Handa ka na Bala Para sa Adlaw ni Jehova?

“Malapit na ang dakung adlaw ni Jehova. Malapit na ini, kag nagadalidali sing tuman.”​—⁠SOFONIAS 1:⁠14.

1. Paano ginalaragway sang Kasulatan ang adlaw ni Jehova?

ANG “daku kag makakulugmat nga adlaw” ni Jehova magaabot sa indi madugay sa sining malauton nga sistema sang mga butang. Ginalaragway sang Kasulatan ang adlaw ni Jehova subong adlaw sang inaway, kadulom, kaalipungot, kahuol, kalisang, katalagman, kag kahapayan. Apang may mga makalampuwas, kay “ang bisan sin-o nga nagapanawag sa ngalan ni Jehova maluwas.” (Joel 2:​30-32; Amos 5:​18-20) Huo, laglagon sang Dios ang iya mga kaaway kag luwason ang iya katawhan.

2. Ngaa dapat kita magbatyag sing pagkahilingagawon tuhoy sa adlaw ni Jehova?

² May pagkahilingagawon nga ginapatuhuyan sang mga manalagna sang Dios ang adlaw ni Jehova. Halimbawa, si Sofonias nagsulat: “Malapit na ang dakung adlaw ni Jehova. Malapit na ini, kag nagadalidali sing tuman.” (Sofonias 1:14) Ang kahimtangan labi ka hilingagawon karon bangod ang Punong Manuglaglag sang Dios, ang Hari nga si Jesucristo, malapit na ‘magtaklus sang iya espada sa iya balikawang kag magasakay bangod sa kamatuoran, pagkamapainubuson, kag pagkamatarong.’ (Salmo 45:​3, 4) Handa ka na bala para sa sina nga adlaw?

Daku ang Ila Pagpaabot

3. Ano ang ginpaabot sang pila ka Cristiano nga taga-Tesalonica, kag sa anong duha ka rason nagsayop sila?

³ Madamo ang napaslawan sa ila ginpaabot tuhoy sa adlaw ni Jehova. Ang pila sang unang mga Cristiano sa Tesalonica nagsiling, ‘Yari na ang adlaw ni Jehova!’ (2 Tesalonica 2:2) Apang may duha ka sadsaran nga rason kon ngaa wala pa ini mag-abot. Ginasambit ang isa sini, si apostol Pablo nagsiling: “Sa tion nga magsiling sila: ‘Paghidait kag kalig-unan!’ nian magaabot sa ila ang hinali nga kalaglagan.” (1 Tesalonica 5:​1-6) Sa sining “tion sang katapusan,” ginahulat man naton ang katumanan sinang mga pulong. (Daniel 12:4) Ang mga taga-Tesalonica wala man sing iban pa nga pamatuod nga nag-abot na ang dakung adlaw ni Jehova, kay ginsilingan sila ni Pablo: “Indi ini magaabot kon indi anay mag-abot ang apostasya.” (2 Tesalonica 2:3) Sang ginsulat ni Pablo ining mga pulong (mga 51 C.⁠E.), “ang apostasya” wala pa maglambo sing bug-os gikan sa matuod nga Cristianismo. Sa karon, maathag naton ini nga makit-an sa Cristiandad. Apang, walay sapayan sang napaslawan nila nga mga pagpaabot, yadtong matutom nga mga hinaplas sa Tesalonica, nga padayon nga nag-alagad sa Dios sing matutom tubtob sa kamatayon, nakabaton sang ulihi sing langitnon nga padya. (Bugna 2:10) Pagapadyaan man kita kon magpabilin kita nga matutom samtang ginahulat naton ang adlaw ni Jehova.

4. (a) Sa ano gin-angot ang adlaw ni Jehova sa 2 Tesalonica 2:​1, 2? (b) Ano ang pagtamod sang kuno mga Amay sang Simbahan tuhoy sa pagbalik ni Cristo kag kaanggid nga mga butang?

