“Dili Malisang ang Inyo mga Tagipusuon”

“Dili malisang ang inyo mga tagipusuon. Magtuo kamo sa Dios, magtuo man kamo sa akon.”—JUAN 14:1.

 1. Ngaa ang pinamulong ni Jesus sa Juan 14:1 suno sa panahon?

NISAN 14 sadto sang tuig 33 C.E. Isa ka diutay nga grupo sang mga tawo ang nagtipon sa ibabaw nga hulot sa Jerusalem pagtunod sang adlaw. Ginhatagan sila sang ila Lider sing katapusan nga laygay kag pagpalig-on. Sa bahin nagsiling sia: “Dili malisang ang inyo mga tagipusuon.” (Juan 14:1) Ang iya pulong suno gid sa tion, kay mahanabo sa dili madugay ang makatulublag nga mga hitabo. Sadto nga gab-i gindakop sia, ginbista, kag gintagudilian nga patyon.

 2. Ngaa importante gid yadto nga adlaw, kag ano ang nagbulig sa mga disipulo?

² Makatarunganon gid nga tamdon mo yadto nga adlaw subong ang pinakaimportante sa maragtas, nga nagaapektar sa bug-os nga palaabuton sang katawhan. Ang mahalaron nga kamatayon sang Lider, nga si Jesus, nagtuman sa madamong dumaan nga mga tagna kag naghatag sing sadsaran para sa kabuhi nga walay katapusan sa mga nagatuo sa iya. (Isaias 53:5-7; Juan 3:16) Apang ang mga apostoles, nga nakibot kag naligban sa makalilisang nga mga hitabo sadto nga gab-i, nagumon kag hinadlukan sa makadali. Ginpanghiwala pa gani ni Pedro si Jesus. (Mateo 26:69-75) Apang, sang mabaton sang matutom nga mga apostoles ang ginsaad nga kabulig, ang balaan nga espiritu, nangin masidla sila kag wala malisang. (Juan 14:16, 17) Gani, sang makaeksperiensia si Pedro kag si Juan sing mabudlay nga pamatok kag ginbilanggo, nangayo sila sing bulig sa Dios paagi sa pangamuyo nga mapamulong nila ang iya pulong “sa kasidla.” Ginsabat ang ila mga pangamuyo.—Binuhatan 4:1-3, 29-31.

 3. Ngaa madamo nga tawo ang nalisang sing daku karon?

³ Karon, nagapuyo kita sa kalibutan nga nalisang sing daku. Ang katapusan sining daan nga sistema sang mga butang madasig nga nagahinampot. (2 Timoteo 3:1-5) Minilyon ang personal nga naapektuhan ukon natublag sing daku sang serioso nga pagkaguba sang pagkabuhi sang pamilya kag mga talaksan sa moral, sang makahaladlok nga pagdugang sang makatilingala nga mga balatian, pagkawalay kalig-onan sa politika, pagkawala sing palamugnan, kakulang sing pagkaon, terorismo, kag sang pamahog sang nuklear nga inaway. Madamong tagipusuon ang nalisang sa masubo hunahunaon nga kahadlok sa palaabuton. Subong sang gintagna ni Jesus, may “kalisang sa mga pungsod . . . kag ang mga tawo nagakapunaw sa kahadlok kag sa kalangkag sa magaabot sa napuy-an nga duta.”—Lucas 21:25, 26.

 4. Ano nga mga butang ang kabangdanan sang pag-antos sang mga Cristiano?

⁴ Bisan ang mga Cristiano sarang maapektuhan sinang masubo nga mga butang. Nagaagom man sila sing kahuol bangod sang relihioso nga pagkamaynadampigan ukon pagpamatok gikan sa mga himata, mga kaingod, mga kaupod sa trabaho, mga kabutho, kag mga awtoridad sang gobierno. (Mateo 24:9) Gani paano kita makapabilin nga kalma, wala malisang, sa sining mabudlay nga mga tion? Paano naton mahuptan ang kalinong sa hunahuna kon nagalain ang kahimtangan? Paano naton maatubang ang palaabuton nga may kompiansa? Ano ang magabulig sa aton agod malandas ang daku nga kabalaka nga nangin kinaandan na? Ugyon kita sang ginhatag ni Jesus ang laygay sa Juan 14:1, gani usisaon naton ini sing maayo.

