Palambua ang Espiritu sang Pagkamapasalamaton

NALUWAS sang isa ka manugbulong sa New York State ang nagaagaw-agaw nga kabuhi ni Marie. Apang ang 50-anyos nga si Marie wala gani magpasalamat sa doktor ukon magbayad sang iya balayran. Isa gid ka halimbawa sang pagkawalay kabalaslan!

Ang Biblia nagareport nga sadto anay, sang nagapasulod sa isa ka minuro, nasumalang ni Jesus ang napulo ka tawo nga may makangilil-ad nga balatian nga aro. Nagsinggit sila sa iya sa mabaskog nga mga tingog: “Jesus, Manunudlo, kaluuyi kami!” Si Jesus nagsugo: “Lakat kamo kag mag-atubang kamo sa mga saserdote.” Gintuman sang mga aruon ang iya sugo, kag samtang nagalakat, nakita nila kag nabatyagan nga napasag-uli ang ila panglawas.

Ang siam sa naayo nga mga aruon nagpadayon sa ila paglakat. Apang ang isa pa ka aruon, nga isa ka Samaritano, nagbalik sa pagpangita kay Jesus. Ining anay aruon nagdayaw sa Dios, kag sang nakita si Jesus, nagluhod sia, nga nagapasalamat sa iya. Bilang sabat si Jesus nagsiling: “Napulo ang natinluan, indi bala? Diin na, kon amo, ang siam? Wala bala sing isa nga nasapwan nga nagbalik sa paghatag sing himaya sa Dios kundi ining tawo sang iban nga pungsod?”​—⁠Lucas 17:​11-19.

Isa ka importante nga leksion ang ginapahangop sang pamangkot: “Diin na, kon amo, ang siam?” Kaangay ni Marie, ang siam ka aruon may malubha nga kakulangan​—⁠wala sila magpakita sing pagpasalamat. Ining pagkawalay kabalaslan tuman ka lapnag karon. Ano ang rason sa sini?

Sadsaran nga Kabangdanan sang Pagkawalay Kabalaslan

Ang pagkawalay kabalaslan naghalin sa kakagod. Binagbinaga ang aton nahaunang tawhanon nga mga ginikanan, sanday Adan kag Eva. Si Jehova nagtuga sa ila nga may diosnon nga mga kinaiya kag nag-aman sing tanan nga butang para sa ila kalipay, lakip na ang matahom nga katamnan nga puluy-an, himpit nga mga palibot, kag makalilipay kag makaalayaw nga hilikuton. (Genesis 1:​26-29; 2:​16, 17) Apang, bangod sang pagbuyok ni Satanas sa ila pagkamaiyaiyahon, subong mag-asawa ginlapas kag gintamay nila ang kaalwan ni Jehova.​—⁠Genesis 3:​1-5; Bugna 12:⁠9.

Binagbinaga man ang katawhan sang dumaan nga Israel, nga ginpili sang Dios nga mangin pinasahi nga pagkabutang niya. Daku gid ang pagpasalamat sang tanan nga Israelinhon nga mga ginikanan sang gab-i sang Nisan 14, 1513 B.⁠C.⁠E.! Sadtong importante nga gab-i, ginpatay sang anghel sang Dios ang “tanan nga panganay sa duta sang Egipto” apang ginligaran ang namarkahan sing nagakaigo nga mga kabalayan sang mga Israelinhon. (Exodo 12:​12, 21-24, 30) Kag sang ginluwas gikan sa hangaway ni Paraon sa Dagat nga Pula, upod ang mga tagipusuon nga puno sing pagpasalamat, ‘si Moises kag ang mga anak sang Israel nag-amba kay Jehova.’​—⁠Exodo 14:​19-28; 15:​1-21.

Apang, paglipas lamang sang mga pila ka semana nga nakahalin sa Egipto, “ang bug-os nga asambleya sang mga anak sang Israel nagsugod sa pagkumod.” Kadasig gid sa ila madulaan sing utang nga kabalaslan! Ginkahidlawan nila ang “paglingkod sa tupad sang mga lalagaan sang karne . . . , nga nagakaon sing tinapay tubtob mabusog” nga gin-agom nila anay sa Egipto, ang pungsod nga nag-ulipon sa ila. (Exodo 16:​1-3) Sing maathag, ang pagkamapasalamaton indi mapalambo kag mapadayag kon may kakagod.

Subong mga kaliwatan sang makasasala nga Adan, ang tanan nga tawo nabun-ag nga may huyog nga mangin makagod kag mangin walay kabalaslan. (Roma 5:12) Ang pagkawalay kabalaslan isa man ka bahin sang makagod nga espiritu nga lapnag sa katawhan sining kalibutan. Kaangay sang hangin nga aton ginahaklo, ina nga espiritu yara bisan diin, kag nagaapektar ini sa aton. (Efeso 2:​1, 2) Nian, dapat naton palambuon ang kinaiya nga pagkamapasalamaton. Paano naton ini mahimo?

Ang Pagpamalandong Kinahanglanon!