⁴ Ginaangot sang Biblia “ang dakung adlaw ni Jehova” sa “presensia sang aton Ginuong Jesucristo.” (2 Tesalonica 2:​1, 2) Ang ginatawag nga mga Amay sang Simbahan may lainlain nga mga ideya tuhoy sa pagbalik ni Cristo, sa iya presensia, kag sa iya Isa ka Libo ka Tuig nga Paggahom. (Bugna 20:4) Sang ikaduhang siglo C.⁠E., si Papias sang Hierapolis nagpaabot sing isa ka makapakibot nga pagkamapatubason sang duta sa tion sang Milenyo nga Paggahom ni Cristo. Si Justin Martyr sulitsulit nga naghambal tuhoy sa presensia ni Jesus kag nagpaabot nga ang ginpasag-uli nga Jerusalem amo ang mangin sentro sang Iya Ginharian. Si Irenæus sang Lyons nagpanudlo nga sa tapos malaglag ang Emperyo sang Roma, si Jesus magapakita, gapuson niya si Satanas, kag magagahom sa dutan-on nga Jerusalem.

5. Ano ang ginsiling sang pila ka iskolar tuhoy sa “Ikaduha nga Pagkari” ni Cristo kag sang iya Milenyo nga Paggahom?

⁵ Ang istoryador nga si Philip Schaff nagsiling nga ang “pinakatalalupangdon nga pagpati” sang tion antes sang Konsilyo sang Nicaea sang 325 C.⁠E. amo “ang pagpati sa kitaon mahimayaon nga paggahom ni Cristo sa duta upod sa ginbanhaw nga mga santo sa sulod sang isa ka libo ka tuig, antes sang pangkabilugan nga pagbanhaw kag paghukom.” Ang A Dictionary of the Bible, nga gin-edit ni James Hastings, nagasiling: “Sanday Tertullian, Irenæus, kag si Hippolytus nagapaabot gihapon sa nagahilapit nga Pagkari [ni Jesucristo]; apang paagi sa Alexandrine nga mga Amay natigayon naton ang isa ka bag-o nga sahi sang panghunahuna. . . . Bangod gin-angot sang panudlo ni Augustine ang Milenyo sa tion sang pagkamilitante sang Simbahan, ang Ikaduha nga Pagkari ginpaisol sa malayo nga palaabuton.”

Ang Adlaw ni Jehova kag ang Presensia ni Jesus

6. Ngaa indi kita dapat maghinakop nga madugay pa ang adlaw ni Jehova?

⁶ Ang sayop nga mga paghangop nagdul-ong sa kapaslawan, apang indi naton paghunahunaon nga malayo pa ang adlaw ni Jehova. Ang dikitaon nga presensia ni Jesus, nga naangot sa sini sing Makasulatanhon, nagsugod na. Ang Lalantawan kag ang kaanggid nga mga publikasyon sang mga Saksi ni Jehova pirme nagahatag sing Makasulatanhon nga pamatuod nga ang presensia ni Cristo nagsugod sang tuig 1914.⁠a Gani, ano nian ang ginsiling ni Jesus tuhoy sa iya presensia?

7. (a) Ano ang pila ka bahin sang tanda sang presensia ni Jesus kag sang katapusan sang sistema sang mga butang? (b) Paano kita maluwas?

⁷ Ang presensia ni Jesus nangin topiko sang paghambalanay wala madugay antes sang iya kamatayon. Sa tapos mabatian ang iya pagtagna tuhoy sa pagkaguba sang templo sa Jerusalem, ang iya mga apostoles nga sanday Pedro, Santiago, Juan, kag Andres namangkot: “San-o mahanabo ining mga butang, kag ano ang tanda sang imo presensia kag sang katapusan sang sistema sang mga butang?” (Mateo 24:​1-3; Marcos 13:​3, 4) Subong sabat, si Jesus nagtagna sing mga inaway, gutom, linog, kag iban pa nga bahin sang “tanda” sang iya presensia kag sang katapusan sang sistema sang mga butang. Nagsiling man sia: “Ang nagabatas tubtob sa katapusan maluwas.” (Mateo 24:13) Maluwas man kita kon matutom kita nga magbatas tubtob sa katapusan sang aton kabuhi karon ukon sa katapusan sining malauton nga sistema.

