Naisip Mo Na Bala ang Bili?

“ANO! Ginapangindian mo inang matahom nga tanyag?” Daw indi halos makapati ang superbisor sa iya bag-o lang nabatian. Ang iya tinawo, isa ka babayi nga ginatahod bangod sang iya kalantip kag maayo nga paggawi, nagpangindi sa tanyag nga mag-eskwela sa iban nga pungsod sa duha ka tuig sa gasto sang kompaniya. Ngaa nangindi sia?

Ang pagbaton sa tanyag, paathag sang babayi, magakahulugan sang pagbulag sa iya bana kag duha ka kabataan sa duha ka tuig. Hidlawon gid sia sa ila. Labi ka importante, mapatumbayaan niya ang iya hatag-Dios nga mga katungdanan bilang asawa kag iloy. Ang emosyonal kag ang espirituwal nga bili tuman kataas agod ibayad. Nian, sa tapos mabinagbinag ang bili, nagdesisyon sia nga indi pagbatunon ang tanyag.

Ano ang imo himuon kon ikaw ang yara sa lugar niya? Sing maathag, indi tanan ang magaugyon sa desisyon nga ginhimo sining Cristiano nga babayi. Ang pila, katulad sang iya mga kaupod sa trabaho, mahimo magabatyag nga gin-usikan niya ang isa ka matahom nga kahigayunan nga mapauswag ang iya karera. Ang iban magabasol pa sa iya nga wala niya ginahunahuna ang palaabuton sang iya pamilya, bangod, kon pensaron, ang duha ka tuig madali man lang maglipas. Apang, ang iya desisyon indi padasudaso ukon dala sang balatyagon. Napasad ini sa maayo nga rason kag maalamon nga mga prinsipio. Ano ang mga ini?

Kapin Pa sa Pagkapraktikal

Ang labing maalam nga tawo nga naglakat sa duta, si Jesucristo, nag-aman sing sulundan sa isa sang iya mga parabola. “Kay sin-o bala sa inyo nga nagahandum sa pagtukod sing torre ang indi anay maglingkod kag mag-isip sang kabilihanan, kon may igapahuman sia?” Namangkot si Jesus. “Basi kon, sang nabutang niya ang sadsaran kag indi makasarang sa pagtapos, ang tanan nga makakita sini magasugod sa pag-uligyat sa iya nga nagasiling, ‘Ining tawo nagsugod sa pagtukod kag wala makasarang sa pagtapos.’”—Lucas 14:28-30.

Magaugyon ang tanan nga maalamon kag praktikal ang pag-isip sang bili antes maghimo sang bisan anong importante nga bagay. Halimbawa, kon luyag sang isa ka tawo magbakal sing balay, magapadasudaso bala sia sa pagpirma sa kontrata nga wala anay ginahibalo ang bili kag siguraduhon nga may pinansial sia nga ikasarang sa pagtapos sa kasugtanan? Tamdon gid sia nga buangbuang kon himuon niya ina. Huo, mas maayo nga binagbinagon ang bili antes suguran ang isa ka buluhaton.

Apang, ano gid nga punto ang ginapakita ni Jesus sa sina nga parabola? Antes ipahayag ang parabola, sia nagsiling: “Ang bisan sin-o nga wala nagapas-an sang iya kaugalingon nga usok sang pag-antos kag nagasunod sa akon indi mangin akon gintutun-an.” (Lucas 14:27) Nian, ang konteksto nagapakita nga si Jesus wala lamang nagahatag sing praktikal nga laygay para sa aton kinaandan, adlaw-adlaw nga mga buluhaton. Sa baylo, nagahambal sia tuhoy sa pag-isip sang bili may kaangtanan sa pagkamangin gintutun-an niya.

