Mga Pamaagi sa Pagbantala sing Maayong Balita

SUBONG aktibo nga manugbantala sing maayong balita, nagpahamtang si Jesus sing halimbawa sa iya mga sumulunod. Sia mismo ang nagpalapit sa mga tawo, nga nagapakig-istorya kag nagatudlo sa ila sa ila mga puluy-an kag sa publiko nga mga lugar. (Mat. 9:35; 13:36; Luc. 8:1) Nakighambal si Jesus sa mga indibiduwal, nagtudlo sing pribado sa iya mga disipulo, kag namulongpulong sa linibo ka tawo. (Mar. 4:10-13; 6:35-44; Juan 3:2-21) Ginkalitan niya ang tanan nga nagakaigo nga sitwasyon para maghatag sing pagpalig-on kag paglaum. (Luc. 4:16-19) Bisan pa sa tion nga kinahanglan na niya magpahuway kag magrelaks, ginkalitan niya gihapon ang kahigayunan nga magpanaksi. (Mar. 6:30-34; Juan 4:4-34) Kon mabasa naton ang rekord tuhoy sa ministeryo ni Jesus, indi bala mapahulag kita nga ilugon sia? Mapahulag gid kita, kaangay sang mga apostoles sang una.—Mat. 4:19, 20; Luc. 5:27, 28; Juan 1:43-45.

² Binagbinaga ang mga kahigayunan karon nga bukas sa mga Cristiano agod makapakigbahin sa hilikuton nga ginsugdan ni Jesucristo sang nagligad nga halos 2,000 ka tuig.

³ Subong mga Saksi ni Jehova, ginakilala naton nga importante ang organisado nga pagbantala sing maayong balita sang Ginharian sa pamalaybalay. Pirme gid naton ginagamit ini nga pamaagi, gani nakilal-an kita tungod sini. Ang maayo nga mga resulta sini nagapamatuod nga mapuslanon ini nga pamaagi para mabantalaan ang minilyon sa malip-ot nga tion. (Mat. 11:19; 24:14) Ini nangin praktikal nga paagi agod mapakita naton ang aton gugma kay Jehova kag sa aton isigkatawo.—Mat. 22:34-40.

⁴ Ang pamalaybalay nga pagbantala indi bag-o nga pamaagi sang mga Saksi ni Jehova. Si apostol Pablo nagapatuhoy sa iya pagpanudlo sa puluy-an sang mga tawo. Sa paglaragway sang iya ministeryo sa mga manugtatap sa Efeso, sia nagsiling: “Sugod sang una nga adlaw nga nag-abot ako sa Asia. . . . Wala ako magpugong sa pagsugid sa inyo sing bisan ano nga butang nga mapuslanon ukon sa pagtudlo sa inyo . . . sa mga balay.” Sa sini kag sa iban pa nga paagi, si Pablo nagpanaksi “sing maid-id sa mga Judiyo kag sa mga Griego nga dapat sila maghinulsol, magsimba sa Dios, kag magtuo sa aton Ginuong Jesus.” (Binu. 20:18, 20, 21) Sa sina nga tion, ginpalig-on sang Romano nga mga emperador ang idolatriya kag madamo ang ‘mahinadlukon sa mga dios.’ Kinahanglan gid pangitaon sang mga tawo ang “Dios nga naghimo sang kalibutan kag sang tanan nga butang sa sini,” ang Isa nga ‘nagpahayag sa tanan nga katawhan bisan diin nga dapat sila maghinulsol.’—Binu. 17:22-31.

⁵ Mas ginadalian pa gid karon ang pagbantala sing maayong balita sa mga tawo. Ang katapusan sining malauton nga sistema sang mga butang malapit na gid. Bangod sini, ginapalig-on kita nga dugangan ang aton mga panikasog. Wala na sing mas epektibo pa sangsa napamatud-an nga pamaagi nga pagpamalaybalay para pangitaon ang mga ginagutom sa kamatuoran. Epektibo ini karon kaangay sang panahon ni Jesus kag sang mga apostoles.—Mar. 13:10.

⁶ Makapakigbahin ka bala sing bug-os sa pamalaybalay nga ministeryo? Kon amo, makasiguro ka nga nahamuot si Jehova sa imo. (Ezeq. 9:11; Binu. 20:35) Mahimo nga indi mahapos para sa imo ang pamalaybalay nga ministeryo. Ayhan may pisikal ka nga kasablagan, ukon madamo sa inyo teritoryo ang wala nagapamati. Mahimo pa gani nga ginadumilian ini sang gobierno. Ayhan mahuluy-on ka, kag nabudlayan ka gid nga sugdan ang pagpakig-istorya sa mga indi mo kilala. Gani sa tion nga makigbahin ka sa pamalaybalay nga ministeryo, medyo ginakulbaan ka. Indi maluyahan sing buot. (Ex. 4:10-12) Ang imo kahimtangan kaangay man sa imo kauturan sa iban nga lugar.

