Si Jesucristo​—Ang Hinigugma nga Anak sang Dios

“Subong man, may tingog gikan sa langit nga nagsiling: ‘Ini ang akon Anak, nga hinigugma, nga akon nahamut-an.’ ”​—⁠MATEO 3:⁠17.

 1, 2. (a) Anong simple nga kamatuoran ang ginatudlo sang Biblia tuhoy sa labing gamhanan nga Dios kag kay Jesucristo? (b) Ano ang ginatudlo sang mga relihion sang Cristiandad?

GINBAWTISMUHAN si Jesucristo sa edad nga 30 paagi sa pagtum-oy sa iya sa tubig. Sang magguwa sia sa tubig, may tingog sa langit nga nagsiling: “Ini ang akon Anak, nga hinigugma, nga akon nahamut-an.” (Mateo 3:17) Tingog yadto sang Dios. Sa isa pa ka okasyon, sang nagapangamuyo sa Dios, si Jesus nagsiling: “Amay, himayaa ang imo ngalan.” Kag sang masiling ina ni Jesus, ang “tingog [sang Dios] nag-abot gikan sa langit: ‘Ginhimaya ko na, kag himayaon ko ini liwat.’ ”​—⁠Juan 12:⁠28.

² Pasad sa sini nga mga rekord, bisan ang bata makahangop nga ang kaangtanan sang labing gamhanan nga Dios kag ni Jesucristo kaangay sa amay kag sang iya hinigugma nga anak, duha ka magkatuhay nga indibiduwal. Apang, ining simple nga kamatuoran sa Biblia ginapanghiwala sang mga relihion sang Cristiandad. Nagapamilit sila nga si Jesucristo amo ang Dios nga Labing Gamhanan, ang ikaduha nga persona sang Trinidad, kag ang ikatlo nga persona amo ang balaan nga espiritu.

 3. Paano ginapakita ang pagkagumon tuhoy sa Trinidad nga doktrina?

³ Ina nga panudlo nagtuga sing daku nga kagumon sa tunga sang katawhan sa mga relihion sang Cristiandad, nga amo ang isa ka rason kon ngaa ginatawag sang New Catholic Encyclopedia ang Trinidad nga isa ka misteryo. Sa pagkamatuod, nagatuga ini sing kagumon bisan gani sa tunga sang mga klero, kay ina nga insiklopedia nagasiling man: “Pila lamang ka manunudlo sang Trinidad nga teolohiya sa mga seminaryo sang Romano Katoliko ang wala mapamangkot sa lainlain nga tion sing, ‘Apang paano ibantala sang isa ang Trinidad?’ Kag kon ang pamangkot sintoma sang kagumon sa bahin sang mga estudyante, mahimo nga sintoma man ini sang kaanggid nga kagumon sa bahin sang ila mga propesor.”

 4. Ano ang opisyal nga panudlo sang mga iglesia tuhoy sa Trinidad?

⁴ Inang makapagumon nga doktrina amo ang sentral nga pagtuluohan sang Katoliko kag Protestante nga mga relihion. Ang The Catholic Encyclopedia nagasiling: “Ang Trinidad amo ang termino nga ginagamit subong tanda sang sentral nga doktrina sang Cristianong relihion . . . Sa amo, sa mga pulong sang Atanasianhon nga Kredo: ‘ang Amay Dios, ang Anak Dios, kag ang Balaan nga Espiritu Dios, apang indi tatlo ka Dios kundi isa ka Dios.’ ” Sing kaanggid, sa isa ka kaso sa korte nga nagdalahig sa mga Saksi ni Jehova sa Gresya, ang Griegong Iglesia nga Ortodokso nagsiling: “Ang sadsaran nga doktrina sang Cristianismo, nga ginapatihan sang tanan nga Cristiano . . . walay sapayan sang sekta ukon dogma, amo . . . ang Trinidad, nga ang Dios isa sa tatlo ka persona.” Ang Griegong Iglesia nga Ortodokso nagsiling man: “Ang mga Cristiano amo sila nga nagabaton kay Cristo subong Dios.” Ginasiling sini nga ang mga wala nagabaton sa Trinidad indi mga Cristiano kundi mga erehes.

 5, 6. Ngaa importante nga mahibaluan ang kamatuoran nahanungod sini?

