“Napahulag sang Kaluoy”

1-3. (a) Ano ang ginhimo ni Jesus sang nakitluoy sa iya ang duha ka bulag nga manugpakilimos? (b) Ano ang buot silingon sang ekspresyon nga “napahulag sang kaluoy”? (Tan-awa ang footnote.)

DUHA ka lalaki nga bulag ang nagapungko sa higad sang dalan malapit sa Jerico. Nagakadto sila didto adlaw-adlaw kag nagapuesto sa duog nga madamo sing tawo agod magpakilimos sa mga nagalabay. Apang, maeksperiensiahan nila karon nga adlaw ang isa ka butang nga magabag-o gid sang ila kabuhi.

² Sa hinali lamang, nakabati ang mga manugpakilimos sing kinagahod. Bangod indi sila makakita, namangkot ang isa sa ila kon ano ang nagakatabo, kag ginsilingan sia: “Si Jesus nga Nazaretnon nagalabay!” Magakadto si Jesus sa Jerusalem sa katapusan nga tion. Apang wala sia nagaisahanon; ginasundan sia sang daku nga kadam-an. Pagkabati kon sin-o ang nagalabay, ang mga manugpakilimos nagsinggit: “Ginuo, maluoy ka sa amon, Anak ni David!” May kaugot nga ginpahipos sila sang kadam-an, apang mapilit ang mga bulag. Wala sila maghipos.

³ Walay sapayan sang kagahod sang kadam-an, nabatian ni Jesus ang ila singgit. Ano ang himuon niya? Madamo sia sing ginapamensar. Katapusan na nga semana sang iya pagkabuhi sa duta. Nahibaluan niya nga pintasan kag patyon sia sa Jerusalem. Apang, wala niya ginbalewala ang ila wala untat nga pagsinggit. Nagdulog sia kag nagsugo nga dalhon sila sa iya. ‘Ginuo, pamuklata ang amon mga mata,’ pakitluoy nila. “Napahulag sang kaluoy,” gintandog ni Jesus ang ila mga mata, kag nakakita sila.a Sugod sadto, nagsunod sila kay Jesus.​—Lucas 18:35-43; Mateo 20:29-34.

 4. Paano gintuman ni Jesus ang tagna nga “magakaawa sia sa kubos”?

⁴ Indi lang ini ang tion nga nagpakita si Jesus sing kaluoy. Ginpakita niya ini sa madamo nga okasyon kag sa nagkalainlain nga mga hitabo. Gintagna sang Biblia nga “magakaawa sia sa kubos.” (Salmo 72:13) Subong sang gintagna, sensitibo si Jesus sa ginabatyag sang iban. Kinabubut-on nga ginbuligan niya ang mga tawo. Nagbantala sia bangod sang iya kaluoy. Tan-awon naton kon paano ginapakita sang Ebanghelyo nga ang kaluoy ni Jesus amo ang nagpahulag sa iya ginhambal kag ginhimo para sa mga tawo kag binagbinagon naton kon paano man naton ini mapakita.

5, 6. Ano nga mga halimbawa ang nagapakita nga si Jesus mahinuklugon?

⁵ Si Jesus mahinuklugon gid. Nahangpan kag nahanuklog sia sa ginabatyag sang mga nagaantos. Bisan pa nga wala niya maagihan ang tanan nila nga ginaantos, naluoy gid sia sa ila. (Hebreo 4:15) Sang gin-ayo niya ang isa ka babayi nga ginatagasan sing dugo sa sulod sang 12 ka tuig, ginlaragway niya ini nga isa ka “malubha nga balatian,” sa amo nahangpan niya ang daku nga kalisod kag pag-antos nga ginbatyag sang babayi. (Marcos 5:25-34) Sang makita niya si Maria kag ang iya mga kaupod nga nagahibi bangod sang pagkapatay ni Lazaro, natandog gid sia amo nga nalisang sia. Bisan pa nahibaluan niya nga banhawon niya si Lazaro, naghibi si Jesus.​—Juan 11:33, 35.

