Ang Katapusan sang Kaimulon Malapit Na

ANO ang buot silingon ni Jesus sang magsiling sia: “Kaupod ninyo pirme ang mga imol”? (Mateo 26:11) Buot bala niya silingon nga ang kaimulon magaluntad sa walay katapusan, nga wala sing solusyon?

Nahibaluan ni Jesus nga tubtob nagaluntad ang sistema sang paggahom sang tawo karon, ang kaimulon indi madula. Nahibaluan niya nga indi ini madula sing dayon sang bisan ano nga porma sang panguluhan sang tawo ukon sang bisan anong ekonomiko ukon sosyal nga sistema. Kag ginapamatud-an ini sang rekord sang maragtas.

Sa sulod sang linibo ka tuig sang maragtas sang tawo, natilawan na ang tanan nga sahi sang panguluhan kag ang tanan nga sahi sang ekonomiko kag sosyal nga sistema, apang yara gihapon ang kaimulon. Sa pagkamatuod, walay sapayan sang mga pag-uswag sa siensia, industriya, kag medisina, ang indi masuay nga katunayan amo nga sa bug-os nga kalibutan padayon nga nagadugang ang mga tawo nga nasiod sa kaimulon.

Nahibaluan gid ni Jesus ang madamo nga butang nga nagatuga sing kaimulon, subong sang gutom, tigpalamangag, pagpanakop sang mga kaaway, malain nga gobierno, sayop nga pagdumala sa ekonomiya, pagpamigos sang mga manggaranon kag mga gamhanan sa mga imol kag mga maluya, mga aksidente kag balatian, kag ang kamatayon sang mga bana nga nagbiya sa imol nga mga ilo kag mga balo. Dugang pa, nahibaluan niya nga ang mga tawo sarang makadala sing kaimulon sa ila kaugalingon kag sa ila mga pamilya paagi sa malain nga mga pamatasan subong sang katamaron, pagpahubog, pagsugal, kag pagkagiyan sa droga.

Gani sang magsiling si Jesus nga “kaupod ninyo pirme ang mga imol,” ginapahangop niya nga indi masarangan sang bisan ano nga ahensia sining kalibutan nga dulaon ang kaimulon. Buot niya silingon nga samtang nagaluntad pa ang sistema sang paggahom sang tawo karon, may yara gid imol nga mga tawo.

Walay sapayan nga madugay na ining problema sa kaimulon, indi kita dapat maghinakop nga si Jesus ukon ang iya langitnon nga Amay wala maluoy sa mga imol. Indi man kita maghinakop gikan sa mga pinamulong ni Jesus nga ang kaimulon indi gid madula. Maathag ini gikan sa ginasiling sang Biblia tuhoy sini nga butang.

Ang Kaimulon kag ang Mosaikong Kasuguan

Halimbawa, binagbinaga ang Kasuguan nga ginhatag sang Dios sa dumaan nga pungsod sang Israel paagi kay Moises. Ang isa ka mando sang Kasuguan nagapatuman nga ang tagsa ka Israelinhon nga pamilya hatagan sing duta nga palanublion sa Canaan. (Deuteronomio 11:​8-15; 19:14) Ang wala malakip sa sini amo lamang ang mga Levinhon, nga wala ginhatagan sing bahin. Sa baylo, bangod sang ila pinasahi nga hilikuton sa templo, ginsakdag sila paagi sa pagbaton sing ikanapulo nga bahin sang patubas sang duta.​—⁠Numeros 18:​20, 21, 24.

Dugang pa, ang mga kasuguan tuhoy sa pagpanubli sa idalom sang Mosaikong Kasuguan nagapasalig nga ang duta padayon nga panag-iyahan sang pamilya ukon sang tribo nga ginhatagan sini. (Numeros 27:​8-11) Bisan kon ginbaligya sang isa ka tawo ang iya duta, temporaryo lamang ini nga mapanag-iyahan sang bag-o nga tag-iya. Sa ulihi ang duta igabalik sa pamilya sang isa nga nagbaligya sini.

Para sa mga nag-imol bangod sa pila ka rason, subong sang sayop nga pagdumala sa ila duta ukon paggarnatsa sa ila mga kinitaan, ang Kasuguan nagapatuman sing kinamatarong sa pagpanaghaw sing pagkaon sa mga kaumhan, mga katamnan, kag mga ubasan sang iban. (Levitico 23:22) Dugang pa, ang imol nga Israelinhon sarang makahulam sing kuwarta nga wala sing saka. Sa pagkamatuod, ang espiritu sang kaalwan ginalauman anay nga ipakita sa mga imol.​—⁠Exodo 22:⁠25.

Si Jesus Nag-ulikid sa mga Imol

Mga siniglo sang ulihi sang magkari si Jesus sa duta, padayon niya nga ginpakita ang maalwan nga espiritu nga natun-an niya sa iya Amay, si Jehova. Personal nga ginpakitaan ni Jesus sing interes ang mga imol sa materyal. Sila sang iya mga disipulo may pundo agod ihatag sa imol nga mga Israelinhon​—⁠Juan 12:​5-8.