⁷ Si Jesus nagsaad sa iya mga disipulo: “Dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.” (Mat. 28:20) Ini nga saad nagapabakod sa aton nga tudluan ang mga tawo agod mangin mga disipulo. Magabatyag kita pareho kay apostol Pablo, nga nagsiling: “Sa tanan nga butang may kusog ako paagi sa isa nga nagapabakod sa akon.” (Fil. 4:13) Kaliti gid ang mga kahimusan sang kongregasyon sa pagpakigbahin sa pamalaybalay nga pagpanaksi. Paagi sa pagbantala upod sa iban, makabaton ka sing pagpalig-on kag bulig. Magpangamuyo sing bulig para malandas ang bisan ano nga balagbag nga imo maatubang, kag manikasog gid subong manugbantala sing maayong balita.—1 Juan 5:14.

⁸ Samtang ginasugiran mo ang iban tuhoy sa maayong balita, may mga kahigayunan ka sa paghatag sing “pangatarungan tuhoy sa [imo] paglaum.” (1 Ped. 3:15) Mas mahangpan mo pa gid ang kinatuhayan sang mga nagalaum sa Ginharian kag sa mga wala nagalaum. (Isa. 65:13, 14) Matigayon mo ang kalipay sa paghibalo nga nangin matinumanon ka sa sugo ni Jesus nga ‘paiwagon ang imo kapawa,’ kag mahimo nga may pribilehiyo ka pa gani sa pagbulig sa iban nga makilala si Jehova kag mahibaluan ang kamatuoran nga nagadul-ong sa kabuhi nga wala sing katapusan.—Mat. 5:16; Juan 17:3; 1 Tim. 4:16.

⁹ May mga kahimusan sa pagpamalaybalay nga hilikuton sa talipuspusan sang semana subong man sa sulod sang semana. Sa mga lugar nga mabudlay maabtan ang mga tawo sa ila balay kon adlaw, ang pila ka kongregasyon may kahimusan sa pagpanaksi sa gab-i. Mahimo nga mas magbaton ang mga tawo sing mga bisita kon hapon ukon kasisidmon sangsa aga.

¹⁰ Ginsugo ni Jesus ang iya mga disipulo nga ‘pangitaon’ ang mga takus. (Mat. 10:11) Ang iya pagpangita sa mga takus indi lang limitado sa pamalaybalay nga ministeryo. Sa pagkamatuod, nagpanaksi sia sa tanan nga nagakaigo nga okasyon, sing pormal kag sing di-pormal. (Luc. 8:1; 1 Juan 4:7-15) Nagpanaksi man ang mga apostoles sa mga tawo sa nanuhaytuhay nga lugar.—Binu. 17:17; 28:16, 23, 30, 31.

¹¹ Tulumuron man naton karon nga mapalab-ot ang mensahe sang Ginharian sa tanan. Nagakahulugan ini nga ilugon naton ang pamaagi ni Jesus kag sang iya mga apostoles sa paghimo sing mga disipulo kag sa pagpahisuno sa mga pagbag-o sang tion kag sa nanuhaytuhay nga kahimtangan sang mga tawo sa aton teritoryo. (1 Cor. 7:31) Halimbawa, nangin madinalag-on ang mga manugbantala sa pagpakig-istorya sa mga tawo sa mga duog sang negosyo. Ang pagpanaksi sa dalan epektibo sa madamo nga pungsod, subong man ang pagpanaksi sa mga parke, mga palarkingan, ukon bisan diin nga may mga tawo. May pila ka kongregasyon nga nagpahamtang sang mga lamesa ukon masulusaylo nga mga displey sa ila teritoryo. Dugang pa, ang sanga talatapan mahimo mag-organisar sing special metropolitan public witnessing sa mga lugar sang siudad nga madamo katama sing tawo nga nagalabay, nga nagagamit sing mga utod halin sa pila ka kongregasyon. Subong resulta, ang mga indibiduwal nga wala sa ila balay kon magduaw ang mga manugbantala mahimo mabantalaan sing maayong balita sa iban nga lugar.

¹² Kon may maistorya kita sa publiko nga mga lugar nga nagpakita sing interes sa mensahe sang Biblia, mahimo kita magtanyag sang nagakaigo nga publikasyon. Para palambuon pa gid ang interes, mahimo nga ihatag mo sa interesado ang impormasyon kon paano ka niya makontak kag maghimo sang kahimusan para maduaw sia liwat, itudlo sa iya kon paano makakadto sa jw.org, ukon hatagi sia sang adres sang pinakamalapit nga duog nga ginahiwatan sang mga miting. Mahimo nga mangin makalilipay sa imo pagpasangkad sang imo ministeryo ang pagpanaksi sa mga tawo sa publiko nga mga lugar.

