Pagpabakod sang Aton Pagsalig sa Pagkamatarong sang Dios

“Agod ang imo pagsalig mangin kay Jehova mismo ginhatagan ko ikaw sing ihibalo karon.”​—⁠HULUBATON 22:⁠19.

1, 2. (a) Ngaa nagasalig ang mga Saksi ni Jehova kay Jehova? (Hulubaton 22:19) (b) Ano ang nagapakita nga dapat pabakuron sang pila ka indibiduwal ang ila pagsalig kay Jehova?

ANG matuod nga mga Cristiano ginapakamaayo sing sibu nga ihibalo tuhoy kay Jehova kag tuhoy sa iya mga katuyuan. Ang isa ka “matutom kag mainandamon nga ulipon” mahigugmaon nga nagahatag sa ila sing espirituwal nga “pagkaon sa nagakaigo nga tion.” (Mateo 24:45) Ang ihibalo nga ila ginatun-an nagahatag sa ila sing mabakod nga pundasyon nga amo ang sadsaran sang ila pagsalig sa Dios. Sa amo, subong isa ka grupo, ang mga Saksi ni Jehova nagapakita sing pagsalig kay Jehova kag sa iya pagkamatarong.

² Apang, subong mga indibiduwal, mahimo nga dapat pabakuron sang pila ka mga Saksi ini nga pagsalig. Ang Sosiedad makabaton kon kaisa sing mga sulat nga nagapabutyag sing duhaduha sa mga paathag nga ginhatag sa mga publikasyon sini. Ining mga pagduhaduha mahimo nga isa ka reaksion sa mga pagpasibu sa paghangop, ukon mahimo nga nagabinagbinag ini sing mga butang nga nagaapektar mismo sa nagapamangkot, labi na sa emosyonal nga paagi.​—⁠Ipaanggid ang Juan 6:​60, 61.

3. Ano ang mahimo matabo bisan sa matutom nga mga alagad ni Jehova, kag ngaa?

³ Bisan gani ang matuod nga mga alagad ni Jehova nakaeksperiensia sang pagkamatuod sang Manugwali 9:​11: “Nagliso ako kag nakita ko sa idalom sang adlaw nga ang palumba indi sa madasig, ukon ang inaway sa makusog, ukon ang kalan-on sa maalam, ukon ang manggad sa mga mahangpunon, ukon ang kahamuot sa mga may ihibalo; bangod ang tion kag wala ginapaabot nga hitabo nagakahanabo sa ila tanan.” Paano ini magmatuod sa dugang pa, ukon sa espirituwal, nga kahulugan? Ayhan may kilala kita nga mga Cristiano nga madasig mag-aplikar sang laygay sang Biblia, maayo mag-apin sa kamatuoran, maalamon mag-aplikar sang mga prinsipio sang Biblia, kag makugi sa pagkuha sing sibu nga ihibalo. Apang, bangod sang “tion kag wala ginapaabot nga mga hitabo,” mahimo nga masapwan karon sang iban ang ila kaugalingon nga nalimitehan na bangod sang isa ka aksidente ukon katigulangon. Ayhan nagapalibog sila kon bala makasulod sila sa bag-ong kalibutan sang Dios nga indi na makaeksperiensia sing kamatayon.

4, 5. Ngaa wala gid sing rason ang mga Cristiano nga dulaon ang ila pagsalig sa pagkamatarong ni Jehova?

⁴ Kon ang isa ka Cristiano mamatyan sing tiayon, daku gid nga kasakit kag kadulaan ang ginatuga sini. Mahimo nga magkaupod sila nga nag-alagad kay Jehova sa sulod sang mga tinuig ukon mga dekada pa gani. Nahibaluan sang nabalo nga tiayon nga ginabugto sang kamatayon ang higot sang pag-asawahay.⁠a (1 Corinto 7:39) Karon, agod nga indi magluya ang iya pagsalig, dapat niya kontrolon ang iya balatyagon.​—⁠Ipaanggid ang Marcos 16:⁠8.

⁵ Daw ano ka maalamon nga tamdon ang pagkapatay sang isa ka tiayon, ginikanan, anak, ukon suod nga Cristianong abyan subong isa ka kahigayunan sa pagpakita sing pagsalig sa pagkamatarong ni Jehova! Bisan sa pagbatyag sing personal nga kadulaan, makasalig kita nga si Jehova indi dimatarong. Makasalig kita nga ang tanan nga makatigayon sing kabuhi nga walay katapusan​—⁠paagi sa kaluwasan ukon paagi sa pagkabanhaw​—⁠mangin malipayon. Tuhoy sa Dios, ang salmista nagsiling: “Ginahumlad mo ang imo kamot kag ginabusog ang handum sang tagsa ka butang nga buhi. Si Jehova matarong sa tanan niya nga dalanon kag mainunungon sa tanan niya nga binuhatan. Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Tumanon niya ang handum sang mga nagakahadlok sa iya, kag pamatian niya ang ila pagpangayo sing bulig, kag luwason niya sila.”​—⁠Salmo 145:​16-19.

