Padunggi “ang Gintingob sang Dios”

 1, 2. Ano ang ginalaygay sa aton sang Hebreo 13:4?

GINAPADUNGGAN mo bala si Jehova? Sigurado nga ginahimo mo gid ini! Takus gid sia padunggan kag nagpromisa sia nga padunggan man niya kita. (1 Sam. 2:30; Hulu. 3:9; Bug. 4:11) Gusto man niya nga padunggan naton ang iban nga tawo, pareho sa mga opisyal sang gobierno. (Roma 12:10; 13:7) Pero may dapat pa gid kita padunggan. Amo ini ang pag-asawahay.

² Si apostol Pablo nagsulat: “Dapat padunggan sang tanan ang pag-asawahay kag ang bana kag asawa dapat mangin matutom sa isa kag isa.” (Heb. 13:4) Wala lang nagkomento si Pablo parte sa pag-asawahay, kundi ginalaygayan niya ang mga Cristiano nga padunggan ang pag-asawahay, nga tamdon ini nga hamili. Amo man bala sini ang imo pagtamod? Kon minyo ka na, ginapadunggan mo bala ang inyo pag-asawahay?

3. Ano ang ginsiling ni Jesus parte sa pag-asawahay? (Tan-awa ang piktyur sa umpisa sini nga artikulo.)

³ Ginasunod mo ang maayo nga halimbawa kon ginapadunggan mo ang pag-asawahay. Ginpadunggan ni Jesus ang pag-asawahay. Sang namangkot ang mga Fariseo sa iya parte sa diborsio, ginsambit niya ang ginsiling sang Dios parte sa una nga pag-asawahay: “Bangod sini bayaan sang lalaki ang iya amay kag iloy, kag sila nga duha mangin isa ka unod.” Nagsiling pa sia: “Ang gintingob sang Dios, indi pagbulagon sang tawo.”—Basaha ang Marcos 10:2-12; Gen. 2:24.

4. Ano ang katuyuan ni Jehova sa pag-asawahay?

⁴ Nagsiling si Jesus nga ang Dios amo ang nagtukod sang pag-asawahay kag dapat mangin permanente ini. Wala nagsiling ang Dios kanday Adan kag Eva nga puede sila magdiborsio. Sa baylo, katuyuan niya nga sila nga “duha” magahiusa sa wala sing katapusan.

5. Paano ang kamatayon makaapekto sa pag-asawahay?

⁵ Sang nakasala si Adan, madamo sing pagbag-o ang natabo. Ang isa sa sini amo ang kamatayon, nga nakaapekto sa pag-asawahay. Makita naton ini sa ginsulat ni apostol Pablo sang ginpaathag niya nga wala na ginapatuman sa mga Cristiano ang Mosaikong Kasuguan. Nagsiling sia nga kon mapatay ang isa ka tiayon, ang buhi nga tiayon hilway sa pagminyo liwat bangod gintapos na sang kamatayon ang ila pag-asawahay.—Roma 7:1-3.

6. Ano ang ginatudlo sa aton sang Mosaikong Kasuguan parte sa pagtamod sang Dios sa pag-asawahay?

⁶ Ang Kasuguan nga ginhatag sang Dios sa Israel nagasugid sang dugang parte sa pag-asawahay. Gintugutan sini ang poligamya ukon pagminyo sing sobra sa isa, nga ginahimo na antes pa ginhatag sang Dios ang Kasuguan sa Israel. Pero, ginbutangan ini sing limitasyon para maamligan ang mga asawa kag kabataan. Halimbawa, kon ang Israelinhon nagpangasawa sang isa ka ulipon kag sang ulihi nagpangasawa sia sing isa pa, indi niya dapat pagbuhinan ang sustento, ang bayo, kag ang natungod sa una niya nga asawa. Ginapatuman sang Dios nga amligan kag atipanon sang bana ang iya una nga asawa. (Ex. 21:9, 10) Wala na ginapatuman sa aton ang Kasuguan, pero ginatudlo sini nga importante kay Jehova ang pag-asawahay. Makabulig gid ini sa aton nga padunggan ang pag-asawahay.

 7, 8. (a) Suno sa Deuteronomio 24:1, ano ang ginasiling sang Kasuguan parte sa diborsio? (b) Ano ang pagtamod ni Jehova sa diborsio?

