Pagbukas sang Dalan Pabalik sa Paraiso

“[Si Jesus] nagsiling sa iya: ‘Sa pagkamatuod, nagasiling ako sa imo karon nga adlaw, Mangin kaupod ka nakon sa Paraiso.’ ”​—⁠LUCAS 23:⁠43.

 1, 2. (a) Ano ang kahulugan sang “paraiso,” kag kaangay sang ano ang katamnan sang Eden? (b) Paano ginbadbad ang Hebreo nga tinaga nga “katamnan” sa Cristianong Griegong Kasulatan?

ANG tawhanon nga pamilya nagsugod sa Paraiso. Nahanungod sa pagtuga sa tawo, aton mabasa sa nahauna nga tolon-an sang Balaan nga Kasulatan: “Si Jehova nga Dios naghimo sang tawo gikan sa yab-ok sang duta kag naghuyop sa iya ilong sang ginhawa sang kabuhi, kag ang tawo nangin buhi nga kalag. Kag si Jehova nga Dios naghimo sing katamnan nayon sa sidlangan, sa Eden, kag didto ginbutang niya ang tawo nga iya nahimo.” (Genesis 2:​7, 8) Ang ngalan “Eden” nagakahulugan sing “Kalipay,” kag busa ang katamnan sang Eden isa ka malapad nga parke sang kalipay, nga may madamo kag lainlain katahom nga mga kinaiya.

² Ang tinaga nga “paraiso” naghalin sa Griegong pamulong, kag sa sina nga pamulong nagakahulugan ini sa isa ka katulad parke nga katamnan. Ang Griegong tinaga nga gingamit sa pagbadbad sa Hebreong nombre nga gan, nagakahulugan sing “katamnan,” amo ang pa·raʹdei·sos. Ang Kasulatan halin sa Mateo tubtob sa Bugna ginsulat sa Griegong pamulong, kag ining Griegong tinaga gingamit sa pagrekord sa mga pinamulong ni Ginuong Jesucristo sang nag-antos sia sang silot nga kamatayon sa usok sang pag-antos sa Kalbaryo sang Nisan 14 sang tuig 33 C.⁠E.

Ang Paraiso nga Ginsaad ni Jesus sa Malaut

 3. (a) Ano ang ginpamangkot sang mahinuklugon nga malaut kay Jesus? (b) Ang pangabay sang malaut nagpakita sing ano nahanungod sa iya pagtuo kay Jesus?

³ Sadto nga tion, ang duha ka malaut ginlansang sa tupad ni Jesus. Ang isa sa ila nag-untat sa pagpasipala kay Jesus bisan pa nga ang ikaduha nga makawat nga nalansang sa pihak nga kiliran ni Jesus nagpadayon sa pagpasipala. Ang mahinuklugon nga malaut nagliso kag nagsiling: “Jesus, dumduma ako kon magsulod ka sa imo ginharian,” busa nagpabutyag sing pagtuo nga si Jesus, bisan pa nabitay sa tupad niya, nalinya para sa palaabuton nga ginharian. (Lucas 23:​42; Marcos 15:32) Mahimo nga nagtandog gid ina sang tagipusuon ni Ginuong Jesus! Yadtong mainabyanon nga kriminal nagtuo nga si Jesucristo wala sing sala kag nga indi sia nagakabagay sa mabug-at nga silot subong sang paglansang nga makahuluya sa publiko. (Lucas 23:41) Ginpakita niya paagi sa iya pangabay nga nagtuo sia nga si Jesus banhawon gikan sa minatay kag magasulod sa isa ka ginharian. Nagpakita man sing pagtuo ang malaut nga sia mismo mahimo nga mabanhaw kag nga si Jesus amo ang Isa nga magatawag sa iya gikan sa minatay kag padyaan sia sing bag-o nga kabuhi sa duta.

