Ang Tanda—Ginapamatian Mo Bala Ini?

“LUYAG namon nga ang katawhan sa tagsa ka pungsod magaagom sing kabuganaan, kaayuhan kag kalipay. Ang dalan pakadto sa sini nasandig sa pagsugod kag sa pagpatuman sing hublag nga nagapadulong sa hilway sa nuklear, dimasingki nga kalibutan.”​—⁠Perestroika, sang lider sang Sobyet nga si Mikhail Gorbachev.

Sing makatarunganon, madamo ang nagaduhaduha nga ang tawo tunay nga makasarang sa pagpaluntad sinang mga kahimtangan sa kalibutan. Ang isa pa ka lider, si Jesucristo, nagsaad sang butang nga mas daku pa​—⁠isa ka paraiso nga duta nga bisan ang proseso sang kamatayon dulaon. (Mateo 5:5; Lucas 23:43; Juan 5:​28, 29) Sa pagkamatuod, matuman ini paagi sa balaan nga pagpasilabot. Sa pagsabat sa pamangkot tuhoy sa “kon san-o” inang pagpasilabot magaabot, si Jesus nagsiling: “Ang ginharian sang Dios wala nagaabot nga may mga tanda nga panilagan.” Sa primero, ang mga mapanilagon lamang sing maayo nga may malaragwayon nga mata sang agila ang makakita sini. (Lucas 17:​20, 37) Ngaa amo sina?

Kon Ngaa Kinahanglan Naton ang Tanda

Kutob sang magkayab sia sa langit, si Jesucristo “nagapuyo sa kapawa nga dimapalapitan, nga walay tawo nga nakakita ukon makakita.” (1 Timoteo 6:16) Busa, indi sia liwat makita sang literal nga mga mata. Subong sang ginsiling ni Jesus sa katapusan nga adlaw sang iya kabuhi sa duta: “Sa diutay pa nga tion kag ang kalibutan indi na makakita sa akon.” (Juan 14:19) Sarang lamang sia makita sa malaragwayon nga paagi.​—⁠Efeso 1:18; Bugna 1:⁠7.

Apang, nagsiling si Jesus nga mangin posible para sa iya mga disipulo nga mahantupan kon san-o ang Ginharian sang Dios magasugod sa paggahom. Paano? Paagi sa tanda. Sa pagsabat sa pamangkot, “Ano bala ang tanda sang imo presensia?” ginbalay ni Jesus ang kitaon nga pamatuod sang iya palaabuton nga dikitaon nga paggahom.​—⁠Mateo 24:⁠3.

Nalakip sa tanda amo ang ilustrasyon nga nagapakita kon ano nga sahi sang katawhan ang makabenepisyo gikan sa sini. “Bisan diin ang lawas nga patay,” siling ni Jesus, “didto magatipon sing tingob ang mga agila.” (Mateo 24:28) Ang tanan nga luyag makalampuwas sa katapusan sang karon nga sistema pasulod sa bag-ong kalibutan sang Dios dapat “magatipon” kag magaagom sing espirituwal nga pagkaon kaupod sa kaangay sang agila nga “pinili” ni Cristo.​—⁠Mateo 24:​31, 45-47.

Pag-andam Batok sa Pagkadimapailubon

Wala sing tawo ang makahibalo sa petsa sang katapusan sang karon malauton nga sistema. “Nahanungod sadtong adlaw ukon sadtong takna,” siling ni Jesus, “walay isa nga nakahibalo, bisan pa ang mga anghel sa langit ukon ang Anak, kundi ang Amay lamang.”​—⁠Marcos 13:​32, 33.

Apang, mahimo bala nga ang tanda mahanabo sa sulod sang kalawigon sang kabuhi sang madamong kaliwatan sang tawo? Indi. Ang tanda mahanabo sa isa ka partikular nga kaliwatan. Ang kaliwatan nga nakasaksi sang ginsuguran sang tanda amo man ang makasaksi sang katapusan sini sa “kapipit-an subong sang wala pa sing kaangay nga natabo kutob sa ginsuguran sang tinuga.” Ang tatlo ka istoryador, sanday Mateo, Marcos, kag Lucas, nagrekord sang pasalig ni Jesus nahanungod sini.​—⁠Marcos 13:​19, 30; Mateo 24:​13, 21, 22, 34; Lucas 21:​28, 32.

