Ang Kabuhi kag Ministeryo ni Jesus

Halin kay Pilato Pakadto kay Herodes kag Balik Liwat

SANG ginsumbong sang mga Judiyo si Jesus bangod sang pagsiling nga sia hari, nagsulod liwat si Pilato sa palasyo sang gobernador agod pamangkuton sia. Bisan pa wala pagtinguhai ni Jesus nga itago nga sia hari, ginapaathag niya nga ang iya Ginharian indi makatalagam sa Roma.

“Ang akon ginharian indi iya sining kalibutan,” siling ni Jesus kay Pilato. “Kon ang akon ginharian iya sining kalibutan, ang akon mga alagad makig-away kuntani agod nga indi ako ikatugyan sa mga Judiyo. Apang, ang akon ginharian indi gikan sa kalibutan.” Busa ginbaton ni Jesus sing makatlo nga may Ginharian sia, bisan pa nga ini indi gikan sa duta.

Apang, si Pilato namangkot sing dugang sa iya: “Ti, kon amo, hari ikaw?” Kon sayuron, hari bala ikaw bisan pa nga ang imo Ginharian indi iya sining kalibutan?

Ginpahibalo ni Jesus si Pilato nga husto ang iya konklusion, sa pagsabat: “Ginasiling mo nga ako hari. Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran. Ang tagsatagsa nga yara sa kamatuoran nagapamati sang akon tingog.”

Huo, ang pagkabuhi ni Jesus sa duta amo ang magsaksi sa “kamatuoran,” labi na sa kamatuoran nahanungod sa iya Ginharian. Handa si Jesus nga magmatutom sa sina nga kamatuoran bisan pa magakahulugan ini sang iya kabuhi. Bisan pa nagpamangkot si Pilato: “Ano bala ang kamatuoran?” wala sia maghulat para sa dugang nga paathag. Bastante na ang nabatian niya para magdesisyon.

Nagbalik si Pilato sa kadam-an nga nagahulat sa guwa sang palasyo. Ayhan yara sa tupad niya si Jesus, ginsilingan niya ang pangulong mga saserdote kag yadtong kaupod nila: “Wala ako sing nakita nga kasal-anan sining tawo.”

Naakig sa desisyon, ang kadam-an nagsugod sa pag-insister: “Ginasugyot niya ang katawhan nga nagapanudlo sa bug-os gid nga Judea, kutob sa Galilea bisan tubtob diri.”

Ang dimakatarunganon nga panatisismo sang mga Judiyo mahimo nga nagpakibot kay Pilato. Gani, samtang padayon nga nagasinggit ang puno nga mga saserdote kag ang mga tigulang, si Pilato nagbalikid kay Jesus kag nagpamangkot: “Wala ka bala nagapamati sa madamo nga butang nga ginasaksi nila batok sa imo?” Apang, si Jesus wala magsabat. Ang kakalma niya sa atubangan sang matigdas nga mga sumbong nagpatingala sing daku kay Pilato.

Sang nahibaluan niya nga si Jesus Gali­leanhon, si Pilato nakakita sing paagi nga manginluwas sa responsabilidad. Ang manuggahom sang Galilea, si Herodes Antipas (anak ni Herodes nga Daku) yadto sa Jerusalem para sa Paskuwa, gani ginpadala ni Pilato si Jesus sa iya. Sang nagligad, ginpapugutan sing ulo ni Herodes Antipas si Juan Bautista, kag nian hinadlukan si Herodes sang nabalitaan niya ang nahanungod sa milagruso nga mga buhat ni Jesus, nahadlok nga basi si Jesus amo gid si Juan nga ginbanhaw sa patay.

Ti, nalipay sing daku si Herodes nga makita si Jesus. Indi bangod nabalaka sia sa kaayuhan ni Jesus ukon nga luyag niya mahibaluan kon bala matuod ukon indi ang sumbong batok sa iya. Sa baylo, interesado lamang sia kag nagalaum nga makita si Jesus nga magahimo sing milagro.

Apang, wala ginsapak ni Jesus ang pagkamausisaon ni Herodes. Sa katunayan, sang ginapamangkot sia ni Herodes, wala sia magsabat sing bisan ano. Nabang-awan, gin-uligyat ni Herodes kag sang iya soldado si Jesus. Ginpasul-uban nila sia sing panapton nga malahalon kag gin-uligyat sia. Nian ginpabalik niya sia kay Pilato. Subong resulta, si Herodes kag si Pilato, nga magkaaway sadto anay, nangin maayo nga mga mag-abyan.

Sang nagbalik si Jesus, gintipon ni Pilato ang puno nga mga saserdote, ang Judiyong mga manuggahom, kag ang katawhan kag nagsiling: “Gindala ninyo sa akon ining tawo subong sang isa nga nagapatalang sang katawhan, kag, yari karon! sang nausisa sia sa atubangan ninyo, ako walay nakita nga kasal-anan sa sining tawo sang bisan ano nga mga ginsumbong ninyo batok sa iya. Wala, bisan pa si Herodes, kay ginpabalik niya sia sa akon; kag, yari karon! walay ano nga takus sa kamatayon nga nahimo niya. Busa silotan ko sia kag buhian.”

Gani, makaduha nga ginpahayag ni Pilato nga si Jesus wala sing sala. Nalangkag sia nga buhian sia, kay nahibaluan niya nga bangod lamang sa kahisa nga gintugyan sia sa iya sang mga saserdote. Apang sang padayon nga gintinguhaan ni Pilato nga buhian si Jesus, nakabaton sia sing isa pa ka makusog nga motibasyon nga himuon ina. Samtang yara sa iya lingkoran nga hukmanan, ang iya asawa nagpasugo sa iya, nga nagasiling: “Indi ka maghilabot sinang tawo nga matarong, kay nag-antos ako karon nga adlaw sing madamo nga butang sa damgo [ayhan nga may balaan nga ginhalinan] bangod sa iya.”

Apang, paano buhian ni Pilato ining walay sala nga tawo, subong sang nahibaluan niya nga dapat niya himuon? Juan 18:​36-38; Lucas 23:​4-16; Mateo 27:​12-14, 18, 19; 14:​1, 2; Marcos 15:​2-5.

◆ Paano ginsabat ni Jesus ang pamangkot nahanungod sa pagkahari niya?

◆ Ano ang “kamatuoran” nga nahanungod sini ginhinguyang ni Jesus ang iya kabuhi sa duta sa pagpanaksi?

◆ Ano ang desisyon ni Pilato, ano ang reaksion sang mga tawo, kag ano ang ginhimo ni Pilato kay Jesus?

◆ Sin-o si Herodes Antipas, ngaa nalipay sia sing daku nga makita si Jesus, kag ano ang ginhimo niya sa iya?

◆ Ngaa luyag buhian ni Pilato si Jesus?