“Ang Maayong Balita Kinahanglan Ibantala Anay”

“Subong man, ang maayong balita kinahanglan ibantala anay sa tanan nga kapungsuran.”—MARCOS 13:10.

 1. Ano ang isa ka butang nga nagahimo sa mga Saksi ni Jehova nga tuhay gikan sa tanan nga relihion sang Cristiandad, kag ngaa?

SA TANAN nga nagapangangkon nga Cristiano, mga Saksi ni Jehova lamang ang nagatamod sing serioso sa pagbantala sing maayong balita. Sila lamang ang grupo nga sa diin ang tagsa ka katapo nagabatyag sing personal nga obligasyon sa pagduaw sa iya isigkatawo sing regular agod hambalon sia nahanungod sa mga katuyuan sang Dios. Ngaa subong sini? Bangod ang tagsa ka Saksi nagabatyag nga, subong isa ka Cristiano, dapat sia mangin sumulunod ni Cristo. (1 Pedro 2:21) Ano ang ginapahangop sini?

 2. Paano ginatamod sang madamo nga tawo si Jesucristo, apang ano anay ang iya nagapanguna nga hilikuton sa duta?

² Sa hunahuna sang madamo, si Jesucristo isa lamang ka tawo nga naghimo sing maayong mga buhat. Gin-ayo niya ang mga may balatian, ginpakaon niya ang mga gutom, kag nagpakita sia sing gugma kag kaluoy sa mga nagakinahanglan. Apang kapin pa ang ginhimo ni Jesus. Una sa tanan sia isa ka makugi nga manugbantala sing maayong balita sang Ginharian sang Dios. Pila ka bulan sa tapos sang iya bawtismo sa suba Jordan, si Jesus nagsugod sa pagbantala sa publiko: “Hinulsol kamo, kay ang ginharian sang langit malapit na.” (Mateo 4:17) Ang rekord ni Marcos nagasiling: “Nag-abot si Jesus sa Galilea, nga nagawali sing maayong balita sang Dios kag nagasiling: ‘Ang gintalana nga tion natuman na, kag ang ginharian sang Dios malapit na. Hinulsol kamo, kag magtuo sa maayong balita.’”—Marcos 1:14, 15.

 3, 4. (a) Bisan pa gin-ayo ni Jesus ang tanan nga sahi sang balatian, ano ang iya ginpadaku sa iya ministeryo? (b) Ngaa ginpadala si Jesus? (c) Sa ano ginpaanggid ni Jesus ang iya pagbantala nga hilikuton, kag ano ang ginsugo niya sa iya mga disipulo nga himuon nila?

³ Gintawag ni Jesus sanday Pedro, Andres, Santiago, kag Juan nga magsunod sa iya, kag aton mabasa: “Kag naglibot sia sa bug-os nga Galilea, nga nagapanudlo sa mga sinagoga nila kag nagawali sing maayong balita sang ginharian kag nagapang-ayo sang tanan nga balatian kag sang tanan nga masakit sa katawhan.” Sang ginhawiran sia sang kadam-an sa Galilea, sia nagsiling: “Kinahanglan ako magwali sing maayong balita sang ginharian sang Dios sa iban nga mga siudad man, kay sa sining katuyuan ginpadala ako.” Nian nagbantala sia sa mga sinagoga sang Judea.—Mateo 4:18-23; Lucas 4:43, 44.

⁴ Pagbalik ni Jesus sa Galilea, “naglibot sia sa mga siudad kag mga minuro, nga nagawali kag nagadala sing maayong balita sang ginharian sang Dios.” (Lucas 8:1) Ginpaanggid niya ang iya pagbantala nga hilikuton sa pag-ani kag nagsiling: “Ang alanyon bugana, apang pila lamang ang mga mangangani. Busa, pangamuyo kamo sa Agalon sang alanyon nga magpadala sia sing mga mangangani sa iya alanyon.” (Mateo 9:35-38) Bisan pa wala sia ginpapahuway sang kadam-an, “ginbaton niya sila kag nagpamulong sa ila sang ginharian sang Dios, kag ginpang-ayo niya ang mga may kinahanglan nga ayuhon.”—Lucas 9:11.