8. Antes sang katapusan sang Judiyong sistema, ano ang dapat nga matuman, kag ano ang ginahimo tuhoy sini sa karon?

⁸ Antes sang katapusan, ang pinasahi nga bahin sang presensia ni Jesus matuman. Tuhoy sini, sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; ugaling magaabot ang katapusan.” (Mateo 24:14) Antes ginlaglag sang mga Romano ang Jerusalem kag sang katapusan sang Judiyong sistema sang mga butang sang 70 C.⁠E., si Pablo nagsiling nga ang maayong balita “nabantala na sa tanan nga katawhan sa idalom sang langit.” (Colosas 1:23) Apang, karon, isa ka mas masangkad nga pagbantala nga hilikuton ang ginahimo sang mga Saksi ni Jehova “sa bug-os napuy-an nga duta.” Sang nagligad nga pila ka tuig, ginbuksan sang Dios ang dalanon para sa daku nga pagpanaksi sa Sidlangan nga Europa. Paagi sa mga imprintahan kag iban pa nga mga pasilidad sa bug-os nga kalibutan, ang organisasyon ni Jehova naghanda para sa dugang nga hilikuton, bisan sa “wala pa mapanaksihan nga teritoryo.” (Roma 15:​22, 23) Ginapahulag ka bala sang imo tagipusuon nga himuon ang imo bug-os nga masarangan sa pagpanaksi antes mag-abot ang katapusan? Kon amo, palig-unon ikaw sang Dios sa paghimo sing makapaladya nga bahin sa hilikuton nga yara sa unahan.​—⁠Filipos 4:​13; 2 Timoteo 4:⁠17.

9. Ano ang ginpahangop ni Jesus, subong sang narekord sa Mateo 24:​36?

⁹ Ang gintagna nga pagbantala nga hilikuton sang Ginharian kag ang iban pa nga bahin sang tanda sang presensia ni Jesus nagakatuman na sa karon. Sa amo, malapit na ang katapusan sining malauton nga sistema sang mga butang. Matuod, si Jesus nagsiling: “Nahanungod sa amo nga adlaw kag takna wala sing nakahibalo, bisan ang mga anghel sa langit bisan ang Anak, kundi ang Amay lamang.” (Mateo 24:​4-14, 36) Apang ang tagna ni Jesus makabulig sa aton nga makahanda para sa “amo nga adlaw kag takna.”

Nakahanda Sila

10. Paano naton mahibaluan nga posible ang magpabilin nga nagamata sa espirituwal?

¹⁰ Agod maluwas sa dakung adlaw ni Jehova, dapat kita magpabilin nga nagamata sa espirituwal kag magpakalig-on sa matuod nga pagsimba (1 Corinto 16:13) Nahibaluan naton nga posible ina nga pagbatas, kay nahimo ini sang isa ka diosnon nga pamilya kag naluwas sila sa Anaw nga naglaglag sa malauton nga katawhan sang 2370 B.⁠C.⁠E. Ginapaanggid ina nga dag-on sa iya presensia, si Jesus nagsiling: “Subong sang mga adlaw ni Noe, amo man ang presensia sang Anak sang tawo. Kay subong sadtong mga adlaw sang wala pa ang anaw, sila nagakaon kag nagainom, ang mga lalaki nagapangasawa kag ang mga babayi nagapamana, tubtob nga nagsulod si Noe sa arka; kag wala sila magsapak tubtob nga nag-abot ang anaw kag gin-anod sila tanan, amo man ang presensia sang Anak sang tawo.”​—⁠Mateo 24:​37-39.

11. Ano ang ginhimo ni Noe walay sapayan sang nagaluntad nga kasingki sang iya mga adlaw?

¹¹ Kaangay naton, si Noe kag ang iya pamilya nagapuyo anay sa isa ka masingki nga kalibutan. Ang malinapason angheliko nga “mga anak sang matuod nga Dios” nagpakatawo kag nagpangasawa kag nangin amay sila sang malauton nga mga Nefilim​—⁠mapiguson nga mga tawo nga nagpasingki pa sang kahimtangan. (Genesis 6:​1, 2, 4; 1 Pedro 3:​19, 20) Apang, “si Noe naglakat upod sa matuod nga Dios” sa pagtuo. ‘Ginpamatud-an [niya] ang iya kaugalingon nga walay kasawayan sa tunga sang iya mga katubotubo’​—⁠ang malauton nga kaliwatan sang iya mga adlaw. (Genesis 6:​9-11) Paagi sa mapinangamuyuon nga pagsalig sa Dios, mahimo man naton ini sa sining masingki kag malauton nga kalibutan samtang ginahulat naton ang adlaw ni Jehova.

