Isa Ka Dakung Kadam-an sang Matuod nga mga Sumilimba​—⁠Sa Diin Sila Maghalin?

“Yari karon! ang dakung kadam-an, . . . gikan sa tanan nga pungsod kag mga tribo kag katawhan kag hambal, nga nagatindog sa atubangan sang trono kag sang Kordero.”​—⁠BUGNA 7:⁠9.

 1. Ngaa ang matagnaon nga mga palanan-awon sa Bugna talalupangdon gid sa aton sa karon?

SANG hingapusan sang unang siglo C.E., si apostol Juan nakakita sing mga palanan-awon tuhoy sa makadalayaw nga mga hitabo may kaangtanan sa katuyuan ni Jehova. Ang pila sang mga butang nga iya nakit-an sa palanan-awon nagakatuman na sa karon. Ang iban sini matuman sa malapit nga palaabuton. Ini tanan nasentro sa dramatiko nga katapusan sang dakung katuyuan ni Jehova sa paghimaya sang iya ngalan sa atubangan sang tanan nga tinuga. (Ezequiel 38:​23; Bugna 4:​11; 5:13) Dugang pa, nagalakip ini sang mga paglaum sa kabuhi sang tagsa sa aton. Paano?

 2. (a) Ano ang nakit-an ni apostol Juan sa iya ikap-at nga palanan-awon? (b) Anong mga pamangkot tuhoy sining palanan-awon ang aton pagabinagbinagon?

² Sa ikaapat nga serye sang mga palanan-awon sa Bugna, nakita ni Juan ang mga anghel nga nagapugong sa mga hangin sang kalaglagan tubtob nga ang “mga ulipon sang aton Dios” mapat-inan sa ila mga agtang. Nian nakita niya ang labing makakulunyag nga hitabo​—⁠“isa ka dakung kadam-an, nga walay tawo nga makaisip, gikan sa tanan nga pungsod kag mga tribo kag katawhan kag hambal,” nga nahiusa sa pagsimba kay Jehova kag sa pagpadungog sa iya Anak. Ginsugiran si Juan, nga ini sila, amo ang katawhan nga nagguwa sa dakung kapipit-an. (Bugna 7:​1-17) Sin-o ang ginlaragway subong “mga alagad sang aton Dios”? Kag sin-o ang magahuman sa “dakung kadam-an” nga makalampuwas sa kapipit-an? Mangin isa ka bala sa ila?

Sin-o ang “mga Ulipon sang Aton Dios”?

 3. (a) Sa Juan 10:​1-18, paano ginlaragway ni Jesus ang iya kaangtanan sa iya mga sumulunod? (b) Ano ang gin-aman ni Jesus sa iya mga karnero paagi sa iya mahalaron nga kamatayon?

³ Mga apat ka bulan antes sang iya kamatayon, gintawag ni Jesus ang iya kaugalingon subong ang “maayong manugbantay” kag ang iya mga sumulunod subong mga “karnero” diin igahalad niya ang iya kabuhi. Ginsambit niya sing pinasahi ang karnero nga iya nakit-an sa malaragwayon nga toril kag pagahatagan niya sing pinasahi nga pag-atipan. (Juan 10:​1-18)⁠a Sing mahigugmaon, ginhalad matuod ni Jesus ang iya kabuhi para sa iya mga karnero, nga nagahatag sing kinahanglanon nga bili sang gawad agod mahilway sila sa sala kag kamatayon.