⁵ Apang, kon ining “sadsaran” nga panudlo sang Trinidad sang Cristiandad indi matuod, kon ini binutig, nian ang kabaliskaran sini ang matuod. Ang matuod nga mga Cristiano magasikway sa sini. Ang nagtalikod sa Cristianismo magapanguyapot sa sini. Ano ang mga resulta sa naulihi nga grupo? Sa katapusan nga tolon-an sang Biblia, “ang bugna ni Jesucristo, nga ginhatag sang Dios sa iya,” mabasa naton ang nahanungod sa mga wala makabaton sing dayon nga kabuhi sa Ginharian sang Dios: “Sa guwa yara ang mga ido kag ang mga nagabuhat sing espiritismo kag ang mga makihilawason kag ang mga manugpatay kag ang mga nagasimba sa idolo kag ang tagsatagsa nga nagahigugma kag nagahimo sing butig.”​—⁠Bugna 1:1; 22:⁠15.

⁶ Bangod sang pagkaimportante sini, dapat kita pahibaluon kon sa diin naghalin ining Trinidad nga ideya kag kon ngaa nag-umpisa ini. Sin-o gid ang sa likod sini? Ano ang ginasiling sang modernong mga eskolar sa Biblia nahanungod sini? Apang antes hambalan ining mga butang, usisaon naton sing dugang pa kon ano ang ginasiling sang inspirado nga Pulong sang Dios.​—⁠2 Timoteo 3:​16, 17.

Indi ‘Dios nga Anak’ Kundi “Anak sang Dios”

 7. Ano ang ginapakita sang walay nadampigan nga pagtuon sa Biblia tuhoy kay Jesus?

⁷ Wala gid mangangkon si Jesus nga sia ang labing gamhanan nga Dios. Ang bisan anong walay nadampigan nga pagbasa sa Biblia nga wala sing nahuman na sa hunahuna nga mga ideya nahanungod sa Trinidad magapamatuod sa sina. Halimbawa, sa Juan 3:​16, si Jesus nagsiling: “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak.” Duha ka bersikulo lamang sang ulihi, si Jesus nagsiling liwat nga sia “ang bugtong nga Anak sang Dios.” (Juan 3:18) Sang ginsumbong sang mga Judiyo si Jesus sing pasipala, sia nagsabat: “Nagasiling bala kamo sa akon nga ginpakabalaan sang Amay kag ginpadala sa kalibutan, ‘Ikaw nagapasipala,’ bangod nga ako nagsiling, Ako ang Anak sang Dios?” (Juan 10:36) Wala magsiling si Jesus nga sia ‘Dios nga Anak’ kundi sia ang “Anak sang Dios.”

 8. Ano nga pamatuod ang ginhatag sang kapitan kag sang iya mga kaupod?

⁸ Sang mapatay si Jesus, bisan ang Romanong mga soldado nga nagatindog sa tupad niya nakahibalo nga si Jesus indi ang Dios: “Ang kapitan kag ang mga kaupod niya nga nagabantay kay Jesus, sang nakita nila ang linog kag ang mga butang nga nahanabo, nagkahadlok sing lakas, nga nagasiling, ‘Matuod gid nga ini Anak sang Dios.’ ” (Mateo 27:54) Wala sila magsiling, ‘ini ang Dios’ ukon ‘ini ang Dios nga Anak,’ bangod si Jesus kag ang iya mga disipulo nagpanudlo nga si Jesus Anak sang Dios, indi ang Dios nga Labing Gamhanan sa porma sang tawo.

 9, 10. Anong malig-on nga pamatuod ang ginahatag sa Mga Ebanghelyo tuhoy sa kaangtanan sang Dios kag ni Jesus?