 4. Paano ginsabat ni Jesus ang pangabay sang malaut, nagapakita sing ano?

⁴ Sang si Jesus nagsiling sa iya: “Sa pagkamatuod nagasiling ako sa imo karon nga adlaw, Mangin kaupod ka nakon sa Paraiso,” gintudlo niya ang isa ka pagkabanhaw sa sinang mahinuklugon nga malaut. Mahimo nga isa gid yadto ka paumpaw sa kriminal nga nagpakita sing pagtuo. Agod mabanhaw sia, dapat anay banhawon si Jesus. Nian, nagatuo sa iya hatag-Dios nga ikasarang sa pagbanhaw, si Jesus magatawag sa sining malaut gikan sa minatay sa adlaw sang pagbanhaw sa kalibutan sang katawhan.​—⁠Lucas 23:​43; Juan 5:​28, 29; 1 Corinto 15:​20, 23; Hebreo 9:⁠15.

 5, 6. (a) Ano ang ginsulat ni Gobernador Poncio Pilato sa ibabaw sang ginlansang nga si Jesus? (b) Sa anong pamulong mahimo nga nakighambal si Jesus sa malauton?

⁵ Sa anong pamulong ginhatag ni Jesus ina nga saad? Madamo ang ginagamit didto sadto nga tion. Ginpakita ini sang pinamulong ni Gobernador Poncio Pilato nga ginpasulat sa uluhan sang ginlansang nga si Jesucristo, nagapakilala sa iya para mabasa sang tanan nga mga nagalabay. Ang kasaysayan sa Juan 19:​19, 20 nagasiling: “Si Pilato nagsulat sing titulo man kag ginbutang ini sa usok sang pag-antos. May nasulat: ‘Jesus nga Nazaretnon, ang Hari sang mga Judiyo.’ Madamo sang mga Judiyo ang nakabasa sining titulo, kay ang duog nga ginlansangan kay Jesus malapit sa siudad; kag nasulat ini sa Hebreo, sa Latin, kag sa Griego.”

⁶ Bangod sang pagbun-ag sa iya sa Betlehem sang iya ulay nga iloy, nga si Maria, si Jesus nabun-ag nga isa ka Judiyo, ukon isa ka Hebreo. Sing nagakahisuno, sa iya pagbantala sa sulod sang tatlo ka tuig kag tunga sa duta nga natawhan niya, mahimo nga nagbantala sia sa Judiyong pamulong, ukon Hebreo. Gani, sang ginbungat niya ining saad sa mahinuklugon nga malaut, mahimo nga nagpamulong sia sa Hebreo. Mahimo nga gingamit niya ang Hebreong tinaga nga gan sang nagapatuhoy sa Paraiso​—⁠ang tinaga nga makita sa Genesis 2:⁠8. Didto, ang Griegong Septuagint nga bersion sang Sagrado nga Kasulatan nagagamit sang tinaga nga pa·raʹdei·sos sang nagbadbad sang orihinal nga tinaga nga gan.

 7. Paano ginhimaya si Jesus sang ginbanhaw sia?

⁷ Si Jesus ginbanhaw gikan sa minatay sang ikatlo nga adlaw sa tapos sia ginlansang, ukon sang Nisan 16 sa Hebreo nga kalendaryo. Kap-atan ka adlaw sang ulihi nagbalik sia sa langit, sa iya orihinal nga puluy-an, lamang nga sa karon sa ginpakataas pa nga kahimtangan. (Binuhatan 5:​30, 31; Filipos 2:9) Napanaptan sia karon sing pagkadimamalatyon, ang kinaiya nga kaangay sang iya langitnon nga Amay. Si Jehova nga Dios amo lamang anay ang Tag-iya sang pagkadimamalatyon tubtob nga ginbanhaw si Jesus gikan sa minatay sadtong Domingo, Nisan 16.​—⁠Roma 6:​9; 1 Timoteo 6:​15, 16.

Ang Gawad Nagabukas sang Dalan

 8. Ano ang orihinal nga katuyuan ni Jehova nahanungod sa duta, kag ano ang nagapakita nga ginahuptan niya ina nga katuyuan?

⁸ Ini tanan mga tikang sa katuyuan sang Dios nga ang bug-os nga duta mapuno sing katulad paraiso nga katahom, huo, agod mangin tugob-globo nga paraiso. (Genesis 1:​28; Isaias 55:​10, 11) Sa 1 Corinto 15:​45, ginpatuhuyan ni apostol Pablo si Jesus subong ang “katapusan nga Adan.” Nagapakita ini nga ang Dios nagpabilin sa iya orihinal nga katuyuan may kahilabtanan sa duta kag nga may isa nga magatuman sang katuyuan nga wala mahimo sang unang Adan.

