“Nagpalapit sa Iya ang Daku nga Kadam-an”

1-3. Ano ang natabo sang gindala sang mga ginikanan ang ila mga kabataan kay Jesus, kag ano ang ginapakita sini nga hitabo tuhoy kay Jesus?

NAHIBALUAN ni Jesus nga ang iya kabuhi sa duta malapit na matapos. Pila na lang ka semana ang nabilin sa iya, apang madamo pa sia sing talapuson! Nagbantala sia sadto upod sa iya mga apostoles sa Perea, isa ka rehiyon sa sidlangan sang Suba Jordan. Nagbantala sila sa bagatnan nayon pakadto sa Jerusalem, diin gintambungan ni Jesus ang iya hingapusan nga Paskua kag isa ka talalupangdon nga butang ang natabo.

² Sa tapos makigdiskusyon si Jesus sa pila ka relihioso nga mga lider, may diutay nga kinagula. Gindala sang mga tawo ang ila mga kabataan agod makita sia. Mahimo gid nga lainlain ang edad sang mga kabataan, kay ang tinaga nga gingamit ni Marcos sa pagpatuhoy sa ila amo man ang tinaga nga gingamit niya anay sang ginpatuhuyan niya ang 12 anyos nga bata, samtang ang tinaga nga gingamit ni Lucas sarang mabadbad nga “mga lapsag.” (Lucas 18:15; Marcos 5:41, 42; 10:13) Kinaandan gid man nga kon may yara mga kabataan, masami nga magahod kag daw magamo. Ginsaway sang mga disipulo ni Jesus ang mga ginikanan, ayhan bangod nagdumdom sila nga masako gid ang Agalon kag wala sing tion para sa mga kabataan. Ano ang ginhimo ni Jesus?

³ Sang makita niya ang nagakatabo, naakig sia. Kay sin-o? Sa mga kabataan bala? Sa mga ginikanan bala? Indi​—sa iya mga disipulo gali! Nagsiling sia: “Pabay-i ang mga bata nga magpalapit sa akon; indi sila pagpunggi, kay ang ginharian sang Dios ila sang mga kaangay nila. Sa pagkamatuod nagasiling ako sa inyo, Ang bisan sin-o nga indi magbaton sang ginharian sang Dios subong sang isa ka bata indi gid makasulod sa sini.” Nian “ginhakos,” ni Jesus ang mga kabataan kag ginpakamaayo sila. (Marcos 10:13-16) Ang mga pulong nga gingamit diri ni Marcos nagapahangop nga mapinalanggaon nga ginhakos ni Jesus ang mga kabataan, ayhan suno sa isa ka manugbadbad “ginkugos” pa gani niya ang iban nga mga lapsag. Maathag nga palangga ni Jesus ang mga kabataan. Apang, may matun-an pa kita diri tuhoy sa iya​—madali sia palapitan.

4, 5. (a) Paano naton mapat-od nga si Jesus isa ka tawo nga madali palapitan? (b) Ano nga mga pamangkot ang binagbinagon naton sa sini nga kapitulo?

⁴ Kon si Jesus isa ka tawo nga estrikto, suplado, ukon bugalon, mahimo gid nga indi magpalapit sa iya ang mga bata; kag mahimo man nga indi magpalapit sa iya ang ila mga ginikanan. Samtang ginahanduraw mo ang danyag, indi bala nga makita mo gid ang kalipay sang mga ginikanan samtang ginapakita sining mabuot nga tawo ang iya pagpalangga sa mga kabataan, kag nagasiling nga palangga man sila sang Dios, kag ginapakamaayo niya sila? Sa pagkamatuod, bisan pa nga si Jesus ang may pinakamabug-at nga salabton, sia gihapon ang pinakamadali palapitan nga tawo sadto.

⁵ Sin-o pa ang wala natahap nga magpalapit kay Jesus? Ngaa madali gid sia palapitan? Kag paano naton mailog si Jesus sa sini? Tan-awon naton.

