Ano ang Ginasiling sang Kasulatan Nahanungod sa “Pagka-Dios ni Cristo”?

SI Jesucristo may daku nga relihiosong epekto sa katawhan. Ini bangod minilyon ang nagaangkon nga mga sumulunod niya. Apang, indi tanan sa ila nagaugyon nahanungod sa pagkakilala sa iya.

Ang iban nga nagasiling nga ginabaton nila ang mga panudlo ni Jesus nagatamod sa iya subong ang Anak sang Dios, indi ang Manunuga mismo. Ang iban nagapati sa “pagka-Dios ni Cristo” kag nagahunahuna nga amo gid sia ang Dios. Nagapati sila nga si Jesus pirme nagaluntad kag labaw sia sa tawo sang yari sia diri sa duta. Husto bala sila nahanungod sini? Ano ang ginasiling sang Kasulatan?

Ang Wala Pa Nangin Tawo nga Pagluntad ni Jesus

Ginpamatud-an ni Jesus nga may yara sia wala pa nangin tawo nga pagluntad. Nagsiling sia: “Walay nakasaka sa langit kundi ang nanaug gikan sa langit, ang Anak sang tawo.” (Juan 3:13) Nagsiling man si Jesus: “Ako ang buhi nga tinapay nga nagkari gikan sa langit; kon bisan sin-o ang magkaon sining tinapay, magakabuhi sia sing dayon; kag ang tinapay nga akon ihatag tungod sa kabuhi sang kalibutan amo ang akon unod.”—Juan 6:51.

Nga si Jesus buhi antes sia nagkari sa duta maathag gikan sa iya pinamulong: “Sa wala pa matawo si Abraham, amo na ako.” (Juan 8:58) Si Abraham nagkabuhi kutob sang 2018 tubtob 1843 B.C.E., samtang ang tawhanon nga pagkabuhi ni Jesus nagdalagan halin sang 2 B.C.E. tubtob 33 C.E. Antes gid lang sang iya kamatayon, si Jesus nangamuyo: “Amay, himayaa ako kaupod nimo sang himaya nga naagom ko sadto anay kaupod nimo sa wala pa ang kalibutan.”—Juan 17:5.

Ang mga sumulunod ni Jesus naghatag sing kaanggid nga pamatuod. Si apostol Juan nagsulat: “Sa ginsuguran amo ang Pulong, kag ang Pulong kaupod sa Dios, kag ang Pulong dios. Ang tanan nga butang ginhimo niya, kag sa wala sia walay bisan ano nga nahimo sang ginhimo. . . . Kag ang Pulong nangin unod kag nagpuyo sa tunga naton, kag nakita naton ang iya himaya, ang himaya nga iya sang bugtong nga anak sang amay; kag puno sia sang dibagay nga kaluoy kag kamatuoran.” (Juan 1:1, 3, 14) Huo, “ang Pulong nangin unod” subong ang tawo nga si Jesucristo.

Nagapatuhoy sa wala pa nangin tawo nga pagluntad ni Jesus, si apostol Pablo nagsulat: “Hupti ninyo ini nga hunahuna, nga yara man kay Cristo Jesus, nga, bisan sa dagway sia sang Dios, wala niya pagbilanga ang pagpakigtupong sa Dios nga butang nga pag-agawon. Kundi, gin-ula niya ang iya kaugalingon kag nangin dagway sang ulipon kag natawo sa kaanggid sang mga tawo.” (Filipos 2:5-7) Gintawag ni Pablo si Jesus nga “ang panganay sang tanan nga tinuga; paagi sa iya ang tanan pa nga butang gintuga.”—Colosas 1:13-16.

Indi Dios sa Duta

Ginaathag sang Kasulatan nga si Jesus tawo lamang kutob sang natawo sia tubtob sang napatay sia. Wala nagsiling si Juan nga ang Pulong napanaptan lamang sing unod. Sia “nangin unod” kag indi bahin unod kag bahin Dios. Kon si Jesus nangin tawo kag dios sa amo man nga tion, indi mahimo isiling nga ‘ginhimo [sia] nga kubos sa mga anghel.’—Hebreo 2:9; Salmo 8:4, 5.