 9. Ano ang gin-aman ni Jesus sa pagbukas sang dalan pabalik sa Paraiso?

⁹ Suno kay Pablo, si Jesus nag-aman sing “gawad.” (1 Timoteo 2:6) Si Jesucristo mismo nagsiling: “Subong nga ang Anak sang tawo wala magkari nga alagdon kundi sa pag-alagad kag sa paghatag sang iya kabuhi nga gawad sang madamo.” Nagpaposible ini nga ang nagatuo kay Jesucristo makatigayon sang kabuhi nga walay katapusan.​—⁠Mateo 20:​28; Juan 3:⁠16.

10. (a) Ano ang ginpat-od sang Dios nahanungod sa limitado nga kadamuon sang nahamut-an nga mga tawo? (b) San-o ginsugdan ang pagpili sa “diutay nga panong,” kag paagi kay sin-o?

¹⁰ Sang si Jesus nagkayab sa langit pagkatapos nga mabanhaw sia gikan sa minatay, ginpresentar niya ang balor sang iya halad gawad sa Dios tungod sa tawhanon nga pamilya. Apang, tuyo sang iya langitnon nga Amay, si Jehova nga Dios, nga magkuha gikan sa mga pungsod sa duta sing “katawhan sa iya ngalan.” (Binuhatan 15:14) Suno sa Bugna 7:4 kag 14:​1-4, magadamo sila sa 144,000 lamang ka indibiduwal, ang “diutay nga panong,” nga gintawag sa langitnon nga Ginharian sang Dios. (Lucas 12:32) Ang pagpili sa sining ginkahamut-an sing pinasahi ni Jehova nga Dios nagsugod paagi sa pagpili sa 12 ka apostoles ni Jesucristo. (Mateo 10:​2-4; Binuhatan 1:​23-26) Si Jesus nagsiling sa sadsaran nga mga katapo sang iya kongregasyon: “Kamo wala magpili sa akon, kundi ako nagpili sa inyo.” (Juan 15:16) Ginsugdan nila ang hilikuton nga pagbantala sang nagapakari tugob-globo nga Paraiso sa idalom sang paggahom sang Ginharian.

Ang Pagkanagakaigo sang Ginharian

11. San-o gintangdo nga tukuron ang Mesianikong Ginharian?

¹¹ Sa ngalan ni Ginuong Jesucristo, kita karon padayon nga nagapangamuyo kay Jehova nga pakarion ang Iya Ginharian. (Mateo 6:​9, 10; Juan 14:​13, 14) Ang Mesianikong Ginharian nagakaigo nga tukuron sa talipuspusan sang “gintangdo nga tion sang mga pungsod.” (Lucas 21:24) Inang Panahon sang mga Gentil natuman sang tuig 1914.⁠a

12. Ano ang natabo sang 1914 nahisanto sa tagna ni Jesus nahanungod sa talalupangdon nga mga butang nga magatanda sang iya dikitaon nga presensia?

¹² Yadto nga tuig gintandaan sang unang inaway sa kalibutan sa maragtas sang tawo. Nahisuno ini sa tagna ni Jesus nahanungod sa talalupangdon nga mga butang nga magatanda sang iya dikitaon nga presensia sa pagginahom sang Ginharian sa ibabaw sang duta. Ginpamangkot sia sang iya mga disipulo: “Isugid sa amon, San-o bala mahanabo ini, kag ano bala ang tanda sang imo pagkari kag sang katapusan sang sistema sang mga butang?” Sa pagsabat si Jesus nagsiling: “Ang pungsod magatindog batok sa pungsod kag ang ginharian batok sa ginharian, kag may mga tiggulutom kag mga linog sa nagakalainlain nga mga duog. Tanan ini pamuno lamang sang mga kasakit. Kag iwali ining maayong balita sang ginharian sa bug-os nga kalibutan subong nga panaksi sa tanan nga kapungsuran; kag ugaling magaabot ang katapusan.”​—⁠Mateo 24:​3, 7, 8, 14; Marcos 13:⁠10.

