Magkalipay—Kaluoyi ang mga Nasit-an

“Ang nagatamay sang iya isigkatawo nagapakasala, apang ang nagakaawa sa nasit-an malipayon sia.”—HULUBATON 14:21.

 1, 2. Ano ang natabo sa tatlo ka pamilya sa Pilipinas, nga nagadul-ong sa aton sa pagbinagbinag sa anong mga pamangkot?

SAMTANG ang tatlo ka pamilya sa Pilipinas sa Probinsia sang Pangasinan nagtambong sa Cristianong miting, isa ka aksidente nga sunog ang nag-upos sa ila balay. Pagpauli nila, nasapwan nila nga wala na sila sing kalan-on ukon lugar nga matulugan. Sang mabatian ang natabo, ang mga masigka Cristiano nagkadto nga dala ang pagkaon kag nag-areglo sing mga dalayonan upod sa iban sa kongregasyon. Pagkaaga, ang mga Cristiano nag-abot nga dala ang mga kawayan kag iban pa nga materyalis sa pagpatindog. Ining paghiliutod nga gugma nagpahamuot sa mga kaingod. Maayo man ang epekto sini sa tatlo ka pamilya. Nasunog sang kalayo ang ila balay, apang ang ila pagtuo kag iban pa nga Cristianong mga kinaiya nakalampuwas kag nagtubo bangod sang mahigugmaon nga buhat.—Mateo 6:33; ipaanggid ang 1 Corinto 3:12-14.

² Indi bala nga ang mga eksperiensia kaangay sini makalilipay? Ginapalig-on sini ang aton pagtuo sa tawhanon nga kalulo kag labi pa gid sa gahom sang matuod nga Cristianismo. (Binuhatan 28:2) Apang, ginaapresyar bala naton ang Makasulatanhon nga sadsaran para sa sinang ‘pagbuhat sing maayo ayon sa tanan nga tawo, kag labi na gid sa mga tagapanimalay sang pagtuo’? (Galacia 6:10) Kag paano kita ayhan personal nga makahimo sing labi sa sini nga bahin?

Isa ka Ekselente nga Talaksan Para sa Aton

 3. Paano kita makasiguro nga si Jehova nagaulikid sa aton?

³ Ginasilingan kita ni disipulo Santiago: “Ang tagsa ka maayong hatag kag ang tagsa ka dulot nga himpit nagagikan sa hitaas.” (Santiago 1:17) Daw ano ka matuod ina, kay si Jehova nagaaman sing bugana para sa aton espirituwal kag materyal nga ikaayo! Apang, ano ang ginauna niya? Ang espirituwal nga mga butang. Halimbawa, ginhatag niya sa aton ang Biblia agod kita may espirituwal nga panuytoy kag paglaum. Ina nga paglaum nasentro sa dulot sang iya Anak, nga ang halad amo ang sadsaran para mapatawad kita kag makatigayon sang dayon nga kabuhi.—Juan 3:16; Mateo 20:28.

 4. Paano mapamatod-an nga ang Dios interesado man sa aton materyal nga mga kinahanglanon?

⁴ Si Jehova interesado man sa aton materyal nga kaayohan. Si apostol Pablo nangatarungan sa sini upod sa mga tawo sang dumaan nga Listra. Bisan pa indi sila matuod nga mga sumilimba, indi nila mapanghiwala nga ang Manunuga ‘naghimo sing maayo, naghatag sa aton sing ulan sa langit kag mga panag-on nga mapatubason, nga nagapuno sang aton mga tagipusuon sing pagkaon kag kasadya.’ (Binuhatan 14:15-17) Tungod sa gugma, si Jehova nagahatag sang aton espirituwal nga mga kinahanglanon kag nagaaman para sa aton pisikal nga kabuhi. Wala mo bala ginahunahuna nga nagaamot ini sa iya pagkamangin “malipayon nga Dios”?—1 Timoteo 1:11.