⁶ Sa isa pa ka hitabo, nagpalapit kay Jesus ang isa ka aruon kag nagpakitluoy: “Kon luyag mo gid, matinluan mo ako.” Ano ang ginhimo ni Jesus, nga isa ka himpit nga tawo kag wala gid makaagi masakit? Nahanuklog sia sa aruon. Huo, “napahulag sia sang kaluoy.” (Marcos 1:40-42) Gani naghimo sia sing isa ka tumalagsahon nga butang. Nahibaluan niya nga ang mga aruon di-matinlo sa idalom sang Kasuguan kag indi dapat makigsimpon sa iban. (Levitico 13:45, 46) Masarangan gid sia nga ayuhon ni Jesus bisan nga indi na sia pagtandugon. (Mateo 8:5-13) Apang, gin-untay niya ang iya kamot kag gintandog ang aruon, nga nagasiling: “Luyag ko. Mangin matinlo ka.” Gilayon nga nadula ang aro. Daw ano gid ka mahinuklugon si Jesus!

 7. Ano ang makabulig sa aton agod mapalambo ang kahanuklog, kag paano mahimo ipakita ini nga kinaiya?

⁷ Subong mga Cristiano, ginalaygayan kita nga ilugon ang pagkamahinuklugon ni Jesus. Ginalaygayan kita sang Biblia nga magpakita sing “simpatiya.”b (1 Pedro 3:8) Mahimo nga indi naton mahangpan ang ginabatyag sang mga may malubha nga balatian ukon depresyon​—ilabi na kon wala naton ini maagihan. Apang, dumdumon naton nga dapat kita mahanuklog sa ila kahimtangan bisan pa wala naton ini maagihan. Nahanuklog si Jesus sa mga masakiton bisan pa nga wala gid sia makaagi masakit. Paano, nian, naton mapalambo ang kahanuklog? Paagi sa mapailubon nga pagpamati samtang ginatu-ad kag ginasugid sang mga nagaantos ang ila ginabatyag. Mahimo naton pamangkuton ang aton kaugalingon, ‘Kon ako ang yara sa ila kahimtangan, ano ang batyagon ko?’ (1 Corinto 12:26) Kon sensitibo gid kita sa ginabatyag sang iban, labi kita nga ‘makahambal sing malugpayon sa mga kalag nga ginapung-awan.’ (1 Tesalonica 5:14) Kon kaisa, ang kahanuklog indi lamang mapakita sa hambal kundi sa pagluha man. “Maghibi upod sa mga tawo nga nagahibi,” siling sang Roma 12:15.

8, 9. Paano nagpakita si Jesus sing patugsiling sa ginabatyag sang iban?

⁸ Si Jesus mapatugsilingon sa iban, kag nagpanghikot sia nga may patugsiling sa ila ginabatyag. Hinumduma ang tion sang gindala kay Jesus ang isa ka tawo nga bungol kag haluson nga nakahambal. Nahantop ang kahuya sini nga tawo, naghimo si Jesus sing butang nga indi niya kinaandan nga ginahimo kon nagapang-ayo: “Ginpahilayo niya [ang tawo] sa kadam-an.” Gin-ayo niya ang tawo nga sila lamang nga duha kag wala sing kadam-an nga nagatan-aw.​—Marcos 7:31-35.

⁹ Amo man nga patugsiling ang ginpakita ni Jesus sang gindala sang mga tawo sa iya ang isa ka bulag kag nagpangabay nga ayuhon sia. “Gindapit [ni Jesus] ang tawo nga bulag” kag “gindala sia sa gua sang minuro.” Nian gin-ayo niya sia sing amat-amat. Ayhan nagtugot ini sa tawo nga maanad sing amat-amat ang iya hunahuna kag mata sa kasilaw sang adlaw kag sang mga butang sa palibot niya. (Marcos 8:22-26) Daw ano gid ka mapatugsilingon si Jesus!

10. Sa ano nga mga paagi mapakita naton ang pagpatugsiling sa ginabatyag sang iban?

¹⁰ Subong mga sumulunod ni Jesus, dapat man kita mangin mapatugsilingon sa ginabatyag sang iban. Busa, nagahalong kita sa aton ginahambal, kag wala ginakalimtan nga ang di-mapatugsilingon nga paggamit sing dila mahimo makasaklaw sa balatyagon sang iban. (Hulubaton 12:18; 18:21) Ang maparas nga hambal, matinamayon nga komento, kag pagyubit wala sing duog sa tunga sang mga Cristiano, nga sensitibo sa ginabatyag sang iban. (Efeso 4:31) Mga gulang, paano ninyo mapakita ang pagpatugsiling sa ginabatyag sang iban? Kon nagahatag sing laygay, mangin malulo sa paghambal, sa amo ginahatagan sing dignidad ang ginalaygayan. (Galacia 6:1) Mga ginikanan, paano kamo mangin mapatugsilingon sa ginabatyag sang inyo mga kabataan? Kon nagadisiplina, panikasugi nga indi mahuy-an ang inyo mga kabataan.​—Colosas 3:21.