 4. Sin-o ang una nga gintipon subong mga karnero nahisuno sa ginsiling diri ni Jesus?

⁴ Apang, antes niya ginhimo yadto, si Jesus subong ang Maayong Manugbantay personal nga nagtipon sing mga disipulo. Ang una nga mga disipulo amo ang ginpakilala sa iya ni Juan Bautista, ang “manugbantay sang ganhaan” sa ilustrasyon ni Jesus. Si Jesus nagpangita sing mga tawo nga maluyag magbaton sing kahigayunan nga mangin bahin sang natingob nga ‘binhi ni Abraham.’ (Genesis 22:​18; Galacia 3:​16, 29) Ginpalambo niya sa ila mga tagipusuon ang pag-apresyar sa Ginharian sang mga langit, kag ginpasalig sila nga magahanda sia sing isa ka duog para sa ila sa balay sang iya langitnon nga Amay. (Mateo 13:​44-46; Juan 14:​2, 3) Sing nagakaigo sia nagsiling: “Kutob sa mga adlaw ni Juan Bautista tubtob karon ang ginharian sang langit amo ang tulumuron nga ginapanikasugan sang mga tawo kag ginaagaw ini sang mga nagapanikasog sa sini.” (Mateo 11:12) Ang mga nagsunod sa iya agod malab-ot ina nga tulumuron amo ang yara sa sulod sang toril nga ginhambal ni Jesus.

 5. (a) Sin-o ang “mga alagad sang aton Dios” nga ginpatuhuyan sa Bugna 7:​3-8? (b) Ano ang nagapakita nga madamo pa ang magabuylog sa pagsimba upod sa espirituwal nga mga Israelinhon?

⁵ Sa Bugna 7:​3-8, yadtong madinalag-on nga nakapanikasog sa sinang langitnon nga tulumuron ginpatuhuyan man subong “ang mga ulipon sang aton Dios.” (Tan-awa ang 1 Pedro 2:​9, 16.) Ang 144,000 bala nga ginsambit didto kinaugali nga mga Judiyo lamang? Mga Judiyo lamang bala ang yara sa sulod sang malaragwayon nga toril sa ilustrasyon ni Jesus? Indi gid; mga katapo sila sang espirituwal nga Israel sang Dios, tanan sila mga kaupod ni Cristo sa espirituwal nga binhi ni Abraham. (Galacia 3:​28, 29; 6:​16; Bugna 14:​1, 3) Huo, ang tion magaabot, nga mapuno ang sibu nga kadamuon sang 144,000. Nian ano ang matabo? Subong sang gintagna sang Biblia, ang iban​—⁠ang dakung kadam-an sa ila​—⁠magabuylog sa sining espirituwal nga Israel sa pagsimba kay Jehova.​—⁠Zacarias 8:⁠23.

Ang “Iban nga Karnero”​—⁠Mga Cristianong Gentil Bala Sila?

 6. Ano nga hitabo ang ginatudlo sang Juan 10:⁠16?

⁶ Pagkatapos ginsambit ang isa ka toril sa Juan 10:​7-15, ginlakip ni Jesus ang isa pa ka grupo sa danyag sang mga hitabo, nga nagasiling: “May iban ako nga mga karnero, nga wala sa sining toril; sila man dapat ko dalhon, kag magapamati sila sa akon tingog, kag mangin isa sila ka panong, isa ka manugbantay.” (Juan 10:16) Sin-o ining “iban nga karnero”?

 7, 8. (a) Ngaa ang ideya nga ang iban nga mga karnero amo ang mga Cristianong Gentil napasad sa sayop nga paghangop? (b) Anong mga katunayan tuhoy sa katuyuan sang Dios sa duta ang may daku nga importansia sa aton paghangop kon sin-o ang iban nga mga karnero?

⁷ Ginahangop sang mga komentarista sang Cristiandad sa kabilugan nga ining iban nga karnero amo ang mga Cristianong Gentil kag yadtong sa sulod sang toril nga una nga ginsambit mga Judiyo, nga napaidalom sa Kasuguan nga katipan, kag busa ang duha ka grupo magakadto sa langit. Apang si Jesus natawo nga isa ka Judiyo kag duna nga napaidalom sa Kasuguan nga katipan. (Galacia 4:4) Dugang pa, yadtong mga nagakabig sa iban nga karnero subong ang mga Cristianong Gentil nga pagapadyaan sing langitnon nga kabuhi napaslawan sa pagbinagbinag sa isa ka importante nga bahin sang katuyuan sang Dios. Sang gintuga ni Jehova ang unang mga tawo kag ginpahamtang sila sa hardin sang Eden, gin-athag niya nga tuyo niya nga ang duta pagapuy-an, nga mangin isa ini ka bug-os nga paraiso, kag ang mga tawo nga magatatap sini magakabuhi sing walay katapusan​—⁠sa kondisyon nga tahuron nila kag sundon ang ila Manunuga.​—⁠Genesis 1:​26-28; 2:​15-17; Isaias 45:⁠18.