 5. Ano ang maton-an naton gikan sa pagpakig-angot sang Dios sa dumaan nga Israel?

⁵ Ang pagpakig-angot sang Dios sa dumaan nga Israel nagailustrar sa iya timbang nga igtalupangod sa espirituwal nga mga kinahanglanon sang iya mga sumilimba kag sa ila materyal nga kahimtangan. Una, ginhanda niya ang Kasugoan sa iya katawhan. Ang iya mga hari nagahanda sing personal nga kopya sang Kasugoan, kag ang mga tawo nagatipon sing pulo­panag-on sa pagpamati sa Iya Kasugoan nga ­ginabasa. (Deuteronomio 17:18; 31:9-13) Ang ­Kasugoan nag-aman sing tabernakulo ukon templo kag mga saserdote sa paghimo sing mga halad agod ang mga tawo makatigayon sang kahamuot sang Dios. Ang mga Israelinhon nagtipon sing regular para sa espirituwal nga mga kapiestahan, nagapadaku sang ila tuigan nga pagsimba. (Deuteronomio 16:1-17) Subong resulta sini tanan, ang indibiduwal nga Israelinhon mahimo mangin manggaranon sa espirituwal sa atubangan sang Dios.

 6, 7. Paano ginpakita ni Jehova sa Kasugoan ang iya pagkabalaka sa espirituwal nga mga kinahanglanon sang mga Israelinhon?

⁶ Apang, ang Kasugoan nagpadayag man kon daw ano ka matalupangdon ang Dios sa pisikal nga kahimtangan sang iya mga alagad. Ayhan ang magasulod sa aton pensar amo ang mga kasugoan nga ginhatag sa Israel nahanungod sa katinlo kag mga tikang nga nagabuhin sa paglapnag sang impeksion. (Deuteronomio 14:11-21; 23:10-14) Apang indi dapat pagkalimtan ang pinasahi nga mga aman nga ginhimo sang Dios agod buligan ang mga imol kag mga nasit-an. Ang mapigaw nga panglawas ukon ang kapahamakan kaangay sang sunog ukon baha mahimo nga magapaimol sa isa ka Israelinhon. Sa iya mismo Kasugoan ginakilala ni Jehova nga ang tanan indi mangin palareho sa palangabuhian. (Deuteronomio 15:11) Apang labi pa sang sa pagsimpatiya lamang sa imol kag nasit-an ang ginhimo niya. Naghimus sia sing ayuda ukon bulig.

⁷ Ang kalan-on amo gid ang una nga kinahanglanon nila. Gani ang Dios nagmando nga ang imol sa Israel mangin hilway sa pagpanaghaw sa mga uma kag mga ulubasan ukon sa mga kahoy nga olibo. (Deuteronomio 24:19-22; Levitico 19:9, 10; 23:22) Ang paagi sang Dios wala magpalig-on sa mga tawo nga magtinamad ukon magsalig sa bulig sang iban samtang makasarang sila sa pagtrabaho. Ang Israelinhon nga manugsaghaw dapat manikasog, ayhan maghinguyang sing malawig nga inoras sa nagatagiti nga adlaw sa pagtipon sing kalan-on para sa sina nga adlaw. Apang, indi naton dapat pagkalimtan nga sa sining paagi ang Dios mapinatugsilingon nga nag-aman para sa mga imol.—Ipaanggid ang Rut 2:2-7; Salmo 69:33; 102:17.

 8. (a) Ano ang ginpalig-on sa indibiduwal nga mga Judiyo nga himuon tungod sa ila mga kauturan? (Ipaanggid ang Jeremias 5:26, 28.) (b) Paano mo mapaanggid ang panimuot nga ginlaygay sang Dios para sa mga Judiyo nga kinaandan sa karon?