 5. Sang ginpadala ni Jesus ang iya mga apostoles kag iban pa nga mga disipulo sa ministeryo, ano nga mga instruksion may kaangtanan sa ila ministeryo ang ginhatag ni Jesus sa iya mga sumulunod?

⁵ Matuod, ginpang-ayo ni Jesus ang mga may balatian kag kon kaisa ginpakaon niya ang mga gingutom. Apang labaw sa tanan, nangin masako sia sa pagsugid sa katawhan nahanungod sa Ginharian sang Dios. Kag luyag niya nga amo man ang himuon sang iya mga sumulunod. Sa tapos mahanas ang iya mga apostoles, ginpadala niya sila sing tagduhaduha agod magbantala, nga nagasiling: “Kag wali sa nagakadto kamo, nga nagasiling, ‘Ang ginharian sang langit malapit na.’” (Mateo 10:7) Si Lucas nagsiling: “Ginpadala niya sila sa pagwali sang ginharian sang Dios kag sa pag-ayo sa mga masakiton.” (Lucas 9:2) Sa 70 ka disipulo, nagsugo man si Jesus nga ‘ayuhon ang mga masakiton kag iwali nga malapit na ang ginharian sang Dios.’—Lucas 10:9.

 6. Sa wala pa magkayab sa langit, anong mga instruksion ang ginhatag ni Jesus sa iya mga sumulunod nahanungod sa ila ministeryo?

⁶ Sa wala pa magkayab sa langit, ginsugo ni Jesus ang iya mga sumulunod nga padayunon ang pagbantala nga hilikuton kag pasangkaron ini. Ginsugo niya sila: “Busa lakat kamo kag himuon nga mga disipulo ang tanan nga kapungsuran . . . nagapanudlo sa ila sa pagtuman sang tanan nga ginsugo ko sa inyo.” (Mateo 28:19, 20) Dugang pa, sia nagsiling: “Makabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Sa amo, gin-una ni Jesus kag sang iya mga apostoles ang pagwali sing maayong balita sang Ginharian sang Dios.

Ang Ginharian Dapat Ibantala sa Aton Tion

 7. Ano ang ginsiling ni Jesus nahanungod sa pagbantala nga hilikuton nga himuon sa “katapusan sang sistema sang mga butang”?

⁷ Sa iya tagna nahanungod sa mga butang nga matabo sa “katapusan sang sistema sang mga butang,” si Jesus nagsiling: “Kag ibantala ining maayong balita sang ginharian sa bug-os nga kalibutan subong panaksi sa tanan nga kapungsuran; kag ugaling magaabot ang katapusan.” (Mateo 24:3, 14) Ukon, suno sa Marcos 13:10: “Ang maayong balita kinahanglan ibantala anay sa tanan nga kapungsuran.”—Tan-awa man ang Bugna 14:6, 7.

 8. (a) Ano ang ginlakip sang maayong balita sang panahon sang mga apostoles? (b) Ano ang ginalakip sang mensahe sang maayong balita karon?

⁸ Sa “katapusan nga mga adlaw,” ang maayong balita sang Ginharian nagadalahig sing kapin sang sa yari pa si Jesus sa duta. Nagwali anay si Jesus nga ang Ginharian malapit na, ginapatalupangod ang kamatuoran nga sia yara sa tunga sang katawhan subong ang Mesias kag Hari. (2 Timoteo 3:1; Mateo 4:17; Lucas 17:21) Ang maayong balita nga ginwali anay sang unang mga Cristiano naglakip sang pagkabanhaw kag pagkayab ni Jesus sa langit, kag ginpalig-on sini ang mga mahagop nga magtuo sa nagapakari nga Ginharian. (Binuhatan 2:22-24, 32; 3:19-21; 17:2, 3; 26:23; 28:23, 31) Karon nga nalab-ot na naton ang “katapusan sang sistema sang mga butang,” ang pagwali sa maayong balita sang Ginharian nagalakip sa talalupangdon nga mensahe nga ang Ginharian natukod na sa langit.—Bugna 11:15-18; 12:10.

