Pagkaluwas Padulong sa Isa ka Matarong nga Bag-ong Kalibutan

“Magakalipay sila sa kabuganaan sang paghidait.”​—⁠SALMO 37:⁠11.

1, 2. (a) Paano ang pagluwas ni Jehova sa aton tion tuhay sa iya mga pagluwas anay sang dumaan nga mga tion? (b) Sa anong sahi sang kalibutan pasudlon ni Jehova ang iya katawhan?

SI Jehova isa ka Dios nga Manluluwas. Sang dumaan nga mga tion, ginluwas niya ang iya katawhan sa madamong okasyon. Yadtong mga pagluwas temporaryo lamang, kay sa bisan diin sadtong mga okasyon indi permanente nga ginhukman ni Jehova ang bug-os nga kalibutan ni Satanas. Apang sa aton adlaw, himuon ni Jehova sa indi madugay ang pinakadaku sa tanan nga pagluwas para sa iya mga alagad. Sini nga tion laglagon niya ang tanan nga agi sang sistema ni Satanas sa bug-os nga duta, kag pasudlon niya ang iya mga alagad sa isa ka permanente, matarong nga bag-ong kalibutan.​—⁠2 Pedro 2:​9; 3:​10-13.

² Si Jehova nagasaad: “Kay sa diutay pa nga tion, kag ang malauton wala na . . . Apang ang mga mahagop magapanubli sang duta, kag magakalipay sila sa kabuganaan sang paghidait.” (Salmo 37:​10, 11) Tubtob san-o? “Ang mga matarong magapanubli sang duta, kag magapuyo sa sini sing dayon.” (Salmo 37:29; Mateo 5:5) Apang, antes ina matabo, maagihan anay sining kalibutan ang labing daku nga tion sang kagamo.

Ang “Dakung Kapipit-an”

3. Paano ginlaragway ni Jesus ang “dakung kapipit-an”?

³ Sang 1914 nagsulod ining kalibutan sa iya “katapusan nga mga adlaw.” (2 Timoteo 3:​1-5, 13) Nakahinguyang na kita sing 83 ka tuig sa sina nga panahon kag nagahilapit na sa katapusan sini nga, subong sang gintagna ni Jesus, ang masunod mahanabo: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Huo, daku pa ini bisan sa Inaway Kalibutanon II, sang mga 50 milyones ang napatay. Daw ano nga makatay-ug-kalibutan nga tion ang madasig nga nagahilapit!

4. Ngaa hukman sang Dios ang “Babilonia nga Daku”?

⁴ Ang “dakung kapipit-an” hinali gid nga magaabot, “sa isa ka oras.” (Bugna 18:10) Ang palatandaan sini amo ang paghukom sang Dios sa tanan butig nga relihion, nga ginatawag sang Pulong sang Dios “Babilonia nga Daku.” (Bugna 17:​1-6, 15) Ang pinakadaku nga bahin sang dumaan nga Babilonia amo ang butig nga relihion. Ang modernong Babilonia kaanggid sa iya dumaan nga katumbas kag nagalaragway sa bug-os kalibutan nga emperyo sang butig nga relihion. Nangin makihilawason sia paagi sa pagkompromiso sa politikal nga mga elemento. Ginasakdag niya ang ila mga inaway kag ginabendisyunan ang mga soldado sa nagakontrahanay nga mga bahin, nga nagaresulta sa pagpinatyanay sang mga tawo nga pareho sing relihion. (Mateo 26:​51, 52; 1 Juan 4:​20, 21) Ginapabay-an niya ang malaut nga mga buhat sang iya mga sumulunod kag ginahingabot ang matuod nga mga Cristiano.​—⁠Bugna 18:​5, 24.

5. Paano magasugod ang “dakung kapipit-an”?

⁵ Ang “dakung kapipit-an” magasugod kon ang politikal nga mga elemento hinali nga magasalakay sa “Babilonia nga Daku.” ‘Dumtan [nila] ang makihilawason nga babayi kag hapayon kag hubuan sia, kag kaunon nila ang iya unod kag sunugon sia sing bug-os sa kalayo.” (Bugna 17:16) Pagkatapos sina, ang iya mga sumalakdag anay “magahibi kag magahaya sa iya.” (Bugna 18:​9-19) Apang madugay na ini ginapaabot sang mga alagad ni Jehova, kag sila magatuaw: “Dayawa ninyo si Jah, . . . kay ginhukman niya ang dakung makihilawason nga babayi nga nagdagta sang duta sang iya pagkamakihilawason, kag gintimalos niya ang dugo sang iya mga ulipon sa iya kamot.”​—⁠Bug 19:​1, 2.

