Nakita Mo na Bala ang Husto nga Relihion?

“Ang sahi sang pagsimba nga matinlo kag walay dagta gikan sa pagtamod sang aton Dios kag Amay amo ini.”​—⁠SANTIAGO 1:27.

 1, 2. (a) Sa panghunahuna sang madamo nga tawo, ano ang nagapat-od kon bala husto ang ila relihion? (b) Ano ang dapat binagbinagon sing serioso sa paghukom sa relihion?

NAGAKABUHI kita sa isa ka dag-on nga ang madamo nga tawo kontento na sa paghatag sa relihion sing diutay nga bahin sa ila kabuhi. Mahimo nga nagatambong sila sa pila ka relihioso nga serbisyo, apang pila lamang ang nagahimo sini sing tayuyon. Ang kalabanan nga tawo wala nagapati nga ang tanan nga iban pa nga relihion sayop kag ang sa ila husto. Ayhan nagapati lamang sila nga ang ila relihion amo ang husto para sa ila.

² Bangod sini, ang pamangkot nga, Nakita mo na bala ang husto nga relihion? nagakahulugan lamang sing, Nakita mo na bala ang relihion nga naluyagan mo? Ano ang nagapat-od kon ano ang luyag mo? Ang imo pamilya? Ang imo mga kaupod? Ang imo mga balatyagon? Daw ano ka serioso nga ginbinagbinag mo ang pagtamod sang Dios sa sini nga butang?

Paano Naton Mahibaluan ang Pagtamod sang Dios?

 3. (a) Agod mahibaluan naton ang pagtamod sang Dios, ano dapat ang matigayon naton? (b) Anong mga pamangkot ang dapat naton ipamangkot sa kon ngaa personal kita nga nagapati nga ang Biblia gikan sa Dios?

³ Agod mahibaluan naton kon ano ang ginahunahuna sang Dios mismo, dapat nga makatigayon kita sing kapahayagan gikan sa iya. Ang Biblia amo ang pinakadumaan nga libro nga nagapangangkon nga gin-inspirar sang Dios. (2 Timoteo 3:​16, 17) Apang masiling bala sing maminatud-on nga ini nga libro, kon ipaanggid sa tanan nga iban pa, nagaunod sing mensahe sang Dios para sa tanan nga katawhan? Paano mo sabton ina nga pamangkot, kag ngaa? Bangod bala amo sina ang pagtamod sang imo mga ginikanan? Bangod bala sang panimuot sang imo mga kaupod? Nausisa mo na bala mismo ang ebidensia? Ngaa indi himuon ina karon, nga ginagamit ang masunod nga apat ka ebidensia?

 4. Tuhoy sa pagkamatigayon sini, ano ang nagapakita nga ang Biblia, indi ang iban nga libro, naghalin sa Dios?

⁴ Pagkamatigayon: Ang mensahe nga halin gid sa Dios kag para sa bug-os nga pamilya sang tawo dapat nga matigayon nila. Matuod bala ina sa Biblia? Binagbinaga ini: Ang Biblia, sa kabug-usan ukon sa bahin, ginabalhag karon sa kapin sa 2,000 ka hambal. Suno sa Amer­ican Bi­ble So­cie­ty, sang halos isa ka dekada nga nagligad ang mga hambal nga sa amo nabalhag ang Biblia natigayon sang mga 98 porsiento sang populasyon sang kalibutan. Subong ginpakita sang Guin­ness Book of World Records, ang Biblia amo “ang pinakalapnag nga libro sa kalibutan.” Amo sina ang paabuton naton sa isa ka mensahe halin sa Dios nga gintuyo para sa katawhan sang tanan nga rasa kag pungsod kag hambal. (Ipaanggid ang Bugna 14:⁠6.) Wala sing iban nga libro sa kalibutan ang may rekord kaangay sina.