¹³ Apang, ang pagbantala sang maayong balita indi lamang ang hilikuton nga ginsugo sa mga Cristiano karon. Agod magmadinalag-on ka sa pagbulig sa iban nga batunon ang kamatuoran nga nagadul-ong sa kabuhi, dapat mo pirme duawon ang mga interesado agod mag-uswag sila kag mangin hamtong nga mga Cristiano.

¹⁴ Si Jesus nagsiling sa iya mga sumulunod: “Mangin saksi ko kamo . . . tubtob sa pinakamalayo nga bahin sang duta.” (Binu. 1:8) Apang ginsilingan man niya sila: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. . . . Tudlui ninyo sila nga tumanon ang tanan nga ginsugo ko sa inyo.” (Mat. 28:19, 20) Nagahatag sing kalipay sa pag-alagad kay Jehova ang mga pagduaw liwat. Ang mga tawo nga interesado sa maayong balita sa imo nahauna nga pagduaw mahimo nga malipay nga makita ka liwat. Paagi sa pagpaambit sa ila sing dugang nga impormasyon sa Biblia, mahimo mo mapabakod ang ila pagtuo sa Dios kag mabuligan sila nga mahibaluan ang ila espirituwal nga kinahanglanon. (Mat. 5:3) Kon nagahanda ka sing maayo kag nagahimo sing kahimusan sa pagduaw liwat sa oras nga kombeniente sa ila, mahimo mo masugdan ang pagtuon sa Biblia sa puluy-an. Amo ini ang imo tulumuron kon nagaduaw ka liwat. Wala lamang kita nagatanom sang binhi sang kamatuoran kundi nagabunyag man sa sini.—1 Cor. 3:6.

¹⁵ Ang iban mahimo nabudlayan sa paghimo sing mga pagduaw liwat. Mahimo nga maayo ka sa paghatag sang malip-ot nga presentasyon sa pagsugid sang maayong balita, kag nanamian ka gid sa sini nga bahin sang ministeryo. Apang kon nagahunahuna ka na gani nga balikan ang tagbalay agod padayunon ang paghambalanay sa Biblia, basi nabudlayan ka na. Ang maayo nga paghanda makadugang sang imo kaisog. Pat-ura nga gamiton ang praktikal nga mga panugda sa aton midweek meeting. Mahimo mo man updon ang isa ka mas eksperiensiado nga manugbantala.

¹⁶ Sang nagapakig-istorya sa Judiyo nga proselita nga nagabasa sang Pulong sang Dios, ang ebanghelisador nga si Felipe namangkot sa iya: “Nahangpan mo gid bala ang imo ginabasa?” Ang lalaki nagsabat: “Paano ko ini mahangpan kon wala sing magpaathag sa akon?” Ang kasaysayan sa Biblia nga narekord sa Binuhatan kapitulo 8 nagasugid dayon sa aton nga sugod sa dinalan sang Kasulatan nga ginabasa sang lalaki, “ginbantala [ni Felipe] sa iya ang maayong balita tuhoy kay Jesus.” (Binu. 8:26-36) Wala kita nakahibalo kon daw ano kadugay ang ginhinguyang ni Felipe upod sa lalaki, apang ginpaathag ni Felipe ang maayong balita amo nga ang lalaki nangin tumuluo kag nagpangabay nga bawtismuhan. Nangin disipulo sia ni Jesucristo.

¹⁷ Madamo subong ang indi pamilyar sa Biblia, gani mahimo nga kinahanglan ang pila ka pagduaw liwat kag ang detalyado nga pagtuon sing sinemana, binulan, ukon isa pa gani ka tuig ukon kapin pa antes sila magtuo kag mangin kalipikado sa bawtismo. Apang ang imo pagpailob kag mahigugmaon nga pagbulig sa mga interesado nga mangin mga disipulo makalilipay gid, subong sang ginsiling ni Jesus: “Mas malipayon ang nagahatag sangsa nagabaton.”—Binu. 20:35.

¹⁸ Pat-od nga gusto mo nga magdumala sing pagtuon sa Biblia nga ginagamit ang isa sa mga publikasyon nga gindesinyo gid para sa sini nga katuyuan. Kon imo iaplikar ang instruksion nga ginahatag sa midweek meeting kag mangabudlay upod sa eksperiensiado nga mga manunudlo sa kongregasyon, makadumala ka sing mainuswagon nga mga pagtuon, nga nagabulig sa iban nga mangin disipulo ni Jesucristo.