Kon sa Banta Naton Nag-antos Kita Anay sa Walay Pulos

6, 7. (a) Ngaa mahimo nga ang iban nga mga Saksi nga nag-antos sang una may tuhay na karon nga paghangop? (b) Ngaa indi naton dapat tamdon si Jehova nga dimatarong sia bangod gintugutan niya ini nga pag-antos sang una?

⁶ Sang una, ang iban nga mga Saksi nag-antos bangod nagdumili sila sa pagpakigbahin sa isa ka hilikuton nga ginatugot na karon sang ila konsiensia. Halimbawa, mahimo nga amo ini ang ila desisyon sang nagligad nga pila ka tuig tuhoy sa pila ka sahi sang pag-alagad para sa publiko. Ayhan ginabatyag na karon sang isa ka utod nga mahimo niya ini sing bunayag nga wala ginalapas ang iya Cristianong pagkawalay nadampigan tuhoy sa sistema sang mga butang karon.

⁷ Si Jehova bala indi matarong nga gintugutan niya nga mag-antos sia bangod ginsikway niya ang butang nga mahimo na niya karon nga wala sing malain nga resulta? Indi ini paghunahunaon sang kalabanan nga nakaeksperiensia sini. Sa baylo, nagakalipay sila nga nahatagan sila sing kahigayunan nga ipakita sing dayag kag sing maathag nga determinado sila nga magpakalig-on sa hulusayon sang bug-os uniberso nga pagkasoberano. (Ipaanggid ang Job 27:⁠5.) Ano ang marason sang isa nga naghinulsol sia bangod ginsunod niya ang iya konsiensia sa pagtindog sing malig-on para kay Jehova? Paagi sa mainunungon nga pagsakdag sa Cristianong mga prinsipio suno sa paghangop sa sini ukon paagi sa pagsunod sa sugyot sang konsiensia, ginpamatud-an nila nga takus sila sa pagpakig-abyan ni Jehova. Sa pagkamatuod, maalamon gid nga likawan ang isa ka dalanon nga magatublag sa konsiensia sang isa ukon mahimo nga magpasandad sa iban. Tuhoy sini, mahunahuna naton ang huwaran ni apostol Pablo.​—⁠1 Corinto 8:​12, 13; 10:​31-33.

8. Ngaa ang Judiyong mga Cristiano, nga nagatuman anay sa Kasuguan, wala sing rason nga duhaduhaan ang pagkamatarong ni Jehova?

⁸ Agod mapahamut-an si Jehova, obligado ang mga Judiyo anay nga tumanon ang Napulo ka Sugo kag subong man ang nanuhaytuhay nga mga 600 ka dugang pa nga kasuguan. Sang ulihi, sa idalom sang Cristianong kahimusan, ang pagtuman sa sining kasuguan indi na obligado para sa pag-alagad kay Jehova, indi bisan para sa undanon nga mga Judiyo. Ang kasuguan nga indi obligado nga tumanon naglakip sang tuhoy sa pagpatuli, pagbantay sang Adlaw nga Inugpahuway, pagdulot sing sapat nga mga halad, kag paglikaw sa pila ka ginadumilian nga mga pagkaon. (1 Corinto 7:​19; 10:​25; Colosas 2:​16, 17; Hebreo 10:​1, 11-14) Ang mga Judiyo​—⁠lakip ang mga apostoles​—⁠nga nangin mga Cristiano ginhilway gikan sa obligasyon nga tumanon ang kasuguan nga sang una obligado sila nga tumanon sang sila yara pa sa idalom sang Kasuguan nga katipan. Nagreklamo bala sila nga ang kahimusan sang Dios dimatarong bangod ginpatuman anay sa ila ang mga butang nga indi na kinahanglanon? Wala, nagkalipay sila nga nagsangkad ang ila paghangop sa mga katuyuan ni Jehova.​—⁠Binuhatan 16:​4, 5.