⁸ Sang magpakasala si Adan, wala mapaslawi ang katuyuan ni Jehova. Mahigugmaon nga nag-aman ang Dios para sa mga kaanakan ni Adan sing kahigayunan nga matigayon ang wala gin-apresyar ni Adan. Si Jehova nagtagna nga magabangon sia sing isa ka manluluwas, isa ka binhi, nga paagi sa iya ang tanan nga kapungsuran makatigayon sing mga pagpakamaayo. (Genesis 3:​15; 22:18) Yadto nga saad wala nagakahulugan nga ang tanan nga maayo nga tawo sa duta pagadalhon sa langit. Gintudluan ni Jesus ang iya mga sumulunod sa pagpangamuyo: “Magkari ang imo ginharian. Matuman ang imo kabubut-on, subong sa langit, amo man sa duta.” (Mateo 6:​9, 10) Indi pa madugay antes niya ginhambal ang ilustrasyon nga narekord sa Juan 10:​1-16, ginsugiran ni Jesus ang iya mga disipulo nga ang “diutay nga panong” lamang amo ang nahamut-an sang iya Amay nga hatagan sing langitnon nga Ginharian. (Lucas 12:​32, 33) Busa kon ginabasa naton ang pag-ilustrar ni Jesus sa iya kaugalingon subong ang Maayong Manugbantay nga naghalad sang iya kalag para sa iya mga karnero, isa ka sayop ang indi paglakip sa kalabanan sadtong ginbutang ni Jesus sa idalom sang iya mahigugmaon nga pag-atipan, sila nga nangin dutan-on nga mga sakop sang iya langitnon nga Ginharian.​—⁠Juan 3:⁠16.

 9. Sang 1884 pa, ano ang paghangop sang mga Estudyante sang Biblia tuhoy sa identidad sang iban nga mga karnero?

⁹ Sang 1884 pa, ginkilala sang Watch Tower ang iban nga mga karnero subong ang mga tawo nga pagahatagan sing kahigayunan nga magkabuhi sa sini nga duta sa idalom sang mga kahimtangan nga magatuman sa orihinal nga katuyuan sang Dios. Narealisar sang unang mga Estudyante sa Biblia nga ang pila sining iban nga mga karnero mangin amo ang mga tawo nga nagkabuhi kag napatay antes sang dutan-on nga ministeryo ni Jesus. Apang, may pila ka mga detalye nga wala nila mahangpan sing husto. Halimbawa, ginhunahuna nila nga ang pagtipon sa iban nga mga karnero mahanabo pagkatapos nga mabaton sang tanan nga hinaplas ang ila langitnon nga padya. Walay sapayan, nahangpan nila nga ang iban nga mga karnero indi lamang ang mga Cristianong Gentil. Ang kahigayunan nga mangin isa sang iban nga mga karnero bukas para sa mga Judiyo kag mga Gentil, sa katawhan sang tanan nga kapungsuran kag mga rasa.​—⁠Ipaanggid ang Binuhatan 10:34, 35.

 10. Agod makaupod kita sa sadtong matuod nga ginakabig ni Jesus subong iya iban nga mga karnero, ano ang dapat nga matuod sa aton?

