Sin-o nga Dios ang Inyo Ginasimba?

SA BUG-OS nga kalibutan, lainlain ang isabat sang mga tawo sa sina nga pamangkot. Si apostol Pablo nagsiling: “May madamo nga ‘dios’ kag madamo nga ‘ginuo,’ ” kag karon minilyon ang kadamuon sang mga dios nga ginasimba. (1 Corinto 8:5) Apang, nahibaluan bala ninyo nga madamo nga tawo ang nagasimba sa dios nga tuhay sa isa nga pagdumdom nila amo ang ginasimba nila? Kag narealisar bala ninyo nga madamo nga ateista ang kapin ka debotado sang sa mga nagapati sa isa ka dios? Sa anong paagi?

Ti, ang isa ka kahulugan sang pagsimba amo ang “paghatag sing daku, sobra pa gani nga pagtahod, dungog, ukon debosyon.” Sa orihinal nga mga hambal sang Biblia, ang mga tinaga para sa pagsimba nagadala sing ideya nga pag-alagad ukon pagyaub sa atubangan sang isa. Ginatandaan ini, tan-awon naton kon paano mahimo magsayop ang mga tawo sa kon sin-o ukon ano ang ila ginasimba gid.

Sinamo nga Pagsimba

Binagbinaga halimbawa ang dumaan nga mga Samariahanon. Madamo sini sa ila ang mga dumuluong sa umpisa nga gindala sang mga Asirianhon sa Palestina agod ibulos sa gintapok nga napulo ka naaminhan nga mga tribo sang Israel. Antes sini, nagasimba sila sa pagano nga mga dios, apang nagpanikasog sila karon sa pagtuon nahanungod kay Jehova, ang Dios sang Israel. Ginbiyaan bala nila ang ila daan nga relihion? Wala. Ang Biblia nagareport: “Ginhimo nila ang suno sa ila nahauna nga relihion. Kag ining mga pungsod nagkahadlok kay Jehova, apang nag-alagad man sila sa ila mga larawan nga tinigban.” (2 Hari 17:​40, 41) Gani, bisan pa ginkilala sang mga Samariahanon si Jehova sa ngalan lamang, nag-alagad gihapon sila sa ila dumaan nga mga dios, sa amo isa ka sahi sang sinamo nga relihion ang ginbuhat nila.

Kaanggid sini ang natabo sang ginpakilala sang mga misyonero ang Romanong Katolisismo sa Bagatnan nga Amerika. Nakombertir nila ang kalabanan sang mga pumuluyo, apang kaangay sang dumaan nga mga Samariahanon, wala pagkalimti sang mga pumuluyo ang ila dumaan nga mga dios. Sa amo, sa Brazil ang paganong mga rito sang voodoo ginabuhat gihapon sang mga “Cristiano,” subong mga selebrasyon nga nagapadungog sa dumaan nga mga dios, subong sang diosa nga si Iemanjá. Kaanggid man sini ang natabo sa iban pa nga kadutaan sang Bagatnan nga Amerika.

Dugang pa, ang relihion nga ginpakilala sadtong mga misyonero sa Bagatnan nga Amerika isa na nga daan ka sinamo nga relihion. Madamo sang mga doktrina sini, subong sang Trinidad, kalayuhon nga impierno, kag ang pagkadimamalatyon sang kalag, ang naghalin sa dumaan nga paganong mga relihion kag mga pilosopiya. Indi gid ini makita sa Biblia. Subong man, ang mga piesta sini​—⁠lakip ang Paskuwa kag Semana Santa⁠—​wala maghalin sa mga Cristiano.⁠a Posible bala nga magsaulog sining paganong mga piesta kag magpati sa di-Cristiano nga mga doktrina kag sa gihapon magsimba sa Dios sang Biblia, nga nagsiling: “Dili ka maghupot sing iban nga mga dios sa atubangan ko”? (Exodo 20:3) Sa pagkamatuod indi!

“Bantayi ang Inyo Kaugalingon Gikan sa mga Idolo”

Binagbinaga ang isa pa ka paagi nga ang mga tawo ginalimbungan tuhoy sa pagsimba. Si apostol Juan nagsulat: “Mga anak, bantayi ang inyo kaugalingon gikan sa mga idolo.” (1 Juan 5:21) Mga isa ka libo ka milyon ka tawo ang nalista nga natungod sa Cristiandad, kag ini sila nagapangangkon nga nagasimba man sa Dios nga ginsimba ni Juan. Apang, ginatos ka milyon sa ila ang nagayaub sa mga imahen sang “mga santo,” ni Jesus, kag ni birhen Maria.