Sang mapatay si Jesus, ang mga Cristiano nagpakita sing pareho man nga pag-ulikid sa mga imol sang ginbuligan nila sa materyal ilabi na ang mas imol nga mga kauturan nila sa espirituwal. (Roma 15:26) Ang matuod nga mga Cristiano karon nagapakita sing pareho mahigugmaon nga pag-ulikid sa isa kag isa.

Sa pagkamatuod, samtang nagapabutyag sing kaawa sa mga biktima sang mabudlay nga mga kahimtangan, ginabadlong man sang Biblia yadtong, ‘nagakaon sang ila kaugalingon nga unod’ bangod sa katamad. (Manugwali 4:​1, 5) Si apostol Pablo nagsulat: “Kon ang bisan sin-o nga indi magtrabaho, indi man sia pagpakan-on.” (2 Tesalonica 3:⁠10) Sing kaanggid, yadtong nagagarnatsa sang ila kuwarta sa mga bisyo subong sang pagkagiyan sa droga, tabako, ukon alkohol mahimo nga mag-imol. Resulta ini sang ila malain nga mga buhat; sa pagkamatuod ‘ginaani nila ang ila ginsab-ug.’​—⁠Galacia 6:⁠7.

Kalig-unan Karon

Ginapakita sang Biblia nga interesado gid ang Dios sa kahimtangan sadtong nagatinguha nga himuon ang iya kabubut-on. Halimbawa, sa Salmo 37:​25, si David nagsiling: “Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabay-an, ukon ang iya kaliwat nga nagapakilimos sing tinapay.” Yadtong nagahimo sing matarong wala ginapangakuan sing manggad, apang ginapakita diri nga pat-uron sang Dios nga may bastante sila nga materyal nga mga kinahanglanon agod makalampuwas. Kag ang bersikulo 28 sang sina man nga salmo nagasiling: “Si Jehova nagahigugma sing katarungan, kag indi niya pagbiyaan ang mga mainunungon sa iya.”

Kapin pa sangsa pag-ulikid ang ginpakita ni Jesus sa mga imol paagi sa pagbulig sa ila sa materyal sang yari pa sia sa duta. Ginpasalig niya sila nga kon ginatinguhaan nila nga himuon ang kabubut-on sang Dios, pat-uron sang Dios nga iaman bisan ang ila lamang panguna nga mga kinahanglanon, sa karon kag sa palaabuton. Si Jesus nagsiling sing masunod:

“Tan-awa ninyo sing maayo ang mga pispis sa kalangitan, bangod wala sila nagasab-ug sing binhi ukon nagaani ukon nagatipon sa mga tambobo; apang ginapakaon sila sang inyo langitnon nga Amay. Indi bala nga mas importante kamo sangsa ila? . . . Subong man, tuhoy sa panapton, ngaa nagakabalaka kamo? Magtuon kamo sing leksion gikan sa mga liryo sa latagon, kon paano sila nagatubo; wala sila nagapangabudlay, ukon nagapamurong; apang ginasiling ko sa inyo nga bisan si Solomon sa bug-os niya nga kahimayaan wala mapapanaptan subong sang isa sa sini. Karon, kon ginpapanaptan sang Dios ang mga tanom sa latagon, nga yari karon kag buwas idap-ong sa dapog, indi bala nga papanaptan niya kamo sing labi, kamo nga may diutay sing pagtuo? Gani dili kamo magkabalaka kag magsiling, ‘Ano ang aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ . . . Kay ang inyo Amay nga langitnon nakahibalo nga kinahanglan ninyo ining tanan nga butang.”​—⁠Mateo 6:⁠26-32.

Si Jesus naghinakop paagi sa pagsugo sa iya mga sumulunod: “Padayon, nian, nga pangitaa anay ang Ginharian [sang Dios] kag ang iya pagkamatarong, kag ining tanan iban pa nga butang idugang sa inyo.” (Mateo 6:⁠33) Daw ano nga pagpalig-on ini sa mga imol apang nagatinguha nga himuon ang kabubut-on sang Dios! Talupangda man, nga ginpakita ni Jesus nga ang Ginharian sang Dios amo dapat ang pinakaimportante nga butang sa kabuhi sang iya mga sumulunod. Nahibaluan ni Jesus nga kon ang langitnon nga Ginharian sang Dios magagahom na sing bug-os sa bilog nga duta, sa amo​—⁠kag sa amo lamang nga tion​—⁠madula ang kaimulon.