¹⁹ Kon kinahanglan mo ang bulig sa pagsugod kag sa pagdumala sing pagtuon sa Biblia sa puluy-an, makig-istorya sa isa sa mga manugtatap ukon sa isa sa mga utod nga epektibo sa pagtuon sing Biblia. Ang mga panugda sa Pagkabuhi kag Pagministeryo nga Workbook Para sa Miting kag ang pasundayag parte sa sini sa miting makabulig man sa imo. Magsalig kay Jehova, kag ipangamuyo ang imo handum. (1 Juan 3:22) Gani tubtob posible, himua nga tulumuron ang pagdumala sing pagtuon sa Biblia sa puluy-an luwas pa sa pagtuon nga imo ginadumalahan sa imo pamilya. Paagi sa pagdumala sing mga pagtuon sa Biblia, madugangan ang imo kalipay sa ministeryo.

²⁰ Kon ginabuligan naton ang mga tawo nga makilala si Jehova nga Dios kag mangin disipulo ni Jesucristo, mangin bahin sila sang kongregasyon. Ang mga estudyante sang Biblia nagauswag sa espirituwal kag pagkahamtong kon kilalahon nila ang organisasyon ni Jehova kag magkooperar sa sini. Importante gid ang pagtudlo sa ila kon paano ini himuon. Ang mga video kag ang brosyur nga Sin-o ang Nagahimo sang Kabubut-on ni Jehova Subong? ilabi na nga ginhanda para sa sini nga katuyuan. Mahimo man makabulig ang pila ka impormasyon sa Kapitulo 4 sini nga libro.

²¹ Sa umpisa pa lang sang imo mga paghinun-anon sa Biblia, buligi ang estudyante nga mahangpan nga si Jehova may ginagamit nga organisasyon agod matuman ang pagbantala karon sa duta. Ipakita sa iya ang kapuslanan sang mga bulig sa pagtuon sa Biblia, kag ipaathag kon paano ini ginabalhag kag ginapanagtag sa bug-os nga kalibutan sang mga boluntaryo nga dedikado sa Dios. Agdaha ang imo mga estudyante sa Biblia nga mag-upod sa imo sa mga miting sa Kingdom Hall. Ipaathag kon paano ginadumalahan ang mga miting, kag ipakilala sia sa mga nagtambong. Mahimo nga gusto mo man sia buligan nga makilala ang iban nga Saksi sa mga asembleya kag kombension. Sa sini kag sa iban pa nga pagtilipon, tuguti ang bag-uhan nga maobserbahan nila mismo kon paano ginapakita sang katawhan ni Jehova ang gugma—ang nagapakilala nga tanda sang matuod nga mga Cristiano. (Juan 13:35) Samtang nagauswag ang apresasyon sang interesado sa organisasyon ni Jehova, magasuod pa gid sia kay Jehova.

²² Ang una nga mga Cristiano nangin makugi nga mga manugbantala sang Pulong sang Dios. Naghimo sila sing mga kopya sang Kasulatan para magamit sing personal kag para sa pagtuon sa kongregasyon. Ginsugid nila ang kamatuoran sa Pulong sang Dios sa iban. Ang ila sinulat nga mga kopya diutay lamang kag ginpakabahandi gid nila ini. (Col. 4:16; 2 Tim. 2:15; 3:14-17; 4:13; 1 Ped. 1:1) Subong, nagagamit ang mga Saksi ni Jehova sing moderno nga mga pamaagi sa pag-imprinta para mabalhag ang ginatos ka milyon nga Biblia kag mga bulig sa pagtuon sa Biblia. Nagalakip ini sang mga tract, brosyur, libro, kag magasin sa ginatos ka lenguahe.

²³ Samtang ginapaambit mo ang maayong balita sa iban, pat-ura nga ginagamit mo sing maayo ang mga bulig sa pagtuon sa Biblia nga gin-aman sang organisasyon ni Jehova. Bangod nahibaluan mo nga daku ang imo nabenepisyo sa pagbasa kag pagtuon sang mga publikasyon sang mga Saksi ni Jehova, mapahulag ka nga ipaambit ini sa iban.—Heb. 13:15, 16.

²⁴ Nagadamo pa gid ang nagagamit sang Internet bilang panguna nga kuluhaan sing impormasyon. Gani, magluwas sa mga literatura sa Biblia, epektibo man sa pagpalapnag sang maayong balita ang aton opisyal nga website, ang jw.org. Ang mga tawo sa bilog nga kalibutan makagamit sang kompyuter para mabasa ukon mapamatian ang mga rekording sang Biblia kag mga literatura sa Biblia sa ginatos ka lenguahe. Ang mga nagapangalag-ag sa pagpakig-istorya sa aton ukon nagaistar sa mga lugar nga talagsa lang makaistorya sang mga Saksi ni Jehova makausisa sang aton mga pagpati paagi sa jw.org sa ila puluy-an.