⁷ Ano ang ginasiling sang Kasuguan parte sa diborsio? Ginapadunggan gid sang Dios ang pag-asawahay, pero gintugutan niya ang pagdiborsio. (Basaha ang Deuteronomio 24:1.) Puede diborsiohan sang isa ka Israelinhon ang iya asawa kon “may natukiban sia nga indi maayo sa iya.” Wala ginasiling sang Kasuguan kon ano ang nalakip sa “indi maayo.” Pero, mahimo nga makahuluya ini ukon serioso, kag wala malakip diri ang magagmay nga mga sala. (Deut. 23:14) Makapasubo nga sang panahon ni Jesus madamo nga Judiyo ang nagdiborsio sa ila asawa “sa bisan ano nga kabangdanan.” (Mat. 19:3) Indi gid naton gusto nga sundon sila.

⁸ Ginsiling ni manalagna Malaquias ang pagtamod sang Dios sa diborsio. Kinaandan sadto sa isa ka lalaki nga diborsiohan ‘ang iya asawa nga ginpakaslan niya sang bataon pa sia,’ mahimo para mangasawa sing mas bataon nga pagano nga babayi. Ginsulat ni Malaquias ang ginsiling sang Dios: “Ginadumtan ko ang diborsio.” (Mal. 2:14-16) Nahisuno ini sa ginsiling sang Pulong sang Dios parte sa una nga pag-asawahay: “Magahiusa [ang lalaki] sa iya asawa, kag sila mangin isa ka unod.” (Gen. 2:24) Nag-ugyon si Jesus kon paano ginatamod sang iya Amay ang pag-asawahay sang nagsiling sia: “Ang gintingob sang Dios, indi pagbulagon sang tawo.”—Mat. 19:6.

9. Ano ang buot silingon sang ginsiling ni Jesus sa Marcos 10:11, 12?

⁹ Mahimo mamangkot ang iban, ‘May nagakaigo bala nga rason para makadiborsio ang isa ka Cristiano kag magminyo liwat?’ Si Jesus nagsiling: “Ang bisan sin-o nga magdiborsio sang iya asawa kag magpangasawa sang iban nagapanghilahi kag nakasala sa iya, kag kon ang babayi magdiborsio sang iya bana kag magpamana sang iban, nagapanghilahi sia.” (Mar. 10:11, 12; Luc. 16:18) Maathag nga ginpadunggan ni Jesus ang pag-asawahay kag gusto niya nga himuon man ini sang iban. Kon gindiborsiohan sang bana ang iya mainunungon nga asawa (ukon sang asawa ang iya mainunungon nga bana) kag magminyo sang iban, nagapanghilahi sia. Matuod ini kay ang pagdiborsio sang isa sa iya tiayon wala nagatapos sang ila pag-asawahay. Para sa Dios, sila nga duha “isa [gihapon] ka unod.” Nagsiling man si Jesus nga kon diborsiohan sang lalaki ang iya inosente nga asawa, posible nga makapanghilahi ang iya asawa. Ngaa? Sang una, ang gindiborsiohan nga asawa mahimo mapilitan magpamana liwat para may magsuportar sa iya sa pinansial. Kon himuon niya ini, nagpanghilahi man sia.

10. Ano ang isa lang ka rason nga puede magdiborsio ang isa ka tiayon kag magminyo liwat?

¹⁰ Ginsiling ni Jesus ang isa lang ka rason nga puede magdiborsio ang isa ka tiayon: “Nagasiling ako sa inyo nga ang bisan sin-o nga magdiborsio sang iya asawa kag magpangasawa sang iban nagapanghilahi, luwas lang kon ang iya asawa naghimo sing seksuwal nga imoralidad [sa Griego, por·neiʹa].” (Mat. 19:9) Amo man sini ang ginsiling niya sa Sermon sa Bukid. (Mat. 5:31, 32) Pareho nga ginpatuhuyan ni Jesus ang “seksuwal nga imoralidad,” nga amo ang sala nga mga buhat sang pagpakigsekso sang mga wala makasal. Nalakip sa sini ang pagpanghilahi, prostitusyon, pagpakigsekso sang mga indi mag-asawa, homoseksuwalidad, kag bestialidad. Halimbawa, kon ang bana nakahimo sang seksuwal nga imoralidad, ang iya asawa magadesisyon kon diborsiohan niya ang iya bana ukon indi. Kon diborsiohan niya ang iya bana, indi na sila mag-asawa sa pagtamod sang Dios.