 5. Ngaa importante ang maragtason nga pundasyon sang Biblia?

⁵ Pagkamaragtason: Ang mahalungon nga pag-usisa sa mga kasaysayan sang Biblia nagapahayag sing isa pa ka paagi nga sa amo ang Biblia tuhay sa iban nga mga libro nga nagapangangkon nga balaan. Ang Biblia nagaunod sing maragtason nga mga katunayan, indi walay pamatuod nga mga sugilanon. Si Irwin Linton, nga subong isa ka abogado naanad na sa pag-analisar sang kon ano ang kinahanglanon subong pamatuod sa isa ka hukmanan, nagsulat: “Samtang ang mga sugilanon tuhoy sa gugma, mga leyenda kag butig nga pagtestigo mahalungon sa pagpahamtang sing mga hitabo nga may kaangtanan sa malayo nga duog kag walay kapat-uran nga tion, . . . ang mga kasaysayan sang Biblia nagahatag sa aton sang petsa kag duog sang mga butang nga ginasaysay sing sibu gid.” (Halimbawa, tan-awa ang 1 Hari 14:25; Isaias 36:1; Lucas 3:​1, 2.) Para sa mga tawo nga nagaliso sa relihion indi agod likawan ang katunayan kundi para sa kamatuoran, isa ini ka importante nga butang nga dapat binagbinagon.

 6. (a) Paano ang Biblia nagabulig gid sa isa ka tawo tuhoy sa mga problema sang kabuhi? (b) Sa anong tatlo ka paagi nagabulig ang Biblia sa isa ka tawo sa paglandas sang mapintas nga mga katunayan?

⁶ Pagkapraktikal: Ang mga serioso nga nagausisa sa Biblia makarealisar sa indi madugay nga ang mga sugo kag mga prinsipio sini wala ginatuyo sa pagpamintaha sa ila. Sa baylo, ginabalay sini ang isa ka dalanon sang pagkabuhi nga nagahatag sing benepisyo sa mga nagasunod sa sini. (Isaias 48:​17, 18) Ang paumpaw nga ginatanyag sini sa mga ginapiutan indi hapaw, napasad sa walay pulos nga mga pilosopiya. Sa baylo, nagabulig ini sa mga tawo sa paglandas sang mapintas nga mga katunayan sang kabuhi. Paano? Sa tatlo ka paagi: (1) paagi sa paghatag sing maayo nga laygay kon paano atubangon ang mga kabudlayan, (2) paagi sa pagpaathag kon paano mabaton ang mahigugmaon nga pagsakdag nga ginahatag sang Dios sa iya mga alagad karon, kag (3) paagi sa pagpahayag sang matahom nga palaabuton nga ginatigana sang Dios para sa mga nagaalagad sa iya, nagahatag sa ila sing malig-on nga mga rason sa pagsalig sa iya mga saad.

 7. (a) Ginagamit ang mga kasulatan nga ginsambit sa foot­note, ipaathag ang sabat sang Biblia sa isa sang dalagku nga mga hulusayon sang katawhan karon. (b) Ipakita kon paano ang laygay sang Biblia nagaamlig sa aton ukon nagabulig sa aton sa paglandas sang makapahuol nga kahimtangan.

⁷ Bisan pa ang laygay sang Biblia masami nga wala ginabaton sang mga nagasikway sa awtoridad kag nagapatuyang sa kabuhi, madamo ang nakarealisar nga ina nga sahi sang kabuhi wala makahatag sa ila sing matuod nga kalipay. (Galacia 6:​7, 8) Ang Biblia nagahatag sing prangka nga mga sabat sa mga pamangkot nahanungod sa aborsion, diborsio, kag homoseksuwalidad. Ang laygay sini isa ka pangamlig batok sa pag-abuso sa droga kag alkohol kag batok sa pagmasakit sing AIDS paagi sa nagadala sing balatian nga dugo ukon seksuwal nga pagkasalamwanan. Ginapakita sini sa aton kon paano makatigayon sing malipayon nga mga pamilya. Nagaaman ini sing mga sabat nga nagabulig sa isa ka tawo sa paglandas sang labing makapahuol nga mga kahimtangan sa kabuhi, lakip ang pagsikway sang suod nga mga katapo sang pamilya, malala nga balatian, kag pagkapatay sang isa nga hinigugma. Nagabulig ini sa aton nga mahangpan ang aton mga prioridad agod nga ang aton kabuhi mapuno sing kapuslanan sa baylo sang paghinulsol.a

 8, 9. (a) Ano nga tagna ang personal nga nagapahamuot sa imo subong pamatuod nga gin-inspirar ang Biblia? (b) Ano ang ginapamatud-an sang mga tagna sa Biblia tuhoy sa ginhalinan sini?