Ang Webster’s Third New International Dictionary nagahatag sing kahulugan sa pagkamapasalamaton subong “ang kahimtangan nga mapasalamaton: mainit kag mainabyanon nga balatyagon ayon sa isa nga nagbulig nga nagapahulag sa isa nga tumbasan ang pabor.” Ang balatyagon indi mahimo mapukaw ukon mapaiway sing awtomatiko; magautwas ini sing kinabubut-on gikan sa isa. Ang pagpasalamat indi lamang pagpakita sing maayong mga pamatasan ukon isa ka porma sang maayo nga batasan; nagahalin ini sa tagipusuon.

Paano naton matun-an ang magpasalamat sing tinagipusuon? Ginapatungod sang Biblia ang kalabanan nga ginabatyag naton sa aton ginapili nga hunahunaon. (Efeso 4:​22-24) Ang pagtuon sa pagbatyag sing pagpasalamat nagasugod paagi sa pagpamalandong sing mainapresyahon sa mga pagkaayo nga nabaton naton. Nahisuno sa sini, si Dr. Wayne W. Dyer, nga nagapangabudlay sa patag sang kapagros sa hunahuna, nagsiling: “Indi ka makabatyag (emosyon) kon indi ka anay maghunahuna.”

Binagbinaga, halimbawa, ang tuhoy sa pagpasalamat tungod sa mga tinuga sa palibot naton. Kon magtangla ka sa mabituunon nga kahawaan sa wala sing panganod nga kagab-ihon, ano ang ginabatyag mo sa imo nakita? Ginpabutyag ni Hari David ang kahayanghag nga iya nabatyagan: “Kon makita ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginhanda, ano bala ang mamalatyon nga tawo nga padayon mo sia nga ginadumdom, kag ang anak sang tawo nga ginaatipan mo sia?” Kag sa kalinong sang kagab-ihon, ang mga bituon nagapakighambal kay David, nga nagpahulag sa iya sa pagsulat: “Ang mga langit nagapahayag sang himaya sang Dios; kag ang kahawaan nagasugid sang binuhatan sang iya mga kamot.” Ngaa ang mabituunon nga mga langit nakaapektar sing daku kay David? Sia mismo nagasabat: “Ginpamalandungan ko ang tanan mo nga hinimuan; kinabubut-on ko nga ginhunahuna ang binuhatan sang imo mga kamot.”​—⁠Salmo 8:​3, 4; 19:​1; 143:⁠5.

Gin-apresyar man ni Solomon nga anak ni David ang balor sang pagbinagbinag sa mga kalatingalahan sang pagpanuga. Halimbawa, nahanungod sa bahin nga ginatungod sang mga panganod sang ulan sa pagrepresko sa aton duta, sia nagsulat: “Ang tanan nga suba nagailig pakadto sa dagat, apang ang dagat wala mapuno. Sa duog diin ang mga suba nagakadto, didto nagabalik sila.” (Manugwali 1:7) Gani pagkatapos marepreskuhan sang mga ulan kag sang mga suba ang duta, ang ila mga tubig nagaresiklo halin sa mga dagat pabalik sa mga panganod. Ano ang matabo sa duta kon wala ining pagputli kag pagresiklo sa tubig? Daw ano ka daku ang pasalamat ni Solomon sang ginbinagbinag niya ining mga butang!

Ang tawo nga mapasalamaton nagapabalor man sang iya mga kaangtanan sa mga katapo sang pamilya, mga abyan, kag mga kakilala. Ang ila mga buhat sang pagkaayo nagaganyat sang iya igtalupangod. Samtang mainapresyahon nga ginabinagbinag niya ang ila pagkaayo, nagabatyag sia sing tinagipusuon nga pagpasalamat.

Pagpabutyag sing Pagpasalamat

Simple gid lang ang tinaga nga “salamat!” Tuman gid kahapos ibungat ina nga tinaga. Kag may madamo nga kahigayunan agod himuon ini. Daw ano ka makarepresko ang mainit kag hanuot nga Salamat sa isa nga nagabukas sang ganhaan para sa aton ukon nagapudyot sang isa ka butang nga nahulog naton! Ang pagpamati sa sinang ekspresyon magahimo sa trabaho sang isa ka klerk sa balaligyaan ukon sang isa ka serbidora sa restawran ukon sang isa ka kartero nga mas mahapos kag mas makalilipay.

Ang pagpadala sing mga thank-you card isa ka kombeniente nga paagi sa pagpabutyag sing pasalamat tungod sa mga buhat sang pagkaayo. Madamo nga kard ang mabakal sa mga balaligyaan nga nagapabutyag sing matahom sang balatyagon. Apang indi bala pagpakita sing gugma kon magdugang ikaw sing mga tinaga sang pagpasalamat nga ikaw mismo ang nagsulat? Ginpakamaayo pa gani sang iban nga indi maggamit sing komersial nga kard, nagapadala sa baylo sing personal nga malip-ot nga sulat.​—⁠Ipaanggid ang Hulubaton 25:⁠11.