11. Ngaa mahimo magdesisyon ang isa ka Cristiano nga indi magdiborsio bisan pa nakahimo sang imoral ang iya tiayon?

¹¹ Talupangda nga wala nagsiling si Jesus nga dapat gid diborsiohan sang isa ang iya tiayon nga nakahimo sang seksuwal nga imoralidad (por·neiʹa). Halimbawa, mahimo magdesisyon ang asawa nga indi magdiborsio bisan pa nakahimo sang imoral ang iya bana. Posible nga palangga niya sia gihapon kag luyag niya nga patawaron ang iya bana kag handa sia nga magkooperar para mangin maayo ang ila pag-asawahay. Pero kon magdiborsio sia kag indi magpamana liwat, posible nga mabudlayan sia. Mahimo mabudlayan sia sa iya materyal kag seksuwal nga kinahanglanon. Masarangan niya ayhan ang kasubo? Ano ayhan ang mangin epekto sa iya kabataan? Masarangan ayhan niya nga padakuon sila sa kamatuoran? (1 Cor. 7:14) Maathag nga may mga kabudlayan ang magadiborsio nga tiayon.

12, 13. (a) Ano ang natabo sa pag-asawahay nanday Oseas kag Gomer? (b) Ngaa ginbakal ni Oseas si Gomer para makabalik sa iya, kag ano ang matun-an naton sa sini?

¹² Ang eksperiensia ni manalagna Oseas makabulig sa aton. Nagsiling ang Dios kay Oseas nga magpangasawa kay Gomer, nga sa ulihi “magapakighilawas” kag ‘magaanak sing mga anak sa iya pagpakighilawas.’ “Nagbusong [si Gomer] kag nagbun-ag sing anak nga lalaki” kay Oseas. (Os. 1:2, 3) Sang ulihi, nagbata si Gomer sang babayi kag lalaki, nga posible lain ang amay. Bisan pa sulitsulit nga nagpanghilahi si Gomer, wala magdiborsio sa iya si Oseas. Dayon ginbiyaan niya si Oseas kag nangin isa ka ulipon. Pero, ginbakal sia ni Oseas para makabalik sa iya. (Os. 3:1, 2) Gingamit ni Jehova si Oseas para ipakita ang Iya sulitsulit nga pagpatawad sa pagpanghilahi nga ginhimo sang Israel. Ano ang matun-an naton sa sini?

¹³ Kon ang isa ka Cristiano makahimo sang imoralidad, ang inosente nga tiayon kinahanglan maghimo sang desisyon. Nagsiling si Jesus nga ang inosente nga tiayon puede makadiborsio kag hilway nga magminyo liwat. Pero, indi man sala kon patawaron niya ang iya tiayon nga nakahimo sang imoralidad. Ginbakal ni Oseas si Gomer para makabalik sa iya. Sang nakabalik na si Gomer kay Oseas, indi na sia dapat maghulid sa iban nga lalaki. Wala man sadto “maghulid” si Oseas kay Gomer. (Os. 3:3) Pero sang ulihi, posible nga naghulid liwat si Oseas sa iya. Ginapakita sini nga gusto sang Dios nga batunon liwat ang iya katawhan kag magbalik ang ila kaangtanan sa iya. (Os. 1:11; 3:3-5) Ano ang ginatudlo sini sa pag-asawahay subong? Kon indi magdiborsio ang inosente nga tiayon kag maghulid sia liwat sa iya tiayon nga nakasala, nagapakita ini nga ginpatawad na niya sia. (1 Cor. 7:3, 5) Kon himuon niya ini, wala na sing rason nga puede sia makadiborsio. Pagkatapos, ang mag-asawa dapat magbuligay para mailog nila ang pagtamod ni Jehova sa pag-asawahay.

14. Suno sa 1 Corinto 7:10, 11, ano ang posible nga matabo sa pag-asawahay?

¹⁴ Dapat padunggan sang tanan nga Cristiano ang pag-asawahay, pareho sang ginhimo ni Jehova kag ni Jesus. Pero ang iban nabudlayan sa paghimo sini, bangod indi kita perpekto. (Roma 7:18-23) Gani, indi katingalahan nga ang pila ka Cristiano sang unang siglo may mga problema sa pag-asawahay. Si Pablo nagsulat nga “ang asawa indi dapat magbulag sa iya bana.” Pero ginhimo ini sang iban.—Basaha ang 1 Corinto 7:10, 11.

15, 16. (a) Bisan may mga problema ang mag-asawa, ano ang dapat nila himuon, kag ngaa? (b) Paano ini maaplikar kon ang isa ka tiayon indi tumuluo?