Apang, yara ang katalagman nga mangin dimapailubon. Kapitoan-kag-apat ka tuig ang nagligad kutob sang magdabdab ang Inaway Kalibutanon I sang 1914. Gikan sa tawhanon nga punto-de-vista, daw tuman na ini kalawig nga tion. Apang buhi pa gihapon ang iban sang daw agila sing mata nga mga Cristiano nga nakakita sang Inaway Kalibutanon I. Ang ila kaliwatan wala pa magtaliwan.

Sang ginhatag niya ang tanda, si Jesus nagpaandam nahanungod sa katalagman sang mangin dimapailubon. Naghambal sia tuhoy sa mga indibiduwal nga magasiling sa ila tagipusuon: “Ang akon agalon nagapalantang.” Ginpakita ni Jesus nga inang mga balatyagon, kon indi mapunggan, magadul-ong sa binuang nga buhat. (Mateo 24:​48-51) Ang mga apostoles ni Cristo madamo pa sing masiling nahanungod sini.

“Mga Mayubiton”

Suno sa manunulat sang Biblia nga si Judas, ang mga apostoles ni Cristo nagpalanog sang masunod nga paandam: “Sa katapusan nga tion may mga mayubiton, nga nagagawi suno sa ila kaugalingon nga mga kailigbon nga didiosnon.”​—⁠Judas 17, 18.

Ang handum nga magkabuhi sa isa ka matinlo nga bag-ong kalibutan madali nga mabuslan sang “mga kailigbon nga didiosnon.” Labi ini nga makatalagam sa karon bangod sang mga metodo sang ekspresyon kag komunikasyon sang kalibutan. Wala pa gid anay sa maragtas sang tawo nga ang kasingki, espiritismo, kag seksuwal nga imoralidad ginparada sa subong nga kasangkaron. Amo ini sing masami ang tema sang mga presentasyon sa drama kag musika, kag makita ini sa madamong mga programa sa TV, mga video, mga pasayod, mga libro, kag mga magasin.

Ang tanda nagatudlo sa katapusan sinang mga pagkadidiosnon. Natural, nian, ang iban nga mga tawo nga naluyag sa didiosnon nga mga butang nagayubit sa tanda. Subong sang gintagna, nagapangatarungan sila nga “ang tanan nagapadayon subong nga amo sila kutob sa ginsuguran sang pagtuga.”​—⁠2 Pedro 3:​3, 4.

‘Ang Gugma Magabugnaw’

Sining karon lang, ang 75-anyos nga Amerikanong awtor, si Paul Bowles, gin-interbyu sang Newsweek nga magasin. Nagasabat sang pamangkot, “Ano ang imo opinyon nahanungod sa kalibutan?” si Bowles nagsiling: “Ang kalibutan nadugmok sa moral nga kahulugan. Wala na sing isa ang bunayag subong nga amo sila sang nagligad nga 60 ka tuig. Yara anay ang ideya tuhoy sa kon ano ang tawo nga maayo sing batasan; isa anay ini ka bilidhon nga kinaiya sang aton Nakatundan nga kultora. Karon wala na [sing nagasapak]. Yara man ang daku nga pagpadaku sa kuwarta.”

Ining kahimtangan subong gid sang gintagna sang Biblia. Si Jesus nagtagna: “Bangod nga ang kalautan magabuad ang gugma sang kalabanan magabugnaw.” (Mateo 24:12; 2 Timoteo 3:​1-5) Samtang nagamuad ang kakagud kag kahamkon, ang gugma sa Dios nagadiutay. Dugang kag dugang nga katawhan ang nagapakita nga ginauna nila ang ila kaugalingon nga mga kailigbon sang sa mga kasuguan sang Dios paagi sa paghimo sing kriminal nga mga buhat, terorismo, dibunayag nga mga padugi sa negosyo, seksuwal nga imoralidad, kag abuso sa droga.

Ginakilala sang iban ang katumanan sang tanda apang napaslawan sila sa paghulag sa sini bangod masako sila katama sa pagpahamuot sa ila kaugalingon. Sa pihak nga bahin, ang pagpamati sa tanda nagakinahanglan sing kabakud sa pagpakita sing dimahamkunon nga gugma sa Dios kag sa isigkatawo.​—⁠Mateo 24:​13, 14.