9. Ano ang natabo sa pila ka Saksi, apang ngaa wala sila sing dapat hinulsulan?

⁹ Sa modernong mga tion, may pila ka mga Saksi nga tuman ka estrikto sa ila pagtamod kon ano ang dapat kag indi dapat himuon. Bangod sini, mas nag-antos sila sangsa iban. Sang ulihi, bangod sang nag-uswag nga ihibalo nabuligan sila nga pasangkaron ang ila pagtamod sa mga butang. Apang wala sila sing rason sa paghinulsol nga ginsunod anay nila ang ila konsiensia, bisan pa kon ginbangdan ini sang ila kapin nga pag-antos. Dalayawon gid nga ginpakita nila ang ila kahanda sa pag-antos subong katutom kay Jehova, sa “paghimo sing tanan nga butang para sa maayong balita.” Ginapakamaayo ni Jehova ini nga sahi sang diosnon nga debosyon. (1 Corinto 9:​23; Hebreo 6:10) Si apostol Pedro nagsulat nga may paghantop: “Kon, bangod sa paghimo sing maayo nagaantos kamo, apang ginabatas ninyo ini, isa ini ka butang nga kalahamut-an sa Dios.”​—⁠1 Pedro 2:⁠20.

Manuto kay Jonas

10, 11. Paano si Jonas nagpakita sing kakulang sing pagsalig kay Jehova (a) sang ginpakadto sia sa Ninive? (b) sang wala paglaglaga sang Dios ang mga taga-Ninive?

¹⁰ Sang ginsugo sia nga magkadto sa Ninive, wala magpakita si Jonas sing apresasyon sa pagsalig nga ginpakita ni Jehova sa iya. Sa tapos sang makahaladlok nga eksperiensia bangod sang iya mismo pagpangalag-ag sa pagtuman, nakamaradmad si Jonas, narealisar niya ang iya sayop, ginbaton niya ang ginapahimo sa iya sa iban nga pungsod, kag ginpaandaman ang mga taga-Ninive tuhoy sa nagapakari nga kalaglagan. Nian natabo ang wala ginapaabot nga butang: Bangod sang mahinulsulon nga panimuot sang mga taga-Ninive, wala pagdayuna ni Jehova ang paglaglag sa ila.​—⁠Jonas 1:​1⁠–​3:⁠10.

¹¹ Ang reaksion ni Jonas? Bangod wala niya maluyagi ang natabo, nagkumod sia sa pangamuyo sa Dios. Ang punto sang iya reklamo amo: ‘May panagupnop ako nga amo gid sini ang matabo. Amo kon ngaa sa umpisa pa lang indi ko luyag magkadto sa Ninive. Karon, pagkatapos sang tanan nga naagihan ko, lakip ang kahadlok kag kahuluy-an nga gintulon ako sang isa ka daku nga isda, kag pagkatapos sang akon lakas nga pagpangabudlay sa pagpaandam sa mga taga-Ninive sang nagahilapit nga kalaglagan, amo pa sini ang natabo! Walay pulos tanan ang akon pinangabudlayan kag pag-antos! Maayo pa nga napatay na lang ako!’​—⁠Jonas 4:​1-3.

12. Ano ang matun-an naton gikan sa eksperiensia ni Jonas?

¹² May makatarunganon bala nga rason si Jonas sa pagreklamo? Indi bala matarong si Jehova sa pagpakita sing kaluoy sa naghinulsol nga mga makasasala? Ang matuod, dapat kuntani nga nalipay si Jonas; linibo ka tawo ang indi malaglag! (Jonas 4:11) Apang ginpakita sang iya dimatinahuron kag reklamador nga panimuot nga wala sia sing hanuot nga pagsalig sa pagkamatarong ni Jehova. Sobra ang pag-ulikid niya sa iya kaugalingon sangsa iban. Manuto kita kay Jonas paagi sa indi pag-una sa aton kaugalingon kag sa aton balatyagon. Kumbinsihon naton ang aton kaugalingon nga ang pagtuman kay Jehova, pagsunod sa panuytoy nga ginahatag paagi sa iya organisasyon kag pagbaton sa iya mga desisyon, amo ang husto nga butang nga himuon. Kumbinsido kita nga ‘magmaayo ang mga nagakahadlok sa matuod nga Dios.’​—⁠Manugwali 8:⁠12.

Karon Na ang Tion nga Pabakuron Naton ang Aton Pagsalig!