11, 12. Ano nga mga rekord sa Biblia ang nagapakita nga indi na kinahanglan nga pangabayon si Jesus nga magpakita sia sing kaluoy sa iban?

¹¹ Nagpakita si Jesus sing kaluoy bisan wala sia ginpangabay. Ang kaluoy isa ka kinaiya nga nagapahulag sa isa nga magbulig. Gani, indi makapakibot nga kinabubut-on nga ginbuligan ni Jesus ang iban bangod naluoy sia. Halimbawa, sang gin-updan sia sang isa ka dakung kadam-an sa sulod sang tatlo ka adlaw, nga wala sing pagkaon, indi na kinahanglan nga hambalan si Jesus nga nagutom na ang mga tawo ukon singganan nga maghimo sia sing paagi. Ang report nagasiling: “Gintawag ni Jesus ang iya mga disipulo kag nagsiling: ‘Naluoy ako sa kadam-an, kay tatlo ka adlaw na nga kaupod ko sila kag wala sila sing bisan ano nga makaon; kag indi ko luyag nga palakton sila nga gutom. Basi kon mapunaw sila sa dalan.’ Nian, kinabubut-on nga ginpakaon niya sing milagruso ang kadam-an.​—Mateo 15:32-38.

¹² Binagbinaga ang isa pa ka report. Sang 31 C.E., sang malapit na si Jesus sa siudad sang Nain, nakita niya ang isa ka makapasubo nga talan-awon. Isa ka lubong ang nagapagua sa siudad, ayhan padulong sa kaingod nga lulubngan sa higad sang mga bakulod, agod ilubong ang “bugtong nga anak nga lalaki sang balo nga babayi.” Mahanduraw mo bala ang kalisod sang iloy? Ilubong niya ang iya bugtong nga anak nga lalaki, kag wala sia sing bana nga magaunong sa iya. Sa tanan nga tawo sa lubong, ‘nakita’ ni Jesus ang karon wala na sing anak nga balo nga babayi. Natandog sia sa nakita niya​—huo, “napahulag sia sang kaluoy sa iya.” Indi na kinahanglan nga may magpakitluoy pa sa iya. Napahulag sia bangod sang iya kaluoy. Gani “nagpalapit sia kag gintandog ang tulungtungan sang patay,” kag ginbanhaw niya ang pamatan-on. Ano ang masunod nga natabo? Wala niya ginpabuylog ang pamatan-on sa daku nga kadam-an nga nagalakbay upod sa Iya. Sa baylo, “ginhatag niya sia sa iya iloy,” sa amo nangin isa ka pamilya sila liwat kag ginpat-od niya nga may magaatipan sa balo nga babayi.​—Lucas 7:11-15.

13. Paano naton mailog si Jesus sa kinabubut-on nga pagbulig sa mga nagakinahanglan?

¹³ Paano naton mailog ang halimbawa ni Jesus? Matuod, indi kita makaaman sing pagkaon sing milagruso ukon makabanhaw sing patay. Apang, mailog naton si Jesus sa kinabubut-on nga pagbulig sa mga nagakinahanglan. Ang isa ka masigkatumuluo mahimo nga nagapamigado ukon nadulaan sing trabaho. (1 Juan 3:17) Ang balay sang isa ka balo nga babayi mahimo nga kinahanglan na gid nga kay-uhon. (Santiago 1:27) Mahimo may nahibaluan kita nga isa ka namatyan nga pamilya nga nagakinahanglan sing lugpay ukon bulig. (1 Tesalonica 5:11) Kon kinahanglanon gid, indi na kita dapat maghulat nga pangabayon sa pagbulig. (Hulubaton 3:27) Kinabubut-on kita nga magabulig bangod sa kaluoy, subong ginatugot sang aton sirkunstansia. Indi gid naton pagkalimtan nga ang isa ka simple nga buhat sang kaayo ukon pila ka tinaga sang sinsero nga lugpay pagpakita gid sing kaluoy.​—Colosas 3:12.