6-8. Sin-o sa masami ang kaupod ni Jesus, kag paano ang iya panimuot sa ila tuhay sa ginpakita sang relihioso nga mga lider?

⁶ Samtang ginabasa mo ang mga rekord sang Ebanghelyo, ayhan makibot ka nga madamo gid nga tawo ang wala natahap sa pagpalapit kay Jesus. Halimbawa, may kaangtanan sa iya, masami naton mabasa ang tuhoy sa “tuman kadamo nga tawo.” “Nagsunod sa iya ang tuman kadamo nga tawo gikan sa Galilea.” “Nagtipon sa iya ang daku nga kadam-an.” “Nagpalapit sa iya ang daku nga kadam-an.” “Naglakbay upod sa iya ang daku nga kadam-an.” (Mateo 4:25; 13:2; 15:30; Lucas 14:25) Huo, pirme si Jesus ginapalibutan sang madamo nga tawo.

⁷ Masami nga ordinaryo ini nga mga tawo, nga matinamayon nga ginatawag sang relihioso nga mga lider nga “mga tawo sang duta.” Ang mga Fariseo kag mga saserdote hayag nga nagsiling: “Ining kadam-an nga wala makahibalo sang Kasuguan ginpakamalaut nga mga tawo.” (Juan 7:49) Ginapamatud-an sang ulihi nga mga sinulatan sang mga rabbi nga matuod ini. Madamo nga relihioso nga mga lider ang nagpakanubo sa sini nga mga tawo, amo nga wala sila nagadungan kaon sa ila, wala sila nagabakal sa ila, ukon wala sila nagapakig-upod sa ila. Sa katunayan, nag-insister ang iban sa ila nga wala sing paglaum nga mabanhaw ang mga tawo nga wala makahibalo sang oral ukon wala masulat nga kasuguan! Pat-od gid nga nagpalayo ang kubos nga mga tawo gikan sa sini nga sahi sang mga lider sa baylo nga mangayo sa ila sing bulig ukon tuytoy. Apang tuhay si Jesus.

⁸ Nagpakig-upod si Jesus sa kinaandan nga mga tawo. Nagkaon sia upod sa ila, gin-ayo niya sila, gintudluan niya sila, kag ginhatagan sila sing paglaum. Walay sapayan sini, realistiko si Jesus, kag nahibaluan niya nga indi pagbatunon sang kalabanan nga tawo ang kahigayunan nga mag-alagad kay Jehova. (Mateo 7:13, 14) Apang, positibo sia sa tagsa ka indibiduwal kag nagalaum sia nga himuon nila kon ano ang husto. Tuhay gid sia sa matig-a sing tagipusuon nga mga saserdote kag mga Fariseo! Apang, makapakibot nga bisan gani ang mga saserdote kag mga Fariseo nagpalapit kay Jesus, kag madamo sa ila ang nagbag-o sang ila mga dalanon kag nagsunod sa iya. (Binuhatan 6:7; 15:5) Ang pila sang mga manggaranon kag mga gamhanan wala man natahap sa pagpalapit kay Jesus.​—Marcos 10:17, 22.

 9. Ngaa wala natahap ang mga babayi sa pagpalapit kay Jesus?

⁹ Wala natahap ang mga babayi sa pagpalapit kay Jesus. Mahimo masami nga nabatyagan nila ang pagpakanubo sa ila sang relihioso nga mga lider. Masami nga indi luyag sang mga rabbi nga tudluan ang mga babayi. Sa katunayan, wala ginatugot sa mga babayi ang magtestigo sa legal nga mga kaso; gintamod sila subong indi masaligan nga mga testigo. May pangamuyo pa gani ang mga rabbi diin ginasambit nila nga nagapasalamat sila sa Dios nga indi sila mga babayi! Apang, ini nga pagtamay wala maeksperiensiahan sang mga babayi kay Jesus. Madamo ang nagpalapit sa iya kag nalangkag nga makatuon sa iya. Halimbawa, mabasa naton nga ang utod ni Lazaro nga si Maria nagpungko sa tiilan sang Ginuo, nga nagapamati sing maayo sa mga ginahambal ni Jesus samtang ang iya naman utod nga si Marta, masako kag nabalaka gid sa pagdigamo. Gindayaw ni Jesus si Maria bangod gin-una niya kon ano ang nagakaigo.​—Lucas 10:39-42.