Ginasalakay ang mga Alagad sang Dios

6, 7. Ngaa makasalig ang mga alagad ni Jehova kon salakayon sila sa tion sang “dakung kapipit-an”?

⁶ Sa tapos malaglag ang butig nga relihion, salakayon naman sang politikal nga mga elemento ang mga alagad ni Jehova. Si Satanas, nga “Gog sa duta sang Magog” sa tagna, magasiling: “Magakadto ako sa ila nga nagapahimunong, nga nagapuyo sing malig-on.” Bangod sa hunahuna niya mahapos sila biktimahon, salakayon niya sila paagi sa “daku nga hangaway . . . , subong sang gal-um sa pagtabon sang duta.” (Ezequiel 38:​2, 10-16) Nahibaluan sang katawhan ni Jehova nga ining pagsalakay mapaslawan bangod nagasalig sila kay Jehova.

⁷ Sang ginbatyag ni Paraon kag sang iya kasuldadusan nga nakibon nila ang mga alagad sang Dios sa Dagat nga Mapula, milagruso nga ginluwas ni Jehova ang iya katawhan kag ginlaglag ang kasuldadusan sang Egipto. (Exodo 14:​26-28) Sa tion sang “dakung kapipit-an,” kon sa banta sang mga pungsod nakibon na nila ang katawhan ni Jehova, sia sa liwat milagruso nga magatabang: “Sa amo nga adlaw . . . ang akon kasingkal magasaka sa akon ilong. Kag sa akon kaimon, kag sa kalayo sang akon kasingkal, magapamulong ako.” (Ezequiel 38:​18, 19) Sa amo nga tion malapit na ang talipuspusan sang “dakung kapipit-an”!

8. Anong labaw sa kinaugali nga mga hitabo ang mahanabo antes laglagon ni Jehova ang mga malauton, kag ano ang epekto?

⁸ Sa pila ka tion kon magsugod na ang “dakung kapipit-an,” apang antes anay hukman ni Jehova ang nabilin nga bahin sining kalibutan, mahanabo ang labaw sa kinaugali nga mga hitabo. Talupangda ang mangin epekto sini. “Nian magapahayag ang tanda sang Anak sang tawo [Cristo] sa langit, kag nian magakasubo ang tanan nga tribo sa duta, kag makita nila nga nagakari ang Anak sang tawo sa ibabaw sang mga panganod sa langit nga may gahom kag daku nga himaya.” (Mateo 24:​29, 30) “Kag may mga tanda sa adlaw kag sa bulan kag sa mga bituon, . . . samtang ang mga tawo nagakapunaw sa kahadlok kag sa kalangkag sa magaabot sa napuy-an nga duta.”​—⁠Lucas 21:​25, 26.

“Ang Pagtubos sa Inyo Nagahilapit”

9. Ngaa ang mga alagad ni Jehova ‘makahangad sang ila mga ulo’ kon matabo ang labaw sa kinaugali nga mga hitabo?

⁹ Sa amo nga partikular nga tion, ang tagna sa Lucas 21:​28 naaplikar. Si Jesus nagsiling: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagahilapit.” Ang mga kaaway sang Dios magakurog sa kahadlok bangod mahibaluan nila nga ang labaw sa kinaugali nga mga hitabo naghalin kay Jehova. Apang magakasadya ang mga alagad ni Jehova bangod mahibaluan nila nga ang pagtubos sa ila nagahilapit.

10. Paano ginalaragway sang Pulong sang Dios ang talipuspusan sang “dakung kapipit-an”?

¹⁰ Nian laglagon ni Jehova ang sistema ni Satanas: “Ako magahukom sa iya [Gog], sa kamatay kag sa dugo; kag magapaulan ako sa iya kag sa iya mga guban sing mabunok nga ulan kag dalagku nga mga yelo nga daw bato, sing kalayo kag asupre . . . Kag makilala nila nga ako amo si Jehova.” (Ezequiel 38:​22, 23) Ang tanan nga agi sang sistema ni Satanas malaglag. Ang bug-os nga tawhanon nga katilingban sang nagasikway sa Dios nga katawhan madula. Amo ina ang Armagedon nga talipuspusan sang “dakung kapipit-an.”​—⁠Jeremias 25:​31-33; 2 Tesalonica 1:​6-8; Bugna 16:​14, 16; 19:​11-21.