14. Ngaa ginhatagan sing prioridad ni Jesus ang pagbantala sing maayong balita?

¹⁴ Subong sang nakita naton sa Seksion 2 sini nga libro, si Jesus naghatag sing tumalagsahon nga halimbawa sa pagbantala sing maayong balita. Nagsiling sia: “Dapat ko ibantala ang maayong balita sang ginharian sang Dios, kay tungod sini ginpadala ako.” (Lucas 4:43) Ngaa ginhatagan niya sing prioridad ini nga hilikuton? Una bangod sang iya gugma sa Dios. Apang may isa pa ka rason si Jesus: Ginbuligan niya ang iban sa ila espirituwal nga mga kinahanglanon bangod sang iya tinagipusuon nga kaluoy. Sa tanan nga paagi nga ginpakita niya ang kaluoy, ang pinakaimportante sa tanan amo ang pagbusog niya sa espirituwal nga pagkagutom sang iban. Usisaon naton ang duha ka hitabo nga nagapakita kon paano gintamod ni Jesus ang mga tawo nga ginbantalaan niya. Makabulig ini sa aton sa pag-usisa man sang aton mga motibo sa pagpakigbahin sa publiko nga ministeryo.

15, 16. Ilaragway ang duha ka hitabo nga nagapakita sang pagtamod ni Jesus sa mga tawo nga ginbantalaan niya.

¹⁵ Sang 31 C.E., pagkatapos sang mga duha ka tuig nga pagpangabudlay sing lakas sa ministeryo, ginpasangkad ni Jesus ang iya mga panikasog paagi sa ‘paglibot sa tanan nga siudad kag minuro’ sang Galilea. Natandog gid sia sa iya nakita. Si apostol Mateo nagreport: “Sang makita niya ang kadam-an naluoy sia sa ila, kay ginpanitan sila kag nag-alaplaag kaangay sa mga karnero nga wala sing manugbantay.” (Mateo 9:35, 36) Nahanuklog si Jesus sa mga tawo. Nahibaluan gid niya ang ila makaluluoy nga kahimtangan sa espirituwal. Nahibaluan niya ang di-maayo nga pagtratar kag pagpatumbaya sang mga tawo nga dapat kuntani nagabantay sa ila​—ang relihioso nga mga lider. Bangod sa daku nga kaluoy nga maukod nga ginbantala ni Jesus ang mensahe sang paglaum sa mga tawo. Kinahanglan gid nila ang maayong balita sang Ginharian sang Dios.

¹⁶ Amo man ang natabo pila ka bulan sang ulihi, sang malapit na ang Paskua sang 32 C.E. Sini nga tion, nagsakay si Jesus kag ang iya mga apostoles sa sakayan kag nagtabok sa Dagat sang Galilea sa pagpangita sing malinong nga duog nga mapahuwayan. Apang nagdalagan ang isa ka kadam-an sang mga tawo sa baybayon kag una pa nga nag-abot sa tabok. Ano ang ginhimo ni Jesus? “Sang nagpanaug sia, nakita niya ang dakung kadam-an, kag napahulag sia sang kaluoy sa ila, bangod subong sila sang mga karnero nga wala sing manugbantay. Kag nagpanudlo sia sa ila sang madamo nga butang.” (Marcos 6:31-34) Liwat nga ‘napahulag sang kaluoy’ si Jesus bangod sang makaluluoy nga kahimtangan sa espirituwal sang mga tawo. “Subong sila sang mga karnero nga wala sing manugbantay” kag gutom sila sa espirituwal kag ginpabay-an lamang. Napahulag si Jesus nga magbantala indi bangod katungdanan niya ini kundi bangod naluoy sia.

17, 18. (a) Ano ang nagapahulag sa aton sa pagpakigbahin sa ministeryo? (b) Paano naton mapalambo ang kaluoy sa iban?

¹⁷ Ano ang nagapahulag sa aton subong mga sumulunod ni Jesus sa pagpakigbahin sa ministeryo? Subong sang nakita na naton sa Kapitulo 9 sini nga libro, katungdanan ukon responsibilidad naton nga magbantala kag maghimo sing mga disipulo. (Mateo 28:19, 20; 1 Corinto 9:16) Apang nagabantala kita indi lamang bangod katungdanan naton ini. Labaw sa tanan, nagabantala kita sing maayong balita sang Ginharian bangod ginahigugma naton si Jehova. Nagabantala man kita bangod naluoy kita sa mga indi kaangay sa aton sing pagtuo. (Marcos 12:28-31) Paano, nian, naton mapalambo ang kaluoy sa iban?