Paano Naton Malandas ang Paghimud-os?

 5. Anong makapalig-on nga mga laygay ang ginahatag sa aton sang Kasulatan?

⁵ Bangod kay ginhatagan sing mahigugmaon nga laygay nga ‘indi malisang sa ila mga tagipusuon,’ ginsilingan ni Jesus ang iya mga apostoles: “Magtuo kamo sa Dios, magtuo man kamo sa akon.” (Juan 14:1) Ang inspirado nga Kasulatan nagahatag sa aton sing madamong kaanggid nga laygay: “Itungtung kay Jehova ang imo lulan, kag sia magaalay-ay sa imo.” “Itugyan kay Jehova ang imo dalanon, kag salig man sa iya, kag himuon niya ini.” (Salmo 55:22; 37:5) Ginhatag ni Pablo sa mga Filipos ining importante nga laygay: “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga paghangop magatipig sang inyo mga tagipusuon kag inyo mga painoino.”—Filipos 4:6, 7.

 6, 7. (a) Ano ang isa ka paagi sa pagbuhin sa kahuol? (b) Paano naton mapalambo ang suod nga kaangtanan kay Jehova?

⁶ Ang paghimud-os ukon kabalaka nga ginatuga sang mga problema kag mabug-at nga responsabilidad nagaapektar kon kaisa sa aton panglawas kag subong man sa aton espiritu. Apang, ang isa ka eksperto sa mediko, sa libro nga Don’t Panic, nagakomento: “Kon sarang masugid sang mga tawo ang ila mga problema sa iban nga ginatahod nila . . . , ang kabug-aton sang kahuol masunson nga ginabuhinan sing daku.” Kon matuod ina kon tuhoy sa pagpakighambal sa iban nga tawo, daw ano pa gid ka daku nga bulig ang matigayon gikan sa pagpakighambal sa Dios. Sin-o pa ang matahod naton sing labi sang sa kay Jehova?

⁷ Amo ina kon ngaa ang suod nga personal nga kaangtanan upod sa iya importante katama para sa mga Cristiano sa karon. Nahibaluan ini sing maayo sang hamtong nga mga alagad ni Jehova, gani ginalikawan nila ang pagpakig-upod sa kalibutanon nga mga tawo ukon ang mga kalingawan nga nagapaluya sina nga kaangtanan. (1 Corinto 15:33) Ginaapresyar man nila kon daw ano ka importante nga ipatuhoy kay Jehova ang pangamuyo, indi lamang sing makaisa ukon makaduha sa isa ka adlaw, kundi sing masunson. Ang lamharon ukon bag-ong mga Cristiano dapat labi na nga magpalambo sining suod nga kaangtanan kay Jehova paagi sa regular nga pagtuon kag pagpamalandong sa iya Pulong kag paagi sa Cristianong pagpakig-upod kag pag-alagad. Ginalaygayan kita: “Magpalapit sa Dios, kag sia magapalapit sa inyo.”—Santiago 4:8.

Ang Laygay nga Ginhatag ni Jesus

 8, 9. Anong positibo nga laygay nahanungod sa mga problema sa pangabuhi ang maaplikar naton?

⁸ Sa madamong kapungsoran, ang pagkawalay palamugnan kag kapiot sa pangabuhi amo ang daku nga kabangdanan sang kabalaka. Si Jesus naghatag sing positibo nga laygay nahanungod sining mga kabalaka: “Dili kamo maghimud-os nahanungod sang inyo kalag kon ano ang inyo kaunon ukon ano ang inyo imnon, bisan pa nahanungod sang inyo lawas kon ano ang inyo ipanaput. Indi bala ang kalag labi sa kalan-on kag ang lawas sa panapton?” (Mateo 6:25) Huo, ang kalag kag lawas, ukon ang bug-os nga pagkatawo, mas importante sang sa kalan-on kag panapton. Mapat-od sang mga alagad sang Dios nga buligan niya sila sa pagtigayon sa ila panguna nga mga kinahanglanon. Ginhatag ni Jesus ini nga halimbawa: “Tan-awa ang mga pispis sa langit, wala sila nagasab-ug ukon nagaani ukon nagatipon sa mga tambobo; kag ginapakaon sila sang inyo Amay nga langitnon. Indi bala kamo mahal pa sa ila?” (Mateo 6:26) Indi mahunahuna nga ang Dios magaaman para sa mga pispis apang magapatumbaya sa iya tawhanon nga mga alagad, nga labi pa ka mahal sa iya kag nga tungod sa ila ginhatag ni Cristo ang iya kabuhi.