13. (a) Sa anong paagi nga ang pagbantala sang Ginharian sang Dios maayo nga balita? (b) Daw ano na kadugay ginpangamuyo nga magkari ang Ginharian sang Dios, kag wala bala makapoy ang iya mga saksi sa duta sa pagpangamuyo sini?

¹³ Ining maayong balita sang Ginharian sang Dios ginawali karon sa kapin sa 200 ka kadutaan, kag nagapanikasog sa pagpalapnag sini sa dugang pa nga mga teritoryo. Balita ini, indi nahanungod sa bug-os kalibutan nga pangulohan nga magakari pa, kundi nahanungod sa ginharian nga may kagamhanan na karon, may isa nga nagagahom na. Ina nga Ginharian gintukod sang 1914. Ginsugdan sini ang panag-on para sa sabat sa pangamuyo nga ginbalay ni Jesus sang nagligad nga kapin sa 1,900 ka tuig. Ina nga pangamuyo ginpangamuyo sang Tagpasad sina nga Ginharian kutob sang ang isa nga mangin Hari sina nga ginharian nagtudlo sa iya mga disipulo nga ipangamuyo ini. Gani madugay na nga nabatian sang Awtor sina nga Ginharian ang pangabay tungod sini. Nahamuot sia sa pagpamati sa pangamuyo sa iya sang iya mga saksi sa duta sa sinang bug-os nga tion, kay nagpakita ini nga ginhuptan nila ang ila pagtuo sa pagkari sina nga Ginharian. Wala sila makapoy sa pagpangamuyo sing subong sina sa “Amay sang mga langit,” subong nga daw ini nagligad na sa ila.​—⁠Mateo 6:​9, 10.

14. Ngaa ang mga Saksi ni Jehova nagapadayon sa pagbantala sang maayong balita sang Ginharian sang Dios?

¹⁴ Samtang ang mga Saksi ni Jehova nagatuo kag nagapahayag nga ang Ginharian natukod sa mga langit sang 1914, padayon sila nga nagabantala sining maayong balita sang Ginharian. Ginahimo nila ini bangod indi pa bug-os nga kontrolado sinang natukod na nga Ginharian ang duta apang nagtugot sa mga ginharian sining kalibutan nga padayunon ang pagbuhat sang ila gahom kag awtoridad sa bug-os nga tribo kag rasa sang katawhan. (Roma 13:1) Busa dapat ini magakari sing bug-os gid, kon sayoron, tubtob nga amo ini ang eksklusibo nga pangulohan nga nagagahom sa bug-os nga duta.​—⁠Daniel 2:⁠44.

15. Ano ang natabo sugod sang Pentecostes 33 C.⁠E. nga sa mas masangkad nga kasangkaron sang sa gintangdo anay ang mga hari sang Israel?

¹⁵ Bisan pa gintangdo subong Hari sina nga Ginharian, si Jesus wala nagagahom sing isahanon. Si Jehova nga Dios nagtangdo sang 144,000 ka sumulunod sang iya harianon nga Anak nga mangin mga masigka manunubli sang Mesianikong Ginharian sang Dios. (Daniel 7:27) Subong nga ang mga hari sang dumaan nga Israel ginhaplasan sang balaan nga lana sang mataas nga saserdote, gani kutob sang adlaw sang Pentecostes 33 C.⁠E., ginpahaplasan ni Jehova ang 144,000 ka masigka manunubli ni Jesucristo sang Iya balaan nga espiritu, ginpanganak sila sa espiritu nga kabuhi sa mga langit upod sa “Hari sang mga hari kag Ginuo sang mga ginuo.”​—⁠Bugna 19:​16; ipaanggid ang 1 Hari 1:⁠39.