¹⁰ Agod maghisanto sa paglaragway ni Jesus, ang iban nga mga karnero kinahanglan mangin mga tawo nga, walay sapayan sang rasa ukon etniko nga ginhalinan, nagakilala kay Jesucristo subong ang Maayong Manugbantay. Ano ang ginalakip sina? Dapat sila magpakita sing pagkahagop kag kahanda nga matuytuyan, nga amo ang mga kinaiya sang isa ka karnero. (Salmo 37:11) Kaangay sang diutay nga panong, dapat nila “makilala ang tingog” sang maayong manugbantay kag indi pagtugutan ang ila kaugalingon nga matuytuyan sang iban nga mahimo magtinguha sa pag-impluwensia sa ila. (Juan 10:​4; 2 Juan 9, 10) Dapat apresyahon nila ang importansia sang ginhimo ni Jesus nga paghalad sang iya kalag para sa iya mga karnero kag magtuo sing bug-os sa sina nga aman. (Binuhatan 4:12) Dapat nila “pamatian” ang tingog sang Maayong Manugbantay sang ginasugo niya sila sa paghimo sing balaan nga pag-alagad kay Jehova lamang, sa padayon nga pagpangita anay sang Ginharian, kag sa paghamulag sa kalibutan, kag sa pagpakita sing masakripisyuhon sa kaugalingon nga gugma sa isa kag isa. (Mateo 4:​10; 6:​31-33; Juan 15:​12, 13, 19) Nagahisanto ka bala sa amo nga paglaragway sa mga ginakabig ni Jesus subong iban niya nga mga karnero? Luyag mo bala? Daw ano ka hamili nga kaangtanan ang matigayon sang tanan nga nangin matuod nga iban nga mga karnero ni Jesus!

Pagtahod sa Awtoridad sang Ginharian

 11. (a) Sa tanda sang iya presensia, ano ang ginasiling ni Jesus tuhoy sa mga karnero kag mga kanding? (b) Sin-o ang mga kauturan nga ginapatuhuyan ni Jesus?

¹¹ Mga pila ka bulan pagkatapos nga nahatag niya ang nasambit nga ilustrasyon, didto liwat si Jesus sa Jerusalem. Sang nagapungko sa Bukid sang mga Olibo nga nagatamwa sa duog sang templo, ginhatagan niya ang iya mga disipulo sing mga detalye tuhoy sa ‘tanda sang iya presensia kag sang konklusion sang sistema sang mga butang.’ (Mateo 24:3) Sa liwat nagpamulong sia tuhoy sa pagpanipon sa mga karnero. Lakip sa iban nga mga butang, sia nagsiling: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Tipunon sa atubangan niya ang tanan nga pungsod, kag painpainon niya sila subong sang manugpahalab nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa iya wala.” Sa sining parabola, ginpakita ni Jesus nga yadtong gintalupangod sang Hari pagahukman suno sa kon paano nila ginpakig-angutan ang iya “mga kauturan.” (Mateo 25:​31-46) Sin-o ining mga kauturan? Sila ang mga hinaplas sang espiritu nga mga Cristiano nga busa mga “anak sang Dios.” Si Jesus amo ang panganay nga Anak sang Dios. Busa, mga kauturan sila ni Cristo. Sila ang “mga ulipon sang aton Dios” nga ginsambit sa Bugna 7:​3, ang mga tawo nga ginpili gikan sa katawhan agod makig-ambit kay Cristo sa iya langitnon nga Ginharian.​—⁠Roma 8:​14-17.

 12. Ngaa importante gid ang paagi sang pagtratar sang mga tawo sa mga kauturan ni Jesus?

¹² Ang paagi sang pagpakig-angot sang iban nga mga tawo sa sining mga manunubli sang Ginharian importante gid. Ginatamod mo bala sila kaangay sang pagtamod ni Jesucristo kag ni Jehova sa ila? (Mateo 24:​45-47; 2 Tesalonica 2:13) Ang panimuot sang isa ka tawo sa sining mga hinaplas nagapabanaag sang iya panimuot kay Jesucristo mismo kag sa iya Amay, ang Soberano sa Uniberso.​—⁠Mateo 10:​40; 25:​34-46.

 13. Tubtob sa anong kasangkaron nahangpan sang mga Estudyante sa Biblia sang 1884 ang parabola tuhoy sa mga karnero kag mga kanding?

¹³ Sa guwa sang Agosto 1884, husto nga gintudlo sang Watch Tower nga ang “mga karnero” sa sini nga parabola amo ang mga nagalaum sa himpit nga kabuhi sa duta. Ginahangop man sadto nga ang parabola naaplikar sa tion sang paggahom ni Cristo gikan sa iya mahimayaon nga langitnon nga trono. Apang, wala pa nila sadto mahangpan sing maathag kon san-o niya pagasugdan ang pagpainpain nga hilikuton nga ginlaragway kag kon daw ano ini kalawig.