⁹ Ginlig-on ini ni Jesus paagi sa pagpatuhoy sa mga lirio sa latagon nga wala nagapangabudlay ukon nagapamurong, apang “bisan pa si Solomon sa bug-os niyang himaya wala mapanapti subong sang isa sini sa ila.” Ang pagginahom ni Hari Solomon kilala bangod sa pagkahalangdon sini. Nian malugpayon nga namangkot si Jesus: “Indi bala magpapanapot [ang Dios] sing labi pa sa inyo?”—Mateo 6:28-32; Ambahanon ni Solomon 3:9, 10.

10. (a) Kay sin-o ginpatuhoy ang makalulugpay nga pinamulong ni Jesus? (b) Ano nga laygay ang ginhatag niya nahanungod sa palaabuton?

¹⁰ Apang, si Jesus nagpadayon sa pagpakita nga para lamang ini sa mga “nagapangita anay sang Ginharian kag sang iya pagkamatarong.” Sa bug-os nga kalibutan, ginaapresyar sang matuod nga mga Cristiano kon ano gid ang Ginharian sang Dios kag ginauna nila ini sa ila kabuhi. Naaplikar sa ila ang laygay ni Jesus: “Dili kamo maghimud-os nahanungod sang buwas, kay ang buwas may iya kaugalingon nga paghimud-os. Tuman na sa adlaw ang iya kalainan.” (Mateo 6:33, 34) Sa iban nga hambal, lubara ang tagsa ka problema nga nagautwas, kag indi pagpalibugi sing dinakaigo ang buwas.

11, 12. Paano nagbatyag ang iban nga mga Cristiano nga ginbuligan sila ni Jehova bilang sabat sa ila mga pangamuyo?

¹¹ Apang, ang kalabanan nga mga tawo nahuyog sa pagpalibog tuhoy sa palaabuton, labi na kon ang mga butang nagalain. Apang ang mga Cristiano sarang kag dapat magliso nga may pagtuo kay Jehova. Binagbinaga ang halimbawa ni Eleanor. Ang iya bana nagmasakit sing grabe, kag sa sulod sang isa ka tuig wala sia makatrabaho. May duha sia ka magamay nga kabataan kag tigulang nga amay nga pagaatipanon, gani indi sia puede makatrabaho sing bug-os tion. Nangayo sila kay Jehova sing bulig paagi sa pangamuyo. Isa ka aga, wala madugay pagkatapos sila makapangamuyo, nakita nila ang isa ka sobre sa idalom sang ganhaan. Nagaunod ini sing daku nga kantidad sang kuwarta—bastante nga ipangabuhi nila tubtob makatrabaho liwat ang bana. Daku gid ang ila pagpasalamat sa sining suno sa tion nga bulig. Wala sing Biblikanhon nga rason ang magpaabot sinang kaanggid nga butang nga mahanabo sa tagsa ka Cristiano nga nagakinahanglan, apang makapat-od kita nga pamatian ni Jehova ang aton mga singgit kag may ikasarang sia sa pagbulig sa aton sa lainlain nga paagi.

¹² Isa ka Cristianong balo sa nabagatnan nga Aprika ang nangita sing trabaho agod masagud ang iya duha ka magamay nga kabataan. Apang luyag gid niya nga magtrabaho sing tunga sa adlaw lamang agod makahinguyang sing tion upod sa ila. Sang makakita na sia sing trabaho, napilitan sia sa paghalin sang namat-od ang manedyer nga ginakinahanglan niya ang isa ka bug-os tion nga sekretarya. Bangod wala liwat sing trabaho, ining utod nga babayi hanuot nga nagpangayo sing bulig kay Jehova paagi sa pangamuyo. Tatlo ka semana sang ulihi, ginpangabay sia sang manedyer niya anay nga magbalik kag magtrabaho sing tunga sa adlaw lamang. Daku gid ang iya kalipay! Nagbatyag sia nga ginsabat ni Jehova ang iya mga pangamuyo.