²⁵ Gani, ginapahibalo naton ang parte sa jw.org kon may kahigayunan kita. Kon mamangkot ang tagbalay parte sa aton mga pagpati, magamit naton ang mobile device ukon kompyuter para mapakita sa iya ang sabat sa sina mismo nga tion. Kon makaistorya kita sang isa nga tuhay sing lenguahe, lakip na ang sign language, mahimo naton matudlo sa iya ang aton website para makakita sing Biblia kag mga literatura sa Biblia sa iya lenguahe. Madamo nga manugbantala nga nakagamit sang isa sa mga video sa aton website ang nakasugod sing paghinun-anon sa Biblia.

²⁶ Si Jesus nagsiling sa mga nagapamati sa iya pulong: “Kamo ang kapawa sang kalibutan. . . . Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” (Mat. 5:14-16) Ginapakita sini nga mga disipulo ang mga pamaagi sang Dios paagi sa pag-ilog kay Jesus, nga nagsiling parte sa iya kaugalingon: “Ako ang kapawa sang kalibutan.” Si Jesus nagpahamtang sing halimbawa para sa mga Cristiano sa pagpaiwag sing “kapawa sang kabuhi” para sa kaayuhan sang mga magapamati.—Juan 8:12.

²⁷ Si apostol Pablo nagpahamtang man sing halimbawa agod ilugon naton. (1 Cor. 4:16; 11:1) Samtang didto sa Atenas, nagpanaksi sia adlaw-adlaw sa mga tawo sa tiendahan. (Binu. 17:17) Ang mga Cristiano sa Filipos nag-ilog sa iya halimbawa. Bangod sina, si Pablo nakasulat sa ila nga nagaistar sila “sa tunga sang tiko kag balingag nga kaliwatan,” nga sa tunga nila “nagasiga sila subong mga suga sa kalibutan.” (Fil. 2:15) Mapaiwag man naton karon ang kamatuoran sang Ginharian paagi sa aton mga ginahambal kag ginahimo kon may kahigayunan kita sa pagsugid sa iban tuhoy sa maayong balita. Matuod, ang aton maayo nga halimbawa subong bunayag kag matarong nga mga tawo mahimo magpakita nga tuhay kita sa kalibutan. Apang, kon sugiran naton sila sang maayong balita, mahibaluan nila kon ngaa tuhay kita.

²⁸ Ginasugid sang madamo nga Saksi ni Jehova ang maayong balita sa ila masugilanon sa ulubrahan, sa eskwelahan, kon nagabiyahe, ukon bisan diin samtang ginahimo nila ang ila mga hilikuton kada adlaw. Kon nagabiyahe kita, mahimo may kahigayunan kita nga masugilanon ang kaupod naton nga pasahero. Dapat kita mangin alisto sa mga kahigayunan agod ang ordinaryo nga paghambalanay mangin pagpanaksi. Mangin handa kita sa pagpakig-istorya sa iban sa tagsa ka nagakaigo nga kahigayunan.

²⁹ Mapahulag kita sa paghimo sini kon dumdumon naton nga ginadayaw naton ang aton Manunuga kag ginapadunggan ang iya ngalan. Dugang pa, mabuligan man naton ang mga interesado nga makilala si Jehova agod maalagad man nila sia kag matigayon nila ang paglaum nga kabuhi paagi sa pagtuo kay Jesucristo. Nahamuot gid si Jehova sa sini nga mga panikasog kag ginakabig ini nga sagrado nga pag-alagad.—Heb. 12:28; Bug. 7:9, 10.

³⁰ Kabubut-on ni Jehova nga mabantala ang mensahe sang Ginharian sa bug-os nga kalibutan, sa mga siudad kag sa mga uma. Bangod sini, ang mga kongregasyon subong man ang kauturan nga nagapangalagad sa naligwin nga mga lugar, nagabaton sing mga teritoryo gikan sa sanga talatapan. (1 Cor. 14:40) Nahisanto ini sa kahimusan sang unang siglo nga gintuytuyan sang Dios. (2 Cor. 10:13; Gal. 2:9) Bangod sang madasig nga pag-uswag sang pagbantala sang Ginharian sa sining katapusan nga mga adlaw, daku ang mahimo kon organisado gid ang kahimusan sa pagpanghikot sa teritoryo sang kongregasyon.