 14. Paano ang isa ka kombension sang 1923 nakabulig sa mga Estudyante sang Biblia nga mahangpan ang katumanan sang matagnaon nga parabola ni Jesus?

¹⁴ Walay sapayan, sang 1923, sa isa ka pamulongpulong sa kombension, gin-athag ni J. F. Rutherford, presidente sadto sang Watch Tower Society, ang tion sang katumanan sang parabola tuhoy sa mga karnero kag mga kanding. Ngaa? Sa bahin, bangod ginapakita sang parabola nga ang mga kauturan sang Hari​—⁠ang pila sa ila⁠—​yari pa sa duta. Sa tunga sang mga tawo, ang iya hinaplas sang espiritu nga mga sumulunod lamang ang matuod nga matawag subong iya mga kauturan. (Hebreo 2:​10-12) Indi sila magapabilin sa duta sa bug-os nga Milenyo, nga magahatag sing kahigayunan sa katawhan nga makahimo sing maayo sa ila suno sa mga paagi nga ginlaragway ni Jesus.​—⁠Bugna 20:⁠6.

 15. (a) Anong mga hitabo ang nakabulig sa mga Estudyante sang Biblia nga makilala sing husto ang mga karnero sa parabola ni Jesus? (b) Paano ginpakita sang mga karnero ang ebidensia sang ila pag-apresyar sa Ginharian?

¹⁵ Sa sadto nga pamulongpulong sang 1923, ginhimo ang panikasog nga ipakilala yadtong nahisanto sa paglaragway sang Ginuo sa mga karnero kag mga kanding, apang may iban pa nga butang nga dapat mahangpan antes maathagan ang lubos nga importansia sang parabola. Sang masunod nga mga tinuig, progresibo nga ginpatalupangod ni Jehova ining importante nga mga detalye sa iya mga alagad. Naglakip ini sa maathag nga paghangop, sang 1927, nga “ang matutom kag mainandamon nga ulipon” amo ang bug-os nga hubon sang hinaplas sang espiritu nga mga Cristiano sa duta; nahangpan man, sang 1932, ang kinahanglanon nga makig-angot sing suod upod sa hinaplas nga mga alagad ni Jehova, subong sang ginhimo ni Jonadab kay Jehu. (Mateo 24:​45; 2 Hari 10:15) Sadto nga tion, pasad sa Bugna 22:​17, ining mga tulad-karnero espesipiko nga ginpalig-on nga makigbahin sa pagdala sang mensahe sang Ginharian sa iban. Ang ila pag-apresyar sa Mesianikong Ginharian magapahulag sa ila indi lamang sa pagpakita sing tawhanon nga kaluoy sa mga hinaplas sang Ginuo kundi sa paghalad sang ila kabuhi kay Jehova paagi kay Cristo kag makig-angot sing suod sa iya mga hinaplas, nagapakigbahin sing makugi sa hilikuton nga ila ginahimo. Ginahimo mo bala ina? Sa sadtong nagahimo sini, magasiling ang Hari: “Kari, kamo, mga ginapakamaayo sang akon Amay, panublia ang ginharian nga ginhanda sa inyo kutob pa sang pagpasad sang kalibutan.” Nagahulat sa ila ang dakung paglaum nga walay katapusan nga kabuhi sa kahimpitan sa dutan-on nga duog sang Ginharian.​—⁠Mateo 25:​34, 46.

Ang “Dakung Kadam-an”—Sa Diin Sila Nagapadulong?

 16. (a) Ano ang sayop nga pagtamod sang unang mga Estudyante sa Biblia tuhoy sa identidad sang dakung kadam-an sang Bugna 7:⁠9? (b) San-o kag sa anong sadsaran gintadlong ang ila pagtamod?