Paraiso Ipasag-uli sang “Katapusan nga Adan”

16. Ano ang pagtamod sa Ginharian sang ginlansang si Jesus, apang ngaa indi sia manugbantala sang sayop nga balita?

¹⁶ Sang ginlansang sa usok si Jesus sang 33 C.⁠E., daw imposible nga makatigayon sia sang isa ka ginharian. Apang sa pagbantala niya sang Ginharian sang Dios, indi sia manugwali sang sayop nga balita. Sang ikatlo nga adlaw sang paglansang sa iya, ginpat-od sang Tagpasad sang Ginharian nga ang mga disipulo ni Jesus indi magapangamuyo tungod sa isa ka pangulohan nga diposible. Ginbanhaw ni Jehova ang Isa nga magarepresentar sa Iya sa ginpangamuyo nga Ginharian kag ginpanaptan sia sing pagkadimamalatyon.

17, 18. (a) Ano ang importansia sang pagtawag kay Jesus nga “ang katapusan nga Adan”? (b) Ano ang ginapakita sang mga hitabo sa kalibutan kutob sang 1914?

¹⁷ Nahibaluan ni Jesus nga ang Manunuga sang unang Paraiso sa duta magahatag sa iya sang obligasyon nga ipasag-uli ang Paraiso kag tatapon nga paistaran ang bug-os globo nga katamnan. Sa 1 Corinto 15:​45, 47, aton mabasa: “Sa amo nasulat na: ‘Ang nahaunang tawo nga si Adan nangin buhi nga kalag.’ Ang katapusan nga Adan nangin espiritu nga manughatag sing kabuhi. Ang nahaunang tawo gikan sa duta kag dutan-on; ang ikaduhang tawo gikan sa langit.” Ang ikaduha nga Adan nanaug gikan sa langit kag amo ang gintangdoan ni Jesus sa pagtukod liwat sang Paraiso diri sa duta. Sa sining sadsaran nga si Ginuong Jesus nagsiling sa mahinuklugon nga malaut: “Mangin kaupod ka nakon sa Paraiso.” (Lucas 23:43) Gikan sini nga paghambalanay maathag nga ang Paraiso tukuron sa duta sa idalom sang Ginharian sa langit sa mga kamot sang ginhimaya nga si Jesucristo, “ang katapusan nga Adan.”

¹⁸ Ang mga hitabo sa kalibutan kutob sang 1914 nahisanto sa mga tagna nga ginbungat ni Jesucristo kag busa nagapamatuod nga si Jesus naggahom kutob sadto. Sa sulod sang pito na ka dekada karon, ang katawhan sining ika-20 ka siglo nga kaliwat nga nagkabuhi kutob sang 1914 nakaeksperiensia sang katumanan sang mga hitabo nga nalista sa tagna ni Jesus nga masapwan sa Mateo kapitulo 24. Busa, ining panag-on sang tion malapit na matapos, kag ang pagpasag-uli sa Paraiso sa duta malapit na.​—⁠Mateo 24:​32-35; ipaanggid ang Salmo 90:⁠10.

Ang Makakulunyag nga Dag-on sang Bag-ong Kalibutan Malapit Na

19, 20. (a) Pagkatapos sang Armagedon, pasulod sa ano gin-abiabi ni Jehova ang mga nagahigugma sa iya? (b) Ano ang kinahanglan nga himuon dili madugay pagkatapos sang Armagedon?

¹⁹ Indi makatalaka kag ordinaryo nga sistema sang mga butang ang ipakilala ni Jehova sa mga nagahigugma sa iya sa tapos niya mabindikar ang iya bug-os uniberso nga pagkasoberano nga indi mapangduhaduhaan sa patag-awayan sang Armagedon. Ang nagapakari nga dag-on para sa tawhanon nga pamilya sa idalom sang maayo nga pagginahom sang Mesianikong Hari, si Jesus, nga Anak sang Dios, labing makalilipay gid. Aba, madamo gid ang himuon nga mapuslanon! Ang bisan ano kag ang tanan nga agi nga mabilin sa nawong sang duta gikan sa bug-os globo nga inaway sa ulot sang langitnon nga hubon ni Jehova kag sang hangaway sang malaut dulaon. Wala sing agi ang mabilin.