Kon si Jesus nangin Dios kag tawo sang yari sa duta, ngaa sulitsulit sia nga nangamuyo kay Jehova? Si Pablo nagsulat: “Sa mga adlaw sang iya pagkaunod si Cristo nagpangamuyo kag nag-ampo nga may mabaskog nga mga pagsinggit kag mga luha sa Iya nga makaluwas sa iya sa kamatayon, kag ginpamatian sia tungod sang iya kahadlok nga diosnon.”—Hebreo 5:7.

Nga si Jesus indi isa ka espiritu sing bahin sang yari sa duta ginpamatud-an sang pinamulong ni Pedro nga si Cristo “ginpatay sa unod apang ginbuhi sa espiritu.” (1 Pedro 3:18) Bangod lamang nga si Jesus tawo gid nga naeksperiensiahan niya ang naeksperiensiahan sang dihimpit nga mga tawo kag busa mangin mahinuklugon nga mataas nga saserdote. Si Pablo nagsulat: “Kay wala kita sing isa ka pinakamataas nga saserdote nga indi matandog sang aton mga kaluyahon, kundi isa nga natilawan sa tanan nga bagay kaangay naton, apang wala nagapakasala.”—Hebreo 4:15.

Subong “Kordero sang Dios nga nagakuha sang sala sang kalibutan,” si Jesus “naghatag sang iya kaugalingon subong nga gawad tungod sa tanan.” (Juan 1:​29; 1 Timoteo 2:6) Sa sinang paagi, ginbakal ni Jesus kon ano gid ang nadula ni Adan​—⁠ang himpit, walay katapusan nga tawhanon nga kabuhi. Bangod ang katarungan sang Dios nagapatuman sang ‘kalag sa kalag,’ busa si Jesus dapat nga mangin kon ano anay si Adan—isa ka himpit nga tawo, indi Dios-tawo.—Deuteronomio 19:21; 1 Corinto 15:22.

Indi Paghatagi sing Sobra nga Kahulugan ang mga Teksto sa Biblia

Ang mga nagasiling nga si Jesus Dios-tawo nagagamit sing lainlain nga mga kasulatan sa panikasog nga pamatud-an nga miembro sia sang Trinidad sang Cristiandad, pareho sa Dios sa kahulugan, gahom, himaya, kag kadugayon. Apang kon usisaon naton sing maayo ining mga teksto, masapwan naton nga ang nagabais para sa “pagkadios ni Cristo” nagatamod sining mga bersikulo subong nagasiling sing kapin pa sa ginasiling gid sini.

Ang iban nagasiling nga ang mga teksto sa Biblia diin ang Dios nagagamit sing pronombre nga “naton” nagahimo sa wala pa nangin tawo nga si Jesus (ang Pulong) nga pareho kay Jehova. Apang ang paggamit sa sining pronombre wala nagakahulugan nga ang Dios nagapakighambal sa isa nga pareho niya. Sa baylo nagapakita ini nga sa tunga sang langitnon nga mga tinuga, ang isa may malapit nga kaangtanan sa Dios. Sa pagkamatuod, ang wala pa nangin tawo nga si Jesus amo ang suod nga kaupod sang Dios, ang Kabulig nga Manugpangabudlay, kag ang Humalambal.—Genesis 1:26; 11:7; Hulubaton 8:30, 31; Juan 1:3.

Ang mga sirkunstansia nga ginabuylog sa bawtismo ni Jesus wala nagapakita nga ang Dios, si Cristo, kag ang balaan nga espiritu palareho. Subong isa ka tawo, si Jesus nagpabawtismo bilang simbulo sang pagpresentar niya sang iya kaugalingon sa iya langitnon nga Amay. Sadto nga okasyon “nabuksan sa iya ang mga langit,” kag ang espiritu sang Dios nagkunsad, nagpanaug kay Jesus subong sang salampati. Subong man, “gikan sa langit,” ang tingog ni Jehova nabatian nga nagsiling: “Ini hinigugma kong Anak, nga sa iya nahamuot ako.”—Mateo 3:13-17.