12. (a) Luwas sa pagtukod sing arka, ano pa ang ginhimo ni Noe? (b) Ano ang reaksion sang mga tawo sa pagbantala ni Noe, kag ano ang nangin resulta sa ila?

¹² Nangin bantog si Noe subong ang manughimo sang arka para sa kaluwasan sang kabuhi sa tion sang Anaw. Isa man sia ka “manugbantala sang pagkamatarong,” apang ‘wala ginsapak’ sang iya mga katubotubo ang iya hatag-Dios nga mensahe. Nagkaon sila kag nag-inom, nagminyo, nagtukod sing pamilya, kag nangabuhi sing normal tubtob nga gin-anod sila tanan sang Anaw. (2 Pedro 2:​5; Genesis 6:14) Wala nila ginpamatian ang matarong nga pulong kag pagginawi, kaangay sang karon malauton nga kaliwatan nga nagapabungol sa ginasiling sang mga Saksi ni Jehova tuhoy sa “paghinulsol sa Dios,” pagtuo kay Cristo, pagkamatarong, kag “sa paghukom nga magaabot.” (Binuhatan 20:​20, 21; 24:​24, 25) Wala sing rekord kon daw ano anay kadamo ang mga tawo nga nagakabuhi sa duta sang ginbantala ni Noe ang mensahe sang Dios. Apang isa ka butang ang pat-od, ang populasyon sang kalibutan nabuhinan sing daku sang 2370 B.⁠C.⁠E.! Ginlaglag sang Anaw ang mga malauton, kag ginluwas lamang yadtong nakahanda sa amo nga buhat sang Dios​—⁠si Noe kag ang pito pa sang iya pamilya.​—⁠Genesis 7:​19-23; 2 Pedro 3:​5, 6.

13. Sa anong paghukom sang Dios nagsalig sing bug-os si Noe, kag paano sia naghulag nahisuno sini?

¹³ Wala ginpahibalo sing abanse sang Dios si Noe tuhoy sa eksakto nga adlaw kag oras sang Anaw. Apang, sang nagaedad sing 480 anyos si Noe, si Jehova nagsiling: “Ang akon espiritu indi magsumpong sing dayon sa tawo kay sia man unod. Apang ang iya mga adlaw mangin isa ka gatos kag duha ka pulo ka tuig.” (Genesis 6:3) Nagsalig sing bug-os si Noe sa paghukom sang Dios. Sang nagaedad sia sing 500, “nangin amay sia nanday Sem, Ham, kag Japet,” kag suno sa kinabatasan sadtong mga adlaw ang mga anak nga lalaki indi dapat magpangasawa kon wala pa sila makalab-ot sa edad nga 50 ukon 60 anyos. Sang ginsugo si Noe nga magtukod sing arka para sa kaluwasan sa Anaw, maathag nga ginbuligan sia sang iya mga anak nga lalaki kag sang ila mga asawa sa amo nga hilikuton. Ang pagtukod sing arka nagdungan man sa pag-alagad ni Noe subong “manugbantala sang pagkamatarong,” nga naghimo sa iya nga masako sa nabilin nga 40 tubtob 50 ka tuig antes sang Anaw. (Genesis 5:​32; 6:​13-22) Sa sulod sadtong mga tinuig, sia kag ang iya pamilya naghulag sa pagtuo. Dapat man naton ipakita ang pagtuo samtang ginabantala naton ang maayong balita kag ginahulat ang adlaw ni Jehova.​—⁠Hebreo 11:⁠7.