13. Paano naton tanan mapabakod ang aton pagsalig kay Jehova?

¹³ Ang pagpabakod sa aton pagsalig kay Jehova amo ang dalanon sang kaalam. (Hulubaton 3:​5-8) Sa pagkamatuod, indi lamang kita mangamuyo kay Jehova nga buligan kita nga mangin kapin ka masinaligon. Ang pagsalig nagadaku pasad sa sibu nga ihibalo, gani dapat naton himuon nga bahin sang aton adlaw-adlaw nga pagsinalayo ang personal nga pagtuon sa Biblia, ginabasa ang Biblia kag ang mga literatura nga nagapaathag sang Biblia. Importante ang regular nga pagtambong sa Cristianong mga miting, subong man ang maayong paghanda kag pagkomento tubtob mahimo naton. Ang kinabatasan nga pagpaambit sa iban sang mga kamatuoran sang Biblia, mataktikanhon nga ginalandas ang mga pagpamatok, nagapabakod man sang aton pagsalig kay Jehova kag sa iya Pulong. Sa amo, labi pa kita nga nagasuod sa iya sa adlaw-adlaw.

14. Ngaa ang katawhan sang Dios sa indi madugay dapat labi na nga magsalig kay Jehova?

¹⁴ Sa malapit nga palaabuton, ang pinakadaku nga kapipit-an nga magabunal sa kaliwatan sang tawo hinali nga magaabot. (Mateo 24:21) Kon mag-abot ini, ang mga alagad sang Dios labi pa nga dapat magpakita sing pagsalig sa pagkamatarong ni Jehova kag sa pagtuytoy nga ginaaman sang iya organisasyon. Sa isa ka simbuliko nga paagi, masinaligon nga sundon nila nian ang sugo sang Dios: “Lakat kamo, katawhan ko, sulod kamo sa inyo mga hulot, kag sirahi ang puwertahan. Panago anay kamo tubtob nga mag-ugdaw ang kaakig.” (Isaias 26:⁠20) Nakasulod na sila sa nagaamlig nga palibot sang kapin sa 85,000 ka kongregasyon sa 232 ka kadutaan. Kon ano pa ang idugang sa laygay nga “sulod kamo sa inyo mga hulot,” makasalig kita nga buligan kita ni Jehova sa paghimo sini.

15. Paano ang butang tuhoy sa pagsalig ginapadaku sa sulod sang tuig 1998, kag ngaa nagakaigo ini?

¹⁵ Kinahanglanon gid nga pabakuron naton karon ang aton pagsalig. Kon wala kita sing pagsalig sa aton Cristianong kauturan, sa organisasyon ni Jehova kag, labaw sa tanan, kay Jehova mismo, imposible nga maluwas kita. Gani nagakaigo gid nga sa sulod sang tuig 1998, ang mga Saksi ni Jehova sa bug-os nga kalibutan sulit-sulit nga ginapahanumdom sang mga pulong sang ila tuigan nga teksto nga “ang tagsatagsa nga nagatawag sa ngalan ni Jehova maluwas”! (Roma 10:⁠13) Dapat kita padayon nga maghupot sina nga pagsalig. Kon mamutikan gani naton ang bisan diutay gid lang nga pagluya sini nga pagsalig, dapat kita manikasog nga tadlungon ini karon, huo, karon gid.

Ang Paghukom ni Jehova Mangin Matarong

16. Ano ang mahimo matabo sa pagsalig kon wala ini ginapalambo, kag paano naton mapunggan nga matabo ini?

¹⁶ Sa Hebreo 3:​14, ang hinaplas nga mga Cristiano ginapaandaman: “Matuod nga mangin mga umalambit kita kay Cristo kon magmalig-on kita sa aton pagsalig kutob sa panugod tubtob sa katapusan.” Sa prinsipio, ining mga pulong naaplikar man sa mga Cristiano nga may dutan-on nga paglaum. Ang una nga pagsalig mahimo madula kon indi ini pagpalambuon. Importante gid nga padayon kita nga magkuha sing sibu nga ihibalo, sa amo ginapalig-on naton ang pundasyon nga ginapasaran sang aton pagsalig!

17. Ngaa makasalig kita nga tuhoy sa kaluwasan, mangin matarong ang paghukom ni Jesus?

¹⁷ Ang tanan nga pungsod sa indi madugay usisaon ni Cristo agod nga iya “painpainon ang katawhan gikan sa isa kag isa, subong sang manugbantay nga nagapain sang mga karnero sa mga kanding.” (Mateo 25:⁠31-33) Makasalig kita nga si Cristo mangin matarong sa paghukom kon sin-o ang takus luwason. Ginhatagan sia ni Jehova sing kaalam, paghantop, kag iban pa kinahanglanon nga mga kinaiya “sa paghukom sa napuy-an nga duta sa pagkamatarong.” (Binuhatan 17:​30, 31) Kabay nga ang aton malig-on nga pagpati mangin subong sang kay Abraham, nga nagsiling: “Indi gid mapatihan nga himuon mo [Jehova] ang subong sini nga patyon ang matarong nga tawo upod sa isa nga malauton sa bagay nga ang matarong mangin subong sang malauton! Indi gid ini mapatihan sa imo. Indi bala ang Hukom sang bug-os nga duta magahimo sing matarong?”​—⁠Genesis 18:⁠25.