¹⁵ Wala ginsiling ni Pablo kon ngaa nagbulagay ang pila ka Cristiano. Pero nahibaluan naton nga indi ini bangod nakahimo sang imoral ang bana, amo nga puede kuntani makadiborsio ang asawa kag mamana liwat. Si Pablo nagsulat nga ang asawa nga nagbulag sa iya bana dapat ‘magpabilin nga indi minyo ukon magbalik sa iya bana.’ Sila nga duha mag-asawa gihapon sa pagtamod sang Dios. Si Pablo nagsiling nga bisan may mga problema ang mag-asawa, kon indi seksuwal nga imoralidad ang rason, dapat sila magbalikay kag solbaron ang ila problema. Puede sila makapangayo sang bulig sa mga gulang sa kongregasyon. Indi dapat magdampig ang mga gulang, sa baylo dapat sila maghatag sing laygay nga nabase sa Biblia.

¹⁶ Mahimo nga mabudlay pa gid ang sitwasyon kon isa lang ka tiayon ang tumuluo nga nagasunod sa mga talaksan sang Dios. Kon may mga problema, nagakaigo bala nga solusyon ang pagbulagay? Natun-an naton nga ginsiling sa Kasulatan nga puede makadiborsio kon nakahimo sang seksuwal nga imoralidad ang isa ka tiayon, pero wala sing ginsiling nga mga rason nga puede makabulag ang isa ka tiayon. Si Pablo nagsulat: “Kon ang isa ka babayi may bana nga indi tumuluo kag ang bana sugot nga magpabilin upod sa iya, indi niya pagbayaan ang iya bana.” (1 Cor. 7:12, 13) Ginapatuman gihapon ini asta subong.

17, 18. Ngaa ang pila ka Cristiano wala magbulag bisan pa sa mabudlay gid nga mga sitwasyon?

¹⁷ Pero, may mga sitwasyon nga ang “bana nga indi tumuluo” daw indi “sugot nga magpabilin upod sa iya” nga asawa. Mahimo nga nagapanakit ang bana kag mabutang sa katalagman ang kabuhi sang asawa. Posible nga wala sia nagasuporta sa iya asawa kag sa ila pamilya ukon ginabutang niya sa katalagman ang espirituwalidad sang iya asawa. Sa sini nga mga sitwasyon, ang pila ka Cristiano nga asawa nagdesisyon nga ang ila bana indi “sugot nga magpabilin” sa ila pag-asawahay gani ginbulagan nila ang ila bana, bisan ano pa ang ihambal sang ila bana. Pero ang iban nga may pareho nga sitwasyon nagdesisyon nga indi magbulag. Nagbatas sila kag nagpanikasog para mangin maayo ang ila pag-asawahay. Ngaa?

¹⁸ Kon magbulagay ang mag-asawa, kasado sila gihapon kag mahimo may mga kabudlayan sila nga atubangon, pareho sa ginsambit kaina. Naghatag si apostol Pablo sang isa pa ka rason nga indi sila magbulagay. Sia nagsulat: “Ang indi tumuluo nga bana ginapakabalaan tungod sang iya relasyon sa iya asawa, kag ang indi tumuluo nga asawa ginapakabalaan tungod sang iya relasyon sa iya tumuluo nga bana; kay kon indi, ang inyo mga anak mangin indi matinlo sa mata sang Dios, apang karon balaan na sila.” (1 Cor. 7:14) Madamo sang mainunungon nga Cristiano ang wala magbulag sa ila indi tumuluo nga tiayon bisan pa sa mabudlay gid nga mga sitwasyon. Nalipay gid sila nga sang ulihi ang ila tiayon nangin Saksi ni Jehova.—Basaha ang 1 Corinto 7:16; 1 Ped. 3:1, 2.

19. Ngaa madamo sang malipayon nga mag-asawa sa Cristianong kongregasyon?

¹⁹ Naglaygay si Jesus parte sa diborsio, kag naglaygay man si apostol Pablo parte sa pagbulagay. Gusto nila nga padunggan sang mga alagad sang Dios ang pag-asawahay. Sa bilog nga kalibutan subong, madamo sang malipayon nga mag-asawa sa Cristianong kongregasyon. Mahimo nga sa inyo kongregasyon madamo sang malipayon nga mag-asawa. Ang mainunungon nga mga bana nagapalangga sa ila asawa kag ang mapinalanggaon nga mga asawa nagatahod sa ila bana. Ginapakita nila nga puede padunggan ang pag-asawahay. Nalipay kita nga madamo nga mag-asawa ang nagpamatuod nga husto ang ginsiling sang Dios: “Bangod sini bayaan sang lalaki ang iya amay kag ang iya iloy kag magahiusa sia sa iya asawa, kag sila nga duha mangin isa ka unod.”—Efe. 5:31, 33.