11. Ngaa luwason ang mga alagad ni Jehova sa “dakung kapipit-an”?

¹¹ Luwason sa “dakung kapipit-an” ang minilyon nga sumilimba ni Jehova sa bug-os nga duta. Sila ang nagahuman sa “dakung kadam-an” nga “gikan sa tanan nga pungsod kag tribo kag katawhan kag hambal.” Ngaa luwason sila sa sinang makapulunaw nga paagi? Bangod nagahalad sila kay Jehova sing “sagrado nga pag-alagad sa adlaw kag gab-i.” Gani maluwas sila sa katapusan sining kalibutan kag pasudlon sa isa ka matarong nga bag-ong kalibutan. (Bugna 7:​9-15) Sa amo, masaksihan nila ang katumanan sang saad ni Jehova: “Maglaum kay Jehova kag bantayi ang iya dalanon, kag sia magapataas sa imo sa pagpanag-iya sang duta. Kon ang mga malauton utdon, makita mo ini.”​—⁠Salmo 37:⁠34.

Ang Bag-ong Kalibutan

12. Ano ang mapaabot sang mga makalampuwas sa Armagedon?

¹² Daw ano ina ka makakulunyag nga tion​—⁠ang pagdula sa kalautan kag ang pagpamanagbanag sang labing mahimayaon nga dag-on sa bug-os nga maragtas sang tawo! (Bugna 20:​1-4) Magapasalamat gid kay Jehova ang mga makalampuwas sa Armagedon nga nakasulod sila sa isa ka matarong, matinlo nga sibilisasyon nga paluntaron sang Dios, isa ka bag-ong kalibutan, sa duta nga himuon nga isa ka paraiso! (Lucas 23:43) Kag indi na gid sila mapatay! (Juan 11:26) Sa pagkamatuod, sugod sa amo nga tion, may yara sila makatilingala, matahom nga paglaum nga mabuhi tubtob nagakabuhi si Jehova!

13. Paano padayunon ni Jesus ang pagpang-ayo nga hilikuton nga ginsugdan niya sa duta?

¹³ Si Jesus, nga gintangdo ni Jehova subong langitnon nga Hari, amo ang magadumala sang milagruso nga mga pagpakamaayo nga maagom sang mga maluwas. Sang yari sa duta, ginpamuklat niya ang bulag nga mga mata ginbuksan ang bungol nga mga dulunggan kag ginpaayo ang “tanan nga sahi sang balatian kag ang tanan nga sahi sang masakit.” (Mateo 9:​35; 15:​30, 31) Sa bag-ong kalibutan, padayunon niya inang dakung hilikuton sa pagpang-ayo apang sa bug-os globo nga kasangkaron. Subong Ahente sang Dios, tumanon niya ang saad: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:4) Indi na kinahanglan ang mga doktor ukon mga sepulturero!​—⁠Isaias 25:​8; 33:⁠24.

14. Paano luwason ang mga alagad ni Jehova nga napatay na?

¹⁴ Luwason man ang tanan nga matutom nga alagad sang Dios nga napatay sang una. Sa bag-ong kalibutan, luwason sila gikan sa paghugakom sang lulubngan. Si Jehova nagagarantiya: “May pagkabanhaw sang mga matarong kag mga dimatarong.” (Binuhatan 24:15) Mahimo gid nga unahon banhawon ang “mga matarong” agod magbulig sa pagpasangkad sang Paraiso. Mangin makawiwili gid para sa mga makalampuwas sa Armagedon nga mamati sa mga eksperiensia sang mga matutom nga napatay sang madugay na nga tion, nga sini nga tion nanumbalik na sa kabuhi!​—⁠Juan 5:​28, 29.

15. Ilaragway ang pila sang mga kahimtangan nga maeksperiensiahan sa bag-ong kalibutan.

¹⁵ Ang tanan nga nagakabuhi sa amo nga tion makaeksperiensia sang ginsiling sang salmista tuhoy kay Jehova: “Ginahumlad mo ang imo kamot kag ginabusog ang handum sang tagsa ka butang nga buhi.” (Salmo 145:16) Wala na sing tiggulutom: Ipasag-uli ang duta sa isa ka balanse nga ekolohiya kag magapatubas sing bugana. (Salmo 72:16) Wala na sing walay puluy-an nga mga tawo: “Magapatindog sila sing mga balay kag puy-an sila,” kag ang tagsa magalingkod sa “idalom sang iya ubas kag sa idalom sang iya higuera, kag wala na sing magapakurog sa ila.” (Isaias 65:​21, 22; Miqueas 4:4) Wala na sing kahadlok: Wala na sing inaway, kasingki, ukon krimen. (Salmo 46:​8, 9; Hulubaton 2:22) “Ang bug-os nga duta nagapahuway, nangin malinong. Naghinugyaw ang katawhan sa pag-amba.”​—⁠Isaias 14:⁠7.