⁸ Tagna: Tumalagsahon ang Biblia subong isa ka libro sang tagna, isa ka libro nga nagasugid kon ano ang matabo sa palaabuton, kag ginahimo ini sing detalyado. Gintagna sini ang pagkalaglag sang dumaan nga Tiro, ang pagkapukan sang Babilonia, ang pagtukod liwat sa Jerusalem, ang pagbangon kag pagkapukan sang mga hari sang Medo-Persia kag Gresya, kag ang madamo nga hitabo sa kabuhi ni Jesucristo. Gintagna man sini sing detalyado ang mga kahimtangan sa kalibutan nga nagkalatabo sa sini nga siglo, kag ginapaathag sini ang kahulugan sini. Ginapakita sini kon paano ang mga problema nga indi masarangan sang tawhanon nga mga manuggahom pagalubaron, kag ginapakilala sini ang Manuggahom nga magadala sing dayon nga paghidait kag matuod nga kalig-unan sa katawhan.⁠b​—⁠Isaias 9:​6, 7; 11:​1-5, 9; 53:​4-6.

⁹ Talalupangdon nga ginapakita sang Biblia ang ikasarang sa pagtagna sang palaabuton sing sibu subong isa ka pagtilaw sa pagka-Dios. (Isaias 41:1–46:13) Ang Isa nga makahimo sini ukon makainspirar sa iban sa paghimo sini indi isa lamang ka walay kabuhi nga idolo. Indi sia isa lamang ka debotado nga tawo. Sia ang matuod nga Dios, kag ang libro nga nagaunod sina nga tagna amo ang iya Pulong.​—⁠1 Tesalonica 2:⁠13.

Husto Bala nga Relihion ang Tanan nga Nagagamit sing Biblia?

 10, 11. Subong ginpakita ni Jesus, bisan pa mahimo gamiton sang isa ka klerigo ang Biblia, ano ang makahimo sa relihion nga iya ginasakdag nga walay pulos?

¹⁰ Makatarunganon bala​—⁠mas importante pa, Makasulatanhon bala​—⁠ang maghinakop, nian, nga ang tanan nga relihion nga nagapangangkon nga nagagamit sing Biblia nagatudlo sing matuod nga relihion? Ang tagsatagsa bala nga nagadala ukon nagabalikwat sa Biblia nagapakita sing buhat sang husto nga relihion?

¹¹ Madamo nga klero, bisan pa may Biblia sila, ang nagagamit sang relihion subong paagi sa paghimaya sa ila kaugalingon. Ginasimbugan nila ang putli nga mga kamatuoran sing mga tradisyon kag tawhanon nga mga pilosopiya. Kalahamut-an bala sa Dios ang ila pagsimba? Nagakaigo nga gin-aplikar ni Jesucristo sa relihioso nga mga lider sang unang-siglo nga Jerusalem nga nagahimo sina gid, ang ginpamulong sang Dios paagi kay manalagna Isaias, nga nagasiling: “Ining katawhan nagatahod sa akon sa ila mga bibig, apang ang ila tagipusuon malayo sa akon. Walay pulos ang pagsimba nila sa akon, bangod ginatudlo nila ang mga sugo sang mga tawo subong mga doktrina.” (Mateo 15:​8, 9; 23:​5-10) Sing maathag, ina nga sahi sang relihion indi ang matuod nga relihion.