Mag-ampo kay Jehova

13. (a) Ano ang buot silingon sang “pag-ampo”? (b) Ano ang aton Makasulatanhon nga mga halimbawa sang pag-ampo?

¹³ Tandai palihog nga sa tapos maglaygay nga “Dili kamo maghimud-os sa bisan ano,” si Pablo nagadugang, “kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.” (Filipos 4:6) Ngaa ginasambit ang “pag-ampo”? Ang tinaga nagakahulugan sing “hanuot nga pangabay,” ukon ‘nagapakiluoy nga pangamuyo.’ Nagadalahig ini sa pag-ampo sa Dios sing tuman ka hanuot, subong sa panahon sang daku nga kahuol ukon katalagman. Sang nabilanggo, ginpangabay ni Pablo ang mga masigka Cristiano nga mag-ampo tungod sa iya agod mabantala niya nga may kasidla ang “maayong balita . . . subong embahador nga may mga talikala.” (Efeso 6:18-20) Ang Romanong opisyal sa hangaway nga si Cornelio “nag-ampo [man] sing padayon sa Dios.” Daw ano sia ka malipayon sang ang isa ka anghel nagsiling: “Ang imo mga pangamuyo kag mga panglimos nagdangat nga handumanan sa atubangan sang Dios”! Kag daku gid ang iya pribilehiyo nga mangin sa tunga sang unang mga Gentil nga ginhaplasan sang balaan nga espiritu!—Binuhatan 10:1-4, 24, 44-48.

14. Paano naton nahibaluan kon bala ang hanuot nga pakiluoy kay Jehova dapat lamang himuon sing makaisa?

¹⁴ Takus talupangdon nga inang hanuot nga pakiluoy kay Jehova masunson nga wala ginahimo sing makaisa. Si Jesus nagpanudlo sa iya bantog nga Wali sa Bukid: “Padayon sa pagpangayo, kag kamo hatagan; padayon sa pagpangita, kag kamo makakita; padayon sa pagpanuktok, kag kamo pagabuksan.” (Mateo 7:7) Ginabadbad ini sang madamong bersion sang Biblia: “Pangayo . . . pangita . . . panuktok.” Apang ang orihinal nga Griego nagapaalinton sang ideya sang mapinadayunon nga buhat.

15. (a) Ngaa masinulub-on si Nehemias samtang nagaserbe sing alak kay Hari Artajerjes? (b) Paano nahimo ni Nehemias ang kapin pa sa paghimo sing malip-ot nga pangamuyo?

¹⁵ Sang si Nehemias nagaalagad sa Persiahanon nga hari nga si Artajerjes subong manugtagay sang alak, ginpamangkot sia sang hari kon ngaa masinulub-on sia. Si Nehemias nagsiling nga masinulub-on sia bangod kay nabalitaan niya nga ang Jerusalem yara sa isa ka nahapay nga kahimtangan. Nian ang hari namangkot: “Ano bala ang ginapangayo mo?” Gilayon nga nangamuyo si Nehemias kay Jehova sing bulig, sa walay duhaduha sing malip-ot, sing mahipos. Nian ginpangayo niya ang pahanugot sa pagpauli sa Jerusalem agod patindugon liwat ang iya hinigugmang siudad nga natawhan. Ginhatag ang iya pangabay. (Nehemias 2:1-6) Dugang pa, sa wala pa ang importante nga interbyu, si Nehemias naghinguyang sing inadlaw nga nagapakiluoy, nagaampo, kay Jehova sing bulig. (Nehemias 1:4-11) Nakita mo bala ang leksion sa sini para sa imo?

Si Jehova Nagasabat

16. (a) Anong pinasahi nga pribilehiyo ang gin-agom ni Abraham? (b) Ano ang aton matahom nga mga bulig nga magamit sa pagsabat sa aton mga pangamuyo?