16. Ngaa magaluntad ang pagkamatarong sa bag-ong kalibutan?

¹⁶ Sa bag-ong kalibutan, madula na ang nagapropaganda nga media ni Satanas. Sa baylo, “ang mga pumuluyo sang mapatubason nga duta pat-od nga magatuon sing pagkamatarong.” (Isaias 26:​9; 54:13) Paagi sa mapuslanon nga espirituwal nga instruksion kada tuig, ‘ang duta pat-od nga matugob sang ihibalo ni Jehova subong nga ang mga tubig nagatabon sang dagat.’ (Isaias 11:9) Pasulabihon sang katawhan ang makapalig-on nga mga panghunahuna kag mga buhat. (Filipos 4:8) Handurawa lamang, isa ka bug-os kalibutan nga katilingban sang katawhan nga hilway sa krimen, pagkamaiyaiyahon, pagkahisa​—⁠isa ka internasyonal nga paghiliutod nga nagapalambo tanan sing mga bunga sang espiritu sang Dios. Sa pagkamatuod, bisan sa karon ini nga mga kinaiya ginapalambo sang dakung kadam-an.​—⁠Galacia 5:​22, 23.

Ngaa Naghulat sing Madugay Gid?

17. Ngaa naghulat si Jehova sing madugay gid antes tapuson ang kalautan?

¹⁷ Apang, ngaa naghulat pa si Jehova sing madugay gid sa pagdula sa kalautan kag luwason ang iya katawhan pasulod sa bag-ong kalibutan? Binagbinaga kon ano ang dapat himuon. Labing importante amo ang pagbindikar sa pagkasoberano ni Jehova, ang iya kinamatarong sa paggahom. Paagi sa pagtugot sing bastante nga tion, ginpamatud-an niya nga ang paggahom sang tawo sa guwa sang iya soberanya indi maduhaduhaan nga napaslawan gid. (Jeremias 10:23) Gani may kinamatarong gid karon si Jehova nga islan ang paggahom sang tawo sing paggahom sang iya langitnon nga Ginharian sa idalom ni Cristo.​—⁠Daniel 2:​44; Mateo 6:​9, 10.

18. San-o napanubli sang mga kaliwat ni Abraham ang duta sang Canaan?

¹⁸ Ang natabo sining tanan nga siglo kaanggid sa natabo sang panahon ni Abraham. Ginsugiran ni Jehova si Abraham nga ang iya mga kaliwat magapanubli sa duta sang Canaan​—⁠apang maghulat anay sila sing apat ka gatos ka tuig “kay wala pa mapuno ang kalautan sang mga Amornon.” (Genesis 12:​1-5; 15:​13-16) Mahimo gid nga ang termino nga “mga Amornon” diri (isa ka daku nga tribo) nagatiglawas sa katawhan sang Canaan sa kabilugan. Gani mga apat ka siglo anay ang magalipas antes pasudlon ni Jehova ang iya katawhan sa Canaan. Samtang wala pa ini, gintugutan ni Jehova ang mga pungsod sa Canaan nga palambuon ang ila mga katilingban. Ano ang resulta?

19, 20. Ano nga sahi sang mga katilingban ang ginpalambo sang mga Canaanhon?

¹⁹ Ang Bible Handbook, ni Henry H. Halley, nagasiling nga nakasapo ang mga arkeologo sa Megiddo sing mga kagulub-an sang templo ni Astoret, ang diosa nga asawa ni Baal. Sia nagsulat: “Pila lamang ka tikang gikan sa sining templo amo ang isa ka sementeryo, diin madamo nga tibod ang nasapwan, nga nagaunod sing tul-an sang mga lapsag nga ginhalad sa sining templo . . . Ang mga manalagna ni Baal kag ni Astoret amo ang opisyal nga mga manugpatay sa diutay nga kabataan.” “Ang isa pa ka makasiligni nga buhat amo [ang] gintawag nila nga ‘mga daga para sa pundasyon.’ Kon magtukod sing balay, may bata nga ginadaga, kag ang iya lawas ginasimpon sa dingding.”