²⁰ Apang kamusta ang tanan nga kasangkapan sa inaway nga ibilin sang mga pungsod? Bangod sang simbuliko nga indikasyon sang kalawigon sang tion nga kinahanglan agod dulaon ang masunog nga mga bahin sini, ang kadamuon madamo gid. (Ezequiel 39:​8-10) Ang mga makalampuwas sa Armagedon mahimo nga makasarang sa paggamit sa mga materyal sang nabilin nga mga relikya sang inaway sang mga pungsod sa mapuslanon nga katuyuan.​—⁠Isaias 2:​2-4.

21. Kaanggid sa inagihan sang mga nakalampuwas sa Anaw, ano ang kahimtangan nga ginaatubang sang mga makalampuwas sa Armagedon, apang ano ang daku nga kinatuhayan?

²¹ Ang ginpakamaayo nga modernong-adlaw nga katumbas ni Noe kag sang iya panimalay subong milagruso nga mga makalampuwas sa bug-os globo nga Anaw magaatubang sing dutan-on nga kahimtangan nga kaanggid sa nasapwan sang pamilya ni Noe. Apang, si Satanas nga Yawa kag ang iya yawan-on nga mga puwersa indi na magagamo sa dikitaon nga mga langit nga nagalibot sa duta kundi pauntaton sa pagpanghikot sing bug-os sa sulod sang napulo ka siglo. (Bugna 20:​1-3) Ang mga makalampuwas sa Armagedon may yara makahalangkat nga hilikuton sa pagdumala sa duta nga nakalampuwas sa “dakung adlaw sang Dios nga Labing Gamhanan,” nagaatubang sa bisan anong epekto nga mabilin sa sining planeta.​—⁠Bugna 16:⁠14.

22. Ano ang reaksion sang mga makalampuwas sa Armagedon sa hangkat nga pasangkaron ang Paraiso sa bug-os nga duta?

²² Diutay lamang sa kadamuon, ining mga makalampuwas sa inaway sang Armagedon kinaandan nga mahimo ginapaabot nga mahadlukan katama kon hatagan sing daku nga hilikuton nga pasangkaron ang Paraiso sa bug-os nga duta. Apang sa kabaliskaran, nalipay gid katama, maisog kag matinumanon nga sugdan nila ini. Nahibaluan nila sing bug-os nga ining duta amo ang malaragwayon nga palatungan sang tiil sang Dios, kag luyag nila sing hanuot nga ining globo mangin makagalanyat kag matahom nga palatungan sang iya tiil diri.

23. Ano nga pagsakdag ang matigayon sang mga ma­kalampuwas sa Armagedon subong pasalig nga ang ila hilikuton sa pagpasangkad sa Paraiso magamadina­lag-on?

²³ Makalilipay kag makapalig-on mahibaluan nga indi sila pagpabay-an nga silahanon kag wala sing bulig sa tapos matuman ining masadya nga pag-alagad subong katumanan sang balaan nga hilikuton sa duta. (Ipaanggid ang Isaias 65:​17, 21-24.) Matigayon nila ang bug-os, dilimitado nga pagsakdag sang Isa nga nagsaad sang napasag-uli nga Paraiso kag nga nagsiling sang adlaw nga nagkayab sia sa langit: “Ang bug-os nga pagbulut-an sa langit kag sa duta natugyan sa akon.” (Mateo 28:18) Ginapanag-iyahan gihapon niya ina nga pagbulut-an, kag sarang niya matuman ang iya tumalagsahom nga saad sa mahinuklugon nga malauton, subong sang makita naton sa masunod nga artikulo.

[Footnote]

Mga Pamangkot sa Repaso

◻ Ano ang ginsaad ni Jesus sa Kalbaryo ang ginapasalig para sa katawhan kag para sa isa ka kriminal?

◻ Ano ang sadsaran sa pagbukas sang dalan pabalik sa Paraiso?

◻ Ano ang napaslawan nga himuon sang unang Adan, apang ano ang himuon sang “katapusan nga Adan”?

◻ Pagkatapos sang Armagedon, pasulod sa anong sahi sang sistema sang mga butang abiabihon ni Jehova ang nagahigugma sa iya?

[Piktyur sa pahina 13]

Ang artikulo “Katapusan sang Tanan nga Ginharian sang 1914” nagguwa sa “The World Magazine” sang Agosto 30, 1914