang papa nga ini nga misyon “indi puede nga itugyan lang sa grupo sang mga ‘eksperto’ kundi responsibilidad ini sang tanan nga miembro sang Katawhan sang Dios.” Pero daw ano kadamo ang nagtuman sa sini nga panawagan?

¹² Kamusta naman ang mga Saksi ni Jehova? Sila lang ang nagabantala nga si Jesus nagagahom na nga Hari sugod sang 1914. Subong sang ginsugo ni Jesus, prioridad nila ang pagbantala. (Mar. 13:10) Ang libro nga Pillars of Faith—American Congregations and Their Partners nagsiling: “Para sa mga Saksi ni Jehova, ang pagbantala nga hilikuton amo ang pinakaimportante.” Nagkomento man ang awtor parte sa ginsiling sang isa ka Saksi: “Kon may ginagutom, nasubuan, kag nagamasakit, nagabulig sila, . . . pero wala nila ginakalipatan nga ang ila panguna nga hilikuton amo ang paghatag sing espirituwal nga mensahe parte sa katapusan sang kalibutan kag ang dapat himuon para maluwas.” Padayon nga ginabantala sang mga Saksi ni Jehova ini nga mensahe, kag ginasunod nila ang mga pamaagi ni Jesus kag sang iya mga disipulo.

13. Daw ano dapat kasangkad ang pagbantala nga hilikuton?

¹³ Ginlaragway ni Jesus ang kasangkaron sang pagbantala sang nagsiling sia nga ang maayong balita ibantala “sa bug-os nga duta.” (Mat. 24:14) Dapat tudluan ang “mga tawo sa tanan nga pungsod.” (Mat. 28:19, 20) Ginapahangop sini nga bug-os kalibutan ang hilikuton.

14, 15. Ano ang pamatuod nga ginatuman sang mga Saksi ni Jehova ang tagna ni Jesus parte sa kasangkaron sang pagbantala? (Tan-awa ang mga piktyur sa umpisa sini nga artikulo.)

¹⁴ Para mahangpan kon paano ginatuman sang mga Saksi ni Jehova ang tagna ni Jesus parte sa kasangkaron sang pagbantala, binagbinagon naton ang pila ka impormasyon. Sa Estados Unidos, mga 600,000 ang mga klero sa nagkalainlain nga simbahan, kag mga 1,200,000 naman ang mga Saksi ni Jehova. Sa bilog nga kalibutan, sulusobra 400,000 ang mga pari sang Iglesia Katolika Romana. Daw ano naman kadamo ang mga Saksi nga nagabantala sang Ginharian? Sa bilog nga kalibutan, mga walo ka milyon ka ministro ang kinabubut-on nga nagabantala sa mga tawo sa 240 ka kadutaan. Dalayawon gid ang ila ginahimo, ang tanan sa kadayawan kag kahimayaan ni Jehova!—Sal. 34:1; 51:15.

¹⁵ Bilang mga Saksi ni Jehova, gusto naton nga mabantalaan sang maayong balita ang madamo nga tawo antes mag-abot ang katapusan. Bangod sini, pinasahi gid kita kon parte sa pag-translate kag pag-imprinta sang mga literatura sa Biblia. Minilyon ka libro, magasin, tract, kag imbitasyon sa kombension kag Memoryal ang napanagtag na naton sing libre. Ang aton mga publikasyon matigayon sa sobra 700 ka lenguahe. Sobra 200 ka milyon nga kopya sang Bag-ong Kalibutan nga Badbad sang Balaan nga Kasulatan ang naimprinta sa sobra 130 ka lenguahe. Sang nagligad lang nga tuig, nakahimo kita sing mga 4.5 ka bilyon nga literatura sa Biblia. Ang mga impormasyon sa aton opisyal nga website matigayon sa sobra 750 ka lenguahe. May iban pa bala nga relihion nga nakahimo man sini?

16. Paano naton nahibaluan nga ginatuytuyan sang espiritu sang Dios ang mga Saksi ni Jehova?

¹⁶ Asta san-o himuon ang pagbantala? Nagsiling si Jesus nga ining bug-os kalibutan nga hilikuton magapadayon asta sa katapusan nga mga adlaw, “kag dayon magaabot ang katapusan.” May iban pa bala nga relihion nga nagapadayon sa pagbantala sang maayong balita sa sining importante nga tion sa katapusan nga mga adlaw? Ang iban nga maistorya naton sa ministeryo mahimo magsiling: “Ara sa amon ang balaan nga espiritu, pero kamo lang ang nagahimo sang hilikuton.” Pero indi bala nga ang pagpadayon naton sa sini nga hilikuton nagapamatuod nga ginatuytuyan kita sang espiritu sang Dios? (Binu. 1:8; 1 Ped. 4:14) May mga tion nga ang pila ka relihion nagtinguha nga himuon ang ginahimo sang mga Saksi ni Jehova, pero napaslawan sila. Ang iban nagtilawtilaw nga mangin misyonero, pero sa malip-ot lang nga tion, dayon nagbalik sila sa ila naandan nga pagkabuhi. May iban naman nga nagpamalaybalay, pero ano bala ang ila ginabantala? Ang sabat sa sini nga pamangkot nagapakita nga wala nila ginahimo ang hilikuton nga ginsugdan sang Cristo.

17, 18. (a) Ngaa mapat-od naton nga ang mga Saksi ni Jehova amo ang nagabantala sang maayong balita sang Ginharian subong? (b) Ngaa nakapadayon kita sa pagbantala?

¹⁷ Gani sin-o gid ang nagabantala sang maayong balita sang Ginharian subong? Masiling naton nga may bug-os nga pagsalig: “Ang mga Saksi ni Jehova!” Ngaa? Bangod ginabantala naton ang husto nga mensahe, nga amo ang maayong balita sang Ginharian. Paagi sa pagkadto sa mga tawo, ginahimo man naton ang husto nga mga pamaagi. Ginahimo naton ang pagbantala nga may husto nga motibo, nga amo ang gugma, indi ang kuarta. Ginahimo naton ang pinakamasangkad nga hilikuton, nga nagalab-ot sa mga tawo sa tanan nga pungsod kag lenguahe. Kag padayon naton nga himuon ini nga hilikuton, tubtob mag-abot ang katapusan.

¹⁸ Nagadayaw gid kita sa ginahimo sang katawhan sang Dios sa sining tion sang katapusan. Pero paano nangin posible ini tanan? Ginsabat ini ni apostol Pablo sa iya sulat sa mga taga-Filipos: “Ang Dios amo ang isa nga nagapapagsik sa inyo, nga nagahatag sa inyo sang handum kag kusog nga himuon kon ano ang iya nahamut-an.” (Fil. 2:13) Kabay pa nga padayon kita tanan nga papagsikon sang aton mahigugmaon nga Amay samtang ginahimo naton ang aton bug-os nga masarangan sa pagtuman sang aton ministeryo.—2 Tim. 4:5.