Paagi sa iya parabola, ginpadaku ni Jesus nga nadalahig ang mga pagbag-o kag mga sakripisyo agod mangin iya gintutun-an. Ngaa? Bangod materialistiko kag ginapahulag sang kaugalingon nga interes ang presente nga sistema sang mga butang. Ang kalabanan nga mga tawo nagahunahuna lamang sang pagpaayaw sa ila undanon nga mga handum, nagahatag sing diutay nga pagtamod ukon wala gid sa ila espirituwal nga mga kinahanglanon ukon sa ila kaangtanan sa Dios. (2 Timoteo 3:1-4) Apang baliskad ini nga panimuot, ukon espiritu, sa ginpakita ni Jesucristo. “Subong nga ang anak sang tawo wala magkari,” sia nagsiling, “nga alagdon, kundi sa pag-alagad kag sa paghatag sang iya kabuhi nga gawad sang madamo.” Ginbutang niya ang labing mataas nga balor sa espirituwal sa baylo sang sa materyal nga mga bagay sang sia nagsiling: “Ang espiritu amo ang nagahatag sing kabuhi; ang unod walay pulos.”—Mateo 20:28; Juan 6:63.

Sa amo, sang ginlaygayan ni Jesus yadtong luyag mangin iya gintutun-an nga isipon nila ang bili, nagahambal sia labi na, indi sang materyal, kundi sang espirituwal nga mga kabilihanan. Ano ang kapin ka importante sa ila, ang materyal nga bentaha nga ginatanyag sang kalibutan ukon ang espirituwal nga mga benepisyo nga ginatanyag sang pagkagintutun-an? Amo ina kon ngaa sa tapos mahatag ang parabola kag ang isa pa nga may kaangtanan diri, naghinakop sia: “Busa, gani ang bisan sin-o sa inyo nga indi magbiya sang tanan niya nga pagkabutang indi sia mangin akon gintutun-an.” (Lucas 14:33) Ang isa nga mangin sumulunod kinabubut-on kag handa bala sa paghimo sina nga sakripisyo, ukon tuman ina bala kataas nga bayad?

Isa ka Natimbang nga Pagtamod

Bisan pa ang materyal nga mga butang makadala sing benepisyo nga kapin ka talalupangdon kag sa gilayon, ang mga benepisyo gikan sa espirituwal nga mga panikasog nagapabilin kag kapin ka makaalayaw. Si Jesus nangatarungan sa sining paagi: “Dili kamo magtipon sa inyo kaugalingon sing mga bahandi sa duta, diin ang sipit kag ang tuktok nagapapas, kag diin ang mga makawat nagaguhab kag nagapangawat. Kundi, magtipon kamo sa inyo kaugalingon sing mga bahandi sa langit, diin walay sipit kag tuktok nga nagapapas, kag diin ang mga makawat indi magguhab kag magpangawat.” (Mateo 6:19, 20) Sa aton tinion, ang pagsaka sang balaklon, pag-usmod sang stock-market, pagkaputo sang banko, kag iban pa, nangin kabangdanan sang kapierdihan sang iban nga nagbutang sang ila pagsalig sa materyal lamang nga kamanggaran. Apang, si apostol Pablo nagalaygay sa aton nga ‘indi magtulok sa mga butang nga makita, kundi sa mga butang nga dimakita. Kay ang mga butang nga makita umalagi, apang ang mga butang nga dimakita nagapadayon.’ (2 Corinto 4:18) Apang, paano kita makapalambo sina nga pagtamod?

Mahimo naton ina paagi sa pag-ilog sa aton Huwaran kag Halimbawa, si Jesucristo. Sang yari sa duta, indi sia isa ka ermitanyo, subong ginapamatud-an sang kamatuoran nga nagpakigbahin sia kon kaisa sa mga piesta ukon mga sinalusalo. Apang, maathag nga gin-una niya ang espirituwal nga mga butang. Agod matuman ang kabubut-on sang iya Amay, handa sia bisan pa sa pagpaiway sang ginakabig nga mga kinahanglanon. Kaisa sia nagpahayag: “Ang talunon nga mga ido may mga lungib kag ang mga pispis sa langit may mga hapunan, apang ang Anak sang tawo wala gid sang ulunlan sang iya ulo.” (Lucas 9:58) Ginkabig niya ang paghimo sing kabubut-on sang iya amay nga tuman ka importante kag makalilipay amo nga nakasiling sia upod ang tinagipusuon nga pagkasinsero: “Ang akon kalan-on amo ang paghimo sang kabubut-on sang nagpadala sa akon kag ang pagtuman sang iya buluhaton.”—Juan 4:34.