⁹ Ang Dios mismo nagpamatuod nga si Jesus amo ang iya hinigugma nga Anak, subong ginsiling sang manunulat sa Biblia nga si Mateo sang ginbawtismuhan si Jesus. (Mateo 3:17) Amo man ang ginsiling sang iban nga mga manunulat sang Biblia. Si Marcos nagsulat: “Ang isa ka tingog naggikan sa langit: ‘Ikaw ang akon Anak, nga hinigugma; nahamut-an ko ikaw.’ ” (Marcos 1:11) Si Lucas nagsiling: “Ang isa ka tingog naggikan sa langit: ‘Ikaw ang akon Anak, nga hinigugma; nahamut-an ko ikaw.’ ” (Lucas 3:22) Kag si Juan Bautista, nga nagbawtismo kay Jesus, nagpamatuod: “Nakasaksi ako nga ini [Jesus] amo ang Anak sang Dios.” (Juan 1:34) Gani ang Dios mismo, ang apat ka manunulat sang Ebanghelyo, kag si Juan Bautista maathag nga nagsiling nga si Jesus amo ang Anak sang Dios. Kag pila ka tion sang ulihi, sa pagbaylo dagway ni Jesus, kaanggid man nga butang ang natabo: “Nagguwa ang tingog [sang Dios] sa panganod, nga nagasiling: ‘Ini ang akon Anak, nga akon pinili. Magpamati kamo sa iya.’ ”​—⁠Lucas 9:⁠35.

¹⁰ Sa sining mga hitabo, naghambal bala ang Dios nga sia ang anak niya, nga ginpadala niya ang iya kaugalingon, kag nga nahamut-an niya ang iya kaugalingon? Wala, ang Dios nga Amay, ang Manunuga, amo ang naghambal nga ginpadala niya ang Anak nga si Jesus, isa ka tuhay nga indibiduwal, sa paghimo sang hilikuton sang Dios. Busa, sa bug-os nga Griegong Kasulatan ang prase nga “Anak sang Dios” ginagamit sa pagpatuhoy kay Jesus. Apang bisan makaisa indi naton makita ang prase nga ‘Dios nga Anak,’ kay si Jesus indi ang Labing Gamhanan nga Dios. Anak sia sang Dios. Sila duha ka magkatuhay nga mga persona, kag wala sing teolohiko nga “misteryo” ang makabalhin sinang kamatuoran.

Ang Amay Superyor sa Anak

11. Paano ginpakita ni Jesus nga superyor sa iya ang Dios?

¹¹ Nahibaluan ni Jesus nga indi sia tupong sa iya Amay kundi sa tanan nga paagi yara sa isa ka sakop nga posisyon. Nahibaluan niya nga sia ang hinigugma nga Anak nga may daku nga gugma sa iya Amay. Amo kon ngaa, sa liwat kag liwat, si Jesus nagsiling subong sang mga masunod: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay.” (Juan 5:19) “Nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon.” (Juan 6:38) “Ang akon ginatudlo indi akon, kundi iya sang nagpadala sa akon.” (Juan 7:16) “Kilala ko sia [Dios], bangod nga ako tiglawas niya, kag ginpadala Niya ako.” (Juan 7:29) Ang isa nga nagapadala amo ang superyor. Ang isa nga ginpadala amo ang mas manubo, ang alagad. Ang Dios amo ang manugpadala. Si Jesus amo ang ginpadala. Indi sila pareho. Subong ginpabutyag ni Jesus: “Ang ulipon indi daku pa sa iya agalon, ukon ang ginpadala daku pa sa nagpadala sa iya.”​—⁠Juan 13:⁠16.

12. Anong ilustrasyon ang nagapakita sang sakop nga posisyon ni Jesus sa Amay?

¹² Ginpakita man ini sing maathag sa isa ka ilustrasyon nga ginhatag ni Jesus. Ginpaanggid niya ang iya Amay, nga si Jehova nga Dios, sa tag-iya sang ulubasan nga naglakbay sa iban nga duta kag ginpaagsahan ang ulubasan sa mga mangunguma​—⁠nga maathag nga nagalaragway sa Judiyong klero. Sang ulihi, ang tag-iya nagpadala sing ulipon sa pagkuha sing bunga gikan sa ulubasan, apang ginbunal sang mga mangunguma ang ulipon kag ginpapauli sia nga wala sing dala. Nian ang tag-iya nagpadala sing ikaduha nga ulipon, kag amo gihapon ang natabo. Nagpadala sia sing ikatlo nga ulipon, kag amo man ang ginhimo sa iya. Nian ang tag-iya (Dios) nagsiling: “Ipadala ko ang akon anak [Jesus] nga hinigugma. Ayhan tahuron nila sia.” Apang ang malaut nga mga mangunguma nagsiling: “ ‘Ini amo ang manunubli; patyon naton sia, agod ang palanublion mangin aton.’ Kag ginsubol nila sia sa guwa sang ulubasan kag ginpatay sia.” (Lucas 20:​9-16) Sa liwat, maathag nga ginapakita sini nga si Jesus sakop sang Amay, nga ginpadala sang Amay sa paghimo sang kabubut-on sang Amay.

