Tion sa Pagpabilin nga Nagamata

“Ang maayong balita kinahanglan ibantala anay sa tanan nga kapungsuran. . . . Apang sia nga nagapadayon tubtob sa katapusan maluwas.”​—⁠MARCOS 13:​10, 13.

 1. Ngaa dapat kita magbatas kag magpakaisog?

DAPAT kita magbatas​—⁠sa tunga sang kaliwatan nga dimatinuuhon kag balingag! Sugod sang 1914 ang isa ka kaliwatan sang katawhan nangin malaut, subong gid sang adlaw ni Jesus. Kag ang kalautan karon lapnag sa bug-os nga kalibutan. Sa karon nga “katapusan nga mga adlaw,” ang “makahalanguyos nga mga tion nga mabudlay atubangon” nga ginlaragway ni apostol Pablo nagapaantos sa katawhan. ‘Ang malaut nga mga tawo kag mga malimbong nagalain kag nagalain pa gid.’ Sing maathag, “ang bug-os nga kalibutan yara sa gahom sang isa nga malauton,” si Satanas nga Yawa, nga nagahimo karon sang iya katapusan nga panikasog sa paglaglag sang duta. Apang magpakaisog kamo! Magaabot ang “dakung kapipit-an” nga magadala sing dayon nga paumpaw sa tanan nga nagahigugma sang pagkamatarong.​—⁠2 Timoteo 3:​1-5, 13; 1 Juan 5:19; Bugna 7:⁠14.

 2. Paano natuman ang tagna sang 1914?

² Sing makalilipay, ginpalingkod na karon ni Jehova si Ginuong Jesucristo sa trono sa mga langit, bilang paghanda sa pagdula sang mapiguson nga mga kaaway sang katawhan. (Bugna 11:15) Subong sang sa una nga pagkari sang Mesias, nagakatuman man sa karon nga siglo ang talalupangdon nga tagna nga ginsulat ni Daniel. Sa Daniel 4:​16, 17, 32, ginasugiran kita tuhoy sa temporaryo nga pagpadulog sa may kinamatarong nga pagkahari sa duta sa sulod sang “pito ka panag-on.” Sa daku nga katumanan sini, ining pito ka panag-on nagatumbas sa pito ka Biblikanhon nga tuig nga may 360 ka ‘adlaw’ ang tagsa, ukon 2,520 ka tuig sa kabilugan.a Nagsugod ini sang 607 B.C.E., sang gintasak sang Babilonia ang ginharian sang Israel, tubtob sang 1914 C.E., ang tuig nga si Jesus ginpalingkod sa trono sa langit subong amo ang may kinamatarong nga Hari sang katawhan. Dayon natapos “ang gintalana nga panag-on sang mga pungsod.” (Lucas 21:24) Apang nangindi ang mga pungsod sa pagpasakop sa nagkari nga Mesianikong Ginharian.​—⁠Salmo 2:​1-6, 10-12; 110:​1, 2.

 3, 4. (a) Paano mapaanggid ang mga hitabo sang unang-siglo kag ang sa aton tion karon? (b) Anong may kaangtanan nga mga pakiana ang mahimo ipamangkot?

³ Sang nagahilapit ang ika-70 nga semana sang mga tuig (29-36 C.E.), kag sa liwat sang nagahilapit ang tuig 1914, ginpaabot sang mahinadlukon sa Dios nga katawhan ang pag-abot sang Mesias. Kag nag-abot sia matuod! Apang, sa tagsa sining tion, ang paagi sang iya pag-abot tuhay sa ginpaabot. Sa tagsa man sining tion, pagkatapos sang malip-ot nga panag-on, ang isa ka malaut nga “kaliwatan” ginlaglag suno sa mando sang Dios.​—⁠Mateo 24:⁠34.

⁴ Sa aton nauna nga artikulo, nakita naton kon paano nalaglag ang malaut Judiyong kaliwatan nga nangayo sang dugo ni Jesus. Kon amo, ano pa ang mapaabot sa malaglagon nga kaliwatan sang katawhan nga nagapamatok ukon nagasikway gani sa iya karon? San-o hukman ining dimatinuuhon nga kaliwat?