¹⁸ Dapat naton tamdon ang mga tawo subong sang pagtamod ni Jesus sa ila​—“ginpanitan sila kag nag-alaplaag kaangay sa mga karnero nga wala sing manugbantay.” Handurawa nga nakakita ka sing isa ka kordero nga nagtalang. Kon wala sing manugbantay nga magtuytoy sa iya sa halalban kag sa ilimnan, ang makaluluoy nga kordero gutumon kag uhawon. Indi ka bala mahanuklog sa iya? Indi mo bala himuon ang tanan nga masarangan mo agod pakaunon kag paimnon sia? Kaangay sa iya ang madamo nga tawo nga wala pa makahibalo sing maayong balita. Bangod ginpatumbayaan sang mga manugbantay sang butig nga relihion, ginagutom kag ginauhaw sila sa espirituwal kag wala sila sing matuod nga paglaum para sa palaabuton. Mahatag naton ang kinahanglan nila: ang masustansia nga espirituwal nga pagkaon kag ang makaparepresko nga tubig sang kamatuoran nga masapwan sa Pulong sang Dios. (Isaias 55:1, 2) Kon hunahunaon naton ang espirituwal nga mga kinahanglanon sang mga tawo sa aton palibot, mahanuklog kita sa ila. Kon, kaangay ni Jesus, nahanuklog kita sa mga tawo, himuon naton ang tanan nga masarangan naton agod sugiran sila sing paglaum sa Ginharian.

19. Ano ang himuon naton agod pahulagon ang isa ka kalipikado nga estudyante sa Biblia nga makigbahin sa dayag nga pagministeryo?

¹⁹ Paano naton mabuligan ang iban nga ilugon ang halimbawa ni Jesus? Ibutang naton nga luyag naton palig-unon ang isa ka kalipikado nga estudyante sa Biblia nga makigbahin sa dayag nga pagbantala. Ukon ayhan luyag naton buligan ang isa ka di-aktibo nga makigbahin liwat sing bug-os sa ministeryo. Paano naton sila mabuligan? Dapat naton tandugon ang ila tagipusuon. Dumduma nga, una, si Jesus ‘napahulag sang kaluoy’ sa mga tawo, kag dayon, gintudluan niya sila. (Marcos 6:34) Gani kon mabuligan naton sila nga mapalambo ang kaluoy, mapahulag sila nga ilugon si Jesus kag ibantala ang maayong balita sa iban. Mahimo naton sila pamangkuton: “Paano napauswag sang mensahe sang Ginharian ang imo kabuhi? Kinahanglan man bala sang mga tawo nga wala pa makahibalo sini nga mensahe ang maayong balita? Ano ang himuon mo agod mabuligan sila?” Sa pagkamatuod, ang pinakamabaskog nga motibo sa pagpakigbahin sa ministeryo amo ang gugma sa Dios kag ang handum nga alagaron sia.

20. (a) Ano ang kinahanglan agod mangin sumulunod ni Jesus? (b) Ano ang binagbinagon sa masunod nga kapitulo?

²⁰ Indi lamang pagsulit sa ginsiling ni Jesus kag pag-ilog sa iya mga buhat ang kinahanglan agod mangin sumulunod niya. Dapat palambuon naton ang iya “panimuot sang hunahuna.” (Filipos 2:5) Busa, nagapasalamat gid kita nga ginasugid sa aton sang Biblia kon ano ang nagpahulag kay Jesus sa iya ginhambal kag ginhimo para sa mga tawo! Paagi sa paghibalo sang “hunahuna ni Cristo,” labi nga mailog naton ang iya pagkasensitibo kag tinagipusuon nga kaluoy kag busa mapakig-angutan ang mga tawo subong sang pagpakig-angot ni Jesus sa ila. (1 Corinto 2:16) Sa masunod nga kapitulo, binagbinagon naton ang nanuhaytuhay nga mga paagi nga ginpakita ni Jesus ang iya gugma ilabi na sa iya mga sumulunod.