13. Anong maathag nga mga pinamulong sa Biblia ang nagapakita nga ang Dios superyor kay Jesus?

¹³ Si Jesus mismo nagsiling: “Ang Amay daku pa sa akon.” (Juan 14:28) Dapat naton patihan si Jesus, kay pat-od nga nahibaluan niya ang kamatuoran nahanungod sa iya kaangtanan sa iya Amay. Nahibaluan man ni apostol Pablo nga ang Dios superyor kay Jesus, kag sia nagsiling: “Ang Anak [Jesus] man magapasakop sang iya kaugalingon sa . . . Dios.” (1 Corinto 15:28) Makita ini sing dugang pa sa ginhambal ni Pablo sa 1 Corinto 11:3: “Ang ulo ni Cristo amo ang Dios.” Ginkilala ni Jesus nga sia may superyor nga Dios sang magsiling sia sa iya mga disipulo: “Makayab ako sa akon Amay kag inyo Amay kag sa akon Dios kag inyo Dios.”​—⁠Juan 20:⁠17.

14. Anong iban pa nga kasulatan ang nagapakita nga si Jesus indi ang Dios nga Labing Gamhanan?

¹⁴ Ginsambit ni Jesus ang pagkasuperyor sang Dios sang ang iloy sang duha niya ka disipulo nangabay sa iya nga ang iya mga anak nga lalaki palingkuron sa tuo kag wala ni Jesus kon magsulod sia sa iya Ginharian. Sia nagsabat: “Ang paglingkod sa akon tuo kag sa akon wala indi akon ang paghatag.” (Mateo 20:23) Kon si Jesus ang labing gamhanan nga Dios, sia kuntani ang magahatag. Apang indi iya ang paghatag. Ang iya Amay ang magahatag. Subong man, sang nagasaysay sang iya tagna nahanungod sa katapusan sining sistema sang mga butang, si Jesus nagsiling: “Nahanungod sadtong adlaw ukon oras wala sing isa nga nakahibalo, bisan pa ang mga anghel sa langit ukon ang Anak, kundi ang Amay lamang.” (Marcos 13:32) Kon si Jesus ang Dios nga Labing Gamhanan, nahibaluan niya kuntani ang adlaw kag ang oras. Apang wala niya mahibaluan bangod indi sia ang Nakahibalo-sang-tanan nga Dios. Sia Anak sang Dios kag wala makahibalo sang tanan nga nahibaluan sang iya Amay.

15. Sang malapit na mapatay si Jesus, paano sia nagpakita sing pagpasakop sa Dios?

¹⁵ Sang malapit na mapatay si Jesus, ginpakita niya ang iya pagpasakop sa iya Amay paagi sa pagpangamuyo: “Amay, kon buot mo, ipahilayo sa akon ining tagayan. Apang, indi ang akon kabubut-on, kundi ang imo, paghimuon.” (Lucas 22:42) Sin-o ang ginpangamuyuan ni Jesus? Ang iya bala kaugalingon? Indi, nangamuyo sia sa iya Amay sa langit. Maathag ini nga ginpakita sang iya pagsiling: “Indi ang akon kabubut-on, kundi ang imo, paghimuon.” Kag nian, sang mapatay sia, si Jesus nagsinggit: “Dios ko, Dios ko, ngaa ginpatumbayaan mo ako?” (Marcos 15:34) Sa kay sin-o nagsinggit si Jesus? Sa iya bala kaugalingon? Indi, nagsinggit sia sa iya Amay nga yadto sa langit.