⁸ Dugang nga ginpadaku ni Jehova ang iya interes sa nasit-an paagi sa mga pinamulong subong sang sa Isaias 58:6, 7. Sang panahon nga ang iban sang naayawan sa kaugalingon nga mga Israelinhon pakunokuno nga nagapuasa, ang manalagna sang Dios nagsiling: “Indi bala nga ini ang puasa nga ginpili ko? Ang . . . pagbuhi sang mga ginpigus, kag nga balion ninyo ang tagsa ka gota? Indi bala ini ang pagpaambit sang imo kalan-on sa nagutom, kag dalhon mo ang mga nasit-an, walay puluy-an nga mga tawo, sa imo balay? Nga, kon makita mo ang hubo, panaptan mo sia, kag nga dili ka magpanago gikan sa imo kaugalingon nga unod?” Ang iban nga mga indibiduwal sa karon nagabantay sa ginatawag nila nga ila ‘sona sang kasulhay.’ Handa sila sa pagbulig sa imol lamang nga wala ini nagakahulugan sang bisan anong personal nga sakripisyo ukon indi kombeniente para sa ila. Daw ano gid ka tuhay nga espiritu ang ginpadaku sang pinamulong sang Dios paagi kay Isaias!—Tan-awa man ang Ezequiel 18:5-9.

 9. Ano ang ginalaygay sang Kasugoan tuhoy sa pagpahulam, kag ano nga panimuot ang ginapalig-on sang Dios?

⁹ Ang pag-ulikid sa imol nga Israelinhon nga kauturan mapakita kon nagapahulam. Ayhan ang isa ka Israelinhon nagapaabot nga bayaran sing saka kon nagapahulam sing kuwarta sa isa nga maluyag sa paggamit sini sa pagnegosyo ukon pagpasangkad sang iya negosyo. Apang, si Jehova nagsiling nga indi pagpasakaan ang kuwarta nga ginpahulam sa imol nga utod, nga ang kapigaduhon mahimo nga magsulay sa iya sa paghimo sing sala. (Exodo 22:25; Deuteronomio 15:7, 8, 11; 23:19, 20; Hulubaton 6:30, 31) Ang panimuot sang Dios sa mga makaluluoy dapat nga mangin talaksan para sa iya katawhan. Ginsaaran pa gani kita: “Ang nagakaluoy sa imol nagapahulam kay Jehova, kag ang iya maayo nga buhat bayaran Sia niya.” (Hulubaton 19:17) Hunahunaa lamang ina—pagpahulam kay Jehova, upod ang iya pasalig nga bayaran niya ikaw sing nagakaigo!

10. Sa tapos mabinagbinag ang halimbawa sang Dios, ano ang mahimo nga mapamangkot mo sa imo kaugalingon?

¹⁰ Busa dapat kita tanan mamangkot: Ano ang kahulugan para sa akon sang pagtamod kag pagtratar sang Dios sa mga nasit-an? Nakatuon bala ako gikan sa iya himpit nga talaksan kag nagatinguha sa pag-ilog sini? Mapauswag ko bala ang akon pagkayara sa larawan sang Dios sa sini nga bahin?—Genesis 1:26.

Kon Ano ang Amay, Amo man ang Anak

11. Paano ang pag-ulikid ni Jesus kaanggid sa iya sang iya Amay? (2 Corinto 8:9)

¹¹ Si Jesucristo “nagapabanaag sang himaya [ni Jehova] kag nagadala sang larawan gid sang iya kinaugali.” (Hebreo 1:3) Gani, mapaabot naton sa iya nga ipabanaag niya ang pag-ulikid sang iya Amay sa mga interesado sa matuod nga pagsimba. Nag-ulikid gid sia. Ginpakita ni Jesus nga ang kaimulon nga nagakinahanglan sing labi nga kalubaran amo ang espirituwal nga kaimulon: “Malipayon ang mga nabalaka sa ila espirituwal nga kinahanglanon, kay ila ang ginharian sang langit.” (Mateo 5:3; ipaanggid ang Lucas 6:20.) Si Cristo nagsiling man: “Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran.” (Juan 18:37) Sing nahisuno, wala sia makilal-i subong nagahimo lamang sing milagro ukon nagapang-ayo kundi subong Manunudlo. (Marcos 10:17-21; 12:28-33) May kaangtanan sa sini, talupangda ang Marcos 6:30-34. Nabasa naton ang nahanungod sa tion nga si Jesus nangita sing pribado nga tion sa pagpahuway. Nian “nakita niya ang dakung kadam-an . . . [nga] daw kaangay sang mga karnero nga wala sing manugbantay.” Ano ang reaksion niya? “Nagsugod sia sa pagtudlo sa ila sang madamong butang.” Huo, ginhatag ni Jesus ang iya kaugalingon bilang sabat sa ila labing daku nga kinahanglanon: ang kamatuoran nga sa amo mahimo sila magkabuhi sing dayon.—Juan 4:14; 6:51.