Ginpakita ni Jesus ang iya pagpabili sang ginsikway niya ang mga pagsulay ni Satanas. Gintinguhaan sang Yawa nga ipagamit kay Jesus ang iya hatag-Dios nga gahom para sa Iya kaayuhan, sa pagpaayaw sa Iya pisikal nga mga kinahanglanon, kag sa pagtigayon sang kalibutanon nga dungog kag kabantugan. Nakahibalo gid si Jesus nga inang maduhaduhaan nga mga benepisyo maangkon lamang sa tuman kataas nga bili—ang pagwasi sang kahamuot sang Dios—bili nga mas mataas sang sa luyag niya bayaran, bangod ginapakabahandi niya labaw sa tanan ang iya maayo nga kaangtanan sa iya Amay. Amo kon ngaa malig-on niya nga ginsikway ang mga tanyag ni Satanas, nga wala sing pangalag-ag.—Mateo 4:1-10.

Subong mga sumulunod ni Cristo, luyag gid naton nga may kaangay nga prinsipio sa aton Agalon. Sa karon nga sistema sang mga butang nga kontrolado ni Satanas, madamong butang ang daw nagasaad sing maayong mga benepisyo apang makahalalit gali sa aton kaangtanan sa Dios. Ang mga butang kaangay sang pagtinguha sing mataas nga posisyon sa sekular nga trabaho, pagtinguha sing mataas nga edukasyon agod mapasaka ang posisyon, pagpangaluyag sa mga ditumuluo, ukon pagpakigbahin sa malain nga mga padihot sa negosyo mahapos makadul-ong sa pagkadula sing pagtuo kag sa pagkawasi sang kahamuot ni Jehova. Dapat naton binagbinagon sing maayo ang bili kon nagaatubang sa sinang mga pagsulay.

Ang Matuod nga Kaalam Isa ka Pangamlig

Mga pila ka tuig ang nakaligad, isa ka Cristianong lalaki sa daku nga siudad sa Malayong Sidlangan ang may kahigayunan nga makakadto sa iban nga pungsod agod makatuon sing dugang. Bisan pa may maayo na sia nga sekular nga edukasyon kag trabaho nga may maayo nga sweldo, nagbatyag sia nga indi pa ini bastante; luyag niya pauswagon ang iya kahimtangan sa pangabuhi. Ang masigka-Cristiano nagtinguha sa pagpangatarungan sa iya nahisanto sa Makasulatanhon nga mga punto nga aton bag-o lang nabinagbinag, apang matig-a gid sia kag nagpadayon sa iya plano. Bisan pa nagtinguha sia sing primero sa pagpabilin sa iya pagtuo, amat-amat niya nga nadula ang iya apresasyon sa kamatuoran sa Biblia, kag nagsugod sa pagsulod ang mga pangduhaduha. Sa isa ka tuig ukon sulusobra lang, bug-os niya nga nadula ang iya pagtuo kag nangangkon nga wala nagapati sa Dios. Ibutang ta, ang pag-angkon sang mataas nga karera paagi sa mataas nga sekular nga edukasyon nakahatag sa iya sing kaayawan. Apang para sa umalagi nga himaya, daw ano ka daku nga kabayaran—ang pagkalunod sang iya pagtuo kag ang katalagman nga madula ang kabuhi nga walay katapusan!—1 Timoteo 1:19.

Sa pihak nga bahin, yadtong wala nagapahanugot sang bisan ano nga bagay nga makabutang sa katalagman sang ila kaangtanan sa Dios nakaani sing daku nga mga pagpakamaayo gikan kay Jehova.