¹⁶ Isa ka bes, si Abraham may pribilehiyo sa pagpakigsugilanon kay Jehova paagi sa mga anghel. (Genesis 22:11-18; 18:1-33) Bisan pa nga wala ina nagakatabo sa karon, ginhatagan kita sing matahom nga mga bulig nga wala sadto kay Abraham. Ang isa amo ang kompleto nga Biblia—ang wala nagakaubusi nga tuburan sang panuytoy kag paumpaw. (Salmo 119:105; Roma 15:4) Sing masami, ang Biblia nagahatag sa aton sang panuytoy kag laygay nga kinahanglan naton, si Jehova nagabulig sa aton sa pagpanumdom sa ginahunahuna nga mga teksto. Sing masami, ang konkordansia ukon ang isa sa madamong publikasyon sa Biblia nga gin-aman sang Dios paagi sa iya organisasyon makahatag sa aton sing sabat. Ang detalyado kag tul-id nga indese sa sining mga publikasyon isa pa ka hamili nga bulig sa pagpangita sa kinahanglanon nga impormasyon.

17. Sa anong mga paagi mahimo sabton ni Jehova ang aton mga pangamuyo, kag paano makabulig ang malulo kag mahinuklugon nga mga Cristiano?

¹⁷ Kon nalisang kita bangod sang isa ka problema ukon nasubuan ukon nagaluya ang buot, ang mga sabat sa aton mga pangamuyo mahimo nga magaabot sa iban man nga mga paagi. Halimbawa, ang isa ka pamulongpulong sa Biblia sa kongregasyon ukon kombension sang mga Saksi ni Jehova mahimo nga nagaunod sing eksakto nga “tambal” nga kinahanglan naton. Kon kaisa, ang pagpakigsugilanon sa isa ka Cristiano magahatag sing sabat sa problema naton. Madamong beses nga ang mga gulang sa kongregasyon nagahatag sing pagpalig-on ukon laygay. Bisan ang pagpautwas lamang sang aton tagipusuon sa isa ka hamtong, malulo, kag mahinaklugon nga Cristiano nga nagapamati sing maayo masunson nga nagahimo sa aton nga mahaw-asan sing daku. Matuod ina labi na kon ini nga abyan nagabulig sa aton sa pagdumdom sa Biblikanhon nga mga panghunahuna. Inang pagsugilanunay nagakuha sang mabug-at nga lulan sa aton hunahuna kag tagipusuon.—Hulubaton 12:25; 1 Tesalonica 5:14.

18. Anong pinasahi nga hilikuton ang makabulig sa mga Cristiano sa paglandas sa masubo nga mga tion, kag paano ini nakabulig sa isa ka lamharon nga payunir?

¹⁸ Ang lainlain nga dagway sang kasubo kinaandan sa sining “ital-ital nga tion nga mabudlay pakig-angotan.” (2 Timoteo 3:1) Ang mga tawo nagaluya ang buot kag nagakasubo bangod sang nanuhaytuhay nga rason. Mahimo man ini matabo sa mga Cristiano, kag mahimo ini mangin isa sa dimakalilipay nga eksperiensia. Apang, nasapwan sang madamo nga ang ila kasubo gilayon nga nangin kasadya paagi sa pagbantala sing maayong balita.a Natilawan mo bala ina? Kon nagabatyag sing kasubo, tilawi ang makigbahin sa isa ka dagway sang pag-alagad sa Ginharian. Ang pagpakighambal sa iban nahanungod sa Ginharian sang Dios masunson nga nagabulig sa imo sa pagbag-o sang imo panghunahuna halin sa negatibo pakadto sa positibo. Ang pagpakighambal nahanungod kay Jehova kag ang paggamit sang iya Pulong nagahatag sa imo sing kalipay—isa ka bunga sang iya espiritu—kag nagahimo sa imo sa pagbatyag sing tuhay. (Galacia 5:22) Nasapwan man sang isa ka lamharon nga payunir nga ang pagpabilin nga masako sa hilikuton sang Ginharian nagparealisar sa iya nga “kon ipaanggid sa problema sang iban, [ang iya] tuman ka diutay kag umalagi.”