16. Paano ang kamatayon kag pagkabanhaw ni Jesus nagapakita nga indi sia ang labing gamhanan nga Dios?

¹⁶ Sang mapatay si Jesus, nagpabilin sia sa lulubngan sing mga tatlo ka adlaw. Sin-o ang nagbanhaw sa iya? Sanglit patay sia, indi niya mabanhaw ang iya kaugalingon. Kag kon indi gid sia patay, nian indi niya mabayaran ang gawad para sa sala ni Adan. Apang napatay gid sia, kag wala sing kabuhi sing mga tatlo ka adlaw. Ginasugiran kita ni apostol Pedro kon sin-o ang nagbanhaw kay Jesus: “Ginbanhaw sia sang Dios paagi sa paghuklas sang mga kasakitan sang kamatayon.” (Binuhatan 2:24) Ang superyor, ang Dios nga Labing Gamhanan, nagbanhaw sa isa nga mas manubo, ang iya hinigugma nga Anak, nga si Jesus, gikan sa minatay. Sa pag-ilustrar: Sang ginbanhaw ni Jesus si Lazaro gikan sa minatay, sin-o ang superyor? Superyor si Jesus, kay ginbanhaw niya si Lazaro gikan sa minatay. (Juan 11:​41-44) Amo man sina sang ginbanhaw sang Dios si Jesus. Superyor ang Dios, kay ginbanhaw niya si Jesus gikan sa minatay.

17. Ano pa ang iban nga pamatuod nga si Jesus indi ang Dios?

¹⁷ Indi mahimo nga si Jesus amo ang Dios mismo, kay si Jesus gintuga sang Dios. Talupangda kon paano ginabadbad sang Emphatic Diaglott ni Benjamin Wilson ang Apokalipsis (Bugna) kapitulo 3, bersikulo 14: “Ining mga butang ginpamulong sang Kabay Pa, ang matutom kag matuod nga saksi [Jesus], ang pamuno sang tinuga sang Dios.” Subong man, ang Colosas 1:​15, 16 nagasiling tuhoy kay Jesus: “Sia amo ang larawan sang dimakita nga Dios, ang panganay sang tanan nga tinuga; kay paagi sa iya gintuga ang tanan nga butang sa langit kag sa duta . . . Ang tanan nga butang natuga paagi sa iya kag tungod sa iya.” Gani sa langit direkta nga gintuga sang labing gamhanan nga Dios ang iya Anak kag nian “paagi sa iya,” ukon “sa iya,” gintuga ang iban nga mga butang, subong sang isa ka lantip nga mamumugon nga naghanas sa isa ka empleyado sa paghimo sing trabaho para sa iya. Ang mga butang nga gintuga “paagi sa iya” wala maglakip kay Jesus, kay natuga na sia sang Dios. Sa amo, gintawag sia nga “panganay,” ang “bugtong.” Kon ang bata panganay, bugtong, wala ini nagakahulugan nga ang bata pareho sa amay. Nagakahulugan ini pirme nga may yara duha ka magkatuhay nga personalidad nga nadalahig, ang amay kag ang bata.

Balaan nga Espiritu​—⁠Isa Bala ka Persona Ukon Aktibo nga Puwersa?

18. Ano ang ginatudlo sang Biblia tuhoy sa balaan nga espiritu?

¹⁸ Kamusta naman ang ginasiling nga ikatlo nga persona sang Trinidad, ang balaan nga espiritu, nga kono tupong sa Amay kag sa Anak sa gahom, sa elemento, kag sa pagkadayon? Wala gid ginasambit sa Biblia nga ang balaan nga espiritu tupong sa Dios kag kay Cristo. Halimbawa, sang okasyon nga ginbawtismuhan si Jesus, ginapakita sang Marcos 1:10 nga ang balaan nga espiritu nagkunsad kay Jesus “subong sang salampati,” indi sa porma sang tawo. Ang balaan nga espiritu indi persona nga nagkunsad kay Jesus kundi amo ang aktibo nga puwersa sang Dios. Yadto nga gahom gikan sa Dios nagbulig kay Jesus sa pag-ayo sa mga masakiton kag sa pagbanhaw sa mga patay. Subong ginasiling sang Lucas 5:17 sa Diaglott: “Ang Gamhanan nga Gahom sang Ginuo [Dios] yara sa iya [Jesus] sa pagpang-ayo.” Sang ulihi, sang Pentecostes, ang mga apostoles ginhatagan man sing gahom gikan sa Dios sa pagpang-ayo sa mga masakiton kag sa pagbanhaw sa mga patay. Naghimo bala ina sa ila nga bahin sang “pagkadios”? Wala, ginhatagan lamang sila sing gahom gikan sa Dios, paagi kay Cristo, sa paghimo sang indi mahimo sang kinaandan nga mga tawo.