Ayhan ang labi gid nga nagakabagay sa aton pagpasalamat amo ang mga pinakamalapit sa aton sa puluy-an. Tuhoy sa isa ka sangkol nga asawa, ang Biblia nagasiling: “Ang iya bana nagabangon, kag nagadayaw sa iya.” (Hulubaton 31:28) Indi bala nga ang tinagipusuon nga mga ekspresyon sang pagpasalamat sang bana sa iya asawa nagapasanyog sing kalinong kag pagkakontento sa puluy-an? Kag indi bala malipay man ang bana sa pagpauli kon may mainit kag mainapresyahon nga panamyaw gikan sa iya asawa? Sini nga mga inadlaw, madamo ang pag-ipit sa pag-asawahay, kag kon magdugang ang mga pag-ipit, madali nga magsilabo ang kaakig. Ang isa nga mapinasalamaton madali magpasensia kag maabtik magpasaylo kag magpatawad.

Ang mga pamatan-on dapat man nga mangin mahunahunaon sa paghatag sing tinagipusuon nga mga ekspresyon sang pagpasalamat sa ila mga ginikanan. Sa pagkamatuod, ang mga ginikanan indi himpit, apang indi ina rason agod indi ikaw magpasalamat sa kon ano ang ila nahimo sa imo. Ang gugma kag igtalupangod nga ginhatag nila sugod sang ginbun-ag ka indi mabakal. Kon gintudluan nila ikaw sing ihibalo sang Dios, may dugang pa ikaw nga rason sa pagpasalamat.

“Ang mga anak palanublion gikan kay Jehova,” siling sang Salmo 127:⁠3. Gani ang mga ginikanan dapat mangita sing mga kahigayunan nga dayawon ang ila kabataan sa baylo nga akigan sila sa magagmay nga mga butang. (Efeso 6:4) Kag daku gid ang ila pribilehiyo nga mabuligan ang ila mga kabataan sa pagpalambo sing espiritu sang pagkamapasalamaton!​—⁠Ipaanggid ang Hulubaton 29:⁠21.

Magpasalamat sa Dios

Si Jehova nga Dios amo ang Manughatag sang “tagsa ka maayong dulot kag tagsa ka himpit nga regalo.” (Santiago 1:17) Ang importante ilabi na amo ang dulot sang kabuhi, kay ang tanan nga ginapanag-iyahan naton ukon ginaplano mangin walay pulos kon kita mapatay. Ang Kasulatan nagalaygay sa aton nga dumdumon nga “si [Jehova nga Dios] amo ang tuburan sang kabuhi.” (Salmo 36:​5, 7, 9; Binuhatan 17:28) Agod mapalambo ang mapinasalamaton nga tagipusuon sa Dios, dapat naton pamalandungan ang iya maalwan nga mga aman nga nagasakdag sang aton pisikal kag espirituwal nga kabuhi. (Salmo 1:​1-3; 77:​11, 12) Ini nga tagipusuon magapahulag sa aton nga ipakita ang pagpasalamat sa mga pulong kag mga buhat.

Ang pangamuyo isa ka hayag nga paagi sa pagpabutyag sang aton pagpasalamat sa Dios. Si salmista David nagsiling: “Madamo ang nahimo mo, O Jehova nga akon Dios, bisan ang imo makatilingala nga mga buhat kag ang imo hunahuna ayon sa amon; dili sila mapaanggid sa imo. Kon ako magpahayag kag magpamulong nahanungod sa ila, labi pa sila kadamo sa maisipan.” (Salmo 40:5) Kabay nga mapahulag man kita sa sina nga paagi.

Determinado man si David nga ipakita sa Dios ang iya apresasyon paagi sa mga pulong nga ginpamulong niya sa iban. Sia nagsiling: “Magapasalamat ako sa imo, O  Jehova, sa bug-os ko nga tagipusuon; ipahayag ko ang tanan mo nga makatilingala nga binuhatan.” (Salmo 9:1) Ang pagsugid sa iban tuhoy sa Dios, ang pagpabutyag sang aton kaugalingon paagi sa pagpaambit sa ila sang kamatuoran gikan sa iya Pulong, ayhan amo ang labing maayo nga paagi nga mapakita naton sa iya ang aton pagpasalamat. Kag magabulig ini sa aton nga mangin mas mapasalamaton sa iban pa nga bahin sang kabuhi.

“Ang isa nga nagadulot sing pagpasalamat subong halad niya amo ang isa nga nagahimaya sa akon; kag tuhoy sa isa nga nagapahamtang sing matadlong nga dalanon, ipakita ko sa iya ang kaluwasan,” siling ni Jehova. Kabay nga maagom mo ang kalipay bangod sang pagpakita sang imo tinagipusuon nga pagpasalamat sa iya.​—⁠Salmo 50:​23; 100:⁠2.

[Retrato sa pahina 7]

Ang kabuhi isa ka dulot halin sa Dios. Pat-ura nga idugang ang personal nga balatyagon