“Magpabilin nga Nagabantay!”

 5. (a) Sa anong makatarunganon nga rason nga indi naton kinahanglan mahibaluan ang “adlaw kag takna” ni Jehova? (b) Suno kay Marcos, anong maayo nga laygay ang ginhinakop ni Jesus sa iya tagna?

⁵ Sa tapos gintagna ang mga hitabo nga magadul-ong sa isa ka tion sang “dakung kapipit-an,” nagdugang pa si Jesus: “Nahanungod sadtong adlaw kag takna wala sing nakahibalo, bisan pa ang mga anghel sang langit ukon ang Anak, kundi ang Amay lamang.” (Mateo 24:​3-36; Marcos 13:​3-32) Indi naton kinahanglan hibaluon ang sibu nga tion sang mga hitabo. Sa baylo, dapat kita magmabinantayon, ginapalambo ang malig-on nga pagtuo, kag masako sa pag-alagad kay Jehova​—⁠indi sa pagbulubanta sang isa ka petsa. Ginhinakpan ni Jesus ang iya dakung tagna paagi sa pagsiling: “Magpabilin kamo nga nagapanilag, magpabilin kamo nga nagamata, kay wala kamo makahibalo kon san-o ang gintalana nga tion. . . . Magpabilin kamo nga nagabantay . . . Ang ginasiling ko sa inyo ginasiling ko sa tanan, Magpabilin kamo nga nagabantay.” (Marcos 13:​33-37) Nagahukmong ang katalagman sa kadudulman sang kalibutan karon. Dapat kita magpabilin nga nagamata!​—⁠Roma 13:​11-13.

 6. (a) Sa ano dapat iangkla ang aton pagtuo? (b) Paano naton mahimo “isipon ang aton mga adlaw”? (c) Ano ang buot silingon ni Jesus sa “kaliwatan”?

⁶ Indi lamang nga dapat talupangdon naton sing maayo ang inspirado nga mga tagna tuhoy sa katapusan nga mga adlaw sang malaut nga sistema karon kundi dapat man naton iangkla ang aton pagtuo una sa tanan sa hamili nga halad ni Cristo Jesus kag sa matahom nga mga saad sang Dios nga napasad sa sini. (Hebreo 6:​17-19; 9:14; 1 Pedro 1:​18, 19; 2 Pedro 1:​16-19) Sa kalangkag nga makita ang katapusan sining malaut nga sistema, ginbulubanta kon kaisa sang katawhan ni Jehova kon san-o maabot ang “dakung kapipit-an,” ginaangot ini sa kalkulasyon kon daw ano kalawig ang kabuhi sang isa ka kaliwatan halin sang 1914. Apang, ‘nagaagom [kita] sing tagipusuon nga may kaalam,’ indi paagi sa pagbulubanta kon pila ka tuig ukon mga adlaw ang kalawigon sang isa ka kaliwatan, kundi paagi sa paghunahuna kon paano naton ‘ginaisip ang aton mga adlaw’ sa paghatag sing malipayon nga pagdayaw kay Jehova. (Salmo 90:12) Sa baylo nga maghatag sing talaksan sa pagtakus sang tion, ang termino nga “kaliwatan” nga gingamit ni Jesus nagapatuhoy labi na sa magkatubotubo nga katawhan sang isa ka maragtason nga panag-on, upod ang ila nagapakilala nga mga kinaiya.b

 7. Ano ang ginsulat sang isa ka propesor sa history tuhoy sa “kaliwatan sang 1914,” kag ano ang kaangtanan sini sa tagna ni Jesus?