²⁰ Si Halley nagkomento: “Ang pagsimba kay Baal, kay Astoret, kag sa iban pa nga mga dios sang Canaan may pinakamagasto gid nga mga seremonya; ang ila mga templo amo ang sentro sang bisyo. . . . Ang mga Canaanhon nagsimba, paagi sa imoral nga pagpatuyang, . . . kag dayon, paagi sa pagpatay sa ila panganay nga mga anak, subong halad sa sini gihapon nga mga dios. Daw subong bala nga, sa dakung kasangkaron, ang duta sang Canaan nangin isa ka sahi sang Sodoma kag Gomorra sa pungsudnon nga kasangkaron. . . . May kinamatarong bala ining makangilil-ad kag mapintas nga sibilisasyon nga magdugay pa? . . . Nagakatingala ang mga arkeologo nga nagkutkot sa kagulub-an sang mga siudad sang Canaan nga wala sila sa gilayon ginlaglag sang Dios.”​—⁠Ipaanggid ang 1 Hari 21:​25, 26.

21. Ano ang pagkaanggid sang kahimtangan sang mga Canaanhon kag sang aton adlaw karon?

²¹ Ang kalautan sang mga Amornon ‘napuno.’ Gani may kinamatarong na karon si Jehova nga laglagon sila. Amo man sa karon. Ang kalibutan karon puno sing kasingki, imoralidad, kag pagtamay sa kasuguan sang Dios. Kag sanglit nagakaigo lamang nga makugmat kita sa makangilil-ad nga paghalad sing mga bata sa dumaan nga Canaan, ano ang masiling sa minilyon ka pamatan-on nga ginahalad sa mga inaway sining kalibutan, nga malain pa sa bisan ano sa Canaan? Sa pagkamatuod, may kinamatarong gid karon si Jehova nga laglagon ining malaut nga sistema.

Paghimo sing Lain Pa nga Butang

22. Ano ang butang nga nahimo bangod sang pagpailob ni Jehova sa aton tion?

²² Ang pagpailob ni Jehova sa sining katapusan nga mga adlaw nagahimo sing lain pa nga butang. Nagahatag sia sing tion nga tipunon kag tudluan ang dakung kadam-an, nga kapin na sa lima ka milyon ang kadamuon. Sa idalom sang pagtuytoy ni Jehova, ginhimo sila nga isa ka mauswagon nga organisasyon. Ginahanas ang mga lalaki, mga babayi, kag mga pamatan-on sa pagtudlo sa iban sing mga kamatuoran sang Biblia. Paagi sa ila mga miting kag mga publikasyon sa Biblia, ginatun-an nila ang mahigugmaon nga mga dalanon sang Dios. (Juan 13:​34, 35; Colosas 3:​14; Hebreo 10:​24, 25) Dugang pa, ginapauswag nila ang kalantip sa konstruksion, electronics, pag-imprinta, kag iban pa nga ikasarang agod sakdagon ang pagbantala sing “maayong balita.” (Mateo 24:14) Mahimo gid nga ining ikasarang sa pagtudlo kag pagpatindog gamiton sing maayo sa bag-ong kalibutan.

23. Ngaa isa ka pribilehiyo nga mangin buhi sa sining tion?

²³ Huo, ginahanda karon ni Jehova ang iya mga alagad sa pagtabok sa “dakung kapipit-an” pasulod sa matarong nga bag-ong kalibutan. Didto indi na sila magapakig-away batok kay Satanas kag sa iya malaut nga kalibutan, wala na sing balatian, kasubo, kag kamatayon. Himuon sang katawhan sang Dios nga may dakung kakunyag kag kasadya ang makalilipay nga hilikuton sa pagtukod sa paraiso, diin ang tagsa ka adlaw mangin “makalilipay gid.” Isa gid ka pribilehiyo nga nagakabuhi kita sa sining putukputukan sang mga dag-on, nga makilala kag nagaalagad kay Jehova, kag sa indi madugay aton ‘ihangad ang aton mga ulo kay ang pagtubos sa aton nagahilapit’!​—⁠Lucas 21:28; Salmo 146:⁠5.

Repaso nga mga Pamangkot

◻ Ano ang “dakung kapipit-an,” kag paano ini magasugod?

◻ Ngaa mapaslawan ang pagsalakay ni Gog sa mga alagad ni Jehova?

◻ Paano matapos ang “dakung kapipit-an”?

◻ Anong dalayawon nga mga benepisyo ang ihatag sang bag-ong kalibutan?

◻ Ngaa naghulat si Jehova sing madugay gid antes laglagon ining sistema?

[Kapsion sa pahina 16]

Ang bug-os nga duta himuon nga isa ka paraiso