“Mga Paghimud-os sa Kabuhi”

Nagpaandam man si Jesus nga, luwas sa makagud nga mga kalipayan, ang makatarunganon nga mga kinahanglanon sa pisikal nagasako sa iban sa bagay nga napatumbayaan nila ang tanda. Naglaygay sia: “Andam kamo sa inyo mga kaugalingon basi ang inyo mga tagipusuon mabug-atan sang patuyang kag kahulugbon kag mga paghimud-os sining kabuhi, kag yadtong adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta.”​—⁠Lucas 21:​34, 35.

Ang Biblia, sa pagkamatuod, nagapalig-on sang malipayon nga kabuhi sa pamilya. (Efeso 5:24–6:⁠4) Masami ini nagakinahanglan nga ang ulo sang pamilya magapamugon ukon maganegosyo agod maamanan ang iya asawa kag kabataan. (1 Timoteo 5:⁠8) Apang, binuang nga tugutan ang kabuhi nga magalibot lamang sa pamilya, negosyo, kag materyal nga mga butang. Bangod sining katalagman, si Jesus nagpaandam: “Subong sang nahanabo sa mga adlaw ni Noe, mangin amo man sa mga adlaw sang Anak sang tawo: nagkalaon sila, nag-ilinum sila, nagpangasawa sila, ginpabanhan sila, tubtob sa adlaw nga si Noe nagsulod sa arka, kag nag-abot ang anaw kag naglaglag sa ila tanan. . . . Mangin amo man ini sa adlaw nga ipahayag ang Anak sang tawo.”​—⁠Lucas 17:​26-30; Mateo 24:​36-39.

“Kuhaon” ukon “Bayaan”

Ang takna ulihi na. Sa dili madugay, ang Ginharian sang Dios magapasilabot sa pagtadlong sa mga butang. Nian ang tagsa ka tawo maapektuhan sa bisan paano. Subong sang ginpaathag ni Jesus: “Nian may duha ka tawo sa latagon: ang isa kuhaon kag ang isa bayaan; duha ka babayi magagaling sa galingan: ang isa kuhaon kag ang isa bayaan.”​—⁠Mateo 24:​40, 41.

Kon mag-abot inang ital-ital nga tion, mangin ano ang imo tindog? Bayaan ka bala sa kalaglagan, ukon kuhaon ka bala para sa kaluwasan? Agod tuytuyan ka sa husto nga direksion, binagbinaga liwat ang ilustrasyon nga ginhatag ni Jesus: “Kon diin ang lawas nga patay, didto man magtipon ang mga agila.”​—⁠Lucas 17:​34-37; Mateo 24:⁠28.

Busa ginpadaku ni Jesus ang kinahanglanon para sa maalamon kag nahiusa nga buhat. Yadtong kuhaon para sa kaluwasan amo ang mga tayuyon nga nagatipon sing tingob kag nagabenepisyo gikan sa espirituwal nga pagkaon nga ginaaman sang Dios. Minilyonmilyon ang nakaeksperiensia nga inang espirituwal nga pagkaon nagahalin paagi sa suod nga pagpakig-upod sa isa sang kapin sa 55,000 ka kongregasyon sang mga Saksi ni Jehova kag paagi sa pagtuon sa napasad sa Biblia nga mga publikasyon subong sang isa nga ginabasa mo.

Kapin sa tatlo ka milyon ka Saksi ni Jehova ang nagapakita sing pagtuo sa tanda paagi sa pagpaambit sang “maayong balita sang ginharian” sa ila isigkatawo. (Mateo 24:14) Nagahulag ka bala sing positibo sa maayong balita? Kon amo, magahulag ka nahisuno sa saad sang kaluwasan pakadto sa dutan-on nga paraiso.

[Laragway sa pahina 5]

Madamo ang masako katama sa mga kalipayan sa bagay nga ginpatumbayaan nila ang tanda

[Laragway sa pahina 6]

Ang pagpamati sa tanda nagalakip sang pagtipon sing tingob agod magkaon sang Pulong sang Dios