 12, 13. (a) Paano ang paggawi sang mga katapo sang isa ka iglesia makabulig sa isa ka tawo sa pagpat-od kon bala husto ang ila relihion? (b) Paano tamdon sang Dios ang aton pagsimba kon pilion naton subong mga kaupod ang mga ginasikway niya? (2 Cronica 19:⁠2)

¹² Ano kon ang mga bunga nga ginapatubas sang mga panudlo sang pila ka relihion, nga ginapakita sa kabuhi sang ila mga katapo nga may maayo nga tindog, dunot? Sa iya Sermon sa Bukid, si Jesus nagpaandam: “Andam kamo sa dimatuod nga mga manalagna . . . Sa ila mga bunga makilala ninyo sila. . . . Ang tagsa ka kahoy nga maayo nagapamunga sing maayo nga bunga, apang ang tagsa ka dunot nga kahoy nagapamunga sing walay pulos nga bunga.” (Mateo 7:​15-17) Matuod nga ang mga indibiduwal mahimo magsayop kag dapat tadlungon. Apang lain ang kahimtangan kon ang mga katapo sang iglesia, pati ang klero, nagapatuyang sa pagpakighilawas kag panghilahi, pagpakig-away, pagpahubog, kakagod, pagbinutig, espiritismo, pagsimba sa mga idolo​—⁠bisan diin sini ukon ini tanan​—⁠apang wala gihapon sing disiplina nga ginapadapat, kag ang mga nagapadayon sa paghimo sini wala ginatabog sa kongregasyon. Ang Biblia maathag nga nagasiling nga ang mga nagabuhat sining mga butang dapat paguwaon sa kongregasyon; wala sila sing duog sa Ginharian sang Dios. (Galacia 5:​19-21) Ang ila pagsimba indi kalahamut-an sa Dios, kag amo man ang aton pagsimba sa Dios kon pilion naton subong mga kaupod ang mga tawo nga iya ginasikway.​—⁠1 Corinto 5:​11-13; 6:​9, 10; Bugna 21:⁠8.

¹³ Maathag nga indi tanan nga grupo nga nagapangangkon nga nagagamit sing Biblia nagapakita sing buhat sang matuod nga relihion nga ginalaragway sini. Ano, nian, ang ginapakita sang Biblia subong nagapakilala nga mga tanda sang matuod nga relihion?

Pagkilala sa mga Tanda sang Matuod nga Relihion

 14. (a) Sa ano napasad ang tanan nga panudlo sang matuod nga relihion? (b) Daw ano ka madinalag-on sa sining pagtilaw ang mga panudlo sang Cristiandad tuhoy sa Dios kag sa kalag?

¹⁴ Ang mga panudlo sini malig-on nga napasad sa inspirado nga mga Kasulatan. “Ang bug-os nga Kasulatan gin-inspirar sang Dios kag mapuslanon sa pagpanudlo, sa pagsabdong, sa pagtadlong sang mga butang.” (2 Timoteo 3:16) Apang sa diin ang Balaan nga Biblia nagahambal tuhoy sa Trinidad sang Cristiandad? Kag sa diin nagatudlo ang Biblia, subong sang ginapanudlo sang klero, nga ang mga tawo may kalag nga nagalampuwas kon mapatay ang pisikal nga lawas? Napangabay na bala ninyo ang isa ka klerigo nga ipakita sa inyo ini nga mga panudlo sa inyo Biblia? Ang The New Encyclopædia Britannica nagasiling: “Ang tinaga nga Trinidad ukon ang maathag nga doktrina wala sa Bag-o nga Testamento.” Kag ang New Catholic Encylopedia nagabaton: “Sa tunga sang Apostoliko nga mga Amay, wala gid sing bisan isa sa ila ang may kaanggid sa sina nga panghunahuna ukon pagtamod.” Tuhoy sa ideya sang Cristiandad nga ang kalag nagapain sa lawas sa kamatayon, ginabaton sang mga eskolar sang iglesia nga ginhulam nila ini nga ideya gikan sa Griegong pilosopiya. Apang, wala ginasikway sang matuod nga relihion ang kamatuoran sang Biblia agod lamang ibulos ang pilosopiya sang tawo.​—⁠Genesis 2:7; Deuteronomio 6:4; Ezequiel 18:4; Juan 14:⁠28.

 15. (a) Paano ginapakilala sang Biblia ang Isa nga amo lamang ang dapat simbahon? (b) Ano ang ginabatyag sang matuod nga mga sumilimba tuhoy sa pagpalapit kay Jehova?