14. Ano sang ulihi ang ginsugid ni Jehova kay Noe, kag ngaa?

¹⁴ Sang malapit na mahuman ang arka, mahimo nga naghunahuna si Noe nga malapit na ang Anaw, walay sapayan nga wala niya nahibaluan sing eksakto kon san-o ini magaabot. Sang ulihi ginsilingan sia ni Jehova: “Pito pa ka adlaw kag paulanon ko sa duta sing kap-atan ka adlaw kag kap-atan ka gab-i.” (Genesis 7:4) Naghatag ini kay Noe kag sa iya pamilya sing hustuhan nga tion nga mapasulod sa arka ang tanan nga sahi sang sapat antes mag-abot ang Anaw. Indi naton kinahanglan mahibaluan ang adlaw kag ang takna sang pagsugod sang kalaglagan sining sistema; wala gintugyan sa aton ang pagluwas sa mga kasapatan, kag ang ginalauman nga mga tawo nga maluwas nagasulod na sa simboliko nga arka, ang espirituwal nga paraiso sang katawhan sang Dios.

“Padayon nga Magbantay”

15. (a) Sa imo kaugalingon nga tinaga, paano mo ipaathag ang ginsiling ni Jesus sa Mateo 24:​40-44? (b) Ano ang epekto sang pagkawalay ihibalo tuhoy sa pagkari ni Jesus agod ipatuman ang pagtimalos sang Dios?

¹⁵ Tuhoy sa iya presensia, si Jesus nagpaathag: “Nian may duha ka tawo [nga nagapanghikot] sa latagon: ang isa pagakuhaon kag ang isa pagabayaan; duha ka babayi ang nagagaling [sing uyas] sa galingan: ang isa pagakuhaon kag ang isa pagabayaan. Busa bantay kamo, kay wala kamo makahibalo kon sa ano nga adlaw magakari ang inyo Ginuo. Apang kilalaha ninyo ini, nga kon ang tagbalay nakasayod kon ano nga takna magaabot ang makawat, magapulaw sia kuntani kag indi sia magtugot nga guhaban ang balay. Busa maghanda man kamo, kay sa takna nga wala ninyo paghunahunaa, magakari ang Anak sang tawo.” (Mateo 24:​40-44; Lucas 17:​34, 35) Bangod wala naton mahibaluan ang eksakto nga tion sang pag-abot ni Jesus agod ipatuman ang pagtimalos sang Dios nagapahulag ini sa aton nga padayon nga magbantay kag nagahatag sa aton sing kahigayunan sa adlaw-adlaw nga pamatud-an nga ginaalagad naton si Jehova nga walay kakagod.

16. Ano ang matabo sa mga indibiduwal nga “ginbiyaan” kag sa mga “ginkuha”?

¹⁶ Ang mga indibiduwal nga “ginbayaan” sa kalaglagan upod sa mga malauton magalakip sadtong nasanagan anay apang gindulman sang makagod nga paagi sang pagkabuhi. Kabay nga malakip kita sa mga tawo nga “pagakuhaon,” yadtong bug-os nga debotado kay Jehova kag tunay nga mapinasalamaton sa iya espirituwal nga mga aman paagi sa “matutom kag mainandamon nga ulipon.” (Mateo 24:​45-47) Tubtob sa katapusan, alagaron naton ang Dios upod ang “gugma gikan sa matinlo nga tagipusuon kag gikan sa matinlo nga konsiensia kag bangod sang pagtuo nga indi salimpapaw.”​—⁠1 Timoteo 1:⁠5.

Importante ang Balaan nga mga Buhat

17. (a) Ano ang gintagna sa 2 Pedro 3:​10? (b) Ano ang pila ka binuhatan kag hinimuan nga ginpalig-on sa 2 Pedro 3:​11?

¹⁷ Si apostol Pedro nagsulat: “Ang adlaw ni Jehova magaabot subong sang makawat, diin ang mga langit magataliwan sa dakung kagahod, kag ang mga kasangkapan matunaw sa kalayo, kag masunog ang duta kag ang mga binuhatan nga yara sa sini.” (2 Pedro 3:10) Ang simboliko nga mga langit kag duta indi makalampuwas sa masingkal nga kaakig sang Dios. Gani si Pedro nagdugang: “Sanglit ining tanan nga butang tunawon sa among bagay, ano bala nga sari sang mga tawo dapat mangin amo kamo sa balaan nga pagginawi kag sa mga buhat sang diosnon nga debosyon!” (2 Pedro 3:11) Lakip sa sining mga buhat amo ang regular nga pagtambong sa Cristianong mga miting, paghimo sing maayo sa iban, kag makugi nga pagpakigbahin sa pagbantala sing maayong balita.​—⁠Mateo 24:​14; Hebreo 10:​24, 25; 13:⁠16.

