San-o Magagahom sa Duta ang Ginharian sang Dios?

Gusto mahibaluan sang pila ka matutom nga sumulunod ni Jesus kon san-o magagahom ang Ginharian sang Dios. Bilang sabat, nagsiling si Jesus nga indi nila mahibaluan ang eksakto nga tion kon san-o ini magagahom sa duta. (Binuhatan 1:6, 7) Pero antes sini, ginsilingan niya sila nga kon makita sang iya mga sumulunod ang pila ka hitabo nga dulungan nga nagakatabo, “mahibaluan [nila] nga malapit na ang Ginharian sang Dios” kag nag-abot na ang tion nga magagahom ini sa kalibutan.—Lucas 21:31.

ANO ANG GINSILING NI JESUS NGA MATABO?

Nagsiling si Jesus: “Magailinaway ang mga pungsod kag subong man ang mga ginharian. May mabaskog nga mga linog, kag sa nagkalainlain nga lugar may kakulang sa pagkaon kag mga balatian.” (Lucas 21:10, 11) Pareho sang mga linya sang finger print, ining dulungan nga mga hitabo indi gid mapanghiwala nga tanda. Kag pareho sa finger print nga nagapakilala sa isa ka tawo, ini nga mga hitabo nga dulungan nga nagakatabo mangin tanda nga “malapit na ang Ginharian sang Dios.” Ini bala nga mga hitabo makita sa bilog nga kalibutan? Binagbinaga ang mga ebidensia.

1. INAWAY

Mga fighter jet, tangke de-guerra, kag mga missile.

Sang 1914, may natabo nga inaway nga wala pa gid anay natabo. Suno sa mga historian, sang 1914 nagbag-o ang kasaysayan kay natabo ang una nga bug-os kalibutan nga inaway. Sa sini nga inaway, gingamit ang madamo nga tangke de-guerra, bomba, machine gun, makahililo nga mga gas, kag iban pa nga makamamatay nga mga armas. Ginsundan ini sang ikaduha nga bug-os kalibutan nga inaway, nga naggamit na sang mga atomic bomb. Sugod sang 1914, wala untat ang mga inaway sa sarisari nga lugar kag minilyon ka tawo ang napatay bangod sini.

2. LINOG

Mga bilding nga naglitik bangod sang linog.

Kada tuig, mga 100 ka mabaskog nga linog ang nagaresulta sa dalagku nga kahalitan, siling sang Britannica Academic. Kag ang United States Geological Survey nagreport nga “base sa rekord (sugod sang 1900), mapaabot naton nga may 16 ka mabaskog katama nga linog nga nagakatabo kada tuig.” Nagapati ang iban nga mas madamo subong ang nareport nga linog kay mas mahapos na ini mahibaluan paagi sa pila ka kagamitan. Pero indi gid mapanghiwala nga ang mabaskog nga mga linog nagresulta sa pag-antos kag kamatayon sang madamo nga tawo.

3. KAKULANG SING PAGKAON

Isa ka graph nga nagapakita nga nagnubo ang kadamuon sang ani.

Ang kakulang sing pagkaon nagakatabo sa bilog nga kalibutan bangod sang inaway, korapsion, pagnubo sang ekonomiya, indi maayo nga pagdumala sa agrikultura, ukon sang indi maayo nga tiempo nga wala mapreparahan. Ang “2018 Year in Review” sang World Food Programme, nagsiling: “Sa bilog nga kalibutan, 821 ka milyon ang ginagutom kag 124 ka milyon sa sini ang wala gid sing makaon.” Malnutrisyon ang isa ka rason sang kamatayon sang 3.1 ka milyon ka kabataan kada tuig. Sa mga bata nga napatay sa bilog nga kalibutan sang 2011, mga 45 porsiento sini ang bangod sa malnutrisyon.

4. BALATIAN KAG EPIDEMIA

Simbulo sang mga biochemical hazard kag bakterya.

Ang publikasyon sang World Health Organization nagsiling: “Madamo nga epidemia ang naglapnag sang ika-21 nga siglo. Nagbalik ang mga balatian sang una pareho sang kolera, makamamatay nga balatian, kag yellow fever. Naggua man ang bag-o nga mga balatian pareho sang SARS, pandemic influenza, MERS, Ebola, kag Zika.” Ang COVID-19 nga pandemic amo ang pinakaulihi. Bisan pa madamo na ang nahibaluan sang mga scientist kag mga doktor parte sa mga balatian, indi gihapon nila mabulong ang tanan nga balatian.

5. BUG-OS KALIBUTAN NGA PAGBANTALA

Ang duta nga may nagalibot nga arrow kag may nakabukas nga Biblia sa tupad sini.

May isa pa ka bahin sang tanda nga ginsugid si Jesus. Nagsiling sia: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” (Mateo 24:14) Madamo sing mabudlay nga problema ang kalibutan subong. Pero bisan amo sina ang sitwasyon, sobra walo ka milyon ka tawo halin sa tanan nga pungsod ang nagabantala sang maayong balita sang Ginharian sang Dios sa 240 ka kadutaan kag sa sobra 1,000 ka lenguahe. Subong lang ini natabo sa kasaysayan sang tawo.

ANO ANG BUOT SILINGON SANG TANDA PARA SA ATON?

Ang mga hitabo nga nagahuman sang tanda nga ginsugid ni Jesus nagakatabo na subong. Ngaa dapat kita mangin interesado sa sini? Bangod si Jesus nagsiling: “Kon makita ninyo nga nagakahanabo ini, mahibaluan ninyo nga malapit na ang Ginharian sang Dios.”—Lucas 21:31.

Si Jesus nga nagapungko sa isa ka trono sa langit bilang Hari, nga nagatan-aw sa paraiso nga duta. — Sa indi madugay, siguraduhon sang Ginharian nga matuman sa duta ang kabubut-on sang Dios

Ang tanda nga ginhatag ni Jesus, pati na ang kronolohiya sa Biblia, nagabulig sa aton nga maintiendihan nga gintukod sang Dios ang iya Ginharian sang 1914.a Sa sina man nga tion, ginpapungko niya ang iya Anak, si Jesucristo, bilang Hari. (Salmo 2:2, 4, 6-9) Malapit na lang maggahom ang Ginharian sang Dios sa duta, kag dulaon sini ang tanan nga gobierno sa duta kag himuon ini nga paraiso nga pagaistaran sang mga tawo sa wala sing katapusan.

Dali na lang gid matuman ang ginsiling sa pangamuyo nga gintudlo ni Jesus: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Ti, ano na ang ginahimo sang Ginharian sugod sang naggahom ini sang 1914? Kag ano ang mapaabot naton kon ang Ginharian magagahom na sing bug-os sa katawhan?

a Para sa dugang nga impormasyon parte sa tuig 1914, tan-awa ang leksion 32 sang libro nga Magkabuhi sing Wala Katapusan! nga ginbalhag sang mga Saksi ni Jehova.