May yara iban pa malalangon nga mga porma sang idolatriya. Sang tuig 44 C.⁠E., si Hari Herodes Agripa naghatag sing pamulongpulong publiko, kag nakunyag gid ang mga tawo nga sila nagsinggit: “Tingog sang isa ka dios, kag indi iya sang tawo!” (Binuhatan 12:​21, 22) Huo, gin-idolo nila si Herodes, kag ginhimo sia nga dios. Amo man ang nagakatabo karon. Sang mga adlaw nga ang Nazismo nagabaskog sa paggahom sa Europa, ang singgit nga “Heil Hitler!” isa gid ka singgit sang pagsimba. Madamo ang handa sa pagpakig-away kag sa pagpakamatay para sa Führer nga subong bala dios sia, ang manluluwas sang pungsod. Apang, ang kalabanan sadtong naghatag sina nga pagpadu­ngog mga katapo sang mga iglesia sang Cristiandad!

Antes kag sa tapos ni Hitler, ginsakdag man sang iban nga politikal nga mga lider ang ila kaugalingon subong mga manluluwas kag nangayo sing eksklusibo nga debosyon. Ang mga nagsunod naghimo sini sa ila nga mga dios, walay sapayan kon ano ang pormal nga relihion sang mga “sumilimba” ukon bisan pa kon nangangkon sila nga mga ateista. Ang pagpadungog nga ginabaton sang makagalanyat nga mga bituon sa hampang, sang mga bituon sa pelikula, kag sang iban pa nga mga manuglingaw gikan sa ila mga humalangad kaanggid man sa pagsimba.

Pagsimba sa Kuwarta

Dugang pa, hunahunaa ang ginapahangop sang ginsiling ni Jesus: “Wala sing tawo nga makapaulipon sa duha ka agalon; kay magadumot sia sa isa kag magahigugma sa isa, ukon magadampig sia sa isa kag magatamay sa isa. Indi kamo makapaulipon sa Dios kag sa Manggad.” (Mateo 6:24) May kilala bala kamo nga nagabuylog sa isa ka relihion apang ang iya una nga interes sa kabuhi amo ang makakuwarta? Sin-o, nian, ang ginaalagad gid sina, ang Dios ukon manggad? Pila ka tumuluo ang kilala ninyo nga masako sa pagpangita sing kuwarta? Sa pagkamatuod, sila man mga nagasimba sa kuwarta, ayhan kapin kakugi sang sa madamo nga tumuluo.

Ginpaathag ni apostol Pablo ang kaanggid nga prinsipio sang magsulat sia: “Busa, patya, ang mga bahin sang inyo lawas nga dutan-on kon tuhoy sa pagkamakihilawason, kahigkuan, seksuwal nga gana, malaut nga handum, kag pagkamahamkunon, nga idolatriya.” (Colosas 3:5) Kon ginahamkon naton ang isa ka butang sing mabaskog gid sa bagay nga ginahimo naton ang tanan nga panikasog agot matigayon ini, ayhan ginalapas pa ang kasuguan sa paglab-ot sini, nian para sa aton ina nga butang isa ka idolo, isa ka dios. (Efeso 5:5) Sa isa pa ka sulat, si Pablo nagsulat tuhoy sa pila ka malaut: “Ang ila dios amo ang ila tiyan.” (Filipos 3:19) Kon ang aton bug-os nga katuyuan sa kabuhi amo ang pagpahamuot sa aton kaugalingon, pagbusog sa aton tiyan kon sa aton pa, nian ang aton dios amo ang aton kaugalingon. Pila ang inyo kilala nga nagasimba sini nga sahi sang dios?

Huo, subong ginsulat ni apostol Pablo: “May madamo nga ‘dios’ kag madamo nga ‘ginuo.’ ” Kag sa madamo nga kaso, ang ila mga sumilimba kaangay sang dumaan nga mga Samariahanon, nga nagaalagad sa isa ka dios paagi sa ila mga pulong kag sa lain nga dios paagi sa ila mga buhat. Apang, ang matuod may isa lamang ka Dios nga takus sang aton pagsimba. Kilala bala ninyo kon sin-o sia? Dugang pa, may isa ka butang nga nagahiusa sa pagsimba sa tanan nga iban pa nga dios luwas sa iya. Ano ina? Makita naton ini sa masunod nga artikulo.

[Footnote]