12. Ano ang maton-an naton nahanungod sa mga panimuot ni Jesus gikan sa Marcos 6:30-34 kag Marcos 6:35-44?

¹² Samtang gin-una ni Jesus ang espirituwal nga kinahanglanon sang imol nga mga Judiyo, wala niya pagpasapayani ang ila materyal nga kinahanglanon. Ang kasaysayan ni Marcos nagapakita nga si Jesus alisto sa pagkinahanglan sang literal nga pagkaon. Ang mga apostoles nagsiling primero nga ang kadam-an palakton “sa pagbakal sing pagkaon.” Wala magpasugot si Jesus. Nian ang mga apostoles nagpanugda nga gamiton ang pundo nila sa pagbakal sing pagkaon. Sa baylo, ginpakamaayo ni Jesus nga himuon ang bantog nga milagro diin ginpakaon niya ang 5,000 ka lalaki, luwas sa mga babayi kag mga kabataan, sang tinapay kag isda. Ayhan ang iban karon magabatyag nga mahapos para kay Jesus ang mag-aman sang mga kinahanglanon sang kadam-an sing milagruso. Apang, indi naton pagkalimtan ang kamatuoran nga may yara sia matuod nga pag-ulikid, kag ginhimo niya ina.—Marcos 6:35-44; Mateo 14:21.a

13. Anong iban pa nga pamatuod ang ginhatag ni Jesus tuhoy sa iya interes sa kaayohan sang mga tawo?

¹³ Ayhan nabasa mo ang kasaysayan sang mga Ebanghelyo nga nagapamatuod nga ang balatyagon ni Jesus ginpakita indi lamang sa mga makaluluoy kundi sa mga imol man. Ginbuligan man niya ang balatianon kag mga nasit-an. (Lucas 6:17-19; 17:12-19; Juan 5:2-9; 9:1-7) Kag indi lamang ini pagpang-ayo sa mga nataboan nga yara malapit sa iya. Kon kaisa naglakbay sia pakadto sa masakiton agod makahatag bulig.—Lucas 8:41-55.

14, 15. (a) Ngaa makasiguro kita nga ginapaabot ni Jesus sa iya mga sumulunod nga ipadayag ang mga pag-ulikid nga kaangay sa iya? (b) Ano ang dapat naton ipamangkot sa kaugalingon?

¹⁴ Apang, ang mga kinahanglanon sang imol kag nasit-an nga mga disipulo (ukon mga nagapangita sing kamatuoran) amo lamang bala ang ginaulikdan sang mga nagahatag sing paumpaw paagi sa paghimo sing milagro? Indi. Ang tanan nga mga disipulo ni Jesus dapat nga mag-ulikid kag maghulag sing nagakaigo. Halimbawa, ginlaygayan niya ang manggaranon nga maluyag sang kabuhi nga walay katapusan: “Ibaligya ang tanan mo kag ipanagtag sa mga imol, kag may bahandi ka sa langit.” (lucas 18:18-22) Si Jesus naglaygay man: “Kon nagahimo ikaw sing sinalusalo, agdaha ang mga imol, ang mga pingkaw, ang mga piang, ang mga bulag; kag mangin malipayon ikaw, bangod nga wala sila sing ibalus sa imo. Kay balusan ka sa pagkabanhaw sang mga matarong.”—Lucas 14:13, 14.

¹⁵ Ang Cristiano sumulunod ni Cristo, gani ang tagsa sa aton makapamangkot: Tubtob diin ko ginailog ang panimuot kag mga buhat ni Jesus sa imol, nasit-an, makaluluoy? Makasiling bala ako sing bunayag, kaangay ni apostol Pablo: “Mangin manug-ilog ko, subong nga ako kay Cristo”?—1 Corinto 11:1.