19. Ngaa indi posible nga ang balaan nga espiritu mangin ikatlo nga persona sang Trinidad?

¹⁹ Ina gihapon nga aktibo nga puwersa ginasambit sa Efeso 5:​18, nga sa diin si Pablo nagalaygay: “Padayon kamo nga magmapuno sing espiritu.” Subong man, ang Binuhatan 7:55 nagasiling nga si Esteban “puno sing balaan nga espiritu.” Kag sang Pentecostes, ang mga sumulunod ni Jesus ‘napuno tanan sing balaan nga espiritu.’ (Binuhatan 2:⁠4) Mapuno bala ang isa ka tawo sing isa pa ka persona? Indi, apang sarang sia mapuno sing gahom nga nagagikan sa Dios. Inang balaan nga espiritu amo man ang puwersa nga gingamit sang Dios sa pagtuga sa uniberso. Suno sa Genesis 1:2: “Ang aktibo nga puwersa sang Dios nagagiho sa nawong sang mga tubig.”

20. Anong palanan-awon ang nakita ni Esteban nga nagapakita sing dugang pa nga ang Trinidad indi ang kamatuoran?

²⁰ Sa tapos mabanhaw si Jesus, nakakita si Esteban sing palanan-awon sa langit kag iya ‘nakita ang himaya sang Dios kag si Jesus nga nagatindog sa too sang Dios.’ (Binuhatan 7:55) Sa amo, duha ka magkatuhay nga persona ang nakita sa langit: (1) ang Dios kag (2) ang ginbanhaw nga si Jesucristo. Wala sing balaan nga espiritu nga ginsambit sa sining palanan-awon bangod indi ini ikatlo nga persona sang Trinidad. Ang balaan nga espiritu, bangod aktibo nga puwersa sang Dios, nagagikan sa Dios apang indi isa ka tuhay nga persona. Amo kon ngaa duha lamang ka persona ang nakita ni Esteban, indi tatlo.

21, 22. (a) Ano ang ginabaton sang isa ka relihioso nga insiklopedia nahanungod sa balaan nga espiritu? (b) Anong mga punto ang ilakip sang aton masunod nga artikulo?

²¹ Tuhoy sa balaan nga espiritu, ang New Catholic Encyclopedia nagabaton: “Ang D[aan] nga T[estamento] maathag nga wala nagalaragway sa espiritu sang Dios subong isa ka persona, bisan sa pilosopiko gid nga kahulugan, ukon sa Semitiko nga kahulugan. Ang espiritu sang Dios gahom lamang sang Dios. Kon isa ini ka butang nga ginalaragway subong tuhay sa Dios, amo sini bangod ang ginhawa ni Yahweh nagahikot sa guwa niya.” Nagasiling man ini: “Ang kalabanan nga teksto sang B[ag-ong] T[estamento] nagapakita sa espiritu sang Dios subong isa ka butang, indi subong isa ka persona; makita ini labi na sa pag-anggid sang espiritu kag sang gahom sang Dios.”

²² Bangod sining tanan nga kamatuoran, ining “sadsaran” nga doktrina sang Trinidad sang Cristiandad indi matuod. Ang Pulong gid sang Dios nagapamatuod nga butig ina nga pangangkon. Ginapakita sini sing maathag nga si Jehova nga Dios amo ang mahigugmaon nga Amay kag nga si Jesucristo amo ang iya hinigugma nga Anak, Anak nga may daku nga gugma sa iya Amay amo kon ngaa matinumanon sia tubtob sa kamatayon. Apang, ang iban nagabais nga may yara mga kasulatan nga daw nagasakdag sa Trinidad, gani sa aton masunod nga artikulo, usisaon naton ang pila sini. Subong man, hambalan naton kon ngaa ining doktrina nangin importante nga bahin sang Cristiandad, kag kon sa diin ini maghalin.

Paano Mo Sabton?

◻ Ano ang ginatudlo sang Biblia tuhoy sa Dios kag tuhoy kay Jesus?

◻ Paano ginapakita sang Kasulatan ang kaangtanan sang Amay kag sang Anak?

◻ Ano ang pila ka kasulatan nga nagapakita nga ang Dios superyor kay Jesus?

◻ Ngaa ang balaan nga espiritu indi mahimo nga bahin sang Trinidad?

[Laragway sa pahina 13]

Si Jesus nagsiling: “Ang Amay daku pa sa akon”