¹⁵ Ang matuod nga relihion nagasakdag sa pagsimba sa isa lamang ka matuod nga Dios, si Jehova. (Deuteronomio 4:35; Juan 17:⁠3) Sa pagpaathag sang Deuteronomio 5:9, si Jesucristo malig-on nga nagsiling: “Si Jehova nga imo Dios ang dapat mo simbahon, kag sa iya ka lamang dapat maghalad sing balaan nga pag-alagad.” (Mateo 4:10) Nahisanto sa sina, ginpakilala ni Jesus ang ngalan sang iya Amay sa iya mga disipulo. (Juan 17:26) Gintudluan ka bala sang imo relihion nga simbahon si Jehova? Nakilala mo bala ang Persona nga ginapakilala sina nga ngalan​—⁠ang iya mga katuyuan, mga hilikuton, mga kinaiya​—⁠amo kon ngaa ginabatyag mo nga ikaw masinaligon nga makapalapit sa iya? Kon matuod ang imo relihion, huo ang sabat.​—⁠Lucas 10:22; 1 Juan 5:⁠14.

 16. Ano ang kahulugan sang pagtuo kay Cristo para sa mga nagapakita sing buhat sang matuod nga relihion?

¹⁶ Ang isa ka importante nga bahin sang pagsimba nga kalahamut-an sa Dios amo ang pagtuo sa iya Anak, si Jesucristo. (Juan 3:36; Binuhatan 4:12) Wala ini nagakahulugan lamang sing pagpati nga sia nabuhi anay ukon nga sia isa anay ka talalupangdon nga tawo. Nagalakip ini sing pag-apresyar sa kon ano ang ginatudlo sang Biblia tuhoy sa bili sang ginhalad nga himpit nga tawhanon nga kabuhi ni Jesus kag sing pagkilala sa iya katungdanan karon subong langitnon nga Hari. (Salmo 2:​6-8; Juan 3:16; Bugna 12:10) Kon nagapakig-upod ikaw sa mga nagapakita sing buhat sang matuod nga relihion, nahibaluan mo nga sa adlaw-adlaw nga pagkabuhi nagapanikasog sila sing mahalungon sa pagtuman kay Jesus, sa pag-ilog sang iya halimbawa, kag sa pagpakigbahin sing personal kag sing makugi sa hilikuton nga ginpahimo niya sa iya mga disipulo. (Mateo 28:​19, 20; Juan 15:14; 1 Pedro 2:21) Kon indi ina matuod sa mga kaupod mo sa pagsimba, dapat ka mangusisa sa iban.

 17. Ngaa nagahalong ang matuod nga mga sumilimba nga magpabilin nga indi nadagtaan sang kalibutan, kag ano ang ginalakip sina?

¹⁷ Ang matuod nga pagsimba wala ginamusingan sang pagkanadalahig sa politika kag sa mga inaway sang kalibutan. (Santiago 1:27) Ngaa wala? Bangod nagsiling si Jesus tuhoy sa iya mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:16) Si Jesus wala magpasilabot sa politika, kag ginpunggan niya ang iya mga sumulunod sa paggamit sing mga hinganiban. (Mateo 26:52) Ang mga nagasunod sa ginasiling sang Pulong sang Dios ‘wala na nagatuon sa pagpakig-away.’ (Isaias 2:​2-4) Kon ang isa ka relihion nga imo ginaupud-upuran lamang wala nagasibu sa sina nga paglaragway, tion na nga utdon ang imo kaangtanan sa sini.​—⁠Santiago 4:4; Bugna 18:​4, 5.

 18. (a) Ano ang ginapakilala sang Juan 13:35 subong isa ka talalupangdon nga kinaiya sang matuod nga relihion? (b) Paano mo mabuligan ang isa ka tawo sa pagpat-od kon diin nga grupo ang nagasibu sa Juan 13:35?