10. Paano si Jesus tuhay sa relihioso nga mga lider sa pagtratar niya sa mga masakiton?

¹⁰ Ang mga masakiton nagdugok man kay Jesus, bisan pa nga masami sila nga gintratar sang relihioso nga mga lider subong mga sinikway. Ang Mosaiko nga Kasuguan naglakip sing sugo nga ikuarentina ang mga aruon agod indi malatnan ang iban, apang wala gid gintugutan ang walay kaluoy nga pagtratar. (Levitico, kapitulo 13) Apang, sang ulihi ang mga pagsulundan nga ginhimo sang mga rabbi nagsiling nga ang mga aruon makangilil-ad subong sang ipot. Sobra pa gani ang ginhimo sang pila ka relihioso nga mga lider kay ginbato nila ang mga aruon agod indi sila makapalapit! Daw indi mapatihan nga ang mga tawo nga gintratar sing subong sini makapangisog pa sa pagpalapit sa bisan sin-o man nga manunudlo, apang nagpalapit ang mga aruon kay Jesus. Ang isa nakabungat sining bantog nga mga pulong nga nagapakita sing pagtuo: “Ginuo, kon luyag mo gid, matinluan mo ako.” (Lucas 5:12) Binagbinagon naton ang sabat ni Jesus sa sini sa masunod nga kapitulo. Sa karon, bastante na nga isiling nga amo ini ang labing mabakod nga pamatuod nga si Jesus madali palapitan.

11. Ano nga halimbawa ang nagapakita nga ang mga tawo nga ginakonsiensia bangod sang sala nila wala natahap sa pagpalapit kay Jesus, kag ngaa importante ini?

¹¹ Ang mga tawo nga ginakonsiensia bangod sang sala nga nahimo nila wala natahap nga magpalapit kay Jesus. Hunahunaa, halimbawa, ang tion sang si Jesus nagkaon sa balay sang isa ka Fariseo. Nagsulod ang isa ka babayi nga kilala nga makasasala kag nagluhod sa tiilan ni Jesus, nga nagahibi bangod sang sala nga iya nahimo. Nabasa sang iya mga luha ang tiil ni Jesus, kag ginpamala niya ini sang iya buhok. Wala ini maluyagi sang tagbalay nga nag-agda kay Jesus kag ginmulay niya si Jesus kon ngaa nagpasugot sia nga palapitan sini nga babayi, apang mahinuklugon nga ginhatagan ni Jesus sing komendasyon ang babayi bangod sang iya sinsero nga paghinulsol kag ginpasalig sia nga napatawad na ni Jehova ang iya mga sala. (Lucas 7:36-50) Sa karon, ang mga tawo nga ginakonsiensia bangod sang sala nila indi dapat matahap magpalapit sa mga tawo nga makabulig sa ila agod mapasag-uli ang ila kaangtanan sa Dios! Ngaa madali palapitan si Jesus?

12. Ngaa indi makapakibot nga madali palapitan si Jesus?

¹² Dumduma nga nailog gid ni Jesus ang iya hinigugma nga langitnon nga Amay. (Juan 14:9) Ginapahanumdom kita sang Biblia nga si Jehova ‘indi malayo sa tagsa sa aton.’ (Binuhatan 17:27) Ang matutom nga mga alagad ni Jehova kag ang bisan sin-o nga sinsero nga nagatinguha nga makilala kag maalagad sia makapalapit pirme kay Jehova nga amo ang “Manugpamati sang pangamuyo.” (Salmo 65:2) Hunahunaa lamang​—ang labing gamhanan kag importante nga Persona sa uniberso amo man ang pinakamadali gid nga palapitan! Kaangay sang iya Amay, ginahigugma ni Jesus ang mga tawo. Sa masunod nga mga kapitulo, binagbinagon naton ang tuhoy sa mabaskog nga gugma ni Jesus. Apang, madali palapitan si Jesus bangod indi manigar nga ginahigugma niya ang mga tawo. Usisaon naton ang pila sang mga kinaiya ni Jesus nga nagpakita sini nga sahi sang gugma.

