Ang Kabuhi kag Ministeryo ni Jesus

Pagtuman sa Tagna ni Isaias

SANG mahibaloan ni Jesus nga ang mga Fariseo kag mga sumulunod ni Herodes nagaplano sa pagpatay sa iya, sia kag ang iya mga disipulo naglikaw pakadto sa Dagat sang Galilea. Diri ang dakung kadam-an gikan sa bilog nga Palestina, kag bisan gikan sa guwa sang mga dulonan sini, nagdugok sa iya. Gin-ayo niya ang madamo, amo kon ngaa ang tanan nga nagabalatian sing grabe nagdinaguso sa pagtandog sa iya.

Bangod daku ka tama ang kadam-an, ginsilingan niya ang iya mga disipulo nga maghanda pirme sing sakayan nga magamit niya. Paagi sa pagpakadto sa dagat, mapunggan niya ang kadam-an sa pagdinaguso sa iya. Matudloan niya sila gikan sa sakayan ukon makalakbay sa iban nga lugar sa baybayon agod mabuligan ang mga tawo didto.

Si disipulo Mateo nagsiling nga ang ginhimo ni Jesus nagatuman “sang ginpamulong ni Isaias nga manalagna.” Nian ginkutlo ni Mateo ang tagna nga ginatuman ni Jesus, nga amo:

“Yari karon! Ang akon alagad nga ginpili ko, ang akon hinigugma, nga nahamut-an sang akon kalag! Ibutang ko sa iya ang akon espiritu, kag sia magapahayag sing paghukom sa mga pungsod. Indi sia magabais, ukon magasinggit, kag bisan sin-o indi makabati sang iya tingog sa mga dalan. Ang tabon-ak nga basag indi niya pagbalion, ukon ang pabilo nga nagapuug pagpalungon, tubtob nga iya madala ang katarungan sa pagdaug. Kag sa iya ngalan magalaum ang mga pungsod.”

Sa pagkamatuod, si Jesus amo ang hinigugma nga alagad nga nahamut-an sang Dios. Kag ginpahayag ni Jesus ang matuod nga katarungan, nga ginlikom sang butig nga relihiosong mga tradisyon. Bangod sang ila dimakatarunganon nga pag-aplikar sa kasugoan sang Dios, ang mga Fariseo indi gani magbulig sa tawo nga nagamasakit sa Adlaw nga Inugpahuway! Gani, nagapahayag sang katarungan sang Dios, ginhilway ni Jesus sa mga tawo ang lulan sang dimakatarunganon nga mga tradisyon, nga bangod sini gintinguhaan sang relihiosong mga lider nga patyon sia.

Ano ang buot silingon sang ‘indi sia magabais, ukon magasinggit agod ang iya tingog indi mabatian sa mga dalan’? Ti, sang gin-ayo niya ang katawhan, si Jesus ‘nagtugon gid nga indi nila pag-ipakilala sia.’ Indi niya luyag ang magahod nga pagpahibalo tuhoy sa iya sa mga dalan ukon ang makunyagon nga balita nga ipamababa kag ipatiko.

Subong man, si Jesus nagadala sing makapaumpaw nga mensahe sa mga tawo nga daw subong sang tabon-ak nga basag, nga nabali kag gintapaktapak. Kaangay sila sang pabilo, nga halos napalong sang nagakipawkipaw. Si Jesus wala nagabali sa tabon-ak nga basak ukon nagapalong sa nagakipawkipaw, nagaaso nga pabilo. Apang upod ang kalum-ok kag gugma malantipon niya nga ginapahalipay ang mapainubuson. Sa pagkamatuod, si Jesus amo gid ang isa nga malauman sang mga pungsod! Mateo 12:15-21; Marcos 3:7-12; Isaias 42:1-4.

◆ Paano ginapahayag ni Jesus ang katarungan, kag wala nagabais ukon nagasinggit sa mga dalan?

◆ Sin-o ang kaangay sa tabon-ak nga basag kag pabilo, kag ano ang ginhimo ni Jesus sa ila?