Sin-o ang Magabantala sa Maayong Balita?

 9. (a) Paano nagapangatarungan ang iban nga ang pagbantala sing maayong balita indi obligado para sa tanan nga Cristiano karon? (b) Sin-o anay ang gingamit ni Jehova sa pagbantala sang iya pulong, kag ano ang kahulugan sini para sa aton karon?

⁹ Sin-o, sa karon, ang dapat magpakigbahin sa pagbantala nga hilikuton? Sing maathag, ginabatyag sang Cristiandad nga indi ini obligasyon sang tanan, kag matuod nga sang ginsiling ni Jesus nga ang maayong balita dapat ibantala, wala niya ginsambit sing ispisipiko kon sin-o ang magabuhat sini. Apang, sin-o pa ang gamiton ni Jehova para sa sina nga hilikuton kundi amo sila ang nagatuo sa iya Pulong kag nagaaplikar sini sa ila kabuhi? Sang namat-od si Jehova sang adlaw ni Noe nga paandaman ang malaut nga kalibutan sang katawhan sang nagapakari sadto nga kalaglagan, gingamit niya ang tawo nga “naglakat upod sa matuod nga Dios.” (Genesis 6:9, 13, 14; 2 Pedro 2:5) Sang luyag niya idul-ong ang matagnaon nga mga mensahe sa Israel, ginpadala niya ang ‘iya mga alagad, ang mga manalagna.’ (Jeremias 7:25; Amos 3:7, 8) Ang nakadedikar nga pungsod sang Israel isa ka pungsod sang iya mga saksi. (Exodo 19:5, 6; Isaias 43:10-12) Huo, ginagamit ni Jehova ang iya nakadedikar nga mga alagad subong iya mga saksi.

10. Paano makita gikan sa mga pulong sang Mateo 28:19, 20 nga ang sugo sa paghimo sing mga disipulo naaplikar sa tanan nga mga Cristiano?

¹⁰ Ang iban nagsiling nga ang sugo sa paghimo sing mga disipulo, sa Mateo 28:19, 20, ginhatag lamang sa mga apostoles kag busa wala naaplikar sa mga Cristiano sa kabilugan. Apang talupangda kon ano ang ginsiling ni Jesus: “Busa lakat kamo kag himuon nga mga disipulo ang katawhan sang tanan nga kapungsuran . . . nagapanudlo sa ila sa pagtuman sang tanan nga ginsugo ko sa inyo.” Ginsugo ang mga sumulunod ni Jesus nga tudluan ang bag-ong mga disipulo sa pagtuman sang tanan nga butang nga ginsugo ni Jesus. Kag isa sang mga butang nga ginsugo niya amo ang ‘maglakat kag maghimo sing mga disipulo.’ Sa pagkamatuod, ang tanan sang bag-o nga mga disipulo dapat tudluan sa pagtuman man sining partikular nga sugo.

11. (a) Anong obligasyon ang nahamtang sa Cristianong kongregasyon sang unang siglo? (b) Ano ang kinahanglanon agod maluwas ang isa, kag ano ang ginalakip sini?

¹¹ Ang Cristianong kongregasyon sang unang siglo gintawag nga ‘pinasahi nga katawhan sang Dios agod nga ibantala nila ang gamhanan nga mga buhat sang isa nga nagtawag sa ila gikan sa kadudulman pakadto sa iya kalatingalahan nga kapawa.’ (1 Pedro 2:9) Ang mga katapo sini makugi nga nagpanaksi sa Ginharian sang Dios. (Binuhatan 8:4, 12) Ang tanan nga “mga balaan,” hinaplas nga mga Cristiano, sa Roma ginsugo nga “sa baba ang pagtu-ad ginahimo nga sa kaluwasan” kag nga “ang bisan sin-o nga magtawag sa ngalan ni Jehova maluwas.” (Roma 1:7; 10:9, 10, 13) Ining pagtu-ad sa publiko para sa kaluwasan, nga ginahimo sa tion sang pagpabawtismo sang isa, nagalakip man sa pagbantala sa publiko sing maayong balita sang Ginharian ni Jehova.