³¹ Ini nga kahimusan ginadumalahan sang manugtatap sang pag-alagad. Ang isa ka ministeryal nga alagad mahimo nga amo ang aktual nga magaasayn sang teritoryo. May duha ka sahi sang teritoryo, mga teritoryo sang grupo kag personal nga mga teritoryo. Kon gamay lang ang teritoryo, ang mga manugtatap sang grupo may mga teritoryo sang grupo nga mahimo mabantalaan sang manugbantala sa iya grupo. Sa pihak nga bahin, kon malapad ang teritoryo, mahimo mangayo sing personal nga mga teritoryo ang indibiduwal nga mga manugbantala.

³² Ang manugbantala nga may personal nga teritoryo mahimo makabantala sa tion nga wala sing mga miting para sa pag-alagad sa latagon ukon kon indi praktikal nga mag-upod sia sa grupo. Halimbawa, ang pila ka manugbantala nakakuha sing teritoryo nga malapit sa ila ginaubrahan kag nagabantala diri sa tion sang tigpalanyaga ukon sa tapos sang trabaho. Ang pila ka pamilya nakakuha sing personal nga teritoryo malapit sa ila balay, kag nagabantala diri kon gab-i. Bangod malapit ang personal nga teritoryo, mahimo ini makabulig sa manugbantala nga makahinguyang sing madamo nga oras sa pag-alagad sa latagon. Siempre, mahimo man bantalaan sang grupo ang personal nga mga teritoryo. Kon gusto mo nga may personal ka nga teritoryo, mahimo ka makapangabay sa alagad sang teritoryo.

³³ Teritoryo man ini sang grupo nga nakuha sang manugtatap sang grupo ukon personal nga teritoryo nga nakuha sang manugbantala, ang manugbantala nga ginhatagan sang teritoryo magapat-od nga ang makatarunganon nga panikasog nahimo agod mapanaksihan ang mga tawo sa tagsa ka puluy-an. Ang mga kahimusan sa pagkobre sang teritoryo dapat nagasunod sa naaplikar nga mga kasuguan parte sa pagkuha kag paggamit sang personal nga mga impormasyon ukon data protection laws. Ang manugtatap sang grupo ukon manugbantala nga ginhatagan sing teritoryo dapat manikasog nga matuptupan ini sa sulod sang apat ka bulan. Kon matuptupan na ini, dapat pahibaluon niya ang alagad sang teritoryo. Depende sa kahimtangan, mahimo huptan sang manugtatap sang grupo ukon manugbantala ang teritoryo agod bantalaan ini liwat ukon mahimo man ibalik ini sa alagad sang teritoryo.

³⁴ Kon ang tanan nga katapo sang kongregasyon magkooperar, ang teritoryo mahimo matuptupan sing maid-id. Malikawan man ang dungan nga pagtuptop sa isa ka lugar sang duha ukon kapin pa ka manugbantala, nga mahimo makapaakig sa mga tagbalay. Sa sini nga paagi, mapakita naton ang konsiderasyon sa aton mga utod kag sa mga tawo sa teritoryo.

³⁵ Ang tanan dapat nga makatuon parte kay Jehova nga Dios, sa iya Anak, kag sa Ginharian. (Bug. 14:6, 7) Interesado kita nga buligan ang mga tawo sa tanan nga lenguahe nga magtawag sa ngalan ni Jehova para maluwas kag magsul-ob sang Cristianong personalidad. (Roma 10:12, 13; Col. 3:10, 11) Ano ang pila ka kabudlayan sa pagbantala sang maayong balita sa teritoryo nga may nagkalainlain nga lenguahe? Ano ang maayo nga himuon sa sini agod mabatian sang madamo ang mensahe sang Ginharian sa lenguahe nga ila mahangpan?—Roma 10:14.

³⁶ Ang gin-asayn nga teritoryo sa tagsa ka kongregasyon ginbase sa lenguahe sang kongregasyon. Gani, sa mga teritoryo nga may nagkalainlain nga lenguahe, ang mga manugbantala halin sa nagkalainlain nga kongregasyon mahimo nga magbantala sa pareho nga teritoryo. Sa sini nga kahimtangan, labing maayo sa mga manugbantala sa tagsa ka kongregasyon nga magkonsentrar sa pagbantala sa mga tawo nga nagahambal sang ila lenguahe. Maaplikar man ini sa tion sang kampanya nga pagpangimbitar kada tuig. Apang, kon nagapakigbahin sa publiko kag di-pormal nga pagpanaksi, mahimo bantalaan sang mga manugbantala ang bisan sin-o kag tanyagan sing literatura sa bisan ano nga lenguahe.

