10. Paano ang madamong anghel kaupod ni Cristo samtang nagabulig sila sa hilikuton nga pagpainpain?

¹⁰ Apang indi sia isahanon, kay ang Mateo 25:31 nagasiling nga kaupod niya ang “tanan nga anghel.” Pila sila? Ang Bugna 5:11 nagasiling: “Nakita ko, kag nabatian ko ang tingog sang madamong anghel sa palibot sang trono [sang Dios] . . . kag ang kadamuon nila linaksa ka linaksa.” Ang isa ka laksa 10,000. Gani ang isa ka laksa pamuaron sa isa ka laksa mangin 10,000 pamuaron sa 10,000, nga may kabilogan nga 100 ka milyon nga anghel! Apang, “linaksa ka linaksa” nga mga anghel ang ginsambit sa Bugna nga nagaalagad sa Dios. Ginatos ka milyon ina, ayhan binilyon pa. Sa idalom sang pagtuytoy ni Cristo, ining espiritu nga mga tinuga nagabulig sa mga tiglawas sang Dios sa duta sa pagpain sa katawhan sa duha ka grupo, ang isa para sa “silot nga walay katapusan,” ang isa para sa “kabuhi nga walay katapusan.”—Mateo 25:46; tan-awa man ang Mateo 13:41, 42.

15. Pasad sa ano ang paghukom sa mga tawo karon?

¹⁵ Ang reaksion sang mga tawo sa maayong balita sang paggahom sang Ginharian amo ang sadsaran sa pagpat-od kon bala painon sila para sa “silot nga walay katapusan” ukon para sa “kabuhi nga walay katapusan” sa bag-ong kalibutan. Ang reaksion sang madamo kaanggid sa ginasiling sang 2 Cronica 36:15, 16: “Si Jehova . . . nagpadala sa ila paagi sa iya mga manugbalita, nga nagabugtaw kag nagapadala, bangod nga naluoy sia sa iya katawhan . . . Apang gin-uligyat nila ang mga manugbalita sang matuod nga Dios kag gintamay ang iya mga pulong, kag ginyubitan ang iya mga manalagna, tubtob nga nag-ibwal ang kasingkal ni Jehova.” Apang ang reaksion sang iban maayo kag ginaamligan sila ni Jehova. “Ang nagapamati sa akon [matuod nga kaalam], magapuyo sing malig-on kag magamalinong sa wala sing kahadlok sa malaut.”—Hulubaton 1:20, 33; Mateo 25:34-46.