12, 13. (a) Ano ang “dayag nga pagtu-ad sang aton paglaum” nga ginsambit sa Hebreo 10:23? (b) Paano ginapakita sang Salmo 96 ang pagkinahanglan sa dayag nga pagbantala sa guwa sang kongregasyon, kag paano ini ginasakdag sang Bugna 7:9, 10?

¹² Si apostol Pablo nagsulat sa Hebreong mga Cristiano: “Lig-unon ta ang dayag nga pagtu-ad sang aton paglaum nga indi mationg, kay matutom sia nga nagsaad.” (Hebreo 10:23) Ining dayag nga pagtu-ad wala nalimitehan sa mga miting sang kongregasyon. (Salmo 40:9, 10) Sa Salmo 96:2, 3, 10 maathag nga makakita kita sing matagnaon nga sugo nga magbantala sa guwa sang kongregasyon, sa mga pungsod, sa sining mga pulong: “Sa adlaw-adlaw isugid ang iya maayong balita sang kaluwasan. Ipahayag ang iya himaya sa tunga sang mga pungsod, ang iya makatilingala nga binuhatan sa tanan nga katawhan. Isiling sa mga pungsod: ‘Si Jehova nagahari.’” Sa pagkamatuod, sa Mateo 28:19, 20 kag Binuhatan 1:8, ginsugo ni Jesus ang mga Cristiano nga magbantala sa mga pungsod.

¹³ Ining pagbantala sa publiko ginpatuhuyan sa dugang pa nga mga pulong ni Pablo sa hinaplas nga Hebreong mga Cristiano: “Paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.” (Hebreo 13:15) Sa tolon-an sang Bugna, ang “dakung kadam-an,” nga gintipon gikan sa tanan nga pungsod, nakita man nga nagasinggit sa mabaskog nga tingog: “Ang kaluwasan utang namon sa Dios, nga nagalingkod sa trono, kag sa Kordero.” (Bugna 7:9, 10) Sa amo, sa sining tion sang katapusan sang sistema sang mga butang, ang pagbantala sing maayong balita ginahimo sang nakadedikar nga mga Saksi ni Jehova, ang nagkalabilin sang espirituwal nga kauturan ni Cristo kag ang ila tulad-karnero nga mga kaupod nga nagahuman sa “dakung kadam-an.” Apang paano nila dapat himuon sing aktuwal ining hilikuton?

“Sing Dayag kag sa Pamalaybalay”

14. Sa diin ginhimo ni Jesus ang iya pagbantala, kag anong prinsipio ang maton-an naton gikan sa sini?

¹⁴ Si Jesus direkta nga nagbantala sa mga tawo. Mabasa naton, halimbawa, nga nagbantala sia sa mga sinagoga. Ngaa? Bangod ang mga tawo nagatipon didto kon Adlaw nga Inugpahuway kag nagapamati sa pagbasa kag pagpaathag sang Kasulatan. (Mateo 4:23; Lucas 4:15-21) Nagbantala man si Jesus sa mga tawo sa higad sang dalan, sa higad sang dagat, sa kabukiran, sa tupad sang bubon sa guwa sang siudad, kag sa mga puluy-an. Sa bisan diin nga may mga tawo, si Jesus nagbantala sa ila.—Mateo 5:1, 2; Marcos 1:29-34; 2:1-4, 13; 3:19; 4:1, 2; Lucas 5:1-3; 9:57-60; Juan 4:4-26.