³⁷ Sa pila ka kahimtangan, indi makobrehan sing regular sang lain sing lenguahe nga kongregasyon ang ila mas malayo nga teritoryo. Sa amo nga kahimtangan, ang nadalahig nga mga manugtatap sang pag-alagad sang mga kongregasyon dapat makigkomunikar sa isa kag isa agod nga makahimo sila sing sistema sa pagtuptop sang teritoryo. Nagahatag ini sa tanan sing kahigayunan nga makapamati sang mensahe sang Ginharian kag malikawan ang indi kinahanglanon nga pagsulit sa pagtuptop sang teritoryo.—Hulu. 15:22.

³⁸ Ano ang dapat himuon kon ang masugilanon mo sa ganhaan nagahambal sing tuhay nga lenguahe? Indi paghaumhauma nga mabantalaan sia sang manugbantala nga nagahambal sang iya lenguahe. Ang pila ka manugbantala nagtuon sing simple nga presentasyon sa lenguahe sang mga tawo nga masami nila maistorya sa ila teritoryo. Ipakita naton sa tawo kon paano niya basahon ukon i-download ang mga literatura sa iya lenguahe sa aton opisyal nga website, ang jw.org, ukon hambalan naton sia nga dal-an sia sing literatura sa iya lenguahe.

³⁹ Kon ang tawo interesado gid, dapat tinguhaan naton nga makakita sang kalipikado nga utod nga makabulig sa iya sa lenguahe nga iya nahangpan. Mahimo ihambal man naton sa iya ang malapit nga ginahiwatan sang miting sa iya lenguahe. Kon luyag niya nga makontak sang isa nga nagahambal sang iya lenguahe, ipakita naton sa iya kon paano magbutang sa jw.org sang impormasyon agod makontak sia. Ang sanga talatapan naman magatinguha nga makakita sing malapit nga manugbantala, grupo, ukon kongregasyon nga magapadayon sa pagbulig sa iya.

⁴⁰ Tubtob indi maghambal ang tawo nga ginkadtuan sia sang isa nga nagahambal sang iya lenguahe, dapat naton ipadayon ang pagduaw sa iya. Sa pila ka kahimtangan, ginapahibalo sang sanga talatapan ang mga gulang nga wala sila sing makita nga utod nga nagahambal sang lenguahe sang tawo. Kon matabo ini, dapat naton himuon ang aton bug-os nga masarangan para mapadayon ang pagtatap sa interes sang tagbalay. Kon posible, tun-an naton sia sa Biblia, ayhan sa bulig sang publikasyon sa iya lenguahe. Kon gamiton naton sing maayo ang mga piktyur kag ipabasa sa tawo ang mga ginsambit nga teksto, matigayon niya ang sadsaran nga panudlo sang Biblia. Ang miembro sang iya pamilya nga nakahibalo sing maayo sang iya lenguahe kag sang imo lenguahe mahimo nga luyag mangin interpreter.

⁴¹ Para magiyahan ang interesado sa organisasyon sang Dios, dapat naton sia agdahon sa aton mga miting, bisan pa mahimo indi niya mahangpan sing maayo ang programa. Kon basahon ang mga teksto, mabuligan naton sia sa pagpangita sini paagi sa paggamit sang Biblia sa iya lenguahe kon may yara sini. Ang pagpakig-upod mismo sa iban sa kongregasyon makapabakod kag makabulig sa iya nga mag-uswag sa espirituwal.

⁴² Mga pregroup: Ang pregroup ginatapuan sang pila ka manugbantala nga nagabantala sa lenguahe nga lain sa lenguahe sang teritoryo sang kongregasyon, bisan wala sing kalipikado nga gulang ukon ministeryal nga alagad nga magdumala sang miting sa sina nga lenguahe kada semana. Kilalahon sang sanga talatapan ang isa ka kongregasyon bilang host sang isa ka pregroup kon:

1. (1) May rasonable nga kadamuon sa teritoryo sang nagahambal sang lenguahe nga tuhay sa lenguahe sang kongregasyon.

2. (2) May pila ka manugbantala nga nagahambal sang amo nga lenguahe ukon handa nga tun-an ini nga lenguahe.

3. (3) Handa ang hubon sang mga gulang nga dumalahan ang pag-organisar sang pagbantala sa sina nga lenguahe.

Kon luyag sang hubon sang mga gulang nga mag-host sang isa ka pregroup, konsultahon nila ang manugtatap sang sirkito. Mahimo nakahibalo sia kon may iban nga kongregasyon nga nagaplano nga magbantala sa sina nga lenguahe kag makahatag sia sing kinahanglanon nga impormasyon nga makabulig sa pagpat-od kon diin nga kongregasyon ang mas maayo nga mag-host sang pregroup. Kon mapat-od na ang kongregasyon, magapadala ang mga gulang sing sulat sa sanga talatapan para pangabayon nga kilalahon ang ila kongregasyon bilang host sang pregroup.