⁷ Nahisanto sa bag-o lang masambit, ang propesor sa history nga si Robert Wohl nagsulat sa iya libro nga The Generation of 1914: “Ang isa ka maragtason nga kaliwatan wala ginatakus sa petsa . . . Indi ini isa ka sona sang mga petsa.” Apang ginpakita niya nga ang Inaway Kalibutanon I nagtuga sing “isa ka indi mapanghiwala nga pagbulag gikan sa nagligad,” kag nagdugang pa sia: “Ang mga nakalampuwas sa inaway indi gid malipat nga ang isa ka kalibutan natapos kag ang isa pa gid nagsugod sang Agosto 1914.” Daw ano ka matuod ina! Ginapatalupangod sini ang sibu gid nga punto. “Ining kaliwatan” sang katawhan sugod sang 1914 nakaeksperiensia sing makakulugmat nga mga pagbag-o. Nasaksihan sini ang duta nga nabulit sang dugo sang minilyon. Ang inaway, pagpapas sa isa ka rasa, terorismo, krimen, kag ang pagkamalinapason nagdabdab sa bug-os nga kalibutan. Ginhugakom sang tiggulutom, balatian, kag imoralidad ang aton globo. Si Jesus nagtagna: “Kamo man, kon makita ninyo [mga disipulo niya] nga nagakahanabo ining mga butang, kilalaha ninyo nga malapit na ang ginharian sang Dios. Sa pagkamatuod nagasiling ako sa inyo, Indi magtaliwan ining kaliwatan tubtob nga ang tanan mahanabo.”​—⁠Lucas 21:​31, 32.

 8. Paano ginapadaku sang mga manalagna ni Jehova ang kinahanglanon nga magpabilin nga nagamata?

⁸ Huo, malapit na ang bug-os nga pagdaug sang Mesianikong Ginharian! Kon amo, may butang bala nga mabenepisyo sa pagpangita sing mga petsa ukon sa pagbulubanta nahanungod sa literal nga kalawigon sang kabuhi sang isa ka “kaliwatan”? Wala gid! Ang Habacuc 2:3 maathag nga nagasiling: “Ang palanan-awon naigo pa sa gintalana nga tion, kag nagadalidali ini sa katapusan, kag indi ini magbutig. Bisan pa magpalantang ini, paabuta ini; kay pat-od nga magaabot ini. Indi ini magpalantang.” Mas malapit na karon ang adlaw sang pagpakighusay ni Jehova.​—⁠Jeremias 25:​31-33; Malaquias 4:⁠1.

 9. Anong mga hitabo kutob sang 1914 ang nagapakita nga malip-ot na ang tion?

⁹ Sang magsugod ang paggahom sang Ginharian ni Cristo sang 1914, gintagbong si Satanas sa duta. Nagkahulugan ini sing “kailo sa duta . . . kay ang Yawa nagpanaug sa inyo sa dakung kasingkal, bangod nahibaluan niya nga malip-ot na lamang ang iya tion.” (Bugna 12:12) Sa pagkamatuod, ina nga tion malip-ot na kon ipaanggid sa linibo ka tuig nga paggahom ni Satanas. Malapit na ang Ginharian, kag amo man ang adlaw kag takna sang paghukom ni Jehova sa sining malaut nga kaliwatan!​—⁠Hulubaton 3:25; 10:​24, 25.

Ang “Kaliwatan” nga Magataliwan

 10. Paano “ining kaliwatan” kaangay sang kaliwatan sang mga adlaw ni Noe?

¹⁰ Usisaon naton sing maayo pa ang ginsiling ni Jesus sa Mateo 24:​34, 35: “Sa pagkamatuod, nagasiling ako sa inyo nga ining kaliwatan indi magtaliwan tubtob nga tanan ining butang matuman. Ang langit kag duta magataliwan, apang ang akon mga pulong indi magtaliwan.” Ang nagasunod nga mga pulong ni Jesus nagapakita nga ‘wala sing nakahibalo sadto nga adlaw kag takna.’ Mas importante pa, ginapakita niya nga dapat naton likawan ang mga siod sa palibot naton sa sining kaliwatan. Sa amo si Jesus nagdugang: “Kay subong sang mga adlaw ni Noe, amo man sa presensia sang Anak sang tawo. Kay subong nila sadto sa wala pa ang anaw, nga nagakaon kag nagainom, ang mga lalaki nagpalangasawa kag ang mga babayi nagpalamana, tubtob sang adlaw nga si Noe nagsulod sa arka; kag wala sila magtalupangod tubtob nga nag-abot ang anaw kag ginlambas sila tanan, amo man sa presensia sang Anak sang tawo.” (Mateo 24:​36-39) Ginpaanggid diri ni Jesus ang kaliwatan sang iya adlaw sa kaliwatan sang adlaw ni Noe.​—⁠Genesis 6:​5, 9; foot­note.