Si Pablo—Malipayon nga Halimbawa

16. Ano ang may pinasahi nga interes kay apostol Pablo?

¹⁶ Nagakaigo nga binagbinagon si Pablo sa sining kaangtanan, kay isa man sia ka maayong halimbawa nga dapat ilugon. Subong sang mapaabot naton, ang iya una nga interes amo ang espirituwal nga kinahanglanon sang iban. Isa sia ka ‘embahador nga tal-us kay Cristo, nagapakiluoy sa iban, “Magpasag-uli sa Dios.”’ (2 Corinto 5:20) Ang pinasahi nga asaynment ni Pablo amo ang pagbantala kag pagtukod sing mga kongregasyon sa tunga sang mga indi Judiyo. Nagsulat sia: “Gintugyan sa akon ang maayong balita para sa mga disirkunsidado.”—Galacia 2:7.

17. Paano naton nahibaloan nga si Pablo naghatag man sing pisikal nga pag-ulikid?

¹⁷ Apang bangod si Pablo nagsiling nga gin-ilog niya si Cristo, sia bala (kaangay ni Jehova kag ni Jesus) naghatag igtalupangod sa pisikal nga kasisit-an kag kabudlayan sang mga masigka sumilimba? Pasabta si Pablo mismo. Sa Galacia 2:9, nagsiling sia: ‘Si Santiago kag si Cefas [Pedro] kag si Juan naghatag sa akon kag kay Bernabe sang tuo nga kamut sang pagpakig-ambit, agod nga magkadto kami sa mga pungsod.’ Nian sa masunod nga bersikulo si Pablo nagdugang: “Lamang nga pagdumdumon namon ang mga imol. Makugi man ako nga nagtinguha sa paghimo sini.” (Galacia 2:10) Gani naapresyar ni Pablo nga, bisan pa isa sia ka misyonero kag apostol nga may mga responsabilidad sa madamong kongregasyon, indi sia mahimo nga mangin tuman kasaku nga sa amo mangin indi interesado sa pisikal nga kaayohan sang iya kauturan nga lalaki kag babayi.

18. Anong “imol” ang ginapatuhoyan ni Pablo sa Galacia 2:10, kag ngaa dapat sila makabaton sing igtalupangod?

¹⁸ Mahimo nga ang “imol” nga ginpamulong niya sa Galacia 2:10 amo ang Judiyong mga Cristiano sa Jerusalem kag Judea. Sang primero “nagkumod . . . ang nagahambal sing Griego nga mga Judiyo batok sa nagahambal sing Hebreo nga mga Judiyo, bangod nga wala matatapi ang ila mga balong babayi sa pagpanagtag adlaw-adlaw” sang pagkaon. (Binuhatan 6:1) Busa, sang ginsambit ang iya pagka-apostol sa mga pungsod, gin-athag ni Pablo nga wala niya pagpasapayani ang bisan sin-o sa Cristianong paghiliutod. (Roma 11:13) Gin-apresyar niya nga ang pisikal nga pag-atipan sa mga kauturan nalakip sa mga pinamulong: “Walay pagbinahinbahin sang lawas, kundi . . . ang mga bahin magkabalaka ang isa tungod sa isa. Kay kon ang isa ka bahin nagaantus, ang tanan nga bahin nagaantus upod sa iya.”—1 Corinto 12:25, 26.