15. (a) Anong mga instruksion ang ginhatag ni Jesus sa iya mga disipulo sang ginpadala niya sila agod magbantala? (b) Paano ini ginpaathag sang iban nga mga komentarista sa Biblia?

¹⁵ Sang ginpadala ni Jesus ang iya mga disipulo agod magbantala, ginpadala man niya sila sing direkta sa katawhan. Makita ini sa iya mga instruksion nga narekord sa Mateo 10:1-15, 40-42. Sa bersikulo 11 sia nagsiling: “Sa bisan diin nga siudad ukon minuro nga magsulod kamo, usisaa didto kon sin-o ang takus, kag pabilin kamo didto tubtob nga maghalin kamo.” Ang The Jerusalem Bible nagabadbad sining bersikulo: “Pangitaa ang isa nga masaligan,” nga subong bala pamangkuton sang mga disipulo ang kilala ukon nakahibalo nga tawo sa minuro kon sin-o ang may maayong reputasyon kag sa amo takus sa mensahe. (Tan-awa man ang Weymouth kag ang King James Version.) Kag amo sini ang paathag sang iban nga komentarista sa Biblia sa bersikulo 11.

16. Ano ang ginapakita sang kapin ka makatarunganon nga pagbinagbinag sang mga pulong ni Jesus sa Mateo 10:11 kon paano pangitaon sang mga apostoles ang mga takus?

¹⁶ Apang, dapat dumdumon nga sa kabilugan, ang mga teologo sang Cristiandad wala nagapamalaybalay, kag madamo nga komentarista sa Biblia ang nagapatpat sang Kasulatan sa konteksto sang ila kaugalingon nga eksperiensia. Ang kapin ka makatarunganon nga pagbinagbinag sa instruksion ni Jesus nagapakita nga nagahambal sia anay nahanungod sa pagpangita sang iya mga disipulo sa mga tawo sing indibiduwal, sa pamalaybalay ukon sa dayag, kag ginapresentar sa ila ang mensahe sang Ginharian. (Mateo 10:7) Ang ila sabat magapakita kon bala takus sila ukon indi.—Mateo 10:12-15.

17. Ano ang nagapamatuod nga ang mga disipulo ni Jesus wala magduaw sa takus nga mga tawo pasad sa rekomendasyon ukon kasugtanan?

¹⁷ Makita ini sa mga pulong ni Jesus sa Mateo 10:14: “Kon sin-o ang indi magbaton sa inyo ukon magpamati sang inyo mga pulong, sa pagguwa ninyo didto sadtong balay ukon siudad, itaktak ninyo ang yab-ok sa inyo mga tiil.” Ginahambal ni Jesus ang nahanungod sa paghimo sang iya mga disipulo sang wala gin-agda nga mga pagduaw sa mga tawo agod magbantala sa ila. Matuod, dapat nila batunon ang pagdayon sa isa sang mga panimalay nga nagbaton sa mensahe. (Mateo 10:11) Apang ang una nga butang amo ang pagbantala nga hilikuton. Sa Lucas 9:6 ginasiling ini: “Naghalin sila kag nagkadto sa tanan nga minuro, nga nagawali sing maayong balita kag nagapang-ayo sa bisan diin.” (Tan-awa man ang Lucas 10:8, 9.) Indi madula ang padya sang mga takus nga nagbaton sa mga disipulo sa ila mga puluy-an subong mga manalagna, ayhan naghatag sa ila sing “isa ka tagayan sang mabugnaw nga tubig” ukon sing dalayunan pa gani. Namati sila sa mensahe sang Ginharian.—Mateo 10:40-42.

18, 19. (a) Suno sa Binuhatan 5:42, paano ginhimo sang unang mga Cristiano ang ila pagbantala nga hilikuton? (b) Paano ang mga pulong ni Pablo sa Binuhatan 20:20, 21 nagapakita nga ginahambal niya ang nahanungod sa ministeryo sa mga ditumuluo, indi ang nasulod nga hilikuton sa pagbantay?