18. Kon daw nagasuod kita sa kalibutan, ano ang dapat naton himuon?

¹⁸ Ang “balaan nga pagginawi kag mga buhat sang diosnon nga debosyon” nagapatuman nga ‘huptan naton ang aton kaugalingon nga wala sing dagta sang kalibutan.’ (Santiago 1:27) Apang ano kon daw nagasuod kita sa sining kalibutan? Mahimo nga ginadala kita sa isa ka makatalagam nga tindog sa atubangan sang Dios bangod sang paghandum sing dimatinlo nga mga kalingawan ukon sang pagpamati sa musika kag mga ambahanon nga nagapasanyog sang didiosnon nga espiritu sining kalibutan. (2 Corinto 6:​14-18) Kon amo sina ang kahimtangan, mangayo kita sing bulig sa Dios sa pangamuyo agod indi kita magtaliwan upod sa kalibutan kundi mangin kalahamut-an sa atubangan sang Anak sang tawo. (Lucas 21:​34-36; 1 Juan 2:​15-17) Kon nakadedikar na kita sa Dios, pat-od nga luyag naton himuon ang aton labi nga masarangan agod makatukod kag mahuptan ang isa ka maayo nga kaangtanan upod sa iya kag sa amo mangin handa sa daku kag makakulugmat nga adlaw ni Jehova.

19. Ngaa ang kadam-an sang mga manugbantala sang Ginharian ginapaabot nga mabuhi sa katapusan sining malauton nga sistema sang mga butang?

¹⁹ Ang diosnon nga si Noe kag ang iya pamilya naluwas sa Anaw nga naglaglag sa dumaan nga kalibutan. Ang matarong nga mga indibiduwal naluwas sa katapusan sang Judiyong sistema sang mga butang sang 70 C.⁠E. Halimbawa, si apostol Juan aktibo pa anay sa pag-alagad sa Dios sang mga 96-98 C.E., sang ginsulat niya ang tulun-an sang Bugna, ang iya Ebanghelyo, kag tatlo ka inspirado nga sulat. Sa tunga sang linibo nga nagbaton sa matuod nga pagtuo sang Pentecostes 33 C.⁠E., mahimo nga madamo ang naluwas sa katapusan sang Judiyong sistema. (Binuhatan 1:​15; 2:41, 47; 4:4) Sa karon ang mga kadam-an sang manugbantala sang Ginharian may paglaum nga mabuhi tubtob sa katapusan sang karon malauton nga sistema sang mga butang.

20. Ngaa dapat kita mangin makugi nga ‘mga manugbantala sang pagkamatarong’?

²⁰ Samtang ginahulat ang kaluwasan padulong sa bag-ong kalibutan, dapat kita mangin makugi nga ‘mga manugbantala sang pagkamatarong.’ Daw ano nga pribilehiyo ang mag-alagad sa Dios sa sining katapusan nga mga adlaw! Kag daw ano nga kalipay ang pagtuytoy sa mga tawo pasulod sa modernong-adlaw nga “arka,” ang espirituwal nga paraiso nga natigayon sang katawhan sang Dios! Kabay nga magpabilin nga matutom ang minilyon karon nga yari sa sini, nagamata sa espirituwal, kag handa para sa dakung adlaw ni Jehova. Apang ano ang makabulig sa aton agod makapabilin nga nagamata?

[Footnote]

Paano Mo Sabton?

◻ Ano ang ginapaabot sang iban tuhoy sa adlaw ni Jehova kag sa presensia ni Cristo?

◻ Ngaa masiling naton nga sanday Noe kag ang iya panimalay nakahanda para sa Anaw?

◻ Ano ang matabo sa sadtong “padayon nga nagabantay” kag sa mga wala nagabantay?

◻ Ngaa importante ang balaan nga mga buhat, ilabi na samtang nagahilapit kita sa dakung adlaw ni Jehova?