Isa ka halimbawa amo ang iya sang isa ka lamharon nga lalaki nga nagapanag-iya sang isa ka negosyo sa interior decorating (pagpatahom ukon pagdekorar sa isa ka balay ukon tinukod) sa amo man nga siudad nga ginsambit sa ibabaw. Pila lamang ka bulan matapos sia makasugod sa pagtuon sa Biblia upod sa mga Saksi ni Jehova, nakabaton sia sing makagalanyat nga tanyag—sa paghimo sing isa ka $30,000 nga trabaho sa pagpakaayo. Apang, magalakip ini sa dipagsunod sa mga building code kag regulasyon sa pagpatindog sing di-legal nga tinukod. Sanglit natun-an niya nga ang mga Cristiano dapat mangin masinulundon sa kasuguan, nahibaluan niya nga ang pagbaton sining trabaho magakahulugan sing pagkawasi sang kahamuot sang Dios. (Roma 13:1, 2) Matapos matimbangtimbang sing maayo ang bagay, wala niya pagbatuna ang trabaho. Ang resulta? Ining buhat sang pagtuo nangin panugod sang iya espirituwal nga pag-uswag. Sa sulod sang isa ka tuig, nag-uswag sia sa punto sang dedikasyon kag bawtismo. Ginbaligya niya ang iya negosyo kag nagkuha sing obra nga makapahanugot sa iya sing kapin nga tion para sa espirituwal nga mga panikasog. Nagaalagad sia karon kay Jehova nga may kalipay kag kakugi.

Ining duha ka lamharon nga mga lalaki nag-isip sang bili. Ano ang kinatuhayan sa ila pagpili? Diosnon nga kaalam! Paano? Ang kaalam amo ang ikasarang sa pag-aplikar sang ihibalo sa paagi nga makadala sing dayon nga mga benepisyo, kag ang diosnon nga kaalam nagakahulugan sang paggamit sang ihibalo nahisuno sa katuyuan sang Dios para sa aton. Samtang ang duha ka lamharon nga lalaki pareho nga may pila ka kinaalam sa Biblia, ang ila pag-aplikar sa sini nagdul-ong sa lainlain nga mga resulta. Ang tulun-an sang Hulubaton nagasiling: “Kon ang kaalam magasulod sa imo tagipusuon kag ang ihibalo mangin kalahamut-an sa imo kalag, ang pagbinagbinag magabantay sa imo, ang paghangop magatipig sa imo, sa pagluwas sa imo sa dalanon sang malaut.”—Hulubaton 2:10-12.

Ang Pulong sang Dios, ang Biblia, amo ang tuburan sang matuod nga kaalam sa diin ikaw pirme makadangop para sa tuytoy kon kinahanglan mo maghimo sing importante nga mga desisyon. Sa baylo nga magmangin maalam sa imo kaugalingon nga mga mata, pamatii ang laygay: “Salig kay Jehova sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag magatuytoy sia sa imo mga banas.” (Hulubaton 3:5, 6) Dapat kita mangin mapainubuson kag handa tudluan, nagalikaw sa kinaugalingon nga pagbuot kag independiente nga espiritu sang kalibutan nga lapnag karon.

Huo, indi kita makalikaw sa pag-ani sang kon ano ang aton ginsab-ug, kag makatarunganon lang nga pas-anon naton ang mga resulta sang aton mga desisyon kag pagpili. (Galacia 6:7, 8) Gani, isipa ang bili antes sang tagsa ka buluhaton. Indi pagtuguti ang bisan ano nga daw bentaha sa pagkuha sa imo sang imo espirituwalidad ukon sang imo kaangtanan kay Jehova nga Dios. Magpangamuyo para sa kaalam kag maayong paghukom sa paghimo sing husto nga desisyon, bangod ang mga desisyon nga ginahimo mo karon mahimo magakahulugan sang kabuhi ukon kamatayon—sa walay katapusan!—Ipaanggid ang Deuteronomio 30:19, 20.

[Mga Laragway sa pahina 28]

Unahon bala niya ang espirituwal nga mga buluhaton ukon ang sekular nga karera?