¹⁸ Ang matuod nga relihion nagatudlo kag nagapakita sing dimakagod nga gugma. (Juan 13:35; 1 Juan 3:​10-12) Ina nga gugma wala ginahambal sa mga sermon lamang. Aktuwal gid nga ginatingob sini sa matuod nga pag-ululutod ang mga tawo gikan sa tanan nga kaliwatan, tanan nga kahimtangan sang pangabuhi, tanan nga hambal, tanan nga pungsod. (Bugna 7:​9, 10) Ginapain sini ang matuod nga mga Cristiano gikan sa kalibutan sa palibot nila. Kon wala mo pa mahimo ini, magtambong sa mga miting sa Kingdom Hall sang mga Saksi ni Jehova, subong man sa ila dalagku nga mga kombension. Tan-awa sila samtang nagapangabudlay sila sing tingob sa pagpatindog sing isa sang ila mga Kingdom Hall. Panilagi kon paano nila ginapakig-angutan ang mga tigulang (lakip ang mga balo) kag ang mga pamatan-on (lakip ang mga may isa lamang ka ginikanan ukon ilo na). (Santiago 1:27) Ipaanggid ang imo mapanilagan sa imo nakita na sa iban nga relihion. Nian pamangkuta ang imo kaugalingon, ‘Sin-o ang nagapakita sing buhat sang matuod nga relihion?’

 19. (a) Ano nga solusyon sa mga problema sang katawhan ang ginasakdag sang matuod nga relihion? (b) Ano dapat ang ginahimo sang mga katapo sang grupo nga nagasunod sa matuod nga relihion?

¹⁹ Ang matuod nga relihion nagasakdag sa Ginharian sang Dios subong amo ang dayon nga solusyon sa mga problema sang katawhan. (Daniel 2:44; 7:​13, 14; 2 Pedro 3:13; Bugna 21:​4, 5) May nagahimo bala sina sa mga iglesia sang Cristiandad? San-o ang katapusan nga tion nga nabatian mo ang isa ka klerigo nga nagapaathag sang Ginharian sang Dios kag kon ano ang ginapakita sang Kasulatan nga himuon sini? Ginapalig-on ka bala sang organisasyon nga imo ginatapuan sa pagpakighambal sa iban nahanungod sa Ginharian sang Dios, kag kon huo, nagapakigbahin bala sa sini ang tanan nga katapo sini? Ginhimo ni Jesus ang subong sina nga pagpanaksi; ginhimo ini sang iya unang mga disipulo. Ikaw man makatigayon sing pribilehiyo sa pagpakigbahin sa sining hilikuton. Amo ini ang labing importante nga hilikuton nga ginahimo sa nawong sang duta karon.​—⁠Mateo 24:⁠14.

 20. Dugang sa pagkilala sa husto nga relihion, ano dapat ang himuon naton?

²⁰ Bisan pa may linibo ka relihion, ginabuligan kita dayon sang Biblia nga madula ang pagkagumon agod makilala ang matuod. Apang kapin pa sa pagkilala lamang sini ang himuon naton. Importante nga iaplikar naton ini. Kon ano ang ginadalahig sini pagabinagbinagon sing maayo sa amon masunod nga artikulo.

[Mga footnote]

Paano Mo Sabton?

◻ Sa pagkilala sa husto nga relihion, kay sin-o pagtamod ang labing importante?

◻ Anong apat ka ebidensia ang nagatudlo sa Biblia subong amo ang Pulong sang Dios?

◻ Ngaa indi tanan sang relihion nga nagagamit sing Biblia kalahamut-an sa Dios?

◻ Ano ang anom ka nagapakilala nga tanda sang isa ka husto nga relihion?

[Kahon sa pahina 10]

Ang mga Saksi ni Jehova . . .

◆ Nagapasad sang tanan nila nga panudlo sa Biblia.

◆ Nagasimba sa isa ka matuod nga Dios, si Jehova.

◆ Nagakabuhi nahisanto sa ila pagtuo kay Jesucristo.

◆ Wala nadalahig sa politika kag sa mga inaway sang kalibutan.

◆ Nagatinguha sa pagpakita sing dimakagod nga gugma sa adlaw-adlaw nga pagkabuhi.

◆ Nagasakdag sa Ginharian sang Dios subong amo ang dayon nga solusyon sa mga problema sang katawhan.

[Piktyur sa pahina 9]

ANG BIBLIA​—⁠ano ang nagapakita nga nagaunod ini sing mensahe sang Dios para sa tanan nga katawhan?