13. Paano mailog sang mga ginikanan si Jesus?

¹³ Mahapos nga nasat-uman sang mga tawo nga si Jesus may personal nga interes sa ila. Ginpakita ni Jesus ining personal nga interes bisan pa may iban sia nga ginakabalak-an. Subong sang natun-an na naton, sang gindala sang mga ginikanan ang ila mga kabataan sa iya, madali gihapon palapitan si Jesus bisan masako sia kag may mabug-at nga mga alatipanon. Maayo gid nga halimbawa ang ginhatag niya para sa mga ginikanan! Mabudlay magpadaku sing mga kabataan sa kalibutan karon. Apang, importante gid nga makita sang mga kabataan nga madali palapitan ang ila mga ginikanan. Kon ikaw isa ka ginikanan, nahibaluan mo nga kon kaisa bangod sang kasakuon, daw wala na ikaw sing tiempo para sa imo bata nga amo ang ginakinahanglan niya. Walay sapayan sini, mapasalig mo bala sia nga hatagan mo gid sia sing tiempo sa gilayon nga makalugar ka? Kon pirme mo ginatuman ang imo pangako, mapiaran sang bata nga ang iya pagpailob may padya. Marealisar man niya nga pirme sia makapalapit sa imo kon may problema ukon kinahanglan sia.

14-16. (a) Ngaa ginhimo ni Jesus ang iya una nga milagro, kag ngaa makatilingala gid ini nga buhat? (b) Ano ang ginapakita sang milagro nga ginhimo ni Jesus sa Cana tuhoy sa iya, nga nagahatag sing ano nga leksion para sa mga ginikanan?

¹⁴ Ginpahibalo ni Jesus sa mga tawo nga nagaulikid sia kon may problema sila. Halimbawa, binagbinaga ang una nga milagro nga ginhimo ni Jesus. Nagkadto sia sa isa ka punsion sang kasal sa Cana nga isa ka banwa sa Galilea. Isa ka makahuluya nga problema ang nag-utwas​—naubos ang alak! Ginsugiran si Jesus sang iya iloy nga si Maria kon ano ang natabo. Ano ang ginhimo ni Jesus? Ginsugo niya ang mga alagad nga pun-on sing tubig ang anom ka dalagku nga tadyaw nga bato. Sang ginpatilaw sa manugdumala sang punsion ang sampol sini, abaw, kanamit gid! Isa bala yadto ka pagpanglimbong? Indi, ang tubig “nangin alak.” (Juan 2:1-11) Madugay na nga handum sang mga tawo nga himuon ang isa ka butang nga mangin lain nga butang. Sa sulod sang mga siglo, nagtinguha ang mga tawo nga ginatawag nga alkemiko nga himuon nga bulawan ang tingga. Wala gid sila magmadinalag-on​—bisan pa nga ang matuod, ang tingga kag bulawan magkaanggid nga mga elemento.a Kamusta ang tubig kag alak? Ang mga substansia nga nagahuman sa tubig simple lamang, isa ka kombinasyon sang duha ka sadsaran nga elemento. Samtang, ang alak ginahuman sang halos isa ka libo ka substansia, kag masibod ang madamo nga substansia sini! Ngaa ginhimo ni Jesus ang subong sadto ka makatilingala nga buhat agod masolusyunan ang isa ka gamay nga problema subong sang naubos nga alak sa punsion sang kasal?