¹⁶ Nagapati anay ang mga alagad ni Jehova nga ang dakung kadam-an sang Bugna 7:​9, 10 tuhay sangsa iban nga mga karnero sang Juan 10:​16 kag sa mga karnero sang Mateo 25:⁠33. Bangod ginasiling sang Biblia nga “nagatindog sila sa atubangan sang trono,” ginhunahuna nga ini sila magakadto sa langit, indi sa mga trono, nga nagagahom subong kaupod nga manunubli ni Cristo, kundi sa ikaduha nga duog sa atubangan sang trono. Gintamod sila subong kubos katutom nga mga Cristiano, nga wala magpakita sang espiritu sang matuod nga pagsakripisyo sang kaugalingon. Sang 1935 gintadlong ang amo nga pagtamod.⁠b Ang pag-usisa sa Bugna 7:​9 sa bulig sang mga teksto subong sang Mateo 25:​31, 32 nagapaathag nga ang mga tawo diri sa duta mahimo nga mangin yara sa “atubangan sang trono.” Ginpadaku man nga ang Dios wala sing duha ka talaksan sang katutom. Ang tanan nga makatigayon sang iya kahamuot dapat maghupot sing integridad sa iya.​—⁠Mateo 22:​37, 38; Lucas 16:⁠10.

 17, 18. (a) Ano nga mga bagay ang gintunaan sang daku nga pag-uswag, kutob sang 1935, sa kadamuon sadtong nagapaabot sing kabuhi nga dayon sa duta? (b) Sa anong importante nga hilikuton nagapakigbahin sing makugi ang dakung kadam-an?

¹⁷ Sa sulod sang madamong tinuig ang katawhan ni Jehova nagpamulong tuhoy sa mga saad ni Jehova sa duta. Bangod sang ila ginlauman nga mahanabo sang 1920, ginpahibalo nila nga “Minilyon sa Karon nga Nagakabuhi ang Indi Na Mapatay.” Apang wala sing minilyon nga nagbaton sang mga aman sang Dios sa kabuhi sadto nga tion. Sa kalabanan nga nagbaton sang kamatuoran, gin-aman sang balaan nga espiritu ang paglaum sa langitnon nga kabuhi. Apang, ilabi na pagkatapos sang 1935, isa ka daku nga pagbag-o ang natabo. Indi buot silingon nga ginsikway sang The Watchtower ang paglaum sa kabuhi nga dayon sa duta. Sa sulod sang mga dekada ang mga alagad ni Jehova nagpamulong tuhoy sini kag nagpangita sa mga tawo nga nagahisanto sa paglaragway sang Biblia. Apang, sa sibu nga tion ni Jehova, gintuytuyan niya ang mga butang agod mapadayag ang mga katapo sang dakung kadam-an.

¹⁸ Ginapakita sang mga rekord nga sa sulod sang madamong tinuig ang kalabanan sang nagtambong sa Memoryal nagpakig-ambit sa mga emblema. Apang sa sulod sang 25 ka tuig pagkatapos sang 1935, ang tumalambong sa tuigan nga Memoryal sang kamatayon ni Cristo nagtimbuok sa kapin sa isa ka gatos ka pilo sa kadamuon sang mga nagaambit. Sin-o ining iban? Ang palaabuton nga mga katapo sang dakung kadam-an. Sing maathag, nag-abot na ang tion ni Jehova sa pagtipon kag paghanda sa ila sa paglampuwas sa nagahilapit nga dakung kapipit-an. Subong sang gintagna, “nagguwa sila gikan sa tanan nga pungsod kag mga tribo kag katawhan kag mga hambal.” (Bugna 7:9) Makugi sila nga nagapakigbahin sa hilikuton nga gintagna ni Jesus sang magsiling sia: “Ining maayong balita sang Ginharian ibantala sa bug-os napuy-an nga duta subong panaksi sa tanan nga kapungsuran; ugaling magaabot ang katapusan.”​—⁠Mateo 24:⁠14.

[Mga Footnote]

Ano ang Imo Komento?

◻ Ngaa talalupangdon gid ang palanan-awon sa Bugna kapitulo 7?

◻ Ngaa ang iban nga mga karnero sang Juan 10:​16 indi limitado sa mga Cristianong Gentil?

◻ Ano ang matuod sa sadtong nagahisanto sa paglaragway sang Biblia sa iban nga mga karnero?

◻ Paano ang parabola sang mga karnero kag mga kanding nagapadaku sing pagtahod sa awtoridad sang Ginharian?

◻ Ano ang nagapakita nga nag-abot na ang tion ni Jehova sa pagtipon sa dakung kadam-an sang Bugna 7:⁠9?