Indi Naton Kaupod Sing Dayon

Sa amo, si Jesus naghatag sing tumalagsahon nga paglaum para sa palaabuton. Gani sang magsiling sia “kaupod ninyo pirme ang mga imol,” ginapatuhuyan niya ang kabuhi sa idalom sang sistema sang paggahom sang tawo karon. Wala niya ginapatuhuyan ang kabuhi sa palaabuton sa idalom sang paggahom sang langitnon nga Ginharian sang Dios. Ang Biblia nagatagna: “Ang mga imol indi malimtan sing dayon, ukon madula sing dayon ang ginapaabot nga paglaum sang mga mahagop.” (Salmo 9:18) Kag subong Hari sang Ginharian sang Dios, indi pagtugutan ni Cristo Jesus ang bisan sin-o nga luyag maghingalit kag magpigos sa iban.

Ginhimo ni Jesus ang paggahom sang langitnon nga Ginharian sang Dios subong ang panguna nga tema sang iya panudlo. (Mateo 4:17) Sa idalom sang paggahom sang Ginharian, ang mga kahimtangan sa duta magapakita, ukon magapabanaag sang mga kahimtangan sa langit. Amo sina kon ngaa gintudluan niya ang iya mga sumulunod nga magpangamuyo sa Dios: “Magkari ang imo ginharian. Matuman ang imo kabubut-on kon paano sa langit, amo man sa duta.”​—⁠Mateo 6:⁠10.

Paano ina matabo? Katuyuan sang Dios nga dulaon ang bug-os nga sistema sang paggahom sang tawo karon gikan sa duta kag buslan ini sang paggahom sang iya langitnon nga Ginharian. Ang tagna sa Daniel 2:​44 nagasiling: “Sa mga adlaw sadto nga mga hari [nga nagagahom karon] ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan [wala na sing tawhanon nga paggahom]. Dugmukon sini kag papason ini tanan nga ginharian [karon], kag magapadayon ini tubtob sa walay katubtuban.”

Nian, sa bag-ong kalibutan sa idalom sang paggahom sang Ginharian sang Dios, ang bug-os nga duta mangin isa ka mabuganaon nga paraiso, nga wala sing bisan diutay nga agi sang kaimulon. Talupangda ang pila ka tagna sa Biblia tuhoy sa mga kahimtangan nga magaluntad sa sina nga tion:

“Si Jehova sang mga kasuldadusan magahimo sa tanan nga katawhan . . . sing piesta sang alak sa mga labod, sang matambok nga mga kalan-on nga puno sing utok sang tul-an.” (Isaias 25:⁠6) “May bugana nga uyas sa duta; sa putukputukan sang kabukiran magahapayhapay ini.” (Salmo 72:⁠16) “May mga ulan sang pagpakamaayo. Kag ang kahoy sang latagon magapamunga, kag ang duta magapatubas, kag mangin malig-on sila sa ila duta.” (Ezequiel 34:​26, 27) “Ang duta magahatag sang iya patubas; ang Dios, ang aton Dios, magapakamaayo sa aton.” (Salmo 67:6) “Ang kahanayakan kag ang duta nga kigas magakasadya, kag ang desyerto magakalipay kag magapamulak subong sang rosa.”​—⁠Isaias 35:⁠1.

Dugang pa, ang Miqueas 4:4 nagasaad: “Magalingkod sila, ang tagsa ka tawo sa idalom sang iya ubas kag sa idalom sang iya higuerra, kag wala na sing magapahadlok sa ila.” Ang tanan makatigayon sang ila kaugalingon nga mga puluy-an: “Magapatindog sila sing mga balay kag puy-an ini . . . Indi sila magpatindog kag iban ang magapuyo.” (Isaias 65:​21, 22) Indi katingalahan si Jesus nagasaad sa mga nagapati sa iya mga panudlo: “Mangin kaupod ko [kamo] sa Paraiso”!​—⁠Lucas 23:⁠43.

Huo, maathag nga ginatudlo sang inspirado nga Pulong sang Dios nga madula sing bug-os ang kaimulon. Kag ina nga tion malapit na, kay ginapakita sang mga tagna sa Biblia nga ining kalibutan yara na sa iya “katapusan nga mga adlaw,” nga nagaatubang sing “makahalanguyos nga mga tion nga mabudlay pakigbagayan.” (2 Timoteo 3:​1-5, 13) Sa indi madugay ang sistema sang mga butang karon madula sing dayon kag amo man ang kaimulon​—⁠indi paagi sa mga panikasog sang tawo kundi paagi sa pagpasilabot sang Dios. Ang Hari nga si Jesucristo ‘magaluwas sa imol nga nagapangayo sing bulig, subong man sa nasit-an kag kay bisan sin-o nga wala sing manugtabang. Magakaawa sia sa kubos kag sa imol, kag luwason niya ang mga kalag sang mga imol.’​—⁠Salmo 72:​12, 13.

[Piktyur sa pahina 9]

Sa bag-o nga kalibutan sang Dios, may maayo nga pamalay kag bugana nga pagkaon para sa tanan

[Piktyur sa pahina 10]

Sa bag-ong kalibutan, wala na gid sing gutom nga kabataan