¹⁵ Indi gamay ang problema para sa nobya kag nobyo. Sa dumaan nga Natung-an nga Sidlangan, importante gid ang pagpakita sing pagkamaabiabihon sa inagda nga mga bisita. Mahimo gid nga mahuy-an ang nobya kag nobyo kon naubusan sing alak ang punsion sang ila kasal kag indi gid malipatan ining malain nga handumanan sa adlaw sang ila kasal bisan sa pagligad sang mga tinuig. Ang problema isa ka daku nga butang para sa ila, kag amo man kay Jesus. Gani ginhimuan niya ini sing paagi. Nahangpan mo na bala kon ngaa nagapalapit ang mga tawo sa iya kon may problema sila?

¹⁶ Sa liwat, mahimo nga may mapuslanon nga leksion nga makuha diri ang mga ginikanan. Ano kon palapitan ka sang imo bata kag may daku gid sia nga problema? Basi masulay ka nga pakadiutayon ang iya problema. Basi kadlawan mo pa gani ini. Kon ipaanggid sa imo ginalukdo nga mga problema, mahimo nga daw gamay matuod ang problema sang imo bata. Apang, dumduma nga indi ini gamay para sa imo bata! Kon daku ini nga butang sa isa nga imo ginapalangga, indi bala nga dapat amo man ini sa imo? Mangin isa ikaw ka ginikanan nga madali palapitan kon mapaalinton mo sa imo bata nga nagaulikid ka sa iya mga problema.

17. Ano nga halimbawa sang pagkalulo ang ginpakita ni Jesus, kag ngaa ini nga kinaiya isa ka pamatuod sang kalig-on?

¹⁷ Subong sang nabinagbinag naton sa Kapitulo 3, malulo kag mapainubuson si Jesus. (Mateo 11:29) Ang kalulo isa ka matahom nga kinaiya, nga nagapamatuod gid nga ang isa ka tawo mapainubuson. Isa ini sang mga bunga sang balaan nga espiritu sang Dios kag naangot sa diosnon nga kaalam. (Galacia 5:22, 23; Santiago 3:13) Bisan sa idalom sang makapaakig gid nga kahimtangan, ginpunggan ni Jesus ang iya kaugalingon. Ang iya kalulo indi gid isa ka kaluyahon. Ang isa ka iskolar nagsiling tuhoy sa sini nga kinaiya: “Sa likod sang kalulo amo ang kalig-on sang asero.” Sa pagkamatuod, masami nga nagakinahanglan kita sing kalig-on agod mapunggan naton ang aton kaugalingon kag magpakita sing kalulo sa iban. Apang sa bulig ni Jehova, sarang naton mailog si Jesus sa pagpakita sing kalulo kag magabulig ini sa aton nga mangin madali palapitan.

18. Ano nga halimbawa ang nagapakita nga rasonable si Jesus, kag ngaa sa banta mo madali palapitan ang isa ka tawo kon may subong sia sini nga kinaiya?

¹⁸ Rasonable si Jesus. Sang magkadto si Jesus sa Tiro, ginpalapitan sia sang isa ka babayi kay ang iya bata nga babayi “ginsudlan sang demonyo.” Sa tatlo ka magkatuhay nga paagi, ginpakita ni Jesus nga indi sia sugot sa ginapangabay sang babayi. Una, naghipos lang sia; ikaduha, nangatarungan si Jesus kon ngaa indi niya mahimo ang ginapangabay sang babayi; ikatlo, naghatag si Jesus sing isa ka ilustrasyon nga nagpaathag pa sang punto. Apang, ang paagi bala sang pagpakig-angot ni Jesus walay simpatiya kag walay kaluoy? Ginpasat-om bala niya nga mahimo silutan ang babayi bangod nangahas sia nga supakon ang ginasiling sang isa ka dungganon gid nga tawo? Indi, kompiansa gid ining babayi nga wala sing malain nga matabo sa iya. Indi lamang nga nangayo sia sing bulig kundi nag-insister pa gani sia walay sapayan nga maathag gid nga wala sing gana si Jesus nga buligan sia. Nakita ni Jesus ang talalupangdon nga pagtuo nga nagpahulag sa babayi nga mag-insister gid, amo nga gin-ayo niya ang iya anak nga babayi. (Mateo 15:22-28) Sa pagkamatuod, nalangkag gid ang mga tawo sa pagpalapit kay Jesus bangod rasonable sia, handa sia mamati kag magpasugot kon nagakaigo!