18. Ngaa indi kita dapat mabalaka gid sa mga butang nga wala naton mahibaluan sa karon?

¹⁸ Upod ang bug-os nga pagsalig sa pagkamatarong ni Jehova, indi kita dapat magkabalaka nga hibaluon kon ano ang sabat sa mga pamangkot subong sang: ‘Paano hukman ang mga lapsag kag magagmay nga kabataan? Mahimo ayhan nga madamo pa nga tawo ang indi malab-ot sang maayong balita kon mag-abot ang Armagedon? Ano ang matabo sa mga tawo nga may depekto sa hunahuna? Ano ang matabo sa . . . ?’ Matuod, mahimo nga indi naton mahibaluan sa karon kon paano lubaron ni Jehova ining mga problema. Apang, lubaron niya ini sa isa ka matarong kag maluluy-on nga paagi. Indi gid naton pagduhaduhaan ini. Sa katunayan, mahimo nga matingala pa kita kag malipay sa pagtan-aw sa iya nga ginalubad ini sa isa ka paagi nga wala gid naton mahunahuna.​—⁠Ipaanggid ang Job 42:​3; Salmo 78:​11-16; 136:​4-9; Mateo 15:​31; Lucas 2:⁠47.

19, 20. (a) Ngaa indi sayop nga mamangkot sing rasonable nga mga pamangkot? (b) San-o ihatag ni Jehova ang kinahanglanon nga mga sabat?

¹⁹ Ang organisasyon ni Jehova wala nagapamatok sa sinsero kag sibu sa tion nga mga pamangkot, subong sang ginabutangbutang sang pila ka manugpamatok. (1 Pedro 1:​10-12) Apang, nagalaygay ang Biblia nga likawan naton ang mga pamangkot nga binuang kag wala sing maathag nga sabat. (Tito 3:9) Ang pagpamangkot sing rasonable nga mga pamangkot kag ang pagpanalawsaw sa Pulong sang Dios kag sa Cristianong mga publikasyon agod hibaluon ang Makasulatanhon nga mga sabat makapauswag sang aton sibu nga ihibalo kag sa amo makapalig-on sang aton pagsalig kay Jehova. Ginasunod sang organisasyon ang huwaran ni Jesus. Naglikaw sia sa pagkomento sa mga pamangkot nga sabton pa sa nagakaigo nga tion. Nagpaathag sia: “May madamo pa ako nga butang nga inugsiling sa inyo, apang indi ninyo masarangan ini sa karon.” (Juan 16:12) Ginbaton man niya nga sia mismo may pila ka butang nga wala niya mahangpi sadto.​—⁠Mateo 24:⁠36.

²⁰ Madamo pa sang ipahayag si Jehova. Daw ano ka maalamon nga maghulat sa iya, nagasalig nga ipahayag niya ang iya mga katuyuan sa nagakaigo nga tion. Makasalig kita nga kon mag-abot na ang sibu nga tion ni Jehova, malipay kita sa pagtigayon sing dugang pa nga paghantop sa iya mga dalanon. Huo, pagapadyaan kita, basta lamang magsalig kita sing bug-os kay Jehova kag sa organisasyon nga iya ginagamit. Ang Hulubaton 14:​26 nagapasalig sa aton: “Sa kahadlok kay Jehova yara ang mabakod nga pagsalig, kag ang iya mga anak may duog nga dalangpan.”

[Footnote]

Ano sa Banta Mo?

◻ Ngaa indi maalamon nga tugutan ang mga emosyon nga paluyahon ang aton pagsalig kay Jehova?

◻ Ano ang matun-an naton gikan sa eksperiensia ni Jonas?

◻ Ngaa importante gid ang pagtuon sa Biblia kag ang pagtambong sa mga miting?

[Retrato sa pahina 16]

Walay sapayan sing personal nga kadulaan, makasalig kita nga matarong si Jehova

[Kapsion sa pahina 18]

Napat-od mo bala nga kay Jehova gid ikaw nagasalig?