19. Ano ang pamatuod naton nga si Pablo kag ang iban pa nagpanghikot sa ila pag-ulikid sa mga imol?

¹⁹ Sang ang mga Cristiano sa Jerusalem kag Judea nag-antus bangod sang kaimulon, gutom, ukon paghingabot, ang mga kongregasyon sa malayo nagbulig. Sa pagkamatuod, gindumdum nila ang ila mga imol nga kauturan sa pangamuyo para sa pagsakdag kag paumpaw sang Dios. Apang wala sila mag-untat didto. Si Pablo nagsulat nga “nahamut-an sang Macedonia kag Acaya ang pag-amot tungod sa mga imol sa mga balaan sa Jerusalem.” (Roma 15:26, 27) Ang mga nag-amot sing pinansial sa nasit-an nga mga kauturan “pamanggaron sa tagsa ka butang sa bug-os nga pagkaalwan, nga nagahimo paagi sa amon sing pagpasalamat sa Dios.” (2 Corinto 9:1-13) Indi bala ina rason para sa ila nga magkalipay?

20. Ngaa ang mga kauturan nga nag-amot sing bulig sa “imol” magamalipayon?

²⁰ Ang mga kauturan nga nagpaambit sang ila pundo sa “imol sang mga balaan sang Jerusalem” may dugang nga rason sa pagkalipay. Ang ila pag-ulikid sa nasit-an magabulig sa mga nag-amot nga matigayon ang kahamuot sang Dios. Makita naton kon ngaa paagi sa pagsiling nga ang Griegong tinaga nga ginbadbad “amot” sa Roma 15:26 kag 2 Corinto 9:13 nagaunod sang ideya nga “tanda sang pag-ululupod, pamatuod sang utudnon nga paghiusa, bisan sang dulot.” Gingamit ini sa Hebreo 13:16, nga nagasiling: “Dili malimot sa paghimo sing maayo kag sa pagpaambit sang yara sa imo, kay sa amo nga mga halad nahamuot ang Dios.”

Mangin Malipayon Bala Kita?

21. Ano ang mahinakop naton nga makahatag sing sadsaran sa pagtigayon naton sing kalipay?

²¹ Sa sining paghambalanay, nausisa naton ang pamatuod sang Kasulatan nga si Jehova nga Dios, si Jesucristo, kag si apostol Pablo nag-ulikid sa mga nasit-an. Nakita naton nga sila tanan nagkilala nga ang espirituwal nga mga kinahanglanon dapat nga hatagan sing una nga igtalupangod. Apang nagpakita man sila sa praktikal katama nga paagi sang ila interes sa imol, sa masakiton, kag sa nagaagom sing kasisit-an. Nakasapo sila sing kalipay sa pag-aman sing praktikal nga bulig. Indi bala nga matuod man ina sa aton? Si apostol Pablo naglaygay sa aton nga “dumdumon ang pinamulong ni Ginuong Jesus, sang magsiling sia, ‘Daku ang kalipay sa paghatag sang sa pagbaton.’”—Binuhatan 20:35.

22. Ano nga bahin sini ang nagakabagay pa sang imo igtalupangod?

²² Apang, basi mamangkot ka: Ano gid ang akon personal nga mahimo? Paano ko mahibal-an kon sin-o gid ang nagakinahanglan? Paano ako makahatag bulig sa paagi nga wala nagapalig-on sang katamad, nga malulo kag realistiko, nga nagabinagbinag sa balatyagon sang iban, kag nga timbang sa akon Cristianong katungdanan nga ipalapnag ang maayong balita? Ang masunod nga artikulo magahinun-anon nahanungod sini, nagapasad sing sadsaran para sa imo agod makasapo sing dugang nga kalipay.

[Footnote]

Natandaan Mo Bala?

◻ Paano ginapakita sang Dios ang iya interes sa aton espirituwal nga mga kinahanglanon kag sa aton man pisikal nga mga kinahanglanon?

◻ Ano ang nagapakita nga si Jesus nagaulikid sing labi pa sa pagbulig sa mga tawo paagi sa pagtudlo sa ila sang kamatuoran?

◻ Ano nga sahi sang halimbawa ang ginpahamtang ni Pablo nahanungod sa imol?

◻ Sa tapos mabinagbinag ang mga halimbawa ni Jehova, ni Jesus, kag ni apostol Pablo, ano ang nakita naton nga kinahanglanon himuon?

[Laragway sa pahina 13]

Dapat iaplikar sang Cristianong mga gulang kag sang iban pa ang laygay ni Jesus sa Lucas 14:13, 14.