Gani, nian, ano ang buot silingon ni Jesus sang nagsugo sia sa iya mga sumulunod nga magbawtismo sing mga disipulo “sa ngalan sang Amay kag sang Anak kag sang balaan nga espiritu”? (Mateo 28:19, 20) Indi buot silingon ni Jesus nga sia, ang iya Amay, kag ang balaan nga espiritu magkapareho. Sa baylo, ang mga ginbawtismuhan nagakilala kay Jehova subong ang Manughatag sang Kabuhi kag Labing Gamhanan nga Dios, nga sa iya gindedikar nila ang ila kabuhi. Ginabaton nila si Jesus subong ang Mesias kag ang isa nga paagi sa iya ang Dios nag-aman sing gawad para sa nagatuo nga katawhan. Kag nakahibalo sila nga ang balaan nga espiritu amo ang aktibo nga kusog sang Dios, nga sa sini dapat sila magpasakop. Apang, ang mga kandidato sa bawtismo wala nagatamod kay Jehova, kay Jesus, kag sa balaan nga espiritu subong isa ka dios sa Trinidad.

Apang indi bala nga ang mga milagro ni Jesus nagapamatuod nga isa sia ka Dios-tawo? Indi, kay si Moises, Elias, Eliseo, sanday apostol Pedro kag Pablo, kag ang iban pa naghimo sing mga milagro nga indi mga Dios-tawo. (Exodo 14:15-31; 1 Hari 18:18-40; 2 Hari 4:17-37; Binuhatan 9:36-42; 19:11, 12) Kaangay nila, si Jesus isa ka tawo nga naghimo sing mga milagro paagi sa ginhatag sang Dios nga gahom.—Lucas 11:14-19.

Si Isaias matagnaon nga nagpatuhoy kay Jesus nga Mesias subong ang “Gamhanan nga Dios.” (Isaias 9:6) Sa Isaias 10:21, ina man nga propeta nagsiling tuhoy kay Jehova subong “ang Gamhanan nga Dios.” Ginatinguhaan sang iban nga gamiton ining pagkaanggid sang pulong sa pagpamatuod nga si Jesus Dios. Apang dapat kita maghalong nahanungod sa paghatag sing sobra nga kahulugan sa sining mga bersikulo. Ang Hebreong ekspresyon nga ginbadbad “Gamhanan nga Dios” indi limitado kay Jehova subong sang ekspresyon nga “Dios nga Labing Gamhanan.” (Genesis 17:1) Matuod, may kinatuhayan sa ulot sang gamhanan kag labing gamhanan, nga wala sing superyor.

Suno sa Isaias 43:10, si Jehova nagsiling: “Una sa akon wala gid sing dios nga ginhuman, kag wala na gid sa ulihi nakon.” Apang inang mga pulong wala nagapamatuod nga si Jesus Dios. Ang punto amo nga si Jehova wala sing ginsundan, nga wala sing dios nga nagluntad una sa iya, kay sia dayon. Wala sing dios sunod kay Jehova bangod pirme sia nagaluntad kag wala sing mga tal-us subong ang Supremo nga Soberano. Apang, si Jehova naghimo sa iban nga sia mismo nagtawag nga mga dios, subong sang ginapakita sang Kasulatan paagi sa pagsiling nahanungod sa iban nga mga tawo: “Ako nagsiling, ‘Mga dios kamo, tanan kamo mga anak sang Labing Mataas. Walay sapayan mapatay kamo subong sang mga tawo; kag mapukan kaangay sang isa sang mga prinsipe.’” (Salmo 82:6,7) Sa kaanggid, ang Pulong isa ka dios nga gintuga ni Jehova, apang wala ina nagahimo kay Jesus nga pareho sa Labing Gamhanan nga Dios sa bisan anong tion.