¹⁸ Sa tapos matukod ang Cristianong kongregasyon, mabasa naton ang nahanungod sa mga apostoles: “Kag sa adlaw-adlaw sa templo kag sa pamalaybalay wala sila mag-untat sa pagpanudlo kag pagwali sing maayong balita nahanungod kay Jesus subong nga Cristo.” (Binuhatan 5:42; tan-awa ang Reference Bible, foot­note.) Ang ekspresyon sa Griego nga ginbadbad “sa pamalaybalay” amo ang kat’ oiʹkon. Ang ka·taʹ diri yara sa kahulugan nga ginatawag dis­trib­u­tive ukon nabahinbahin. Busa, mahimo masiling nga ang pagbantala sang mga disipulo nabahinbahin sa balay kag balay. Wala sila maghimo sang nahimos na nga daan nga mga pagduaw. Ang kaanggid sa sini nga paggamit sa ka·taʹ makita sa Lucas 8:1 sa ekspresyon nga “sa mga siudad kag sa mga minuro.”

¹⁹ Amo man nga ekspresyon sa pangmadamo nga kahulugan, kat’ oiʹkous, ang ginagamit ni apostol Pablo sa Binuhatan 20:20. Didto nagasiling sia: “Wala ako mag-isol . . . sa pagpanudlo sa inyo sa dayag kag sa pamalaybalay.” Ang ekspresyon nga “pamalaybalay” ginbadbad nga “sa inyo mga puluy-an” sa pila ka pagbadbad. Busa ang iban sang mga komentarista sa Biblia sang Cristiandad nagasiling nga ginapatuhuyan diri ni Pablo ang pagbantay nga pagduaw sa mga puluy-an sang mga tumuluo. Ang masunod nga mga pulong ni Pablo nagapakita nga nagahambal sia nahanungod sa pagministeryo sa mga ditumuluo, kay sia nagasiling: “Apang nagapanaksi ako sing bug-os sa mga Judiyo kag sa mga Griego nahanungod sa paghinulsol sa Dios kag pagtuo sa aton Ginuong Jesus.”—Binuhatan 20:21.

20. (a) Sa anong kasangkaron nabantala na sang mga Saksi ni Jehova ang maayong balita sang Ginharian sa aton tion? (b) Paano mahimo ginatamod sang iban ang padayon nga pagbantala?

²⁰ Busa ining metodo sa paglab-ot sa katawhan dapat gamiton sa aton tion kon san-o ang “maayong balita sang ginharian” dapat “ibantala sa bug-os napuy-an nga duta subong panaksi sa tanan nga kapungsuran.” (Mateo 24:14) Sa kapin sa 65 ka tuig, ang mga Saksi ni Jehova makugi nga nagabantala sing maayong balita sang natukod na nga Ginharian sang Dios sa dayag kag sa pamalaybalay—sa 200 ka kadutaan karon. Daw ano ka dakung panaksi ang ginahimo! Kag ini walay sapayan sang kamatuoran nga ang kalabanan nga tawo karon nagapamati sa mensahe nga “wala nagabaton,” ang iban nagakaugot pa gani. (Mateo 13:15) Ngaa nagapadayon ang mga Saksi ni Jehova sa pagbantala sa mga lokasyon nga sa diin ang mga tawo nagapangindi sa pagpamati ukon nagapamatok pa gani sa ila? Ining pamangkot pagabinagbinagon sa masunod nga artikulo.

Paano Mo Sabton?

◻ Ano ang ginapakita sang Kasulatan nga kinaiya sang ministeryo ni Jesus?

◻ Ano nga mga sugo ang ginhatag sa mga apostoles sa ila ministeryo?

◻ Ano nga hilikuton ang dapat tapuson sa aton tion, kag ngaa?

◻ Sin-o ang gamiton ni Jehova sa pagbantala sing maayong balita sa aton adlaw?

◻ Sa diin kag paano himuon ang pagbantala nga hilikuton?