 11. Ano nga pagpaanggid sang ‘mga kaliwatan,’ ang ginhimo ni Jesus subong sang ginreport nanday Mateo kag Lucas?

¹¹ Indi ini ang una nga tion nga ang mga apostoles nakabati kay Jesus nga nagahimo sing pagpaanggid sang ‘mga kaliwatan,’ kay sang pila ka adlaw antes sini nagsiling sia tuhoy sa iya kaugalingon: “Ang Anak sang tawo . . . dapat mag-antos sing madamong butang kag sikwayon sining kaliwatan. Dugang pa, subong nga nahanabo sang mga adlaw ni Noe, mangin amo man sa mga adlaw sang Anak sang tawo.” (Lucas 17:​24-26) Sa amo, ang Mateo kapitulo 24 kag Lucas kapitulo 17 nagahimo sing pareho man nga pagpaanggid. Sang adlaw ni Noe ang “tanan nga unod nga nagdunot sang iya dalanon sa duta” kag ginlaglag sa Anaw amo “ining kaliwatan.” Sang adlaw ni Jesus ang apostata nga Judiyong katawhan nga nagsikway kay Jesus amo “ining kaliwatan.”​—⁠Genesis 6:​11, 12; 7:⁠1.

 12, 13. (a) Ano sa karon “ining kaliwatan” nga magataliwan? (b) Paano ginaatubang sang katawhan ni Jehova karon ining “kaliwatan nga tiko kag balingag”?

¹² Busa, sa katapusan nga katumanan sang tagna ni Jesus karon, mahimo gid nga “ining kaliwatan” nagapatuhoy sa katawhan sang duta nga nakakita sa tanda sang presensia ni Cristo apang napaslawan sa pagbag-o sang ila mga dalanon. Sa kabaliskaran, kita nga mga disipulo ni Jesus nagapangindi nga dihunon sang estilo sang pagkabuhi “sining kaliwatan.” Bisan pa yari kita sa kalibutan, indi kita dapat mangin bahin sini, “kay malapit na ang gintalana nga tion.” (Bugna 1:3; Juan 17:16) Si apostol Pablo nagalaygay sa aton: “Padayon nga himua ninyo ang tanan nga butang nga walay pagkumod ukon pagyamo, agod nga mangin disalawayon kamo kag walay daya, mga anak sang Dios nga walay dagta sa tunga sang kaliwatan nga tiko kag balingag, nga sa tunga nila nagasiga kamo subong nga mga sulu sa kalibutan.”​—⁠Filipos 2:​14, 15; Colosas 3:​5-10; 1 Juan 2:​15-17.

¹³ Ang aton ‘pagsiga subong mga sulu’ nagalakip indi lamang sang pagpasundayag sing isa ka matinlo Cristianong personalidad kundi, labaw sa tanan, sing pagtuman sa matagnaon nga sugo ni Jesus: “Ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Wala sing tawo ang makasiling kon san-o magaabot inang katapusan, apang nahibaluan naton nga ang katapusan “sining kaliwatan” sang malaut nga katawhan magaabot sa tion nga kontento na ang Dios sa panaksi nga nahatag sa “pinakamalayo nga ukbong sang duta.”​—⁠Binuhatan 1:⁠8.

“Sadto nga Adlaw kag Oras”

 14. Anong laygay ang ginhatag ni Jesus kag ni Pablo tuhoy sa “mga tion kag mga panag-on,” kag ano dapat ang aton reaksion?