Ang Matuod nga Posisyon ni Jesus

Ang mga nagasiling nga si Jehova nagpakatawo subong ang Dios-tawo dapat magtalupangod nga wala gid nagapanugda ang Biblia nga gintamod ni Jesus ang iya kaugalingon sa amo nga paagi. Sa baylo, dalayon sini nga ginapakita nga si Jesus pirme nga kubos sa iya Amay. Sang yari sa duta, wala gid nag-angkon si Jesus nga labaw pa sa Anak sang Dios. Dugang pa, si Cristo nagsiling: “Ang Amay daku pa sa akon.”—Juan 14:28.

Si Pablo naghatag sang kinatuhayan sa ulot ni Jehova kag ni Jesus sa pagsiling: “Sa aton may isa ka Dios ang Amay, nga sa iya nagikan ang tanan nga butang kag nga sa iya kita nagakabuhi kag isa ka Ginuo, si Jesucristo, nga paagi sa iya nangin amo ang tanan nga butang, kag paagi sa iya kita nagakabuhi.” (1 Corinto 8:6) Si Pablo nagsiling man: “Iya kamo ni Cristo; kag si Cristo iya sang Dios.” (1 Corinto 3:23) Sa pagkamatuod, subong nga ang mga Cristiano iya sang ila Agalon, nga si Jesucristo, sia man iya sang iya Ulo, si Jehova nga Dios.

Nagahatag sing kaanggid nga punto, si Pablo nagsulat: “Ang ulo sang tagsa ka tawo amo si Cristo; ang ulo sang babayi amo ang iya bana; kag ang ulo ni Cristo amo ang Dios.” (1 Corinto 11:3) Ining kaangtanan sa ulot sang Dios kag ni Cristo magapadayon, kay pagkatapos sang Isa ka Libo ka Tuig nga Paggahom ni Jesus, ‘itugyan niya ang ginharian sa iya Dios kag Amay’ kag “ang Anak man magapasakop sa iya nga nagpasakop sang tanan nga butang sa iya, agod nga ang Dios mangin tanan sa tanan.”—1 Corinto 15:24, 28; Bugna 20:6.

Pagtan-aw sa Iban nga mga Teksto

Nahanungod sa pagkatawo ni Jesus, si Mateo nagsulat: “Ini tanan nahanabo agod nga matuman ang ginpamulong ni Jehova paagi sa iya manalagna [sa Isaias 7:​14], nga nagasiling: ‘Yari karon! Ang isa ka ulay magapanamkon kag magaanak sing lalaki, kag tawgon ang iya ngalan Emanuel,’ nga kon sayuron, ‘Ang Dios Kaupod Naton.’ ” (Mateo 1:​22, 23) Si Jesus wala paghatagi sing personal nga ngalan nga Emanuel, kundi ang iya papel subong tawo nagtuman sang kahulugan sini. Ang presensia ni Jesus sa duta subong ang Mesianikong Binhi kag Manunubli sa trono ni David nagpamatuod sa mga sumilimba ni Jehova nga ang Dios kaupod nila, sa bahin nila, nagasakdag sa ila sa ila mga buluhaton.—Genesis 28:15; Exodo 3:11, 12; Josue 1:5, 9; Salmo 46:5-7; Jeremias 1:19.

Nagasugilanon sa ginbanhaw nga si Jesus, si apostol Tomas nagtu-aw: “Ginuo ko kag Dios ko!” (Juan 20:28) Ini kag ang iban nga kasaysayan “nasulat agod nga magtuo kamo nga si Jesus amo ang Cristo ang Anak sang Dios.” Kag si Tomas wala nagasupak kay Jesus, nga nagpadala sa Iya mga disipulo sang mensahe: “Makayab ako . . . sa akon Dios kag inyo Dios.” (Juan 20:17, 30, 31) Gani wala naghunahuna si Tomas nga si Jesus amo ang Labing Gamhanan nga Dios. Mahimo nga gintawag ni Tomas si Jesus nga “Dios ko” sa kahulugan sang pagka “dios” ni Cristo, bisan pa indi “ang lamang matuod nga Dios.” (Juan 1:1; 17:1-3) Ukon paagi sa pagsiling “Dios ko,” mahimo ginakilala ni Tomas si Jesus subong ang Humalambal kag Tiglawas sang Dios, subong nga gintawag sang iban ang anghel nga mensahero subong nga daw sia si Jehova.—Ipaanggid ang Genesis 18:1-5, 22-33; 31:11-13; 32:24-30; Hukom 2:1-5; 6:11-15; 13:20-22.