19. Paano nalandas sang isa ka Cristiano nga mapigaw sing panglawas ang negatibo nga mga panghunahuna?

¹⁹ Kon kaisa, ang masinulub-on nga kahimtangan, ayhan bangod sang mga libog ukon mga problema, nagadul-ong sa kapung-aw. Naghimo ini sa iban nga magbugtaw sa gab-i nga nalisang, subong sang natabo kis-a sa isa ka may edad-edad nga Cristiano nga mapigaw sing panglawas. Apang natukiban niya nga nakabulig sing daku ang tinagipusuon nga pagpangamuyo. Kon magbugtaw sia nga nagabatyag sing kasubo, kalmado sia nga nagapangamuyo kay Jehova. Nagaayo ang iya pamatyag pagkatapos sini. Natukiban man niya nga makapaumpaw ang pagsulit gikan sa memorya sang makapalugpay nga mga teksto sa Biblia, kaangay sang Salmo 23. Sa nanuhaytuhay nga paagi, ang espiritu ni Jehova, nga nagapanghikot bilang sabat sa pangamuyo ukon paagi sa iya Pulong, nagabulig sa pag-ilis sa masinulub-on nga hunahuna sing isa nga makalilipay. Sang ulihi, mapensar na niya ang iya mga problema sing timbang kag kalmante, nagahangop kon paano ini malubad ukon nagabatyag nga mabakud sa pagbatas sini.

20. Ngaa ang sabat sa pangamuyo kon kaisa daw napalantang?

²⁰ Isa ini ka halimbawa sa kon paano ang pangamuyo makahatag sing sabat. Apang kon kaisa daw may pagpalantang sa pagtukib sang solusyon. Ngaa? Ayhan ang sabat dapat maghulat sa gintalana nga tion sang Dios. Mahimo nga sa iban nga hitabo ginapahanugutan sang Dios ang mga nagapangabay sa pagpakita sa kadakuon sang ila kabalaka, sa intensidad sang ila luyag, sa pagkamatinuoron sang ila debosyon. Naeksperiensiahan ina sang isa ka salmista!—Salmo 88:13, 14; ipaanggid ang 2 Corinto 12:7-10.

21. Ngaa daku nga pribilehiyo ang mangin isa ka Saksi ni Jehova karon, kag paano naton ginapakita ang apresasyon?

²¹ Bisan ano man ang matabo, ang pagpakig-angot sa Labing Gamhanan nga Dios sa pangamuyo isa ka nagapabakud sing pagtuo nga eksperiensia nga nagapahalipay sa aton gikan sa kasubo pakadto sa kompiansa. Daw ano ka makalilipay mahibaluan nga nagapamati kag nagasabat sia! Subong sang ginsulat ni Pablo sa kongregasyon sang Filipos, dapat kita magpangamuyo kag mag-ampo “nga may pagpasalamat.” (Filipos 4:6) Huo, sa adlaw-adlaw dapat naton ipautwas ang aton tagipusuon bilang pagpasalamat kay Jehova kag “magpasalamat sa tagsa ka butang.” (1 Tesalonica 5:18) Nagaamot ini sa isa ka suod kag mainit nga wagkus kag nagahatag sa aton sing paghidait. Ginapakita sang masunod nga artikulo kon daw ano ini ka importante para sa mga alagad ni Jehova sa sining makalilisang kag makatalagam nga tion.

[Mga footnote]

Ang umalagi nga kasubo tuhay sa grabe kag malawig nga kapung-aw, nga mas serioso kag masibud nga kahimtangan sang balatyagon kag isip. Tan-awa ang Awake! sang Oktubre 22, 1987, pahina 3-16.

Paano Mo Sabton?

◻ Ano nga mga butang ang nagatuga sing kalisang sa mga Cristiano?

◻ Ano ang magabulig sa imo sa paglandas sa paghimud-os?

◻ Ngaa makapat-od ang mga Cristiano nga buligan sila sang Dios sa ila panguna nga mga kinahanglanon?

◻ Ano ang buot silingon sang “pag-ampo,” kag paano ginapakita sang nagligad nga mga halimbawa sa kon paano nagasabat si Jehova?

◻ Sa anong mga paagi mahimo sabton ni Jehova ang aton mga pangamuyo?

[Laragway sa pahina 12]

‘Ginapakaon sang inyo langitnon nga Amay ang mga pispis. Indi bala nga mahal pa kamo sang sa ila?’