¹⁴ Kon mahatag na ang tugob-globo nga panaksi tubtob sa kasangkaron nga ginatuyo ni Jehova, mangin amo ini ang iya “adlaw kag takna” sa paglaglag sa sistema sining kalibutan. Indi naton kinahanglan nga hibaluon sing abanse ang petsa. Sa amo, bilang pagsunod sa huwaran ni Jesus, si apostol Pablo naglaygay: “Karon kon nahanungod sa mga tion kag mga panag-on, mga kauturan, indi ninyo kinahanglan nga sulatan sang bisan ano. Kay kamo gid nakahibalo sing sibu nga ang adlaw ni Jehova magaabot subong sang makawat sa kagab-ihon. Sa tion nga magasiling sila: ‘Paghidait kag kalig-unan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila nga mas-a makalikaw.” Talupangda ang ginapatalupangod ni Pablo: ‘Sa tion nga magasiling sila.’ Huo, sa tion nga may yara paghambalanay tuhoy sa “paghidait kag kalig-unan,” sa tion nga wala ini ginapaabot, ang paghukom sang Dios hinali nga magaabot. Daw ano ka nagakaigo ang laygay ni Pablo: “Gani, nian, dili kita magtulog subong sang iban, kundi magpulaw kita kag magmaligdong”!​—⁠1 Tesalonica 5:​1-3, 6; tan-awa man ang bersikulo 7-11; Binuhatan 1:⁠7.

 15, 16. (a) Ngaa indi kita dapat maghunahuna nga ang Armagedon malayo pa sangsa aton ginapatihan? (b) Paano ibindikar ang soberanya ni Jehova sa malapit nga palaabuton?

¹⁵ Nagakahulugan bala ang aton kapin ka sibu nga pagtamod tuhoy sa “sining kaliwatan” nga ang Armagedon malayo pa sangsa ginahunahuna naton? Indi nga mas-a! Bisan pa wala gid naton mahibalui ang “adlaw kag takna,” nahibaluan ini ni Jehova nga Dios halin sang una pa, kag wala sia nagabag-o. (Malaquias 3:⁠6) Sing maathag, ang kalibutan dugang kag dugang pa nga nagalugdang padulong sa kalaglagan. Ang kinahanglanon nga magpabilin nga nagamata mas kinahanglanon gid karon. Ginpahayag sa aton ni Jehova “ang mga butang nga mahanabo sa madali,” kag dapat kita magpauyon sa sini upod ang bug-os nga pagbatyag sing pagkahilingagawon.​—⁠Bugna 1:1; 11:18; 16:​14, 16.

¹⁶ Samtang nagahilapit ang tion, magpabilin kamo nga nagamata, kay malapit na laglagon ni Jehova ang bug-os nga sistema ni Satanas! (Jeremias 25:​29-31) Si Jehova nagasiling: “Pakadakuon ko kag pakabalaanon ko kag ipakilala ko ang akon kaugalingon sa mga mata sang madamo nga mga pungsod; kag makilala nila nga ako amo si Jehova.” (Ezequiel 38:23) Malapit na inang mahukmanon nga “adlaw ni Jehova!”​—⁠Joel 1:15; 2:​1, 2; Amos 5:​18-20; Sofonias 2:​2, 3.

Matarong nga “Bag-ong mga Langit kag Bag-ong Duta”

 17, 18. (a) Suno kay Jesus kag kay Pedro, paano “ining kaliwatan” magataliwan? (b) Ngaa dapat kita magbantay kon tuhoy sa paggawi kag mga buhat sang diosnon nga debosyon?

¹⁷ Tuhoy sa ‘sining tanan nga butang nga mahanabo’ si Jesus nagsiling: “Ang langit kag duta magataliwan, apang ang akon mga pulong indi magtaliwan.” (Mateo 24:​34, 35) Mahimo gid nga ginahunahuna sadto ni Jesus ang “langit kag duta”​—⁠ang mga manuggahom kag mga ginagamhan​—⁠“sining kaliwatan.” Gingamit ni apostol Pedro ang kaanggid man nga mga pulong sa pagpatuhoy sa “mga langit kag duta kag amo karon,” nga “ginatipigan para sa adlaw sang paghukom kag sang kalaglagan sang mga tawo nga didiosnon.” Masunod nga ginalaragway niya kon paano ang “adlaw ni Jehova magaabot subong sang makawat, nga sa amo nga tion ang [panguluhan] nga mga langit magataliwan” upod sa malaut nga katilingban sang tawo, ukon ang “duta,” kag ang malaut nga mga buhat sini. Nian ginalaygay sa aton sang apostol ang “balaan nga mga buhat sang paggawi kag mga binuhatan sang diosnon nga debosyon, [samtang aton] ginahulat kag gindumdom ang pag-abot sang adlaw ni Jehova, nga paagi sa amo ang mga langit nga nagahingalayo matunaw kag ang mainit gid nga mga elemento matunaw!” Ano ang masunod? Ginapatalupangod sa aton ni Pedro ang ‘bag-ong mga langit kag bag-ong duta diin nagapuyo ang pagkamatarong.’​—⁠2 Pedro 3:​7, 10-13.c