19. Paano naton mahibaluan kon bala madali gid kita palapitan?

¹⁹ Luyag hunahunaon sang mga tawo nga madali sila palapitan. Halimbawa, halambalanon gid sang iban nga yara sa palangakuan nga pirme bukas ang ila ganhaan, nga hilway ang ila mga sakop sa pagpalapit sa ila bisan ano nga tion. Apang, may mabaskog nga paandam ang Biblia: “Madamo nga tawo ang magabantala nga may mahigugmaon nga kaayo ang tagsatagsa sa ila, apang sin-o ang makakita sing tawo nga matutom?” (Hulubaton 20:6) Mahapos hambalon nga madali kita palapitan, apang ginailog gid bala naton ini nga bahin sang gugma ni Jesus? Indi ang aton kaugalingon ang makasabat sa sini kundi ang iban. Nagsiling si Pablo: “Ipakita sa tanan nga tawo ang inyo pagkamakatarunganon.” (Filipos 4:5) Dapat mamangkot ang tagsatagsa sa aton: ‘Ano ang masiling sa akon sang iban? Ano ang pagkakilala sa akon?’

20. (a) Ngaa importante nga mangin madali palapitan ang Cristiano nga mga gulang? (b) Ngaa dapat kita mangin rasonable sa butang nga ginapaabot naton sa mga gulang sa kongregasyon?

²⁰ Ang Cristiano nga mga gulang ilabi na nga nagapanikasog nga mangin madali palapitan. Nagatinguha gid sila nga tumanon ang paglaragway nga nasulat sa Isaias 32:1, 2: “Ang tagsa mangin subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga lamgod.” Mahatag lamang sang isa ka gulang ini nga sahi sang pag-amlig, lugpay, kag paumpaw kon padayon sia nga madali palapitan. Matuod, mabudlay ini himuon kon kaisa, kay sa karon nga tion nga mabudlay ang kahimtangan, may mabug-at man nga mga responsibilidad ang mga gulang. Walay sapayan sini, ginatinguhaan gihapon sang mga gulang nga indi gid magpasat-om nga wala sila sing tiempo agod atipanon ang mga kinahanglanon sang mga karnero ni Jehova. (1 Pedro 5:2) Nagatinguha ang iban nga mga katapo sang kongregasyon nga mangin rasonable sa butang nga ginapaabot nila sa sining matutom nga mga lalaki, paagi sa pagpakita sing mapainubuson kag mabinuligon nga panimuot.​—Hebreo 13:17.

21. Paano ang mga ginikanan makapabilin nga madali palapitan sang ila mga kabataan, kag ano ang binagbinagon naton sa masunod nga kapitulo?

²¹ Ginatinguhaan sang mga ginikanan nga yara gid sila kon kinahanglan sila sang ila mga kabataan. Isa ini ka serioso nga butang! Luyag nila nga mahibaluan sang ila mga kabataan nga wala sila sing dapat kahangaw-an kon magtu-ad sila kay Tatay ukon Nanay. Gani, nagatinguha gid ang Cristiano nga mga ginikanan nga mangin malulo kag rasonable, nga indi maabtik sa pagpangakig kon ang bata magtu-ad nga nakasala sia ukon may sayop nga panghunahuna. Samtang mapailubon nga ginatinguhaan sang mga ginikanan nga hanason ang ila mga kabataan, ginatinguhaan gid nila nga huptan nga bukas ang mga linya sang komunikasyon. Sa pagkamatuod, luyag naton tanan magpabilin nga madali palapitan, kaangay ni Jesus. Sa masunod nga kapitulo, binagbinagon naton ang tinagipusuon nga pagkamaluluy-on ni Jesus​—isa sang panguna nga mga kinaiya kon ngaa madali sia palapitan.