⁴³ Mga grupo: Kilalahon sang sanga talatapan ang isa ka kongregasyon bilang host sang isa ka grupo kon:

1. (1) May bastante nga mga interesado kag may potensyal nga mag-uswag ang teritoryo sina nga lenguahe.

2. (2) May diutay nga mga manugbantala nga nagahambal sina nga lenguahe ukon nagatuon sini.

3. (3) Isa ka kalipikado nga gulang ukon ministeryal nga alagad nga makapanguna kag makadumala sing bisan isa ka miting kada semana sa sina nga lenguahe—ukon isa ka bahin sang miting kada semana, subong sang pamulongpulong publiko ukon Pagtinuon sa Ang Lalantawan—sa sina nga lenguahe.

Kon malab-ot ina nga mga kinahanglanon sa makatarunganon nga kasangkaron, ang hubon sang mga gulang magapadala sing sulat lakip ang kompleto nga detalye sa sanga talatapan nga nagapangabay nga kilalahon ang ila kongregasyon bilang host sang grupo. Ang gulang ukon ministeryal nga alagad nga nagapanguna kabigon nga “manugtatap sang grupo” ukon “alagad sang grupo” nga responsable sa pagtatap sa grupo.

⁴⁴ Kon grupo na, ang hubon sang mga gulang sang host nga kongregasyon magapat-od kon bala ang iban nga bahin sang mga miting sang kongregasyon idugang kag kon daw ano ini kasunson hiwaton kada bulan. Ang mga miting para sa pag-alagad sa latagon mahimo man maiskedyul para sa grupo. Ang tanan sa grupo nagapanghikot sa pagdumala sang hubon sang mga gulang nga nag-host sa grupo. Ang mga gulang magahatag sing balanse nga panuytoy kag magapakita sing inisyatibo sa pag-atipan sa mga kinahanglanon sang grupo. Kon manghikot ang manugtatap sang sirkito sa grupo sa semana sang iya duaw sa host nga kongregasyon, mapadala sia sa sanga talatapan sing malip-ot nga report parte sa pag-uswag sang grupo kag sambiton niya ang bisan ano nga espesipiko nga mga kinahanglanon. Pagligad sang tion, mahimo mangin kongregasyon ang grupo. Kon iaplikar sang tanan nga nagapanghikot ang teokratiko nga mga panuytoy, mahamuot gid si Jehova.—1 Cor. 1:10; 3:5, 6.

⁴⁵ Ang dedikado nga mga Cristiano may personal nga responsibilidad sa pagpaambit sang maayong balita sa iban. Madamo sing paagi nga mahimo ini, apang ginaapresyar sang kalabanan sa aton nga makagua sa pag-alagad sa latagon upod sa iban. (Luc. 10:1) Bangod sini, ang mga kongregasyon nagatipon para sa pag-alagad sa latagon sa mga talipuspusan sang semana subong man sa sulod sang semana. Ang mga piesta opisyal nagahatag man sing maayo nga mga kahigayunan para sa grupo nga pagpanaksi, kay madamo nga utod ang wala sing trabaho. Ang Komite sa Pag-alagad sang Kongregasyon amo ang nagahimo sang mga kahimusan para sa mga miting sa pag-alagad sa latagon sa kombeniente nga tion kag tilipunan sa adlaw kag sa gab-i.

⁴⁶ Ang grupo nga pagpanaksi nagahatag sing kahigayunan sa mga manugbantala nga makapanghikot upod sa iban kag “makapalig-unay.” (Roma 1:12) Ang bag-uhan nga mga manugbantala makapanghikot upod sa hanas kag eksperiensiado nga mga manugbantala kag mahanas sila. Sa iban nga lugar, mas maayo nga duha ukon kapin pa ka manugbantala ang mag-updanay para luwas sila sa katalagman. Bisan pa nagaplano ka sa pagbantala sing isahanon sa teritoryo, ang pagtipon upod sa grupo makapalig-on sa tanan. Ang paghibalo nga nagbantala man ang iban sa sina nga duog, nagahatag sa imo sing kompiansa. Ang mga payunir kag ang iban pa indi dapat magbatyag nga obligado sila nga suportahan ang tanan nga miting para sa pag-alagad sa latagon nga gin-organisar sang kongregasyon, ilabi na kon adlaw-adlaw ina ginahiwat. Apang, mahimo nga masuportahan nila ang pila ka miting para sa pag-alagad kada semana.

⁴⁷ Kabay nga sundon naton tanan ang pagsulundan nga ginpahamtang ni Jesus kag sang iya mga apostoles! Makapat-od kita nga pakamaayuhon ni Jehova ang aton panikasog nga makapakigbahin sing bug-os sa importante nga hilikuton nga pagbantala sining maayong balita sang Ginharian.—Luc. 9:57-62.