Ang Kabuhi kag Ministeryo ni Jesus

Ginpamangkot Nahanungod sa Puasa

HALOS isa ka tuig na ang nagligad sugod sang magtambong si Jesus sa Paskua sang 30 C.E. Sini nga tion, si Juan Bautista bilanggo na sa pila ka bulan. Bisan pa handum niya nga ang iya mga gintoton-an mangin mga sumulunod ni Cristo, indi tanan nagsunod.

Karon ang pila sining mga gintoton-an sang nabilanggo nga si Juan nagpalapit kay Jesus kag namangkot: “Ngaa bala nagapuasa sing masunson kami kag ang mga Fariseo, apang ang imo mga gintoton-an wala nagapuasa?” Ang mga Fariseo makaduha magpuasa kada semana subong rito sang ila relihion. Kag mahimo nga amo man sini ang kinabatasan sang mga gintoton-an ni Juan. Mahimo man nga nagapuasa sila bilang pagkasubo sa pagkabilanggo ni Juan kag nagakatingala sila kon ngaa ang mga gintoton-an ni Jesus wala nagabuylog sa ila sa sining pagpabutyag sing kasubo.

Bilang sabat si Jesus nagpaathag: “Ang mga abyan sang nobyo wala sing rason nga magkasubo samtang kaupod nila ang nobyo, indi bala? Apang magaabot ang mga adlaw nga kuhaon sa ila ang nobyo, kag nian magapuasa sila.”

Dapat dumdumon sang mga gintoton-an ni Juan nga gintawag ni Juan mismo si Jesus subong Nobyo. Gani, samtang yara pa si Jesus, indi kabigon ni Juan nga nagakaigo ang magpuasa, kag subong man sang mga gintoton-an ni Jesus. Sa ulihi, kon mapatay na si Jesus, ang iya mga gintoton-an magakasubo kag magapuasa. Apang kon banhawon na sia kag magkayab sa langit, wala sila sing dugang pa nga rason sa pagpuasa subong pagkasubo.

Nian, ginsugid ni Jesus ining mga ilustrasyon: “Wala sing tawo nga nagabutang sing tukap nga bag-o gid sa panapton nga daan; kay ang tukap nagabingkas sang panapton kag nagadandan tapat ang gisi. Wala man sing tawo nga nagasulod sing bag-o nga alak sa mga panit nga daan; kay kon himuon nila, mabusdik ang mga panit, kag ang alak mauyang, kag ang mga panit maguba. Apang ginasulod sang mga tawo ang bag-ong alak sa mga panit nga bag-o.” Ano ang kaangtanan sining mga ilustrasyon sa pagpuasa?

Ginabuligan ni Jesus ang mga gintoton-an ni Juan sa paghangop nga indi nila dapat paabuton ang iya mga sumulunod sa pagsunod sang daan na nga mga buhat sang Judaismo, subong sang pagpuasa bilang rito. Wala sia magkari agod tukapan kag palawigon ang daan na nga sistema sang pagsimba nga buot na sikwayon. Ang Cristianismo indi dapat ipauyon sa Judaismo sadtong adlaw upod ang mga tradisyon sang mga tawo. Indi, indi ini mangin subong sang bag-o nga tukap sa daan nga panapton ukon subong sang bag-o nga alak sa panit nga daan. Mateo 9:14-17; Marcos 2:18-22; Lucas 5:33-39; Juan 3:27-29.

◆ Sin-o ang nagbuhat sing pagpuasa, kag para sa ano nga katuyoan?

◆ Ngaa wala magpuasa ang mga gintoton-an ni Jesus samtang kaupod niya sila, kag sa tapos sadto paano ang rason sa pagpuasa wala magdugay?

◆ Ano nga mga ilustrasyon ang ginsugid ni Jesus, kag ano ang kahulugan sini?

[Bug-os pahina nga retrato sa pahina 8]