¹⁸ Yadtong “bag-ong mga langit,” ang paggahom sang Ginharian ni Cristo Jesus kag sang iya kaupod nga mga hari, magapasagahay sing mga pagpakamaayo sa matarong nga “bag-ong duta” nga katilingban sang katawhan. Isa ka bala ka palaabuton nga katapo sinang katilingban? Kon huo, may rason ikaw sa pagkasadya sa dakung palaabuton!​—⁠Isaias 65:​17-19; Bugna 21:​1-5.

 19. Anong dakung pribilehiyo ang mahimo nga ginatigayon naton sa karon?

¹⁹ Huo, isa ka matarong nga “kaliwatan” sang katawhan ang ginatipon na sa karon. Ang hinaplas nga “matutom kag mainandamon nga ulipon” nagaaman karon sing balaan nga edukasyon nahisuno sa mga pulong sang Salmo 78: 1, 4: “Dungga, O katawhan ko, ang akon kasuguan; ilingig ang inyo igdulungog sa mga pulong sang akon baba . . . , isugid sa palaabuton nga kaliwatan, ang mga pagdayaw kay Jehova kag ang iya kusog kag ang iya makatilingala nga binuhatan nga ginhimo niya.” (Mateo 24: 45-47) Sang Abril 14 sini nga tuig, sa kapin sa 75,500 ka kongregasyon kag sa mga 230 ka kadutaan, kapin sa 12,000,000 ka tawo sa bug-os nga duta ang nagtambong sa Memoryal sang kamatayon ni Cristo. Isa ka bala sa ila? Kabay nga ihatag mo ang imo pagtuo kay Cristo Jesus kag ‘magtawag sa ngalan ni Jehova para sa kaluwasan.’​—⁠Roma 10:​10-13.

 20. Sanglit “ang tion nga nabilin ginpalip-ot,” paano kita magpabilin nga nagamata, kag upod ang anong paglaum sa palaabuton?

²⁰ “Ang tion nga nabilin ginpalip-ot,” siling ni apostol Pablo. Busa, tion na nga magmata kag magmasako sa hilikuton ni Jehova, samtang ginabatas naton ang mga pagtilaw kag pagdumot sang malauton nga kaliwatan sang katawhan. (1 Corinto 7:​29; Mateo 10:​22; 24:​13, 14) Padayon kita nga magbantay, ginapanilagan ang tanan nga butang nga gintagna sa Biblia nga magaabot sa “sining kaliwatan.” (Lucas 21:​31-33) Paagi sa pagpalagyo sa sining mga butang kag paagi sa pagtindog nga may kahamuot sang Dios sa atubangan sang Anak sang tawo, mahimo nga sa ulihi matigayon naton ang padya nga kabuhi nga walay katapusan.

[Mga footnote]

Mga Pamangkot sa Repaso:

◻ Sa tapos nahibaluan ang katumanan sang Daniel 4:​32, paano kita karon “magpabilin nga nagabantay”?

◻ Paano ginapakilala sang mga Ebanghelyo nanday Mateo kag Lucas “ining kaliwatan”?

◻ Samtang ginahulat naton “inang adlaw kag takna,” ano ang aton mapanilagan, kag paano kita dapat maghulag?

◻ Ano ang ginapalig-on sa aton nga himuon sang paglaum sa matarong nga “bag-ong mga langit kag bag-ong duta”?

[Mga retrato sa pahina 17]

Ang nagaantos nga katawhan makasapo sing kaumpawan kon magtaliwan ining masingki kag malaut nga kaliwatan

[Credit Line]

Alexandra Boulat/Sipa Press

[Credit Line]

Wala kag ubos: Luc Delahaye/Sipa Press

[Retrato sa pahina 18]

Ang mahimayaon nga “bag-ong mga langit kag bag-ong duta” yara lang sa unhan para sa tanan nga rasa sang katawhan