Suno sa Biblia, nian, si Jesus nagkabuhi anay antes nangin tawo subong ang Pulong. Sang yari sa duta, indi sia ang balaan nga Dios-tawo. Bug-os sia nga tawo, bisan pa nga himpit, kaangay kay Adan anay. Kutob sang ginbanhaw si Jesus, ginbayaw sia sa dimamalatyon nga espiritu nga pirme napaidalom sa Dios. Sing maathag, nian, ang Kasulatan wala nagasakdag sa ideya sang “pagka-Dios ni Cristo.”

[Kahon sa pahina 23]

Ginasimba Bala sang mga Anghel si Jesus?

ANG iban nga mga badbad sang Hebreo 1:6 nagasiling: “Pasimbaha sa iya [Jesus] ang tanan nga mga anghel sang Dios.” (King James Version; The Jerusalem Bible) Si apostol Pablo maathag nga nagbalikwat sang Septuagint, nga nagasiling sa Salmo 97:7: “Simbaha Sia [Dios] kamo tanan nga mga anghel Niya.”—C. Thomson.

Ang Griegong tinaga nga pro·sky·neʹo nga ginbadbad “simba” sa Hebreo 1:6 gingamit sa Salmo 97:7 sa Septuagint para sa Hebreong termino, sha·chahʹ, nga nagakahulugan sa “pagyaub.” Ginabaton ini nga buhat sang pagtahod para sa mga tawo. (Genesis 23:7; 1 Samuel 24:8; 2 Hari 2:15) Ukon maangot ini sa pagsimba sa matuod nga Dios ukon sa sayop nga ginpatuhoy sa butig nga mga dios.—Exodo 23:24; 24:1; 34:14; Deuteronomio 8:19.

Sa masunson ang pro·sky·neʹo nga ginhatag kay Jesus katumbas sa pagyaub sa mga hari kag sa iban. (Ipaanggid ang Mateo 2:2,8; 8:2; 9:18; 15:25; 20:20 sa 1 Samuel 25:23, 24; 2 Samuel 14:4-7; 1 Hari 1:16; 2 Hari 4:36, 37.) Sa masunson maathag nga ang pagyaub ginahimo kay Jesus indi subong Dios kundi subong “Anak sang Dios” ukon ang Mesianikong “Anak sang tawo.”—Mateo 14:32, 33; Lucas 24:50-52; Juan 9:35,38.

Ang Hebreo 1:6 nagapatuhoy sa posisyon ni Jesus ubos sa Dios. (Filipos 2:9-11) Ang iban nga mga badbad nagabadbad diri sang pro·sky·neʹo nga “paghatag sing . . . pagtahod” (The New English Bible), “pagyaub sa” (New World Translation), ukon “pagyaub sa atubangan” (An American Translation). Kon ginapakamaayo sang isa ang badbad nga “pagsimba,” ina nga pagsimba relatibo, kay si Jesus nagsiling kay Satanas: “Magsimba [dagway sang pro·sky·neʹo] ka kay Jehova nga imo Dios, kag sa iya lamang mag-alagad ka.”—Mateo 4:8-10.

Bisan pa ang Salmo 97:7, nga nagapamulong nahanungod sa pagsimba sa Dios, naaplikar kay Cristo sa Hebreo 1:6, ginpakita ni Pablo nga ang ginbanhaw nga si Jesus “nagapabanaag sang himaya sang Dios kag nagadala sang larawan gid sang iya kinaugali.” (Hebreo 1:1-3) Gani ang “pagsimba” nga ginahatag sang mga anghel sa Anak sang Dios relatibo kag ginhimo kay Jehova paagi sa iya.